أشياء بسيطة

من الظروف ما تشيلي هم ..

1.22K views16:17

استثنائيه 😉
؛

متذكره !!؟؟
مصطفى لما قال وضاحة يا فجر المشارق! هو تقريباً ما كان شافك لسه، قصدي ما كان عارف إنك حتتولدي، و انا لما سمعتها ما كنت فاهم فجر المشارق دي يعني شنو....
المهم اول يوم لاقيتك فيهو،،،!! عرفت مصطفى كان قاصد شنو بفجر المشارق دي 😅.. لاكين انت بتشبهي شفق الغروب اكتر على فكرة،،، ستيفاني ماير لما كتبت رواية الشفق ( twilight ) برضو ما كانت بتعرفك...
المهم،،،
النبطشية (الديوتي) امس كانت مكَدِّسة شديد،،، فإتذكرتك طوالي،،، استني استني،،، ما تكرفسي وشك،، هو ببقى احلى لما تكرفسيهو بس عواقب الكرفسة دي ما حلوه،،، و انا ما بستحملا،،،
انا على طول متذكرك اصلاً،،، من غير أي مناسبة و الله،، بس بمناسبتك إنتِ،،،
لاكين امس على غير العادة كَدَاس النبطشية ذكرني بيك،،،
عشان انا اساساً كلما الاقيك الاحاسيس عندي بتتكدس كده و مشاعري بتكون ملخبطة،،، المهم الدنيا بتجوووووط كده و ببقى ما فاهم شي،،، فبفقد الادراك في اللحظه ديك،،، و ما بكون واعي بتصرفاتي،،،
بالضبط زي ما حصل في نبطشية امس،،، قاعدة قدامي العيانه و بكتب ليها في الروشته،،، لما خلصت لقيت نفسي رسمتك 😨 ،،، تصدقي!؟،،، شالتا و مشت الصيدلية،،، سبحان الله،،، الصيدلي صرف ليها ادوية،،،، تخيلي !!! ،،،، بالروشته الفيها صورتك،،، ههههه لخبطتك صاح !؟ انا برضو كنت ملخبط وما فاهم شي،،، حتى الادوية البكتبا بقت بتشبهك،،،،، ده شنو ده ياخ 😵،،،
المهم،،،
مصطفى لما قال لي حَ تَجِي البت الحديقة،،، و قبل ما يكمل لي كلامو ،،، الكهربة قطعت،،، كتلني الفضول طبعاً،،، و بقيت منتظر الكهربة تجي،،، لما جات و فتحت التلفزيون،،،! لقيت مصطفى مشى 😥،،، كنت عايز اسألو،،، البت الحديقة دي شنو!؟ و بتجي من وين!؟ فرقها شنو من البنات!؟
المهم،،،،
نسيت القصة...
لما اتلاقينا،،، بَتْكلَّم عن اول مره اشوفك فيها طبعاً،،، كنتِ واقفة جنب المكتبة،،، كان في برد شديييييد،،، كنتِ لابسة جَاكيت كده ،،، الياقة بتاعتو كانت بتتحرك مع الهوا تقريباً،،، الشمس كانت ضاربة في خدك الشمال الكانت متلصقه فيهو واحدة من رموشك و عاكسة في طرف ياقة الجاكيت،،، في اللحظة ديك اتذكرت يوم الكهربة قطعت،،، لما مصطفى مشى خلاني منتظر،،، ياخ مصطفى ده غريب ،،، بعرف الحاجات دي من وين!؟
هو لما قال لي انك ح تجي! هو و انا ما كنا بنعرفك،،، تخيلي!؟ ههههه و الله جد... بس هدا إنتِ جيتي،،،، و انا زاتي استاهلك ياخ😉...
.
لاكين مصطفى ده ليه ما قال لي انك ح تمشي 😧 !؟ بالغ معاي شديد...
ياخي دقيقه دقيقه،،،، هي الكهربة مش كانت قطعت!؟،،، و مصطفى ما كمل لي كلامو،،، احتمال كان عايز يقول لي انك ح تمشي،،، لا لا لأ ،،،، لو كان عارف انك ح تمشي ما كان وراني إنك جاية،،، عشان انا ما انتظرك،،، و قلبي يتكسر،،، انا عارفو مصطفى ده كان زول راقي.

المهم؛
إنتِ،،،، و مصطفى سيد احمد،،، و قلمي،،، و النبطشيه! ،،،،،
لما تتلموا ! ،،،،، أنا بتلخبط.
.
.
.
استثناء اخير:

هسه!
مصطفى مات،،،
.
و إنتِ مشيتي،،،
.
و أنا،،،
.
و خلاص..

❤1👍1😁1

1.36K views18:51