الراحل ..زيد السومري


مَرّه سألوني اعله روحي
و عاندت .. گلتلها صيري

ما استنكف من خلالاتي و حصيري

الناس نامت للظهر
و من الصبح غبّش ضميري

لا حچيت الفاهيات
و لا خفت من تايهات

و لا مخلّي مريتي التقرر مصيري

احله شي بـ الدنيا آني

مره سألوني اعله أمّي
و فرفح التنور البگلبي و چواني

لسّه و آني بعيد
تشغر لله و تحسّ بمكاني

و مره سألوني
اعله صاحبتي .. استحيت

تحبني بس ما عدنه بيت

غاليه دموعي و عله المامش بچيت

منتظر سعد


لا تحبني الدنيا موسم
وانه ما عندي غصن يغوي البلابل
لا تحبني
الشيب لاح زلوفي سكته
وبيه منشار العمر
كل لحظه ياكل
لا تگرب وانت برحي وانه گاع
من تطيح بحضني تتطشر حلاتك
لا تجيني الغربه ترست كل فراغي
وبعد ما عندي وطن يجمع شتاتك !
لا تگربلي الشمس شباچي ارمد
ولا تحرك چفك بحجة سوالف
انه ميحركني معضد
غض جفن عينك عليه
وصي عينك لا تدور بيه كحله
ولا تحاول
تتعب وما تلگه مرود
وحضني ما ضل بي دفو وليلك جحيل
وانه اخاف بحضني تبرد
وانه خشبه وضايع ابستان صبري
ومره نارك تشتهيني
ومره تاخذني الچفوف الما اعرفها
و مدري وين اتريدني امتد
لاتدگ بابي يخايب
لا يفز بيه صباي
انت ماي
ولا تظن بيه انه گاع
انه فوگ الماي
هم اتبده ماي
ياهوگلك بيه تلگالك ربيع
شنهي جيتك ليش جاي
وخاف لومك بيه يگصي
راح اسولفك علي
انه المتعب الشفه من الشفايف
وانه من چفوفي تعبت الزلوف
وانه المتعب الضلوع من الضلوع
بس بعد ما بيه حيل
و هسه تعبت الچفافي من الدموع
جان خلگي ايصير في وكت الشمس
ويصير راگ
كل زند مر بيه لاعبته بهداوه
وكل نهد يغويني احط فوكه زراگ
ليلي جان اوسع من عيون الاحبها
وهسه بيه الليل ضاگ
سيرت يم كل ظلام
بچفي شايله شمس
وسيرت يم كل صراخ
وصار يحچيلي همس
انته اجيت اليوم متأخر عليه
انه الاتمنيته بس لو جاي امس

مصطفى النوري


ها يمنسي فك نسل طكات جنحك
وسافر ألاخر وحدتك تلكة مامش في كذلتك
تلكة أثر جويات أصابع فوك من وحشة صفنتك

وأنت ذاك ألعايش بواهس خريف
رخصت خصرك نطر....للمالة داعي

للبحزنك جف دعاء بكل فرض ليلية ساعي

وين مبحر يا جرح كلي أشجراك
عايش بطرك ألحزن فك ريج كلبك

يا نشد ......يا هلبت ألله ......فحطت لهفة فرحتك
كافي بسك تايه بواهس غريب
تمشي ومكاود وحشتك

أليا ظلام أمودي شوكك
يا ضريح ألمالة بعيون ألفكد حوبة يجوك
كلي ياعاشك يطوفك

ليش باهلت ألظلام....وكتلة أجيك
وكايد ألهندس شجاعة وكتلة أشوفك

وأنت تدري ألليل من أينث حنين
أيفزز أحلام ألثكالة

يا ولك ...ياخوف مجفي أعلة ألسواحل
روج ممحل

فيض بيك فل كصيبة ليل حزنك
ومشط ألكذلة فرح
وأجفي ضيك عل كماري

أتلكة وجه أخدود حسنك
أتناوش ألضحكة ألبعيدة
ألعودتها أسنين مامش....بالجريدة

ولا تكل لنسان أحبك
خلي ذكراتك جريبك

كابل أمراية ضحكتك
وعيش وي حسنك.... حبيبك

سيروان التميمي


عيش جنك
وامشي مثلك
كافي تشبه غيرك بهاي البشر
التشابه للكصب مو للبشر

سافر اذا بولايتك عايش غريب
واشبك جروحك اذا مالك حبيب

هو جرح ولايتك طاب على عيب
منين تلكالك طبيب؟؟

وابجي وحدك
وامسح دموعك بإديك...
الينشف بيده دمعك يرد يشتاك لبجيك


يا غريب...
ياغريب باجر يبوكون اسمك وانت اسمك توه صار!!
وباجر يشبگك حمدهم لو برد حضن القطار!!

شمالهم
دارو كفاهم وانت عمرك داير الهم؟؟
شمالهم
شككو عمرك وانت كضيت السنين اتفصللهم؟؟

لكطو تفاح عمرك..
وانت گضيت العمر تستغفر الهم

كافي تتوسل نهرهم..
واعبر بمايك على الغثك عطشهم..

كافي تندار ويعتك شوكك وهم ترجعلهم
كافي مو طشو سنينك.. وانت لاهي تلم صورهم

هزهم بكل حيل بيك..
وطيح من غيومهم گطرة مطر

شنهي ضلتك بالمحطة وما الك نية سفر؟؟؟

تضحكلهم؟
جا وجرحك؟
جا و حزنك؟
وجفنك اليمطر دمع صحوة ومنام
تضحكلهم..
وانت حزن البيك يركض ركضة الگطرة على جام
همه ذول الصغت غربتهم وطن واستغربوك
همه ذول الطحت يم طفهم نهر بس عطشوك

الحدو بضعون دمعك من بجيت
وصرت ماي عيونهم لكن بچوك
الكلت تنساهم ولكن مانسيت
وكمت تندلهم لحدما ضيعوك
من شعلت سنين عمرك مادفيت
ومن برد بيهم وكتهم حطبوك
باعدو وانت بطرك روحك بقيت
لاوحكك حتى عنك باعدوك
ولايتك عمية ورسالة المن بقيت
ويه الكواغد خلصتها و ماقروك

اخ منك...
جبت عمرك تنتظر وادم نسوك

جبت عمرك تركض على الما تناك
يا الكيت الناس كلها ومن ضعت محد لكاك

نعي .. أحمد عجيمي


عنك تسولف هَوية الباب
وعيوني تفتر للهوى الهاب
بلكت يدفعك من التراب
يمدلل اشمالك مشــيت

يالحيد ما تهوى الخفيفة
ما تنسجن نار بصريفة
يا مشية الذيب اعله كيفه
وعيونه توجع گبل الأنياب

يا ﭼـفن يتمشى اعله بالي
امتانيك واگماطك اگبالي
من شيعوك الخشب غالي
جان الخشب للـ يدفه ينجاب ..

بس بالعشگ تنشاف مغلوب
ولو طحت من ثگلك يحالوب
ذلة عزيز الگوم مصيوب
ويظل عليل ابين الاحباب

بمراية الحلوات تنشاف
و اعداك من جروحك اتخاف
ظِلك اعشوش لطيرة الصاف
والناس ريشة بجنح الغراب

احجاياتك اتسكت العشيرة
اترد الـهَلا ماي بجزيرة
يمة التتن تارس شليلي
ياهو الـ يلفه بهذا ليلي

مشلوع گلبي الليلة مشلوع
لو بيدي اجرنه من الضلوع ..

كاظم اسماعيل الگاطع


حنيت انا لشوفتكَ
وأصبرت بس ما صبر
گلبي وصرخ راح أطكَ

جاباني ألك ، وأذعنت
جيتك ، بليلة شتة

ظلمة ومطرها رشگ

وشبعدة صار الدرب
خوف و رعيد وثلج
وچفوف أدية زرگ

أبابك طحـت هاگمت
ضميت أدية او ردت
َ عألباب بالروح ادك

بس كالوا ألمنّ تدكَ ؟
گلمن مشة لـ حالته
واحد
سكن بالغرب ،
واحد سكن بالشرگ

عباس الغالبي


تجني الناس ظلمتها بهدايتها
وتخاف امن الله يهديها علة الظلمة.
تكسرني الخطية الكاسرة اصورهم
لا يدرون جنتهم فهاوة ليل

ولا عدهم عذر لليل حتى يذم فهاوتهم

خطية الناس، تبوگ الونسة من الخوف

ساعات الذنب مريود من يكشف عذاب الله
وساعات العذاب ابكيف خلگ الله

ومابين الصدگ والكيف تلگة الحگ وجه خواف
يرسم حرگ جنسيتك علة اثيابك
يوعدك بالمطر يغسلك اترابك
وانت ابلا مطر وتراب

خطية الناس، مسحوگة لدرب جذاب
العمر من يوگف اعل الليش

ومگبرة النشد خطوة
يندل كلشي بالسرداب.

بلال الصافي

كل قصيدة
اتضوج منهه هاي عنك..!
كل خنگتي البيه منك..!

واعدتني..!
اتصوغ عمري بكل برائه
عوف وعدك عمري وينه..؟
ابطيفي شفتك معرفتني ..!
وردت اكلك ..
انه واحد كاسَر الليل ابصورك ..!

بس..
خفت لا عيني تبچي وما گلتهه
بعيني ضلت دمعه
وحده بطيف تنزل ما ردتهه ..!

بيدك احلى ..!
والله هدت حيلي چلمة انت وينك..؟
ولو كلتلي ..!
هيج ناذر حتى دربي اوياي اجيبه..
رايد اغفه اويه الگصيبه

استعجل الميل
اعله عمري وشفتك بنص شعري شيبه..!!

فجأة شو ما مش محنه اتگودك النه....!

كاظم العشطان



چف رماد

وچف حلم متروس شيب

وچف تحنّه اعله السواد

وحلم برعم مات هرفي

ومالحگ ياخذ امراد

ومن كبر واهس خضاري

طلگت الضحكه سنابل

والوكت موسم حصاد

وتعثر الخطوه وكابر

والبس اهدوم الغوه اعله اعناد حزني

ونتشي ابعطر العناد

ومن تهب ريح الطواري

تترس اكتاري العواصف

والسوالف چف رماد

چف رماد

ونهر آخ ابروحي يجري

الماي مهره... و گاعي طين

ودربي نيّه بلايه شوف

ودللول ابلايه أم

وليل گمّطني اعله خوف

وجرح يتوحّم عتابه

واوف مفطومه اعله اوف

وثاري خلگ السكته حضره

يفوح بچفوف التطوف

ومنهد ذاك النده... وشوگ الصريفه

وخبزة أمي ابطعم ابوي

الغمّس الشيب ابرغيفه

ومنهد چاي العصاري

وثوب المطرز قديفه

ومنهد صيد الحباري

( والگطه الحدر السنابل )

لسه بيّه الطف نعاوي

وتردح بعرسي المناجل

هزني ياطور الجناجل

فزز ابروحي الهلاهل

لسه بكتاري الطفوله

الغفت بعيوني صورهه

وحب درابين العصاري

النست بكتاري عطرهه

جواد زغير


اليشتل حسين بضميره الماي كلش ما يهمه
وين ما تعطش الثوره يفيض دمه
و وين ما يصحى الشرار تشوف رسمه..

اليشتل حسين بضميره يعيش حر
لـَوّن شاف البرد ضالم يشتعل گبل الجمر
وانتَ يـ أمورث الليل لهسه بعدڪ مشتعل شمعه غريبة

سافرت ماي لسواجيهم الصبخه وطشروڪ
ولمتڪ غيرة گصيبـه
طيح يا مسلم يـَ گمره
الطاح شامخ يلگه فردوسه جريبـه

ولو طيحاتڪ اسرار ...
وشوفهم ما عزب لملگاڪ بير
ولو كل الدنية ضدڪ وانتَ بس مرسال وياڪ وضمير
و (وين) مشتولـه اعله شفتينڪ عطش.!

ماكو ناس بلون نيتڪ
هندس تفيض الولاية
شچم نهر بوجوهم ما حفظ مايـه..؟
وتلتفت كلشي رخيص...

ونثية ما تشبه گصصهم....
فرعت شباچها بوجهڪ مضيف..!
وفرزنت شوفڪ عبايـه
ما رضت يكبر ضماڪ..
ولا رضت تعتاز عين..

اتعذرتلڪ ( والله ما يستاهلونڪ )
ذبحوا الملگه وي جيتڪ ...
چي قروا وجهڪ رساله من الحسين
و صلوا الشڪ اعله دربڪ
چي صدح صوتك يقيـن..!

يا سفير الماي غيَـم..
باچر امن اتطيح يتشيم الطـين..!

عبد الله العبدلي


فانوس العمر مطفي

وروازين البخت سوده

الدمع سچه عله خد الما لگه چفوفه هله تگوده

انچفيت من الرمش للگاع

گطره احلام

گطره الوان

گطره وداع

وضميتك شمس بالماي

خايف لا لياليهم يجني وتاخذك مني

لضحكتك جنت اضم بيبان

اذا مريت يحچني

خريف ظنونك بروحي هفت كل شوگ

يالمخلي المناجل ضوگ

رگبتي الرادت چفوفك

مشه بيهه الحزن چم ماي

وتگاودنه انه وياي

نسيت الما گدر ينسه يظل يعثر

اذا شاف بطريقه حروف اساميكم

اذكر .. مدري ناسيكم !؟

عقيل العرد


انت فلاح الكرامة
وبيدهم شط وضما

وانت تكدر بس حنين
حجاية من كلبك لربك
تكدر تنشف الفرات
وينزل الكوثر عليك من السما

وتكدر تحاجي الرمل
يشربهم وما يرد واحد
وما رمى جفك لحدما
جفهم الحاقد رمى

الماي اخذ رشوة اعله زرعك
والضمير بدرهم السلطة انعمى

وبين موت وموت ما مديت اديك
عاندت حدما مطر نحرك دما

يكرهونك دم اهلهم ما نسى فقار ابوك
و ما شفت بيهم جبيل

انت وين وهمه وين
ضوى وسبعين الف ليل

بس جسد وتشوف كلشي
وضلعك الداس الحوافر !
والطف أظلم جان كلش .
كمر ماكو... ودنيا خيل

حيدر شايع


خذني بيدك
وبغميج عيوني طب
خذني بيدك لاتهدني مكاود النية صعب

تدري ياحادي العشك بس انت بيه
وحزنك موضيني حب
حزنك موضيني حب

والبواجي تفرح الله من تطيح امن الكلب

گودني لعالم هدوءك
الدنيه هوسة
وكل ضجيج الغشمه بذني

انطيني رايك وين اروح
لو بكيفك انت اخذني

خذني ترجية لمعزتك
وين ماعندك رقية

وين اشوفك
وانه كلبي لهسه مايندل مجانة
وماعثر بالغاضرية

لاتهدني
انه احبك والوجع فرض اليحب
وذيج هيه اتعيب العين البجتهه
الدمعة اذا طاحت جذب ..

ياشريعة مستحاي
جروحي غار وضالة بعازة نبي
معاكب اللجمة ولاني
وكمت احس روحي سبي

اتعلمتهه
الخيمة اذا يثگل مشيهه
يصير عكازة ستر في العبي

امنيلي جروحك واموتن من وراك
كون اكلك هاك روحي
وانت هم تشيل دمعة تكلي هاك

بيش يتعوض حنانك
وياعشك ياخذ مجانك

والله لو كل البشر تبجي اعله جرحك جا صفينة
وانت جرحك ينولد كل ما بجينة
ياسولفنة وشرفنة وباللطم نلگاك ادينه

امداهه الكعده ذيج الما نجيبك بيهه طاري
بيش يتجازه التعب والنوم بتراب الصحاري

غاد منك مبتعد بس هم لكيتك
عصبو عيني بسمة الله وكشفت كلبي وقريتك

كبلوني بسوك دنية
ومحد اتعامل عليه
وانت نحرك صاح بيش
دوم اشوفك طفل شايل وين ماعد الله ليش

الليش
ليش تستنگي العطش
دامك شريعة ومحلا مايك

الاعوج اهلاله يجي يتوب بنجمتك
ابليس صار ابليس جا ما سمع رايك
فدوه مشيني اعله رايك

انه كلما استعدلك ينبت بكلبي سهم
وانت حتى النار مشمولة برحمتك
طببتهه اعله الخيم

علمتني الجرح طالب
ولازم براس السنة الدم يمتحن
وانه ماعندي قلم مثل الرمح يكتب بهمة
وماركد بية الحزن
انه طالب مو فطن

عاينتهم كصب يتمرجح ابهوية
وانت خيط عمامتك كاعد رزن ..

علي عماد


نخلة
وشتلني علي
ويواعد ويشتل
وكال إلا برحي وكلت
شكلين ما حمّل

ما صرت مثل الشمس
الصبح تمطر ضوه.. والمغرب توشل

لا جبت وين النهر
بالوفة من ينذكر ...عطشان ويبلل

وين اليهد وحده
لو شاف منجل وكح... كال انه اخو السنبل

كالولي بيهم فرق
العباس ذكره صعد
وذكر الوياه يقل
لا كلت كلهم سوى
يكتمل معنى النفس
باليصعد وينزل

الكاع دهلة وفه ...وكلهم شتال أيدي
من جان عمري حضن
نگط أبالي علي... وضحكن مواليدي

بس فتشت بالسما
واتنوعت للكمر... كتلهم اوليدي

بي خيزران وصلب... مو كل گصب لين
حرمه أزلمتها علي... شتخلف الهين

كالولي ما بينوا ؟؟
لا كلت مثل الجرح
كلما تضمه بضحك
هم يرجع ايبين

كاع الحسين الصدك
من زغرة مثل المطر..... لو طاح يندلهم

بس كال ياابو الفضل... كالوله (ها) كلهم

بالفزعه ماكو فرق
يم الخيم دائرة.... واخرهم اولهم

كبل الولادة الوفه ...البيهم يناغيني
ياهو الاجيبة كلف
ويكلي كلفي علي... وعباس سميني

بالفزعه ماكو فرق
ياهو النگله عطش... كال أخذوا جفيني

من دكول زينب شمس ...كلهم الگاهم في

ولو عطش عدنه طفل
يطونه مُلك الري

ليش اصفن بكربله
والكه الكمر عل النهر
واهل الكمر ماهم
وانه من اكلب السمه ...بكل هندس الكاهم

أفرض جدل مو علي... العباس رباهم
شتعتقد تلكه خلل ...موجود برباهم

خوة گبل تختلف.. مو مثل هذا الوكت

خوة كبل تختلف.. مد النحر واحجي
من طاحوا بكربلا... العباس ظل يبجي

گالوا بلايه گبر ..واطيتهم شاهد
كلش جبيرة السمه
بس المهم تكتفي وتضوي بكمر واحد

الشاعر حسن البركي



احسّك تنظلم كل ما نبالغ بيك
(احسك تنظلم كل ما نلح بالسيف)
عرب و نميل وين القوة تتميل
مارسنا التصحر من گلب وياك
وغمضنا وخضارك نابت بمعزل
المهم رغبتنا تشبع مو شرط نرضيك
رغم حد معرفتنا وياك بس تزعل
وعشنا بمجتمع بيه كل ضعيف يطيح
ومن العجز گلنه الزلم تتحمل
جوعان الرفض رايدله خبزة "لا"
وباب السنابل تأتئ المنجل
ونقصنا انثور مثلك بس صعوبة انثور
حـچينا بموقفك حتى النقص يكمل
هالخلينه جسمك اقوى من معناك
جا يمته نحس بـ إنصافنا اتفشل
وبدم الرگاب التارس التاريخ
اجينه لـ سيرتك طفينه كم مشعل
وجعلنا السيف يطغى اعله البياض البيك
واتقبلنا من الـ كلشي يتقبـــــــــل
اكو سبعين محمل للحجاها فلان
بس للـ تنعقل ما ظل ولا محمل
و مو معناها ما لاهث بجفك سيف
بس باقي صفاتك يفترض تنسل!
و الا منطق الخافوا وما لاگوك
أبلغ من الف لو جم الف يُقتل
اذا حجّمنا دورك بالزند والسيف
معناها الزند من ينگطع تنذل
و حشا يصير انتكالك عالمصيره يطيح
يبو روح الجذب عالمحك تتبدل
الشجاع شلون يثبت مو شلون يصول
ويا محلى الثبات اعله الوفي اليندل
اكثر من جذبنا عليك بيك ايثار
انت اشكد جرح وشكثر ما نخجل
بذاك العطش وادركت الشعوب تريد
واحد يرسلمها اشلون تتغربل
ويتعير اليفزع من تجيسه النار
اذا ظل عالمصالح غيره يتنصل
بس جيب الفهم معنى الرسمته بروح
ويگول انا للعباس مستقبل
عرفنا الماي لكن ما وراء الماي
شنو النفس العظيمة الما رضت تبتل
تگدر تشرب وتاخذ الماي وياك
وفعلك ينحجي وتتخلد وتنجل
لكن ما تريد تصير اي عباس
اليغزل بالإيثار ويكسر المغزل
زَرگ عود القيم وي ما رفضت الماي
وگتلنا تره تذبلون من يذبل
وبنيت وهدمت كل البنوه بالزور
يل بهدم المبادئ ما صرت معول
صمود الواثق يدّني الهدف خطوات
ويخلي الجبيل بعزمه يتوسل
فروسيتك تعززها الفراسة البيك
يا صيهود من خنيابك اتهدل
يا مرود الما خله العيون عيون
من شاف الحقيقة تريد تتكحل
اخو نعرفك ونجهل خوتك مولاي
ضنيناها هاي البيها نتغزل
يالضحيت مو لحسين لـلـ بحسين
شفت كل اليعجبن بيهن اتمثل
ولو يتفسرن كلهن المضمومات
جا حتى النواصب تسمع المقتل

عقيل العرد



كبل يومك
جانت الدنيا غموس بلا ملح

وبعد يومك لبست الكاع الخضار

وطابت جروح الفلح

يوم عاشر
بدا التقويم الحسيني

والسنين الكبل يومك كلها لازم تنطرح

الم نشرح لك صدرك ؟

بالعطش ، بالسهم ، بالحر ، بالحوافر

المهم صدرك ينشرح

والصبح لمن تنفس
تنفس بنحرك كرامة
وربك تنفس شموخك بالطف الحد الذبح

يبدي يومك
من بدا العباس يكتب

( تنكطع جف اليحبك كبل لا تنمد ذليلة اعله الصلح )

ومن نزل سعر الكرامة
صعد راسك للرمح

الدنيا كلها بيوم وانت بيوم وحدك
مثل يومك ما يصح

حيدر الطائي

ولا مره
اعله حيطانك
لگيت بعشر اصابع حنه لليهواك

الخنصر ينذب بعاشور

چان العطش بيك رماد
وسمه الكوفه
شحيحه ريح
ورماد العطش حد ما يبس برسومك
جو الكوفه نگط ريح
وچويت الذل ...
وبهامه ضميرك چان نبع تاج الكرامه يفور

وذا ذبحوك .. شيموته اليشم ذبحه گبل ذبحه
انته اول انسان ضلوع من يخسر يكض ربحه

چنت تدري .. نياشينك تدلي الناس بجروحك
وما هميت
رادو مايضل نيشان الك سحگوك
وسحگهم راح ع المامش
چنت واگف خيال من الشمس للماي
چنت ماواگف بروحك ..

اصابيع الشمس مفضوحه برسومك
يلي بدون راس تنام
مدري شلون من تثگل عليك الريح
كلك تفز من نومك

العطش تالي
ونته الماي من يومك ....

مصطفى الاشتراني


تركض اتدور اعله عمرك
تدور بفانوسك اعله ارذاذ عينك

انت يالغيضك
جزه
رسوم الميانه وعايفينك

تشوف روحك مو عزيز تلوم روحك
انت والدنيا اعله روحك

تكري اليام بتجاعيد نتضارك ونت كاس
وتدري الجنازه الغريبه ستاحشت لهواي ناس
وتدري يتشضه الحنين المغربيه ويترس فراشه النعاس

لملم الباجي اعله
قمصانك قصيده
وحني بيبان النشد باچر يجون

وصلب عيونك مسيح الراهبات الصلن بخصر الضنون

كلشي البچفك عذر للـموش الك والتدري بيها
وكلشي بحسابك نذر حت ال رساله الشگگو دمعك عليها

وتيبس اردانك
بچي
اگلبها الگفاها وعاذرينك

تبچي وادم بايعينك

انت
يالوجهك چتل نيشان دم

وانت يولاية حدي ودكان هم

شرعن بيك الضفاير ونعوج ميل الثواني ومن عليك
وحت كاسك ماركد طاح امن اديك
وحت شباچك غلگ روحه اعله اديك

ولا وعيت؟
وحيل چفك
چف الاخر
مايلوحه

ودين الولايه
اليموت اگبالها
تغني اعله روحه

شيل حيلك گبل المناده وعزيز الشال حيله
وغني حلمك والنخل حزنه اعله گد موتت فسيله

احمد المشرفاوي


اكتبك (ماي) وارد الگه العكس مكتوب
يقرونك (عطش) يانبع كل گطرة
من گد ما ابيض گلبك ..عدى زلوفك
يحظن الشيب
يهلهولة عرس كل شاب
بس زفتك كلهه ثغيب

ينعمة الضيعت حوبة شكو نعمة
يال بس بالبواچي عليك احس بعازة عيوني
يديرة (هاك) طحت بديرة ( اطوني )

يا اول شمس تنطي فياي لليحتر
يأول نعمة ماتنباس.. تتطشر

موش مطشر ومامش نعش لماك
ي أكبر من حزن زينب
اعلگدك مالگو تابوت
يكاسر واهس اليحچون
سكتك اعلى من كل صوت

يحسين اليحب يغار عاليهواه
مدري شلون احبن كل بشر يهواك
ال (احبنك ) و ( اموت عليك )
ال ( هلا ) وال (فدوة اروحنلك)
لغيرك چذب كلهن بس
كلهن صدگ وياك

تكره كلشي بي منة ..لذلك ماتدور فياي
يچنك شمس وكت غروب
شما تبعد اشوفك جاي
يشاده فطنة السبعين
بين المشرعة وبينك
احتاروا ياهو منكم ماي

عريان وفضحت اللابسين هدوم
من عدهه وعرفت الماتستره انت يضل عريان
لو لا بس هدوم الكون
من شفتك بلا جناز .. عرفت النعش ربعه متون
ومن شفتك لبست الدم
عرفتك تكشخ بأي لون
ومن شفتك كلت ل الله اريد ارضيك
عرفت الماتوا يحبون
ومن شفتك مشيت براحتك للموت
عرفت الثگلوا بممشاهم يلحگون
ومن شفتك صحت اسرجيها ام عون
عرفتك ماتدور عون

شعر : احمد المشرفاوي
صوت : سيد فاقد

@sha3er_100