يب الدغ ....!! ( برضو ماظابتا ) ...!!
ياخ بنطق الجيم دال ...!! وضحت مش ...!!!؟؟
يعني بدل مابقول لي عمك ( يس ) سيد الدكان دايرين ( جبنة ) بقول ليهو (دبنة)
( سمعنا بي لدغة في الرا ...!! وكسرة الغين ...!! والقاف مرات بنطقوها دال .....!!! بس الجيم تنقلب دال ...!!! يطرشنا ...!!
أول مره ....!!!
بعدين مايفوتكم ( البشري ) دا زول كبيير يعني ماشافع ...!!
بس لقي نفسو كدا ...يسوي شنو ...!! قسمتو ....!!!
مره لاقاني في الشارع لابس لي فنلة حمرا كدا
...قال لي ...لكن يا علوب ...( دننتا اللحمر دن ...) ..
افتكر بعد التنوير العملتو ليكم دا ممكن عااادي تترجمو الزول دا قال لي شنو ،..!!!
والله مافي ( جن ) غيرك يا البشري ....!!! بس العاجبني فيهو إنو منسجم جدا مع حالتو دي .... ومتصالح معاها لدرجة انو شايف إنو نحنا الغلطانين بننطق الدال جيم ...!!
وهي لعمري أرفع درجات التصالح مع الذات ....! وقد تفوق علي نفسه والجميع....!!!
بين كل عشرة مليون شخص في العالم في حالة ذي حالتو دي ...!!! بختك يالبشري محكر مع
‏( 10 TOP ) في العالم
كمان علي العليهو ( حاجه عجيبة جدا ) دي عبارتو المفضلة
( التلاتة ( جيمات ) في ربع المتر دا ....) بحولن ليك لي ( دال ) واحده ورا التانية ...!! ذي الترتيب ...!!! ( ولايرمش له جفن ...!!! )
البسمع دال ...يقول ( دال ) للغلال ...!! ديل كمان بعد ( مديدة الحلبة ) دي فضل ليهم ( المريسة )
بالله البشري دا مابالغ ....!!! هسا دا ماياهو ( عدو) نفسو البقولو ....
غايتو عصر علي الجيم دي عصرا ما معقولة
فعلا ( حادا عديبة ددا .....)
ياخ دي مَش عديبة ددا ..!!!
دي ...(عديبة ددا ...ددا ...ددا)
وحات الله ...!!
اها حاجه اخيرة مستوقفاني ...!! ليه الزول لما يقولو ليهو ...قوم لف ...!!! بعتبرا نبذة وإهانة ...!!!
ماهسا الناس دي كلها ( لافا ) من تصبح لمن تمسا ...المشكلة وين ...!!
معليش بس ااااخر سؤال ...
لما تقول للزول انتا ماشي وين...!!! و يقول ليك ماشي السما الأحمر ...!!
السؤال ...هل هناك سما أحمر ...!!!؟ وإذا كانت الإجابة لا ....!!! ليييي بقولو كدا ....!! ولماذا تم اختيار اللون الأحمر الأزرق مالو ...!! وهل هناك اي علاقة بين السما ( الأحمر ) والسما ( اليبلعك ) ...وانت بدر ( السما ) في علاك ....غايتو في علاك دي بتكون بت عمهم في الحسبة ...!!!
عليك الله ياعلوب ياخ ركز معانا ياخ قلتا في مشكلة عايز تطرحا
تقعد تزازي تخش بي هنا وتجي بي هناك .....تجيك ( الكشه )
ياخ .....!!
( كلو هين بس ما تكون ( الروحية ) ديك ....)

ايوااا نرجع للمشكلة ) ...!! بسسس ...!! اتذكرتا ..!!
المشكلة الداير أقولا ليكم ببساطة إنو أي ( فرطوق ) في حلتنا دي قايل نفسو أفهم زول فينا وله القدرة علي حلحلة كل قضايا الجماهير ....( تطير عيشتم الجماهير ) كان أي زول داير يحل مشكلتم ...!! في النهاية ياكلم ويمشي ...!!!
يعني بس بالمنطق كدا معقولة الزول ممكن يفهم في الموية والكهربا ....والدقيق ...!! والهلال ...!! والرقشات ....!!! والحلاقة ....!!! والسلم التعليمي ....!!! والتطعيم ...!!! والسلع الرأسمالية ...!!!
بالعقل كدا ....!! القصة دي ...ممكن...!!؟؟
الجواب ...!! أيوه ممكن ...!!!
وفِييي حلتنا دي مابعيد ...!!
يعني هسا لو فتحتا ليك اي موضوع من المواضيع أعلاه بتلقي أكتر من ستة متحدثين رئيسيين مستعدين يشيلو الليلة ....!!! غير الشيالين البي ورا ...( والكنداكا سيدي سيدي الاراكا )
ما بقصد يعني واحد يحكي عن موضوع ويترك بقية المواضيع لبقية المتحدثين.....لا لا لا بحكي فيها كلها ( سلطان زمانو ....!!! )
اها هسا دي بالجد ما مشكلة ...!!؟ وكبيرة كمان ...!! مشيلين ( مخهم ) دا ( اوفر لووووود )
‏Overload
ساااكت كدا في الفارغة ....!! عشان كدا مرات بتحصل ( رترته ) ...!! ( الحمولة زايدة ) ...!!!
إنتو قايلين الخواجات ديل متقدمين علينا بي شنو....!! بس ياهو ( التخصص ) دا ...!!
يعني النقول مثلا ..!! مثلا يعني ...!!! في خواجه بفهم في الخشب ...!!! 🔨 الخشب الوااااحد دا ...!!! يعني تخصصو خشب ...!!! أها الخواجة دا ( مخو ) دا تاني مابدخل فيهو حاجه غير ( الخشب ) ....!!! ولا حتي قبول خاص ....!!
( خشب يعني خشب ....!!!! ) لذلك هذا الشخص بكون بعرف عن الخشب دا اي حاجه من طقطق للسلام عليكم ....!!! بطقطقو طقطيق ...
( والعود كان مافيهو شق مابقول طق ....!!! ) دا ياهو الفالحين فيهو نحنا ...!! نص زمنا مضيعنو في الحكم والامثال والأقوال المأثورة .....!! ( قال طق ...!! وقال واي ...!! ) ....!!!
والخواجات الوكت داك ( يطقطقو ) في الأبواب والشبابيك والخشب المقاوم للحريق ....!! وهنا يكمن ( الفرق ) ...!!! وفِي رواية اخري ( يكمن ( الطق ) ...!! طوااالي (طاقننا ) 0/6 ....!! و بالتخصص ....!!
اها ناس قريعتي راحت جماعتنا ديل عايزين يفهمو في الخشب

والحديد ...!! والقهوة ...!! ومخرجات الحوار الوطني ....!! والية التبادل السلمي ...!! والدوري الانجليزي ( شرح وتحليل ) دي كمان ( مادة اختيارية ) ..!!! (برضو بشيلوها) ....!!! مع ميكانيكا السيارات ....!!! كل القيامة الرابطة دي ...!!!
معقوووووولة لكن ..!!؟؟ دا كلام دا ....!!
وبي كدا نكون لا لمينا في الخشب ولا لمينا في الكرور القاطرنو دا ...!!!
كترنا المحلبية...!!! وجهجهنا القضية
زي عمك عطية ...!!!
عطية دا جارنا في الحلة ......زمني دا كلو ماسمعتو بتكلم كتير ودايما ما اشيد بهذه التجربة الرائدة قبل ان تنهار في ذلك النهار ....!!! غايتو الْيَوْمَ داك فهمني كتاب ...........
لاقيتو ليك في اللفة منتظر المواصلات .....سلمتا عليهو وركبنا سوا ....اها يازول بعد اكتمال النصاب أعلن سائق الحافلة عن قيام الرحلة 1209 المتجهة ال السوق العربي ....!! وأغلقت الأبواب بعد سماع النداء الأخير والصعود الي البوابة الرئيسيّة الشافع يكوركً ذي الجرس ( عربي..!! عربي..!! عربي عاااااربي يا )
البسمع عربي يقول (مول دبي ) ....!!

المهم تحركت ( الحافلة ) مع دعاء السفر....!!! 🚌
أها لازم تلقي ليك واحد من النوع داك البكلم الناس بما يدور في خاطرو ...( الله يدينا خاطرو بس ...!! ) لانو الحركة دي في العالم كلو مافي ....!!! إلا نحنا ... الزول عادي ممكن وسط لمة كدا يقوم يقول ...
( غايتو ناس الدنيا ديل الله يدينا خيرم ...) ...!!!
كدا بس بي صوت عااالي وقدام الناس...!! ومافارقا معاهو اذا كان بعرفم ولا مابعرفم ....!! حيردو عليهو ولا لا ...!!! المهم إنو عمل العليهو وذاع بيانو دا علي الهواء ولكل الناس ...!! شاء من شاء وأبي من أبي ....!!!
ماعرفتها دي شنو ...!!! فضفضة ولافرفرة ...ولا مسخرة ولا سمكرة ......ولا شنو....!!؟؟ والله ماعرفتا ...!!!
بس يرمي ليك كلامو دا كدا دون إيضاحات ....اها لو لقي ناس شاركوهو بالتعليق ممكن يسترسل ...!! ولو كمان وقفت علي كدا بقفل الموضوع ....!! ،..
( مشاركة الانسانية في مواضيعك الخاصة ...) ( في حب يا اخوانا أكتر من كدا ) ......!!
انا شاكي شك شديد جدا ( وعديب ددا ) انو ( مارك ) سيد ( الفيس بوك ) Facebook دا جاب فكرة ( ماذا يدور في خاطرك )
‏what's in your mind
دي مننا
ياخ نفس الفكرة....!! كل الفرق حقتنا( شفهية ) وحقت الفيس مكتوبة ....!! بس قطعا نحنا الجبناها اول ....!!
هو ( الشفت ) أضاف انو الناس الحتشاركم أفراحك واتراحك ديل أصدقاءك .....!!
ونحنا حنرد عليهو في المحكمة الزول دا ....!!
لأنو حنرفع دعوي حقوق ملكية فكرية نيابة عننا كلنا ويدكم معانا بالله ياشباب ....!!!
( مارك ) دا لو طلعنا منو بي مليون دولار بس ...!! في ناس كتيرة حتكون عبرت ....
هو طبعا حيقول ( حقتكم ) دي الزول بشارك حاجاتو مع ناس أصلا ما بعرفم بس لقاهم قدامو....ودا إقحام الآخرين في مواضيع مابتهمهم وتعدي علي الخصوصية أما في ( الفيس ) فانت تتشارك ( الخاطرة ) مع أصدقاءك ....!!
بس نحنا مجهزين الدفاع ....!!!
حنقول ليهو منو القال ليك ما بعرفم ....!!
ونشغل ليهو أهل الحارا ديل أهلي ....!!! والله السودان دا كلو يبقي مارق ....!!! وفِي ناس بقلعو للبطان والجلد ...والصواني دي تمرق .....والنسوان تزغرد....!!! والله يا ( مارك ) تشوف نور...! انتا بتلعب ولا شنو ...قايلا ( أوكلاهوما )
وكان عندك شك ابقي مارق تعالنا جاي ....!!! نوريك أهل الحارا ديل اهلي ولا ...!! لا ....!! وبالمرا تعرف منو ( الشحن ) الفيس ...!!! تحسبو لعب ...!!
أها دا جا داخل علينا في الحافلة طوالي وقبل مايقعد كدا رمي ليك ( الخاطرة) بتاعتو ومايدور في ذهنو في تلك اللحظات ....( تقول لي الفيس بوك ) شوف القصة دي كيف ....
وبي صوت عالي وواثق قال ( السخانة دي حاتخلص متين ياخ ...!! انتهت مننا ...)
( كأنو إكتشف ليهو حاجه جديدة ...)
المشكلة بقت مش في الزول دا المشكلة في الزِّي ناس ( عطية ) الاتغشيت فيهو دا .....طوالي استلم ليك الموضوع ....!!!
وبدا ( الكومنتات ) ....
دبغنا ليك دبغ بغياب الأحزمة الغابية ومصدات الرياح وتأثيرات كل ذلك علي المناخ وكيف إنو ( الكسرة ) البناكلا دي سبب في ( الحر ) لانو بعوسوها بالحطب ...يازوووول موضوع طويل عريض ...!! والحطب من الشجر ...!! والشجر ...!! عايز مطر ....! والمطر عند ربنا وربنا جيب المطر ...!!
وندعوك مبتهلين يا الله أمطار تصحبها زوابع رعدية تهوزز ( عطية ) دا لما يتخجا ....!! قول اميين ....ياعطية
.....( وياعطية ) من الله والله بدّي الجنة ....!!! عامل رأسك الكبير دا ..!!
المهم ( عطية ) اتجدع ليك فينا لقي ليهو جمهور مضمووون
نمشي وين ماياها الحافلة دي .....!!! الا نطير
غايتو بلعناها قلنا كويس معلومات عامة .....!! بس مشينا محطة كدا لي قدام واحد تاني عمل مداخلة قال ...!!!
(غايتو ترامب لو ما رفع العقوبات د

ي يكون قاصدنا بس )
دي غايتو ماخاطرة ...دا بوست عديييييل )
طوالي زولك قعد يتحكحك المرة دي خشي لينا بي شخصية المحلل السياسي والخبير الاستراتيجي عطية اب طاقية ...!!!
ودخل ليك في موضوع العقوبات دا من جوووووه بحثا وتحليلا ( وتنكيل ) ...!!!
وكيف أن السياسة الامريكية تعمل لمصالحها وان السودان يحب ان يستعمل بعض أوراق الضغط والكونغرس والجمهوريين وقصص كدا ...
غايتو يا عطية أصلو انا ما قايلك بالمستوي دا ...!! طبعا بالمناسبة اسمح لي اقول ليك انك ( مرطنا ) مرض ...والدنيا سخانة والنَّاس زهجانة ...!! جنبي مرتين مقنعات كدا لما عطية بقول في كلامو دا ( وترامب والكونغرس واللوبي ...!! )
قالت للمعاها مسكين مايستاهل ...!!! ديك قالت ليها ( والله اهلو ذاتم بالغو يابت أمي يعني فاكنو كدا ...) ... اها نقعد لي جنس دا ...!!! كدا كويس ياعطية ...! أهو طلعتا ( مجنتر ) ...ألف ألف مبروك
أها بعد ما انتهي من ندوتو دي وسكت داير أتكلم معاهو يهدي شوية ..!! تاني قلتا أنا مالي ومالو...!!! ان شاءالله يغني في نص الحافلة دي ....هو ذاتو شكلو راكب اساااكت عدم موضوع.... الزول دا واضح إنو ماعندو وجهة محددة ...!! بس عشان لما يسألوهو كنتا وين يقول ليك كنا في الخرطوم وجينا ...!!! كلام النسوان صاح ...!!!
بس الحافلة وقفت نزل منها راكب ...!!! قربنا نبارك ليهو ...اخد أفراج ( من عطية السبب لي أذية ) ...وركب واحد تاني ...!! اها الراكب الجديد دا الله لا غزا فيهو بركة ولا كسبو ...!!! جا شايل معاهو موضوعو في جيبو دا ...اول ما اتوهط في الكرسي طلع ليهو منديل كدا ( شربااان ) أدا ليك وشو دا فوطه جد ....!! تمرو سممممح ...وطلع ليك جريدة الدار وقعد يتصفح ....!! المستشار ...!!
انا قلنا الحمد لله ينشغل شوية ...لانو شكلو كدا النوع الهاباش البقابض داك ... أول مادخل الحافلة سلم علينا أربعة مرات التقول نسابتو....ويضحك برا ....اها النوع دا خطر جدا البضحك برا دا ...لانو دا النوع كان مالقي ليهو زول يفضفض معاهو ...!! عادي بتونس مع روحو ...!! العينة دي لو لحقت لمت ليها في موضوع ......( ماسورة واتحلجت ....!! ) ...!! كمان يلقي ليك نوع ( عطية ) قسما بالله الا يلعبونا ( صفرجت ) .....!!!
المهم زولك يقرا سااكت ....ونحن ندعو له بالثبات ...ونتضرع للمولي خاشعين إنو يهدي سرو ...!! المهم أخدنا لينا صنة كدا مسااافة ولله المنة .....!!
فجاءتن العواليق دا بدأ يتدفق ويستفيق ....خلاص ما قدر .... رفع راسو من الدار وقرأ الملعب ...وجدع ليك الباص بالمقاس ( باص قون ...!!)
قال غايتو الله يستر ( ابن يعتدي علي والده بالساطور.....!! )
( دا عنوان البوست الولدوهو لينا في نص الحافلة ....!!! )
...عمل شيرshare من ( الدار )
اها كدا ما أتأكدتو انو ( مارك ) دا لعبنا ...وشال حاجاتنا
عمل بيها ( فيسو ) دا ...قضيتنا مضموونة ...!!
ياخ مالك علينا ياخ ...!! جاي بي سواطيرك
ومنو القال ليك الجريدة بقروها جَهْرًا ....اسمها جريدة ياخ
ما قصيدة الله يرضي عليك ....!!! يجروك من رجلينك الطوال ديل ( ركبتو وهو قاعد جنب اضنينو ) والدار في النص ...!!
انتا اصلو ماسمعتا ( أبو اللمين ) قال ليها بتقري في أية كلميني ...!!! وانتي مشغولة بجريدة ...!! تجي انتا ياخ عايز( تسمعا ) لينا ....
( أبو اللمين ) شنو كمان البتسمعو إنتا .....!!!
انتا حدك ( الخدير انا ماني حي ....والنقدو الطير انا ماني حي ....) ينقدك ( الدبيب ) البجيبو في ( ناشونال جيوغرافي ) داك ( ياللهول الثعبان يقترب منهم وهم نيام لكن انظرو
للمفاجأة التي تحدث ..!!! ) عرفتو ....!!!؟؟ بس ياهو دا
مالك علينا ياخ ....!!
وكما كان متوقعا اخونا ( اللغم ) دا اكتفي بقراءة العناوين ...والأخبار بالتفصيل كانت مع ( عطية ) الجزلي
ختف ليك الكلام من خشم الزول دا وبدا التعليق والبري والمرض ....!!
قال يا اخوانا دي ظواهر جديدة علي مجتمعنا ....دي المخدرات مافي غيرا ...الود دا اكيد مافي وعيو ...!!! يجب عمل حملة قومية لمكافحة هذه الافة ...!!! ومساعدة الشباب في إيجاد بدائل وفرص ...!! وداير يخش ليك في كلام الحكومة الكبار داك ...التوظيف ورعاية الشباب والأوعية الشبابية وحاضنات الاعمال والكلام الكبار كبار دا .....!!
بتصدقو في واحد قال للكمساري قرصة عليك الله عمك دا ذاتو ( قدانا ) ياخ نزلنا هنا ...!!! كدا بي صوت عالي ( الشعب بدا يتململ )
( عجبني ليك ياعطية ) فعلا قديتنا ياخ ...ماف غيرك ...
وهو ولا كأنو هنا ....غايتو جنس سقالة ...
ويادوب نحن عبرنا أجواء ( بحري ) داخلين علي كبري ( المك نمر ...) يعني المسافة الباقية ( للعربي) بتشيل ليها تلاته ندوات براااحة ....!!
بس هسا أهما خطوة تكمن في محاصرة ( عطية ) وعدم إعطائه طرف الخيط ...!!! وبالفعل سادت حالة من الهدوء و الصمت ارجاء الحافلة ،...وعمك بقي يتملل داير ليهو موضوع يتمطي فينا ....!! زووول

هببو ليهو مافي ...بقي يتلفت بالشبابيك لما وصلنا نصص الكبري ...!!
ووقع المحظور ...!! وجاء الإلهام ...!! من خارج الصندوق هذه
المرة ....شات الباص لي نفسو وجاب القون ...عاين كداااا بالشباك وقبل علينا قال الحمد لله البحر نازل ...!!
( زووول قال ليهو نازل وين مافي ...)
تاني ردا علي نفسو قال
انا قلتا ليكم مافي حاجه اسمها ( فيضان ) السنة دي لانو حصل تغييير كبير في المناخ ....والجو ذاتو اتغير ...شوف زمان كان ذي الوكت دا بنكون داخلين علي الخريف ...!! تدخل ما تمرق ياعطية ....!!! وكسر ليك فينا ( فصول ) ) ( وتغير مناخي ) وظاهرة التبخر ...... عايزين ( نستفرغ ) ..!
معقولة ياعطية ياخ
مناخ.. وسياسة ...وطاقات شبابية ....ومخدرات ...وترامب وترامادول ....!! مافي راجل غيرك في الحافلة دي ولاشنو المعني ..!! ؟؟؟
بس في واحد نزل كدا الظاهر من الزعل عايز ( يدور ) لينا
( عطية ) دا قبل مايفوت...!!! أها قبل مايتخارج كدا اتلفت علي عطية قال ليهو هسا دا غنا شنو دا بتاع أولاد الزمن دا وريهم عليك الله ياعمك الغنا زمان كان كيف ...!! ونزل ...!!
( تنزل فيك صاقعة الهي وانتا جاهي تفرطق اضنينك الواقفات ذي ابراج ( سوداني) ديل ....!!! ) عليك الله شوف الود دا
اها المره دي عطية بالقانون وبناء علي طلب الجمهور
( الولد نزل يضحك سااي بعدما فكا ( العبوة الناسفة) دي في الحافلة ....!!!
وعطية استلم ...!! ( بي سدرو المره دي ....) والنوع ده من الملاعب واسع جدا ...!! وأي زول في السودان دا عادي ممكن يقول ليك لاقيت ( سرور ) ...!!! وقعدتا مع ( كرومة ) ...!! ( والكاشف) قال لي
...!!
المرة دي درع ليك بدلة ( قدور ) .....!!! حصة كاملة عن الحقيبة وتاريخا ...!! وأم درمان وحي العرب .... ( والحقيقاب) ديل كانو بتلاقو وين وبفطرو بي شنو ...!!
والخدرو ناعس ...نامت ولا لسا ....!!
وود الريح صحي اتشاكل مع سرور .....
والخواجة ( برمبل ) كان فردة ود الرضي ...ولا عتيق .....!! وصحي ( برمبل ) دا كان عامل فيها خواجه ساكت وهو أصلا من مدني ...!!! ولازم طبعا تجي سيرة ( جورج مشرقي ) ( سيد القهوة ) وسيد الشي كلو ...( لحدي قريب دا انا قايلو مدرب المريخ ...!!! )
المهم يازول ماخلي صفحة للحقيبة دي اهم الفنانين واهم المنعطفات ...!! والعربية تشيل ( وتنعطف )بينا تارة لليمين وأخري ذات اليسار...( وتقوم بينا العربية ...!!)
هو السوق العربي دا مالو بقي بعيد كدا ...!!عدينا( الخارجية) الله يخارجنا بالسلامة بس .....!!
أها ( عطية ) وكت ما لقي ليهو ناس ( يشيلو ) معاهو في الحقيبة دي ....!!! كضم ( المعفن )
وبفضل الله بدأت ملامح السوق العربي تلوح في الأفق .....!! والزحمة بدت تزيد ....والنَّاس البرا بقت قريبة من الحافلة ...وأصوات مناديب المبيعات في الخارج أضحت أكثر وضوحا وشفافية ...
( نضارااات ....ساااعات .....شواااااحن.. ) يااااااا
انا ( يااااا ) الاخيرة دي ( بتشلني ) من الفرح سمحة ياخ ..يااااا ....فيها ( اكشن كدا ) ....!!!
واختلط الحابل بالنابل ...!! لحدي ما تصل مرحلة انك مابتعرف الحافلة دي ماشا براها ....!! ولا شايلنها الناس ديل ...!! 😳
اها في عز هذه الأجواء المشحونة ... أبت نفس ( عطية ) إلا أن يقدم لحن الختام ....!!!
عارفين الراجل ( المطرطش ) دا قال شنو ...!! ؟؟
قال في ( اليابان ) الناس بتستخدم المواصلات أكتر من العربات الخاصة عشان كدا مافي زحمة في الشوارع ...
عمك حالف ينزل من الحافلة بدرجة وزير للنقل ...!!
واحد طوالي قال ليهو والله كلامك صاح المواصلات في (اليابان ) كان فيها واحد زيك كدا ...كان زول ركب مافي ...!!!
..........!!!!!!
اولا لا لااااااااااا... ...هدف قاتل في دقيقة قاتلة ...والله اصفق وأعلّق ....!! والله أصفق وأعلّق ...ما هذا الهدف .....!!!! ماهذه الروووعة ...ما هذا الجماااال ....شوف شوق شوف شوف فعلها الساحر ...وفي الوقت بدل الضايع ...أين انت يارجل .....أين كنت ...!!!!!
من الصباح عطية يتفسح فينا دمرنا كرهنا الحافلة وكل انواع ( الدواب )
عفيت منو الولد دا ....صدقو شدة ما اتكيفتا منو لما نزلنا مشيت هنيتو واتعرفتا عليهو قلتا ليهو عجبتنا والله وعجبنا موقفك ....!!!
وعجبتنا كلمتك الفي الختام دي ....!! طلع اسمو ( الفاتح) ...!! قال لي ياخ معقولة نحنا مما اتحركنا ماعندنا شغلة غير الزول دا ...!!
ينصر دينك ياخ وفتح الله عليك يالفاتح أخوي ......
اصلو كدا نحنا .....!!! ناسنا ديل صبوريييييين
لكن اذا وصلو الحد ...ينبغي للرهيفة أن ( تنقد ....)
قال مالم يجرؤ شعب الحافلة أن يقوله
وترجل عطية ( الأذية ) تزفة لعنات ( الراكبين )
يبدو ان الحافلة الجابتنا في طريقها الي رحلة العودة العكسية من ( العربي ) الي ( بحري ) لانو شايف لي كمساري تاني غير الجابنا داك مسك القصة ...!!! اكتشفتا انو الكماسرة ديل بفتحو فرص لي بعض وخانا

ت ....!! ذي الحركة دي
داك يجيبا من بحري ودا يرجعا ...!! قوبة منكم والله
دايرين لينا وزير كمساري ...!!
بس قعد يكورك بذات الجرس والإيقاع
شعبية ...شعبية ...شعبية..... شاااعبية يا ...
في رحلة جديدة تحمل في داخلها ....أمثال عطية
وأشباه (الفاتح ) وبعضا من ( علوب ...) واخرين
انطلقت الرحلة من جديد وتوهطت الحافلة الطريق
وهي تبحث عن شارع جديد ....!!!
والشارع فاتح في القلب والقلب مساكن (شعبية )
يموت ( عطية ) والأرض تنبت الف ( عطية )
شاااااعبية ياااا....!!!


#اشياءبسيطة ..

حبوبة بتحكي لي اولادا .. عن زمن الجمال و الطيبة .. تتحسر تقول يا الله تاني تجيبا ❤️

شاقيني خرير النيل الأسمر .. متوسط ضلع الحب الأبدي .. بتدفق في جواي جداول .. 💚

وأنا أمي شيالة تقيل كضابة ي دنيا وفقر كان قلتي بتهزيها يوم انا أمي غالباك بالصبر 😍❤

عن حبيبتي انا بحكي ليكم ضل ضفايرا ملتقانا❤️

أمي الله يسلمك يااا يمااا الله يسلمك 😢❤ #ميم

ولا ﺗﻬﺘﻢ ﻳﺎ ﻳﺎﺑﺎ
ﻭﻻ ﻳﻬﻤﻚ ﻛﺘﻴﺮ ﻳﺎﺑﺎ
ﺑﻨﺎﻛﻼ ﻛﺴﺮﻩ ﺑﻲ ﻣﻮﻳﻪ
ﻭﺑﻨﺤﻤﺪ ﺭﺑﻨﺎ ﺍﻟﺠﺎﺑﺎ
ﻭﻫﻲ ﺯﺍﺗﺎ ﻛﺘﻴﺮﻩ ﺍﺻﻼ ﺟﺎﺕ ..

#EiLaF

ولمحت فيك راحة المشاوير البعيدة ولفحت النسمة الحنيـنة الجاية من جوف المضيق ❤
🎶

للتواصل وابداء الاراء يمكنكم التواصل علي الحساب ادناه ..

@mgddin

سبحان الله وبحمده ، عدده خلقه ، و رضا نفسه و زنة عرشه و مداد كلماته ..
سبحان الله وبحمده ، عدده خلقه ، و رضا نفسه و زنة عرشه و مداد كلماته ..
سبحان الله وبحمده ، عدده خلقه ، و رضا نفسه و زنة عرشه و مداد كلماته ..

وجود الاخ في الحياة هو حضور لصديق أبدي ..
وصخره تستند عليها عندما تكبر ..

صباح الخير عليكم ..


#3mr ..

اي زول بي همو ..


#3mr ..

#✍🏻بلاغ_رقم45


اما قبل :-
ممتن انا لكل الذين احبهم .
وعاجز انا عن الكتابه ، فلملمو حروفي عسي ولعل #لكوليتا الاعذار في ساعات الغياب .
#اما_قبل.....

_ يبدو الامر فخ ...
فعندما كنت صغيرا كنت اتمني ان اصبح مثل جدي ، في كل شي حتي عندما يرتل القران ، او يبتسم لجدتي .
حتي عندما يتافف من شي كان نصيبه النسيان .
كان الامر بالنسبه لي متعه ان يحكي لي عن كل التجارب التي صنعته كما احب .
_ تلك المؤلمه واخري ربما رسمت علي وجهة طعم الابتسامه حتي عندما يحكيها .
يبدو الامر برمته كان فخ يا كوليتا .
اليوم احتاج لزياره طبيب الاطفال ليعالجني من كل الامراض التي بسببها بداء شعري في البياض .
يبدو الامر فخ يا كوليتا
وتبدي انتي في الجانب الاخر ترسمين ملامح طفلتي التي ربما تتمايل كخصرك تماما .
تغني بصوتي الاجش ، وتنادي فالمسارح باسمك .
_ غني انتي في الجانب الاخر وساغنيك شوقا وحدي .

الحياه ايضا فخ
رغم ان جدي لم يخبرني مباشره بامرها حتي لا اصنع سيناريو مشابه لقصته .
كان يحكي تجاربه وهو مبتسم وكنت اصغي وكلي شوق بان لا ينتهي .
_ احبه حد التعلق رغم انه لم يسالني عنك ، ورغم حديثي الليلي معك كان يشهده معنا احيانا فهو ايضا يناجي محبوبه الله .

ربما هكذا التصوف يكتمل في وجه جدي يغفر لي الهفوات ، ويدعو من قلبه ان يوفقني الله رقم الاعتراضات التي اقدمها له في الدين وفي الحياه.
جميل هو ومتسامح كوجهك تماما ، كعينيك يا كوليتا .
يدس لي الافراح وعند فرحتي اتوسد قلبك وحده .
كوليتا اصنعي الفرحه ونامي علي وساده الحب اللئيم .

يبدو الامر فخ ، فعندما كنت صغير حكي لي ابي عن تفاصيل انثي تدعي *عزه* زرع في قلبي حبها حتي ظننت انها احدي اقربائي .
وعندما كبرت ادركت انها ليست سواء وطن ادعاه الخليل وتغني به ، فاحيانا ما يقربنا لحب الوطن صوت انثي او دعوه انثي او #وجهك.
_ كانت تقاسمك قلبي فاحببت النيل الجميل وصديقي منقو ، ومريسه ميري تلك الجميله التي تسكن طرف حينا .
كانت شامخه الصدر ، رغم انها ارضعت ثلاثه .
وجميله البشره
وكشجره جدي في الطول ، كنت اعشق تعريها ايضا ، وانفلات لسانها والاعوجاج الجميل .
رحلت ميري ايضا ، وبدا الوطن يفقد ظله .
_بكيتها لثلاثه ليالي ، لم ابكيها وحدها بل شملت جوسيف ايضا بنص البكاء .
يبدو ان امي ايضا كانت تحبها فقد اهدتها ثوبا كانت تلبسه ميري في اعياد المسيح (كساري) .
كنت اسرقه في الايام الاولي لاشم رائحتها ودعوت الله ايضا بكل الصالحين اللذين اعرفهم ، فلم تاتي .
حتي انني ذات سجده دعوته بيسوع وبعيسي فلم تات ايضا .
يبدو ان الامر كان يحتاج لاخر ليبكي في صلاه ، ليعيد الوطن تماسكه .
اصبحت اكره النظام ، وكنت علي يقين بان دعوه عاهره واحده علي غلاء الاسعار كفيله بان تغير نظام الاقتصاد في بلادي .
كرهت المنابر ، رغم انهم كانو يحتكرون الله في رسائل وعظهم ، والتظاهر بالطهر وتكفير امثالي من مقصري اللحي ولا يهتمون بامر ثيابهم .

كوليتا فلنغن للوطن كلما حلمنا بالحب والسلام فغني معي يا جميلتي .



#عثمان_الخطيب

ﻳﺎ ﻓﺮﺣﺔ ﻓﻰ ﺑﺤﺮ ﺍﻟﺴﺮﺍﺏ،،
ﻳﺎ ﻛﻠﻤﺔ ﻓﻰ ﺍﻭﻝ ﺟﻮﺍﺏ،،
ﻳﺎ ﻭﺍﺣﻪ ﻓﻰ ﻟﻴﻞ ﺍﻟﺼﻌﺎﺏ،،
ﻳﺎ ﺧﻴﻂ ﺷﻌﺎﻉ ﻭﺳﻂ ﺍﻟﻀﺒﺎﺏ.. 😍

فك المحنه وختنا نحنا 😅 ..

#3mr ..

القهوه كيييف ومزاج ..


#3mr ..

التلاته نيسانات ..


3mr ..