أشياء بسيطة

خطواتها وهي بتعدي ..
نظراتها فيهم تحدي ..
كلماتها أنا حافظاها عندي ..
شعار وهوية ♡
#سودانية

4.6K viewsAreej Haj, 14:35

بسم الله تاني..
الحاجة دي لي فترة عايز اتكلم فيها والله ومضايقاني جداً جداً.
في واحدة من المظاهرات الصغيرة شهدت بأم عيني ناس بيحاولوا يستفزوا البوليس وبيقولوا ليهم يا * شفع المايقوما* يا *اولاد الحرام* ويا ويا ويا..
طبعاً انا ضد الاستفزاز اساساً وشايف انو دا غلط كبير وبالطريقة دي بدل ما تحاول تضمن العسكري في صفك ح تزيد حقدو عليك وح يحصل ما لا يحمد عقباه، وكذلك انت بتقصيهم تماماً من انو يكون عنده اي دور في الثورة، ومعروف بينا كلنا انو في ناس بيكونوا مجبرين ومهددين انهم يكافحوا الثوار بل زي ما شفنا في فيديو بحري بيتضربوا بالعصايا عشان يلاحقوا الثوار.
لكن دي ما النقطة الانا عايز اتكلم عنها، انا عايز اتكلم في النبزة زاتها او اللي الناس فاكراها نبزة.
شفع المايقوما ديل ياخوانا او اولاد الحرام زي ما بيتم تسميتهم في البلد دي، ديل اكتر فئة مضطهدة ومغلوب على امرها في البلد دي، واكتر فئة مظلومة واكبر الظلم واقع عليها من الشعب اللي هو احنا بالمناسبة يعني، انا اشتغلت في مستشفى من المستشفيات فيها عنبر كامل لاطفال المايقوما، شفت حاجات لو ما شفتها بعيني ما كنت حصدقها، الاظفال ديل بيتم اضطهادهم من قبل الكل ابتداءً من اهلهم الجبناء العملوا عملتهم وما اتحملوا نتيجة طيشهم وما قدروا يواجهوا المجتمع مروراً بالدار المعنية بالاطفال ديل والحكومة البتقطع من دعمهم انتهاءً بالمجتمع البيحكم عليهم بالاقصاء والعار لذنب هم ما عندهم اي دخل فيهو.
اطفال بيجوا الدنيا دي منبوذين بيقاسوا المعاناة والامرين طول عمرهم اللي بالمناسبة برضو يعني ما بتجاوز الاربعة اسابيع لاغلبهم. بيموتوا لاسباب تافهة جداً ومؤلمة جداً ولا كانهم جدادة واتضبحت.
والمحظوظين منهم البيتكتب ليهم عمر بيدخلوا في الدوامة الذكرناها اعلاه، طبعاً من غير ذكر انو الحكومة والدار بياكلوا جزء كبير من التبرعات، وانو الحكومة وقفت انها ترسل الاطفال لقرية SOS العالمية اللي بتجيها funds من برا مباشرةً، لانو الحكومة طلبت انو الدعن يجيها هي وهي اللي تتصرف فيه، ما علينا.
العايز اقولوا انو لو ما نضفنا دواخلنا واتقبلنا الفئات المختلفة واحترمناها وراعينا لضعفها وألمها وما كان عندنا القدرة نفكر ولو شوية قبل ما نحكم ع الناس التانية او نقصيهم زي ما بنعمل دايما فنحن ما بنستحق الثورة.
ثوروا على انفسكم و افكاركم البالية اولاً.
اطفال المايقوما ديل ألطف خلق الله وأكثرهم بؤساً وفي نفس الوقت مليانين حب وحياة بطريقة تخليك تبكي.

البوست دا انا بهديه لملاذ وماهر عيانيني اللي ماتوا في عمر شهر وعانوا ما عانوا في الشهر دا وقدروا يغيروا فيني حاجات كتيرة 💔
لملاذ اللي كانت باصابعها النحيلة بتضم اصبع ايدي وبتخليني احس باعظم احساس في الدنيا
❤

ارحموا من في الارض ياخي يرحمكم من في السماء

" رب كلمة لا تلقي لها بالاً تهوي بك سبعين خريفاً في النار "

4.34K viewsAsoOoOoOoma, 15:05