يوم ستشهاد الفضل ابن الإمام العباس عليه السلام
https://t.me/shabkd

1محرم  الحرام
‏نزله حماسيه   
جديد  (1448ه‍) (2026 م) 
‏            
‏ ياهــلا بشهر الحـزن
‏نبجي المصـابه ونون
‏
‏زينب أنواسيها    زينب أنواسيها
‏__
‏ياهلا بشــهر المـناحه.ياهلا بـشهر الجروح
‏شفت الجروح بهلاله وطلعت منعدي روح 
‏جهزت كلشي المصابه وللعزه واجب اروح 
‏وأخدم بلايه مظاهر ابجي الحسين وانوح

‏هلاله من شفته الشهر 
‏دمعـتي ســيل المـطر 
‏دمعتي من اجريها     زينب أنواسيها 
‏____
‏واجبه الدمعه ع جرحك واجب علينه الدمع
‏ننـصب الجرحك عزيه ونلطم ونكـسر ضلع  
‏ذابت الروح بمـصـابك سـيـدي ذوبـت شـمـع 
‏مااوصـف وضعي  أنه لو اجـه هـلالك يشــع 
‏
‏نكتـب اهات وجرح
‏للـغـريــب المنــذبح  
‏نبجي وي ناعيها    زينب أنواسيها 
‏____
‏نبـجي المصـاب العقلية الضلت بلايه أهل 
‏لو نعه ناعيها حيره  ويذكر الـصار وحصل 
‏حايره بجمع اليتامه  تندب بصوت الوجل 
‏مذبحـه كل العـشـيره والكفل طـاح الكـفل
‏
‏والحسـين ع الثـره 
‏والنـذل حز منحره 
‏ونذبح  واليها     زينب أنواسيها 
‏____
‏هـلال شهرك لوالفانه نلبـس اثـياب العزاء
‏والـحزن عم  المدينه ويرتفع صوت النداء 
‏نذكر الحره الغريبه وحيده في طف كربلاء
‏تريده عبـاس اليجيـها ويــنه شــياله الـواء
‏
‏زينـب بنار الـخيم
‏تريده شيال العلم
‏تنـدب الغاليها     زينب أنواسيها 
‏___
‏حايره وزيـنب غـريبه تــريده شـيال العلم
‏تكـله ياخويه بغيابك حركو اعليـنة الخيم 
‏من الهيب النار بعدك ينجوي خويه الجدم
‏وانه وحـدي بلا كفاله عندي أيـتام وحـرم
‏بـزودك  أنه  مـدالله 
‏من  جبـتني  الكربلة 
‏
‏والكفل حاميها      زينب أنواسيها 
‏___  
‏الشاعر الحسيني
‏مرتضى مكطوف الموالي 
‏

زينب ع استقبال محرم


          يهلال الـموت..المـــن هليت
          دمعه ابعيناي..ماضن خليت
عشت هــم وقهر       وعمه اعيوني السهر
              المن هليت المن هليت
==========================
 گلتلك لاهله ولاجيت منك هاجـت  آلامي
تهل يالبيك خمس اخـوان مـذبـوحين گدامي
   طاحوا وانــه منـــي تطيح سنين العمر ويامي
  مجرح من هذاك اليوم خدي ومتني واجدامي

            فـرگه الخوان..تهــدم بالحيل
            الفاگدله اعزاز..شينومه الليل
الحزن سيفــــه شهر     وعمه اعيوني السهر
              المن هليت المن هليت
=========================
 بيك اشچم جرح ماطاب لحد هسه يأذيني
  اريد ارتاح مـــــــن النّوح شمالك ماتخليني
  منين الصبر اجيبنـه وانه للفاگـده احسيني
  كل دايـر سنــه يهلال مــا ترحمني تسبيني
        
            
      تّذكرني بيوم..الجيش يصيحون
      طــاح العباس..سلبوهـه ام عون
اخـــذ عمره النهر         وعمه اعيوني السهر
                المن هليت المن هليت
===================================
       اشچم مــــــــره اشوف الموت من بالسوگ طبينه   
       الضعن والبالضعن للبيع صــــــــــــــاح الشمر بينه
       كل واحـــــــــــد اگباله نباع شي منه وجرت عينه
       واحد صاح محبس هاذ گطعته امن يد ابو سكينه

                   بــالمسلوبــات..بيهه ايبيعـون
                   خاتـم لحسين..هذا يصيحون
شّعمل بيــــــه الدهر                      وعمه اعيوني السهر
                       المن هليت المن هليت
===================================
         آه ياضهرك المابيه گطرت مــــــــــــاي اشربنّه
        ركضت ابجدم كله اجروح يلجمنّي امن احطنه
        فوگ الگاع بس مــــــو گاع كلشي البيه يچونه
        ابعمود اخيامنه جمرات عضم اجـدامي وصلنه

               متني امن السوط.. بيه ميــة اصواب
               يلچمنــــــي الماي..والريــــــــح الهاب
الجمر جــدمي صهر                       وعمه اعيوني السهر
                       المن هليت المن هليت
===================================
         شفـــــت بيامك الما مار عله واحـــــد گبل غَيري
         مابين الجسد والراس مــــــن صاح الشمر حيري
         يزينب عين عالعطشان وعيــــن اعله النهر ديري
         وصّيت الخيول يگول اعله صـدر المنذبح غِيري

                      بالحافــر ضال..ظلعه المكسور
                     شيلــم احسين..بــالطف منثور
انسحگ صدر وظهر                       وعمه اعيوني السهر
                          المن هليت المن هليت
=================================
✍حيدر الشغانبي

#لهلال_شهر_محرم_الحرام

هل محرم و ابتـدت لوعاتي
و انه خايف ما تسد دمعاتي
راح اقره اول قصيدة
بلون و بفكرة جديدة
هل محرم
ـــــــــــــــــــــــــــــــــــــــــــــــ
نوگ و سياط و هضم شد الحـبال
هيچي يتــراوالي لــو هــل الهلال
فوگ ظهــر الهــزلة ايــات الـدلال
و صوت ام تندَه يا بعد امك تعال

روس و رماح انرسم باحساسي
و صــار دخــان الخــيم انفاسي
المستهل بالونة اعيده
بلون و بفكرة جديدة
هل محرم
ـــــــــــــــــــــــــــــــــــــــــــــــ
هـل محرم و انفــتح بــاب الـمصاب
و اعله گلبي انفتحت ابواب العذاب
گمــت اشوف الواقع بعــين السراب
و الـدمع بعيوني ظــل يدفن شباب

مسجد احزاني انفتح محرابه
اه يحــسين السـبط و مصابه
و الگــلب ردد نشـيده
بلون و بفكرة جديدة
هل محرم
ـــــــــــــــــــــــــــــــــــــــــــــــ
شهر بي ضيم و جرح ما يندمِل
يومه مو يوم و ابــد ما ينـحمِل
العشرة الاوله تاكل بروحي اكِل
تنتهي و زينب يچتـفوها بحبِل

امــن العليلة ابتـــدي احزاني
و بهضــــمها تلتــهب نيراني
و اقره عن لوعة حميدة
بلون و بفــكرة جــديدة
هل محرم
ـــــــــــــــــــــــــــــــــــــــــــــــ
يوم من هذا الشهر طـول السـنين
انجــدد الاحــزان بــي لام الـبنين
وياها نصرخ يا حبيبي يا حـسين
عيوني يا ريت انعمن كون الثنين

مــن محـــرم ليلة لام الابـــعة
نذكر شصار و جره عالمشرعة
و نذكر المگطوعة ايده
بلــون و بفكرة جديدة
هل محرم
ـــــــــــــــــــــــــــــــــــــــــــــــ
و نذكر انصار الوفه و التضحيات
و الشباب الطــاحت بصف الفرات
و العليل و زينب و سبـي البنات
و نـــذرف الــمدمع دمه للامـهات

عـــله الاكبر ونّتــي مسـموعة
و ليلة القاسم نضوي شموعه
فخر شــبان العقــيدة
بلون و بفكرة جديدة
هل محرم
ـــــــــــــــــــــــــــــــــــــــــــــــ
عاشــر بعـاشــور مكــتوب الـرحيــل
ويلي واطشّره و تلمّه احسيــن خيل
شلــون لو چلچل على المسـبية ليل
خيمة لا عــــدها و لا عــدها كــفيل

يَمها طفله خايفة و مدمية
مـن اذنها امسلبه الترچية
ليلة الحادي شديدة
بلون و بفكرة جديدة
هل محرم
ـــــــــــــــــــــــــــــــــــــــــــــــ
الحمدلله
الشاعر - علي_حسين_الكناني

نزله العليله سلام الله عليها

الف هنيالك يمن دمعك جره
العليله هاذه سعيك تشكره
____

للعليله ادموع عينك خل تهلّ ابحُرگه
فوگ علّتها او حزنها إِبتلت بالفرگه
مثل يعگوب او نظرها بي دمع ما تلگه
تلهج ابطف النوايب كل نَفَس كل شهگه

دمعك اعليها يخادم حضّره
العليله هاذه سعيك تشكره
____

فاگده الوالد تراها والفگد خي عونه
اشما يطول الليل يسهر ما تنام اعيونه
امعلعله او صارت نحيله امن الهجر مسحونه
يا عمت عيني عليها طفله وازغيرونه

جمره بيها للحسين اموجره
العليله هاذه سعيك تشكره
____

إِبچي اعليها العليله هل دمع تستاهل
شاحبه اللون ابغيابه والبدن ضل ناحل
لا طوارشهم اجوها لا خبرهم واصل
اتصيح مره احسين بويه مره يابو فاضل

يمن عفتوني ابهموم امحيره
العليله هاذه سعيك تشكره
____

ضلت ابطرگ المدامع ما تعرف الچاره
العليله اشلون حيره اصبحت محتاره
هدهد اسليمان وينه ما يجيب اخباره
احسين ميت لو يجيني گلبي وجّت ناره

ياجروحي بالدليل امخضّره
العليله هاذه سعيك تشكره
____

من بعيد اتحاچي ابوها بلهظم والدمعه
ناعيه صرت ابغيابك بالطوايف انعه
منهو يشري اسنين عمري والعزيز ايرجعه
وينه اليدوّر ثواب او ينتخي للنفزعه

يمشي لحسين او يشوفه اشأخره
العليله هاذه سعيك تشكره
____

تعتني ال أم البنين امن الصبح تسالها
بلكي من ذيچ الضعينه لن خبر واصلها
يمه يم عباس روحي الهضم كاتلها
سوه خل نبچي عليهم امگابل اتگللها

يبچن الحدما يطيحن ع الثره
العليله هاذه سعيك تشكره
____

الشاعر ابو فاطمة الطائي

إحنه غير حسين ما عدنه وسيلة...والذنوب هواي كفتها ثجيله
وغداً يبدو لنا سّداً منيعا.... هذهِ آراؤُنا فيهِ جميعا
والذنوب هواي كفتها ثجيله

اهنا ياهلكثرة ذنوبك وإنت متحير بأمرك
إخدم بمأتم إمامك لو ردت للجنه مسلك
وإنت بالتأبين تخدم تسمع الهاتف يكلمك
لو إلك قوة فاكره.... بنور العقيده منوره
وللخدمه عندك مقدره.... وباللطم وسمت صدرك
هالوسام يخّمد جهنم شعاعه.... والوثيقه البيها تحصيل الشفاعه
من بكاهُ وهوَ للهِ مُطيعا... تُطفئُ النارَ لهُ تِلكَ الدموعا
والذنوب هواي كفتها ثجيله

يالذي عندك عقيده ثابته وحره وشريفه
و تعلم الميزان حق و كفة أعمالك خفيفه
وما إلك غير الشفاعه وبيها آمالك ضعيفه
صفي العمل لا تخالطه.... ويه حسين قوي الرابطه
أكرم الوادم بالعطه.. وما يرد مايوس ضيفه
واليخدم حسين بالجنه يتنعم..... وبالأناشيد الحسينية يترنم
ضيفُهُ في الدهرِ لا يخشى ضِياعا.... شأنُهُ يعلو ويزدادُ إِرتفاعا
والذنوب هواي كفتها ثجيله

والذي بهاي المآتم ينفق بحسب إقتداره
وغايته خدمة إمامه لا رياسه ولا إماره
ويه ريحانه محمد تاجر وربح التجاره
جنة وقصورٍ عاليه... وأنهار عذبٍ جاريه
وحور وقطوفٍ دانيه... ولا تفوتك هالبشاره
والصرف لحسين صرفه إيعوضونه.. واحد بسبعين أجره يضاعفونه
كلُ من أنفقَ مِن شيءٍ رجاءا... ولهُ في صاعهِ سبعينَ صاعا
والذنوب هواي كفتها ثجيله

لا تقول إشلون أحصّل هالسعاده ابهالخدامه
و لعد سبط النبي الهادي هاي من الله كرامه
و الدليل إبهاي فطرس من خدم مهد الإمامه
مرغ إجناحه بالمهد ....و شملته الرحمه للأبد
ردت له إجنحانه و صعد ....للسمه إمحصل مرامه
هالخدامه إهواي عالي مستواها ....حته فطرس عالملك بيها إيتباها
فعلا في الملأِ الأعلى مُذيعا ....فازَ من كانَ لهُ السبطُ شفيعا
والذنوب هواي كفتها ثجيله

هاك إخذ يا صاح و إسمع هالبراهين العديده
سامع إبجبريل لمن نزل هز المهد بيده
راد بحسين إيتشرف و بمزاياه الحميده
إبفذ معجزه عيسه اشتهر ....بالمهد من كلم بشر
و حسين زاد إعليه فخر....و معجزه أظهر جديده
كلّمه الجبريل بإلسانه و صفاته ....و هاي أسهل معجزه من معجزاته
كلّمَ الأملاكَ في المهدِ رضيعا ....عجّب الأكوان في النُطقِ سريعا
والذنوب هواي كفتها ثجيله

إشما يريد البشر يوصف هالخدامه الحسينيه
ما وصل مثقال ذره من محاسنها البهيه
تعجز الكتاب عنها و أهل الأفكار القويه
هالخدمه تنطي المجتمع ....دستور إيمان وورع
و حبها بضمايرنه إنطبع ....و هايخدمه دائميه
هالخدامه شرف للثابت يقينه ....و الطريق البيها يتعرف إبدينه
يا لها من نعمةٍ تُعطي إنتفاعا ....لطريقٍ فيهِ نحتاجِ مِتاعا
والذنوب هواي كفتها

سلام عليكم كل عام وانتم بالف خير وصحة وسلامه يا رب العالمين

ياشيخ ياشيخ - الله يبارك سـعــوانك
ياشيخ ياشـيخ - بالطف سجل عنوانك
***
1= جاء مـن أقـصى المخيم شاهرا بتاره
طالبا رخصه يـــقاتل راغـــــبا بزياره
شيخ الأنصار الـموالي ماتضيع أخباره
يدري يستشهد فدائي من طلع من داره
***
وفاي وفاي - يــقـرب رايد للزهره
وفاي وفاي - مايــترك دين العتره
**
2= ذاك الحب الحبـــيبي الفايضات جروفه
عمره بالتسعـــين عام وبالأمام تـشوفه
الجيش يتخلل أساسه بس يشيل جفوفه
سيف المجرب وشيخ وصولته معروفه
****
فراس فراس - شارة حيدر بزنوده
فراس فراس - محد يتعــده حدوده



3= ياحسيـــن المدد منك ياحسيـــــن أدعيلي
من صلاتك سجده وحده من أطيح أهديلي
سيدي بدفــــــتر أنصارك بس أسم خليلي
كون عندي حيل ثاني والله أضـيفه الحيلي
****
أفديك أفديك - أفديك بعيني وعمري
أفديك أفديك - تستاهل حبك عذري
**
4= بيا شكر يـنرد جميلك خالني برجبانك
عمري لو عمرين فوكه ماأرد أحسانك
شرفت كلبي ولساني مـــن قره قرائنك
شيخ وأيماني كسبته سيدي مـن أيمانك
****
مولاي مولاي - ياهنيالي وهيعوني
مولاي مولاي- عينك تنضر بعيوني





5= وياك متـغـرب ولكن ياحــــلات الأغتراب
ياحبــــيبي الماي طولك البقــو كلهم سراب
الدنيا مهما أطول باجر لا زم يضمني التراب
وأنه دام وياك واكف ما أخاف من الحساب
*
ياماي ياماي - أشرب مــنك واتروه
ياماي ياماي - ماكو غيرك شي يسوه
**
عبد الجليل المالكي

تتراعــــد زلازلها من فاضت مراجلها
طبوها الزلم منهـــم والنعم
انصار انصار
***

حيا الله الزلم هـــــدت ركضت ياهو يلزمها
تتراعد زلازل غيض تتلامــع صــوارمها
شدوها الحزم بحسين والعبـــــــاس شــيمها
والشيخ الحبيب ايقـود حملتــــــــــها وتقدمها

هوس سمع القاده احنه بخدمة الساده
طبوها الزلم منهـــم والنعم
انصار انصار
***

طبوها الحرابه اســـباع من سلت مواضـــيها
الحومه وكفت اســتعداد وارتجـــــت بواديها
ازلام التعدل الميــــدان وامعلك محاجــــيها
اجابوها الكتايب حــود أولها اعلـــــه تاليها

خنكوه العده خنكه صارت كربلاء ضنكه
طبوها الزلم منهـــم والنعم
انصار انصار
***

فزعت والحشيم يصـــيح جوكم شــــيعة الزهره
شردت واليطيح ايطــيح سـحكَت هامته الشكره
شبجت والركاب اتطير عشره من بعد عشره
أكوام وبيـــــدر الميتين ماتنعد جثــــــث كثره

سوها الارض حمره فاضت بالدمه الصحره
طبوها الزلم منهـــم والنعم
انصار انصار
***

حيا الله اشكثر شجعان انصار ونعـــــــم ذوله
خاضو بالمنايا اشواط صالو من صدك صوله
زلم الموزمه الكلفـــين لعبو بالعــــــــده جوله
الجيش امتيه المشـراد حارت زلمـــه وخيوله

من يكـــدر يلاكيهم لو سلو مواضيهم
طبوها الزلم منهـــم والنعم
انصار انصار
***

راووها العساكر ضــيم رهبــه الغير مشيوفه
راس براس يردم كـــام صارت بالعـده خوفه
اليكدر يسلم امن الموت يوصـل لازم الكوفه
فر الجيش منه اهواي ذب اهــدومه وسيوفه

واحدهم صـــدك زلمه رفعو راس ابو اليمه
طبوها الزلم منهـــم والنعم
انصار انصار
***

عيد الله الجبير اليوم واحد بشـــــــر الثاني
الجنه فتحــت البيبان حيدر والنبـــي امتاني
نافع وي أنس والحر برير الجـــــده همداني
حارث واسلم التركي وشاب الجان نصراني

دخلو كربله بغيره خلوها العده بحيره
طبوها الزلم منهـــم والنعم
انصار انصار
***


الشاعر ابو علي الركابي

هاي  انصار   العقيده وشانها
تعتلي سوح الوغى وفرسانها
***
يارجال التضحيه ومعنى الحياة
گدها  للكلفات  معروفه  الأوباة
يشهد   الميدان  موقفكم  ثبات

شفنه زود المرجله ابميدانها
***
يا ليوث  الغانمه  وعز الرجال
ثبتت  الابطال ساحات القتال
لشرف مقياس راسمهه النزال

اتموج صارت كربله طوفانها
***
شوفهه الصحبه مقاييس الزلم
عالجهاد  اليوم  خطتهه  العزم
حبهم  المعروف ما طاح العلم

يشهد التاريخ عشگ  إيمانها
***
شوف سر الغانمه ابكثر العدد
يا علي   كلها   تناديك  المدد
مانسينه اهناك موقف للحشد

للفخر صارت مثل عنوانها
***
انشوف انصارك عزمهه المرجله
قدمت   اعظم  دروس  ابكربله
مشهد  الاصحاب  كلها   امعدله

ضحوا  ابأغلى النفس وثمانها
***
سجلت  عنوانهه  وتروي الطفوف
اگبال هاشم ثبتت ابيوم الحتوف
عشگت  الأنصار بس اربع حروف

حسين حبهه والمقر لاوطانها
***
سجل التاريخ شفنه الملحمه
صار  عنوان الحشد  بالغانمه
باچر التوفيق تحضر   فاطمه

هناك تجزيهم عظيم احسانها
***
تمت بعون الله تعالى الشاعر___يوسف_الفتلاوي

 قصيدة ليلة القاسم
.
.
حي على الشهامه    قــد قامت القـيامه
بســم رب الـخيم    اروي الحــومـه دم
اجه يوم التندمون
فــلا ينـــفع نــدم
 
***
 
قل ياايها العسكر .. قل بس كون تتذكر
اجانه الاسمه موت احمر
اجه جسام
لم ابلــغ حلـم اني .. ولكن اقرو عنواني
يسموني عـلي الـــثاني
بهالايـــام
 
انه ابـــن الگــال اسألوني اسألوني
ماقصــر اوياكــم وانتـــو تــدروني
منو الرايد يموت بصارمي خيگول
ومنو الرايد يمـوت بخزرت اعيوني
 
كل واحد وخـياره    وانه احترم قراره
المهــم ثــم الاهـم    اروي الحـومه دم
اجه يوم التندمون
فـــلا يــنفع نـــدم
 
***
 
الجيش الكربله القادم .. لخلي يعترف نادم
انه ابن الحــسن جاسم
بديه الموت
ذو الفقـــار بيمـيني .. ياجيـــش اليــلاگيني
اسوي الطف لجل ديني
شبه تابوت
 
بأمر حسين ابو السجاد افنيها
اشـما يكثـر عددها مااهم بيها
احرگــها واطفــيها وارد اردود
احـرگهــا وارد انـــوب اطفيها
 
بس تجدح الشـراره    تنسون اكو معاره
اذا خــــــط القــــلم    اروي الـحومه دم
اجه يوم التندمون
فـــلا يــــنفع ندم
 
***
 
برب العاديات اقسم .. انه اليــوم من اهجم
حزن بوجوهكم ارسم
كـــما الكرار
كما بالجمــل سوينه .. العسكر نكص رجلينه
اقتــفينه اثــار والينه
بعزم واصرار
 
انـــه اليـــوم اسـمي سيد الكلمه
اليواجهني طبيعي لو نسه اسمه
صح ازغـير بالحومه تشـــوفوني
ولكــن ساعدي يلــوي الف زلمه
 
الحاظر يبلغ الغـايب  هالموت اصبح واجب
حقيــــقه مــو وهــم   اروي الحـــومـــه دم
اجه يوم التندمون
فـــلا ينـــفع نــدم
 
***
 
انه الموت الموصف .. اذا حسيتو ماج الطف
ريج الجيش من ينشف
 اذكــروني
وحده حچايتي وحده .. وينــــه الراد يتعده
جحيم وغضب اتبـده
وتشوفوني
 
برجليكم اجـيتو ومالكــم رجعه
وماينــفع توسلــكم ولا دمــــعه
طبع جاسم صعب يالماعرفتوله
مثل عباس عمـي موسهل طبعه
 
العسكر يجب يتوسل   والصـارمي يتذلل
نعــم اقســــم قســـم    اروي الحومه دم
اجه يوم التندمون
فـــلا يـنـفع نـــدم

***
 
عمي احسين يستاهل .. وانه بهاي ماجامل
واصل مرحله واصل
بحب حسين
حبه يعـــتبر جــنه .. وابـــذل روحي اتمنه
احامي ابـــدن عـنه
مثل هالعين
 
ماعاش اليـفـكر يوصــل اخيامه
مامسموحله لـو حتـــه بحــلامه
تاج الهامه ابو السجاد اسمعوها
وفنه اليوصل الحد تاج هالهامه
 
هالحچــي ما اعيده   ما انقصه او ازيده
اذا لــجــــل القــــيم   اروي الحــومه دم
اجه يوم التندمون
فــلا ينفـــع نــدم
***
حيدر تركي الكربلائي
.

لقاسم إبن الحسن ع
_
زفتك موللعرس بالغاضريه ::: للشهاده وحنتك دم المنيه

نحرك الغالي فداء - - - للحسين بكربلاء

للشهاده وحنتك دم المنيه

____

هيبه سيف المجتبى وبيدك حِلالك

ولامته بشخصيتك تلوگ وجمالك

ملك لابس تاجه طُب ساحة قتالك

ماتهم بالموت مامر إعله بالك


وصيح بوجوه الجيوش الأمويه :::: يالَ ثارات السبط وأمنه الزچيه

الروح ترخص والدماء - - - للحسين بكربلاء

للشهاده وحنتك دم المنيه
_

والأمير المثلك وكله شهامه

على جده يطلع وعوده وعمامه

تدري هاي الحرب مابيها سلامه

ولأجل دين المصطفى عمرك خِتامه


شاب وارث غيره من بدر الهواشم :::: گتلي أموت وريت يبقه عمي سالم

حالي حال الشهداء - - - للحسين بكربلاء

للشهاده وحنتك دم المنيه
_

يبني بيك المجتبى ماخاب ظنه

بدمك چفوفك يجسام إِتّحنه

حربك أولها ذبح وآخرها جنه

أدعي ربي حسين لايحرمنه منه


بينك ومابين الأكبر گعد عمك :::: باس خدك يبني وبنحرك يشمك

الأرض ترتج والسماء - - - للحسين بكربلاء

للشهاده وحنتك دم المنيه

_

شسع نعلك يسوه جيش الرجس كله

إنت عند الله العزيز وهمه أذله

لأبواليمه المايضحي بعمره شله

علن كفره الحاربه وبأصله خله


فوز دنيا وآخره إحنه الرابحينه :::: والذبيح الينتصر عالذابحينه

نفتخر عدنه إنتماء - - - للحسين بكربلاء

للشهاده وحنتك دم المنيه

_


ماوصل لأخمس طعش بالطف شبابك

جثه شفتك ناگعه بالدم ثيابك

تحمليت السبي بالغربه وعذابك

گبل راسي شَيَّبت گلبي بغيابك


أمنيتي تكبر ياحبيبي وچنت أريدك :::: تشيل نعشي لومتت تدفني بيدك

طيحتك حب أُوَّفاء - - - للحسين بكربلاء

للشهاده وحنتك دم المنيه

_

الشاعر هادي العگيلي الناصري


ك

من كنت مولاه فهذا علي مولاه... نشيدٌ ردّدته السماء وتوارثته الأجيال. مبارك لكم عيد الغدير.

عَـنْ الأكـبـر وعـلـومـه ناشـد فرسان الحومه
شجانت بالطف ادواره الكل يروون اخباره
___

ناشد بَني صخر وبني عَـبد الدار
عَن الفـتىٰ الـجـرَّد عليها البــتـار
مِـن ياسلاله ويانسب هــالمغوار
أفـعـالـه هَــم يفعلها غَـير الكرار
هـٰذا الأكـبـر مـا غَـيـره شيخ وبن شيخ الديره
حيدر لو شن الغاره الكل يروون اخباره
____
كَـالَـت بـنـي مـيَّـه إشعليه نتكلَّم
وخلَّه الفواىس شي بِشي تِـتردَّم
اقـوى مُـقـاتِـل بـالـحـرايب هـزَّم
ياهو الذي مِن سيف الأكبر يِسْلَم
بِهالسيف الدين اتقَوَّم هَـدَّمْ جم صَنَمٍ هَــدَّم
سيف الأكبر بي شاره الـكـل يـروون اخباره


يشبه مُحمَّد مُوفقط بس بالمظهر
بالجـوهَـر تـكول النـبي بالجـوهَـر
وبساعده إنرسمـت مـلامـح حيدر
ضـربِـتَـه وحـده اثـنـيـن مـاتـتكرَّر
مِـن الـجـديـن مـأصَّــل يغضب بس لله ويزعل
الله لهاليوم اختاره الكل يروون اخباره


أروَع صِـور مِن الـمـلاحم سـطَّـر
بفن عسكريته جيش امـيَّـه تحيَّر
جَـن طـيـر ابابيل وعـليهـم سيطر
سجيل يمطر صارمه أعله العسكر
إبْرَهَةْ جن جايب فيله والأكبـر يمـطر سجيله
منهو يخلص من ناره الـكــل يروون اخباره


غـيـر الأشاوس بـالحرب مايدعي
يَـبنَ النُمَير ويـا شِـبثْ ذِي الرِبعي
أستدعي أقواكم لَحَرْبي استدعي
إبـدرعـه هــوَّ وآنـي لَأنـزَع دِرعي
إلــبــي زُود يـكـرِّبــلـي ويسعى بميدانه لقتلي
ويكطع نحري ابتاره الكل يروون اخباره


بـكْـر ابن غـانـم ورِطـه بـيـه اتـورَّط
مايــدري يـوكــع بـالدِمـــاء إمْشَحَّطْ
بَس صاح الأكبر بي إخْتَل وتخَربَط
وعـلَّـيـه مَــحَّـد لَــحَّـك إشـمَـاعـيَّـط
جدَّامـه اتدَحْرَج راسه ورد الحسين بنوماسه
وبَـكْـر إنـذَل إسْتكباره الكل يروون اخباره


مِـن طَاح دامي وطَـبْـرِتـه الخياله
مَدري الحسين شلون حَس وجاله
طَب بينهم يـصْرخ يـبـويـه وشاله
وشاف الـعِـزيـز ومكطعات وصاله
لا ضـل راس ولا رُكـبـه طاحت ضربه اعله الضربه
المهدي لياخذله بثاره الكل يروون اخباره


تمت بعونه تعالى
القصيدة من وزن الميمر
شاعر أهل البيت عليهم السلام
علاء الكناني

الأكبر
ــــــــــــــــــــــــــــــــــ
طاح الأكبر وابو الأكبر ليه يصد
گطعت جسمه سيوف أهل الحقد
وطشت املاك السمه فوگه الورد

،،،،،،،،،،،،،،،،،،،،،،،،،،،،،١،،،،،،،،،،،،،،،،،،،،،،

اليشبه الهادي وگع من ظهر مهره
طاح وسيوف العده فزعت تطبره
ذبحو اليشبه نبيهم والله حسره
بعد كسر حسين بمصابه شيجبره

طاح ابو السجاد واهتز السمه
ياعلي حضرت تنادي فاطمة
گلب فاطم بالمصايب ينمرد
وطشت املاك السمه فوگه الورد

،،،،،،،،،،،،،،،،،،،،،،،،٢،،،،،،،،،،،،،،،،،،،،،،،،،،،،

سيوف عدوانه خبيثه وماترحمه
على اتراب الطف توزع وسفه دمه
بالحصيره الأكبر يلمون جسمه
ابو وجه الحلو وسفه اختلف رسمه

على أشفافه تبچي دم البسمله
العده فرحانه وتهني ابمقتله
علي الأكبر بعد لهله مايرد
طشت املاك السمه فوگه الورد
،،،،،،،،،،،،،،،،،،،،،٣،،،،،،،،،،،،،،،،،،،،،،،

وصل للخيمه وتصد ليه العقيله
صاحت ابنچ هذا أجه گومي يليله
حسين أجه يمشي وراه دمعه يسيله
سكنه ركضت وانحنه السجاد حيله

فراگ الأكبر هدم حيل أمه وابوه
وعلى العكازه علي توچه أخوه
ألف وسفه مايعود الينفگد
طشت املاك السمه فوگه الورد
،،،،،،،،،،،،،،،،،،،،٤،،،،،،،،،،،،،،،،،،،،،

بچه العباس وسمع تندب رقيه
ما أريد الماي ردوه علي اليه
خل يجي الأكبر واشم عطر الزچيه
مني خافن أخذته سيوف المنيه

ماينام بهلوكت طبعه علي
شلون بيه خاف مايرجع الي
من تجينه الگوم ياسيف اليرد
طشت املاك السمه فوگه الورد

،،،،،،،،،،،،،،،،،،،،،،،،٥،،،،،،،،،،،،،،،،،،،،،،

ودعه حسين وسمع جاسم ونينه
من الحزن جسام تجري دموع عينه
اعلبن عمه اليشبه الهادي نبينه
والسيوف الطبرت وجهه وجبينه


خاطر حسين انكسر والله غضب
اشگد عزيز حسين عد الله أنكتب
عليه بدت أرض وسمه تقره الحمد
وطشت املاك السمه فوگه الورد

،،،،،،،،،،،،،،،،،،،،،،،،،،،،،،،،،،،،،،،،،،،،

حيدر موسى الرميثي