‏"انتي يا الفرح الحقيقة
المستحيل
هدْهِدى الصبر الجميل
وأمسحى الحزن المخيِّم
فى مدارات الرحيل"

💜

قشة قشة بنبي بيتنا
عشنا المفروش مودة
فيهو اوضتين بي برندة
فيهو مطبخ من محبة
قشة قشه بنبي بيتنا
حوش بيجمع كل اهلنا
وفيهو شفعنا الصغار
بيت مكون من مودة
وزايدة فيهو الالفة حبة


#مريوومة

لَم يكُنْ أبداً مِن شُروط السَّير إلى الله أَن تَكون في حالة طُهرٍ مَلائِكية، سِر إليه بَأثقال طينِك ، فَهو يحبُّ قدومك عليه ولو حبواً " ، 💜

قال
أنا زول فقيير لا عندي بيت لا قرووش
كل حيلتي راكوبة حصير وحمار صغير
قالت
شن فايدة البيت والقروش والزول بلا قلبا" يحس بي غيرو ويبادلو الشعور
راكوبة حصيير بس فيها بتنوم هاني مرتاح الضمير
#مريوومة

ماف زول يبكي ولا يزعل ويقول البلد انتهت وضاعت الكيزان مصيرهم يفوتو ولا يموتو و ماف احتلال علي مر التاريخ استمر للابد ، بفوتو و بموتو ويبقي الوطن ، ان شاء الله ..❤

الاطفال يا فاطمة بغنو..
الافراح لابد من ترجع 💜🎶

طول الوجع رشـّح
مواطن العافية فيك ..🌸

الوجعة ما جات من بعيد
الوجعة جاتك من ولادك يا بلد
آه يابلد💔
حقك عليّ

أنا كلهن كل البنيات الابنكن وفتهن .. ♥

#إيلا ..

وزي نَسمة خريف مُنسابه تدخل فيك .. تَونِس قلبك المهموم وبي الهمس الندي تحجيك .. بنيه بترسم الاحساس علي ضحكة وتر حساس 💫🎼

ياااريت كل زول تايه يلاقي الريدة في دربو ..💜

يا بلسم القلب النزف..
ياغيم بوادينا اليباااب...
جنك سفر..جنك غياااب..💔

اللهم صل وسلم وبارك علي سيدنا محمد صل الله عليه وسلم..
سبحان الله وبحمده..عدد خلقه ورضا نفسه وزنة عرشه ومداد كلماته ..
سبحان الله وبحمده..عدد خلقه ورضا نفسه وزنة عرشه ومداد كلماته ..
سبحان الله وبحمده..عدد خلقه ورضا نفسه وزنة عرشه ومداد كلماته ..

اصبحنا واصبح الملك لله ..
صبااااح الخير ..💜

وكنتى الصبية الغايبة ..
فى زحمة حجا وكلمة شرف💚
كنتى الزوايا الميتة ..
فى متحف خزف 🖤
كنتى الوصايا العشرة..
واللون الشحيح ✨💚
#Asom

ولعل ما تخشاه ليس بكائن
ولعل ما ترجوه سوف يكون
ولعل ما هونت ليس بهين
ولعل ما شدّدت سوف يهون💕

#الق_الصباح🌸

يا مشاوير يا غناوي
يا نفوس طيبه ورضيه 💛

#تسنيمة ..

نحن سافرنا وبعدنا
ماعرفنا هواك بعدنا ..💔
كل ما لاقتنا فتنة
الفؤاد حنا ولفتنا ..💔
وكل ما اتمناه بسمة
من ملاك اضناه حبو ..
حلمو كان في الغربة نسمة
من اريج بلدو البحبو..💜
#Amna_Adel

حروف اسمِك نجوم ركّت على الياسمين ..
فرح فى عين جمالها حزين..
أساور فى إيدين طفلة بتحفظ فى كتاب الدين..
زَفَافَ عاشقين بعد فرقه وسط باقات دعى الطيبين ..💔😢

#Mohammad_Aam

ونفرح فرحة القالولها ولدك ماات..
جنك ودر..
رجع ناداها ياا يمة 💜

هو: الوووو
هي : هلاااا
هو : وين انتي ،
هي : في المكتب لكن طالعه خلاص بلم في حاجاتي ، ح تجي توصلني ؟!
هو : لالا ما عندي طريقة ، بعدين انا جعان شديد وانتي ح تصلي متأخرة وماف اكل ، اتغدا برة؟!
هي" بنبرة زعل وطنطنة " : تمام الله يسهل والقى مواصلات

بعد ١٠ دقايق
هو : الوووو
هي : اهلين ، ف شنو تاني ،
هو : جايب اصحابي معاي يعني اعملي حسابهم في الاكل ودايرين تحلية
هي " نفس الطنطة وصرة وش " : لكن ما ممكن انا امشي بالمواصلات واصل متاخرة وبراي واجهز دا كلو ، سكتت وقالت تاني طيب حاضر ح اعمل حسابهم ، منو الجايي معاك
وهي بتتكلم بي زعل ودايرة تقطع الظلط

هو: يا بت عايني قدامك تقوم تطقشك عربية نبقي في جري ومستشفيات
هي : اتخلعت ، انت شايفني ولا شنو ، كان ح تطقشني عربية ، ولا إحساسك فجأة اشتغل
هو: " ضحك بي خباثة " انتي عبيطة ولا حاجة إحساس شنو ، طيب عايني ع يدك اليمين انا منتظرك
هي : دايرة تطير من الفرح وبسرعه مشت ركبت واول ما دخلت قالت ليو طيب مالك بتتعابط من قبيل ومخليني ازعل واصر
هو: "ضحك وقال ليها عشان اشوف جمال ابتسامتك لما تلقيني منتظرك
هي : بطل عوارة ياخ قال جمال ابتسامتك ، حاسي بشنو انت " ومن جوها مبسوطة بي كلامو"
هو: اصلو ما عندك احساس ، اقول ليك دايرة اشوف ابتسامتك اشتقت ليها ، تقولي لي بطل عوارة ، انا ما عارف عرستك ليه
هي : عشان ادخل المطبخ اعمل ليك اكل انت واصحابك
هو : بالجد دي الفايدة الوحيدة
هي : عملت ما سامعة
هو شغل الاغنية البتحبها وساق بي سرعه
اول ما وصلوا البيت ،
فتح الباب وقال ليها اتفضلي عزيزتي
هي بإستغراب قالت ليو بالجد انت ما طبيعي

دخلت وجدعت شنطتها ف اقرب كرسي وقعدت ترتاح حبه وتقوم ع الطبخ
وفي قعدتها دي ، جاها قاليها قاعدة ليها شنو قومي ع المطبخ هسه اصحابي بصلوا ،
هي دموعها قربت تنزل وقامت على المطبخ
اول ما فتحت باب المطبخ ، لقت ورقة مكتوب فيها ،
" حبيبتي الغالية ،
متذكرة اول يوم اتلاقينا فيو ،
طيب اول مرة طلعنا فيها مع بعض ،
طيب لما عرسنا،
طيب متذكرة الحاجة الكان نفسك فيها ،






افتحي الدرج "
فرحت وقالت ح يكون جابها ليها هدية
فتحت الدرج لقت ورقه تانية مكتوب فيها
" انتي عبيطة ولا شنو
لا وكمان صدقتي ،
بالجد عبيطة انتي وهبلة كمان ،


المهم اعملي الاكل ،
الحاجات في الدرج التاني "

دموعها جرت وحست بالوجع ،
فتحت الدرج التاني لقت ورقة


" طيب انا اسف ،
بس اعمل شنو بحب اشغلها ليك واجننك ،

امسحي دموعك دي ،
وامشي غيري هدومك وتعالي المطبخ "



مشت عشان تغير هدومها لقت ورقه مكتوب فيها
" ما ممكن دا كلو تاخير ، استعجلي يااااخ ، الضيوف ح يجوا ، ويقول مرتي كسلانه ، صراحه ما برضاها لي وليك "


غيرت ونزلت المطبخ
دخلت لقتو راصي الحاجات في المصطبة و منتظرها ،

دخلت اتفاجأت
قال ليها : يا عويرة ، انتي نسيتي ولا شنو. ،
الليله الطبيخ مشترك بينا ، موش نحن اتفقنا ، وح ناكل على زوقي ،سلطة وفطاير وسلطة فواكه ،
انا بعمل السلطة وانتي اعجني العجين ،
ابتسمت وجات داخلة ، بدت تعجن وهو يقطع وتعاين ليو وتبتسم ، قال ليها بالمناسبة. ف حاجه في الدرج الجنبك دا شفتيها
قالت ليو لا، قال ليها خلاص بعد تدخلي الاكل دا الفرن شوفيها ، الشمار حرقها والصبر غلبها ومدت يدها قال ليها لالالا عيب ح توسخي الدرج ، سكت تاني مدت يدها وبرضو قال لليها لالا ح تنضفي انتي ،وضحك ،مبسوط هو بي فضولها وهي الشمار كاتلها ، وف الاخر فتحت الدرج
لقت كتاب وكباية وجوة الكباية شكولاته وخاتم ، طارت من الفرح وجات مبسوطة زي شافعه جارية تسلم على ابوها وقال ليها ح تبوظي القميص ، ضربتو وقالت ليو قميص شنو ف الساعه دي وبعدين انا البغسل يا فالح و طلعت لسانها برة تكاويهو ، مسك يدها وقال ليها يا شافعه انتي ح تكبري متين ، قالت ليو لما انت تبطل تعاملني كشافعه ،


حاجة بسيطة جابها ليها خلتها تنبسط وتعيش حياتها سعيدة. وبقي ثابت عندهم كل يوم تلات من الاسبوع طبيخ مع بعض وكل واحد بفاجأ التاني بي هدية ،


الحب عطاء ، بساطة ، حياة ، تفاهم ، تعاون ،سند

كونوا للحب كما يجب او اتركوه لمن هو جدير به ،



#مريوومة