كريم حاشوش


ماعفت كلبك بجه... ولا زودت ونك
وغير التعب والسهر.. ماشفت شي منك

لو جرح واحد سهل ..عثره ونرد نكوم
بس انه كلبي وطن.. من كل كتر ملجوم

واضحك واكول العوض غلطه ونعبرها
ما ادري طبعك طفل ياجامه بيها رسم ، ، ضحكات تكسرها

كاسر كلب ديرتي
وكلبي اعله مودك مشه وعاف اليحبونه
وهو انه تالي اعرفت
بس اليحب من صدك ماتنشف عيونه

بس ابو عيون الحمر
والطيب .. ويستحي .. ربعه اليغثونه

هو الحزن مو حجي
ولا سالفه وتنتهي ونكول نمونه

مثل الجمر بالشتا
للعافه كرصت برد ويجوي اليجيسونه . .

" عطش صحراوي "


الشاعر عزيز السماوي


لا تبچين
غيمة انتِ توجّين
و على آخر جرح بالروح بچفوفچ تحنين
تجيبين الليالي الـ ما تجي و گمره تجين
نهر يشبگ نهر .. للموت
ونهودچ عطشها سنين
يلين الحزن .. بچفوفي .. وخصرها يلين
النهر دافي و حزين
الضحك گمره و بساتين
صدرچ مهره .. مذعورة
توّج الروح بالچفين
تصهل بليل
و ترد
هالة خضرة من الحنين
صحراوي هذا العطش يحلم بالنهر چفّين
يرف لون الخصر گبل اللمس : جنحين
خَطف .. ياخذ حنين الروح
عليچ من العطش نهرين
اصابيعچ أغاني الماي
تتلون غنج وأسرار
گميره من الفرح وأسرار
اصابيعچ ورد من نار
تجيب الگمره للظلمة .. و تفل أسرار بأسرار
اصابيعچ برد من نار
اصابيعچ ليالي طوال
اصابيعچ توج گبل اللمس ذكرى و جمر تذكار
أحلم بطولچ نهر .. توج خضرة البساتين
مهر ياخذ اصابيعي بصهيل و يشعل الصوبين
علميني المشي عَ الماي
علميني الرگص بالنار
أسهر الـ أبعد صبح .. هيبة و گمر وأسرار
ويهيم الحنين عليك هالة من الحزن وأسرار
علميني أجيس الحجر ينطوي بچفي و يلين
علميني ..
علميني ..
آخ
أدوسن عَ الجرح صوبين
درويش الأغاني ما فرح طوله الحزين
يتلگّى النهر جرفين
و يفيض من العطش لو رفت العين
و ماتدرين
عزيز يعاند الغربة و يرد من الفرح كلّش حزين
يهيم خيول مذعورة ما تعرف تريد الـ وين .. ؟
نزيف عيوني ياخذني .. العراق منين .. ؟
يجي منك جرح .. أفرح .. يجن جرحين
صحراوي هذا الحلم يمتد للأبد ماشين
ما أدري إنتِ من يا صبح مهرة تجين
النفس ورد البساتين
اخذيني . .
اخذيني . .
أصد الخوف من يعرض تجين و ما تجين
الجمر يخضر من تجين
الگمر يكبر من تجين
يا لون البرد بچفوچ الحلوين
تزيد من الحزن كلما فرحها يزيد
يا خفگ الحمام ..
و لهفة التنهيد
مذعور الصدر
دوّخ اصابيعي ..
و حيّر النهدين ..
سرب من الحمام يطير .. مدري الـ وين .. ؟
كل عمري يمتد نهر .. يفيض يضيّع الجرفين
أموت من العطش
لمن تجين .. و ما تجين
أمر برد الصبح بچفوفچ .. تحلمين :
شمس تاخذ اصابيعي نهار الغبشة الماشين
انتَ منين ..
وآنا منين .. ؟
جرح يجمع عذابين
تحزن .. أشوفك
گمر
يغرگ
بالنزف
ليوين .. ؟
حزين الگمر .. بچفوفي .. ليالي ينوح
يا صوت الـ يهيم .. شراع .. للروح
يا .. سر . . الـ يجيب .. الروح .. للروح
يا گلبي .. الـ عليك .. بذلة مذبوح
إشعلي الماضي كلّه بليل
و حيل إبچي عليَّ شما بالنفس من حيل
اخذيني ظلام و خوف
لمّيني نزف ما شوف
داويني گمره الوطن
يهيم عيون للشوف
اخذيني نهر أزرگ يفيض من الفرح ويشوف
يلمض الليل و يفز : خيل وشمس وسيوف
حزين النهر يتلمس بيديچ طيوف
يوج برد الأصابع من حنين الخوف
ويهيم غبشة الصدر .. لچفوفي كلي .. نشوف
مذعور الشَعر بالريح .. مهرة بلا رسن وطيوف
اخذيني خذاني الخوف
اخذيني نزف شاعر يطيح إعله الورق ملهوف
اخذيني قصيدة هور تدوي بكل حرف مشحوف
اخذيني ..
اخذيني ..
گمره وحصن وسيوف
أريد الـ ما تريده
الناس
وأحلم بالظلام يشوف
أهيم من الحزن وأوگف بطولي شراع
ولك ماي النهر كل عمره بس .. وداع
الوطن بين الأصابع ما يمس الگاع
أفرح يموت الفرح
أحزن
توج أسرار
أسافر بالدمع مرتين
• مرّة حنين الصدر ياخذني مدري الـ وين ..؟
• ومرّة الأصابع توج روحي أغنية بچفّين
وين ..
وين تغنّي بچفوفك تريد الـ وين ..؟
يهيم الصوت بالگمره عَلَيْ : مهرين
ياخذني الصهيل و يرد خوف يفزز النهدين
أغانيّك حنين چفوف بالنهدين
حمام يطير .. بالگمره .. لوين ..؟
أطير بلا جنح جنحين .. !
أغانيّك نهر تاخذ حنيني أنهار
أغانيّك سفن من نار
فرح ورد القميص بجية الخطّار
أغانيّك .. جمر بيت الفقير و عزّة الأفكار
أغانيّك .. تهز ليل المدينة بگمرة الاسرار
أغانيّك فرح درويش .. يلعب بالجمر والنار
أغانيّك .. تمس جرح الشهيد بدمعة الثوار
وين
وين تغنّي بچفوفك تريد .. الـ وين ..؟
يهيم الصوت بالگمرة عَلَيْ : مهرين
أغانيّك نزيف عيون تجيب لكل صبح شمسين
دلّيني العراق منين ..؟

علي مهدي


يا عطر شال وشابك زلوف
تلاحگ" ارداني صارت جروف
لنته الغريب و نگدر نعوف
وجهك على العميان مألوف

ترضاها يا گلب العصافير
من صورتك حصتي البسامير !
فزاعه يمكن وسط العيون
توه النعاس يفوت و ايطير

وشحجيلك اعله الخنكه بيه
امن الصبح خنكه مغربيه
ومنطي بثواب الريح ريه ؟!
والخاصره تغفه اعله اديه

الحنيه كلما تعله اطخ راس
مهيوب ، بس من وحدي انداس
حنيتلك من ناموا الناس !!
اكثر امن الدم بيه الاحساس

مو انته و اتوسل بگایاك
يدري الله بالصاير بلياك
خاب اعله شوفة وجهك انخاك ؟
جا وين المسولفهن وياك !!!

ويخنكني شوكي المارضه يفض
وكلما انگال اسمك اغمض !!
ارد انسه بس الـ ليش تعرض؟!
و ها حشه جدامك صوج دربي

المشكله عيونك هنه هنه
جا وين وديت المحنه !!
وبسك تكول اليوجعنه ؟
ماظل وجع ما جاس گلبي

بگد برد وجهك بية حركة
بكل المنافي ارسومي تلگة
اغلط بثوبي و جرحي اشگه
ليهسه فگدك ما مصدگة

وناطر رسايل من وداعي
وبس انه الاتعنه اعله ساعي
يا گلبي اخذ بينه اعله ناعي
ويه اعزاز كلبي مالي داعي

زهير الدجيلي


مرة وحدة

صرت اشوفك أحلى مامرسوم باالدنيا وأرسمك
صرت اشوفك وين ما يطلع گُمر
صرت أگل للناس حبوا هواية حبوا
ولاتخلون الربيع بلايا وردة

حتى يبقى الوفه شمعة
حتى تبقى الدنيا مليانة مودة

مو امحبين
الي يردون اليحب لازم يشوف الهجر مره
مو محبين
الي يحسبون الگلب مثل المواسم الف مره

شلون لو ماي الوفه أبيناتنه طاح وتبده
شلون بينه

شلون لو راحت الدنيا مسافرة بلايا ردّه
ماأظن يبقى غصن شابگ له ورده
بعد ما يمر بينا الهوى ولامرة وحدة

تدري مرات الغياب ايصر شامت واضل احسب
وحتى ساعات العتاب وياك ماخلتني اعتب

مرة اشوفك فرح يكبر
ومره اشوفك حلم أخضر

لجل عينك والعيون الصافية بلون الموده
والعيون التعرف أتحب مرة وحدة
كلت احبك مرة وحدة
والعمر بس مرة وحدة

مرحبا أصدقاء قصيدة وشاعر .
رابط صفحتنا على الفيس بوك ..
نتمنى منكم تقييم الصفحة و طرح آرائكم بخصوص محتوى قناة قصيدة وشاعر ..

كذلك ستكون هناك فعاليات مختلفة على الفيس بوك .. قريباً

عامر عاصي


كلشي يجوز
إذا دسنا المواسم كلشي بينه يجوز

وگف وحده العِثِگ،
بس الجِذِع مهزوز ..

كلشي يجوز ..
الحنطة دموع،
والخد،
على البوسة يموع ..

كلشي يجوز ..
يخلصون الشباب،
وينتهي الموضوع ..

كلشي يجوز ..
نِزِفْ كتّال اهلنه،
وندفن الحاجوز ..

كلشي يجوز ..

دنياكم لِعِب
والمستريح يفوز
وشتا عيوني طويل
وعينكم تمّوز ..

موفق محمد


يا مطر زخهه بحلاتك
وأترس إشليلي مطر
حالوب ،
يا هو الچان يمعود ددخيلك
ارد اطير وياك
وأتنفس گذايل

وتدري خالي ،
الگذله ورده
الگذله هلهوله
ضوه إبراس الجدايل

يامطر طگني إبسبحتك ،
خرزة
خرزة
وخلي شاهودك بأيدي
وآنه أبيت ،
ومن اصيحن بات
انزل يا فحلنه
واگعد
اگعد
وافتح اليمنه دخيلك ،
بقن هالنهدين
ولفني الدنيه گمره
وارد أذبن ليل حزني
وأسكر إبميتك أغني

يا ديچ يابو عرف
گعّد حبيبي الترف
گله المطر تلني
يخدرني چني إبحلم
خل يجي إيلعبني
إينزعني ثوب المطر
وبميته إيضمني ..

يا مطر طگني دخيلك ،
كلشي عدنه
وارگصلك گمر بالروح ،
يتماوج محنه
ولمني طينه ،
ودوفني إبمي الورد
دوف غطيني إبحنينك
ارد اطگ شجرة محبه

إتضوي من طاريك
وتخضر فخاتي
ومن تهزها الريح
والله تصيح باسم الله بناتي

ونام حدري
وهزني امطرلك
عسل ، بوسات
ترچيات ،
عيديات
وشتأمر أغاتي

وطير تلگه ابصدري عشّك
وغني وآنه أسبح إبحسك

ويا ديچ يابو زلف
عوعي اعله راس الولف
گله المطر هزني
ولفني ابگلايد شذر
خل يجي اينزعني
ويعلگلي شمعة عرس
وبميته ايزفني ..

عقيل العرد


و بحلم يصغر ضواك ويبتعد ،
يتلاشى عمرك
تصير ذكرى ،
تصير طيف ، تصير امس

ولمن توصل للتريده
تلكه نفسك كلشي بين جفوفك و مالك نفس

تصفن وما تلكه نفسك
كلشي بيك اتغير وصاير ممل

تحس ما داعي لوجودك
شايل اجوبتك بديك
محضر و ما تنسأل

تحسب اخطائك تمل
تعترف بيهن تذل

تتعب وتلزم ضميرك من قميصه
تستفزه ويستفزك
توكف تضربه و يضربك
معركة وصعبة النهاية
بيها واحد ينكتل

تريد ترجع للبداية
تخاف لا جدمك يزل

تاكل بروحك
حطب والدنيا نار
الغربة الاكبر يابس وما تشتعل

تركض تلم روحك من الفرهدوك
محد يردك الك
انت كاتب مهرجانك وانت قربان الحفل

تمشي بين الناس بالك مدري وين

يموت كلشي بعينك وبعدك عدل

كاظم الرويعي


تجرحونه ونسميكم حبايب
تفرحونه ونسميكم حبايب

تسگونه المرار انگول محلاه
تعيفونه اعلى نار نگول الله
الله ... الله

صحيح اهمومكم من احلى الاهموم
وصحيح رسومكم بگلوبنه رسوم
لكن خوفنه لا يمر فد يوم
نحس العمر يگضي معاتب ولوم

شطوله الليل من يمر بالافراگ
بأول غفوه مني العين تنباگ
جزيننه حد صبرنه وحد الاشواگ
تركنه ولسه عدنه عيون عشاگ

يا حر الگيض دلينا على الماي
كبر بينه الحلم نهران وفياي
گضينه الراح فرگه اشينگضي الجاي
قصيده وما لگت شاعر ولا ناي

احمد عبد الرضا


شما اكولن أيست تفضحني عيني
امبينه تنتضرك تجيها
من اسمع بديره جديده يكلي
كلبي يجوز بيها
وامشي ادورك


استغلني.. العشگ فرصه
وخاف يبهت بيه عيدك
خضر بروحي گبل لا صير صبخه وبيش افيدك
اطرد اصورك واحنآ
وارجع وبالشوف ألح
واشكي من طيفك ولكن
شكوة العاشگ صلح


عفيه عمري الگاضي هم
الفرگه هم… الملگه هم
الجوري يسال ياهو ساعدني أعله شتله وهذا هم
كبرت الورده الزرعناها سويه
وصارت حديثه وتريد اليوم شم
وهذا هم

انت يا اول عرف واخر غريب
يحبني بس مو مالتي
ياحبيبي…
ولايتي الما بيها مثلك عيب اگول ولايتي
الليل شنهو الليل عگبك
لون مشمور ابمدينه
الليل اذا ما بي محنه شفرقه عن العميه عينه

سعود الخفاجي

طفه الفانوس
واستانس ضوه الشباچ
واتدنيت للرگبة
ومشيت سنين
ومدري ليا كتر
منك خذاني الليل
تيهت النشد ما بين
سوباط العنب والتين

وعرگت من الفشل كترين
ولخصرك گطفني السيل
ومناهد لگفتك لگفت النتاگ
ومكاسر گضيت الشوف
ادور عن وجه بالليل ما يطفه
ولگيتك مشتعل للناس
كل ضحكة عله وجهك
سالفة ورباط
وعيونك شواطي

من السدر والياس يالمرتاح
يالخلگك خلگ سكران
واسمك يا تنين الكاس
ونسني ونسني
الضوه الما بين
خدك والزلف ليلين
اتحرگن واگولن اخ لو تنباس
يا دير العشگ يا طين حرّي
ورهبنة قداس
يا مهيوب يهديب
الحچي المحسوب ما بين الجدم والراس
گدّرت المسافة عيون
بحساب الشبر محشوم ما تنقاس

وانه.... انه
الچنت اذم بالكاس
من اول كاس
صليت عله روحي
الجاستك فرضين
ودليت اليحبني
عله الصدگ والاخ

وين بيا جرح تنداس
وغنيت عله كيفي
واذنّت بالناس
حبّو..... حبّو
حبّو.....حبّو
حبّو الدنيه عميه
الما يحب ينداس

منهه وگمت احب الناس
ومنهه وصدگت بالكاس
ما خان برفيج
ولا گطعله براس

واحبك..... احبك
ليل ومساتر عشگنه يصير
ما احبك ضوه تنشاف
واحنه ازغار

نكسر خاطر الشيطان
هسه اكبار ليش نخاف
ليش نخاف..... ليش نخاف
سولفني عله روحك
والتهي بطرواي
واخدر بطرواك
شوكت ما نعست
غمض واخذني وياك
يالغيرك ولا مره خذاني وياه
وغيّمني عله كيفك
واضحك لملگاي

ارتاح من اچلچل
واثگل بممشاي
واستانس لون شرجيه وكتي يصير
واضحك عالشمالي اليدفع بگفاي
وغيّمني
ودفيني بغنج
ومن ادفه امطر شوگ
واتبده عله گاعك
من تسومر ماي

ولاگيني ولك لاگيني
بهوه الراگين للبلام
وخلني براحتي
من ارعد واگلك جاي

وانزلك مطر من ينزل بنيسان
وافيض بغير هاي بيش
وهاي بيش وذيچ بيش
وافكن عازة العطشان
واتسرسح جدم متعوب
وادهده عله وديانك خلگ نهران

واتطوطح حلم ما بيه
بس انت بخيالي تدور
وافتر عله خصرك فرة السكران
واتشچل واجيك بحسبة الفلاح
واظل بكيفي الگط واعزل التفاح
واطوّل بال وي مزاغل الرمان

واتمشه عله جرف التين ست ايام
والسابع اچودر واعلن العصيان
واتفرهد وافرهد
واحچي بالمحضور
ومرات اعتقد
نحتاج للشيطان

"حزن جنوبي"

علي عبد الرضا



ودعتك من الباب للباب
شايل سمارك صوت الأحباب
لون الفجر ﭼـن لون سرداب
عطاب گلبي اليوم عطاب

جست السراگي وطاحن سنين
من الـﭼـتف لدوارة الـ وين ..
مـﭼـفي وفزع حزنك يالونين
هبت الريح تيبس الطين

ودعتك وضاگ الدرب حيل
نجمة وكتلني موادع الليل
موتك خريف ويصرخ الريل
حزنك عبر سيل بظهر سيل

لا تبتعد فاض الحزن شوگ
صحرة وتطرني امعاند النوگ
فز بيه ذكرك دمعة بالسوگ
لميت حزني وباوعت فوگ


طشيت شوفي اعله الدرابين
هلبت ترد وتلجحك العين
ظلمة الگبر مو مال حلــوين
خفاگ گلبي اعليك يا زين

ناطرتك وجن سود الالوان
ناخي المعبرة بـ ليش وبـ جان
ضيعة نده بدروب دخــــــان
ضايع عليك ومامش امجان

ودعتك وصافن على ضواگ
جن گمرة ضايع حزنك وياك
حتى النخل صوفر اعله جفاك
ينعاك گلبي اليوم ينعـــاك

حزنك قريب وجسمك بعيد
ثگلتي وحشتي وفگدك يريد
يجزي الوكت وعيوني يا حيد
تعمه وي ثوبك من يمر عيد

مهيمن الاسدي

بعد مليون عام



بعد مليون عاام
نَقّبَوا صدفة ولگونه
عظام مابين الحَجَر
إكتشاف ..
وضجّة صارت ، والخَبَر ،
سُرعان ما شاع الخَبَر
عيّنات أخذوا وصعدوا
طَلّعوا منهن صوَر رَسِم توضيحي لشكلنا
وجوّة مكتوب بلُغَتهم
( هكذا كان البَشَر )

ومن بقايانا بنَوا متحف چبير
وتجي المخلوقات ،
تتفرّج على الناس وتطير !
"وقسّمونه "
السلاطين ،
ال سياسيين ،
وال تجّار، فوگ ،،
وفرشَوا الطابق حرير

الجنود ،
ال كَسَبة ،
ال عُمّال ،
جَوّة ،،
وفرشَوا المَدخَل حَصير

من بعد مليون عام
من هياكلنا استدلّوا
ياهو من عدنا غني
وياهو الفقير !
أُجرة الطابق العلوي
أغلى بس بيه ازدحام
واحنه أُجرتنه رخيصة ،
الفقرة ، فقرة
لو بعد مليون عام !

المُهِم
درسوا علينه
عن تعاملنا .. ووضعنا
عن لغتنا .. وعن طبعنا
وشاعت الصدمة بوسطهم ،
إكتشاف ..
بس خلَق حالة رعُب
نقطة سودة
ويَه كل هيكل ..
بالمكان ال بي گلُب
وصورة توضيحيّة جوّه
لطفل ميّت بالحرب
ونقطة سودة
ويَه كل هيكل ..
بالمكان البي عقِل
وصورة توضيحيّة جوّه
لشايب يناقش طفِل !

ونقطة حمرة
ويَه كل هيكل ..
بالمكان البي نَحَر
وصورة توضيحيّة جوّة
لبشَر ياكلّه بَشَرْ
استدَلّوا على العِلّة الخلّت
الإنسان يفنى وينقرض
الطمَع
والجهَل
والغِل ،
والبُغض
بچّوا حَد ما بَلّلوا جنحانهم
طول وعرُض
غلقوا المتحف
وطاروا
وسدّوا الفتحة التوَصِّل للأرض ..

وفاة الشعراء الشباب زيد السومري و علي مهدي .. اثر حادث سير في بغداد

إنا لله وإنا اليه راجعون ..

الراحل ..زيد السومري


مَرّه سألوني اعله روحي
و عاندت .. گلتلها صيري

ما استنكف من خلالاتي و حصيري

الناس نامت للظهر
و من الصبح غبّش ضميري

لا حچيت الفاهيات
و لا خفت من تايهات

و لا مخلّي مريتي التقرر مصيري

احله شي بـ الدنيا آني

مره سألوني اعله أمّي
و فرفح التنور البگلبي و چواني

لسّه و آني بعيد
تشغر لله و تحسّ بمكاني

و مره سألوني
اعله صاحبتي .. استحيت

تحبني بس ما عدنه بيت

غاليه دموعي و عله المامش بچيت

منتظر سعد


لا تحبني الدنيا موسم
وانه ما عندي غصن يغوي البلابل
لا تحبني
الشيب لاح زلوفي سكته
وبيه منشار العمر
كل لحظه ياكل
لا تگرب وانت برحي وانه گاع
من تطيح بحضني تتطشر حلاتك
لا تجيني الغربه ترست كل فراغي
وبعد ما عندي وطن يجمع شتاتك !
لا تگربلي الشمس شباچي ارمد
ولا تحرك چفك بحجة سوالف
انه ميحركني معضد
غض جفن عينك عليه
وصي عينك لا تدور بيه كحله
ولا تحاول
تتعب وما تلگه مرود
وحضني ما ضل بي دفو وليلك جحيل
وانه اخاف بحضني تبرد
وانه خشبه وضايع ابستان صبري
ومره نارك تشتهيني
ومره تاخذني الچفوف الما اعرفها
و مدري وين اتريدني امتد
لاتدگ بابي يخايب
لا يفز بيه صباي
انت ماي
ولا تظن بيه انه گاع
انه فوگ الماي
هم اتبده ماي
ياهوگلك بيه تلگالك ربيع
شنهي جيتك ليش جاي
وخاف لومك بيه يگصي
راح اسولفك علي
انه المتعب الشفه من الشفايف
وانه من چفوفي تعبت الزلوف
وانه المتعب الضلوع من الضلوع
بس بعد ما بيه حيل
و هسه تعبت الچفافي من الدموع
جان خلگي ايصير في وكت الشمس
ويصير راگ
كل زند مر بيه لاعبته بهداوه
وكل نهد يغويني احط فوكه زراگ
ليلي جان اوسع من عيون الاحبها
وهسه بيه الليل ضاگ
سيرت يم كل ظلام
بچفي شايله شمس
وسيرت يم كل صراخ
وصار يحچيلي همس
انته اجيت اليوم متأخر عليه
انه الاتمنيته بس لو جاي امس

مصطفى النوري


ها يمنسي فك نسل طكات جنحك
وسافر ألاخر وحدتك تلكة مامش في كذلتك
تلكة أثر جويات أصابع فوك من وحشة صفنتك

وأنت ذاك ألعايش بواهس خريف
رخصت خصرك نطر....للمالة داعي

للبحزنك جف دعاء بكل فرض ليلية ساعي

وين مبحر يا جرح كلي أشجراك
عايش بطرك ألحزن فك ريج كلبك

يا نشد ......يا هلبت ألله ......فحطت لهفة فرحتك
كافي بسك تايه بواهس غريب
تمشي ومكاود وحشتك

أليا ظلام أمودي شوكك
يا ضريح ألمالة بعيون ألفكد حوبة يجوك
كلي ياعاشك يطوفك

ليش باهلت ألظلام....وكتلة أجيك
وكايد ألهندس شجاعة وكتلة أشوفك

وأنت تدري ألليل من أينث حنين
أيفزز أحلام ألثكالة

يا ولك ...ياخوف مجفي أعلة ألسواحل
روج ممحل

فيض بيك فل كصيبة ليل حزنك
ومشط ألكذلة فرح
وأجفي ضيك عل كماري

أتلكة وجه أخدود حسنك
أتناوش ألضحكة ألبعيدة
ألعودتها أسنين مامش....بالجريدة

ولا تكل لنسان أحبك
خلي ذكراتك جريبك

كابل أمراية ضحكتك
وعيش وي حسنك.... حبيبك

سيروان التميمي


عيش جنك
وامشي مثلك
كافي تشبه غيرك بهاي البشر
التشابه للكصب مو للبشر

سافر اذا بولايتك عايش غريب
واشبك جروحك اذا مالك حبيب

هو جرح ولايتك طاب على عيب
منين تلكالك طبيب؟؟

وابجي وحدك
وامسح دموعك بإديك...
الينشف بيده دمعك يرد يشتاك لبجيك


يا غريب...
ياغريب باجر يبوكون اسمك وانت اسمك توه صار!!
وباجر يشبگك حمدهم لو برد حضن القطار!!

شمالهم
دارو كفاهم وانت عمرك داير الهم؟؟
شمالهم
شككو عمرك وانت كضيت السنين اتفصللهم؟؟

لكطو تفاح عمرك..
وانت گضيت العمر تستغفر الهم

كافي تتوسل نهرهم..
واعبر بمايك على الغثك عطشهم..

كافي تندار ويعتك شوكك وهم ترجعلهم
كافي مو طشو سنينك.. وانت لاهي تلم صورهم

هزهم بكل حيل بيك..
وطيح من غيومهم گطرة مطر

شنهي ضلتك بالمحطة وما الك نية سفر؟؟؟

تضحكلهم؟
جا وجرحك؟
جا و حزنك؟
وجفنك اليمطر دمع صحوة ومنام
تضحكلهم..
وانت حزن البيك يركض ركضة الگطرة على جام
همه ذول الصغت غربتهم وطن واستغربوك
همه ذول الطحت يم طفهم نهر بس عطشوك

الحدو بضعون دمعك من بجيت
وصرت ماي عيونهم لكن بچوك
الكلت تنساهم ولكن مانسيت
وكمت تندلهم لحدما ضيعوك
من شعلت سنين عمرك مادفيت
ومن برد بيهم وكتهم حطبوك
باعدو وانت بطرك روحك بقيت
لاوحكك حتى عنك باعدوك
ولايتك عمية ورسالة المن بقيت
ويه الكواغد خلصتها و ماقروك

اخ منك...
جبت عمرك تنتظر وادم نسوك

جبت عمرك تركض على الما تناك
يا الكيت الناس كلها ومن ضعت محد لكاك

نعي .. أحمد عجيمي


عنك تسولف هَوية الباب
وعيوني تفتر للهوى الهاب
بلكت يدفعك من التراب
يمدلل اشمالك مشــيت

يالحيد ما تهوى الخفيفة
ما تنسجن نار بصريفة
يا مشية الذيب اعله كيفه
وعيونه توجع گبل الأنياب

يا ﭼـفن يتمشى اعله بالي
امتانيك واگماطك اگبالي
من شيعوك الخشب غالي
جان الخشب للـ يدفه ينجاب ..

بس بالعشگ تنشاف مغلوب
ولو طحت من ثگلك يحالوب
ذلة عزيز الگوم مصيوب
ويظل عليل ابين الاحباب

بمراية الحلوات تنشاف
و اعداك من جروحك اتخاف
ظِلك اعشوش لطيرة الصاف
والناس ريشة بجنح الغراب

احجاياتك اتسكت العشيرة
اترد الـهَلا ماي بجزيرة
يمة التتن تارس شليلي
ياهو الـ يلفه بهذا ليلي

مشلوع گلبي الليلة مشلوع
لو بيدي اجرنه من الضلوع ..

كاظم اسماعيل الگاطع


حنيت انا لشوفتكَ
وأصبرت بس ما صبر
گلبي وصرخ راح أطكَ

جاباني ألك ، وأذعنت
جيتك ، بليلة شتة

ظلمة ومطرها رشگ

وشبعدة صار الدرب
خوف و رعيد وثلج
وچفوف أدية زرگ

أبابك طحـت هاگمت
ضميت أدية او ردت
َ عألباب بالروح ادك

بس كالوا ألمنّ تدكَ ؟
گلمن مشة لـ حالته
واحد
سكن بالغرب ،
واحد سكن بالشرگ