أشياء بسيطة

مقال اليوم ١٠

أهل العوض !! ليكم شكري وحبي

الصديق محمد موسى الكوميدي المعروف زمااااان فكا نكته في أهل الجزيرة ولقبن بي أهل العوض وللعلم هو زاتو من الجزيرة المهم طلعت فيهم نكتة كدا خلتن مسار سخرية ، أهل العوض ديل لمن يجوك زيارة او ينزلو معاك و لأنو دي الفطرة السوية إنو هم زي مابيشوفو الواجب إنهم يكرمو الزول كمان بيشوفو إنو عادي الزول البيعرفوهو دا بعني بيحسو إنو هو هم زاتن وبيتعاملو على الاساس دا ووالله دا سلوك إيجابي وماحاجة يعايروا بيها الزول😊
(يعني شنو لو زول بات في عنقريبك ولا قدمت ليهو صحن فول ولا كسرة هل كدا بيكون قصم ظهرك )؟ سبحان الله الإنسانية في خطر إذا أي زول بيشوف إنو بعيش براهو لي نفسو بدون مايشارك الآخرين مأكل ومشرب وفزعة وياها دي شراكة الإنسانية أصفى شراكة 😊
مرة أيام الجامعة ركبت البص ماشي ناس عمتي زيارة وهم من سكان مدني الزمان فركب جنبي زول كدا طوالي توووش بدى يسأل فيني زي المحقق ، الأخو إسمك منو ؟ وإنت من ياتو قرية ؟ مزارع ولا موظف ؟ ولو ما إسلوبو البسيط دا كنت قلت بتاع مباحث😂 قلت ياخ أنا الركبني شنو جم الزول دا 😕، لمن نزلنا القهوة في الشارع إستراحة مشيت أصلي وقلت أرجع أشتري ساندوتش كدا تصبيرة ، اها مشيت على الكاونتر بالله بي صوت عالي اسمع زولك بيكورك من هناك آآمرغني آمرغني جاي جاي أنا راجيك من قبيل 😲 ولقيتو خاتي صينية الزول دا طلب من أي صنف صحن (فول ،سمك،كبدة،شية،فتة شوربة ) والله صينية مستفة ، أها طبعا إتحرجت وقلت ليهو لا ياخ ليه تعبتا نفسك ماكان تطلب الاكل دا كلو ، فضحك وقال لي انت زول غريب شاقي ديارنا وضيف اها ماعارفك بتدور تاكل شنو قلت انوع في الاكل 😂 . طبعا اللحظة ديك حسيت إني سغير وخجلت من إحساسي القبيل فقلت ليهو طيب كنت تصلي وبعدين نطلب ،فقال لي ياخوي الزنقلة دي ان مامليتا(البطن) الصلاة كلها بتبقى تفكر في الاكل وتجهجه صلاتك ، فلك أن تلمس هذه البساطة والإنسانية الكبيرة .

جارنا في الصحافة كدا بيحكي قال عندو جارو عزابي من الجزيرة أها يوم جمعة كدا قام عزمو فطور فجا فطر معاهو والجمعة البعدها زولك بدري دق الباب وقال ليهو عندي اخوان لي كدي شغالين في السوق الشعبي قلت نجي نفطر معاك الليلة ، اها فعلا جوهو وفطروا معاهو ومرتو كانت متضايقة من حركة الزول يعزم نفسو ، يلا بعد سنة كدا من باب الزوق بس كلمو انو زواج اختو في السجانة ، قال بعد يومين جا البيت وسمع باااع باااااع ،😕 مرتو لاقتو في الحوش فرحانة والله فلان العزابي دا قبيل جو امو واخواتو زيارة الخرطوم وجو يباركو ليك العرس وجابو خروفين وشوال (درة) وبصل 😲 ، ومشو لي اهلن شان مسافرين الصباح يشكروا فيك شان عزمتا فلان دا وامو دعت ليك وقالت دا الواجب ، قال لي والله لحظتا كنت شايل هم خروف واحد بس 😂😂
أهل #الجزيرة لمن يجو #الخرطوم مابحبوها أصلا وبيجو للشديد القوي علاج ولا تعليم ولا سفر عبرها للخارج والشباب البسيطين البيشتغلو ديل (تنجيد سراير ولا جزارين ، حفر آبار ولا حتى البيبيعو مناديل ورق في الاوتوستوب ) بيشتغلو اي حاجه حلال لكن مابيمدوا يدهم والله رجال شغل .ياخ ماسمعتو بالكمساري العندو ماجستير في البزنس اول دفعتو جامعة الخرطوم !! 😊

من تمرق من سوبا لغاية حدود قرى سنار ناس من قبائل مختلفة ياخ يبدو لي #السودان كلو ممكن تلقاهو هناك أعراق ولهجات وسحنات مختلفة ولكن بجمعن طيبة ومحنة وعلامة محددة تقول ليك انو دا إنسان الجزيرة 😊
. حكى لي صحبي قال مشو بالليل بالوصف لي بيت صديق دفعة دراسة في إحدى قرى الجزيرة والزمن داك ماكان في تلفونات ومشو قرية إسمها مشابه للقرية القاصدنها وإسم مطابق لي زولن فوصلو البيت ولقوهو مازولن والدنيا ليل فأصرا سيد البيت يبيتو معاهو ولمن رفضو قعد في الواطة في عتبة الدار على وضع الرجلين وقال ليهم بي نبرة الزول العاوز يوصل خبر وفاة (مابتدوروني أنا مالي ؟ قايلني بقصر معاكم؟ واتنخج وقعد يبكي . 😢 فما كان من الشباب ديل إلا إنو إتكسر خاطرن وقرروا يبيتو إرضاء لي عمك .
. لم يجلب لهم الطريق القومي سوى الموت والأخطار وهم الكان عندهم مشروع الجزيرة أضخم مشروع زراعي مروي في العالم قبل أن يتم تدميروا الممنهج ، المشروع دا جاب ليهم كل قبائل السودان وإستقبلوهم بكل حب وأدوا الكتيرين أراضي زراعية وبيوت وحواشات هدية من عمدن ومشايخن فيال طيبتهم .

. الواحد تلقاهو يقابلك من بعيد حبابك حبابك تحلف تقول بتعرفو ويمسك يدك يتحلف عليك تتفضل دارو ، أتذكر مرة مشينا زواج أخو زميلتنا في جامعة الخرطوم ( قرية حسين حاج موسى) مشينا 4 اولاد وبتين المهم غايتو كانت ورطة للناس المابحبو الاكل ، بالله الضبايح دي تقول العرسان انحنا وكمان عندهم غرام مع اللبن بالجردل ويحلفو الا تشربو كلو 😂😂 كرم كرم مبالغة أها الجيران الصباح كل زول بحكم إنو نحنا ضيوف بيجو شايلين الشاي والخبائز واللقيمات واللبن والقهوة لاحظ دا كلو معاها (عليك الرسول اشرب من شاهينا دا ، جار تاني انت آزووول لقيما

1.64K views16:20