عزيز عسكر || اغــاني ||

انه بيا موت انه بيا موت
من من والعذاب الوان احسبه
وعبرتني الجيل
مايسوه التعده الماي
كاسين الچذب والكاس
دين اسود وانه بلا دين
وجه الدم يعبر الدم
وانته العبرتني بوجهك لدمي بوجه خايف
وانه بلا دين
وك بهداي اخذني من الحزن والليل
وك بهداي احبك يافجر ناسي
وعطش كاسي
وتعب مثل الله مايگضي
وك بهداي
انه چفوفك خذاهه الضي
تحدي الضي
وانه المات امن امس كادود بس من رد
تعداه التعب والفي
وك ياشيب غني غني شما حزن غني
گالولي الوطن عده وگلت ظني
هلبت والعمر كله اعله خصرك طاح
صورهه بركضتك والسكته مثل الطيف
عدت يانبي التفاح
رديت ولگيت اخر گلب مثلي يدلي الريح
ببنادم
حرامات وبعد والـ اخ يا ادم
المن ضيعتني وضيعت ناسك ولك يادم
هذا الخوف الموت وعذاب الناس
وك من يوجه ادم
هذا الشيب والحرمان وك منك
عليمن ضيعتني وضيعت ناسك ولك يادم
شاورني وگلت ياموت عبر الناس
وجوه الكناطر مثل كل الناس
يسحكهه الرمل والطين والسلطان
يسحكهه التعب وتموت وبعدهه تصلي للسلطان
امس وحدي وعله الحيطان
دم كل القصايد يركض من الخوف
امس كل انبياء الله اعله كاس تطوف
حذاء الحاكم يصلي وقبلته الناس
امس والغربه وجه ادم
شما يسكر نبي ينداس
وظل مكسور مدري شحرك ومد وكفته بعيني
واغاني تصيحلي ياموت دليني
اخ ومن ثگل بيه التعب للغيب
بثيابي مشه الشيطان والحرمان
سحكت اول مناره انذكر بيهه اسمك
سحگت الدين حدما وصل جدمي لشارب السلطان
وك ياليل فك بيبانك اعله الليل
طش كل الخمر فوك المناير خلهه تسكر حيل
ليش الناس مومثلي اش يخوفهه وتصليلك
بنات الليل والفقره وسكاره الليل كلهه انته
الماتت والتريد تموت كلهه انته
الشعر والكره والحب والدمع والخوف كلهه انته
وبعدهه تخاف منك ياصدگ ياخوف
يبايعني اعله هاي الناس بعتك وشتريت الكاس
كتبتك من جنت للناس من جنت من اموت تموت
من چنه اعله هم الناس نسكر واليموت نموت
وين انته يبايعني لگيتك بالچذب والخوف
ببيوت الحكومه الباگتك مني
لگيتك انته والدنيه صبح وبيوت
كتبتك واستحت روحي
ياحزن الدفاتر
ظلمه ظلمه بسكتتك مديت اصابيعي ومتت
ونهرين من دمك رسمني الجوع غربه
غنيتلك عمر السنابل والمناجل والثياب البيهه صوتك
وانته غربه
وجبتك من الظلمه سكتات السواجي
الماله وي الماي غنوه
او عفتك بدورات ليلي
شموع يشربهه الضلام بغير عنوه
والمضايف بيك تكبر
وانته شامات بخصر كل السمر
ورموش حلوه
ماكتبتك للصرايف
وانته عدهه مرورة الگهوه وبراد الماي ياصوت النثايه
وطير شلوه
اخ منك ضيعتني وضعت منك
حروفك وگاعك وناسك كلهه بچفوف المراجع
كلهه بچفوف السياسه وانته ماكو
الناس التحبك گبل هم باعتك من ما لگتك بالشوارع
وانته ماكو
ليل يشرب ليل ياوجه الصحاري وظن بعيد
شوف يتعده اعله شوف وعيد يتعده اعله عيد
انه من گتلك بعتني
اثنينه انبعنه بغلاتك للبعيد
اثنينه انبعنه بغلاتك للبعيد

عريان ال سيد خلف

ضيعتني ...
.
.ضيعتني بغيمتك ..
وآنه على حالي اهلال ديره
وانطفيت الخاطرك .. كت للنفس
.بلجت علينه ...اتجيبه غيره

وذوبتلك حتى اصابيع العرايس ..
وآنه هاجس ...
امشي واضحك للضحك .. وعيوني ..
بعيون اليضدونك تجابس
بس احسنهم يكولون ابكلبهم .. (( ضيعك ))
واسيتهم بيه .. وجرت منك دمعتي
وماشفتني ....وماكلتلك ....
ضيعتني ....!

ومدري ليش الليل مو ليلي ..
ولا دنياي دنيه ..
ولا على جفوفي انلظم خيط الثلج ..
والعين عميه ...

وكلت لا ينهظم راعي الروح ...
لو بينت وسط الروح ثنيه ...

و ضيعتني .....

من جنت غيبه .. وعطية الله
وعسى وياريت اشوفك ؟؟؟؟
جانوا ايدكون بابي اعليك .. واتعذر واكول الليل
هد حيله وغفه الغبشه الغبشه !!!
و العراريس ...
اعله غفوتهم .. يفل الليل طوله ..
وطولك العريس
يا بعد امهاتي
يا براد الماي .. من تنشف لهاتي
وما تعديت اعله حك روحي ..
وخذت منك وردتي
ولا توسلتك تفل منك شبكتي !!
بس لوّن..بيه ابكثر مابيك .. جا سالت دمعتي
وضيعتني ..!!!

يابو المقلم على التلوين ...
جف ابيض سماوي ...
يا فرع مسكون ... وكلوبه ضوي ..
ونفذاته تطلع عالكهاوي ...

آنه احس .. تتهدم اكتاري .. كتر يهدم كتر
واثبت ..وطول الشمس .. جواهه ابشبر ...
عن لا تكول الناس داوي ..!
ولك يالكلك بلاوي ..!

وخاطرك .. والخاطر المرسوم بجفوفي ..
وشم ..بطلت اخاوي !!

ومن كلت بذات عنك .. عاتبتني ..
وضيعتني

ابكثر ما شرعت صدري .. اتنفسك ليلي ونهاري
مره نكطع ... مرة جاري ..
وآنه يا طولة خلك روحي شكثر ..
صبر الصواري
جنت اشم جفي .. ابتفاطين الفجر .. من تنكطع
عالكاع وردة ...
وجان خيط الود .. كتر عندي .. وكتر عندك حبيبي
ومن ردت كربك ... لكيت الخيط سايب
ليش ..؟؟؟
يا تالي الحبايب ....
ليش ؟؟؟؟
ماكتلي اعله غفله .....

وضيعتني

من ميسان واحد مبدعيهاا

جواد زغير

"اشطبني" ....

اشطبني
أسم
فوگ الرمل مكتوب ما أتعبك
ضباب
أعله المري مصلوب ما أخسرك

أشطبني
بـ ضحك
بـ دموعك
بـ نسيان
من عمرك حزن حايل

أشطبني
بـ سحابه
بـ هندس
بـ دخان
من ليلك گمر ذابل

لا تحتار بـ أدموعي
الحزن ثوبي

ولا تنشد قبلتك وين
خليك لـ صلاتك وأنه لـ ذنوبي

ما مكسور خاطر حتى تبچيلي

ولا ضايع بـ دربك حتى توميلي

أنه مكتوبلي العثرات ما يحتاج تحچيلي

صـدگ نوبات أذم روحـي
وصدگ نوبات أمل نوحي

لچن شفت الحزن صاحب طويله أوياي و أعشگته
و شفت عمر النهر يركض تعب مو ماي
منها وفرزنت علتي مثل علته

عليمن چا امعطلني ؟
السفر واجب اذا كل السچچ غنت
و اذا رب المشابگ بارد بملگاي أكص اچفوفي اذا صلت

دتيهني
الدمع چذبه اذا ما عطل الرايح
دتيهني
ألك كل التعب و الـ مو تعب طايح

ما ألومك
و لا ازعل
المثلي بكلشي يقنع حتى بـ الله وياك

وأعذرني
أعله كل لهفـه
أعله كل رجفه
أعله كل مكتوب مني مطرز بـ أهواك

أشطبني
العشگ مو نخوه حتى انخاك

ولا گلبي ضريح أيمام
من تدعي يگلك هاك

أشطبني

المواسم تايهه بعمري
و خريفك عمره ما يگضي

أشطبني
وراي اهموم
لا حظك ولا حظي

شلك بيه ؟

الجريده
اليجزي موعدها وطنها أرفوف

ولك بابي رهم عـ الريح
مو ذاك اليتاني أچفوف

يـ ما تشبهني من احتار
ضم چفك
عتبتي بـ ندم مرشوشه

أنه حتى من أفك بابي
افكه لـ نسمه تستاهل
شلي بـ چفوف مغشوشه

يـ بايعني
أشنفع وجهك ؟
أنه أمناطر وجه بي ماي

أشنفع فيـّك ؟
أنه متعـوب
بس تعبي بدليلي وما أتلمه أفياي

انا المامش وراها جنازته صياح ...



محسن الخياط في ذمة الله

محسن الخياط .....


ملح روحي وشربهه الليل والمامش شرب طيفه
ومشيت وكلبي وصله هنا
وصله بحد سواليفه
العمر جربة نخل وبشوج واكف وبطرك ليفه
وتلمست العدو من السيف ...
جيه بيه انكسر سيفه
يريد ايضوكني الزنجار حسباله الذهب زيفه
وكفت انكر الاوي الماي لاوني مشاحيفه

الثلج مو عار بجويريد عار اليجرد بصيفه

انه امشي وتمشي الحجايه وترد بيه عتيجه
من الصبر شجره
وشفت روحي بصيص يريد
يتعب يوصف الكمره

نكلت الروح اسولفها
لكيت اسنين احد السيف وايامي اعله طارفها
اجيت اسكت ...تبديت
الشمس تزهد بالمرايه

وبعد ياهو اليضوي الها وبعد ياهو اليلم جفها
الجرح كبلك وصل ليها
وكبل ماتلتف يلفها

ويطشرهه والمهه من الضلام وهي نيليه
ويطشرهه والمهه من اللهيب وهي برديه

ي وانته اطباع ماتتبدل بروحي
مثل عشك السمج للماي وك روحي شوديلك
اوديلك ضوه مرايات لجروحي
اوديلك قصيده مسافره بروحي
يلمتاهت عطش بالليل وانشمرت بعيد
وجلبت وانكطعت بروحي

وتلكيته هذاك ال بالعمر مكتوب
وفراكك تلكيته

وكبل مااحجي حاجيته
وشفت غمك العشك بالروح مثل الماي
ياخذ كيش ساجيته....

(صوت من القبر )

شاكر السماوي

لا...
جنّازه لا...

لا بالكَبر تطفون شمعات العمر
خلّوا النعش حدر الشمس..للطير للريح التمر

بلچن يسح ثلج الدمه...
ويعود ب ارمادي الجمر
بلچن بله يدوس العظم... ويدور لظيمه صبر

بلچن هَوه ايصحي الضلع..واتعود موجات الصدر
وايعود گلبي ممتحن مابين مده والجزر
واشهگ واشگ ليل الچفن
واطوف روحي وي الفجر
واصرخ ابكل حيل الوتر....

واسمع صدى صوتي:
لا لا تخلوني ابكَبر....
ماريد أنا....ماريد أنا..ماريد أنا موتي ........

ابدا فلا واحد سمع.... اولا واحد الگلبه التاع
چني ولا منهم جنت،،
همو على دفني بساع

لا حسوا بنعشي اليون .. لا حسوا ابضحچ الگاع

كلمن نفض ايده ومشه ، مستعجل بغير وداع

ياعيد ميلاد الگبر،،ريتك فلا جيت بساع
طفيت بعيوني السمة ،
وطشيت فوگاها الگاع

ملاح جابه مركبك.. ملفوف بشراع الموت
ذبه على جرف الزمن
متخورس بحلگ الصوت

لاچن تمني بشفته..
لاذَل ولاهرشه التوى
روحي على هام النخل ..لوچنت بترابك نوى

محتامه ريتي اعله الهوه
وعيوني مشتهيه الضوه
والطيف بگليبي دوه
يشهگ گبل صوتي

لا لا تخلوني بگبر.. ماريد انا موتي...

غانــم هاشــم الفياض ـــــ

يتفاحــه

مــن ٲيمر قطـار الذاكره التعبان
اجمل ســالفه تمريـن بـأجناحه
ﭼـنت ذبلان
نبــته وعافها الحاصود
ومن گــد ماهويتﭻ خضرت واحــه

يتفاحــه
البعد بي ناب كلش حاد
وامضى من السيوف الحاده ارماحه

يتفاحـه
البعد يوميه ﭼـفه يبوگـ
من غصـن المحبه العالي تفاحه

لايرضـى الصبح ينزل يدگـ الباب
ولا ليلي الطـويل اتناوشه ولاحـه

يتفاحه
البــعد غير جمال البيـﭻ
لـو بعدﭺ جميـله او ورده فواحــه

وهـم بعدﭺ اصيـله وبعدﭺ اذكريـن
وجهـي الـﭼـان الـﭻ من كل كتـر سـاحه

وٲذكـرين ﭼـف الوادداﭺ اسنيـن
وبدفتــر اخطائـﭺ ﭼـان مساحــه...؟

( قصيدة من عالم الحيوان )

الشاعر عقيل العرد




خير من الله الغنم والراعي خاف
خاف لا ذيب اليغته وينّهب

ركب دراغه بمطي وتاه الحلال
ولمله خزله جلاب سواهن حزب

وراد من الذيب يخضع للجلاب
وهاي وصمة عار باجر تنكتب

هي فطرة، وماكو حر يهوى العبيد
و كفرة يتساوى الدنان وي الشلب

الذيب واضح ما يهز ذيله برغيف
اتعفف ودور الوفه انطاه للجلب

يموت جوع بعز،، ولا يشبع ذليل
و المواقف كلها باجر تنحسب

اگطع الخبزة شهر عن الجلاب
تشوفهن كلساع ماخذهن سرب

بينما ياكل لحم زنده ويموت
الذيب حر ودوم يفعل ما يحب

طبعه ثابت ينغلب يغلب شجاع
لو نصر لو موت ابد ما ينسحب

ربعه كثروا ذيب،،، قلوا هو ذيب
مو مثل ذاك ويه كل معشر يهب

والفرق بيناتهن كلش جبير
بالضبط فرق الصدك عن الجذب

ذاك يستذئب بجلمة من الجنوه
وهذا ذيب شما سمع ما ينجلب

#قصيدة_وشاب

محمد السفير - ديالى




أمس شفت الحزن ينجاس
لزم چفي واخذني إيدور بين الناس

عَرفني اعله ربعه بزحمة الخوف
من چان البرد ينباس

من چان الندى يجيس الشبابيچ
چنت ارسم طبل عالجام
واني ادري الفتگ بالدَف
چبير وما يخيطة احساس

وَصفاحَه صفت للنار
بس مجباس

أتاني ليا صبح حزني
صلاة اذنوب

أتوضى بدمع عيني
واسجد للفجر مصلوب

أصبر روحي مدري ابيش اصبرها
اسولف ياعذر حتى اگدر اقنعها

ياروحي
العذر چذاب للمنهوب
ياروحي الحلم منهوب
يافشلة العمر منهوب

طفل يلعب بطين الحر
لعب برسوم وجهي اسنين
وانه بلا لعب متعوب !؟

ياروحي شبعد تردين ...
وشفرقچ عن الميتين ...
بــنبي ومعصوم متقنعين ...
اااخ مكابرچ
وداني مدري ليويين ،

چم ليلة انگضت ماضايگ اني النوم
ادور ياغصن سالم
ماخلالي مأوى البوم

بخت ميت عشت عمري
لا يگدر يشگ اللحد حتى يكوم
ولا يگدر يصبر روحه من تحوم

بعد ما ظل الحچي وينگال
خل أسكت واظم النوح
ماينفع اعتاب السيف
اذا چان النحر مذبوح

بعد ميفيد كثر اللوم
مو باچر اموت اليوم

من القصائد غير المنشورة للشاعر الكبير

محسن الخياط

انا الماي التريده الروح
عمري والحلاة هواي
واتصبّر مثل صبر الطيورالراده المغرب
واگولن جاي
يلّي جيتك عشرين عيد بيوم
واصباحك ولا بلواي
انا وحشة طويلات النخل بالليل
وانت وياي

اطرز جيّتك كل بوسه بويايه
واردلك ناي
وبي گلبي طبع " كل سالفة بدگة
وغريب اغناي

انا عمري من الاول طيبه عالطيبين
طينه وذبته وهرشه

يا نجمة صبح يا نورة الغبشه
احبك گبل ما احبك
ومستاحش گبل مااعرف الوحشه...

سيد سعيد الشريفي ..

رادونه نذل و ما ننذل..
.
.
حنطة و عالگاع تطشرنه
و بطرور الساتر خضرنه
خضرنه من طرور الگاع
تفگه و طاحت بید اسباع

إحنه المانعرف نتختل
بالسنبل حشینه المنجل.....
------------
مو من عدنه الباع ترابچ..یا گاع
و اشحده الیوصل یم بابچ...یا گاع
و احنه بسرگیهن چیلات
و بصدور العدوان نبات

إحنه الما نعرف نتختل
بالسنبل حشینه المنجل
--------
نقسم بتراب الفیلیه
و نقسم بالشیله العربیه
نقسم بچفوف العباس
حره و گاعچ ما تنداس

إحنه الما نعرف نتختل
بالسنبل حشینه المنجل
--------
ردینه الزود و ما ردنه
و هدیناه الراد یهدنه
إحنه أولاد الرمل الحار
و إحنه ال من ظهر الثوار

إحنه الما نعرف نتختل
بالسنبل حشینه المنجل

سعد شميل ...

ليش تكترت؟.. كلي ..وكلت مجبر
اذا عجنت حديثه المحبس تكتر

ردتك سكف ثابت مو سكف تنور
من ابرد تجي وتعوفني من احتر

مثل چويت لضافر ماتهيج بساع
هيج بفزعتك وياي تتاخر

دنت عالخشب عينك من شفت تابوت
ومن كنالك اخذه نريد نجفي الشر

وانته بلارحم صعدتت بل منشار
وكصيت الخشب والميت توذر

شغلاتك من جنت وياي ومقدر
حمامة حضر محد يمد جفه عليك
لاشكلو جناحك لا الريش انجر

وكالولي اليطيحك تره المنك بيك
وكتلهم شلون وكالو اتصور

بضلوعه الكصار الچادر من ايطيح
واول مايهدمه ال بالعزه موزر

سواجي ثنينه بس هيه هم توفيق
طلع للدخن دربك وانه للعنبر

وشفتك منجل وكتلهم استفهام
بس كلولي عمي صويحبك زنجر

وتتكلب ترد لطاردك دينار
وتصطرك جفوفه شماتضل تفتر

مو كلمن يشد ضهرك اتحسبه حزام
الكاره انشد ضهرها وجيموها احذر

اليدنك بل حرب مو شرط جاسه الخوف
انا من دنكت بالروس جاي انحر

ومثل سوده الوجع ماشاله اخوي وياي
وشلته الوحدي ومن داخلي مكسر

وكلت اشعل شمعتي بكهف مابي ريح
من يطفيه غير الريح حته اخسر

بس انه الغشيم الماحسبت احساب
تطفيها الحيايه لمن تتحسر

وليش تكتر تنشدني ! عذري وياي
اذا عجنت حديثه المحبس تكتر..

عماد المطاريحي
.
.


من سمارك
رضعت الحنطه سمار

وغنج شرّبت الطيور ،
وفرح شرّبت الزغار

انتَ وحدك ترسم بروحي النهار
انتَ من تنزل ضحكتك يصعد بروحي
الخضار

انتَ من تسكت مناجل تحصد بروحي الخضار

ومن اشوفك حضني يدفه
وحده يدفه ،
مدري ليش

وروحي كلها تصير شفه !!

تذكر الغيم الصعد مره بسماي؟

ومطرت عيونك غوه ثلاثين ليله ..

واعتذرنه من السوالف
والنوافذ والضوه
والخناجر والقبيله
وفصلت جفني ستاير
وشيعت روحي بخور وقدمتلك گلبي – هيله –

وخضرت كلي عشب ..
من راسي حد راس الجديله ...

ومن تغيب
الورد يسأل والنجم والحلم ، وذراعي
ونبض گلبي الحنين ..

كلها تسأل – وين –
وين – وين !!
وين غايب .. ؟
واني جامد ... !!
ومن أشوفك

إگبالك اتخيل سرير وحضن دافي وليل بارد

ياملاذ ودنيه غابه

غابه مزروعه خناجر

أنتَ وحدك تسكن بروحي قصيده

أنتَ وحدك ممكن تسويني " شاعر "

وممكن تسويني – آنه-
وممكن تسويني- غير-
ممكن تسويني دمعه
وممكن تسويني شمعه
وممكن تسويني طير

أعطش
وشفتك كوثر ؟
أبرد
وطولك حرير ؟

وياك أحب حتى النهار يصير ليل

وياك أحب اقره الخرايط من جديد
وياك أحب الريح يعصف
حيل يعصف ..

حتى أسد شباجنه بحجة الريح
حتى أفك شباج ( رفضك ) وأستريح

وياك أحب إيامي كلها تصير عيد
حتى افلح شفتك بوسات..

واليمنعني – أگله اليوم عيد –

ـــ ياحياتي ـــ
لان أدري انتَ فراشه
قررت أبقى غصن
وانتَ يلكلك ترافه ...
آنه محتاجك حضن

وماإگلك آنه – أحبك ..
خاف يتغير طعمها ..

الشفه خاف تبوگ من عدها الترافه
ولذلك راح اضمها ...
...................

قصيدة " أمساكية التنور "


للكبير الفيلسوف مهند حمود السماوي ..




الطريق أرعن رمل والجو مرافس كَيض
وضعينه الليل بس حامي الضعينه خيال

وسراب المستلم راتب تقاعد بير
ونوه موصخ السمه وكانس الكَاع هلال

شهيق الغيم يشرب من زفير الكَاع
واكَف ما يحرك ساكن الزلزال

حاول ينتحر من صعد فوكَـ الماي
بس الما يحس بي يشك بي شلال

مريضه العافيه وخنصر غصن مذبوب
وضباب مرشح الله ومنتخب تمثال

الدخان اليزيدي يصول شو ويجول
وشكو عذيبي حسيني عليه منع تجوال

خبيث الليل سالب راحت الفانوس
وجشع باع الضوه المجاني بالمثقال

وضوء الهور جويه بكَصة المشحوف
وشراهة ناي تلهم لهم بالموال

النجم قرية جفن والشمس كَرصة شيب
ورماد حلوكََــ بيهه حجاية التنكَال

وأرق حاقد أناني ونوم ما محظوظ
وفجر مغثوث ماصالح للستعمال

ولا ناكَت جفن تندب بهودج نوم
ولا شارع حلم حافظ زقاق البال

ألطع ضحك عيني ضوكَ بجية نوح
وعشيرت حسره ميته بخيمة الدلال

الواقع عين وحده وعين شر مو خير
عوزه اشبر يصير الاعور الدجال

وحده من الثلاثه المجتمع لا غير
لو حيال لو حيال لو حيال

حكم شرعي النحر وشكال شرعي السيف
وعلى طوله الحكم شايخ بطوله شكال

الحَر تكفي الشاره الحر ألـــــ أش تكفي
وماكو ألسان أبلغ من لسان الحال

البحاجت العين هنانه يطرد عين
الوضع مو شي تره ومو خوش فال الفال

نعش تين السبي ومكَبرة فراشات
وعركَ كَصة صريفه ودمع جفن أدلال

وصابع بيهه في تسبيحة الزهراء
البديهه خيوط سبحه تحط بديهه حبال

وزينب بت وأخت وام القلم والسيف
الجيش امتحن بيهه وطلع بيهه أكمال

زمخة صاعقه وحس بي زئير شراع
وخوذة نيزك وترميمة استبسال

واقع حال.......

زينب بالسبي مثل الحلم بالماي
وب الماي الحلم مايكَعد مبلل

زينب ضهر سيف اليكرم من السوط
ورمح بجفوفه شايل ورد جوري عزل

كلشي تحملت ولذالك انته شوف
من تنذكر زينب صعبه تتحمل

المحمل صح غلط..بس هامة الحوراء
على سبعين محمل ماخذه المحمل

وموهيه أعتقد لو خطبة الزهراء
لو نهج البلاغه الواكف عله التل

بمسابقة السيوف مشاركه ومبروك
النحر حصل هنا ع المركز الاول

عفت ليل متوفية بصلاة اليل
ورغم ما الله قابل الله يتقبل

الحجاب اخته الجبيره عمامة العباس
روح بروح نفس الشرب والمئكل

وما تنذل ما تنذل ماتنــــــذل !!

الهبوب مسومر وجهه مصوفر الشباج
وبحه كََماط تدرب عله المقتل

العناكب عميه والحلقه الاخيره الغار
وضهر احمر وهندام الوحي مبهذل

حط ايده عله رجله الحاط ايدي عليه
ولزم سنبلي من ايده التوجعه المنجل

مسترخي النعي وشبعان ضيم العيد
ومنادس جديد وطيش مستعمل

ودمع بس مو دمع يمكن عراضة ماي
وخيمة بدو تباهل شجرة الصندل

ونفخة صور ..وعفه تفور

تكوم السمه وتوكع..بصدمة الجلمود
ويضوكَـ اذنه ويعضعض بصبعه البلور

حب نص عمر ماحصل جديد الماي
وتقويم السدر مابي سبت كافور

الخبز باطل صيامه ودفع ديه عليه
لان ماحافظ (امساكية التنور)

ونفس مشلول أكل نية عذيبي الريف
وغصن صحراوي شوهه سمعة العصفور

الخريف الاصلع تغطه بجلد حرباء
وصداع براسه كَد مايفتر الناعور

وبشاشة نبي مجلبه بياخت الضوضاء
و. ورد بس عنصرية عرد بالجمهور

عفاف الشمس دم سنونه عذر اليل
وهندس بالقصر بس بالخرابه النور

هلال العيد أجه وماهوه ابو وياه
وهلال الجيد اجه ويا ابو عاشور

مجرور النخل وبن النوه يجر بي
وفرق ملحوظ بين الجار والمجرور

هوه الكاروك كَاعد بي صبغ سرداب
ونسيم الجنه واكَف بي نشاز كَبور

السبي مابي جذع بس بي مخاظ بليس
وعله عثكَ الالم مريم الحسره دور

المستطرق هوه يسندس خباثه ريح
وبقه يبلعم جناح الــ أكو بريجه طيور

هنا كوثر عبايه وسلسبيل خيام
هنا حالوف خنصر بي سموم بهام
الزحمه تنام بس الحره زحمه تنام

علم وبراسه مستانس كسوف الشيب
وبيرغ من حجن فقه المكَرم كَام

ونده عله جتافه حط رتبت عمامة غيث
حجاب المذهب وبوشية الاسلام

الجبل صح راسه أصغر من حجم رجليه
ولكن راس مال الجبل بس بالهام

خيال دموعي حدب قلق ذري هنا
هواجس والصمت يعتبر حرب أعلام

بدرب كل عين تلهث تمشي صفنة بوم
وحرب شعواء بين الناي والدمام

أحس اليل مرقد من أدقق بي
لذالك من تطب ليه حافيه الاحلام

يوم النوكَـ يقره براسه عام الفيل
وعطس بصبع محمد محبس الايام

عله صابع رجله يمشي البي نحول بليس
ونشاط الطف يجي سيراا عله الاقلام

نعم للأنتفاظه ونعم للتطهير
وكنيسة جرح بيهه الملح راهب دير

جثث تتحرك البي روح مابي روح
وكَعد علكَمي الحنطه بحضن جربه شعير

وبزخ صلب النهر جم ثار حيه الكَيش
ويم كَبر الدم شكد وج بخور البير

مو الاولي النورس ريشه أحس بي شي
يجي مغمض جناحه وخلكَ ماله يطير

ولا ذمة منارة بركَبه الاذان
وعله مراية السكته يمشط التكبير

الهلال المنحرف شيبه بلحية الغيم
ومجالس ضخمه كلش بـ أية التطهير

حور العين تتباجه عله حور الدين
وخط الاستواء أصبح مشق تطبير

يتبع ..

المسافه من الخشم لريه درب الشام
الهوه استيراد بي والحسره بي تصدير

ومو هودج اثاره الهودج ال ع النوكَـ
هودج امبراطورية التحرير

وفًـي خيال زينب مثل شامه بليل
وطوخ من بلال وجون لونه يصير

ولأن زينب صدك حبل السبي بي طول
وألا لو جذب فـــ الجذب حبله كَصير

عقيل العرد


مو بكيفك
ترسم عيوني وتحطلها دمع

ومو بكيفك
تحرگ احلامي وشبابي
وتذبح بگلبي وطن ما ينسمع

ما يهز گلبي القمع

انه سباح الضوة شتحصدني افضحك

ينشلع جفك بسباحي واذكرك

صوتي شايل رفض هاي الدنيا كلها،
يشلعك وما ينشلع


ما تحب الكاع
ما ماكل خبز تنور طين


انه من افتح شليلي اكبالك ايطيح الدفو، وتراب حري .. وياسمين

وانت بس تفتح شليلك
اتطيح منه شكد شباب مذبحين

الفرق بيناتنا يعرفه ضميرك
(بلا تشابيه) الشمر عن الحسين

نضع بين ايديكم المثل الاعلى للقصائد التي تكتب للوطن

عريان سيد الشعر

(اوراق يومية)

جور
شما طفح غيضك على الناس
سليل الظيم الك
بالساس نداس
لَوَن تكبر حقد نكبر علامات
وجذب شمس الظهر بالباع تنجاس
تذل كثره الكصص حد لطخة الطين
وكصصنه بشدة التاريخ تنباس

فرق بين اليبيع اسمه وسجاياه
ومابين الوفي المادنك الراس
ومن بين الحزن والآه والويل
ومن ركبة طفل ماكاوت الميل
ومن بين العطش والجوع والنار
ومن بين
الثواجل والمجاتيل
ومن بين الصبر.... والطيف. والحيف
وما بين الجفوف المالهن حيل
لون ليل الغدر يكبر علامات
نشع نجمة صبح ونشتت الليل
مهو وحده الصدى الصادك مع الصوت
وابن ليلة غوه اليتهيب الموت

هلج ..ياكاع لاتخذف حناياج
يخون اسمه النجه بروحه وتعداج
ولون هبت عكس ريح التغاريب
وسحب السما احنه عيونهه سماج
ذرى ايامج كحل واسمج مواويل
ودمنا يهون الج لو غيرنا انطاج
وحك ليل الجرح والويل والحيل
العثره شما تصير يفوتهه السيل
وحك ملح الخبز والطيب واللون

يمر الموت بينا ومايمرون

والثوره حلم مازارنا بنوم
روت باول شهيد الطاح لليوم
وتضل رفة جفن كل عين مامون
وكلب كل اريحي المادنسه اسموم
اذا نوفي بالعهد ونطيح ثوار
يخضر دم شعبنا وغيرنا ايكوم
واحك اخر وصيه من اليطيحون
يمر الموت بينا ومايمرون

المنازل شرعت للنار ....والنار... تشب
هلبت تفرزن دار من دار
يلطخ صفحة الانجيل كانوص
ويوصخ صفحة القران غدار
ويساوم عل الشرف والناس جاسوس
ويبيع ويشتري مهزوز الافكار
المنازل شرعت للنار ...والنار

وتهون.....
شاطفح ميزانهه تهون

الوكت صهوة مهر وتجيب البطون

وعرفنه السلطوا سيف الوصايات
باسمنا شكد حجوا وشكد يجذبون
وعرفنا الريح من تكصي ويه الاشجار
يوهسها الكطع بالخاويه ودون
الشمس غايه وشرف لليعشك النور

ودرب كرص الشمس من كال مامون ..؟؟!

اوراق يومية (تكملة)

ل... عريان آل سيد خلف


عراريس

التفك زافوفنا واحنه عراريس
جمعنا كلوبنا
وشبت متاريس

زمر يغمز زمر وتورد الكاع
وبريج عيونا ينور فوانيس
توهسنا الصدك حد رفة العين
وعرفنا شلون تنباع النواميس
الطفل من يلعب بخرطوشة امهاد
ويحل وكت الوهف بالصايده يجيس

وعراريس
وزهت بينا الخنادق والممرات
وضوه بوجوهنا وجوه المحلات
يضكنا الموت مره ويكبر الصيت

ونضك الموت.... حد الموت مرات
مرتنا تنزرت ساتر مناجيب
وضفيرتهه بزمر جايوس تلتاث
وطفلنا تعذرت عنه الملاعيب
ولعب بالموزمه
وليل العذابات
وخواطرنا اعلكد ماتوسع الكاع
توج بكل شبر مغصوب رايات

ممات الذل عمر ...وسنين... واجيال

وممات العز تره شماطال لحضات

كاظم الرويعي

من ديوان البيارغ ١٩٦٩
.......


غريب آنه .. إو شواطي العطش ويّه الروح
نار إبنار ..
يالجرفك حلم ما وصلته اشفافي
إمن ادگ بيبانكم ليلة

واصحّي جرحي الغافي..
إشتگول الناس؟ اشيگول الجار؟
يالعشگك يوّج بالروح .. نار إبنار

دِمُر أبحجة إمضيع .. واراويك الصدگ وينه
دِمُر أبحجة إمسافر .. وأسولفلك ليالينه
دِمُر مرّه...
حرامات العمر يطفي..
ولا شوفك نهر واهلال
يالدنياك صبح إو هيل
انا دنياي شوگ إو ليل
دِمُر مرّه...
واراويك العمر لو ذبل بستانه
غريب آنه...
———————

عبد الكريم القصاب


گالولي تجي وحطت عصافير المحله
امتانيه الخطار
واغصان الشجر نفضن ورك حنه
وصواني ازغار
وعودان البخور اشتهن طعم النار

وحرگ روحه الشمع
من سمع بيك وذاب
وانه الخاطرك
رشيت ماي الورد عالعتبه
وغشيت برفيف الكلب شباجي 
كلت يمكن يجيك تراب

وبلهفه عطش تانيت
تانيتك تجي لكلبي
تجي لعيني
مثل جية حلم من غير دگة باب

وبلهفة عطش تانيت
واستعجل نبض گلبي عليك
او وكفت الساعه
ومدري شلون
غبت اويا الشمس
وتجرح اللبلاب...