ضحكة بتملى الدنيا عليّا..
وفرحة على الأحزان تتبوبر..💜

يوميات #علوب ..171
الفيس ( عوك )
بروفايل

بت جيرانا إسمها ( ثويبة ) ...!! حالة صعبة شديد ..!!
داخلا ليها في كم شخصية كدا ..وطارحا نفسها كواحدة من من مثقفات الحلة وثقاتها ....
عندها لدغة في السين بتنطقا (ثا )
وبترمش كتير ....!!! مرات تتحجب ومرات تفك ...!! حسب الأعراس ...!
أنا غايتو صفحتا الفي الفيس دي ما بفوتا
بتمتعني عديل البت دي ...وبتمرقني لي عوالم عجيبة كلام الطير في الباقير ...!! لكن حلو حلا ...
مرات الزول بكون محتاج يطلع من الرتابة النحنا فيها دي بي لوحات سيريالية زي دي ...!!

يعني اخر بوست ليها كاتبة فيهو
💥💥💥💥💥
( حبة القرنفل في الصباح كفيلة بان تبدل مزاجي المتصدع وتسكب علي روحي وهجا وتجعلني كخيزرانة في مهب الريح ...!!!!) 😇

أنا لحدي ( تسكب علي روحي وهج ) دي ماكان عندي معاها أي مشكلة ...( هو الإتوهجو شوية )
بس مما جابت ليها ( قرنفلة ) ( وخيزرانة ) قلبي أباها ...!!

هسا تقول ليها إنتي ( خيزرانة ) دي منو ..!!؟ ولا قاصدا بيها شنو !!
تقول ليك دي ضمير مستتر في غياهب الجب .....!!😳
ننطما نسكت بس..!! نعمل شنو !!؟؟
ولا نقول إلا مايرضي الله .....!!
أها ياها دي ( ثويبة ) ...!! غايتو ممتعاني جنس متعة عامل ليها ( فولو ) مابفوت ولا بوست البت دي نقله في عالم الفيس ...تحس إنك في ( زحل ) 💥.....!!
والواحد بقي مرات محتاج لي الحاجات الما مفهومة دي ....!!! لانو نحنا بالجد قدر الفاهمنو مرضنا مرض

وطوالي بمشي علي صفحتا بعد الأحداث المهمة عشان أغير جو ....!! وهي مابتقصر ...!!

يعني بعد المطرة الطمبجت الواطا ديك ..!!والناس دي كلها تشيل وتصور في الحيشان الإتملت موية ...!! والعربات الطفحت ...!! والحيط الإتمتاصت ......!! والضفادع الجات مارقة متلفحة زي بيت البكا .....!!!

خرجت علينا ( ثويبة ) الرهيبة.....!! وكتبت تقول .....!!!

( غازلتني حبيبات المطر ..وداعبت صحراء روحي العطشي ...و قوس القزح 🌈 يلون مساءاتي السرمدية ...!!!

( الكلام دا عندنا هنا !!؟؟ 😳😳)

طبعا قوس قزح واحد مافي ....!! ظهر مره واااااحده ....وقعو فيهو تصوير 🌈 تاني الله اعلم يجي
واضافت تقول ...
وهانذا أقف حائرة بين دعاش المطر ..وأزيز الرياح.....!! لا ياخ .....!!!!!
( أزيز ) طوالي كدا ...مافي اي ( كونكشن ) ......'
أزيز ( دنياي ) ....!!!
أها شفتو جنس المغسة دي .....!!
حاشاك من الحيرة إنتي تبري .....حيرتينا نحنا ديل .....
هسا البت دي بتحكي عن مطرتنا دي ولا مطره تانيه
...قالت حبيبات المطر تتناثر كالبلور ...بلور شنو كمان
يالملكة .....!! هي الحبة الوحده قدر الفولة ....💧💦 ترصعك رصيع ...!! تقولي لي بلور .....دي إسمها المطره البتدق .....!! إنتي أصلو ياثويبة ماسمعتي المطرة دقتنا .....!! ما بالغتي .....!!
قالت والقزح يلون مساءاتنا الوردية .....!!
الصفقة للقزح ) 👏👏
غايتو نحنا مساءاتنا ( الدموية ) دي اللونا جد جد ياهو البعوض دا .....يلون ويطنطن الليل كلو ....!!
ياخ قالو البواعيض ديل ( جمع باعوض ) ...شدة ما شبعو واتجدعو ...!! مرات ساي كدا حقارة بس وقلة أدب بشفطو منك دم وببخو بيهو بعض ....!!
( لعبة كدا عندهم اسمها بخ بخ ....)
شفتو نحنا وصلنا وين ....!!!
ماقلتا ليكم البت دي سارحة ورايحة
زمان عندي صاحبي في المدرسة إسمو ( مجدي )
قاعد جنبي الاستاذ قال لينا ....
اما داء الملاريا فتنقله ( أنثي ) الأنوفليس ...
مجدي دا اتلفت علي قال لي تعرف ياعلوب أنثي اللنوفليس ❤️دي بتكون نار حمرا 😍
(الفصل كلو فاقد حنان ...)
نرجع لي للبت ( الحريقة )
أها يوم ظهرت الحمي في كسلا ...كتبت تحت عنوان الشرق يحترق ...!!
انا قلتا خلاصا البت دي الليلة أبدعت ..!! وتجلت
وعبرت عن المأساة الإنسانية دي بشكل ( إحترافي )
.......!!!
وخذلتني ( الشفيفة ) ....
قالت ...
تبا لحمي الشرق اللعينة ذكرتني حمي قلبي عندما يرتجف وقت السحر وهو يري طيفك شاخصا امامه فتصيبه حمي الخفقان .....!!❤️❤️❤️

وراصة القلوب ❤️❤️❤️

( رايح لبها قلب البت دي ) 💔

الحمي اليلمسوها بالعود ياثويبة يابت ( مسرة ) راجي الله ....!!!
غايتو أمك ماولدت ...!!
عليك ذمتك هسا دا ياهو القدرتي عليهو ....!!
البسمع حمي الخفقان يقول ماجده الرومي ...يالديك الرومي 🐓
الله لا غزا فيك بركة ....الناس ميته وأنت تخفقي ...

أها أنا كل يوم بمر علي (صفحتا )دي بلقاها راقدا علي ( صفحتا) 😜 ...!! ومهببة ليها مصيبة
امبارح لقيت ليها بوست مزخرف كدا وريحتو طاقا
والعنوان فووووق جالطنو
( كتمت ...) ....
هيا اخوانا ( ثويبة ) دي جنت ولاشنو .....!! كتمت دي شنو كمان ...!!!
طبعا هي متعوده علي المفردات القاطعاها من راسا دي ...ناس ...زمهرير ...وجدار الصمت ....وأيقونة
حيرتني ( الكتمة ) دي
قلتا أك

يد حركة في شكل ( كتمة )
وحتحكي لينا عن الكتمان وأسرار القلوب ..ولهيب الدواخل ......!!
وخاب ظني ...😰

أها با اخوانا ياهو دا البوست أقروهو

‏Wednesday at 11:22 PM

( كتمت ) ...!!!

كتمت وكنت أظنها لاتكتمو ( بالواو كمان )
....باركو لي يا اخوانا
أنا الليلة عقدو علي ...ومبروك لي بعلي ( إسماعيل ) 😍😅😍( اسماعيل دا العريس )
وكاتبة ( بعلي ) يعني البت دمها خفيف
وكتبت ( ربنا يقدرني واسعدو ❤️
ايوووووووووووووووووي يووووي يووي😍🌹😍🌹
❤️❤️❤️❤️❤️🌹🌹❤️❤️❤️

Like. Comment. Share

إنتهي البوست ...

بتصدقو بس إنها كتبت أيووووي يوووي دي ....😳

دي اخرتا ياثويبة .......!!! زغاريد في الفيس 😳😳

.. ....ايوووي ياثويبة...!!! ؟؟ 😳😳

بعد القرنفل ....وحبيبات المطر ....وصيف تموز .....

تخلي ( بريستيجك ) دا كلو وتتمطي في نص الفيس دا
وتزعردي بالطريقة دي .....
ما شذيتي ...!!
معقولة لكن ...!!!
يا خوانا هسا انا بس اعمل شنو قولو لي ...!! بالجد غلبني أعبر ....

وعندها واحده كدا صاحبتا في الصفحة الظاهر عليها فردتا شديد ... ...
طوالي حاتلة معاها في صفحتا دي وتعلق
ساما نفسها ( مظلومة الهوي ) من نفس المدرسة
( مدرسة التحليق الجوية ) ..

يعني في بوست المطرة داك علقت قالت ....

( فليغسل المطر دواخلنا المهترئة ياصديقتي )..!!🌧

( يعني المعني أنا وانتي يا ( ثويبة ) مخندقات سوا في خندق الإنسانية بي نفوسنا ( المشرطة) دي ....!!

وفِي بوست الحمي ....طجت داك يا اللايك 👍
وكتبت معلقة ....
( الحمي ليست حمي الجسد بل هي عطب الروح ......

كعععععععع ( أنا أخو البايتات )

وثويبة طوالي لحقتا بي الوش أب عيون قلب داك 😍
تحية علي التعليق الذهبي دا ....!!!

شغالات كدا بس مع بعض قون وباك ...باص وخانة ⚽️

أها دا تعليق الوريفة ( مظلومة الهوي ) علي بوست
( عقد القران ) بتاع ( ثويبة ) صاحبتا
جبتو ليكم زي ماياهو

مظلومة الهوي
.....
الليلة ووووووووووب 💃🏿💃🏿💃🏿 عقبالنا ....!!!
إن شاءالله راجل مرا .....!!
.
1h Like Reply
😳😳😳😳😳😳
( نستغفر بس ) ...!!

عطب الروح ...!! واهتراءالجسد ...!! وصقيع ديسمبر ...راحو في ستين داهية

اها دي البوستات ودا المستوي ....
طوالي قلتا لي ( مشاعر ) اختي إنتي ( ثويبة ) دي صحي عقدو عليها...!!؟
قالت لي أيوا أول أمبارح ..!! و أخدت ليها ضحكة كدا ...!! قلتا ليها بتضحكي مالك ...!!؟
قالت لي ما إتخيلتا ....!! قلتا ليها ليه في شنو ...!!؟
قالت لي إنتا عارفا ( ثويبة ) وفلسفتا ...!!
و انتا بتعرف نحنا كبنات مع بعض بنحكي مرات عن الحاجات البتخصنا ومن ضمنها العرس والارتباط والحاجات الزي دي ...!! وهي طبعا عندها راي في اي زول ...!! مثلا مره طرحنا ( المغترب ) كخيار ...!!
قالت دا متصدع عاطفيا ..!!بعاني من ( شروخ ) وندوب فرضتا الغربة. ....!! وما بنفع معاي 😳
البسمع ما بنفع معاي دي تحلف تقول المغتربين واقفين ليها صف ...!!
هو اصلا الجاك وعبرك منو ذاتو يالسمحة ....!!فاتحة نفسك كمان
مسكين المغترب ماعارف يلقاها من الكفيل ولا من ( ثويبة ) ....هيييع اب شروخ
طبعا ياعلوب البنات عارفنها فبقومو شنو ( يدوروها ) قالو ليها خلاص عرفنا نومتك اكيييييد قافلة علي دكتور ...!!
قالت ... أنا دي ...!!! ولا يمكن ...
دا استعلائي عندو إحساس إنو هو أحسن زول ..!! ويادنيا مافيك إلا أنا ...!! ودا حيأثر علي سلوكو العام ...!! وشعوره بالعظمة دا حيخليهو غير منسجم ومتعاون ....!!!

(معليش يادكترة ماتشتغل بالبت دي كتير ....دي واحده مجنتره ساي)

المهم شغالة ليك كدا بس ،،،،،
مشاعر قالت لي قلنا ليها اووووووو خلاص عرفنا ووريتينا شكلك ميتة ومكسرة في نص الحلة هنا ...وياناس أنا ود الحلة عاشق وحياة الله......!! يامجرمة 😂 😂
قالت ولا يمكن تفكر مجرد تفكير في ود الحلة والجيران قالت هو أشبه بالأخ في الرضاعة فقد تقاسمنا الهواء ذاته وشربنا من ذات الحنين ....!!! 😳😳

هو نحنا حلتنا دي متقاسمين فيها الخور دا بس ...!! حنين شنو الشربنا منو ياثويبة ...!!؟؟

أها أولاد الحلة القالت اخوانا في الرضاعة
ديل بالذات متبرين منها رسمي كدا سامنها .....( جلكسا ) ...قالو كهربتا زايدا ...وفاطا تلاته صفحات مع الغلاف ....( كدا كويس ياثوثو )

قلتا أشوف بس ( ثويبة ) دي عرست منو بعد الرصة دي والعريس دا ذاتو من ياتو كوكب ....!!
مشاعر قالت لي من كوكب الثورة ( الحداشر )
اسمو اسماعيل البرجابي ...
عندو مرتين وثويبة التالته...
والد خمسة اولاد وبتين .....واحده مطلقة
عندو فرنين بلديات وباعو واحد منهن ..!!!
😳😳😳
غايتو البنات لنما يجيبو معلومات ....وكالات الاستخبارات تقعد تتفرج بس ...!!
العريس ط

لع خبير دي التالته متعويييييييدا دااااااايما و
وثويبة طلعت شلابة مع مرتبة الشرف .....
( مشاعر ) قالت زمان في ونساتنا دي مره اتكلمنا عن خيار راجل المرا دا ...قالت لي الساعة الإنفصمت ليك فينا قالت دي جريمة مكتملة الأركان والتفاصيل
مفروض يفتحو فيها تلاتة بلاغات .....
سرقة رب اسرة من اسرتة .....!! واستدراج بالغ عاقل واختطافه ......!! والتعدي غير المشروع علي حقوق الغير ....!! وكلاما دا نزلتو بوست
عليك الله شوف ( ثويبة ) المابتخجل دي ...كلام ( الفيس ) يمحوه النهار .... الليلة إلا تتحللي...!!

قلتا لي ( مشاعر ) غايتو حنفقد صفحتا كانت مونسانا
مشاعر تشيل وتضحك قالت لي قفلتا طوالي تعال نوريك الصفحة الجديدة ....
البروفايل ( صورة ممثلة تركية كدا ماعرفتها )
( خلاص نفضتنا )
وعامله شير لي صفحة تياب
( التياب دي ما تديك الدرب ) أرجا الراجيلك ياسمعة
زمان كان بتكتب
الحب إحساس و ( ثوب ) أمير اتدثر به من عثرات الزمان
الليلة حتكتب
العرس ( ترباس ) وتوب ( حرير) اتلفح به ( كية ) للنسوان

الف مبروكً يا ( إثماعيل ) ...ثويبة مبروكة ....خم وصر .....!!

اسماعيل عندكم ( عيش ) ....💔🥞

#اشياءبسيطة ..

صباح اليقين بأن رحمة خالقنا أوسع من متاعب الدنيا وشقائها ..
اللهم اعطنا في صباحنا هذا من الخير فوق ما نرجو ..

قالو رزق الحلال طاعم ..
خلي عندك أمل في الرزاق ..
اوع تزعل لو رزقك نقص ..
باكر تتعدل عليك الارزاق ..❤

إتمنى الدهب لو لونو يشبه لونك ، إشتهت الدُرر لو هيا تبقى سنونك ؛ مجنون ليلى حالتو اقل من مجنونك ، ما دام ليلى كانت في المحاسن دونك ..💜

جمعة معطرة بذكر الله❤️

"اهرب بقلبك نحو الآخرة❤"

جمعة مباركة ..💚

معاي و غشيتك اسلّم عليك..

⭐️و إنما الأمم الأخلاق ما بقيت⭐️
⭐️فإن هم ذهبت أخلاقهم ذهبوا⭐️

تشبثاً منا - طلاب كلية الطب جامعة الخرطوم - بإحياء سنن مهنية الطبيب و أخلاقيات مهنة الطب ، نقوم الآن بإجراء بحث يستطلع آراءكم حول القيم الأخلاقية في مهنة الطب ، لتكونوا جزءاً من التغيير نحو مجتمع سمته رفعة الأخلاق ، ما عليكم سوى أن تتفضلوا مشكورين بملء الاستبيان أدناه ...

#Professionalism_and_medical_ethics
#Moral_values
#SA10




https://docs.google.com/forms/d/1gLCCsa-6criRAQFvpUu3uyNfAhnWfX4rCfi4aBCQ_es/edit

عن أبي هريرة - رضي الله عنه - أن رسول الله - صلى الله عليه وسلم - قال: ((في يوم الجمعة ساعة لا يوافقها مسلم وهو قائم يصلي يسأل الله خيرًا إلا أعطاه))
تتبارك ايامكم💙
#عزوقه

باكر بشير الخير يجي شايل البشاير لي زاف ♥


#الق_الصباح🌸

البنبر جمب البنبر
و المسك الفايح عنبر
و الشاي و البن قلايه
هبابه ترفرف طيرا
غزلانك دسته كبابي
كفتيرا تفك الحيرا 🖤

مسكين البدا يأمل
أملو يغلبو تحقيقو
والعاشق الجفا المعشوق
والليلة وآسهرو
ونشاف ريقو
أمش قول ليهو يا المرسال
عساهو يراعي ملهوفو
حبيبك وبي وراك
جارت عليهو وخانتو ظروفو
فقد صبرو شرد نوموا

هي نظرة تنسي الوقار وتسعد الروح المعنى ❤️....

#الهودج

أرميني في أرضك بذور...
لميني من وجع الغياب..💔

بنيتك يا حلم عمري..
رفعتك طوبه فوق طوبه..
وشلت المونة في ضهري..
ولسه عليك يا حلمي..
باقي لي البياض والجير..♥️

عديت كل النجيمات الفي السماء
فتشتا ليك والسحب ضارن علي القمره
حجيت كل الخلايق الفي السماء
نورك براااك كان غارو كان شقوى دنا 🙈