للامام الحسن العسكري
عليه السلام

يادمعتي.  من دمه صبي اعله خدي
يادمعتي.  بالبجي نواسي المهدي

عظم الله اجرك يغايب
يعين كلبك ع مصايب

يابو صالح.   يابو صالح
.......

يعين كلبك يابو صالح من دمه دموعك تصب
ولو من ليلة العاشر سيدي شظل بالكلب
تشوف ابوك كبال عينك موقفك كلش صعب
تبجي وانه اعرف عليمن راح اسولفهن واطب

تبجي لحسين ..... محد ينوح  اعله جثته
مرمي ع الكاع .. تنطك شما ناحت اخته

ابالك الشام ونوايب
يعين كلبك ع مصايب

***

فاتحه ابيتك واشوفك بيك لوعه  الكربله
شماتجي تعازيك وادم تذكر حسين وهله
شلون ظل اعله الترايب دامي محد غسله
ولا رضو زينب تنوحه ولا تنوحه العايله

انت سويت  ....  فاتحه ودمعه ومصيبه
وتبجي للشيخ  .. الجثته ظلت سليبه

وفوكه مالطمن حبايب
يعين كلبك ع مصايب

***

والدك غسلته بيدك وانت لفيت الچفن
كبل لا تعگد أزاره صحت  وعيونك بچن
حسين ليش اعله الوطيه ماتغسل وندفن
وليش تغسيله الحوافر سحگته وصدره انطحن

والدك مات .... بس الحسين اعله بالك
كربله وياك ...  سيدي حتى ابخيالك

لن شفت بيهه العجايب
يعين كلبك ع مصايب

**

والدك شيعته بيدك وانت نزلته بگبر
واللحد بيدك حفرته وجبت كافور وسدر
كمت بس من البواجي صارت عيونك حمر
تبجي لحسين وذكرته النايم بحر الظهر

من دمه تنوح ... للبقه بحر الظهاري
بلا گبر نام  ...  بلا فياي حسين عاري

ولا شريف الظل يطالب
يعين كلبك ع مصايب

***

الخادم موسى البطلي

يحسين الكبر ضيگ وريدنك
مو تنساني بدمعاتي احلفنك
———-
انه الگضيت عمري بمجلسك كاعد
جي ليلة الوحشه وياي متواعد
يبو كلب الحنين الما طرد واحد

اول ليله كون وياي اشوفنك
—————-
ضلمه المكبره ومامش عرف بيهه
بس دمعة مجالسكم تضويهه
تنسه اصويجبك ما ظن تسويهه

صح مذنب ولاجن حيل احبنك
———
هنياله اليشوفك ليلته الاولى
خاف المثلي باجر ما تروحوله
تنكر خادمك يحسين معقوله

ماتنطي بصديجك والله اعرفنك
——————
منك ابتعد وانت التجر إيدي
حنين ومن اجيك تكلي يوليدي
ما احسب ليالي الفرحتي وعيدي

بس احسب ليالي الشهرك وحزنك
—————-
يا واهس دمعتي وفرحتي وحزني
اجيلك منهضم وارجع ولا جني
وين الگالي واحد مثلك يحبني

يل مدللني وانه اذنب وازعلنك
—————
خدمتك مو لاجل شهره ولاجل سمعه
لگيتك تسوه عيني شما بجت دمعه
اليمي ايسولف بغيرك ولا اسمعه

غمهه السالفه الما بيهه اسمعنك
—————-
انت اول جرح من تنلجم تنحب
ساتر دنيا وانت اعله الثره امسلب
احلفك بالغريبه ام الحزن زينب

تحضرني الگبر ضيگ واريدنك
—————
الخادم موسى البطلي

وصلت منيتي
ساعة وصيتي عباس اريده

يحفرلي لحدي
يوسدلي خدي ينزلني بيده

ياهو اليجيبه
لمه الغريبه ظلت وحيده

گبل لا اغمض عيوني اريد وليدي اشوفنه
احط عيوني بعيونه واريد بلهفه اشمنه
كل تعبي التعبته اعليه هذا اليوم اريدنه
يدفني ويهيل تراب لحدي ويسجب الونه

عباس
يمه اريدنك يتعب متوني
عباس
تغمض عيوني يبعد عيوني
عباس
انت واخوانك تجي تشيعوني
عباس
تنزلوني الگبري وادفنوني

ام البنين مولاتي ام البنين مولاتي
…………………

تعبي التعبته
وليل السهرته من كبريتك

تذكر دلالي
يبني وحلالي من دلليتك

هسه انه اطلبك
تدريني احبك تحضرني ريتك

ظل آخر نفس بالروح لا تتأخر اعليه
احلفك بالعزيزه اعليك ماسميهه مسبيه
اريدك كون بالتشييع متحزم بجفيه
من تهيل فوگي اتراب تقره اعليه لطميه

يرباي
يمه لا تبطي علي گصر الدرب
يرباي
امك تريدك يسباح الكلب
يرباي
ترضه التشيعني يوليدي غرب
يرباي
كونك تحبني صدگ هيل الترب

ام البنين مولاتي ام البنين مولاتي
…………

حبكم كتلني
لو تدري يبني شكد انه اعزكم

الگصرلي عمري
يمه انت تدري حسين اغله منكم

كل تعبي يسوه
لحسيني فدوه من رحتو كلكم

ثاري الموت موش الروح يمه من الجسم تطلع
الياخذ روحك اغله انسان ميت كون بي تسمع
وينه اوينه نفس اليوم ضل بكربله امكطع
هيه المشكله من يروح غالي وادري مايرجع

مليت
حرم گلبي الجان گلبي يريده
مليت
هيه مقسومه انه اظل وحيده
مليت
الماي من يتبده ياهو يعيده
مليت
كلت اموت وهل عمر ماريده

ام البنين مولاتي ام البنين مولاتي
…………..

منعوني ابجي
منعوني احجي منعوني اهتم

هيه الهضيمه
عدهم جريمه لو سوي مأتم

كله اعله مودك
انت واخوتك سموني بالسم

حلاة الموت من يصير كون بحرگه ع الغالي
بنيت كبوركم ع الكاع بلكت ترجع آمالي
ازورن بيكم شما ضوج عدلين يتراوالي
حالي يبجي سابع عين حقك ماشفت حالي

تدرون
امكم تسوي المناحا بروحهه
تدرون
محد وياهه ويهيد نوحهه
تدرون
ماتت بكثر البجي المذبوحهه
تدرون
ماتت وما طابت من جروحهه

ام البنين مولاتي ام البنين مولاتي
…………
الخادم موسى البطلي

لسان حال مولاتي زينب عليها السلام

هواي تأخرت يا موت — شنهي العطلك عني
المن ظاله بدنياي — لا خواني لا ابني
اريد ارتاح من الضيم — كرهت العيشه من حزني
الوادم شارده من الموت — وانه ادعيله يوصلني

اول مره احس الموت راحه
المن عايشه الما مستراحه
ماظلت عيون خلاف الاخوان
راح الشوف من گد النياحه

ياموتي — استعجل ارد ارتاح من احزاني
ياموتي — مو الغربه التعبوني اخواني
يا موتي — الشام موش اولامي لا هو مجاني
——————-
الينشد ع الحزن والضيم — واكثر واحد أتعذب
وياهو الگضه عمره افراگ — وخلص عمره بس ينحب
وياهو الشيبه من اخوان — مو من الكبر شيب
غمض عينك انت وشوف — بالك يمشي يم زينب

كضت كل عمرهه بعازت اخوان
ماتت بالغرب وتريد دفان
يامن عمت عيني اجنازة ام عون
ما صاحت بوووووي اعليهه نسوان

يا زينب — عدله ميته منشلع دلالج
يا زينب — وين ماترحين غربه اكبالج
يا زينب — يمته من الضيم يفرغ بالج
——————
من ليل 11 لليوم — حلفو الليل إذا نمته
وينه اوينه ذاك اليوم — فرد عصريه فارگته
معروفه الاخو من يموت — تنصب اخته فاتحته
لا خلوني ابجي اعليه — ولا هو البجه اعله اخته

ذبحو كل اخوتي وما نحتهم
من يمهم سبوني وفاركتهم
فوگ الهزله من مروني حسيت
يتمنون يمهم تبجي أختهم

متعوبه — آخر أنفاسي وصحت مشتاكه
متعوبه — موتاني حسين من افراگه
متعوبه — راح اموت وما أظن نتلاگه

————-
ظل آخر نفس بالروح - واديرن گمت بعيوني
بلكت الله دكت باب — واخواني يتعنوني
اريد اخواني اليشيعون — مو غربه اليشيعوني
ويشيلون نعشي بهون — لا يلجمن امتوني

وينصبون فاتحتي ويلطمون
فرد صيحه اعله تابوتي يصيحون
عباس بدمعته ايگل للحسين
خويه البگى براسك راحت ام عون

يا خوتي — وعلي ما مرتاحه ساعه اخلافكم
ياخوتي — وحشه تابوتي ويريد اجتافكم
ياخوتي — كلبي يوجعني منهد ما عافكم
——————-
الخادم موسى البطلي

ويلاه يا عازت هلي

زينب تصيح اخواني
شو محد اتعناني

ياهو اليغمض عيوني
غير انتم تحبوني

بس الغرب تبرالي
يكسر الخاطر حالي

ودموعي من دم تهلي — ويلاه يا عازت هلي
———
تابوتي ياهو يشيله
كل حيلي وشل حيله

مابيه اشم حتى الهوه
منتظره جيتكم سوه

ياهو اليسوي الفاتحه
ولا حرمه تبجي ونايحه

ماجني زينب بت علي — ويلاه يا عازت هلي
—-
اعتب اعله العافوني
وبنص غرب خلوني

محد علي مر و نشد
لا مر اخو لا مر ولد

لا تسمع الشام وفشل
هل حرمه ماعدهه اهل

البالغربه عايش مبتلي — ويلا يا عازت هلي
——-
مزروعه عيني اعله الدرب
بلكت علي واحد يطب

تعب الربه وتعب السهر
وذاك البجي وذاك القهر

معقوله كل ذاك التعب
وي اخوتي راح شعجب

شو محد اتعنه الي — ويلاه يا عازت هلي
———
من ليلة العاشر لحد
هل ساعه ما مرتاحه ابد

من راح بخت العايله
دنياي صارت مايله

تعبوني مو عدواني
التعبوني اخواني

جا بالعمر هذا شلي - ويلاه يا عازت هلي
———
الخادم موسى البطلي