أشياء بسيطة

ناس مستفه بالاماني 🌸

4.24K viewsMohammad Aam, 18:29

مقال اليوم ١٤٣

شخصي جدا !!

من الحكايات الظلت عالقة في الذاكرة حكاية المذيع أيوب صديق .... و أيوب صديق مذيع سوداني مشهور ... كان شغال في راديو هيئة الاذاعة البريطانية ... مرة بذيع في نشرة الأخبار بدل ما يقول "هنا لندن" قال "هنا أمدرمان" ... و من ثم إستدرك معتذرا ببيت شوقي الباذخ : وطني لو شغلت بالخلد عنه ...نازعتني إليه في الخلد نفسي " !
ظل هذا الرجل و قصتو دي عالقة في الذاكرة سنوات طوال لكني ما فهمتها ولا حسيت بيها إلا في الغربة حيث هذا الوطن "ينازعنا" في طعم الفرح و راحة البال و يفسد علينا لحظات السعادة و التجدع في بلاد الخواجات !!
و هذا الوطن قصتو عجيبة جدا ... لا يجيئنا منه غير المواجع و الفواجع ... وطن ما معصور علينا نهائي، ما عندو لينا الحبة و ما عندنا ليه غير الشكية منو و ريدة لم تسعها قلوبنا .

يمر العام تلو العام ..والزمن ماشي سريع و نحن قاعدين "زي ده " تنهشنا الغربة و تغتال في دواخلنا الاحساس بطعم الأشياء ...فمن غرائيبية الاشياء إنو الجو السمح في الغربة ما عندو طعم ...المناظر السمحة في الغربة ما عندها طعم ...المولات ...الشوارع البيوت ...العربات ... النظام ... سهولة الحياة ... أشكال الناس ...كلو في الغربة بلا طعم ... الطعم الحقيقي للاشياء محل هذا الوطن الما معصور علينا ده !!
و تقول البلابل :
انت ما "معصور" علينا ... نحن "معصورين" عليك !! ... أو كما قلن !!!
ثم إنو في حاجات مافي إلا في السودان :
المشوار من بيتنا لبيت ناس حبوبتي مثلا ... إحتمالية تلقى زول بتعرفو في السوق ... الارتماء في احضان الصحاب ... قصة تكون عايش وسط ناس بشبهوك ثم هذا الإحساس الغريب بالأمان ؟!!

أيام إتفاقية نيفاشا و التفاؤل يملأ الأجواء إنو البلد ح تتصلح و الأمور ح تزبط ... حدثني وليد مبارك إنو أيمن أخوه - قدس الله سره- قال ليه البلد دي عمرها ما ح تتصلح لانو بايل فيها شيطان !!
و في ذات ونسة مع واحد من الفرد ... جأر بالشكوى من مرارة العيش في السودان و من ثم شتم البلد و سلح على الحكومة و المعارضة و الناس الساكتة على الحاصل ... قلت ليه طيب ياخي ما تتخارج.... قال لي أحكي ليك حكاية :
كان عندي مواعيد مع صينين في أمبدة ... لزوم الشغل و كدا، إتجبصت لي ببدلة و قشرة كاربة في حر و غبار صنع خصيصا للسودان !
قبل ما أصل الصينين لستك عربتي طرشق و أعلن نفسو غير صالح للاستعمال ... و قبل ما أوعى كويس للمصيبة الحصلت دي ... شفت لي شابين قاطعين الزلط و جايين علي ... قالو ليه يا اخينا إنت قاشر و مزبط و كان غيرت لستكك ده بتعرق و بتتوسخ ساي .... خلينا نغيرو ليك ... قال لي ما صدقت ... عشرة دقايق كانو غيرو لي اللستك ... قلت ليهم حسابكم كم ... قال لي قربو يدقوني في قولة حسابكم كم دي ... ما وقفوا أساسا عشان أقول ليهم شكرا !!!
شكوتو القبيل و معطتو من البلد و الناس و صرتو الكانت مرسومة على وشو اتغيرت و حلت محلها إبتسامة المطمئن و هو بقول لي : البلد دي ما بتتفات !!!
------------------
و ما بين البلد "البايل فيها شيطان" و البلد الما بتتفات" مزروبين و مزرورين نحن بسياج من حبك يا وطن !!!..

#أمين_محمد_سليمان..
#اشياءبسيطة..

4.62K viewsMgd Al-Din, 20:05