Ташқи ишлар вазирлиги матбуот хизматидан маълум қилишларича, ушбу аккаунт ташқи ишлар вазири Абдулазиз Комиловга тегишли эмас, сохта экан. Обуначилардан узр сўрайман ва постни ўчираман.

@shahnozxon

Твиттерда Ўзбекистон ташқи ишлар вазири Абдулазиз Комилов номидан юритиладиган саҳифа бор. Саҳифага Ўзбекистондаги дипломатик ваколатхоналар вакиллари ва ўзбекистонликлар дипломатларнинг деярли бари обуна бўлган. Абдулазиз Комилов билан учрашган ва Твиттерда саҳифаси борлар, мабодо учрашув ҳақида ёзиб қолса, нуқул шу аккаунтни меншн қилади. Масалан, Ҳиндистон ташқи ишлар вазири ёки Афғонистон ташқи ишлар вазири ёки АҚШ Давлат департаметининг тегишли бюроси.

Твиттердаги бу саҳифа 2017 йилдан бери бор, шунча вақтдан бери Абдулазиз Комилов номидан хабарлар, баёнотлар бериб келяпти. Ўтган вақт давомида Ўзбекистон Ташқи ишлар вазирлиги матбуот хизмати бирор марта бу саҳифа фейклиги, вазир ёки вазирлик томонидан юритилмаслиги ҳақида на очиқ, на ёпиқ баёнот берган. Бугун, Твиттердаги шу саҳифада вазир номидан: «Биз очиқ сиёсат тарафдоримиз, Ўзбекистон ҳар доим оммавий ахборот воситаларини ривожлантиришга ва барча журналистларни ҳар томонлама қўллаб-қувватлашга тайёр», деган баёнот пайдо бўлиши билан, ТИВ матбуот хизматидагилар «бу сохта аккаунт» деб чиқишибди.

Одамга алам қиларкан — шунча баёнот-у меншнларга ҳеч нарса дейилмас экан-да (ёлғон қурбонига айланган бечора Ҳиндистон ва Афғонистон ташқи ишлар вазирлари!), лекин «Ўзбекистон очиқ сиёсат тарафдори, журналистларни қўллаб-қувватлайди» деган пост чиқиши билан, қўрқиб кетиб, дарров «бу сохта аккаунт» деб чиқишаркан. Менимча, бунақаси кетмайди — агар ўша аккаунт сохта бўлса, Ташқи ишлар вазирлигининг mfa.uz деган расмий сайтида расмий қилиб ёзиш керак (ҳозироқ), худди Ўзбекистонга алоқадор бирор номаъқул гап чиқиб қолганида раддиясифат баёнотлар берилганидек.

Ташқи ишлар вазирлиги аккаунтнинг вазир Абдулазиз Комиловга тегишли эмаслиги, сохталигини маълум қилди. Муносабат учун раҳмат.

Аммо аккаунт сохта бўлиб чиққанидан афсусланяпман. Чунки ҳозир айнан шунга ўхшаш бир мужда жуда керак эди.

Майли, ўзи расмий муносабат биринчи бўлиб АОКАдан чиққани мантиқли ва тўғри бўлар эди. Кутамиз.

@shahnozxon

Қўшиқчи Санжайнинг Интеллектуал мулк агентлигидан ёзиб тарқатган видеоси бўйича расмий муносабат берилди.

"Хабарингиз бор ижтимоий тармоқларда Санжай тахаллуси билан ижод қилувчи хонанда Джавбердиев Санжар “Гулбадан”, “Атиргулим атрингни соч”, “Карвон” номли қўшиқ ва шеърларни муаллифларнинг розилигисиз, асар яхлитлигининг бузган ҳолда ижро этгани сабабли Ўзбекистон Республикаси Адлия вазирлиги ҳузуридаги Интеллектуал мулк агентлигига ариза келиб тушгани ҳақида хабар тарқалганди.

Маълум бўлишича хонанда Джавбердиев Санжар қўшиқ муаллифи Ўзбекистон ҳалқ артисти Шерали Жўраев ҳамда шеърлар муаллифи Ўзбекистон халқ шоири Усмон Азимовдан ҳеч қандай розилик олмасдан ва улар билан шартнома тузмасдан қўшиқ аслини ўзгартирган ҳолда ижро этиб келган.

Бу эса Ўзбекистон Республикаси Муаллифлик ва турдош ҳуқуқларни ҳимоя қилиш жамиятининг Ўзбекистон ҳалқ артисти Шерали Жўраев ва муаллиф Усмон Азимовнинг ишончли вакили сифатида хонанда Джавбердиев Санжарга “Муаллифлик ҳуқуқи ва турдош ҳуқуқлар тўғрисида”ги Қонунни бузганлиги учун чора кўриш юзасидан ариза билан мурожаат қилишига сабаб бўлган.

“Муаллифлик ҳуқуқи ва турдош ҳуқуқлар тўғрисида”ги Қонун 18-моддасига кўра, асар (қўшиқ)ни омма олдида ижро этиш ёки ундан бошқача тарзда фойдаланишда асарнинг ўзига, номига ва муаллифнинг исми-шарифи кўрсатилишига бирон-бир ўзгартиш киритишга фақат муаллифнинг розилиги билан йўл қўйилади. Аммо бизнинг ҳолатимизда бунинг акси бўлгани туфайли қўшиқларга бўлган муаллифлик ҳуқуқи жиддий равишда бузилган. Натижада Ўзбекистон Республикаси Маъмурий жавобгарлик тўғрисидаги кодекси 177(1)-моддасининг биринчи қисмида белгиланган асарлардан ёки турдош ҳуқуқлар объектларидан қонунга хилоф равишда фойдаланиш, худди шунингдек асарларнинг ёки турдош ҳуқуқлар объектларининг контрафакт нусхаларини такрорлаш, тарқатиш ҳолатлари мавжуд деб ҳисобланиб, унга нисбатан маъмурий ҳуқуқбузарлик тўғрисидаги баённома расмийлаштирилди ва тегишлилиги бўйича судга юборилди.

Афсуски ҳар қандай ижод намунаси муаллифнинг машаққатли меҳнати орқали яратилиши, уни ҳурмат қилмасдан ва рухсат сўрамасдан фойдаланиш эса ҳуқуқбузарлик саналишини эътиборга олмаслик ҳолати учраб туради. Ҳаттоки ривожланган давлатларда муаллифлик ҳуқуқини бузганлик катта жарималар солиниши ҳаттоки ҳуқуқбузарлик ашёларини мусодара қилиш билан жазоланади.

Мисол учун, Россия Федерациясининг Орловск вилояти суди томонидан депутатликка номзоднинг ташвиқот материалларида қўшиқчи ва композитор А.Макаревичнинг “Бизнинг чўққиларга бўлган манзилимиз машаққатли...” матнидан рухсатсиз фойдалангани учун жаримага тортилган.
Яна бир мисол АҚШнинг ҳудудий Федерал суди томонидан www.lyricsdownload.com ҳамда бошқа сайтлар муассисларидан муаллифлик қўшиғи матнини рухсатсиз сайтда жойлаштирганликлари учун 6,6 миллион доллар ундирган. Бу каби мисолларни кўплаб келтириш мумкин.

Мақсадимиз интеллектуал мулк муаллифлари ҳуқуқини ҳимоя қилиш ва муаллиф ижодидан рухсат олиб фойдаланиш лозимлигини етказишдир".


@shahnozxon

Адлия вазирлиги педагог ходимнинг аниқ мақомини белгиловчи қонун лойиҳасини ишлаб чиқди

Ўзбекистон Республикаси Президентининг 1 октябрь – Ўқитувчи ва мураббийлар кунига бағишланган тантанали маросимдаги маърузасида илгари сурилган ўқитувчи ва муаллимларнинг жамиятдаги нуфузи ва мавқеини оширишга қаратилган ташаббусини амалга ошириш юзасидан Адлия вазирлиги ва манфаатдор вазирликлар томонидан ишлаб чиқилган "Педагог ходимларнинг мақоми тўғрисида"ги қонун лойиҳаси жамоатчилик муҳокамасига қўйилди.

Лойиҳада педагог ходимларнинг пенсия ёшини қисқартириш, ойликларини ошириш, уларни мажбурий меҳнатдан ҳимоялаш, шахси ва қадр-қимматига нисбатан нолойиқ муносабатларга қарши курашишга оид нормалар киритилмоқда.

Масалан, лойиҳада қуйидаги таклифлар илгари сурилмоқда:
👉 педагог ходимларнинг шаъни, қадр-қимматини ҳимоя қилиш масаласида ҳамда мансабдор шахсларнинг хатти-ҳаракатлари устидан судга мурожаат қилганида давлат божини тўлашдан озод этиш;
👉 педагог ходимни лавозим мажбурияти ва касбий фаолияти билан боғлиқ бўлмаган ишларга, йиғилишлар ва бошқа тадбирларга жалб қилишни тақиқлаш;
👉 педагог ходим мақомига эга шахсларга кўкрак нишони ва гувоҳнома бериш;
👉 педагог ходимга умумий белгиланган ёшдан беш йилга қисқартирилган ҳолда имтиёзли пенсия олиш ҳуқуқини тақдим қилиш;
👉 педагог ходим томонидан уй-жой ва автотранспорт воситасини харид қилиш учун унинг ойлик иш ҳақидан йўналтириладиган маблағларни даромад солиғидан озод этиш;
👉 давлат таълим ташкилотлари тугатилганда, давлат томонидан педагог ходимга аввалги ишига (лавозимига) тенг бошқа иш (лавозим) берилишини кафолатлаш;
👉 эллик олти иш кунидан иборат йиллик ҳақ тўланадиган узайтирилган таътил бериш, шунингдек, таътил берилганида, календарь йилида бир марта базавий лавозим маоши миқдорида соғлиғини тиклаш учун моддий ёрдам бериш;
👉 педагог ходимнинг базавий лавозим маоши БҲМнинг ўн бараваридан
(2 миллион 230 минг сўмдан) кам бўлиши мумкин эмаслиги белгиланиб, унда мутахассислиги, малака тоифаси ҳамда илмий даражаси, давлат мукофотлари ва унвонлари инобатга олинган ҳолда устама ва қўшимча ҳақлар тўлаш;
👉 умумий ўрта таълим ташкилотида илк бор касбий фаолият бошлаётган шахсга бир ўқув йили даврига ўқитувчи-мураббийликни амалга оширувчи педагог ходим бириктириш;
👉 педагог ходимнинг кўп йиллик хизмати учун устама тўлаш тизимини жорий этиш;
👉 педагог ходимни касбий фаолияти давомида юқумли касалликларга қарши бепул профилактик эмлаш;
👉 олий маълумотга эга бўлмаган, аммо таълим ташкилотларида камида беш йил иш стажига эга педагог ходимни кириш тест синовларисиз, тўлов-контракт асосида ва қабул параметрларидан ташқари олий таълим муассасасининг педагогика йўналиши бўйича сиртқи, кечки ва масофавий таълим шаклига суҳбат асосида ўқишга қабул қилиш.

Марҳамат, қуйидаги ҳавола орқали лойиҳа муҳокамасида иштирок этинг.

http://regulation.gov.uz/uz/d/25127

Муҳокамада фаолроқ иштирок этинг, чунки нажот таълимда.

@shahnozxon

Афсусдаман! "Жажжи академик" журнали энди чоп этилмас экан....
Худдики, умид ўлиб қолди... Шу журнал яшаса бўларди, сақлаб қололмадик деб одам ўзини айблаяпти. Нега биз қарийб уч ўн йиллик давомида монополияларни солиқлардан озод қиламиз, нега биргина бошимизга 200 дан ортиқ монопол ташкилотни боқамиз-у, болалар учун илм улашадиган нашрларни сақлаб қололмаймиз?

Шу ҳолатда ҳам журнал ходимлари янги лойиҳаларни режалаштираётган экан. Қойил қолмай иложи йўқ!

@shahnozxon

​​Миллат яна бир ниҳолидан айрилди...

2015 йили АҚШнинг Орегон штатида 5000 киши яшайдиган кичкина шаҳарда бўлдик. Маҳаллий радиостанцияга таклиф қилишди. Шу шаҳар ва унинг атрофидаги шаҳарчалар аҳолисига хизмат қилувчи чоғроққина радиостанция бўлса, нима қиламиз у ерда, деган фикр ўтди.
Радиога боргандан сўнг тасаввурларим бутунлай ўзгарди. Икки қаватли замонавий бино, боғчаси ҳам бор. Ичкаридаги ускуналар барчаси янги, дид билан дизайн қилинган. Фонотекаси ҳам жуда катта: гарчи барча ёзувлар рақамлаштирилган бўлса-да, эски пластинкалардан тортиб, оригинал кассета ва дискларгача сақланади (тингловчи талабига кўра, рақамлаштирилган вариант эмас, айнан оригинал патефон, магнитофон ва диск плеердан қўйиб бериларкан). Бу ерда 20 тача ижодкор доимий ишлайди.
Радио муҳаррири билан суҳбатда у қизиқ воқеани сўзлаб берди: "Биласиз, интернет, янги ахборот технологиялари чиқиб, оммавий ахборот воситалари, айниқса, улардаги реклама бозори синди. Бу буҳрон бизга ҳам таъсир қилди. Беш йил олдин деярли банкрот даражасига етдик. Станция фаолиятини давом эттириш учун ҳеч қандай ресурс қолмаганди. Бир кун ходимлар билан маслаҳат қилиб, радиони ёпишга ва бу ҳақда тингловчиларимизга маълум қилишга қарор қилдик.
Эртанги эфирда тингловчиларга мурожаат қилдик: "Ҳурматли ватандош тингловчилар. Сизнинг радионгиз 80 йилдан бери хонадонингиз аъзосига айланди. Яхши-ёмон кунларда сиз билан бирга бўлди. Бугун иқтисодий сабаблар туфайли сизни тарк этишга мажбур бўлмоқдамиз. 1 ойдан сўнг эфирларимиз тўлқиндан узилади. Сиз билан бирга бўлганимиздан фахр туямиз!"
Ушбу мурожаат шаҳримиз ва бизни атрофда эшитадиган 10000 аҳолига қаттиқ таъсир кўрсатди. Шаҳар аҳли кампания уюштириб, радиони сақлаб қолиш учун пул йиға бошлади ва радио номига фонд очилди. Шу даражада кўп пул йиғилдики, биз радио биносини янгидан қурдик, ускуналарни замонавийлаштирдик. Фонддаги маблағ яна беш йил фаолиятимизга етади. Унга пул тушуми ҳали ҳам тўхтагани йўқ. Бизни ўз оила аъзоси деб билган ҳамшаҳарлардан миннатдормиз!"
Мен ўшанда Тинч уммони яқинидаги ушбу кичкина шаҳар аҳолисининг ҳамжиҳатлиги, дахлдорлик ҳиссига тан бергандим.
Бугун ўзбекнинг энг танти ношири Санжар Назарнинг "Жажжи академик" журнали ёпилаётгани ҳақидаги хабарини ўқиб, шулар хаёлимдан ўтди. Мен "келинглар, биз ҳам фонд очайлик, "Жажжи академик"ни сақлаб қолайлик" деб айтолмайман, афсус. Журнал жон сақлашига етгулик маблағ йиғилишига, лоақал давлат ёки катта меценатлар бирон бир ёрдам беришига, афсуски, ишониш қийин. Зеро, бу ҳақда Санжар ака аввал ҳам огоҳлантирган эди. Ака 7 йил давомида катта иш қилди. Маърифат учун ўз маблағини тикди-тикди, умид қилди. Натижа сен кутгандай бўлмаса, оқибат шундай бўлиши табиий.
"Жажжи академик" ўзбек болалар дунёсида замонавий янги саҳифа очди. Миллат болаларининг чин камолоти учун хизмат қилди.
Миллат яна бир ниҳолидан айрилди...
Ўрнини хайрлиси билан тўлдирсин!

Давронбек Тожиалиев

@shahnozxon

УЛУҒЛАР МИЛЛИОНЕРЛАРИМИЗ ҲАҚИДА

«Бошқа миллатларнинг бойлари фақир ва етимлар учун мактаб ва дорулфунунлар соладурлар, фақир ва етимларни ўқумоғи учун вақф «истепендия»лар таъйин қилур. Бошқа миллат милўнерлари мактаби ила истепендияси-ла, идора қиладургон газет ва мажалласи-ла, бино қилган доруложизин (аёллар университети), барпо қилган жамъияти хайрияси-ла фахр қилурлар. Бизникилар жуфти оти-ла, аробаси-ла, тўйи ва...-ла фахр этар. Ҳатто ўз ўғилларини ўқутмайдургон бойлар бордур. Бу кетишни охири ямондур, ўқумоқ, ўқутмоқ керакдур. Болаларга оталардан илми диний ва илми замоний мерос қолсун».

© Маҳмудхўжа Беҳбудий

P.S. Орадан 100 йил ўтдими, ўтмадими?

@shahnozxon

Педагогларнинг пулли тиббий кўриги. Адлия ходимлари ҳимоячи

Шу кунларда Учкўприк туманида қизиқ суд иши кетмоқда экан. Унга кўра, бир неча умумтаълим ўқитувчилари пулли тарзда тиббий кўрикдан ўтишга норозилик билдиришган. Уларни ҳимоя қилаётган ташкилот эса Адлия бўлими экан. Гап йўқ лекин.

Биласиз: Меҳнат кодексининг 214-моддасига кўра, Иш берувчи айрим ходимларни тиббий кўрикдан ўтказишни ташкил қилиши шарт дея белгиланган. Улар орасида умумтаълим мактаблари, мактабгача тарбия ва бошқа педагоглар ҳам бор. Ушбу моддага кўра, ходимлар чиқимдор бўлмаслиги қатъий келтирилган. Бироқ педагоглар пулга тиббий кўрикдан ўтказилган.

Айни вақтда, Учкўприк туман маъмурий судида ушбу масала бўйича суд иши кетаётган экан. Ушбу ишда педагоглар томонга омад! Адлия бўлими ходимларига молодес! Тўғриси, кўп ташкилотлар бунақа масалада духига ўтирса керак деб ўйлардим. Яхшики, устозларни ҳимоя қиладиганлар ҳам бор экан.

Бу мазкур масалада меҳнат суд ишларида ўзига яраша кейс бўлади. Суд прецедентида яхши тажриба вазифасини ўтайди. Кузатамиз!

Каналга уланинг
👉 @bahodirahmedoff 👈

Педагог ходимларнинг тиббий кўриги учун ходимлардан пул олинаётгани ижтимоий тармоқларда кўп ёзилди. Айниқса, Isroil Tillaboyev кўп куйиб-ёндилар бу масалада. Мана ривожланган йўлдан бориб, иш судга оширилди. Бу умуман муаммога эътибор қаратиш ва хусусан ечим топиш учун яхши кейс. Воқеалар ривожини кузатамиз

@shahnozxon

​​‼️Metsenat.uz loyihasida navbatdagi grant!

👍"Najot Taʼlim" markazi tibbiyot yo‘nalishida tahsil olayotgan xotin-qizlar uchun taʼlim granti eʼlon qildi.


📢 Taʼlim granti nomi: “Bo‘lg‘usi shifokor ayollar uchun grant”

📍 Qaysi hudud uchun: O‘zbekiston Respublikasining barcha fuqarolari uchun

🏫 Qaysi OTM talabalari uchun: Barcha OTMlar uchun

👩🏻‍⚕️ Qaysi soha uchun: tibbiyot uchun

🎓 Qaysi daraja uchun: bakalavr

❓ Qaysi taʼlim shakli uchun: kunduzgi va kechki

📶 Qaysi bosqich (kurs) uchun: barcha bosqichlar uchun

💵 Grant summasi: 3 mln so‘mdan

👥 Necha nafar talabaga beriladi: 5 nafar

🤷‍♂️ G‘olibni tanlashda muhim jihatlar: moddiy qiynalganligi, aʼlo o‘qishi, sohaga bo‘lgan qiziqishi, qobiliyatlari, tajriba va ko‘nikmalari

⌛️ Arizalar 2021-yil 10-yanvarga qadar metsenat.uz sayti orqali qabul qilinadi.

👩🏻 Grantning qo‘shimcha sharti: mazkur grant faqat xotin-qizlar uchun mo‘ljallangan


✅ Hurmatli, bo'lg'usi shifokor ayollar, grant uchun ariza topshirishga shoshiling!


Kanallarimizga obuna bo’ling:
👉 @metsenatuz
👉 @urfon

Ўқишга қабул учун паспорт нусхасидан 8 та (!) сўрашибди.

Шундай сигнал келиб тушди. Адлия ўрганишни бошлади, чоралар кўрилиши айтилди. Қойил ээ! Шунча қоғозни нима қилишар экан?

Аслида, бюрократия, бўлганда ҳам беъмани, асоссиз, одамларни сарсон қиладиган бюрократик тартиблар шунақанги кўпки, инсонлар умри югур-югурлару қоғозларга сарфланиб сувдек исроф бўлаётгани алам қилади.

Хуллас, жиддий аҳд бўлди: фуқароларнинг давлат органлари билан муносабатида талаб қилинаётган ҳар битта қоғоз мақсадга мувофиқлик юзасидан тафтишдан ўтказилади.

Нега 4 та (баъзан ҳатто 10 та) фотосурат, нега маҳалладан справка, нега 2, 3, 5 талаб паспорт нусхаси? Умуман, нега технологиялар ва ахборот асридан биз ҳамон нусхалар, қоғозлар, югур-югурлар билан бандмиз? Бошқа ишимиз йўқми?

Ортиқча бюрократия ортиқча харажат ва коррупцияга йўл очиб берувчи туйнук дегани.

"Бўридек ғажирдим бюрократизмни..."

@shahnozxon

Учкўприкдаги судда адлия бўлими ва ўқитувчилар ютди!

Суд педагогларнинг тиббий кўрикдан бепул ўтиш тўғрисидаги даъвосини қаноатлантирди.

Фарғоналик журналист Шарифа Мурод ўзининг фейсбук саҳифасида суд тафсилотлари ҳақида қуйидагича пост қолдирди:

"Бугун Учкўприк тумани маъмурий судида ўқитувчиларнинг тиббий кўрикдан бепул ўтиши талаб қилиб тумандаги 4-мактабнинг 6 нафар ўқитувчисини манфаатларини кўзлаб адлия бўлими томонидан судга киритилган ариза кўриб чиқилди.

Хабарингиз бор суд икки марта қолдирилган эди. Бу сафар ҳам жавобгар тарафнинг вакили суд қолдирилишини талаб қилди. Аммо судья бу талабни қондириш учун ҳеч қандай важ йўқлигини айтиб, суд мажлисини давом эттирди.

Томонларнинг фикрлари тингланди. Учкўприк тумани адлия бўлими бош маслаҳатчиси Воҳиджон Эркабоевнинг сўзлари тингланди.
"Меҳнат кодекси"нинг 214-моддаси ва "Таълим тўғрисида"ги Қонуннинг 45-моддаси қўлланилиб судья ҳал қилув қарорини чиқарди.

Адлия бўлимига тиббий кўрикдан ўтишни бепул қилиш ҳақида ариза берган 4-мактабнинг 6 нафар ўқитувчисининг талаби қондирилди. Қарорда 6 нафар ўқитувчининг исми шарифи номма-ном келтирилди.
Энди бу ўқитувчилар бепул тиббий кўрикдан ўтишади.

Қолганлар-чи? Маориф фидойиси Маҳмудхўжа Беҳбудий "Ҳақ олинур, берилмас!" деган эди. Демак ҳеч бир ўқитувчига ҳаққи шундоққина бериб қўйилмайди. Демак, бошқа ўқитувчилар ҳам ўз ҳаққини талаб қилиб адлия бўлимига ёки маъмурий судга мурожаат қилса, албатта ҳаққи ҳақлаб берилади.

Ҳурматли ўқитувчилар ҳаракат қилинглар, мана Учкўприк туманидани 4-мактабнинг 6 нафар ўқитувчиси ҳақлигини исботлай олди. Демак адолат ҳалиям бор!"

Пост тугади!

Ўқитувчилар, ғалаба муборак (ғалабанинг катта-кичиги бўлмайди деган фикрдаман)!

@shahnozxon

Жонли эфир узилгач, нима гаплар бўлди?

Менга энг кўп берилаётган савол шу ҳозир.
Ўзи ғалати занжир реакцияси кузатиляпти: АОКА сайтларга хат чиқарди – саволлар туғилди, унинг оқибатларини бартараф этиш учун баёнот чиқди – саволлар тўхтамади, ХПКда давра суҳбати уюштирилди ва яна саволлар пайдо бўлди. Улардан ҳозир менга энг кўп берилаётгани: нега жонли эфир узилиб қолди? Эфир узилгач, нималар бўлди ва уни кенг омма тўлиқ кўра оладими?

Аввалига фикримни айтай: шахсан менинг назаримда ҳозир муаммо ахборот олишдан кўра кўпроқ, олинган ахборотларни узатиш ва хулосаларни айтишда. Яъни давлат идораларида очиқлик бирмунча таъминланган, ахборот хизматлари, турли порталлар, матбуот анжуманларию пресс-турлар бор. Бироқ шу ахборотни узатиш, қайта ишлаш, фактлар билан ўйнаш, контекстдан узиш, номувофиқ сарлавҳалар қўйиш кабилар бир томон, танқидий фикрлар ва хулосаларни зарбулмасал қилмай, очиқ айтиш ва кейин у айтилган гаплар ўчириб юборилмаслиги бошқа томон – муаммолар шу чегараларда. Шунинг учун матбуот котибларининг малакасини ошириш керак бўлса-да, ҳозир асосий муаммо бу эмас (менимча). Ахборот майдонидаги муаммоларга ҳам матбуот котибларининг малакасидан кўра кўпроқ таъсир қилаётган бошқа омиллар бор. Ҳозир асосий муаммо ахборот маконида томонларнинг ўйин қоидаларини келишиб олиб, уларга оғишмай амал қилишида.

Давра суҳбатига қайтсам.

Жонли эфир узилгач, мунозара ва муҳокамалар бошланди. “Ўзбекистон24” журналисти Нозима Тошпўлатова (доим журналистиканинг юқори стандартларини гапириб келгани учун ҳурмат қиламан шу қизни) бугун энг катта аудиторияга эга “Kun.uz” ахборот портали билан кўнгилочар телеграм каналлари аудиторияси кўламини мисол келтириб, жиддий журналистикага ўқилмай ва эшитилмай қолиш хавф солаётгани ҳақида гапирди. Зафарбек Солижонов журналистик фаолиятга тазйиқ ўтказганлик учун жавобгарлик жорий этиш тўғрисидаги қонун лойиҳаси тақдири билан қизиқди. Содиқ Сафоев бу масала кун тартибида турганини маълум қилди. “Адабиёт” газетаси бош муҳаррири Бахтиёр Карим газетанинг сохта нусхалари чоп этилгани ва бу ҳолат етарлича ўрганилмагани масаласини кўтарди, С.Сафоев бу вазият албатта назоратга олинишини айтди. Мавжуда Мирзаева журналистларга босимлар бўлаётгани, хусусан, ўзининг ишдан бўшатилганини айтди. Анора Содиқова ОАВнинг фаолиятини мувофиқлаштириш учун махсус давлат ташкилоти яна қайси давлатларда бор деб сўради. Акмал Саидов давлатнинг ОАВ фаолиятини мувофиқлаштириши барча давлатларда бор деб жавоб берди. Яна бир журналист (исмини унутдим) “Ички цензурани йўқотиш учун ташқи цензурани йўқотиш керак” деган қизиқ тезисни илгари сурди. Қолганларга микрофон тегмади, вақт етмади. Тез орада журналистлар ва блогерлар учун муҳокама портали очилиши ва ўша ерда бемалол фикр алмашиш имконияти яратилиши ваъда қилиниб, тадбирга якун ясалди.

Модератор Шерзод Қудратхўжаев жонли эфир узиб қўйилишига сабаб қилиб регламентни ва эфир учун олинган вақт тугаганини айтди (Youtube га тўғридан тўғри трансляцияни улаб қўйиш мумкин эди, масалан).

Шахсий фикрим: модератор тадбир регламентини ва унга ажратилган вақтни аввалдан билар эди. 2 соатлик тадбир учун 12 та(!) спикер чақириш мақсадга мувофиқмиди? Хушнуд айтганидек, расмийлар узоқ гапиришлари тўғримиди? 2 соат маърузалар ва 20 дақиқа саволлар – бу мувозанатсизлик, ҳар ҳолда.

Сўз эркинлиги учун қилинган ишларни ва бўлаётган ўзгаришларни мен шахсий тажрибамдан кузатиб келмоқдаман: 20 йилдан бери шунинг ичидаман. “Навоий 30” даги бош цензордан муҳр бостириб келинадиган замонлардан тортиб бугун расмийларга тикка савол бериладиган даражагача – бари кўз олдимдан ўтди. Фикр айтиш эркинлиги бугунги даражада шахсан менинг тажрибамда, аввал кузатилмаган. Буларни эътироф этмай иложи йўқ. Айнан шу очиқлик ва эркинлик янги Ўзбекистоннинг халқаро обрўсини ҳам оширди.

Бироқ барибир бу кам, ОАВ ва блогерлар кўпроғини истайди, яъни соҳада ривожланиш динамикаси сусаймаслиги керак. Бугунгидек тадбирлар айнан шу муждани етказиш учун зарур.

Фақат уларни ниятларимиз самимий эканига саволлар қолдирмайдиган даражада ташкиллаштириш лозим.

@shahnozxon

​​"Тур деб айтманг, туринг"

Бугун "Дуэл"га мени насиба етаклаб борган экан, баланд бир шеъриятдан баҳра олиш насибаси. Икки забардаст шоир - Йўлдош Эшбек ва Мирзо Кенжабек шунақанги авж пардаларга кўтарилишдики, сўз йўқ таърифига. Улар саҳнадан тушгач, мен бошқа одам бўпқолдим. Бир пайтлар шу авлод мени адабиётга, шеърга мафтун қилганди, эсладим. Бир эшитиб ёд бўлган шеърлар, миянгда такрор жаранглайверадиган, топиб ўқишга мажбур қилаверадиган, фикран теран, мазмунан бой, ҳам эстетик, ҳам ижтимоий юки бор шеърият... Бугун ўша таъмни излаб тополмаяпман. Йўлдош Эшбекнинг биргина "Тур деб айтманг, туринг, уйғон деманг, уйғонинг" деганинг ўзидаёқ сиз ҳамма нарсани унутасиз, шуни ўйлайверасиз. Фарқи йўқ, муҳаббатми, маишатми, интимми ё сиёсатми - қай мавзуда бўлмасин оёққа қалқитадиган шеърият. 60-80-йиллар шеърияти чўққиси, афсуски, бугун забт этилмаётир.

Ёшлар, хафа бўлмайсизлар энди, таассурот шу-да. Сизларда ҳаммаси олдинда. Аммо истеъдодингизни фақат ўзингизни тушунтиришга, фақат интим мавзуларга сарфлайверманглар. Абдулла Ориф айтганларидек, "Иккинчи умрдир яшашдан мурод". Иккинчи умр халққа дахлдор, унинг дардини айтолган, умуминсоний шеърларгагина насиб этади. Масалан, Мирзо Кенжабекнинг "Муножот"и ёки Йўлдош Эшбекнинг лўлилар ҳақидаги шеъри каби (шу шеърни ўқигим келяпти, тополмаяпман, кимда боор?)

@shahnozxon

8 декабрь куни “Ибрат” ва “Маҳмудхўжа Беҳбудий” фильмларининг миллий телевизион премьераси бўлиб ўтади

8 декабрь Ўзбекистон Республикаси Конституцияси қабул қилинганининг 28 йиллик байрами муносабати билан юртимиз телеканалларида “Ўзбеккино” Миллий агентлиги томонидан “Ибрат” ва “Маҳмудхўжа Беҳбудий” фильмларининг миллий телевизион намойиши ўтказилади.

"Ибрат" тарихий-бадиий фильмининг телевизион премьераси қуйидаги телеканаллар орқали белгиланган вақтларда намойиш этилади:

"Ўзбекистон" телеканалида соат 18:30да
"Ўзбекистон тарихи" телеканалида соат 13:00да
"Кинотеатр" телеканалида соат 21:00да
"Маҳалла" телеканалида соат 07:00да
"Маданият ва маърифат" телеканалида соат 10:00да
"MY5" телеканалида соат 22:10да
"Севимли" телеканалида соат 13:20да

“Маҳмудхўжа Беҳбудий” фильмининг телевизион намойиши эса қуйидаги телеканаллар орқали белгиланган вақтларда эфирга узатилади:

"Ўзбекистон" телеканалида соат 12:00да
"Ўзбекистон тарихи" телеканалида соат 08:00да
"Кинотеатр" телеканалида соат 15:20да
"Маҳалла" телеканалида соат 10:00да
"Маданият ва маърифат" телеканалида соат 22:00да

“Ўзбеккино” Миллий агентлиги Ахборот хизмати

Website | Facebook | Instagram | Telegram

Биз блогерлар доим қанақадир ўғирлик там талон-тарожлардан жаҳлимиз чиқиб постлар ёзамиз. Аммо бир куни, кимдир нимадир ўғирлаганидан хурсанд бўлган кунимиз ҳам бўлганди😂

Бу "Заковат" интеллектуал ўйинининг блогерлар қатнашган сонида бўлганди. Шу ердан ўйинни тўлиқ кўриш мумкин👉 https://www.youtube.com/watch?v=lNsQo-pTH8A&t=1827s

Каналга уланиш 👉 @nurbekalimov