عقيل العرد



أول مشاوير العمر


جانت عيونك

وآخر رسالة للهجر جانت عيونك

اول غُرب نرتاح بيها
وآخر مدينة نموت بيها

جانت عيونك

ياما حبايب سامرونه وماكو واهس للعشك

وياما كصايب خدرت وما مش اصابع للصدك

وياما كلتلك ضايع المفتاح بكَليبي بعذابك لا تدك

ياما تنيتك بالمواعيد
هلال اعله كَدي وضاملك عيد

والصايمات بلا عذر ..

جانت عيونك

وتاخذني للوادم نذر ... جانت عيونك

زعلان لو هاوي الزعل حيرنا طبعك
جبنا دمعنا ونعتذر لو تعب شمعك

والمطر من كل غيمه اجه ايطيح اعله دمعك

ثاري المطر ما وفه الاعذار

والغيم يم عيونك احتار



ثاري اول صيار المطر ...جانت عيونك
والتهدي للناس السهر ...

جانت عيونك

انشد بساتين الورد يا وردة منهن بيها خله وباكَتك

هاي الالوان الوان صارت جي
شفتها وشافتك

وهاي الانهار الحلوة ..
صارت حلوة..... لمن ضاكَتك

طعم الشموس ولون الازهار
يالحسنك اعله الدنيا خطار
وخطار غالي اعله الحلم ..

جانت عيونك

يطفح دمعها وتبتسم ..



جانت عيونك

ادهم عادل

وآني مليت أرد أعاتب ..
كافي يومية نتعارك عل المذاهب !..
كافي كلمن لام ربعة
وطالع الغبشة يحارب ..

أبنو فكرة
رسّموا صورة
خرّجوا طالب ..
ربّوا للطفلة گصايب ..
حطّوا ضحكة بوجه كل انسان شايب ..

فرّحوا جيل بعمرة ما يعرف سعادة
ولا تزيدون الوكت ضيم ومصايب ..
الدين ضحكة طفلة حلوة
وجنة الله انخلقت لكل طينة طيبة
الجنة مو بس للگرايب !!..

والله واضح
ما يهمه الناس تسجد

بس تهمه الناس لو عاشوا حبايب ..

رياض أبو شبع
من الشعراء الشعبيين الملتزمين ولد في الكوفة عام 1947... قصيدته.(صلاة الكاولي) من القصائد الانسانيه الكبيرة

أنا ابحالين ...
حال الناس تنعاني على البيه
اوحال البيه يشچيلي العمر...
من ضيع اسنينه ابلياليه
وصلاة الغبشة فاتتني
وگلب ظل ابنواعيه
وألف ليل اليمر والآه...
تنگال ابتواليه
وحزن جَر الربابه ابليل
تحچي البيها والبيه
وأون ... لا طارش من الراح
ولا موت بطواريه
ولا چلمة التحاچي الروح
عن ذاك العزيز وروحي عاريّه
ولا نيسان عالتعبان مر فيّه
وظل والنار بجروحي
وشمس مصلوبة فوگ الروح ظهريه
وربابه ...
أونوح وسوالف غجر مابيها حنية
وتنام الخيمة عالمامش..
ويوميه عرس عالمامش ابمامش
وانا آبنادم
وأحط عيوني بعيون...
اليجيني ابليل ، ضيف ونازع الفشلة
واگابح ... واليگابح ضيف خيمتنه
ويجينه وبالنواعي انبيع لمتنه
ويحط جدمه
على أنفاس الربابه ويخنگ الچلمة
ويصيح ويثگل السانه
ويگول ابعين المواكح
يهنياله
ويهنياله اليغني الليل كله وما يعرف النوح
ويهنياله.. اليغني وعيب شاف اجروح
وانا آبنادم...
ينام الصبر بجروحي
وتنام حچايتي ابروحي
وينشدوني ...
أبوك اشچان ؟؟
وگلهم والشفاف أتموت بالحيره
وگلهم چان
أبوي (الكاولي) ولا يگعد ابديرة
ابويه (الكاولي) ومايعرف الغيرة
وگلهم كاولي...
ولاچن... انا ابنادم..
ولي احچاية هوه ابدنياي
وليلية الربابه اتسولف ابلواي
وليلية الجرح ينشدني عن اهواي
ويغص العذر بشفافي
وتموت اعيوني عالسچه
وتبات احچايتي الباچر
وارد اردود ذاك انه
گلب حاير
وحزن متواعد الباچر
ربابه وتكسر الخاطر
وضواي بخيمتي مساهر
واصيح بدمعي يالوادم..
انا ابنادم !!
وألي وياكم گلب بالدنيه يتألم
والي وياكم گلب ما شاف غير الهم
ولي وياكم... حرام احلم ؟!..حرام احلم ؟!
وانا بنادم ؟؟؟

علي الشباني || الشمس و البيت ||

الشمس ودتني فيّ البيتكم ودتني فيّ
رحت بعيون الضهر داوي حزن و تراب ..
وبروحي يفيض الـميّ..
فيض يا روحي تعب وتراب ..
واتعنه المشه بعمري سهر..
واندك وي الباب ..
يمكن بالعمر ينفتح مره البــاب ..
واعلگلك شمس عالـباب...
واتعناك ..ادگ روحي على العتبه نذر..
ومخضر اتمناك...
اصيرن فيّ للمخضــر اصيــرن فيّ
واشبگه انه خضار و ميّ ..
اسيلن غــاد..افيّض كل سواجيك ..اسيلن غاد
ألملم كل عطش روحي واشتله ابابكم سدره ..
جبيره ..وبالعطش ثوب السواجي ازغـــار..
حزينه..وبالربيع اتخضر الها اعشـــوش ..
يالعمرك فرح مرشوش..
يالحزنك خبز يبجي الصبح عالــناس..
يالعشگك درب مسكون ..
ونْ من الزغر بـ الراس ..
واقرالك دفاتر ضيـم ..
ويضل بس حرف بـ الراس ما ينگال ..
يالعشگك هِني و ﭼــتال ..
اضوگ الروح من تــجزي ..
يلفني الدرب واتدوهن ..
واگول اشماله گلبي الما يشوفك حن..
والك گلبي حمامه هناك ..
من تمشي يطگ جنحه و يطير هناك..
يالمامش بعد سجه گضيت وياك ..
بس هوَ العمر ما ينگضي بلياك ..
لا هوَ الشمس وتغيب ..
اول ما يشوف العين وبروحي يفرفح ضيّ..
يمر بيه الگمــر و الميّ..
واجيب الشمس و اوگفلك يـ الاسمر فيّ

عريان آل سيد خلف. (وادعيني )

وادعــيني اوداع المحـــبين مـــــا ضايج حــلاته

انه مثل الطير لـــــو طاحـــن طوارف ســـــبكاته

لو مثل ضامي بظهاري الصيف من تنشف لهاته

عايش بنارين اهــن نار الجـــفه ونـــار الشماته

انتي تدرين الوكــــت يردف علي بمكســــراته

حــطني دوارة كَطب للظيم و افـــترت رحـــاته

لا نهاري يريحــــني ولا ليلي مثل الـناس اباته

وادعيني وداع مضنوكـَ النفس ودموع عينه امونساته

وادعيني وداع الامايه الولدها ابين اديها اموزراته
لاتبرد شوگها ولاتگدر تهده لغلاته

وذاك كلبي الطيب ذاته
وآنه ذاك آنه اليعيش بطيف لو طول بعاده
يل بسمتج فرحتي
او رقة جفن عينچ سعاده
ويا نظر ..لنواظري اوياهن وكتهن لو تراده
يل تبوگ عيونچ من الليل كل لذة سواده
يل حنيني لشوفتچ حن السكن غربه لبلاده
يل تكولين الونين ايچيد
ون الروح عاده
هذا چانون الكلب يسري اللهب حتى برماده
وادعيني ابسّمتج ..اهوه الوداع
البي جلاده

عقيل العرد...


نزلوني مو موتي بعد !!

بيه اعتراض وثرثرة

نزلوني تابوتي استحى

كدما غبش للمكبرة

ما مات شعبي المستقل

ما مات صوتي المايذل

هذا انه ما ميت عدل !!

افرش الكاع من الدما

وارسم خريطة اعله السما

وشرياني اسويه كنطرة

خلني انتحاري المرحلة

البس حزام من الورد

وسلاحي كصبة ومحبرة

ياشعبي كافي تنهضم ؛

اخذ استراحة من اللطم

وازحف على اسوار الظلم

شيل الدنگ والسيطرة

واصرخ بصوتك ( لا تخف )

(يا عملاء المملكة وولاية اهل المصلحة )

الشعب باقي للشعب

واحزابكم والقندرة

( عذرا للقندرة )
....................

فواز الهلالي...

يبو غيمة الزركه شبيك..

انه ابنك..وابن أدم..

جم شلال صبيت الحزن فوكاي..

موش انت التميز وادم او وادم..

يرب الخير ..

خيرك ليش يعبرني..

يرب الروح ..

كون العافيه ابمنه..

اخذها ولا تعذبني..

يربي استغفرك بس الوكت هزني..

ازر ابروحي جم ركعه..

ويهد اليل وي نومي ويشككني..
هذا انه وطن ..

بس هجرته الوادم..

هذا انه فرح..

بس ما دره بيا ديره يتبده..

بهت لوني مثل نجمه..

خذاها الصبح وتعده..

وره شباجي ليش تموت كل ورده..

وليش تظلم الدنيه وتشح الريح..

كل ما افتح البرده..

المغرب لا هلا المغرب..

يجي شايل شليل دموع..

وحزني يكودني لحضنه..

وكسر بيه السنين ضلوع..

تمنيت الله خالكني غصن شجره..

عله متوني يحط الطير....

(...طيفك شيخ يتگهوه بدمع عيني )


الشاعر قاسم الشريفي




امر   المن  وتراب  البوب  يكسر  واهس  ضنوني

اتعنه وارد مطلوب مية ثار عيني مجلبه بمتوني

يل عفتوني مو ناطور لل گيعان خاطر هيج تنسوني

انه فرض  الفجر مريود  واجب  من  تصلوني

واجب من يضل ليلية طيفك شيخ ويتگهوه بدمع عيني 

يهنيالك ولا يعنيلك الساعي

تنام من العصر عينك عجوز الريف ولا غنيت لوجاعي

ساهرلك سهر مسجون وتاعبلك تعب ماصول زرف  ضهري   الراعي 

كاتلني الضمه وبزل بگاعك ماي  وتعيرني بملحها وتطعن بگاعي

يل معودني افسرك من وره الحيطان  ليش متيه اطباعي 

ليش ابجيلك من اتغيب ونته تغني بوداعي

ولك فكني اريد ارجع وجه بسمار داير ضهره لل
صوره

اريد  ارجع نهر يتسابگ ويل غيم ولا يهتم  لناعوره

لجن  مگدر  هذا انته  مرض  سكر  مشيت بروحي وبجلدي 

عفت بيه جرح نيشان  تشهدله  ولد  ولدي

يل عندك بغيري هواي غيرك كلشي ما عدي

الكبير كاظم أسماعيل الكاطع
يصف دول الجوار بقصيدته (الغابه)



كلشي ولا تجنون اسلاح
گالوا لتصنعون اسلاح
واحنه بغابه وداير مادايرنه اذيابه
وهتك اعراض وسفك ارواح
وكل جار ايراوينه انيابه
وكل جار ايسمن بـ ﭼـلابه
ويحد خنجر ذبــاح ..
بوسط الغابة (الشرك) امكهرب
والغار امسگف برماح
وطيور بگاع المحترگه
ويا ويله الما عنده اجناح
مناه ظلمة ومناه ظلمة
وبس عدنه اينور مصباح
كلمن بيده احجار وهدو نص الليل
ويا ليل اشگد بيك اشباح؟
واليگصد بغداد بغاره بأسطنبول يرد يرتاح
وبسوريه الثعلب ماكر
ماكر جداً ثعلب هجاء ومداح
ماكر جداً مو حواء الغشت آدم
هو القدمله التفاح ..
وذاك اللي گاعد يتفرج
هذا اتصوب ذاك الطاح
ومن روجات البحر الاحمر
شفنه الدم وشفنه الكاتل
ومعگل جان التمساح
ويا بستان الما جر حسره؟
ويا عود الما ون اوناح ..
هضبه نجد وربع الخالي
خلوا گاع الله الخضره هيمه ومبزل للأملاح
گطره وطاحت شيرد ماي الگصه الطاح
واشلون ابنادم يرتاح
منهو يعيش بهاي الدنيا
ومامش جوه الراس اسلاح؟
شافوا بغداد ابعزتهه
يومية الناس اتزف عاشگ ..
وحزن الحلوه يصير افراح
وما فادتهم هاي الفكره
ورادوه يطيح وما طاح
ما يعجبهم يكبر سنبل
ويصير ابطول الفلاح
شافوا شمس الديره اتعلي اتعلي اتعلي
وبحجارتهم ما تنلاح
گالوا لا تجنون اسلاح
واحنه بغابه وداير ما دايرنه اذيابه
وهتك اعراض وسفك ارواح ..

عدنان شايع




حتى لو بطراف اصابيعك تكظني وانچفي

الينچفي يگلوله فدوه

الفدوه من حلگك يبعد احلوگ اهلنا هواي تسوه

لولي برموشك على رموشي نُعاس

بروحي غفوه.

فراشنا النسمه .العليله

الگمره.. .غطوه

عيشني ....امن اول (دللّو)خدرتني

وإبدي سافر

خطوه ,خطوه .

طشر بروحي السعادة بكاس وصلك

بي غنوه ...

بي اه

وبي اخ

وبي مدري ...!!

منين ماكظيتني ...

تلگاني شكوى .

عيشني .

وفزز احلامي النامت امتانات .صحوه ؟

عيشني (الجلمود).اكل لوني بضراوة.

وروحي خضره ..

وعيني .رخوه

( خيال الطف )

كريم البغدادي




شمس ضلمه

ونهاية صوت

ونداء من السماء

ياهو العزيز يموت

واختار الحسين الورد والريحان

گلهم روحوا للجنة

والقاسم اذا موجود

هسه نكمل الحنه

ومشوا نجمة بگفة النجمة

كل خطوة بأثرهم خضرت نعمه

وشفت ريشة وگلت عباس راسك حار

نزل ريشتك لا توصللهه النار

وشفت هلال نص الليل بس يفتر

رحت وتقربت منه وطلع يشبه علي الاكبر

سألته شبيك گال حسين

گتله الماي گال حسين

گتله الجنة گال حسين

كل احنه فده لحسين

احنه هوااي عد الله

ياهوا الگالكم سبعين

ورجعت امشي وشفت شمعه وعليها گماط

يعبدالله الخلق روحك عليها شحاط

شو تلمع

انت اول طفل لحسين يتبرع

نزلتلك سمه وشالتك من الگاع

طف متروس كله سباع

واجت زينب وصاحت خويه ابو السجاد

هاي الدنيا موش النه

بعد فترة ويصير فراگ خويه حسين حاللنه

عقيل العرد......


من طحت بجفوفك ابجي
جانت جفوفك منارة
وجان بعيوني صنم

ومن جبت عمري اعله جفي
جانت عيونك متاهة
وضحكتك سجة وهم

اتوكلت عالحب كبل لا امشي بيك
وما شفت خدك جوازي ... الا من شفته بحزن شفتي انختم

من طحت بجفوفك ابجي
جانت الدنيا زغيرة
وشفت بين خطوط اصابيعك وطن

وكتلك احضني لحد ماموت بيك

الماي من تكبر احضانه يتيه دروبه البلم

كبرن حياطينك بروحي وبجيتك
ونزلت كل صورة بيضة وكل حلم واغنية حلوة
وعلكت بمجانهن صورة ندم

لهفتي اضحية برودك
يالخذت ضحكات زغري
لضحكتك تجراة دم
..........

علي نغيمش


تفاح وشايل تفاح
وهذا گليبي ولا يرتاح
اله ايحوشه وينسى الراح
اله يبحوش كل شي بي
واله يشم الماحاچي

فنان بأحلى الألوان
يعرف اطوار الرمان
يعرف فاكهة البستان
تجمع كل شي
بس مايعرف عنده شضام
ياريت يطلع ماضام
ياريت انشوف الاحلام

وياريت ادرفع ياريت

صح الشايلهن نعرفهن
بس الشابگهن مامنهن
شيعثره وحظنه ايكشفهن

هلبت يعثر
هلبت يعثر

شيعثره ونحتضنه اسم الله
شيعثره ونشوف الصله

صلى النده على صدره وسلم
صلى الخمر عليه وسلهم
صلى الشام عليه ونسم

مطر الخجل عليه وقام
قشعر جسمه مثل الجام
وگفت كل مسامته سلام

اسأل مايحدث في المعبد
اسأل كيف يكون المشهد

انه تخيلته وحريت
انه تخيلته وهميت

مابين النهدين قصيدة
مابيني وبينه قصيدة
مابين الأحلام قصيدة

وانه اعشق كل قصيدة
لچن مامتأكد كلش
شنهو اتريد
وهل هي
عنيدة
مفيدة
مااعرف بس حلوة الصيدة
من تطلع من الألهام
تفاح وشايل تفاح
وانه وگلبي اعليه اولام

رسل الركابي


گبل لادگات جفك تغفه عالبيبان تنفك !
وگبل لا عاشور وجهك يعثر بمحراب عيني
أحمل برايات طفك !

دير بالك ..
لاتطيح من العيون ولو طحت لَظن تلمحك
ولو دنت نفسه اعلى بير ،
يوگع الناعور من عين الگناطر
وخوفي لا تدنى اعلى غيري وما يفضحك...

لاترخص بالهواك !!!!!
التمرة مو كل يوم يتلگاها سعفك

باچر امن يموت حبك مايرد يحيى ونحبك
لاتوازينه اعلى غيرك باجر ايسد باب هجرك
باجر انبات اعلى جيده وحاشه لو نبجي اعلى نحرك

انا وانت وباجر الثالث قطار
نواعده بكل مشتهانه
ولانحن مره أعلى دربك ..

لاتطول
عالشبابيبج التگصلك بالتذاكر باجر الرحلة تعبرك
لاتوازينة نعبرك ...
الهودج من ايشم رحيل ونوگ يمشي
واحنه چم دوب الننطرك ؟؟

لاتوازينة نعبرك

كريم الجسار ...

بعد شالحگ جزه النيسان

والما لحگ ما يلحگ

ولا بيدي رسن دنياي

والوي عنانهه وتسحگ

يقنديل الليالي السود

نمنه وبعدڪ امعلگ

يدرويش القوافي الجام

من جان الوكت زيبگ

الڪ بي هوه العزاب

لا غرب ولا شرگ

المه وروحي ثوب عروس

ما گتلي هوه العزاب للمفرگ

شمعه شتاخذ من الليل

خلصت وابو طبيله

اتعطل وما دگ

وانا يا خوي مو ايوب

والتحت الثگال شما صبر يزهگ

اخذلڪ چلمه صوغه .. الشمعه تگظي بساع

مو بس الهدوم الناس هم تعتگ

وخلينه انعم الله رطوبه السباح

لا ريعان ظل ولا نباع ازرگ

بعد شالحگ؟

زمانڪ مو زمان الچان

ماهو الواعد وصدگ

اظملڪ حفنه مني وضوگ

واصفن بي من تشهگ

تلگاني هذاڪ انه

فرق بس الجروح اغمگ

ادور بطارف الدولاب

مدري شظامه التطلگ

بعد شالحگ!! وكت ما عاف ذاڪ الحيل

هسه ايعوفني امعوگ

لو يعرگ وجه دنياي

للعنده وجه يعرگ

تسطر واليطيح ايطيح

وشراع الورق ينشگ

دنيه الصاح منهه الحيد

مو ندمه الرجيچ يصيح من ينطگ

بعد شالحگ!! يليل البارحه اندليتني بيا صوب

لو ما ظال لون البابنه المغلگ

لاگيني عصاري بسوگنه المسگوف

وبريحه عبي الحلوات خل نغرگ

وي زف الفخاتي على الشواطي غروب

ومواعد عشگ وعيون تتعانگ

وخل برد القوافي اينزز النيشان

واعذر غيضته ويكفيڪ ما دنگ

قصيدة -( انته وينك )- احمد رسن


استوطن ابروحي الحزن لمن مشيت
وچوچه بلدلال جرحك
وانه مامش حيل بيه شگد بچيت
يا حنين الله اليزتك سير اعليه و تعال
الليل كله بهم اناطر
بيك شاده يلمدهور بيه بال
وليش تبعد ترى الگمگم هيبتهة ابنص الدلال
شح صبرهة الروح چا يمته تمر
المصايب بيه چلت
ولوكت ناعور مرني شلون ما رايد يفر
الريل لو عاف المحطه يگضي صبره اعله الدرب
وما تهون الفرگه عنده والوكت كلش صعب
وانه چوچيت اعله دربك يمته تچهب يلمحب
چا سير عيني ذبلت ميت بشفتي الدعاء
انه يم ربك دعيتك
وانته مو الله ونخيتك بلصلاء
اي وحك الما گلتهن ميت و عايش عليك
الخشبه ماتت عيسى ردلهة الحياء
وانه راگد و انتظر
يوم يوم احسب وتاني گلي شيفيد الصبر
انته نورس من تسافر يعگد لسانه النهر
وانه مثل الليل صاير
شما يضوي النجم بيه ابقه عايز للگمر
وحتى اعذرك
يلقرنفل شوف منهو بگدي حبك
عيني تانت يمته ما يچهبهة طيفك
خاف ربك
انته عايفلك محب طشر اسنينه اعله دربك
انته وينك
جرحي اترف من فراشه التعتنيك وما تجيبك
روحي طفله وجاني عيد وما عرفت شلون اهني
وانه بلبل والحزن خلاني اغني
شگد تعنيت اعله بابك
وعين غربه تصد اليه بين چاي بين فات
ودليل الشيب اخذني وبلدرب صاير ابات
وخاف تنشدني اعله باجر
زين منك كلشي مابيه بغيابك
هنه بس عيوني عميه و گلبي مات

الكبير الراحل ابا خلدون ..
عريان السيد خلف



أشتاكلي
المشتاك يطفى بماي عينه
ويشتعل بجروح ايديه
ويضحك بوجه الظنون بغير كلبه
ويبتشر والبيه بيه
الماي يخطف عالجروف وداع صدفه
ويعتذل هرش اليبس ما يعتلي
أشتــاكلي اليعثر بظله يموت صاحي
وال يعيش بلايه وعيه بغير ظل
الشوج من ينبت بسجه يبات وابن ادم يزل
أشتاكلي جروحي غلاتي
وعيبي صبري:::ودفلتي السكته ووحشتي بلا يا هم
وحجتي الفشله التطشني تراب ما يسواش لم
وهمي دنيا انبعت بيهه بغيرك انته
وشنو معناة الجرح من غير دم
وك أشتـاكلي أتخضر أضنوني بكاع صبخه
ويشبج ارموشه على طرواك الجفن
وتشرك أشموسه بحظن ليلك نهار
ويحظن الغايب هوى الحاضر حضن
وتطفح البسمه على بال المبتلين
الماي يضحك من تشك صدره السفن
أتعذرت يا بخت ليل المسعدين
ويا مرارة ليلنه بطرف اللسن
الكاع سلها جنازه الميت تكوم
ويندفن جنازها وما تندفن
وأبرى بيــــــــــــــــــــــــــــــــدك
وأغسل ذنوبي واواكح مستحاي
واكطع بروح العطش ومرورة الحلوين ماي
يضيع جروحي غواها
و يعتلك شوكي جرح وانته دواي
وما مـش الما مش بعيني جزيره ونيه وحشه
وفكر ما صافي على راي
يداهر عيوني حلمهه بليله ظلمه
وكبل ما يغفى الجفن يطفى ضواي
وبيــــــــــــــــدك انا
تاخذ عيوني وتعبرهه مدى لدنياك شوف
وتلهث بدمي عرج نخوه وساعات خوف
وتحتيي بروحي
وكاحه ونفس دافي ودفكة مروه وعتابه وليل اوف
وانا بيـدك لو شجتلي الكيظ عينك
ما تلم فيض الجفوف رباة كــــــاع
ربات كَاع وما شبج ليل الولايه رموش عيني
ولا طفى صبيها ضواها وهيه التشوف
بيه حس الساجيه ولون الشموس
وبيه طعم السنبله وطيب الزلوف
أطوف دنياك بدمعها وما رضت
روحي بزعل موحي انا اطوف