عن جمال المنظر اتحدث❤️.. لبيك لاا شريك لك لبيك.. ®

ﻧﺎﺭ ﺍﻟﺒﻌﺪ ﻭ ﺍﻟﻐﺮﺑﺔ
ﺷﻮﻕ ﻷﻫﻠﻲ ﻭ ﺍﻟﺼﺤﺒﺔ
ﺷﻮﻕ ﻟﻜﻞ ﺟﻤﻴﻞ ﻓﻲ ﺍﻟﺤﻲ
ﺷﻮﻕ ﻟﻠﺸﻴﻨﺔ ﻟﻮ ﺻﻌﺒﺔ
ﺑﻴﻦ ﺍﻟﻴﻘﻈﺔ ﻭ ﺍﻻﺣﻼﻡ
ﺑﻴﻦ ﺃﺟﻔﺎﻥ ﺗﻘﻮﻝ ﻟﻠﻨﺎﺱ..❤️

أفضل ما تهبه في حياتك : الاخلاص لمن حولك ، والقدوة الحسنه لطفلك
والإحسان لوالديك ، والإحترام لنفسك ، والمحبة لجميع الناس.. ®

يوميات #علوب ...53 ...ليزا وصلت خط سته ..

مشينا المطار ودعنا دوغلاس وجيمى وناتاليا وقالو انهم رغم هذه المدة القصيرة لكنهم لن ينسوا هذا البلد ..!! وعدنا
ادراجنا انا وليزا وأنور ..!! قلتا لى ليزا انتى هسه حتقعدى براك فى الفندق ..قربت تقول لى ...أجى ياعلوب ..!! ...!! وانتبهت انا لسذاجة السؤال ...(هى فى لندن قاعده براها) ...المهم وصلنا الفندق قلتا ليها خلاص ياليزا انتى ارتاحى ونحن المسا بنجيك نسوقك تفطرى معانا في البيت الليله ...!! قالت ياسلام خبر حلو ...( العاجبنى فى الخواجات ديل مابقهموك..!! والدنيا ايزى ياعزيزي ....) مشيت البيت كلمتا ناس مشاعر والحجه رحبوا ترحيبا عظيما ....مشاعر طبعا انفعلت التقول جايانا الملكة إليزابيث قالت لى ياعلوب لازم نعمل ليها اكل خاص الخواجيه دي ...!! قلتا ليها دى زوله حربيه وهى جايه تجرب ...!! الزلط ده كان لقتو بتاكلوا ...امى قالت لى كيف يعنى الكلام ده ...!! الناس ديل ما أكرموك لما مشيت هناك ..!! قلتا ليها مافى اكرام هناك...!! اى زول بدفع برا ...قالت لى هم بطريقتم ونحن بطريقتنا ...( استوقفنى هذا التعقيب العميق ...) مشيت جبتا سمك ومكرونه وسلطات مع الاكل حقنا .. اها قلتا لى انور امشى جيب ليزا من الفندق ماصدق ..!! جرى جرى ...وأطلت الكونتيسة ....دخلت سلمت على ناس البيت كأنها بتعرفم ... تتبسم..وتتلفت ..!!
ومشاعر كلمت ناس تقوى وصاحباتا يجو عايزه تقشر ليهن بى ليزا ...(يعنى المعنى انتو خليكم فى الفيس بوك ده نحن صداقاتنا خارج الحدود ..!! ) ليزا ذاتا النصيحة جات قااااشره ...!!! وامى تشيل وتعاين ...!! قالت لى ياعلوب ياولدي مالا مسكينه..!! المسمار المغزوز جنب عينا ده شنو ...!!!؟؟ قلتا ليها ده استايل ياحجه ذي الزمام عندنا...!! قالت استايل الشوم والروم ....قلتا ليها لا ديل الإنجليز الروم فى إيطاليا ...اها جات مواعيد الفطور انا ذاتى قعدتا فطرتا معاهم ختينا السمك والحاجات والعصيده فى النص وليزا مركزا مع العصيدة ( كلمتكم من قبيل )...!! أديناها المعلقه وبعد اربعه محاولات انزلاق فاشلة نجحت اخيراً فى السيطره عليها .... (فرحت التقول جابت قون )
قالت ...!! نايس...!! وأت إز زس ....!! قلنا ليها عصيده..!! أكله سودانيه ...!! قالت ....واااو ....اسيدا هلو ....!! (حلو ) امى اتفنقلت من الضحك ...!! قالت عليكم الله شوفو شدتا ....!! وفطوم بس تمشى وتجى تعاين فيها وتديها هبشه
قايلاها بت ام لعاب جبتها ليها ...!! وهى ذاتا اتكيفت منها كل دقيقه تقطع فيها بوسه ...ومشاعر طبعا مجتهده فى الانجليزى تتونس معاها ..!! اها جو داخلات ناس تقوى وصفا وأمنيات ...يعاينن ساكت فى ليزا ...تقوى قالت لى مشاعر عليك الله اسأليها بتعمل شنو لى شعرا ....!! ووصلت اميره لوترى شخصيا سلمت وتتونس مع ليزا عامله فيها بت عمها ....(صفا ) قالت الخواجات ديل غايتو لونم ما بعجبنى ..!! لا ياخ ..!! وهى تتمسح بالكريمات ذي (الفيكس ....)
والحاجه داخله ومارقه تعلق ...!! هسه الخواجيه دى بس براها كدى جات ...!! برى من شدتن ...!! ويشيلن ويقطعن فيها ...قلتا ليهم طبعا ليزا بتفهم عربى بشكل ممتاز ...( وهى يخربا ) قربن يجرن ...!!! قلتا كان يوقفو القطيعة دى شويه
جابو ليها الشاى ..!! امى قالت ليها (شوقر ) كم ....!!!؟ ناس مشاعر ميتان بالضحك ..!! ليزا ذاتا اتكيفت قالت لى يور مام سووو funny ...!! امى قالت لي قالت شنو ..!!؟ قلتا ليها قالت انتى سوووو فنى ...!! قالت لى يفنها بالحجر ...!! قلتا ليها لا funny يعنى ظريفة ...!! قالت ليزا ليزة السرور ....!! امى بتعرف تلاته كلمات بالانجليزى
سكر ( شوقر ) وسنكيو ولاحتى ثانكيو ..وبزابورت للجواز ...!! فضل ليها كرتين (شوقر ) اتحرقت ...!!
اها دخلو بى ليزا جوا يورو فيها الحاجات السودانية ولبَّسوها التوب ...!! ووعدوها بالحنه ...!! (فضل ليها رقيص العروس ...) وانا حاسى بيها دايرا تطير من الفرح ...(واعلم كم يفتقدون مثل هذه الأجواء الاسريه الحميمة ...)
قالت لى ياعلوب انتو فابيولاس ( اها دى غلبنى أفهما ..!! دخلتا جوه طلعتا الدكشنرى فابيولاس ..!!؟ فابيولاس ..!!
قلتا ليهم قالت انتو فابيولاس يعنى قمة الروعة ...!! طوالى مشاعر زغردت ...!!! ليزا نطتت عيونا ..قالت ليها اميييزنغ كان يو ربيتت اقين ...!!! ؟ قلتا ليها لا دى أصلا بتجى مره واحده بس ....مابتنعاد ..!! غايتو ليزا انسجمت فضل ليها تبيت معانا ...ودعوها لحدى خشم الباب ...!! وقالت انتو سعيدين أنكم عايشين فى هذا البلد ...!! امنيات قالت ليها ..تبادلى..!!
وانطلقنا الى الفندق وبكره اخر يوم لى ليزا فى السودان ...!!! عازما راس بى راس ...ياربى افاتحا فى الموضوع!!..

#اشياءبسيطة ..

الاماني الفي سفر قبل الزمن كايسة المواني ..يوم تجيبني عليك بصدق انو مرة الحظ طراني ..

#ﺍﻟﻠﻬﻢ ﺇﻧﻲ ﺃﺳﺄﻟﻚ..
ﺍﻟﻌﻔﻮ ﻭﺍﻟﻌﺎﻓﻴﺔ..
ﻭﺍﻟﻤﻌﺎﻓﺎﺓ ﺍﻟﺪﺍﺋﻤﺔ..
ﻓﻲ ﺍﻟﺪﻳﻦ ﻭﺍﻟﺪﻧﻴﺎ وﺍﻵﺧﺮﺓ.. ™

ﺍﻟﺪﺍﺧﻠﻪ ﺯﻱ ﺍﻭﻝ ﺻﺒﺎﺡ..
ﺍﻟﺰﺍﻫﻴﺔ ﺯﻱ ﺩﻫﺐ ﺍﻟﻤﺤﺲ😘.. ™

ﻳﻘﻮﻝ ﺍﻟﻠﻪ ﻟﻌﺒﺪﻩ : ﻳﺎ ﻋﺒﺪ ، ﺣﺼﻠﺖ ﻋﻠﻰ ﻛﻞ ﺷﺊ ، ﻓﺄﻳﻦ ﻏﻨﺎﻙ ؟ !
ﻓﺎﺗﻚ ﻛﻞ ﺷﺊ ، ﻓﺄﻳﻦ ﻓﻘﺮﻙ ؟ !
ﺃﻋﺬﺗﻚ ﻣﻦ ﺍﻟﻨﺎﺭ ، ﻓﺄﻳﻦ ﺳﻜﻴﻨﺘﻚ ؟ !
ﺃﻇﻔﺮﺗﻚ ﺑﺎﻟﺠﻨﺔ ﻓﺄﻳﻦ ﻧﻌﻴﻤﻚ ؟ !
ﺇﻧﻤﺎ ﺃﻧﺎ ﺳﻜﻨﻚ ﻭ ﻋﻨﺪﻯ ﻣﻘﺮﻙ ﻭ ﺑﻴﻦ ﻳﺪﻯ ﻣﻮﻗﻔﻚ
ﻟﻮ ﻋﻠﻤﺖ ، ﺃﻧﺎ ﺍﻟﻤﻨﺘﻬﻰ .. ﻭ ﻟﻴﺲ ﺩﻭﻥ ﺍﻟﻤﻨﺘﻬﻰ ﺭﺍﺣــــﺔ ..
#مصطفي_محمود.. ™

ﻃﻬّﺮْ ﺟﻨﺎﺑﻚَ ﺑﺎﻷﺫﻛﺎﺭ ﻣﻊ ﻓﻴﻚَ ..
ﻭﺯﻝ ﺑﻬﺎ ﻛﻞ ﻋﻴﺐ ﻛﺎﻣﻦ ﻓﻴﻚَ
ﺍﻟﺬﻛﺮ ﺧﻴﺮ ﺃﻧﻴﺲ ﺗﺴﺘﺮﻳﺢ ﺑﻪ ..
ﻭﻫﻮ ﺍﻟﺬﻱ ﺑﻜﺆﻭﺱ ﺍﻟﺤﺐ ﻳُﺴﻘﻴﻚ.. ™

#مساء_ﺍﻟﺨﻴﺮ.. وتقبل الله.. ™

تقبل الله ❤️.. ®

يوميات #علوب ...53.....عندما ينتصف القمر ..!!

صحى الصيام دخل العضم ..لكن انا داخل فى ضفورى...!!! هسه ليزا دى اقول ليها شنو .....!! ياخ انت شديده لمن بهناك وانا معجب بيك ....!! وذى ردتك كده ...!!! رتك دى شنو كمان انت ياعلوب الخواجات ديل (love ) بس شغل الريده ده هنا ...(والله صحى نحنا ريادين خلاص) والريده سنام الحب ( دى يترجموها كيف )
المهم قلتا ياخ الكلام بجيب الكلام انتا اصلو ماتستعجل ...!!! الله يعدى اليوم ده على خير ...المهم لحدى ماجا الفطور استحميت تلاته مرات واحد جرسه ...!! وأتنين استعدادا للكتاحة الراجيانى دى ...والجزمة اورنيش مرتين ..
جانى انور بعد الفطور ...!! (قاشر كمان قال ليك) ...!! قلتا لى سورى يا ابو النور انت اللليله ماداير اشوفك الا
هسه ولما نجى راجعين ...!! ....قال لى بقعد ساكت ياخ ...!! قلتا ليهو ولا ساكت ولا بتتكلم ...انتا حكم ..!!؟؟ المهم وصلنى الفندق وجات ليزا نازله....!! ماشفتو ليزا الليله ..!! شغل الخواجات الجد جد ...!! قشره من أمها ...والشعر ده مرجعنو لى ورا ..(ضنب حصان ) ..!! فرسه بس ...و والحلق الرقيق ..!! والفستان الأنيق ..!! والريحه تلخم ..!! والجزمة ذى الصابونه ..( عليك الله شوف اللقيتا ياعلوب ).. !! ....الفندق ده كلو يعاين ...!! المهم طلعنا نركب العربية واحد من الجماعة القاعدين قدام الفندق ديل سامعو ليك قال للجنبو .....كريم وادا غشيم ....!!! قلتا ليهو جنس حسادتك دى ياها المؤخرة صرفتك ....خليتو يتلفت ذى الحرامى ..!! )
قلتا لى ابو النور اطلع بينا على (أوزون ) البسمعنى يقول زبون دايم ...وهى مره واحده مع البت اللاقتنى فى محل الاتصالات ديك كان بتتذكروها اها شفتا لى شوية خواجات فى تلك الزيارة اليتيمة لهذا المكان ...قلتا شويه ليزا
تحس بالألفه ...!! المهم وصلنا هناك وأبو النور شتت !!!
انا وليزا وجها لوجه ..!! العاجبنى فى البت دى قوة الشخصية تشيل وتعاين لى جوا عينى ..!! لمن خجلتا ...(اركز ياعلوب) وختت يدينا كده فى خدودا... كل يد فى خد ....!! وقالت لى (ايكانت بلييف وى أر توقزر اقين ان كارتوم ....) ..!! قلتا ليها انا ذاتى ما مصدق ...!!! قالت لى الوووب يو أر ريال مان ...!!! (يعنى حاكون ريال مدريد ...) قلتا ليها شوفى ياليزا اسمحى لى اقول ليك أننى لم أعجب بفتاة كما أعجبت بك ...!!! اتخيلتها تدنقر ....!!! طوالى ردت قالت لى وانا كمان..!! الوب ...!! يو أر دفرانت ...!!! وأنها برضو معجبة بى ....!!! ده كلام شنو ده ....!! هسه نحن خلينا شنو لى باقى القعده دى .....جا (الويتر ) طوالى خامى ليهو اتنين مويه (الكبيرة ) ديك رزعم فى التربيزة ....(القال ليك منو دايرين نستحمى ) استغلا الموقف انى مابقدر اقول ليهو حاجه قدام البت ...!!! بلعتها وسكتا ...!!! لكنها لم تصمت ..!! قالت ليهو شيل المويه دى واحده بتكفي ...!!! ( تحسبو لعب) ...!! هسه الواحد مايقوم يبشر فى البت دى ..!! قلتا ليها تشربى شنو يابت السرور... قالت كابتشينو..!!
قلتا ليهو جيب لينا واحد كابتشينو ...!! وواحد قهوه...!! لى شخصين لو سمحتا ...(ماخلاص لقيت يدى فيهو) ...!!
ليزا قالت لى وهسه انت شغال وين ياعلوب ...( قمنا على الأسئلة المافى محلها ) كده حتقفليها معاى ياليزا.... قربتا اقول ليها فى الامم المتحدة ....!! قلتا ليها انا شغال بزنس حر ...( السودان كلو بزنس حر ولا كضبتا ولا حاجه) وهى لم تطلب التفاصيل ...!!! (ناس ذوق ياخ ...!!! ) قلتا ليها اها انشالله اتبسطتى بس فى السودان ...!!؟ قالت لى انا مااتبسطا ...!!! انا ذهلتا ...!!!!! انتو فعلا ناس مختلفين ...(ناس ...!! فقدتا الخصوصيه ياعلوب) ...قالت لم اشاهد فى حياتى شعبا بهذا اللطف والبهاء ....( دى مابتكون لاقت ناس بله ) ...!!! اها وتانى ....
...قالت لى انتو أنقياء.....!! وده بالنسبة لى ماغريب لانو تاريخكم بقول كده ....!! يشع من اعينكم بريق عجيب لم اره من قبل ...!! ذكاء ممزوج بطيبه ...!!! ولديكم كبرياء محير ...!! ( ياربى كدوس ود جيرانا معانا .!!) والله لما اتصلحتا فى القعده ...!!! ياسلام ..ده كلوو .....!! قالت ماشاهدته فى بيتنا من دفء وحميمية لم تره من قبل ...(اريتك لو شفتى مشاعر وهى فاكا فطوم بالفرشه لانها رمت الموبايل بتاعا ...) قالت لى أمك وديعة ...شى إز سووو كايند ....(ماشافتا لما يكسرو ليها صحن عزيز ) ...!! اها وتانى ...قالت لى ....الوب أنتم رائعين ...واردفت انها كانت تتخيل انا حضارتنا مدفونة تحت الارض لكن يبدو ان مافوق الارض هو الكنز الحقيقى ...هو انتم ..!! ( قلتا ليها براحه مانقوم نبيع بعض ) ...!! قلتا ليها وانا ..!!؟ قالت لى يكفى انك من فتح لي هذا الباب المشرق ....انت علوب الجميل يو أر لايك ا دريييم ...!!
والله لما اديت وشى فوطه ....!! بس داير اقول ليها وانت مدهشة ومكسرانى ...!! جانا ابو مويه ده شايل القهوة
قطع حبل افكارى ...!!! ختاها ومشي

..!! قلتا ليها ياليزا هسه بعد الوصف الوصفتيهو ده ....انت ممكن تعيشى فى السودان ...!! قالت لى ...!! No ...!!! (قالتها هكذا دون تردد) ...!!! صعقتنى الإجابة ....!! وحاولت التماسك ...!! قلتا ليها ليه..!!؟؟؟؟ ...قالت لى ليس تقليلا من شأنكم...!! بالعكس أنتم أفضل منا فى كثير من الأشياء ....!!؟ لكن
يا ( الووب ) الانسان عموما خلق ليتكيف مع بيئة معينة بغض النظر عن هذه البيئة ...!! وضربت لى مثل بالسمكه انها تعيش فى الماء ....وان هذا ليس هو بخيارها ...!! لكنه قدرها ...!! لو خرجت منه لن تعيش ...رغم ان اليابسة قد تكون خيار أوسع ...!!! وأجمل ...!!! وأكثر رحابة ..!! عرفت ليه ياعلوب .....!!!؟؟ ( لم اعرف فقط) ....!! بل ذهلت
لهذا العمق فى التصور والتوصيف ...(يبدو أننى فعلا قد تعرفت على شخص عظيم وكبير ...) الحمد لله ياعلوب ألما قلتا ليها انا بحبك ..!! ..(.غايتو كان تكون عوارة السواد ...!! ) انت لاتحبها ياعلوب ....!!! هى تأثرك ..!! لانها مختلفه..!!! أشبه بزهرة جميله تستنشق عبيرها ...!!! ولكن لاتقطفها ...!!!! أخدت لى سرحه كده ...!! مسكت يدى لمن جاتنى حمى ...!!! قالت لى الووب( غايتو الوب دى بتجنني ) انا فخوره بك وسعيده ...!! وعندى احساس اننا حنلتقى من جديد ...لما شلتا نفس ....قلتا ليها ايوه كده خلى باب الريد متاكى ....!!!! وجلسنا فى (أوزون )حتى انقد ثقبه ....!!! ما أجملك ياليزا .....حتما لنا لقاء..

#اشياءبسيطة ..

#ﺍﻟﻠّﻬُـﻢَّ ﺑِڪَ ﺃَﺻْـﺒَﺤْﻨﺎ..
ﻭَﺑِڪَ ﺃَﻣْﺴَـﻴﻨﺎ،..
ﻭَﺑِڪَ ﻧَﺤْـﻴﺎ..
ﻭَﺑِڪَ ﻧَﻤُـﻮﺕُ..
ﻭَﺇِﻟَـﻴْڪَ ﺍﻟﻨُّـﺸُﻮﺭ.. ™

‏ولنا فيَ الصباح..
حيآة آخرىَ تنبضَ بآلجمآلَ..
صبآح نقيَ وهوآء باآرد ويوم جمَيل..
#اللهم أدِم علينا نعمك..
#صبآح_الخير.. ™

#ﺍﻟﻠّﻬُـﻢَّ اقسم لي من خشيتك..
ما تحول به بيني وبين معصيتك..
ومن طاعتك ما تبلغني به جنتك..
ومن اليقين ما تهون به علي مصائب الدنيا..
#اللهم اجعل آخر قولي في هذه الدنيا
ان لا إله إلا انت وإن محمدا عبدك ورسولك..
#اللهم اني أعوذ بك أن يتخبطني الشيطان عند الموت..
#اللهم احسن خاتمتي يارب العالمين.. ™

#ﺍﻟﻠّﻬُـﻢَّ قرب بين دُعائي والإجابِه.. ™

وقد يأتي احدهم ، خفيفا يطفو بجانبك في كل هذا الغرق
كجذع شجره يصلح للنجاة ...
يارب ما تحرم بيت من الاطفال ..

تقبل الله منا ومنكم..❤️