ان شاء الله علوب اليوم حننزلها بدري عشان حيكون معاها اليوم مقال عشان وعدتكم ..

يوميات #علوب ..31 ....نجمه نجمه الليل نعدو ...

غايتو انا اول مره اعرف السودان ده والسودانيين ديل من جوه كده شديد ايام التعداد السكاني ديك تتذكروها ...!!! مش قالو فى متطوعين كده هم البعدو الناس ...اها انا كنت المتطوعين ديل ...يازول لافين من بيت لى بيت نشيل ونعد وفى كل مره تقابلنى قصة وحكايه تستحق ان تروى حاحكي ليكم تلاته مشاهد ....
المشهد الاول
دقينا ليك الباب ..!! جاتنا مره كده كبيره ..اهلًا حبابكم ..!! انتو منو ..!!؟ قلتا ليها نحن ناس (الإحصاء) اقصد التعداد ياحجه ...!! قالت لى (التاج ) منو ..!! قلتا ليها مالتاج ..!! التعداد ...التعداااد ..!! يعنى العدادين ...هيا اخوانا لاكين أقول ليها شنو ...!! قلتا ليها ...لا ...يعنى نحنا جايين نعدكم ...!! نشوف انتو كم ...!!! والله عاينت لى كدااا... قالت لى خلاص خليتو شغلتكم كووولها ....دايرين تحسبونا كم ..!! حمدت الله انها بس عرفت نحن دايرين شنو ..!! اها ما اشتغلتا بى كلاما الباقى قلتا بسسس نحنا جايين نعدكم ...!! وتعدونا لى شنو ..!!!؟؟ سألت مستفسرة... وهو سؤال منطقى وعلوب حاضر للإجابة...!! نعدكم ياحاجه عشان نعرف عدد السودانيين كم ..!
قالت لى الجوه ولا البره ..!!؟ (صفعتنى بهذا السؤال غير المتوقع ...!! ) قلتا ليها لا ...الجوه بس ...ههههه ( ضحكة كده لتلطيف الأجواء..!! ) والله ولا كشكرت لى بى ابتسامه ...!! اها وبعد ماتعدونا ...!!!؟؟ قلتا ليها ايواااا سؤال وجيه ...!! نعدكم عشان نعرف عددكم ...!! اها وبعد ماعرفتو عددنا ...!!؟ سؤال أجمل ..!! وفى محلو ..طوالى انبريت حسب الدورة الاخدناها (بالمناسبة الدورة كانت مدتها ساعة ونص ...) عشان الحكومة تقدر توفر ليكم الخدمات حسب عددكم ده ..ويكون عندها قاعدة بيانات ...(قاعدة بيانات شنو ياعلوب انتا كمان ....شنو الغباء الانت فيهو ده ..) هى التعداد ماعرفتو ليك ...)غيرت الكلام طوالى قلتا ليها يعنى يكون عندها معلومه انو انتو عددكم كم ..!! والسودان كلو عددو كم ..!! وبى كده الحكومة تكون عارفه هى بتصرف على كم بنى آدم ...!!! والله ياخوانا المره دى سمعت كلامى ده كلو ....!! قالت لى هسه الحكومة دايره تعرف نحن كم ..!! عشان توفر لينا الحاجات ..!! اتكيفتا كيف انها فهمتنى ...!! قلتا ليها أى نعم ....!! قالت قسم المولى قاسى ....والله ووالله ...تانى كان ساكت شفتك لافى بى هنا قسمتا بالله الا أدقك بى يدى دى ...!! امشى تمشى بطنك ..كان عندك شغلا اقضاها ...قال الحيكومه توفر ليكم ..!!! هى وينا الحكومة دى بس فلاحتا فى الشيل واللفحى ...انت مما الله ده خلقك شفت ليك حكومة أدت ...!! يديك المرض اليهرسك ..!! امشى من هنا تمشى من ضلك ...وقول ليهم حاجه (كتيره ) طردتنا ..خلى الحيكومه التجينى هنا انا ذاتى كايساها ....وكوووو رزعت الباب فى وشى ....!!! والله ياجماعة انا بس صبت فينى مطره ....!! طوالى طلعتا ليك كراسى بتاع التعداد الصرفو لينا ...وكتبت من راسى ده ....منزل ١١٩ ..عدد أفراد الاسرة سبعة ...ثلاثة ذكور ...وأربعة أناث ...وعلى القسم مفروض حاجه كتيره دى اكتبها براها أربعة ذكور ...كيفتنى فى حنانى الحاجه دى ....مبروك ياكتيره والله مكانك وزيره .....
مشهد تانى ..!!
ديل مشينا نعدهم لقيناهم بفطرو ...يازول حرام وحليفه وطلاق الا نفطر معاهم ...معاى واحده كده وهى برضو موظفه فى الحكومة ومشرفه على الإحصاء ... قدر ما اعتذرنا وقلنا ليهم نحن شغالين ...قالو نحن حلفنا ..!! معقوله صينية الفطور فى قدامنا وماتفطرو ...الكلام ده ماعيب ..!! والله مانعد ..!! لو مافطرتو ....يازول امام هذا السيل من الإصرار طوالى قعدنا الفطور ...!! ضربنا ليك الفول والبيض والسلطه مع الجماعة ديل..وهم يازول هم فرحانين بينا شديد... هم من النوع داك البحب الضيوف ..!! وجرو جابو بيبسى من الدكان ...!! يازول والشاى دور ...(انا ذاتى نسيت نحنا جايين لى شنو ..!! ) وطلعت الموظفة الجات معاى دى عندهم بيها علاقه كده ...نسابه ولاشنو ماعارف ..المهم دخلت مع النسوان جوه ...وانا هنا مع الرجال ديل ونسه شديده وجبنا سيرة الهلال والمريخ ودخلنا فى نقاش ..ومرات نقاش حاد ...!! وجات القهوة ..!! وانا اخدت لى تكيه فى السرير ... ورشو الحوش ..عندهم مكيف مويه ساااقط شغال ..وريحة البخور ...والله النعسه الدخلتنى مامرقت ..!! خلاااص حيلى بقى ماشايلنى ...الراجل قال لى ياخ ماتاخد ليك تكيه ..اصلو بعد ده ما أظن تقدرو تمشو ..!! قلتا ليهو ليه خير ..!!؟ قال لى (سعديه ) دى الظاهر النسوان مسكوها (تتحنن ) معاهم ..انتو قايلين سعديه دى منو ...سعديه دى الموظفة الجات معاى ....!! سعدية دخلت تتحنن .....!!!!! .. ...طوالى طلعتا كراسى وكتبتا منزل رقم ٣٢٠ ..!! قلتا ليهم عددكم كم انتو ...قال اى حاجه تجى منك كويسه ....قلتا ليهم نقول تسعة .. قالو لى ماكتيره ..!! كمان يدونا عين ...طوالى عملتا ليهم تخفيض ..وكتبتا عدد أفراد الاسرة ....سبعة ...أربعة ذكور وتلاته ن

سوان بمية راجل ...وسعدية دخلت تتحنن ..!!!
مشهد اخير ...
دقيت الباب كده طوالى فتح لى راجل صبوح كده كبير شويه فى السن ..سلم على بحرارة وصوتو هادئ قلتا ليهو نحنا ناس التعداد قال لي ايوه واضح من الشعار ألفي لبستك دى ..قلتا ده تمام ..اها انتو عددكم كم ..!!؟ قال لى معقوله كده فى الباب اتفضل .. ياوهيبه ...(قال لينا وهيبة دى زوجتى ...) كورك ليها تعالى ..ديل إخوانا ناس التعداد ...وهيبة لبست توبا وجات سلمت علينا ..الحقيقة لاحظتا البيت كلو لوحات قلتا ليهو الظاهر بتحب الفنون قال لى انا فنان تشكيلى ودى لوحاتى ..(.الحقيقة لوحات قمة فى الجمال ...) قلتا ليهو ماشاء الله ..حاجه رايعه..!! وماناخد من زمنكم ..!! اها عدد أفراد الاسرة... قال لى اتنين...!! شافنى اندهشتا كده قال لي مالك نحن اتنين انا ووهيبه دى الحقيقة ماعندنا اولاد ربنا ماقسم لينا ...انا شعرتا كده بشوية احراج وهو لاحظ ..!! قال لي ماتتحسس انا ووهيبه دى متزوجين لينا تمنتاشر سنة ...والله على اجمل مايكون واخد ليهو ضحكة كده قال لى بالله مره عظيمه ذي دى مش حرام يشاركوك فى حبها اولاد ...وهيبه قربت تبكى ...وفعلا انا لاحظتا انو نص اللوحات المرسومة دى كانت لى وهيبة
والله انا ذاتى داير ابكى ...ياخ ديل ناس عظيمين ..!! جابو لينا عصير واتونسنا معاهم والراجل اهدانى لوحة وودعناهم بحب ....!! وطوالى طلعتا كراسى وكتبتا منزل ١٢٠ عدد أفراد الاسرة ...لوحتين ..انتو مابعدوكم انتو
ببروزوكم ...
بالله دى أمة يعدوها ..!! ديل ناس يعددو خصالم وبس ....اتذكرتا حاجه (كتيره ...) وياهو داك الكراس خاتيهو فى الدولاب ذكرى عطره من هذه التجربة ..والسودان أغلى وطن ..لابنعد لا ليهو تمن ... وسعديه دخلت تتحنن !! ..

#اشياءبسيطة ..

زايد سُكر انت الليله .. ومن غير سُكر برررضو حلاتڪ ❤ :* ..

مقال اليوم ٣٥

الصلات الطيبة

ﺑﺮﻧﺎﻣﺞ ﺍﻟﺼﻼﺕ ﺍﻟﻄﻴﺒﺔ ﺍﻟﺬﻱ ﺳﻠﻂ ﺍﻟﻀﻮﺀ ﻋﻠﻰ ﻓﺌﺔ ﻭﺷﺮﻳﺤﺔ ﻛﺎﻧﺖ ﻣﻬﻤﺸﺔ ﻣﻦ ﻗﺒﻞ ﺍﻟﻤﺠﺘﻤﻊ ﺍﻟﺴﻮﺩﺍﻧﻲ ﻭﻫﻲ ﺷﺮﻳﺤﺔ ﺫﻭﻱ ﺍﻻﻋﺎﻗﺔ .
ﻧﺎﻝ ﺍﻟﺒﺮﻧﺎﻣﺞ ﺷﻬﺮﺓ ﻭﺍﺳﻌﺔ ﺩﺍﺧﻞ ﻭﺧﺎﺭﺝ ﺍﻟﺴﻮﺩﺍﻥ، ﻭﺣﺎﺯ ﺑﻪ ﺍﻟﺘﻠﻔﺰﻳﻮﻥ ﺍﻟﻘﻮﻣﻲ ﻋﻠﻰ ﺍﻟﻌﺪﻳﺪ ﻣﻦ ﺍﻟﺠﻮﺍﺋﺰ ، ﻓﻀﻼً ﻋﻦ ﺭﺿﺎ ﺍﻟﻤﺸﺎﻫﺪﻳﻦ .
ﻭﺗﺠﺎﻭﺏ ﺃﻫﻞ ﺍﻟﺒﺮ ﻭﺍﻷﺣﺴﺎﻥ ﻣﻊ ﺃﻱ ﻧﺪﺍﺀ ﻳﺘﻮﺟﻪ ﺑﻪ ﺍﻟﺮﺍﺣﻞ ﻣﺤﺠﻮﺏ ﻋﺒﺪﺍﻟﺤﻔﻴﻆ ﻟﺪﻋﻢ ﻭﻣﺴﺎﻋﺪﺓ ﻫﺬﻩ ﺍﻟﻔﺌﺔ ﻣﻦ ﺃﺑﻨﺎﺀ ﻭﺑﻨﺎﺕ ﺍﻟﻤﺠﺘﻤﻊ ﺍﻟﺴﻮﺩﺍﻧﻲ، ﻷﻧﻪ ﻳﻘﺪﻡ ﻛﻞ ﻣﺎ ﻳﺼﻞ ﺇﻟﻴﻪ ﻟﻤﺴﺘﺤﻘﻴﻪ ﺩﻭﻥ ﻭﺳﻴﻂ، ﻭﺿﺮﺏ ﺑﺬﻟﻚ ﺃﻧﻤﻮﺫﺝ ﻓﻲ ﺍﻟﺸﻔﺎﻓﻴﺔ ﻭﺍﻟﻤﺼﺪﺍﻗﻴﻪ ﺍﻟﺘﻲ ﻻ ﻳﺸﻜﻚ ﻓﻴﻬﺎ ﺃﻱ ﺇﻧﺴﺎﻥ .
ﻓﻲ ﺫﻟﻚ ﺍﻟﻮﻗﺖ ﺣﺎﺯ ﺑﺮﻧﺎﻣﺞ ﺍﻟﺼﻼﺕ ﺍﻟﻄﻴﺒﺔ ﻋﻠﻰ ﺍﻟﻤﺮﺗﺒﺔ ﺍﻷﻭﻟﻰ ﻓﻲ ﺑﺮﺍﻣﺞ ﺍﻟﺘﻠﻔﺰﻳﻮﻥ ﺍﻟﺴﻮﺩﺍﻧﻲ ﻣﻦ ﺧﻼﻝ ﺍﺳﺘﻔﺘﺎﺀ ﺗﻢ ﻣﻊ ﺍﻟﻤﺸﺎﻫﺪﻳﻦ .
ﻭﺗﻤﻴﺰ ﺍﻟﺒﺮﻧﺎﻣﺞ ﺑﺎﻟﻤﻘﻄﻮﻋﺔ ﺍﻟﻤﻮﺳﻴﻘﻴﺔ ﺍﻟﺮﺍﺋﻌﺔ ﻭﺍﻟﺨﺎﻟﺪة Master Blaster ﻟﻠﻤﺴﻴﻘﺎﺭ ﺍﻷﻟﻤﺎﻧﻲ ﺍﻟﻌﺎﻟﻤﻲ ﺟﻴﻤس ﻻﺳت .
- ﻣﺜﻞ ﺍﻟﺒﺮﻧﺎﻣﺞ ﺍﻟﺴﻮﺩﺍﻥ ﻓﻲ ﻣﺆﺗﻤﺮ ﺗﺤﺴﻴﻦ ﺍﻹﻋﻼﻡ ﻟﺬﻭﻱ ﺍﻻﻋﺎﻗﺔ ﺑﺘﻮﻧﺲ .
ﻭﺑﻬﺬﻩ ﺍﻟﻤﻨﺎﺳﺒﺔ ﻧﺎﻝ ﺍﻟﺒﺮﻧﺎﻣﺞ ﺟﺎﺋﺰﺓ ﺩﻭﻟﺔ ﺍﻟﻜﻮﻳﺖ ﻭﺗﻢ ﺗﺴﻠﻴﻤﻬﺎ ﻓﻲ ﻫﺬﺍ ﺍﻟﻤﺆﺗﻤﺮ ﺑﺘﻮﻧﺲ ﻭﺑﺬﻟﻚ ﺍﺻﺒﺢ ﺍﻟﺒﺮﻧﺎﻣﺞ ﻋﺎﻟﻤﻲ ﻭﻣﻌﺮﻭﻑ ﻓﻲ ﺍﻛﺜﺮ
ﻣﻦ 52 ﺩﻭﻟﺔ ﺷﺎﺭﻛﺖ ﻓﻲ ﻫﺬﺍ ﺍﻟﻤﺆﺗﻤﺮ . ﻛﺬﻟﻚ ﻣﺜﻞ ﺍﻟﺴﻮﺩﺍﻥ ﻓﻲ ﻣﺆﺗﻤﺮ ﺗﺤﺴﻴﻦ ﺍﻻﻋﻼﻡ ﻓﻲ ﺑﻠﺠﻴﻜﺎ .
ﻭﻳﻌﺘﺒﺮ ﺍﻟﺘﻠﻔﺰﻳﻮﻥ ﺍﻟﺴﻮﺩﺍﻧﻲ ﺍﻭﻝ ﺗﻠﻔﺰﻳﻮﻥ ﻳﻘﺪﻡ ﺑﺮﻧﺎﻣﺞ ﺧﺎﺹ ﺑﺬﻭﻱ ﺍﻻﻋﺎﻗﺔ ﺑﺈﻧﺘﻈﺎﻡ .
ﺍﻧﺘﻘﻞ ﻣﺤﺠﻮﺏ ﻋﺒﺪﺍﻟﺤﻔﻴﻆ ﺍﻟﻰ ﺍﻟﺮﻓﻴﻖ ﺍﻷﻋﻠﻰ ﻓﻲ ﺣﺎﺩﺙ ﺣﺮﻛﺔ ﻭﻫﻮ ﻓﻲ ﻃﺮﻳﻘﻪ ﻻﺩﺍﺀ ﻣﻬﻤﺔ ﻟﺒﺮﻧﺎﻣﺞ ﺍﻟﺼﻼﺕ ﺍﻟﻄﻴﺒﺔ ﻓﻲ .1991 ﻛﺎﻥ ﺍﻧﺴﺎﻥ ﺑﻤﻌﻨﻲ ﺍﻟﻜﻠﻤﺔ ﻓﻘﺪ ﺍﻓﻨﻰ ﻫﺬﺍ ﺍﻟﺮﺟﻞ ﺣﻴﺎﺗﻪ ﻓﻰ ﺧﺪﻣﺔ ﺫﻭﻱ ﺍﻻﻋﺎﻗﺔ ﻭﻳﻜﻔﻲ ﺇﻥ ﺍﻟﺸﻌﺐ ﺍﻟﺴﻮﺩﺍﻧﻲ ﻛﺮﻣــﻪ ﺑﺎﻟﺤـــﺐ ﻭﺍﻹﺣﺘﺮﺍﻡ ﻭﺍﻟﺘﻘﺪﻳﺮ ﻭﺷﻬﺪ ﻟﻪ ﺑﺎﻟﻌﻔﺔ ﻭﺣﺴﻦ ﺍﻟﺨﻠﻖ ﻭﻗﻀﺎﺀ ﺣﻮﺍﺋﺞ ﺍﻷﺧﺮﻳﻦ
.ﺍﻟﻠﻬﻢ ﺍﺭﺣﻤﻪ ﻭﺍﺣﺴﻦ ﺍﻟﻴﻪ ﻭﺍﺳﻜﻨﻪ ﺟﻨﺎﺕ ﺍﻟﻨﻌﻴﻢ ﻣﻊ ﺍﻟﺸﻬﺪﺍﺀ ﻭﺍﻟﺼﺪﻳﻘﻴﻦ .
ﺳﺘﺘﻨﺎﻗﻞ ﺳﻴﺮﺗﻪ ﺍﻻﺟﻴﺎﻝ ﺟﻴﻼ ﺑﻌﺪ ﺟﻴﻞ ﻛﻠﻤﺎ ﺫﻛﺮﺕ ﺍﻳﺎﺩﻱ ﺍﻟﺨﻴﺮ ﻭﺍﻟﺮﺣﻤﺔ ﻓﻲ ﻫﺬﺍ ﺍﻟﺒﻠﺪ ﺍﻟﺬﻱ ﻃﻐﻲ ﻓﻴﻪ ﺍﻟﻔﺎﺳﺪﻳﻦ ﻭﺣﺎﻭﻟﻮﺍ ﻗﺘﻠﻪ ﻭﻟﻜﻨﻪ ﻟﻦ ﻳﻤﻮﺕ ﻭﻓﻲ ﺟﻴﻠﻨﺎ ﺧﺮﺝ ﻣﺌﺎﺕ ﻣﺤﺠﻮﺏ ﻋﺒﺪ ﺍﻟﺤﻔﻴﻆ ﺟﺪﻳﺪ ﺍﻓﺮﺍﺩ ﻣﺒﺎﺩﺭﺍﺕ ﻃﻮﻋﻴﺔ ﻳﺤﺒﻮﻥ ﺍﻟﺨﻴﺮ ﻟﺸﻌﺒﻬﻢ ﻭﻭﻃﻨﻬﻢ ..

#اشياءبسيطة ..

Listen to Master Blaster at Mgd AlDin by Mgd Al-Din #np on #SoundCloud
https://soundcloud.com/mgdaldin/master-blaster-at-mgd-aldin

ﺷﺪﻭﻟﻚ ﺭﻛــﺐ ﻓﻮﻕ ﻣﻬﺮﻙ ﺍﻟﺠﻤـﺎﺡ
ﺿﺮﻏﺎﻡ ﺍﻟﺮﺟﺎﻝ ﺍﻟﻔﺎﺭﺱ ﺍﻟﺠﺤﺠـــﺎﺡ
ﺍﻟﺴـــﻢ ﺍﻟﻨﻘﻮﻉ ﺍﻟﻔﻲ ﺍﻟﺒــــﺪﻥ ﻧﺘﺎﺡ
ﺗﻤﺴﺎﺡ ﺍﻟﺪﻣﻴﺮﻩ ﺍﻟﻤـﺎ ﺑﻘﺘﻠﻮ ﺳــﻼﺡ.. ™

ﺟﻤﺎﻟﻚ ﻓﻲ ﺍﻟﺒﻨﺎﺕ ﻣﻌﺪﻭﻡ
ﺷﺒﻴﻬﻚ ﻣﺎ ﻛﺤﻞ ﻋﻴﻨﻲ
ﺃﻗﺪﻟﻲ ..
ﻭﺳﻜﺘﻲ ﺍﻟﺨﺸﺎﻣﺔ
ﻭﺍﻧﺰﻟﻲ ﻓﻲ ﺍﻟﻌﻮﺍﺫﻝ ﻛﻲ.. ™

للتواصل ..

@mgddin ..

موعدنا اليوم الاربعاء 30 مارس 2016

المكان: سطوح معهد جوته
الزمان: الساعة 7:30 مساء

الدعوة عامة والدخول مجاني
مرحباً بالجميع

#معهد_جوته ..

ﻻ ﺗﻌﺠﺰﻙَ ﺿَﺨﺎﻣﺔُ ﺍﻷﻣُﻨﻴﺎﺕ !
ﻓَـ ﺭُﺑﻤﺎ ﺩﻋﻮﺓٌ ﻭﺍﺣﺪﺓ ﺗَﺮﻓﻌُﻬﺎ ﺇﻟﻰ ﺍﻟﻠّﻪ ﺗﺠﻠﺐُ ﻟﮓ ” ﺍﻟﻤُﺴﺘﺤﻴﻞ..
ﺻﺒــﺎﺣﻜﻢ ﮔﻤـﺎ ﺗﺘﻤﻨـﻮﻥ.. ™

ﻛﻞ ﺑﻴﻮﺕ ﺍﻟﻔﻘﺮﺍ ﺑﻴﻮﺗﻲ.. ™

ﺿﺤﻜﺎﺗﻦ ﺍﻟﻠﺒﻦ ﺍﻟﺤﻠﻴﺐ
ﻭﺍﻟﻘﻤﺮﺓ ﻣﺮﻩ ﻣﺮﻩ ﺑﺘﺸﺒﻬﻦ .. ™

اقلبو الصوره وشوف الإبداع في التصوير..😱😍

ﻃﻔﻮﻟﺘﻨﺎ ﺍﻟﻘﻀﻴﻨﺎﻫﺎ
ﺯﻏﺎﺭﻳﺪ ﻓﺮﺣﺔ ﺷﺎﻗﺔ ﺍﻟﻠﻴﻞ
ﺳﻨﻴﻨﺎ ﺗﻀﻮﻱ ﺑﺎﻵﻣﺎﻝ
ﻭﻛﻞ ﺍﻟﻌﺸﻨﺎ ﺯﺍﻫﻲ ﺟﻤﻴﻞ.. ™

ﺍﻟﺴﻤﺤﺔ ﺑﺖ ﺑﻠﺪﻱ ﺍﻟﺮﺍﻳﻘﻪ ﺳﻮﺩﺍﻧﻴﺔ ﺩﻱ ..❤️

إذا ساءَ حظُك يومًا تبسّم
فلن يُصلِح الحظ طولُ الملَل
تمتّع بيومك و الغيبُ آتٍ
وقد يحملُ الغيبُ بعضَ الأمَل '💕

يوميات #علوب 32.....المحلى داخل عطبرة ....

عندنا جارتنا كده غايتو الله لا وراكم .... منجضه الحله دى نجااااض ..ألم ...ألم ...ألم شديد ...

كدى أولاً بالتبادى النعرفكم عليها....

الإسم / أمونه (لى هسه ماعارفو ده الحقيقى ولا دلع نسوان كبار)

العمر / مما قمنا لقيناها كده (الأعمار بيد الله )

المؤهلات الدراسية. / ( غير معروفه )

الحاله الاجتماعيه / عازبه ... تجيد التعذيب ( القطر فاتا بى سبعة محطات..يعنى الا تركب طياره حتى تحصلو)

المهنة / سواطه بس فى الحله ..!! ونهير ومشاكل ( ...ده كلو قلنا قسمة ونصيب وقدر وسلوكيات نجى... للهوايه.

الهوايه / نسف اى شعور بالفرح وطرشقة اى حاجه جميله ...

المهارات / تجيد الصرصير ...ويمكنها التواجد فى أكثر من مكان فى نفس الوقت ان لم يكن بشخصها فباثارها ( نفس مواصفات الكتاحه )

اها ياها دى امونه ودى سيرتا الذاتيه ...!! عااادى ممكن تشتغل بيها فى (مثلث برمودا ) والنسوان تحت تحت سامنها أمونه الشيطونه ( عاشت الأسامي ) لكن كدى واحده فيهن الله يقدرا وتصرح ...!! عشان هى ذاتا تفهم حاجه ...!!!

اها عندنا جيرانا كده ناس ظرااف عندهم ولدهم نجح وجاب نسبه عاليه فى الشهاده ...برّأنا كده قلنا نعمل ليهو حفله نحتفى بيهو وهو ويلم اصحابو عشان يحتفلو معاهو.. يعنى حفله كده على الضيق فى الحوش ونكلم الجيران القراب.... وكمان قالو حسين الصادق الفنان ده قريبو وحيجى يغنى ...اها البنات الصغار ديل اتجلطن بالأحمر والاخدر من العصر ...وكلنا مشينا نشاركم لانو الناس ديل طيبين جنس طيبه فى الحله دى وأبوهم متوفى وأمهم دى مره لطيفه ومكافحه قعدت ربتم ..!! ووأولادها ديل ماشاء الله كلهم شطار شديد اها كلنا ساهمنا فى الحفله دى ..وده ولدا الكبير جاب ٩٤ ٪ عليكم الله مابستاهل ...!! عندنا قريبنا اهلو مرتاحين جاب ٥٤ ٪ ضابحين تلاته مرات (بالله مش مفروض يضبحو هو ذاتو ) المهم يازول فرحنا للجماعة ديل من جوه قلبنا ده والله الود ده رفع راسنا وراس الحله دى كلها...!!

اها المغرب كده الناس دى اتلملمت ..وجبنا الساوند ...وحسين جا ...صدقو..!! انا كنتا قايلا اشاعه فعلا هو طلع قريبم ...!! والأمور تمام والجكس نزل فى الساحه (سشوارى وسشوارك ) والقشرة طن ...اهاااا بس فى نص الأجواء الساحرة دى ظهرت الساحرة الجد جد (امونه الشيطونه) اممممك... انا عرفتا الموضوع ده مابعدى .....!! اول مادخلت قبل ماتبارك ...!! فرت ليك خشما ده ...وليييه مابتورونا من بدرى ...!!( الله لاغزا فيك بركه يعنى الحاله هم وروك...!! دايره كمان من بدرى ...ياانجيلا ميركل ...) قالو ليها والله ذاتا الحفله دى عاملنها اولاد الحله ديل ونحن ذاتنا ضيوف ...!! غايتو بلعتا وسكتت ...!! والعيون حمر تقول سكرانه ...تعضعض فى سنونا ..!! والنسوان ديل كلهن اضايرن لانو لو لحقت لما شتبكت مع واحده فيهن ...طوااالى ريختر بجيب ميزانو يجى يقيس درجة الزلزال الحيحصل ...!! المهم عاينت كداااا وقت مالقت ليها حاجه ...قالت هو وينو حسين الصادق ده النشوفو ساكت كدى ..الود ده قالو غناااى ...(انت مالك ومال حسين ...حسين دفعتك ..) زووول علق مافى ...اي زول عامل كونترول ...!! غايتو سكتت كده والناس اترصت للحفلة وحسين جا ...والحفلة بدت والغنا دور ..!! والتلاته نيسانات نزلن ..والناس ابتهجت وكلهم فرحانين للود ده ....!! بس امونه طبعا عدوة الفرح وقاهرة الجمال بتكون سرحت واتخيل ليها انو ليه دى ماكانت حفلة عرسا ...والحالة هنا بتزيد ..انا غايتو عاينتا ليها كدااا عرفت انو ساعة الصفر قربت ...!! المهم فى اللحظه دى خشي (جبوره ) كابوى الحله ...اها جبوره ده ...مما نحنا شفع الزول ده بسكر ...!! عديييل كده ولا داسيها..!! السكر الواااحد ده ...يشهد الله لا قوانين سبتمبر وقفتو ...ولا الديمقراطيه التالته ..ولا الجماعة ديل ...!! غايتو الجلد الانجلدو يكفى سبعه مدارس بقى عااادى بنجلد ..!! ومرات بياخد مقدم ..!! غير المرات الضايرناهو فيها ..والحال فى حالو الحكومة ذاتا يئست منو ..!! مره وقع فى الشارع ودوهو اولاد الحله المستشفى ...الدكتور قال ليهو كبدتك دى اتهردت لو شربتا تانى حتموت ...!!! اتخيلو الرد على الدكتور شنو ...عليك الله يادكتور جازف لينا فيها قزازة بس ..!!! اها ده ياهو (جبوره .) .مزروع فى الحله دى لا أهل لا بيت ..!! الحله دى كلها بيتو ...اهم ميزه فيهو انو أطيب زول بالنهار مسكييين وفى حالو ..واى مرسال بقضى ..!! وحتى لما يسكر (ليلا ) اصلو ولا بسأل زول ولا بغلط مع زول ..سكرو ذاتو مميز ...عندو حاجه واااحده بس كان ركز فيك بيقعد يبكى ...!! يقول ليك بتذكرني المرحوم ...(المرحوم منو ..!! لى هسه مافى زول عارفو ..) مره لاقى أمونه دى ذاتا وبكى.. قال ليها بتذكرينى المرحوم.. ...(فلقتو بى حجر ....) اها ده جبوره ...والله بى سكرو ده ناس الحله بقدروهو كده ومابغلطوا معاهو... بس نفسهم جبوره ده يخلى القصة دى .

..!! اها جبوره جا خاشى الحفله وسط تصفيق كل الحضور ...والشفع ديل فضل ليهم يطيرو من الفرح ..لانو عندو رقصه كده وااااحده لمده دقيقتين برقصا ويمشي ينوم ...!!! اها ده جبوره ...هسا الكلام ده فيهو حاجه ...اها امونه وقت مالقت ليها سبب ..وحاجه تعملا ...فجاءة فقعتا ليك صرخه وقَعَدت تبكى ..!! والحفلة وقفت.. !! والجو اتكهرب..!! والناس اتلمو فيها فى شنو يا امونه خير خير ...اتخيلو قالت مالا ...قالت ما استحملت المنظر انو جبوره الراجل الكبير ده يسكر ويتبهدل كده ....!! عليكم الله دى ما مره متسببه ...!! هو جبوره بسكر مما انتى فاتك القطر الاول ....جيتى تبكى الليله ...ده ماجبوره ذاتو الفلقتى ....!! المهم الجو تنشن..!! والناس أتوترت (ياها الكايساها ) غايتو بس بى نية الناس ديل اختها قدرت عليها ساقتا... والحفلة دورت تانى ...وحسين خشى فى عصير القصب ..وعزينا ولدنا ...بتصدقو تانى يوم جبوره عرف انو كان سبب فى الحصل ومن اليوم داك وقف الشراب ...جبوره عندو علاقه خاصه مع أهل المحتفى بيهو ديل اى مرسال بقضى ليهم.. اخر مطره ماخلى ليهو تراب ماردم بيهو حيطتم ... جبوره تاب ..حظظظك ياجبوره شربتا ليك طن تمر ...ان شاءالله تخش (بشق تمره ) ..شاحد الكريم ...اها جبوره تاب ..البتوب لينا عاصفة الصحراء دى شنو...دى ماعندها حل غير القطر ..!! والقطر الشالك انتا يتكسر حته حته ...!!صحى يا امونه !!..

#اشياءبسيطة ..