يابنااااات يااااشباب
مافيش هابي فالنتين❌❌
مافيش عيد حب ❌❌
مافيش حاجة اصلا اسمها ارتباط بين الشباب والبنات من غير مايكون فيه خطوبة رسمي
مافيش حاجة اسمها أصله هيتقدملي ❌
والله تجارب الحب والارتباط الكل بيطلع منها خسران وقلبه مكسور
والبنت اكتر واحدة بتحاسب على فاتورة الحب من كسرة قلبها ومشاعرها
ماتسلموش نفسكم للوهم
الحب الحقيقي اللي بيبدأ من باب البيت
غير إن الفلانتين وهداياه مش من ديننا حتى لو متجوزين
دي ثقافة الناس اللي بيبيدوا أهلنا في غز--ة دلوقتى وهو ده الحب بتاعهم
حب لكل حاجة مخالفة للاسلام واحتلال لينا بثقافة مش ثقافتنا عشان يقدروا يسيطروا على عقولنا وشبابنا بس
يابنااااات ياشبااااااب
ماتنبهروش بهدايا الفالنتين والناس اللي بتجيبها
بالعكس قاطعيه أولا لأنه مش من ديننا
ثانيا لأنك هتقطعي علاقة الارتباط دي وتختاري رضا ربنا وحبه فوق أي حب👍

#الحب_وسنينه
#رسايل_الفلانتين

س/ كنت صايمة ولكن قبل المغرب لقيت إفرازات لونها بني لكن دم الحيض الصريح مانزلش قبل المغرب ...كده اليوم ده أتحسب صيام ولا أصومه تاني ؟وأصلي ولا لأ ؟
ج/ الإفرازات دي تتبع ماقبلها ...يعني طالما قبل الحيض وانتي أصلا في طهر ...فهتكون الافرازات دي طهر ...يعني هتصلي وتصومي عادي لحد ماينزل دم الحيض الصريح بس في الصلاة هتتوضي بعد دخول وقت الصلاة طول فترة الافرازات
👈 ونفس الحكم لو حسيتي بمغص قبل المغرب ومانزلش دم الحيض ...مجرد المغص مش سبب للفطر ولا سبب لترك الصلاة
**
س/طيب لو قبل المغرب ولقيت دم الحيض الصريح ...كده الصيام اتحسب ولا صيام اليوم ده ضاع عليا؟
ج/ لو كان الدم الصريح قبل المغرب ولو بدقيقة كده هتقضي اليوم ده يعني هتصوميه تاني بعد رمضان
بس أجرك ماضاعش ولا حاجه ...هتاخدي أجرك من الشكور على انك فضلتي في عبادة طول الوقت ده ..ولما فطرتي فطرتي عبادة بردو ...مافيش حاجه بتضيع عند ربنا ، الحساب عند ربنا بالذرة

#فتاوى_رمضانية
#رسايل

س/ لو خلص الحيض قبل الفجر بمدة بسيطة مالحقش اغتسل فيها ...ينفع أنوي الصيام وأغتسل بعد اذان الفجر ولا لازم الاغتسال قبل الفجر ؟؟
ج/ طالما شوفتي الطهر قبل الفجر يبقى لازم تنوي الصيام
وينفع تغتسلي بعد الفجر عادي وصيامك صحيح
*
س/ طيب لو اغتسلت ونويت الصيام ونزل دم تاني ...اعمل ايه ؟
ج/ _ لو كان نزول الدم في فترة ١٥ يوم من أول يوم حيض ...هتعتبريه حيض وتفطري وتصومي مكان الأيام دي طبعا

_أما لو كان نزول الدم بعد الفترة دي هتعتبريه استحاضة وتصومي عادي وتتوضي لكل فرض بعد الاذان
⛔ طبعا الكلام ده في حالة نزول دم كتير زي الحيض ولا اعتبار لنزول نقطه واحده او اتنين لان ده ممكن يحصل مع المجهود او الحركه
*
س/ طيب لو نزل افرازات بني مش دم ؟..هل الحكم يختلف ولا واحد ؟
ج/ الإفرازات تتبع ماقبلها
لو متأكده انك شوفتي الطهر اللي علامته
1️⃣الإفرازات الشفافة أو البيضاء....
2️⃣ أو الجفاف يعني الرحم مش بيطلع أي إفرازات
ساعتها هتكون الافرازات دي طهر هتتوضي لكل صلاة بعد الاذان بس
أما لو استعجلتي في الغسل بدون ماتشوفي الطهر هتكون الافرازات دي تبع الحيض

#فتاوى_رمضانية
#رسايل

كل سنه وأنتم طيبين🤝...
ليلة النصف من شعبان خلاص على الأبواب
حبينا نفكركم ونأكد على :
- مفيش قيام ولاصيام مخصوص في الليلة دي ...
الصيام الوارد عن النبي طول السنه هو .. صيام الأيام البيض من كل شهر ..
ماتصومش يوم ١٥ مخصوص ❎
صوم التلات أيام البيض✅

- مفيش صلاة مخصوصة في الليلة دي ..

- مفيش احتفال مخصوص بليلة النصف من شعبان ولا هي ليلة بتتوزع فيها الأرزاق ولا أي حاجة ..
الكلام ده كله في ليلة القدر
همتك معانا بقى عشان تفوز بيها في رمضااان 💪

إيه ده يعني مفيش أي فضل لليلة النصف من شعبان ولا إيه 💔؟؟؟
لا فيه طبعًا .. بس نقول الفضل اللي ورد عن النبيﷺ من غير أي زيادة او نقص
"في ليلة النصف من شعبان يطلع الله إلى عباده فيغفر لكل النااااااس إلا مشرك أو مشاحن"
الحديث رواه ابن حبان في صحيحه وابن ماجه والطبراني وصححه الشيخ الألباني وغيره ، وفيه خلاف صحته وتضعيفه ، لكن العمل عليه عند كثير من أهل العلم..

يبقى الصح تعمل إيه في الليلة دي وقبلها؟!
- تصالح أي حد مقاطعه بدون داعي إلا لمصلحة دينية أو لسبب شرعي
- تنضف قلبك من أي غل أو حقد تجاه حد من المسلمين
- تنزع من قلبك التعلق بغير الله ، والأمور اللي ممكن تكون ذريعة للشرك ، زي التمائم والخرزة الزرقا والحظاظة ، أو التعلق بشخص مقبور لا يملك لنفسه فضلا عن غيره ضرًا ولا نفعًا ..
وبس كدة..
مبروووك عليك ليلة النصف من شعبان🤝
نطمع في كرم ربنا الغفور إنه يغفر لنا الذنوب كلها وندخل رمضان على نظافه بقى ..
يارب اغفر لنا ذنوبنا كلها ولجميع المسلمين 🤲

#رسايل

[ قبلة ترضاها 4 ]

كانت حادثة تحويل القبلة...
تشريف وتكليف لأمة خاتم الأنبياء
لأن زي ماربنا هدى الأمة دي لقبلة إبراهيم وفضلهم على أمم كتير ....
كمان فضل الأمة بإنها تكون وسطا وشهداء على الناس ...بمعنى إنهم أمة تستحق إن يجوا يوم القيامة يشهدوا على باقي الأمم إن رسلهم وصلتهم الرسالة وإن الرسل أدوا الأمانة
فكانت دي كرامة وتشريف لأمة محمدﷺ إنها هتشهد على كل الأمم في اليوم الصعب ده
"يَجِيءُ نُوحٌ وأُمَّتُهُ، فيَقولُ اللَّهُ تَعالَى: هلْ بَلَّغْتَ؟ فيَقولُ: نَعَمْ أيْ رَبِّ، فيَقولُ لِأُمَّتِهِ: هلْ بَلَّغَكُمْ؟ فيَقولونَ: لا ما جاءَنا مِن نَبِيٍّ، فيَقولُ لِنُوحٍ: مَن يَشْهَدُ لَكَ؟ فيَقولُ: مُحَمَّدٌ صلَّى اللهُ عليه وسلَّمَ وأُمَّتُهُ، فَنَشْهَدُ أنَّه قدْ بَلَّغَ، وهو قَوْلُهُ جَلَّ ذِكْرُهُ: "وَكَذَلِكَ جَعَلْنَاكُمْ أُمَّةً وَسَطًا لِتَكُونُوا شُهَدَاءَ عَلَى النَّاسِ"

الشرف ده محتاج منك تكون قد المسؤولية
وتشيل هم دينك وماتفرطش فيه
فتحافظ على الصلاة والصيام وغض البصر وتبعد عن كل حرااام
عشان تستاهل تكون من الشهود اللي هيشهدوا على كل الأمم

النهاية..،

قبلة_ترضاها
#رسايل

عاوزة بجد تفوزي برمضان 💪

امشي على الوصفة دي بالظبط ....

١_ابدأي رمضان بالتوبة من كل ذنب وحاسبي نفسك كويس أوووي عشان نبدأ رمضان على نظافة

٢_اعمليلك برنامج رمضاني مميز يناسبك انتي ....،بس تزودي من العبادات والطاعات على اد ماتقدري ....
لازم تزودي عشان الوصفة تظبط😋

٣_ماتزعليش على وقتك اللي بيضيع في الدراسة لو بتدرسي أو في البيت مع أولادك ...لأنك باحتسابك ليكي أجوووووور كتييييير ...بس انتي احتسبي 👍

٤_هتحتاجي كمان تغذي قلبك في رمضان عاوزين درس إيماني صغير كدة ع السريع ..
وممكن تتابعي دورة "قصة بناء أمة" اللي هتقدمها أكاديمية ميراث للوعي الإسلامي خلال رمضان

٥_ابعدي عن أي حد يعطلك أو يقلل همتك أو يحكيلك عن المسلسلات واللي فيها وصاحبي اللي تشجعك على الطاعة في رمضان وغيره
..خدي بالك ....أي كمية صغيرة من ده الوصفة هتبوظ خالص😤

٦_حددي هدفك من رمضان واوعي حاجة تشتتك خلى قدامك هدف واحد بس تسعي ليه من أول يوم .. العتق من النار والفردوس الأعلى

٧_قللي الوقت الضايع في رمضان
مش كل يوم خروج وزيارات ولبس عيد وكحك وبسكوت....لا...كده مش ناااافع

٨_خلي ايدك تاخد أجازة شوية من التليفون في رمضان🙄 ....
وخلى أقرب حاجة لإيدك مصحفك

٩_الوصفة مش هتنفع من غير ... التراويح والذكر وجلسة الضحى والصدقات
عاوزاها تبوظ يعني ؟؟

١٠_ابعدي عن الحاجات اللي هتحرقلك الوصفة دي بعد ماتعبتي فيها
ابعدي عن الغيبة والنميمة،ابعدي عن أي جدال وخصام

الوصفة دي تستاهل التعب 💪
رمضاااان فرصة...يلا نستغلها

#رسايل

خطة عملية للـ ٣٠ يوم رمضان إن شاء الله:

١- الـ ٥ صلاوات في المسجد للشباب..
الـ ٥ صلاوات في وقتهم بدون تأخير للبنات..

٢- السُنن الراتبة ( عندك ١٢ ركعة لازم تداوم عليهم يومياً .... ٢ قبل الفجر ... ٤ قبل الظهر و ٢ بعده .... ٢ بعد المغرب ... ٢ بعد العشاء )

٣- صلاة الضحي ( بتبدأ من بعد شروق الشمس بـ ربع ساعه ... لحد قبيل أذان الظهر بـ ربع ساعة .. أقلّها ركعتين لحد ٨ ركعات ..إنت وهمّتك )

٤- أذكار الصباح والمساء ( أذكار الصباح بعد الفجر .... وأذكار المساء بعد العصر )

٥- صلاة التراويح
- للشباب ... في المسجد مع الإمام واختار إمام يكون صوته حلو علشان تحسّ بالصلاة

_للبنات ..لو هتصليها في بيتك ده الأفضل ولو هتنزلي المسجد يبقى بكامل حجابك

٦- الصدقة ( يوميًا .. ولو بمبلغ بسيط ولو ربنا موسّعها عليك تصدّق بما يليقُ بك ...وافتكر في النهاية ان انت أحوج للصدقه وأجرها من الفقير )

٧- عمرة و حج يوميًا ...معاك ٣٠ حجة وعمرة ماتسيبهمش في رمضان ( بعد ما تصلي الفجر متطلعش من المسجد ... خلّيك في المسجد لحد الشروق ... قول الأذكار واقرأ قرآن ... لك بذلك أجر حجة وعمرة تامة تامة تامة ..)

٨- قراءة القرآن

- لأصحاب الهمم العالية مش أقل من ٥ ختمات في الشهر .. بواقع ٥ أجزاء يومياً ... يعني هتختم كل ٦ أيام مرة

- لأصحاب الهمم المتوسطة أو المشغوليات الكتير مش أقل ٣ ختمات في الشهر .. بواقع ٣ أجزاء يوميًا ... يعني هتختم كل ١٠ أيام مرة

- للمبتدئين وأصحاب المشاغل الكتيرة جدًا ... مش أقل من ختمى في الشهر .... بواقع جزء كل يوم فقط

٩- الدعاء ( عندك ٣ أوقات مفيش فيهم كلام )

- النص ساعة قبل الفطار
- الساعة اللي قبل الفجر
- آخر ساعة بعد العصر من كل جمعة

١٠- ركعتين في جوف الليل ( عاااااارف ياسيدي والله إنك صليت التراويح .. بس ده ميمنعش إنك تصلي ركعتين خفاف في وقت النزول الإلهي .. علشان تبقي مُميّز مش زيك زي الناس ) .... وكمان ربنا بيقول ( وتزوّدوا فإن خير الزاد التقوى )

--------------------

دول ١٠ خطوات ..... لو داومت عليهم....خلال الـ ٣٠ يوم ..... هيكون أحسن رمضان عيشته في حياتك ....وهتخرج من رمضان إنسان تاني ..... كأنك لسه مولود .... مين عارف مش جايز رمضان السنة دي هو نقطة انطلاقك اللي كنت مستنّيها من زمان ؟ جايز

#رسايل_رمضان
#رسايل

الحور العين في الجنة شكلهم إيه ؟
ربنا بيقول في القران
( وَحُورٌ عِينٌ . كَأَمْثَالِ اللُّؤْلُؤِ الْمَكْنُونِ )
أى أنهم كاللؤلؤ الأبيض المحفوظ من أى شمس أو ريح أو أتربة ممكن تأثر عليه
وربنا بيقول برده (إناأنشَأْنَاهُنَّ إِنْشَاءً . فَجَعَلْنَاهُنَّ أَبْكَارًا . عُرُبًا أَتْرَابًا)
عُربا يعنى تتحبب لزوجها وتعرب له عن حبها
أترابا أى صغيرات السن في سن ٣٣
*انتباه*
وحال المؤمنة في الجنة أفضل من حال الحور العين وأعلى درجة وأكثر جمالاً فالمؤمنة فى الجنة كالملكة والحور العين كالوصيفة
#لأجلها_نعمل
#رسايل_رمضان

س1️⃣/ يعني ايه زكاة الفطر ؟
ج/ زكاة الفطر هي إخراج مقدار معين من الحبوب زي الرز وغيره كزكاة مرتبطة بإتمام صيام رمضان وزكاة الفطر واجبة على كل مسلم كبير وصغير حتى لو لسه مولود ، ذكر وأنثى، سواء صام رمضان أو ماصامش لعذر طبعا
لحديث ابنِ عبَّاسٍ قالَ *فرضَ رسولُ اللَّهِ ﷺ زَكاةَ الفطرِ طُهرةً للصَّائمِ منَ اللَّغوِ والرَّفثِ وطعمةً للمساكينِ من أدَّاها قبلَ الصَّلاةِ فَهيَ زَكاةٌ مقبولةٌ ومن أدَّاها بعدَ الصَّلاةِ فَهيَ صدقةٌ منَ الصَّدقاتِ*
**
س2️⃣/ المفروض أطلع كام كيلو رز مثلا عن كل فرد ؟ولازم رز ولا ممكن حاجه تانية؟
ج/ الواجب في زكاة الفطر صاع من غالب قوت أهل البلد ...صاع يعني 2 كيلو ونص تقريباً
ومش لازم رز ممكن كمان قمح (دقيق أو مكرونه)
وممكن تطلع أكتر من كده زي ماتحب وواجب على كل مسلم يطلع زكاة الفطر عن نفسه وعمن تلزمه نفقته ..يعني هتطلع عن نفسك وعن زوجتك واولادك
ولو مطلق وولادك مش معاك واجب عليك تطلع عنهم
**
س3️⃣/ينفع أشوف سعر الارز مثلاً واديهم فلوس لحد فقير ولا لازم اشترى رز أو اي صنف من الحبوب ؟
ج/ الراجح لأ .. والمسألة فيها خلاف
والحديث الوارد في زكاة الفطر بيقول إنها تكون أكل من الأصناف اللي ذكرتها؛ لأن النبي ﷺ والصحابة طلعوها أكل بس ، فبلاش احنا نقرر نطلعها حاجه تانية
فممكن تشوف السعر وتدي القيمة لجمعية تشتري هي حبوب وتوزعها
**
س4️⃣/ ايه الوقت اللي المفروض أطلع فيه زكاة الفطر ؟
ج/ زكاة الفطر ينفع تطلع قبل العيد بيوم او اتنين ....لقول ابن عمر ((وكانوا يعطون قبل الفطر بيوم أو يومين)...ومعاك لحد صلاة العيد
ولااااااازم تكون خرجتها قبل صلاة العيد
*
س5️⃣/طيب لو مش هعرف أطلع زكاة الفطر في الوقت ده ؟ أو مش جنبي حد فقير أعمل ايه ؟
ج/ هتحسب سعر 2 كيلوونص رز أو قمح (دقيق أو مكرونة)
وتدفع المبلغ ده لجمعية وهي تطلع عنك زكاة الفطر في آخر رمضان

#كاريكاتير_رسايل
#رسايل_رمضان1444هـ

س1️⃣/ يعني إيه صيام 6 من شوال ؟ وايه فضله ؟
ج/ شهر شوال هو شهر عيد الفطر يعني الشهر اللي بيجي بعد رمضان على طول
والنبيﷺ وصانا إننا نصوم منه 6 أيام وبكده ناخد اجر كإننا صومنا السنه كااااااملة
لحديث: *من صامَ رَمَضانَ ثُمَّ أتْبَعَهُ سِتًّا مِن شَوَّالٍ، كانَ كَصِيامِ الدَّهْرِ.* رواه مسلم
**
س2️⃣/يعني صيام 6 من شوال سُنة ولا فرض ؟
ج/صيام 6 من شوال سُنة ولكن أجره كبير
الصيام الوحييييد الفرض هو صيام رمضان
**
س3️⃣/ أصومهم في أي وقت طول الشهر ولا لازم أبدأ من يوم معين ؟
ج/ صوم في أي وقت طول الشهر
اهم حاجه تخلص ال6 أيام قبل آخر يوم في شوال
**
س4️⃣/ينفع أصومهم متفرقين ولا لازم أصوم ال6 أيام ورا بعض ؟
ج/ ينفع تصومهم متفرقين عادي مش لازم ورا بعض
**
س5️⃣/ينفع أصوم بنية الأيام اللي عليا ونية ال6 من شوال في نفس الوقت ؟؟
ج/ لا ماينفعش لازم لكل واحد نية لوحده لأن ايام رمضان فرض وال6 من شوال سُنة زي بالظبط ماينفعش تصلي 4 ركعات بنية الظهر والسُنة
**
س6️⃣/ طيب ينفع أصوم بنية 6 من شوال وفي نفس الوقت بنية الاثنين والخميس أو الأيام القمرية (ايام 13,14,15 من الشهر الهجري )؟؟
ج/ اه ينفع لان الاتنين سُنه فينفع عادي تنوي النيتين وتاخد الأجرين بإذن الله
**
س7️⃣/طيب أنا عليا أيام من رمضان ينفع أصوم ال6 شوال الأول وبعد كده أصوم الأيام اللي عليا في رمضان ؟
ج/ فيه خلاف والراجح إنه ينفع
والافضل طبعا تخلصي الايام اللي عليكي الاول لو انتي ضامنه إنك هتلحقي تخلصي الايام دي وال6 أيام من شوال أما لو مش هتلحقي ....يبقى تصومي ال6 أيام الأول وبعدها تصومي اللي عليكي لأن قضاء أيام رمضان مش واجب على الفور ولكن واجب على التراخي (يعني مش لازم تصوميه اول مايخلص رمضان أهم حاجه تخلصيهم قبل رمضان الجاي)
لحديث السيدة عائشة : *كان يكون علي الصوم من رمضان فما أستطيع أن أقضي إلا في شعبان*


#رسايل

س/اغتسلت من الحيض وبعدها اكتشفت اني نسيت اشيل المانيكير .. اعيد الغسل؟

ج/ لا ماتعيديش

شيلي المانيكير، واغسلي صوابعك بنية رفع الحدث الأكبر، أو نية التطهر من الحيض.

يعني كأنك بتكملي الغسل.

لأنه لا يشترط في الغسل الموالاة يعني أن غسل الأعضاء كلها يكون ورا بعض

بس خدي بالك المانيكير برة البيت حرام لأنه زينة
يعني لو بتخرجي بيه في الشارع مش هينفع خالص ولازم تشيليه قبل الخروج


#رسايل

هو ليه فيه بنات بتعتبر الرقص في الأفراح قدام الناس كلها والشباب يتفرجوا ده حاجة عادية ؟؟

اللي بيحصل في الأفراح ده مش عادي وعمره ما هيبقى عادي
ومينفعش احنا نتعامل معاه على إنه عادي ، انتي كبنت واجب عليكي تمشي بطريقة ماتلفتش النظر أصلا ...مش إنك ترقصي وتفرجي الناس كلها عليكي
ده طبعا غير الناس اللي بتصور والمقاطع دي تفضل ع تليفوناتهم او تنزل ع التيك توك وغيره ..
وكل ده في ميزانك هتلاقيه يوم القيامة
ومش بس كده ....
ده انتي هتلاقي في ميزانك بنت كانت شايفة إن عمرها ماترقص قدام الناس بس اتشجعت لما شافتك وتانية وتالتة ...وكل ده في عداد سيئات ماتعرفيش توقفيه

محتاجين نأكد على شوية ثوابت كده لاحسن تتنسي ..
-رقص البنات في الأفراح في وجود شباب حراااااام ❌
- لو رقصت قدام راجل واحد بس غريب بردو حراااااام ❌
- الرقص في حفلة التخرج والفن داي وفي أي مكان فيه شباب حرااااااام ❌

خدوا بالكم يابنات وماتشيلوش نفسكم ذنوب انتوا في غنى عنها

افرح_صح
#رسايل

📣 يابنااااااات

- خدي بالك مافيش حاجة اسمها حنة البنات فينفع تلبسي أي حاجة....فيه عورة حتى قدام البنات ...اللبس القصير فوق الركبة واللي مبين ضهرك وغيره ماينفعش

- سيشن الروب ده ماينفعش خاااالص 😤
حتى لو اللي هتصورك بنت ....العورة ياست البنات ماتنسيش فوق الركبة منها
وطبعا لو راجل اللي بيصور دي مصايب كتير اوي

- مافيش حاجة اسمها الجو حر ومش هلبس حاجة تحت الفستان وتلبسي الفستان شفاف ....جسمك ياست البنات أمانة عندك لازم تغطيه

- صورك اللي بتنزل عند الكوافير والفوتوجرافر وغيره ....خدي بالك هتفضل سيئة جارية في ميزانك

افرحي ياست البنات بس من غير ماتشيلي نفسك ذنووووب

افرح_صح
#رسايل

س / ايه حكم إزالة الشعر بالليزر عند دكتورة ؟؟
ج/
إزالة الشعر بالليزر لو في منطقة العورة (البيكيني ) ....حراااام لأن المنطقة دي من العورات اللي ماينفعش تنكشف غير لضرورة والليزر مش ضرورة

أما إزالة شعر الايد والرجل وغيره من المناطق اللي مش عورة للمرأة على المرأة ...فيجوز ومافيش فيه مشكلة
****
س/ طيب ماهو إزالة الشعر ضرورة للنظافة الشخصية ومن خصال الفطرة ومش هقدر أعمله لنفسي مش ده عذر ؟
ج/
إزالة الشعر ممكن بطرق كتير مش لازم بالليزر
والعذر يكون للمريضة اللي مثلا عندها شلل أو ايد مقطوعة ....أعذار حقيقية تمنع انها تعمله لنفسها
أما السليمة الكويسة اللي هو اغلب البنات فإزالة الشعر بالليزر مش ضرورة عشان تنكشف العورة حتى لو دكتورة
لأن المنطقة دي منطقة عورة حتى على النساء
***
س/ طب أيه الحل لو أنا عاوزه أعمله بالليزر ؟
ج/ فيه مراكز بيكون فيها خدمة ذاتية لمنطق العورة (البيكيني) وهي إن البنت تعملها لنفسها تحت إشراف الطبيبة اللي بتظبطلك الجهاز وبتعلمك ازاي تعملي لنفسك ....دوري على مكان فيه الخدمة دي
وبكده تبقي عملتي الليزر من غير ماتبقي اخدتي ذنب انكشاف العورة لغير ضرورة

#رسايل

بخصوص الميمز على الكلالة والميراث
اللي جه عليها سؤال في امتحان الدين للثانوية العامة
ياجماعة خدوا بالكم....
مش أي حاجة ينفع تاخدها هزار والله
ده كلام ربنا اللي المفروض تكون عارفه
إنت مش عارف قول مش عارف..
إنما لما تاخد الآيات مادة للهزار ..إنت كده بتعرض نفسك للوعيد ده والله
"وَلَئِنْ سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللَّهِ وَآيَاتِهِ وَرَسُولِهِ كُنْتُمْ تَسْتَهْزِئُونَ لَا تَعْتَذِرُوا قَدْ كَفَرْتُم بَعْدَ إِيمَانِكُمْ"

يلا ..لو وقعت في الغلطة دي احذف اللي كتبته حالا واستغفر ربنا
منشن لصاحبك اللي عمل ميمز على الكلالة وغيرها
عاوزين نرجع تاني لقيمنا ..فيه حاجات خط أحمر مش مسموح بتجاوزه ❌️
وأولها طبعا كلام ربنا وسنة نبينا..ماينفعش أبدا ترول عليهم 👍

#رسايل

س/مين هم المحارم ؟؟
ج/ محارم المرأة هم الرجال اللي يجوز للبنت تقعد قدامهم بدون حجاب
واللي يحرم تماما انهم يتزوجوا البنت دي ..
ودول بيتقسموا لتلات أنواع :
1️⃣ محارم بسبب القرابة
2️⃣محارم بسبب الرضاعة
3️⃣محارم بسبب الزواج
*****
س/مين هم المحارم بسبب القرابة ؟
ج/1️⃣الأب والجد اللي هو أبو والدك ..
*ابن عم والدك الكبير مش جد❌،
*جوز عمة والدك الراجل الكبير مش جد برضو ❌
2️⃣الابن والأحفاد
*ابنك بس ... أصحاب ابنك مش محرم ماينفعش تسلمي عليهم حتى لو انتي أكبر من والدتهم ❌
3️⃣ العم والخال ومعاهم عم والدك وخال والدتك ....
لكن ابن عم والدك مش محرم ولا ابن خالة والدتك❌
4️⃣الأخ وابن الأخ وابن الأخت
*ابن اخو زوجك وابن اخت زوجك مش محرم ❌
***
س/مين هم المحارم بسبب الرضاعة ؟؟
ج/ قال رسول الله (( يَحرُمُ مِنَ الرَّضاعةِ ما يَحرُمُ مِنَ النَّسَبِ ))
يعني الأب والإبن والأخ والخال والعم من الرضاع ..محرمين
بس رغم إنهم محارم إلا إنن لازم ناخد بالنا من التساهل في اللبس أمام المحارم من الرضاعة
**
س/ مين هم المحارم بسبب الزواج (المصاهرة )؟؟
ج/ 1️⃣ أب الزوج (الحما)...يحرم تحريم ابدي بمجرد العقد حتى لو طلقت الزوجه بعد كده
*وأم الزوجة (الحماة)...تحرم على زوج بنتها بمجرد العقد حتى لو لم يكتمل الزواج او اتطلقوا
2️⃣ ابن الزوج ...اذا ليه ابناء من زواج تاني يحرم بمجرد العقد
*
يعني كده...
*أخو الزوج خال الزوج عم الزوج مش محرم ❌
*زوج الأخت مش محرم ❌، صحيح ماينفعش يتزوج اخت الزوجه بس مش تحريم ابدي ...ده تحريم مؤقت
*ابن الخالة وابن العمة وجوز خالتك اللي مربيكي ....كل دول مش محااااارم ❌
الحجاب يتلبس قدامهم ومفيش سلام بالإيد عليهم ❌


#رسايل

﴿ أَليْسَ اللَّهُ بِكَافٍ عَبْدَهُ ﴾
خاطب بها نفسك كل يوم حين تخاف وتقلق
خاطب بها نفسك ...حين تفكر في مستقبل مجهول بالنسبة لك ،حين تترك عملا محرما، حين تجدين الحرب على حجابك

هنا.... فقط الأمان والسعادة والراحة
هنا.... تعلم أن من رزقك بالأمس سيرزقك غدا وأن من توكل على الله كفاه فلا داعي للقلق
هنا....تأخذ القرار الصحيح بترك كل عمل يغضبه تعالى فلا تعمل في أي مكان يتعامل بالربا ولا تضع أموالك في بنك ربوي ولا تعمل في الفنادق التي تقدم الخمور والمعاصي
هنا.... تربطين على حجابك وتشدين وثاقه ولا تخافي من أي تهديد بضياع وظيفة أو زواج أو غيره
هنا ...الكفاية حين يكفيك الله أمرك فتتبدد كل المخاوف وتعلم أن كلّ شيء في هذه الحياة وإنْ عَلا فالله أكبر منه

اجمع مخاوفك كلها وتوكّل على الله من خالص قلبك و كن على يقين أنه سيكفيك
"وَمَن يَتَوَكَّلْ عَلَى اللَّهِ فَهُوَ حَسْبُهُ ۚ إِنَّ اللَّهَ بَالِغُ أَمْرِهِ ۚ قَدْ جَعَلَ اللَّهُ لِكُلِّ شَيْءٍ قَدْرًا"

#رسايل_تدبر

تعرف إيه أسوأ من إنك تعمل ذنب ؟!
الأسوأ إنك تتابع بين الذنب والذنب اللي بعده ✋

• تطلق بصرك في الشارع وبعدها تتفرج على أفلام إباحية ..
• تشرب سيجارة وبعدها مخدرات ..
• تحطي زبدة كاكاو وانتي خارجة وواحدة واحدة تنزلي ب full makeup
• تلبسي بنطلون واسع ثم سكيني
• تتصاحبوا وتعملوا علاقة ع الشات أو الموبايل والموضوع يتطور ويبقى زنا وفاحشة ..

تتابع الذنب بعد الذنب بدون فاصل ندم وتوبة ورجوع لربنا من أسوأ وأخطر ما يمكن يحصل لأي واحد مننا 😞

- ولذلك ربنا نهانا عن اتباع خطوات الشيطان ..
{ يا أيها الذين آمنوا لا تتبعوا خطوات الشيطان }
كل اما خطوات الشيطان تكتر وتتسارع بيبقى صعب أوي الوقوف والسيطرة ع النفس ..
وكل اما تبعد بترجع بصعوبة ..

عشان كده عاوزك تلحق نفسك أول بأول ..
كل اما تزل وتقع في ذنب ،
استغفر وتوب بسرعة وارجع لربنا
{ إن الذين اتقوا إذا مسهم طائف من الشيطان تذكروا فإذا هم مبصرون }

• توب وكمان اعمل عمل خير يعيدك لطريق ربنا ..
{ إن الحسنات يذهبن السيئات }
التوبة بعد الذنب بتبطل مفعول خطوات الشيطان اللي ممكن تبتدي بذنب صغير جدا وتنتهي بالكفر زي ما حصل مع الراهب برصيصا

#رسايل

وصية النبيﷺ "ولا تترُكْ صلاةً مكتوبَةً متعمدًا ، فمن تركَها متعمِّدًا فقدْ برِئَتْ منه الذِّمَّةُ"
تخيل ترك صلاة واحدة بس متعمد = برئت منه الذمة!!
يعني ماعدش ليه ضمان ولا عهد عند ربنا إنه يرحمه ويغفر له ومايعذبوش
طب اللي بيضيع الصلاة بالأيام ويمكن بالشهور هيبقى حاله ايه ؟؟!!
الصلاة خط أحمر ....اوعى تفرط في فرض واحد❌️
ولو الشيطان غلبك مرة وكسلت ...قوووم تاني وحافظ تاني✅️
أصلك هتتحاسب على فرض فرض ...فحافظ إنك تكون دايما في ذمة الله وماتعرضش نفسك للخطر ده

#رسايل

✋محجبة ولكن......
_لابسة فستان قصير مبين رجلك
_لابسة بنطلون ضيق أوقصير
_لابسة طرحة خفيفة وشفافة مبينة شعرك أو مطلعة شعرك من الطرحة
_لابسة لبس ضيق أو شفاف
_لابسة خلخال في الشارع
_لابسة تربون أو طرحة مبينة رقبتك وودنك.....

طبعًا انتوا عاملين خطوة كويسة أوي بإنكم غطيتوا شعركم 👍
بس بصراحة كدة...
انتوا شايفين إن ده الحجاب اللي ربنا فرضه ؟؟!!
انتوا شايفين إنكم كده أخفيتوا زينتكم زي ماربنا أمر ولا أظهرتوها ؟؟
*انتي لما تلبسي الضيق والشفاف تفتكري كده تبقي التزمتي بالحجاب ؟؟!
السيدة عائشة لما دخل عليها نساء لابسين لبس شفاف قالتلهم :
"إن كنتن مؤمنات فليس هذا بلباس المؤمنات"😥
*البنات اللي بتبين رقبتها...
يابنتي ربنا بيقولك : ((وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ))
يعني حجابك ينزل يغطي رقبتك وجسمك ..
ازاي شايفة ان عادي تبيني رقبتك؟؟!
*البنات اللي بتلبس خلخال في الشارع وشايفة إن ده عادي ..
إنتي متخيلة إن في الآية نهي صريح عن مجرد سماع صوت الخلخال لو ملبوس تحت اللبس ...
تفتكري اللي بتلبسه في الشارع عادي كدة يبقى النهي في حالتها ايه؟؟!!
ماتقولييييش 😤...
احنا أحسن من غيرنا ...شوفوا باقي البنات بتلبس ايه ....لإن الحرام هيفضل حرام حتى لو كل الناس عملته

📣يابنااااااات
كفاية جري ورا الموضة....
طبعًا ..الفتن كتيييير والثبات صعب
بس الجنة تستاهل ....اجمدي واثبتي شوية واتمسكي بحجابك صح 💪
#رسايل