قولي الكلمة لصمت الليل .. وكوني النجمة..

ليلة 14 رمضان..😍
دا ياهو البقولوا ليو قمر 14.. ®

#صباح_الخير .. ™

مهلا يا رمضان..
ومضي نصف رمضان..
اللهم نسألك عفوا وعافيه تغنينا..
وعتقا من النار ينجينا..
ومقاما في الفردوس ياوينا..
ونظرة لوجهك الكريم ترضينا.. ™

ﺑﻼﺩﻱ ﺃﻧﺎ..
ﺑﻼﺩ ﻧﺎﺳﺎ..
ﻓﻲ ﺃﻭﻝ ﺷﺊ..
ﻣﻮﺍﺭﻳﺜﻬﻢ ﻛﺘﺎﺏ ﺍﻟﻠﻪ.. ™

‏عـليك صـلاةُ الله ما انـهل صــيبٌ..
‏ولامـس ريـحانَ الريــاض القرنفلُ..
‏وآلك والصــحب الكــرام جـميعهم..
‏نجوم الهدى من عنهم الدين ينقلُ..
#ﷺ.. ™

في بلدنا ليهو طعم تاني..
#رمضانا_سوداني.. ™

قال ليها : تتذكري وقت قلت ليك بريدك بالحيل؟!..
قالت ليو : أيّ ..
قال ليها : الحيل راح لكن بريدك لسه ..❤️

(حلتنا)

اولاد الحلة .. وبنوتا
في ضل النيمة المحتوتة
والحلة الوطن الجوانى
ماقايل لو لحظة أفوتا
***
الفرن الفاتح في السهلة
والترزي الكاتلاه المهلة
وياداب نتعلم فى العجلة
والحلة المطامنة بيوتا
***
اكشاك السوق الوسطانى
والناس الكادحة وبتعاني
يادابك تشرب في التاني
والجبنة قصادك مختوتة
****
جالوصنا نجيرو لعيدنا
وبيوتنا تزغرد بجديدنا
ونطرز بالفرحة نشيدنا
دي الحلة الجواي منحوتة
****
الصورة المرقت أحساسي
والنسمة تطايب أنفاسى
قدام البيت جبنا كراسي
والقمرة تعاين مبهوتة
*****
ويوم داك داقين الصيوان
في الناصية قصاد الدكان
عازمنا الصاحب عثمان
ما الليلة سماية البنوتة
#خالد_شقوري... ®

سلامات يا ناس.. 😊 دايرين لينا عدد 2 ادمن لى صفحه في الفيسبوك هدفها عكس الصور والجوانب المشرقه من السودان الشايف في روحو الكفاءه يراسلني.. مشكورين مقدما😊😊.. ®
@Amgedoz

يوميات #علوب ...52 ...الطريق الى ( قندهار ) ...!!

اتصلت ليزا قالت امورنا تمام ..!! وبكره الختام ماشين رحلة عمل ..!! واخيرا تحقق حلم حياتى وحاشوف البركل ..!! (ياربى البت دى اتلحست )....!! تبركلى شنو فى الحر ده ...!!؟ قالت لى انت مابتعرف ياعلوب ( زس إز أبيس اوف هيفين ....) ...!!! الحقو ياناس (البركل ) دخلتو الجنة ...!!! قلتا ليها ماتتعبى بكره انا البركل كلها بجيبا ليك فى الفندق ده ..!! نصهم معانا هنا ...
...تانى قلتا ما ابوظ عليها هذا الاحساس المتدفق ....!! قلتا ليها والله انت الله بريدك ..!! البركل مره واحده ...(المعتمد بتاعا مابكون قاعد فيها) ... يا مانت كريم يارب ....ياسلااااام حظك ياليزا ..!! عليك الله سلمى لى على بعانخى وحتشبسوت ...!!! (الناس ديل قطع شك بعبدو الأصنام ...) ..!! اها بتجو راجعين متين ...!!؟ قالت لى لا فى نفس اليوم ...! لانو بكره (زا اند اوف آور بروقرام ...) ..!! (الف حمد الله علي السلامه ....) اها تمشو وتجو بالسلامه ...!! الله يستر عليكم من (شريان الشمال ) ده ماينقطع بيكم ...!! تجو بالسلامه...!!
قالت لى ناس (دوغلاس ) وبقية القوم حيسافرو بعد بكره ...! وانا حاتفرغ ليك ...!!! ( لما جانى ابو الشهيق ) ....!!! قلتا ليها تمام خلاص عليك الله اعملى حسابك وكلميهم بكره حنفطر فى ( قندهار) ...والله لما صوتا راح .!! قلتا ليها لا لا
ما اسامه بن لادن...! دى شيه ودواجن ...!! ده فطور رمضان فى الهواء الطلق..!!
انتو ركزو على الفطور خلو لينا رمضان ...!!قالت لى اووو يو ميينز (باربكيو) ..!! الله يبركو فيك خنق...!! اقول ليك (قندهار) تقولى لى باربكيو ...!!
باربكيو ده هناك عندكم على ضفاف التيمز ...!!! دى شيه جمر تولع لندن وضواحيها ...!!!
نحنا ناس دوغلاس ديل لازم نكرمم قبل مايسافرو ..!! وهو دوغلاس ده ذاتو شكلو زول عضه بس عامل جضيماتو المنفخات ديل ....!!! بكون مجبور على الحجار الماشين عليها دى ...!! ضحكت ....!! قلتا ليها قندهار الاصلى سيد الاسم ماشغال فى رمضان لكن فى محل يحمل ذات الملامح سامنو على البقعة بتعرفيها .....قالت لى اوكى...(اوكى شنو ..!!؟ بقعه واحده عرفتيها مافى !!!
المهم مشينا عليهم تانى يوم معاى انور بالأمجاد ...!!! قالو ماحيستخدمو العربيه المدنهم ليها فى مشاوير خاصه ( هنا يكمن الفرق ) ....!!! وأنور طبعا اول مره فى حياتو يستضيف وفد سياحى فى الامجاد ...!! مجهز ليهو شريط
قديم بتاع انجليزى (مسهوك ) كده ... ( بكون لقا واقع ....) المهم ركبنا وانطلقنا الى مطعم قندهار ... قلتا ليهم اها
كيف كانت الرحلة الى البركل ..!!!؟ اجمعو بأنها واحده من اروع المشاوير فى حياتهم ....!!!! (البركل ..!؟؟؟) اى
والله ( البركل ) ...قالو اننا شعب صاحب حضارة راسخة ...!! وتاريخ ملهم ...!! وأجدادنا عظماء ...!!! كلمتا انور بالكلام ده طوالى جنب بالامجاد....!!! ووقف ...
وقال كده قبل عليهم وقعد يرورى ...!! أبشروا بالخير... ابشرو بالخير ...الله واكبر ...الله اكبر ...بى قومة نفس كده....انا ذاتى اتخلعتا .... ( ده كمان لما يقوم ما عبيط ) ....والله الجماعة ديل لمن حننونى ...!!! يازول نططو عيونم دى رقدوا رز ....!! دخلو تحت الكراسى واخدو ساتر ..!! قايلنو داير يكتلن ..!!!
(غايتو الدخلتا فيهم من داعش مامرقت ...!!! ) لحدى ماشرحتا ليهم انو هو عبر ليهم عن سعادتو بى كلامم السمح ده عن السودان .....!! حتى يادوب ربك رب الخير هدو شويه ..!!! (قطعتا قلبم يا انور الله يقطع قلبك ...) ..!!! قلتا لى شغل ليهم شريطك (التافه ) ده كان يروقو شويه ....!! طلع فعلا شريط (معتت ) بتاع ناس الأوبرا ديلاك ....جييييك ...جاااك يصرخو .....!! والله ياخوانا (ناتاليا ) دى انسجمت انسجام ..!! فضل ليها تبكى ...!! قالت ده شريط نادر...!! ( تكون دى حقيبة الفن فرع لندن ) ...!! طوالى انور اهداهو ليها ...!! (بكون عايز يتخلص منو )...!!! ادتو خمسمية دولار ...انور زعل...!! قال ليها انا ما اديتو ليك عشان تدينى قروش ... !!! ناتاليا بكت ..!! قالت فعلا انتو جدكم (هرتوقا ) العظيم ...(طلع واحد من الاصنام الزاروها دى ) ...!! الله لاغزا فيك بركه يا جدى (هرتوقا ) ضيعتا علينا الخمسمية دولار ....!!! قلتا لى انور كنّا نشيلا نقول ليها ده بياض (هرتوقا) العظيم .....ضحكنا ضحك ...!! وواصلنا الرحله ..وصلنا قبل الفطور بي شويه....لقينا الدخاخين دى فى السما والناس مرصوصة ..!! وريحة الشية تسطل ..!!!
الجماعه ديل حسو انهم فى كوكب اخر ...جيمى داير ينشق من الفرحه ...!!! وليزا تتابع باندهاش ...!!!
ودوغلاس خلاص (ريالتو ) سالت ..!! (شما ريحة الأكل ) ......وناتاليا تتفحص بعمق ...!!! لو ماخجلت كان طلعت ليها ورقه وقلم سجلت ملاحاظاتا ...!!! وجماعتنا يعجبوك فى اكرام الضيف احتفلو بالجماعة ايما احتفال وأدونا
ركن ناصية .....وسيد المحل شخصيا مشرف ع

لى العملية !!! والشيه نزلت بى بوخا ..!! والشطوط تلهلب ....!!! قالو فى كوارع ...!!! قلتا ليه لا كمان ماقدر ده والله ياكلوها الا يبرطعوا فى محلهم ده ....!!! وجابو العيش السخن داك....!! وقالو كده نزلو ... !! والله ضربو ضرب انا شكيت انهم خواجات ...!!! ودوغلاس عايز يجرب اى حاجه دخل
يدو فى الشطه ..!! لحقنا بى تلاته سفن أب ....!! (ذي الشافع الدخل يدو فى النار ..) .قال ده شنو ..!!!؟ قلتا ليهو شطه..( سبايسي ...) قال انتو شعب يحب المعاناه ....!!! (فى دى صدقتا ) ....!!!
يازووول مبسوطين بسطه باللمه والناس ..! وناتاليا فضل ليها تدخل الطعمية فى شنطتا تشيل وتقلب فيها....!! تكون قايلاها قطع اثريه ..!! ) ولاحظتا ليزا لابسه ليها ذي طرحه كده قلتا ليها انتى دى جبتيها من وين ...قالت لى هم قبل
مايجو بدوهم دورة عن البلد الماشين ليهو عاداته وتقاليدو ....وهى عارفه الدنيا رمضان ولازم تحترم عادات البلد ...!! ( ليكم حق كان استعمرتو العالم ده كلو ..!! جاينو بى فهم ..) .نطا جيمى كمان حبا يشارك ...!! قال وكمان السودان يطبق شاريعا No alcohol ....law... ...ياسلاااام اديتنا معلومه والله ...الصفقه لى جيمى ...!! ياخ ماتنطم تسكت ...!! جارى للكحول انتا ...!! مكملاك من لحم الدنيا ....!! قلتا لي والله من ناحية الخمور ممنوعة ..!! فهى ممنوعة ..!! لكن بأمانه عندنا (عرقى ) تشرب ليك منو كاس ....!! على الحرام ..!! كنتا عرضتا هسه فى نص الدايره دى ....!!! يضحك ساااكت ...مافاهمنى بقول فى شنو ...!! وأبو النور ميت من الضحك ...المهم قضينا ليلة جميله والجماعه اتبسطوا وليزا قالت لى شرفتنى ياعلوب...!! انت فعلا عظيم ...!! الزوله دى شابكنى عظيم عظيم كان عزمتها (سولتير) كان عملت لى تمثال ...!!!
لكنى اكتشفت ان العظمه فى هذا الوجه الجميل للسودان بشكله الصريح ...!!!( سولتير عندهم منو كتير) ...!!
...ناس بتقدر الفن ياخ ....!! حملناهم الى الفندق ووداع حار ...!! الى الجحيم يادوغلاس ...ونتاليا .....!! وفضلت ليزا ...والله لى من ليزا....(اللهم انى صايم ) !!..

#اشياءبسيطة ..

#صباح_الخير.. ™

#اللهم افرح قلوبنا..
واذهب احزاننا..
واغفر ذنوبنا..
واشفِ مرضانا..
وعافِ مبتلانا..
وارحم موتانا يارب العالمين.. ™

ما أعظم أجر النساء في رمضان..
لهن أجر الصيام..
وأجر العمل في المنزل..
وأجر إفطار صائم..
فـاللهم أرحم ضعفهن وأجزهن الجنة.. ™

ﺍﻓﺮﺍﺣﻨﺎ ﺍﻟﺒﻨﻤﺴﺢ ﺑﻴﻬﺎ ﺍﺣﺰﺍﻥ ﺍﻟﺰﻣﻦ .. ™

اللهم يا رحمان الدنيا والآخر ورحيمهما ارحمنا وارحم أمة محمد رحمة كافة تغنينا عن رحمة من سواك

اللهم اغفر لحيينا وميتنا وشاهدنا وغائبنا كبيرنا وصغيرنا

اللهم من احييته منا فاحييه على الإسلام. ومن توفيته منا فتوفاه على الإيمان. اللهم ارحم (محمد) رحمة واسعة وتغمده برحمتك

اللهم ارحمه فوق الارض وتحت الارض ويوم العرض عليك. اللهم قه عذابك يوم تبعث عبادك.

اللهم انزل نورا من نورك عليه

اللهم نور له قبره ووسع مدخله وآنس وحشته

اللهم ارحم غربته

اللهم اجعل قبره روضة من رياض الجنة. لا حفرة من حفر النار

اللهم أغفر له وارحمه واعف عنه واكرم نزله

اللهم ابدله دارا خيرا من داره. واهلا خيرا من اهله وادخله الجنة بغير حساب. برحمتك يا ارحم الراحمين

اللهم انقله من ضيق اللحود ومن مراتع الدود الى جناتك جنات الخلود لا اله الا انت يا حنان يا منان يا بديع السموات والارض تغمده برحمتك يا ارحم الراحمين

اللهم ان كان غير اهلا لوصول رحمتك فرحمتك اهلا لان تسعه

اللهم اطعمه من الجنة واسقه من الجنة واره مكانه من الجنة وقل له أدخل من أي باب تشاء

اللهم انه في ذمتك وحبل جوارك فقه من فتنة القبر وعذاب النار وانت اهل الوفاء والحق فاغفر له وارحمه انك انت الغفور الرحيم

اللهم انه عبدك ابن عبدك يحتاج الى رحمتك وانت غني عن عذابه فارحمه

اللهم وارزقه لذة النظر الى وجهك والشوق الى لقاءك

اللهم ارجع نفسه اليك راضية مرضيه وادخله في جنتك مع عبادك الصالحين

اللهم انت غني ونحن الفقراء فانت غني ونحن الفقراء فانت غني من عذابه فارحمه

اللهم ان كان من المحسنين فزد في حسناته وان كان من المسيئين فتجاوز عن سيئاته اللهم يا جامع الناس الى يوم لا ريب فيه اجمعه بنبينا محمد صلى الله عليه وسلم كما جمعت بين الروح والجسد

اللهم اغفر له حتى لا يبقى من المغفرة شيء

اللهم ارحمه حتى لا يبقى من الرحمة شيء

اللهم ارض عنه حتى لا يبقى من الرضا شيء. اللهم اني اسالك له الدرجات العلى من الجنة آمين. وادخله الجنة آمن. آمين واسالك له خلاصا من النار سالما آمين. وادخله الجنة آمن. اللهم أغفر له وأرحمه وأعف عنه وأكرم نزله ووسع مدخله وغسله بالماء والثلج والبرد ونقه من الخطايا كما ينقى الثوب الأبيض من الدنس، وإرحمنا إذا صرنا إلى ماصار إليه وجازه بالحسنات إحسانا وبالسيئات عفوا وغفرانا وأفتح أبواب السماء لروحه برحمتك ياأرحم الراحمين ربنا لا تؤاخذنا ان نسينا او اخطأنا ربنا ولا تحمل علينا اصرا كما حملته على الذين من قبلنا سبحان ربك رب العزة عما يصفون وسلاما على المرسلين والحمد لله رب العالمين

مساء الورد..

الحاجه دار السلام.. 😍.. ®

الحاجة دار السلام عبد الله أبوزيد والدة الشاعر التجاني حاج موسى وصاحبة أغنية (أمي الله يسلمك) والتي جعلت منها أم لكل سوداني.. مثال للأم الحنونة..
آثرت تربية ابنها الوحيد (التجاني) بعد وفاة والده وعمره لم يتعدَ حينها عامان ونصف.. وعملت على غرس كريم الخصال في ابنها الذي نذرت له شبابها.. ودائمة الوصية له لتحقيق ذلك.. وعبر التجاني عن وصاياها تلك شعراً.. و منها:

ابدأ يومـك بالتحيـة

هـش وابسـم..

واطرد الهـم والأسية

واحـضـن الـنـاس

بي عيون ضاحكة وندية

ياما بالكلمـة الحنينـة

ينفتح ليك ألف بـاب

باب محنة وباب سعادة

باب أحبة وباب صحاب

تقضي يوم كلو فرحـة

لا ملامـة لا اكتئـاب

جرب اغفر للبخونـك

تلقـى أعدائك قـلال

لقمة العيـش النضيفـة

تحلى بي كسب الحلال

تقول الحاجة دار السلام إنها وُلدت بقرية الترعة الخضراء بريفي مدينة الدويم بولاية النيل الأبيض.. وعاشت فترة صباها مع خالتها بحي البوستة بأم درمان.. ولم تكمل تعليمها حيث رفض والدها ذلك كعادة الكثير من الآباء في ذلك الزمان.. لكنها تعلمت إجادة بعض المهن اليدوية مثل صناعة السعف وأعمال الكروشي..

وتضيف أنها سبق لها الزواج قبل والد التجاني كان ثمرة هذا الزواج الأخ الوحيد غير الشقيق للتجاني، ويدعى سليمان..

وتبين الحاجة دار السلام أنها عندما توفي والد التجاني كانت في (عز شبابها).. الأمر الذي دعا رجل من مدينة الدويم للتقدم لخطبتها وكان وقتها التجاني طالباً بالمرحلة الثانوية.. فردت عليه (أنا راجلي التجاني)..

وتقول الحاجة دار السلام أنها عندما تغنى الفنان كمال ترباس بـ (أمي الله يسلمك) تضايقت في بداية الأمر لأن الناس كانوا يلتفون حولي ويتهامسون بأنها دار السلام التي كتب فيها ابنها أغنية، ولكن بمرور الأيام اعتادت على الأمر وهي سعيدة بالأغنية..

يقول الشاعر التجاني حاج موسى إنه كتب قصيدة (جواب للبلد) في السبعينيات، وكان وقتها طالبا بالجامعة.. و(أُمي الله يسلمك) هو جزء من نصها الطويل.. كما غنى الفنان محمود عبد العزيز جزء آخر منها.. ويضيف (أنا سعيد غاية السعادة إذ وفقني الله أن أهدي والدتي الحاجة دار السلام عبد الله هذه الأغنية.. وإن لم أكتب غيرها لقنعت بذلك.. وأنا نفسي شاهدت الأمهات وهن سعيدات بالأغنية..).

واهدي القارئ النص الكامل لهذه القصيدة..
ضُل الضَحى الرامي

وشمس شتوية دفاية

وريحة الُبن لما تفوح في قلاية

وفروة جدي.. صورة جدي..

لمن جيت أمد إيدي:

«جدي!! أديني تعريفة!!»

«بتقرا الحمدو يا المبروك؟!» صورة تنزاح وتتلمَّ

وآه يا يمه والله زمان!!

***

وقُصر القول.. شايل اللوم

ويوماً جابني للبندر:

وحاتك إنت يا الغالية

ولابسني الخجل من راسي لي كرعيا

شايلة وأحوم!!

وها دي الحالة في الخرتوم!!

أهو عايش شقي ومهموم..

وإنت الله يسلمك..

أمي الله يسلمك..

ويديكي لي طول العمر

في الدنيا - يوم - ما يألمك..

أمي يا «دار السلام»

يا حصني لو جار الزمان

ختيتي في قلبي اليقين

يا مطمناني بطمنك

خيرك عليّ بالجد كتير

يا مرضعاني الطيبة بالصبر الجميل

يا منتهى الريد ومبتدا

إن شاء الله.. الله يسلمك

أنا مهما أصفح عن مشاعري

برضو بيخوني الكلام

وقولة «بحبك» ما بتكفي

وكل كلمات الغرام

يا منتهى الريد ومبتدا

إن شاء الله - الله يسلمك

وأشوفك بي خيال حالم

تشاوري وترقص السبحة

ملامح العابد الصايم

تشع فوق جبهتك سمحة

وشيبك يحاكي ضي النور

مزدان يمة في الطرحة

وتبسم ليَّ

أمد إيدي..

يتلاشى الحلم وأصحى

ويتقطر عرق مالح

ويسكن فيني كل الهم

وأشم ريحة ندم جارح

وأرفس زي بخارج الروح

وزي عصفورة منجرحة

فارقت الفضا البارح

وآه يا يمة والله زمان!!.. ®