القصائد الفصيحة والشعبية

#جرح_سبايكر

عامر عاصي

-عراريس النهر -

يا نهر ذبني عله الجرف ناي
وبهداي جيس الروح بهداي
سولفلي أدري جروحك هواي
ودمهم حرير ويجرح الماي
...........
يا نهر ذبني عله الجرف عين
بعيونهم تقره العناوين
يا نهر حلّفتك بالحسين
من موتهم ، هم استحه الطين ؟
......
توّه الدمع والموت ، توّه
والعاش گوّه ، يموت گوّه
يا نهر شوف آدم شسوه
يمطر جثث بچفوف حوّا
......
يا نهر يا گبر النواميس
ابليس راح وخلف ابليس
والروج ظل يكنس عراريس
ونذور وشموع وفوانيس
......
يا نهر دم ودموع صاير
وچنّك بالولايات حاير
خجلان ؟ شتگل للمناير؟
الشبان بمتونك ضفاير
........
بس يا نهر طينك عماهم
وبرياگهم وذّن ظماهم
أدري النخل يشرب دماهم
وتنوح برحيّة بسماهم
.....
صار النهر حيّه وتمد ناب
تروي الشواطي بدمعة احباب
غِيّاب .. چنهم موش غياب
شو چن أديهم دگّت الباب

نام الولد ، والشوگ ما نام
والريح تعوي ومالها لجام
يا طيف يبن ثمنطعش عام
تبچي الصور وتبلل الجام
......
وينشد فضيض الماي شتشوف؟
ماي وسِعِد وعيون وچفوف
ومچتوف لاذ بإيد مچتوف
والروج مغزل يغزل زلوف
.........
شتشوف من توگف على الشط
وشمس الفجر توهه اتّمَغَط
وتسمع غراب الليل ينغط :
شيلي الضمير البالنهر غَط
.........
شيلي الولد شوفي شحلاته
عطشان والماي بلهاته
والموت شل جرحه بعباته
عريس ...... شيگولن خواته؟
.......
يا نهر روجاتك مخاديد
ناموا عليها الإيد بالإيد
حتى اليريد يصيد ، شيصيد؟
ضحكات وشفاف ومواعيد

محمد الشمري
.

وكلشي اليـنجهب ذبــلان
فهاوة ملكَة بين الجذب والبــيبـان

ورزة بــاب ماتت شيٌعــاهه إشراع
ملامحهم نهار دروب
وصدكَهم شبكَة مال اوداع
أمــتيـهيـن إشـتهتنه الــكاع

وشرب بيــنه النجم كَمــرة
وهدل بيــنه السـعف جم لــيل
بس مـا لحنـه جـي فقرة

بســالوفة عتبهم كَــعدوا إمتيــهين
توازيــنه وخذانـه المـاي عالوادم

ردت البيــبان صفنـة بوجه كلمن جــاي
وجــنه نموت !
من جــان الكَمر بالمــاي يكَعد والعشك بسكوت
من جانت عبــاة الكَــاع تهدل لو شهك تــابوت

أعله نــيتنه إشــتهانـه الليل
جي شفنه الزلف خطار
إشبـديـنه أعل المشوا يا حيف
طواريهه التراجي أكَصار
وركضــنه بدرب كله فراكَــ
مرات الركض مريوود . بس الكَاع
تبيــن ركضة الـمـشتـاكَ
تبين ضحك غربة الكَــاع
يترايه الكَبر لو سولف التابوت
جي شاف الجنازة متــاع

ودعنه العشكَ والليــل ومراية عرس طحنـه
تره الدنـيه سفر و أوجـوه ..
غير أوجوهـنه أشفنه
صــدكَ عــشنه ! ؟
وفكَدنــه الشيب . بس الصدكَ مـا عشنه
يــاربي العـمر عنـكَود
جـا ليش أحنه ما لحــنه ..؟

عمار سالم..

چذّب لوتريد تعيش
وخل ناسك يشوفونك صدك
لاچن طعن درويش
طحت وحاسب من ارجع مجاني الكاه
بس ثاري بمجان الريش يطلع ريش

الحزن لايگ يگلبي عليك
جرح شفه الضحك ياذيك

وانه اگدر يگلبي اچويك
لاچنك شمع ويريدك الشراي ماباچي
بس گلبي انه اعرفك زين
غيرك يحجي حزنك ..وانت ماحاچي

يمنسي انسه
بسك تعبتني وياك ..مثل اغطاي
كل ليلة الحزن نفسه

جنت حاسب وشم ماينوخذ تعبي
ومن شفتك جتف مجتوف ياولفي
بچيت ونيشنت دربي
ورفس مذبوح بضلوعي رفس گلبي

ورجعت اغريب.
ولكيتك ثار ابد ماتنوخذ بالطيب

انوي عليك ازيحك واوصلك واحتار
شيشيلك حديد بنار

هديتك امس شاهول
بس شلتك گبل لاتوگع اعله الگاع
اجس نبضك ردت بوداع
بس ثاريك
حر اصواب دمعك مايطيح ابساع

وانا تعب اليريد يشيل ..
ومغرب وكتي وجروحي عصافير وعمرهه طويل

حزن گلبي دمع وكت العتب يرضي
حزن گلبي عطر كهرب ولا يگضي
وكلشي يبين أعليه جنح فضي

وبالذل كلبي مايرضه
ناوي اعله البعد دخان ..شيكظه .؟
غشيم وضامك يرخيص
يالماتنذخر ..فضه

سومرني من اغيب اوداع واوكفلك
شمس صحرة
وحرت وياك اجيك منين
يالعني اصبحت تندار في شجرة
طحت من عيني ماخليتلك ذكرة

يادمع النعاس الما ورا حسرة ..

صفاء السراي

حبيبي الجنت اناغيله
كبر گبلي
لخذني سنين بذراعه
يلوليلي، ويغنيلي تشوب الروح باوجاعه
حبيبي ومن كبر كلش
سنابل وردت روحه
تلمني بفيها گعدتنا تساجينا
وتصير الضحكه مرجوحه

حبيبي ويا كبر روحه
حبيبي أخضر
حبيبي ابيض
حبيبي بلون دمه احمر
حبيبي من العشگ اكبر
حبيبي ومن يلوعني يضم رويحته بگلبي
يصير اصغر يرد أخضر
يرجع سنبله تفيي
يسگي الشمس ضي اصفر

حبيبي يبوگ من روحه فرح لاجلي
يصبر، ينكسر،ينلام
يبوس عيوني ليليه
يغطيني، ارد أصغر
أرد احبي عله متونه
يمسد شعري بجفوفه
ويشاورني عراق انه
انهض لو ردت تكبر

سعدون قاسم

وتلملمن شو بس عليه تلملمن
وهمومي وين همومي ما يتوصفن

ما يهيدن بيه يوم
لا بگعده ولا بنوم
وكل شموع افراحنا الحلوه انطفن
وتلملمن شو بس عليه تلملمن

گمت ادور عالفرح بالذكريات
واحلم واصحى عله الماضي اللي فات
انه اريد احلامي منكم
يالگضيت ايامي عدكم
وجانن احلى ايام يا وسفه ارحلن

وتلملمن شو بس عليه تلملمن
وهمومي وين همومي ما يتوصفن

يا صبر ما عندي غيرك يا صبر
وانه بغيابك عَلَيّ شح العمر
عمري ضاع وياهم
گلي وين الگاهم
بس الله يدري بيا وكت وبيا زمن
وتلملمن شو بس عليه تلملمن
وهمومي وين همومي ما يتوصفن

الكروب الخاص بالقناة .. 💜

https://t.me/joinchat/TgvQSt5lJ30fQa7g

هادي العكايشي

رديت وجدامي تخط حيره وندم
رديت وعيوني تخط گبل القلم

رديت لحچاياتنه العايزها بس چلمة صدگ
وعيونه الحلمانه بالقداح لو مره يطگ
رديت عالبيبان باب ..اباب.. ادگ

رديت.. وشرديت لا موعد
ولا چلمة نعم

گلي اشگلت وشقررت وك يا گلب
ناوين عالغربه ...يتركونه غرب
بس المطر يمحي الأثر لا سچة ضلت لا درب

وك يا گلب شيصير لو تطلع شمس
فرحة وعرس
شيصير لو رديت يا طيف الامس

رديت وجدامي تخط رديت وعيوني تخط
شرّگـو وامغربين رحنه ويَ الهوى
ودعو لحظات الصبر ما ظل صبر يا اهل الهوى

ولا ساعة التوديع شفناهم
عافونا يولا احنه عفناهم
وگـلبي لهوى الهجران والنسيان
من نار الهوى رد انجوى
رديت وعيوني تخط وتحن حنين النوگ
ورديت وجدامي تخط ويهزني ليك الشوگ

ضياء المياحي

يالمجفي ذاتك ما رخصهه
عيني اليمين تريد فصهه
بس گلي روحي من ارد اگصهه
مثل الشجر.. لو اخلي نصها

بس مو چبيره الشنهي ماذيچ
من تنشد عله رويحتي شبيچ
انه عله حطت روحتك ذيچ
مشلوع گلبي عله الشبابيچ

بـ الا نفس بمناهت الصيف
بردت حزن واستبردت حيف
حنيت اشوفك هيج بالكيف
سنتين وانا بشارب الطيف

دارت سنة خلگي وبچيناه
وگتلك تعال وما گلت ها
ارد اركض عله الشيب وانخا
ينطي الگلوب السود ويا

من توجعك جانت عفتهه
باول صيار الاخ اعتهه
چم مره روحك تيهتهه
لليل وانا استاهدتها

الطيب والعشره خذني
من شفت ادينك مو هذني
حنه انجفيت وگلت حني

وحطيت للبيبان مني

فراس غالب

اشگد عِرف بالمگبره وگلبي غريب
وتارستني الدنيا حسره
منين يل عفتوني اطيب
شمالني اتلگه الاعياد ابلا حبيب
شمالني من اسنيني امل ويم طواري الشوگ اشيب
الليل رايد مني ضحكه... منين اجيب ؟

گلبي مالوم اويه ناسه وعمري يتشهى اليحبه
وانا كل بيبانهم متبريه مني
وعتبه تشمرني اعله عتبه
كون اليه بگد سوالفهم خلگ والبيه اكتبه
الليل واعدني بصبح بس دوم اچذبه

منيلي الواهس واتاني ايامي تحلى
منيلي اندل واعتني لصاحبتي كحله

كلها غنتني ولا واحد نعاني
كلها شربت كاس جرحي بيوم سمعو بيه اعاني
كلها ردت دورها وليهسه اتاني

خايف يحل موتي وانا انطر حياتي
خايف يصيحون بيها بسوگ الاموات امنياتي
خايف يكفرون شوگي وتنذبح باطل صلاتي
وخايف ارجع والگه غيري وياهم
وماخذ غلاتي .

علي مهدي

جاي مثل الجام دمعاتي عله طولي
اللا هلا من گفه بابك صورولي

وانه من ما فات عصفور وي طبتي اتبسمرت
ضاله بنفسي عليش تغيرت

وهيه مثلي تسجد لعينك كذلتك
وأكثر من گلادتك ذمتي برگبتك

مو گلتلك حبني ويه الناس خاف بوحدي تزهگ
الصوره كل ما بيها لمه صعبه تنشگ

وازعل واذبل شكابر
ليش ما گلت لضحكتك هذا شاعر

الليل يبدي وابدي ادور الشگگتهن
حته جلمات التغثني استاحشتهن
وَما اليه واخذ الناس عله گدها
وليك اغني
آآآ يزعل تراب اجيك مراضه ريح
تگوم مني

آخ يايابه من اشم روحي واذكرك
گوه ادور زله بيه حته اعذرك

ما رضه توادعني ضلك ضل وراك
لا توادع يالبديك
و الغصن مد راسه من شباجنه يدور عليك

عيني اذا شافوك بيها بجفني اغمها
وصورتك مثل الجواز بغربه جوه الراس اضمها

حيدر الطفيلي


أريد بكل أمان ابجي
كل ليله كبل لا انام احطن صورتك يمي
واكل للصوره اريد اغفه ..

كل ليله اترس الغرفه
شمع وعلوك واتغطه بمكاتيبك اريد ادفه ..

واضل بردان ...
واكولن هلبت الصدفه
تحطك طيره ع الشرفه ..
يمحبوبي العمر خلصان ع الشرفه ..

لاطيفك غفه بعيني
او ولاغيرك ترس عيني
هذن ضويات الولايه طفن كلهن
او انت انت ولاتطفه ..

بعدك تارس احلامي ..
افز كل غبشه بدموعي
وامد شوفي على الشباج
بلكي تمر نده بجامي ..
وليش تمر ؟ مهو انت وياي بايامي ..

بكلشي اذكرك والكاك ..
يمحبوبي خظار العين
وجويات الصور بالليل
والغربه وضحك بيبان الولايه
(هذني انت) وبعدني اهواك ..

بعدني شما يمر طيفك
امد جفي واكل للطيف اخذني وياك ..

لاخر عطش لعيونك ..
وغفي احلامي مو راسي على متونك ..

اريد بكل أمان ابجي ..
واريد بكل أمان احجي ..

انا مشتاكلك ياطيف ..
كل هذا الشته بيه !! وجفوفك صيف ؟؟
كل هذا الحزن ياكيف

عزيز عسكر

ردني لأيام الصبه لچف الطفولة
ماتت أحچاياتنه بعين الصور
وخذني للگاع
الرسمنة عليها روحي وروحك بجف المطر ،

ردني لأول مستحة لأخر
محنة ردني مو زين الگُبر

بروحي شايلك نَهر وسنيني گاع
منين ما ميل أيتبده
وماكرهت أمناطرك ظال أنتظر

باجر أمتانيك يم باب الچَفن لابس فرحتي أسترخص من الله وتعال
باجر بروحي انشتل جيّة حلم
ضموا طريجة
وبي عثر باقي العُمر

باجر أتغني الشواطي بطور داخل
ماتبدل ثوب كلبك والمحنه ،
انت ذاك انتَ الحنين
الگلشي بيه يصوغني دموع وحزن

ميثاق الهلالي

( تابوت بارد )

ليش كلما اوصل إعيونك
تسد بوجهي باب وتطفى روحي وترجع
جنازة بكبر فشلة جرح

وليش كلما انسَّى روحي باب شفتك
من تجيني تبوس جرحي تگطر شفافك ملح

وليش تگبر بيّة ليل ؟
إعيوني ذبلت خضّر بچفني ولو گطرة صبح
وانه مذبوح إعلة قبلة مار هجرك
لا تواسيني برمح

والسچاچينك فلح ، لا تگصي بيه !
جروحي صبخه وماتفگ ياخه الفلح

وبكلشي أقبل مرني لو تابوت بارد
مرني لو صفگة شماتة
ليا وكت غافي إعلة بابك خل يمر طيفك
ولو شهگة نعش ..

جنت أتاني الغيَّم يمطر صورتك
فوگ العطش ،
ومرت الغيمة
وعصر وجهه النهر

وأنة وشفافي ودمعتي
تسودنت من فشلتني وگتلي ، رايح
دَرَتَ وجهي وغيمتك مطرت سفر

ما گلتلي من البداية !
الحُب ظلالة ، الشوك لعنة ، حتى لا اكفر واحبك
ما گلتلي إعيونك الحلوات مابيهن قرار

ماگلتلي الليل شيّع كل محطات الضوة
وصارت مگابر
حتى ما تاني القطار

ليش ترسمني شبابيج انتظار ؟
وتخنگ خيوط الشمس ؟
ويذوب ويّ روحي الوعد !!

ليش تصلبني إعلة بابك
وانت تدري الشمس ماتت
ما گلتلي الصبح مايطلع بعد

اسماعيل محمد اسماعيل. ...(صلاة وذنوب)

لا يهواي لا تشره
سفين الشوگ ما وچه بشريعة
ولا صفن له شراع
وانتَ الروج اهيسك تطفح بدمي
وجرفينك نبض مامنه الك مطلاع
وجروحي اعله مد الشوف، نبعن أوف
ويرشن شواطي امحبتك نعناع
وج روحي وأخذ عطاب

يومي لكل جرح يحدي، بونين أوداع
يمن ذچرك يمر بيَّه
ندى وليهوب
احب حُبك، صلاة وذنوب
يالوصلك ترافة املّحه بشوگي
صرت طوگي
حجل دنياي..معضدها..وگلايدها
وضوة أحلامي، وربيع الگاع
لا تظلم..ولا تشمس..ولا تمحل.. ولا تريع
ولا تنشرة، ولا تنباع
حيرة ورافگت روحي
اعلى الدرب الضاع والماضاع

وفراگك سبوگ امرسن بصبرين
ما بين الگلب والعين
صبر مناطري
وصبر الجروح وساع

ناحر بالعمر محمل بهاگ الشيب
لا نخوة التنحره ولا گصر مصراع
وانتَ بهالوكت وتغيب
ها گد هابعد بعد الجنح للطير
مادگ ريتي وحاتك نفس للغير
لا زرع المحنة يحصده غير ذراع
مــ انتَ الروح ي احبيب
هواها وزادها وميها

تريد دموع ؟! ادمعلك
ولو ما تستر دموعي اعلى عيني
وحسنك صبيها

ردتني ضلوع، اضلعلك
ولو ما وسعن ضلوعي، لهواك شما كسر فيّها

ردتني شموع، اشعشعلك
ولو شوگي اعلى شوفك نار
ما يجهب شمع ضيها
ردت وشما ردت ويهون
ترمد للشماتة عيون
لو رديت للديرة الحنينة ويبتشر حيها
يــ وين مروتك حيها
رضت روحي بچثيرك خايب شسويت
نايم بالبراد وتگطع شويها

وهيّ حبك صحو ومبيات
ما ظنيت
يالحتى الخشب منك تگذل للدرب ضويات
ما ظنيت
وانت الشگفن عيونك وميض ونار خزامات
ظني لبيك، طير يونسك مناغاي

ويسكنن جناحينك علينا فياي
لو نعطش ينبعن ماي
ما ظنيت
عمري يضل مراح وياك
تسرح بيه، وتمرح خزلة الشوغات
وانا وياك يشگر مرصعة وشارك
ادور بنسمة الهلبت
واطيح بلفحة الهيهات
وشما حسبيت انساك
انسى المستحة من الناس
واتمنى الهوى لجياتك مرايات
وك، لو حبك محيبس
لـ ارج رمضان واهله وحيل اصيحن بات

لچن لو وصل علمك على لسان الشماتة هواي
گالوا مات !!
ابرد الويل..اطش الهيل..ارد كحيل
اصيحن حيل
يالشمات ميتة، مروّة الشمات
روح هواي، ثيلة اتحشها واتنبِع
ريحة بكل نفس تربِع
، نجمة بكل سما ترصِع
روحي ولا تگولش روح!!
لولا الموت مرها تورشعه تورشِع

وانتَ هواي، وانتَ ولا يحرجك ضيم
ولا عالضيم تتشيم
ولاتسهر
ولا طيف اعلى عينك مرّ
وانا الـ لو غمضت عيني اعلى كل مابيك تتلملم
و اود اعبر زفاف وياك لو حتى اعلى روج الدم

و اود لو ايست هينوب
تخطر بالمچان الچنا بي نحلم
واشوفك من بعيد .. ابعيد
لا احزن ولااني بعيد
واعلى مكابري اتلزم
واگل للروح لو زهگت
يروحي الماينوش الماي يتيمم

حسن وصفي

(الرسايل)

البارحه المرسال غنيته وبچيته
انه من فتره المراسيل أدفنتهه ..
خفت لا اقره واسافر واغترب وابجي واغني ..
البارحه المرسال بليل وقريته

وسافرت بيه المواويل وخذتني لغير ديره
وهيه حيره
لا المرسال القريته يذبني يمك
ولا اندلك
البارحه محتاج اشمك !!
وضاكت ضنوني وهوه الغرفه خنكني
وصحت بسمك
وانه شنهي
انه لو ريح اعتنيت ونمت يمك
وانه لو رسام ارسمك

مو حزن حزني لون ما اشوف حزنك
مو جرح جرحي لون ما اجيس جرحك
لو دريت العافيه اتغفي بشليلك
وداعتك جا علحزن ليليه أضحك
خلني مرتاح اويه حزني المهم وضعك
يا حبيبي وداعت الله البيه لو مر بيك تزهگ
بس احبك
وانه كل مغرب يتيم متاني جيتك

استاهدك تگرب واطش روحي هلاهل

وانتشي واسكر بجرحك
يا حبيبي الشوگ نده اعله الرسايل
وانطفيت وزاد حملي اعله المحامل
مرني واحجيلي ولو جذبه قديمه
يا حبيبي وداعت الله الگلب جاهل !!

مالك السيد

تزغر بعيني المسافة
وتكبر
بروحي منارة
وتشبخ الاخ اعلى صبري ويختنگ ليلي بسماره

لا گمر يندل وحشتي
ولا سلف طحت اعلى ناره
ولا انت البايگ غربتي الضحكه بحلوگ السكاره

يابعيد
الخطوة مو نگلت جدم.. هِمة رسالة
وانت ذاك
العافني چفوف اعلى خصري ومارضى
يسولف دلاله

وسولفولي
گالوا فراش اليحب ضايعله طول
والفوانيس النستها اشفاف اهلها تموت
بوساده غريبة

وگالوا المتعوب عاشگ
ما تبدت فرحة الساعي اعلى شفته
ولا عرض بابه لحبيبه

دروب المتانين وكحه
ونجمة نجمة
عيون اليناطر تفر الليل سبحه

تنگطع بـ اول حمامة شايلة الغبشة بجنحها

وانت لو مثلي تحب چا سولفتني
وچا شلت من شفتي كل دين الصحاري" وبللتني

وچا غفت عينك جريبه
او وين ما تندار امشطك

وچا گلتلك
ع التعب لو جاس رمشك وشكثر يوجعني گلبك

ليش ما گلت الحمامك يوگف بشباچي فرحه

وتدري مرسالك فرحتي
ليش كلما تنشف جفوني تلم طيفك نوارس
يشرب عيوني وضحكتي

شضاملي وما سولفتلي..؟

ياسر الابراهيمي


بده بروحي الحنين ايهيد
واشتم الهوى بكيفي

وبعد مالي شغل بالچان
سولة راحته بطيفي

خسرت هواي من عمري
وضگت حلمي اعلى چف سجان

ورجعت امشي بطرگ روحي
وعمر گاضي وضحك دخان ..

وباجر لو تغيرنه
نضيع بكل صدى النسيان

ويصير الحلم عابر

باچر تنتهي السكته ونضل بجروحنه نكابر

باچر كلشي مايبقى
باچر كل كسرنه يهون .. بس الكسره بالخاطر

باچر نبچي للخاطر

غازي ثجيل
.
.

ياليل لمن تمر لفني بعباتك لفة امحبين
واحجيلي كل القصص وشكالو الحلوين

ياليل لفني السهر . اشبعد السهر يا ليل
مو حته كلبي خلص وانهار مني الحيل
عين الأحبهم غفت وآنه ويه ليلك ليل

يا ليل
أنا بكل كتر حسره وضياع وأوف
وعيوني ركهه السهر ونعدم بيهه الشوف
چم دوب الاوي الوكت وشراعي بيه يطوف
بلجي اعله حد الفجر نطوي الليالي ازلوف


ياليل طشني الدهر طشت خرز ما محسوب
أشعل جفوفي شمع واهجس اجفوفي تذوب
بس آني طشني الوكت .. لو طش جثيره
أكلوب ؟

ياليل رد النجم روحي العزيزه أتلوب
كل ساعه اهب من تهب ..نسمه بتوالي اليل .

*سيدوري : هي صاحبة الحانة التي مر بها گلگامش بحثا عن عشبة الخلود بعد موت صاحبه أنكيدو.


معتز سامي الحمداني
(حكمة سِـيدوري )

ما تلگه ...، ولا تلگه ...

ما تلگه الحياة ..
الجاي عنها اتدوّر بكل بحر ، وبكل گاع

وإذا تلگاها ما تلگه ...

ماتلگه عمر ...
بيه ملگه بس بغير موت وداع
بيه تحصد تظل هم ..، و تعب ..، و أوجاع

..........

إنت بموت (واحد) شبّت جروحك

من تمتد سنينك للأبد وتشوف ...
شجره وره شجره تنطفي ... ، وگمره وره گمره ..
ذيج الساعه ..
تضوي بيا عشب روحك؟

خساراتك تصير هواي ....،
ويفيض الحنين هواي
وشويّه جرف روحك !

ذيج الساعه ..
بيك شلون ....، و بروحك ؟