أشياء بسيطة

امسية سعيدة عليكم ..

1.31K views16:59

مقال اليوم ٣٠

في مصر لو جيت ماشي جنب متجر ملابس مثلا و نفسك الأمارة بالسوء اغوتك و اتلفت عاينت للباترينة ساي طوالي واحد من الشغالين في المحل بجيك طاير، اتفضل يا عم. .. خش جوة يا عم. . يا سمارة. . يا ابن النيل. . المهم في النهاية كده يجبرك تخش الدكان، انت ممكن تكون ماشي مستعجل محصل زوجتك اللي حاليا في مستشفى الولادة لكن المصري ده ببقى ليك في رقبتك لازم تخش لازم تخش. ● يا حبيبي أنا والله افلس من أبو الدقيق 😃. ما عندي التكتح ما تضيع زمنك معاي ساي. ● مافيش مشكلة يا عم، انت خش اتفرج بس و يوم ما ربنا يفتحها عليك تعالنا راجع. و جوة الدكان ينزل ليك البضائع كلها رف رف و يفرجك عليها بإخلاص أكتر من إخلاص خضر بشير في الغناء 😃 ، أنت ذاتك لمن تخجل من روحك في النهاية و تتذكر انو عندك مية جنيه خاتيها للطوارئ و تقرر تشتري بيها أي حاجة و السلام خجل ساي من إخلاص و تعب المصري ده 😃. بعد ما تمرق تفتح الكيس تشوف نفسك اشتريت شنو تلقى نفسك اشتريت جوارب نسائية. . تعاين للمحل تاني تكتشف انو أصلا هو ده محل ملابس نسائية 😃 ... تخاف ترجع ليهو تاني يقوم يشريك حاجة تانية كمان. تطلع الجوارب من الكيس تمسح بيهم العرق و تنف فيهو و تعتبرهم مناديل طويلة بس.
يللا تعال راجع معاي لي ناس قريعتي راحت و مقدود ما رقع مقدود في سوق أمدرمان 😃، تخش المحل براااك عمدا مع سبق الإصرار و الترصد داير تشتري ليك بنطلون جينز جديد بدل القديم الاستسلم خلاص بعد ما عدد الثقوب فيهو بقى اكتر من الثقوب السوداء 😃. وأصغر خرم أكبر من ثقب الأوزون. تخش المحل تلقى زول قاعد بالعراقي و السروال "أب تكة" في صندوق بيبسي و بتكلم بالتلفون .. تقول ليهو السلام عليكم .... مش رد السلام ده فرض يا جماعة؟ برضو ما يردوا ليك😕 يعاين ليك كده نظرة السكرتيرات في المكاتب الحكومية و يواصل في كلامه 😃. . تقوم أنت تتقل دمك و تقعد تتفرج براك ، في النهاية تلقى ليك بنطلون كده شكلو ما بطال، تتلفت لي سيد المحل تلقاهو لسه بتكلم بالتلفون، تعمل نفسك محترم و تنتظر سيادته شوية، تقعد تعاين للساعة في يدك الشمال مع انو انت ذاتك ما لابس ساعة لكن بس عشان البهيمة ده يحس على دمه شوية 😃 .. ولاااا يشتغل بيك الشغلة. .. ● يااااا ابن العم عووووك .. ● يقول ليك : مالك؟؟ ● مالالا أم قرينات. . مالك دي شنو كمان😑؟! ما تقوم تبايعنا ... يعاين ليك بي زهج كده التقول انت مضيع جواز السفر بتاعه 😃. .. و يقول للزول المعاهو في التلفون :اسمع برجع ليك بعد شوية، في عارض هنا انتهي منو و ارجع ليك😑. . وانت سااامع لكن برضو تاكلها في حنانك عشان خاطر بنطلون الجينز . يقوم على حيله أخيرا و يصلح الحجاب في ضراعه (يرفع يده فوق كده و يهزها زي البخج ليهو في فتيل بنسلين ) يقول ليك عايز شنو؟ ● كدي نزل لي البنطلون الأزرق ده اشوفه. . ينزل ليك بنطلون أحمر فاقع اللون😃 . ● يا ابن العم ياخ أنا ماشي ظار؟!😃 قلت ليك الجينز الأزرق ده ياخي، أزززززرق ، . . المرة دي ينزلوا صاح. . تفحص البنطلون تلقاهو أكبر منك . . تقول ليهو ده أكبر مني عندك مقاسات أصغر ؟ ..● ما عندنا ده أصغر مقاس 😑، ● طيب عندك اي حاجة قريبة ليهو بس مقاسات أصغر؟ ● دي الحاجات كلها قدامك اختار براك يا زول 😑. يااااا ابن العم انت مالك زعلان؟ ● ما زعلان شوف داير شنو بس و خارجنا 😑. المهم لحدي ما تلقى البنطلون مقاسك بتكون انت و سيد المحل اتضاربتوا عديل كده و جابوا ليكم البوليس. 😃
و أبقى راجل بعد ما تلقى مقاسك و تجربوا قول ليهو : والله ياخ ما عجبني، كدي نشوف واحد غيره. والله يطردك عاااادي التقول محله ده ديوان الزكاة. 😃
مرة انا و المدام كنا في بورتسودان، عادة بناكل سمك في المحلات الشعبية على البحر، يوم حبيت اتفلسف كده و قلت اعزمها في مطعم سياحي 😉، خشينا المطعم الشهادة لله كان أنيق وفي كامل الظرافة بس فااااضي لو اتكلمت تسمع الصدى. .. المهم في جرسون كده جاب لينا "المينو/ قائمة الطعام يعني يا أصحابي الساكنين شارع الشنقيطي " . اها قلنا مادام جينا مطعم سياحي نجرب حاجة سياحية برضو. لفت انتباهنا الاستاكوزا ، ما بنعرفها لكن سامعين بيها، ناديت الأخ الجرسون وقلت ليهو جيب اتنين استاكوزا (صلحهم 😃 ) و سلطات و حاجات زي دي. . طبعا لا في ابتسامة ولا ترحيب ولا أي حاجة التقول متضمض بي موية نار 😃 وهو متخارج كده قامت زوجتي سألته . .انت الاستاكوزا دي شنو يا ابن العم؟ سمكة؟ سرطان بحر؟ سلطعون؟ شنو يعني؟ صاحبك الجرسون عاين ليها كده التقول سألته من عدد ركعات المغرب و صرصر خشمه و قال ليها تحت نخرته : حشرة (في الأول انا قايلوا قال ليها انتي حشرة واتجهزت للشكلة ) قام واصل شرحه المثمر الله لا بارك فيهو : " الاستاكوزا دي حشرة كده. . مجرد حشرة كبيرة كده بتعيش في البحر " .. 😲 .. أقسم بالله العظيم بهذا الأسلوب ... الله يقرفك ياخي. . و يقرف حلتكم كلها معاك بي جاه النبي 😃، يعني دي أغلى طبق عندك وأهم طبق و مع ذ

❤1

1.4K views17:10