Si putìssi, canciàssi certi menti,
chi nun canùscinu li veri sintimènti.

Si putìssi, livàssi lu dulùri,
chi 'ntà sta terra hannu li criatùri.

Si putìssi, mittìssi un pocu d'amùri,
rintra 'ddi cori chi unn' hannu calùri.

Si putìssi, vuciàssi a tutti chiddi chi hannu putìri,
dicènnuci chi li sordi quannu mòrinu l'hannu a lassàri iri.

Si putìssi, purtàssi 'nanticchièdda di luci,
dunni ci sunnu làcrimi e cruci.

Si putìssi, dassi curàggiu nun sulu a mia,
ma a tutti chiddi chi lu ristìnu mi misi pì la via.

Si putìssi, fàcissi tanti di ddi così,
chi la vita pi mia nun vosi.

Si putìssi, turnàssi arrè nicarèddu,
pi crìriri ancora chi lu munnu è beddu.

Si putìssi, dicìssi a tutti chi la vita è un ciùsciu,
e ora è inùtili chi fannu tuttu stu scrùsciu.

Si putìssi, canciàssi, livàssi, mittìssi,vuciàssi,
purtàssi, dassi, fàcissi, turnàssi, dicìssi.

Quantu così fàcissi,
si putissi!

🖋 Giuseppe Lodato

👉@sicilianewseinfo
📌@sicil_iaterramia
🌎@postidavedere
🌅@cartolinesiciliaterramia
🖋#poesia_siciliana