يوميات #علوب ...15....طار فى المطار ..!!!

اخيراً ياعلوب ابتسم القدر وظهر المكتوب ....!! ولمينا لينا فى وظيفة ..!!! شعور جميل بس غير مكتمل ...!!! شغلانية كده مؤقته فى شركة شحن وتخليص ..!! يازول تخليص ..تخليص ..خلينا نخلص من الحاله العلينا دى ....!! المهم طبعا جاى متحمس جدا للشغل ..!! بقوم من سته صباحا ...اول زول بجى المكتب ..!! قلتا ياعلوب لازم ثبت نفسك..!! والجماعة ماصدقوا ..!!! علوب امشى البنك ...!! علوب الحق الطياره فى المطار ..!! علوب راجع البضاعة ...!! علوب شوف البوليصة ....!!! علوب..!! علوب ..! علوب علوب تطير عيشتو ياخ ...!! انتو كنتو بس راجين علوب ده ولا شنو...!! المهم قلتا ياخ أصلا هذا هو تعب البدايات استحمل شويه ياابو علوه وبكره احلى ....!! هو أصلا انتا كنت لاقي شغل ..!!؟؟ وصراحه الوظيفة الجديده خلتنى اشوف عوالم جديده من الداخل ..يعنى مثلا المطار ...!!؟؟ ده بالنسبة لى مكان عندو مكانه خاصة فى خيالى ...محل الطيارة بتقوم والرئيس بنوم ...(استغفر الله ...الرئيس بنوم فى الخرطوم) ...خلينا فى الطياره ...!! المهم يازول ...دايما بتخيل انو ده مكان حالم وجميل ومنظم والناس الشغالين فيهو ديل ذاتم ...ريحتم مطارمطار كده ...ولبسات ..!! وساعات ..!! وانضباط...!! لكن بالجد اخدت لى كم صدمه كده ..لمن فهمتا حاجه ... ...لانو بحكم الشغلانيه الجديده دى ..أدونى ديباجه كده دارعا فى سدرى ده
بنقشط بيها فى اى مكان من باب المطار لحدى باب الطياره....!! مرورا بالصالات ...لمتابعة عمليات الشحن النهائية .واتمام إجراءات التخليص .....لكن بالجد شفتا لى حاجات حيرتنى ...!!!
اول حاجه ده شنو ده ..!!؟؟ ديل منو الناس البتلقاهم واقفين قدام الطيارة اول ماتنزل ديل ....!! يعنى اول مالطياره تقيف فى المدرج بتلقي ليك ذي خمستاشر واحد كده جنب السلم ...المستقبل ليه زول ...والمنتظر ليه وصيه ..!! والجا ساكت كده جابو الدرب...!!! ديل منو ديل .!!؟؟ وتبع وين ..!!؟ لا .. ولمحتا لى واحد كده لابس ليهو حاجه كده بين (السفنجه والشبشب ) ومكفكف بنطلونو ..!! وشايل ليهو مسواك ...!!! والله ماعندنا اى اعتراض على اللبسه ولا المسواك ..!! اريتو حال السرور ..!! لكن ياخ الكلام ده ماهنا ...!! الكلام ده هناك فى بيتكم فى حوشكم الكبير داك انشاءالله (الشبشب ) ذاتو يكون فرده واحده ...والمسواك ده عذبو عذاب ماتخلى فيهو حاجه ....(النضافه ذاتا من الإيمان) ...اخد راحتك بالكااامل ..!! لكن ماهنا ياخ ....!! وكمان تحس بيهو جاييهو احساس كده انو انا ماشغال بأى زول ..!! خاصة لما يدى ليك المسواك ده عضه بالجنبه كده ... !! ولا بالناس النازلين من الطياره ديل مش لو جايين من لندن ولا جايين من الرياض...!! ياوهم ...!!( تعبيرات وشو كلها بتقول كده ...!!) لكن أقول ليك بأمانه وماتزعل ...والله انت الوهم .....!! والله ده مامنظر بطلعو بيهو الشارع ..!! خلى المطار..!! وواقف قدام الطياره كمان ...!! اى عرفنا انك واسطه.. وحكومه...وراستا ..!! وصايم يوم الاتنين .. وكل حاجه ..بس ماهنا ياخ ..!! ماهنا ...!!؟ وبالجد المشكله والله مامنك ..!! الكارثه من الخلاك تزحف لمن جيت هنا ..!! معقوله ياخ ..!!
افرض نحن عارفنك. والحاله واحده وبلعنا المشهد ده كلو واستغفرنا وقلنا مامشكله ..!! .رهيب..!! وفظيع ..!! وخطر !! وأبو مسواك ...وصواااام ...!!وسودانى وافتخر ..!! واى حاجه ..ياخ الحته دى مابتجيب ليها ضيوف واجانب ..!! يقولو شنو بس ..!!؟ ياهو ده السودان ..!!؟؟ انت ماوروك انو هم من النقطة دى ببدو ياخدو انطباعهم عن البلد ...عليك الله بس يقولو شنو بس ..ديل قاعدين وين ديل ..!! ولا الحاصل شنو ...اها بعد داك الزاير الشافك بى مسواكك وسفنجتك دى مش كان مشى بعد داك برج الفاتح كان جاهو الفاتح ذاااتو انطباعو ده ماحيتغير ...!! ذي البرج ده نفسو ..!! مش سموهو كورنسيا ولا كورنشيا ماعارف ...اها ياهو فى راس الناس برج الفاتح ...لانو المشهد الاول ده بنطبع فى الذاكرة خلاص delete تانى مابتشتغل بى اخوى وأخوك ...ماكلموك اصلو انو الانطباع الاول فى الغالب هو الانطباع الأخير ...ليه تعمل كده ياخ ...!! انت قول مسكين وعلى نياتك ..!! ليه أصلا ياخ يخلوك تدخل هنا بالمنظر ده ..!!! ليه يخلوك تدخل هنا ذاتو ..!! خلى المنظر والشبشب..!! بعدين خليك انت ...الجماعة ديل كلهم الجابن شنو هنا ذاتو ...!!؟؟ الطياره دى فى كل الدنيا لما تنزل بجو جنبها الفنيين ديل بشوفوا العجلات ..!! وبراجعو الزيت !! وبجو بى عرباتهم وعدتم ولابسين ..وعارفين دايرين شنو ...لكن كل واحد عندو قريبو شغال فى المطار تلقاهو واقف جنب السلم ..!!!؟؟ دى ما ادونا ليها ..!! بعدين دى اسمها منطقة السلامه يعنى هى ذاتا خطره على الركاب والطياره ذاتا ....!! لاحول الله ..!!
اها كمان لقيت ليك الناس الجايين من بره ديل ذااتم ..!! حقننا ديل ..!! السودانييييين .. خليهم الأجانب ..!!! غايتو فيهم

واحدين كده حالتم جد صعبه ...!! الواحد اول ماينزل من الطياره ...ينزل ليك فى الانتقاد والملاحظات ..!! ..
ويبدا ليك من الجو ..!! افففففف سخانة شديده ..!! سخانة ..!!!؟ الأخ سويدى ولا شنو ..!!!!؟؟ وانت المجبصك بالبدلة فى الحر ده شنو ..وتلقاهو جاى من درجة حرارة 40 ....!! لكن يقول ليك الشمس ذاتا هناك مكندشه ...!! اها كمان وبنات صغار كده مفلقصات .!! يضحكن على اى حاجه يشوفوها فى المطار ...!!.يعنى نظام ده شنو التخلف ده ..!! ديل انا مابلومن أصلا .....!! بلوم اهلم ديل ...يفهموهن انو فى النهايه دى بلدم ...!!؟ صحيح الحاله صعبه لكن فى النهايه مافى داعى لى جنس ده ..!!
اها كمان الناس ديل كلهم الجايين ديل فى النهاية جايين البلد وياها دى بلدم ..ومشتاقين ليها ..وجزء كبير مرقهم منها الشديد القوى ...!! ويعانو من كثيرا من تبعات الغربة والاغتراب ..وجايين يشوفو اهلهم ..!! والشنط دى مليانه هدايا وأشواق ...!!! مافى اصلو داعى للترحيب الحار ده من (بعض ) منسوبى المطار ...( ده شنو ده استقبال حلو ده ) يعنى صرصير وش عجيب ..!! تحلف تقول عندهم تار مع الجماعة ديل ..!! وتحس بيهم كده بيقولو ليك ..!! يعنى خلاص سافرتا وطرتا ..!! وعامل فيها مهم ..اها الليله جيتنا فى الدايمه ...!! والله الليله نفهمك حاجه ..!! بس ياهو ده الاحساس البجيك ....!!! ليه ..ليه ...ياخ ..ليه تحسسوهو انهم عملو جريمة ..!! الزول ده مامسكين ومتغرب من اهلو وصحابو ..وأسر كتيره معتمده عليهو ..!! بدل تخففو عنو بى ابتسامة كده وترحيب ...تعاينو لى كده تحلف تقول عدو ...فى شنو ياخ ...!! وانا اشيل وأعاين وأتأمل ...!!! أريتني لو كنت لافى لِسَّه .!! وخاتي صورتى الزمان ديك للمطار ....!! !
والطياره جات بتحوم ..جات تضرب الخرطوم ...ضربت حمار كلتوم ..ست اللبن ..وياحاجه لا ...ياخ دى ضربتنى انا ذاتى المره دى ....!!! وإذا تعب منك جناح فى السرعة زيد....الله يرحمك ياوردى .. ...اريتو كان بقت على التعب ..!!!! طيرك وقع عديييل المره دى ....الحمد لله الوظيفة الجديدة دى ذاتا مؤقته ..!! قال شحن وتخليص قال ..!! نحن نخلص من الهم نقع فى المرض !!..

#اشياءبسيطة ..

ﻳﻘﺎﻝ ﺃﻥ ﺷﺎﻋﺮﺍً ﺳﻮﺩﺍﻧﻴﺎً ﻓﻘﺪ ﻋﻘﻠﻪ ﻓﻲ ﺁﺧﺮ ﺃﻳﺎﻣه ﻭﺩﺧﻞ ﻣﺴﺘﺸﻓﻰ ﺍﻟﻤﺠﺎﻧﻴﻦ ، ﻭﺃﺭﺍﺩ ﺃﻫﻠﻪ ﺃﻥ ﻳﻌﺎﻟﺠﻮﻩ ﺑﺎﻟﺨﺎﺭﺝ ﻭﻓﻲ ﺍﻟﻤﻄﺎﺭ ﺭﺃﻯ ﺍﻣﺮﺃﺓ ﺟﻤﻴﻠﺔ ﺑﺮﻓﻘﺔ ﺯﻭﺟﻬﺎ ؛ ﻓﺄﻃﺎﻝ ﺍﻟﻨﻈﺮ ﺇﻟﻴﻬﺎ ﻭﺍﻟﺰﻭﺝ ﻳﺤﺎﻭﻝ ﺃﻥ ﻳﻤﻨﻌﻪ ﻓﺄﻧﺸﺪ ﻳﻘﻮﻝ :

ﺃﻋَﻠﻰ ﺍﻟﺠﻤﺎﻝ ﺗﻐﺎﺭُ ﻣِﻨّﺎ
ﻣﺎﺫﺍ ﻋﻠﻴﻨﺎ ﺇﺫْ ﻧﻈﺮﻧﺎ
ﻫﻲَ ﻧﻈﺮﺓٌ ﺗُﻨﺴِﻲ ﺍﻟﻮَﻗﺎﺭَ
ﻭﺗُﺴﻌِﺪ ﺍﻟﺮّﻭﺡَ ﺍﻟﻤُﻌﻧَّﻰ
ﺩﻧﻴﺎﻱ ﺃﻧﺕِ ﻭﻓﺮﺣﺘﻲ
ﻭﻣُﻧَﻰ ﺍﻟﻔﺆﺍﺩِ ﺇﺫﺍ ﺗَﻤﻧَّﻰ
ﺃﻧﺕِ ﺍﻟﺴﻤﺎﺀُ ﺑَﺪَﺕ ﻟﻨﺎ
ﻭﺍﺳﺘﻌﺼﻤﺖ ﺑﺎﻟﺒُﻌﺪِ ﻋﻧَّﺎ

ﻭﻋﻨﺪﻣﺎ ﺳﻤﻌﻬﺎ ﺍﻷﺩﻳﺐ / ﻋﺒﺎﺱ ﻣﺤﻤﻮﺩ ﺍﻟﻌﻘﺎﺩ ﺳﺄﻝ ﻋﻦ ﻗﺎﺋﻠﻬﺎ ﻓﻘﺎﻟﻮﺍ ﻟﻪ : هضا شاعر سوداني اسمه ( ﺇﺩﺭﻳﺲ ﺟﻤَّﺎﻉ ) ﻭﻫﻮ ﺍﻵﻥ ﻓﻲ ﻣﺴﺘﺸﻓﻰ ﺍﻟﻤﺠﺎﻧﻴﻦ .. ﻗﺎﻝ : ﻫﺫﺍ ﻣﻜﺎﻧﻪ ، ﻷﻥ ﻫﺬﺍ ﺍﻟﻜﻼﻡ ﻻ ﻳﺴﺘﻄﻴﻌﻪ ﺫﻭﻭ ﺍﻟﻔﻜﺮ ... !! ﻭﻋﻨﺪﻣﺎ ﺫﻫﺒﻮﺍ ﺑﺈﺩﺭﻳﺲ ﺟﻤّﺎﻉ ﺇﻟﻰ ﻟﻨﺪﻥ ﻟﻠﻌﻼﺝ ﺃُﻋﺠﺐ ﺑﻌﻴﻮﻥ ﻣﻤﺮﺿﺘﻪ ﻭ ﺃﻃﺎﻝ ﺍﻟﻨﻈﺮ ﻓﻲ ﻋﻴﻨﻴﻬﺎ ، ﻓﺄﺧﺒﺮﺕ ﻣﺪﻳﺮ ﺍﻟﻤﺴﺘﺸﻔﻰ ﺑﺬﻟﻚ ﻓﺄﻣﺮﻫﺎ ﺃﻥ ﺗﻠﺒﺲ ﻧﻈﺎﺭﺓ ﺳﻮﺩﺍﺀ ﻓﻔﻌﻠﺖ ، ﻭ ﻋﻨﺪﻣﺎ ﺟﺎﺀﺗﻪ ﻧﻈﺮ ﺇﻟﻴﻬﺎ ﺟﻤﺎَّﻉ ﻭ ﺃﻧﺸﺪ :
ﻭﺍﻟﺴﻴﻒ ﻓﻲ ﺍﻟﻐﻤﺪِ ﻻ ﺗُﺨﺷَﻰ ﻣﻀﺎﺭﺑُﻪ
ﻭﺳﻴﻒُ ﻋﻴﻨﻴﻚِ ﻓﻲ ﺍﻟﺤﺎﻟﻴﻦ ﺑﺘّﺎﺭُ

ﻭﻋﻨﺪﻣﺎ ﺗـُﺮﺟﻢ ﺍﻟﺒﻴﺖ ﻟﻟﻤﻤﺮﺿﺔ ﺑﻜﺖ ..
ﻭﺻُﻨﻒ ﻫﺬﺍ ﺍﻟﺒﻴﺖ ﺃﺑﻠﻎ ﺑﻴﺖ ﺷﻌﺮ ﻓﻲ ﺍﻟﻐﺰﻝ ﻓﻲ ﺍﻟﻌﺼﺮ ﺍﻟﺤﺪﻳﺚ !! ﻭﻫﺬﺍ ﺍﻟﺸﺎﻋﺮ ﺇﺩﺭﻳﺲ ﺟﻤَّﺎﻉ ﻫﻮ ﺻﺎﺣﺐ ﺍﻷﺑﻴﺎﺕ ﺍﻟﺸﻬﻴﺮﺓ ﺍﻟﺘﻲ ﻳﻘﻮﻝ ﻓﻴﻬﺎ :
ﺇﻥ ﺣﻈﻲ ﻛﺪٓﻗﻴﻖٍ ﻓﻮﻕٓ ﺷﻮﻙٍ ﻧﺜﺮﻭﻩ
ﺛﻢ ﻗﺎﻟﻮﺍ ﻟِﺤُﻔﺎﺓٍ ﻳﻮﻡَ ﺭﻳﺢٍ ﺍﺟﻤﻌﻮﻩ
ﻋَﻈِﻢ ﺍﻷﻣﺮُ ﻋﻠﻴﻬﻢ ﺛﻢ ﻗﺎﻟﻮﺍ ﺍﺗﺮﻛﻮﻩ
ﺃﻥ ﻣﻦ ﺃﺷﻘﺎﻩُ ﺭﺑﻲ ﻛﻴﻒ ﺃﻧﺘﻢ ﺗُﺴﻌﺪﻭﻩ.. ™

معليش يا نيل،اذا دمعك سقينا ورود
وما قامت..
ولادك حاضنم وجعك،يواسوك اغتراب عنك
وطن حدادي مدادي..و بزيد همك؟
تفوت لي تاني من تاني
وطن هو لا سر يمة لا يابا
و لي دمل الجروح يابا..
و لساك النشيد الحي
ووجع الغربة وح احي
نغنيك كان تلاقي الضي
تضمنا في للفريق والحي..
Mowda

الحكيم.. ❤️

ﺍﻟﺤﺰﻥ ﻻﻳﺘﺨﻴﺮ ﺍﻟﺪﻣﻊ ﺛﻴﺎﺑﺎً
ﻛﻲ ﻳﺴﻤﻰ ﺑﺎﻟﻘﻮﺍﻣﻴﺲ ﺑﻜﺎﺀً
ﻫﻮ ﺷﻴﺊ ﻳﺘﻌﺮﻯ ﻓﻲ ﻓﺘﺎﺕ ﺍﻟﺮﻭﺡ
ﻳَﻌﺒُﺮ ﻣﻦ ﻧﻮﺍﻓﻴﺮ ﺍﻟﺪﻡ ﺍﻟﻜﺒﺮﻯ
..

ﺍﻟﺒﻠﺪ ﺍﻟﺤﻨﻴﻦ سميتو ﻳﻤﺔ ﻭﻳﺎﺑﺎ
ﺑﻴﻦ ﺍﻟﻌﺎﻟﻤﻴﻦ ﻋﺰﺓ ﻭﺟﻤﺎﻝ ﻭﻣﻬﺎﺑﺔ..

صورة من الحرب العالمية الثانيه لجارتان تتجاذبان أطراف الحديث، وهما ترتديان قناع التنفس للحماية من الغازات السامة، تظهر ولع النساء بالحديث حتى في أصعب الظروف !!♤

ﻟﻤﺎ ﺍﻟﻘﻄﺎﺭ ﺻﻔﺮ ﻭﻗﻒ
ﺑﻬﺮﺗﻨﻲ ﺻﻮﺭﺓ ﻋﻄﺒﺮﺓ ..

ﺻﺒﺎﺣﻚ ﻳﺎﺑﻠﺪ ﺗﻌﻤﻴﺮ ..
ﻋﺮﻕ ﻋﺎﻣﻞ ... ﺻﺪﻕ ﺗﺎﺟﺮ ..
ﺻﻮﺕ ﺭﻛﺸﺎﺕ ﻭﺩﺭﺩﺍﻗﺎﺕ ..
ﻛﻮﺍﺭﻭ ﺣﻤﻴﺮ .. ™

إنت لو دايـــر السعـــاده
لا تخاصـــم لا تجــافي
عيش كأنـك راحل اسـه
بي ضمير مرتاح وصافي..♤

.ﺃﻧﺖ ﺃﺑﻬﺞ ﻧﻮﺭ ﻣﻦ ﺑﺪﻭﺭ ﺍﻟﻜﻤﺎﻝ
ﺳﺎﻃﻌﺔ ﻓﻴﻚ ﺁﻳﺎﺕ ﻣﻦ ﻣﻌﺎﻧﻲ ﺍﻟﺠﻤﺎﻝ
ﺗﺠﻌﻞ ﺍﻟﻔﻨﺎﻥ ﻋﺒﻘﺮﻱ ﺍﻟﺨﻴﺎﻝ
ﻟﻮ ﻧﻈﻢ ﺃﺷﻌﺎﺭ ﺃﻭ ﻋﺰﻑ ﺃﻭﺗﺎﺭ
ﺗﻨﺪﻫﺶ ﺃﻓﻜﺎﺭ ﻭﺍﻟﻌﻘﻮﻝ ﺗﺤﺘﺎﺭ❤️♤

انظر إلى انجازاتك .. و كافيء نفسك بفنجان قهوة.
احترم وقدر نفسك بفنجان قهوه فاخر ~~♤

ﻓﻰ ﺍﺣﻮﺍﻝ ..
ﺍﻟﺰﻣﻦ ﺻﺎﺭ ﺍﻟﻔﻜﺮ ﺣﺎﻳﺮ
ﻭﺍﻟﻴﺎﺑﺎﻙ ﺧﻠﻮ
ﻋﻨﺪﻭ ﺷﻦ ﺩﺍﻳﺮ.. ™

جمال الفال.. وراحة البال..وهجعةزول بعد ترحال..وتنّيةحلوة للشبال..ودنيتناومشاويرنا.. وغنواتنا الى ما بتِنقال... مافي أحلى من كده ؟؟..♤

من بف نفسك يا القطار ورزيم صدرك قلبى طار وين الحبيب

انت شلتو جيبو يا القطار

كم غربت من قريب وكم قربت من غريب
..انت شلتو جيبو يا القطار...♤

يوميات #علوب 16 ....علوب طراوه وهبوب ..!!

انا الليله اول مره اعرف يعنى شنو أصدقاء السوء ....!!مشيت لى واحد صاحبى مافى داعى لى ذكر اسمو ..المهم هو كان صاحبى شديد لكن لى زمن مالاقيتو ...فجاة كده ضرب لى تلفون وقال لى وين ياعلوب وين الغيبه الطويله دى اخبارك شنو ..!! زمن منك ..!! خلينا نشوفك ....قلتا ليهو ياخ انت الوين يا ( ......) مالك مسجل غياب كده وعامل شنو ...قال لى والله كلو تمام ودنيتنا حلوه ....!! اها انا وقفتا فى دنيتنا حلوه دى شويه ....!! لى زمن من جنس الردود دى .....!! لانو طوااالى كل ما تسأل ليك زول عن الأحوال بكون الرد ...عينة ..(ذي الزفت والحمد لله ) او النوع التانى ..(غايتو بس زهج وقرف ...نقول الحمد لله ) ...ولا البقول ليك ..(أهو غايتو تراهو الحال ياهو ذاتو الحال ...) ولو خلاااص بالغ الواحد يقول ليك ...(والله أهو مدردقين والحمد لله .....) اها بس ياها دى الردود ...!! غايتو البركه فى الحمد لله دى تكون هى الساندة القصة دى كلها وإلا كان الدمار الشامل ...!! لكن قصة كلو تمام ودنيتنا حلوه ..!! دى لى منها زمن بصراحه ..!! اها قلت ليهو يازول انت بى صحك ...ولاحركات منك ....!!!؟؟ قال لى فى شنو !!؟ قلت ليهو شنو التمام والدنيا حلوه ...قال لى والله ذي ما أقول ليك ..!! المافى شنو!!؟؟ .....(المافى شنو !!؟؟ الزول ده جنا ولا شنو ..!! هو الفى شنو .!!! ). قلت ليهو يا (........ ) (حتعرفو ليه مابجيب اسمو ) المهم قلتا ليهو عليك الله بطل حركاتك دى وادينا خبرك ...!!؟ قال لى والله خبرى تمام وأحوالنا ظابتا..!! انت مالك مستكترا علينا وكان داير تشوف براك تعال شوف ...!! قلت ليهو والله أبدا بسأل بس والله يزيد ويبارك...!!! وَمِمَّا يسعدنا ..!! وقلتا فى نفسى بس ده زولى ..!! انا براى زهجان وقافله معاى وأمورى بايظه وقدر الشغل اللقينا مع جماعة الشحن والتخليص ديل أهو خلص بسرعة وما لحق يشحن ذاتو بطاريتو تعبانه والحمد لله ...!! اخير النمشى نتكامل على زولى ده ونشوف دنيتو الحلوه دى ..!!؟ كان الدنيا دى ذاتا تمشى معانا .....!!! قلتا ليهو خلاص يافرده الخميس انا معاك ...!! فعلا يازول يوم الخميس دورت طوالى عليهو وعدنى فى بيتهم وبعد داك نمشى نتعشى مع بعض ..!! فعلا مشيت ليهو ...!! هو عامل ليهو اوضه كده فى السطوح بتاع بيتهم كنّا زمان بنذاكر فيها وسامنها (وكر الاشرار ...!! ) لانو بنعديها تلفزيون وكوتشينه ويوم واااحد فتحنا لينا لينا فيها كتاب مافى ...!!! وكانت عندنا فيها ذكريات حلوه شديد انا وهو ومعمر وإبراهيم ومصدق (عطر الصندل ) متذكرنو طبعا وباقى الشله ...!! المهم لقيتو راجينى ليك فوق واتسالمنا وبقينا نتذكر فى الأيام الخوالى ....!!! لاحظتا ليهو بقى ضعيييف كده ..!! قلتا ليهو شابكنا كلو تمام ودنيتنا حلوه ...مالك الجاك شنو ...!!!؟؟ ليه ضعفتا كده ...!!؟؟ اخد ليهو ضحكه كده قال لى ..بحب .!!! قلتا ليهو انت والله اخر من يحب ..!! انت تحب روحك دى بس ..!! ضحك تانى قال لى انت لِسَّه فى حركاتك دى ..!! لاحظتا انو بضحك بى طريقة هيستيريه شويه كده ..ماضحكتو البعرفا ديك ...!! المهم حاولت أغير الموضوع قلتا ليهو اها وأحوالك شنو شكلك امورك ظابطه تتضاحك كده ..!! اها وشغال وين هسا ...!!؟ ضحك ليهو ضحكه اكبر من ديك ذاتا ...قال لى شغال .!!!؟ انتا يازول جنيت ولاشنو ...!! اشتغل وين يعنى ...!! انا شغال فى اوضتى دى ........!! اها المره دى انا الضحكتا ....قلتا ليهو اوعى تكون بس بقيت فكى ...!! والله انت بتعملا يادجال ...!! وانا أقول الهلال والمريخ مالم طارو ..!! عاين لى كدااا عين ماريحتنى ...!! قال لى يازول انت عايز تمرق من أحزانك دى وتعبر ...!! قلتا ليهو ياريت ..!! قال لى بسس انا الليله بخليك اسعد زول فى الدنيا ..قلتا ليهو الليله الليله يعنى ولا حتورينى الطريق ...قال لى بطريقتو ديك ...(طريق التحدى ...!!) وتانى ضحك ...طريق شنو يازول انا بوليس حركة ..!!!؟ أقول ليك الليله يعنى هسه دى ..أخليك إمبراطور ...والله تشكرني لى يوم القيامه ..!! انا هنا اتوجستا شويه (قلتا زولى ده أكيد اتلحس ) لكن قلتا انت مالك ياعلوب خلينا النتابعو ونمشى معاهو لى قدام ..!! قلت ليهو جدا انا معاك الليله.... !! قال لى ظبت ..!! اها انشاءالله بس قلبك حديد ....! قلتا ليهو أفو..!! انا اخوك يامشاعر ...!! قال لى تمام ..انت جاهز ...قلت ليهو جاهز ..!! وقاااال كده مشى الدولاب وجانى ليك بى ورقه ..وجاب ليهو شوية حب كده بقى ينضف فيهو ..!! اممممممك ..بنقو ..!!! انا غايتو شعر راسى وقف ..ورجلينى نملو ...وبقيت ماقادر اعبر ...!! بس قلتا ليهو ده شنو يا (.....) ! بنقو....!! بس سرعة سكتنى ليك هسسس ده شنو ده ..!! خلاص داير تجيب لينا الهوا ...!! انت شلاقتك دى أصلا مابتخليها ..!! اول حاجه ده ما الزفت الانت بتقولو ده ...تانى حاجه ..ده نبات اخضر ...جميل
وصحى ..ويزرع فى بلاد الحبشة مثله مثل

اى نبات اخر وله فوائد صحيه عديده ويعتبر من فصيلة الأعشاب ...!! اها وحاتكم رصا لى الكلام ده ذي مابقولو ليكم كده وباللغة العربيه الفصحى دى ...!! قلتا ليهو والله الخلاك تتكلم ذى ابى فراس الحمدانى ده مابتكون من فصيلة الأعشاب ..ده مؤكد فصيلة الكلاب ..!! يازول عليك الله استهدى بالله ودخل الأعشاب بتاعتك دى ولا
بقوم امشى قال لى دايما مستعجل فى أحكامك ..!! وأصلك جبان وخواف مابتتغير...!!! اها كلمة جبان وخواف دى استفزتني شديد ..!! قلتا ليهو أوعك تقول لى جبان وخواف انت فاهم ...!!! قال لى لكن أقول ليك شنو ..!! نطتتا لى عيونك كده ..!! وتتراجف كلك ..!! ارجل ياخ ...اها انا كلمة ارجل دى خلتنى مابشوف ...!! قلتا ليهو انا راجل وأرجل منك ...!! قال لى كان صحى انت راجل شيل ليك نفس واحد من العشب ده ورينى رجالتك ...!! الوقت داك هو كان ولع المصيبة دى واخد ليهو نفس طويييل .....!! قال لى اها فى شنو يعنى الحصل لى شنو هسه ماياهو ده قدامك انا بكل قواى العقليه ....وشال التانى ..قال لى اها فى شنو ...الحصل شنو ...!!؟ سجارة عشبية المشكله وين مش أحسن من التدخين ..!! انا عارف انو راسك خفيف ومكنتك تعبانه ..!! بس كمان ماتفكها فينا ...اها انا هنا من الزعله والكلام البقول لى فيهو ده ..قررت أوريهو انو انا ماكده ....لكن انا بس رافض الفكره والمبدأ أصلا ....لكن ذي ده حقو اثبت ليهو انا انا راجل وماجبان وراسى ماخفيف واى حاجه ....!! طوالى قلتا ليهو انا مابتكلم عن قوتك ولا شجاعتك لكن ده مامقياس ..!! والبتعمل فيهو ده ماصاح .....!!؟ ضحك ليهو ضحكة لما انا ذاتى اتكيفتا .....(صراحة الضحكة كانت من الأعماق ...) ..وكرر عبارتى ..!! البتعمل فيهو ده ماصاح ....والله بس ذكرتنى أستاذ الجيلى بتاع العربى داك ...ومحاضراتو عن الصاح والماصاح وهو كلو غلط ...وتانى انفقع بالضحك ...!! انا ذاتى ضحكت اتذكرتا أستاذ الجيلى ..( قلبى ميت مرات ..صاح ..!!؟) لكن اتحمقتا شديد ...لكن وبينى وبينكم كده ..!! وتحت تحت..!! عجبنى الجو الهو فيهو ده والضحك المن الأعماق ده ..انا ذاتى طولتا منو ..!! قلتا ليهو عشان اوريك ...!! جيب السجاره دى هنا ...!! لكن هو ذاتو (شفت ) شديد ..!! و لمزيد من التحدى ..!! قال لي سيبك من السجاره دى ..!! انت ماقدرا ...!! خلينا فى اخبارك ..قلتا لى جماعة الشحن والتخليص كيف .!!؟ ياخ ماتخليهم يشحنو لينا من العينه دى كتير ويغيرو اسمهم من الشحن والتخليص ..!! للشحن والتخسيس ....عشان تعرف انا ضعفتا كده مالى ...!! وفقعا ليك ضحكه كده من النوع البقع فيهو الزول فى الواطه من الضحك ....والله انا ذاتى ضحكنى وكمان أعجبت بهذا الربط والتلاعب فى الكلمات ..مازاد اعجابى بهذه العشبه ..(انا ذاتى بقيت أقول عشبه ..!! يبدو انى هيأتا نفسى ليها ) ...!! طوالى قلتا ليهو مش قلت انا ماقدرا...!!!؟؟ انا حاوريك انا قدرا كيف ..!! وبعدها حاوريك أنك بتدمر فى نفسك كيف ...!!؟؟ طوالى فكاها لى ....!! والله ياخوانا شلتا لى نفس ....أريتني كان ماشلتو ..!! اول حاجه حسّيت ليك الدنيا دى لونا بمبييي....!! والسقف بتاع الاوضه دى بقى بعيييد ..!! والمروحه المعلقه فوق دى بقيت أشوفها تلف كدا وترجع تانى حركة ورا ..!! .... وزولى ده مره اشوفو ومرات أجليهو....!! اها لما شلتا النفس التانى ...بقيت بشوف انوار بس ...!! وحاسى انو نخرتى دى بقت طوييييله...!! وهو يعاين لى ومبسوووط ..اخر كلمه سمعتها منو قال لى تراك طلعتا ماهين والله ماقايلك كده ...!! اها كمان دى خلتنى شلتا النفس التالت وبمزااااج ....اها بعد داك هو الحكى لى انو انا عملتا شنو ....(لانو انا كنتا سلمتا نمرى خلاص ) او بالاصح صورنى بالموبايل ..والله ياخوانا انا لمن صحيت من الورطة دى وبشوف فى الموبايل كأنى بحضر فى برنامج الاسرة ...اول حاجه قلبتا لغة عربية فصحى .....! كأنو البتاعة ده جايه من بلاد الأندلس مش من الحبشه ....!! الحاجه التانيه نزلتا ليك تشخيص فى الحالة الراهنة ..!! وطرح وحلول لكل المشكلات العالقة ..وإيجاد حلول للتحديات الماثله ..!! ومشاكل الشباب والبطالة ..(ندوة بس ) ...المشكله طوالى نطيت من المواضيع دى وسألتو...(وده كلو هو مسجل فى الموبايل ) ...قلتا ليهو انت الاخترع الكشتينة منو ..!! ؟ وصوتو فى التسجيل ميت من الضحك ..اها اخر كلمة قلتها ليهو ...حاسى انى عايز انووووم ...ماعندكم غرف نوم ..!! وانتهى التسجيل وانا مامصدق انو ده انا ...فجاة سألتو ...انت الساعة كم ...!! قال لي جلدت النوم ده كلو وتسال الساعة كم ....اتضح انى نمتا فى هذا المكان حتى الصباح ...!!؟ يازول فجاة اتذكرتا ليك ناس البيت ومافى زول عارف انا وين نطيت من السرير لبستا جزمتى ومن غير ما أقول ليهو مع السلامه جرى على الباب ...اتذكرتا الفلم الوثائقي العاملو لى فى الموبايل ده جيت طوااالى راجع مسحتو ...!! وهو كان ردو بكل بساطه وسذاجه ...ياخ حرام عليك والله ده مابتعوض تانى ..!! عاينتا ليهو