عزيز عسكر ...


سكارى نصلي ونغني...

نحب ونموت ونخضر وطن للناس ونغني..

بصابعنه النجم سجه وعمر مكتوب لعيون الحبيبة الغافيه بظنك كبل ظني...

كضيناهن سهر ودموع كل موعد يجي يجيب العمر والخوف
يجي بجف الرمل بسكوت..
سكته برمشك ورمشي الظلام يطوف...

كضيناهن كراجات وسفر وهموم
حماميل وحزن وجفوف...

وين انت وهذاك انا نهر فوك منصابعيك خسارة يصيح..

وينك خايف بروحي النهار يطيح..

فوك اول منارة التفلفت بسمك يوجه ابليس

فوك الماي كبلك وانت مثلي تصيح...

حماميل الوطن فقره..
حته ثيابنه تغني الشعر فطره..

يوجه ابليس هذا انا شعر شعبي أحب شعبي

احب ناسي بس اكره غنه المحراب

كلهه احزاب

وحنه ثنينه من تراب...

نسكر والعمر مكتوب فوك الباب...

حماميل وعمرنه الراح مثل الجاي....

ترجية بوجه حلوه انطفت بالماي..

سكارى ويدري بينه الله نحب الدنيا وطفال الصبح والعيد

الفرح بعيونه من العيد..

(كلشي موسم ...حتى حب الناس موسم)

||عريان ال سيد خلف||

المواسم ....


حته طبع الطير موسم
والنبت موسم
والايام التجي وتروح موسم
والمواسم من تمر عالناس
موسم ينتهي ...
وموسم جديد يبات
والحب،، والكره ،، والصلح ،، والزعلات
وانسام العصاري بطيب الحديثات
بس انت حبيبي
وماكلت بذات

يامفتاح روحي
والسوالف بيك تحله
والهوه يمرني ويرطبني هبوبك
ياندى الغبشه
ياخطار عيني ها كثر مغتاض ..!
من رمش لرمش زعلان تتمشه
وانه احبيبك

عمر زخني حنانك مثل الحميمه
خذت طبعه
وحنينه .. وطيبته ..
وفرني زماني ....وكبرت الوحشه
ياطير المحبه
هم سمعت بطير ؟!
ماشده الحنين لديرته وعشه ؟.

الشاعر ازهر كريم


شمدريني
تلگيت الهوه بگلبي وطحت عاشگ

وذبل عودي بربيعه
وبردت الدنيا
وبعد مالي عرف باحضان المشابگ

وبعد ماحب
لان حبيتك وضليت
واني ودمعتي بالليل نترافگ

واني وحزن الولاية
تواعدنه
وتسامرنه
بفرد شهگة
ردنه نلم بگايانه
ونضحك بس طواريك تباعدنه

شگول عليك
وانت بكل مسافاتي
حزن شمعة

انت تريدني انذل ع لاهيتي
واطيح لنزوتك دمعة

واني العيب الي يغطي
المضايف كله ماخذني

شگول عليك
يل وازيتني بصدك
عساك بليل مايطفه

وعساك بناس جذابة وتضل وحدك

وعساك تصير هم عاشگ
غريب ولامحطة تعرف عنوانك

يلجم گلبك المدري
وتشيل النايم بصدري

ودموعك تجري ع المامش
وتضيع وكلشي بيك يموت
وتظل لجفوف ياهو الجان تستاحش..

قصيده رائعة ... تحمل معنى الشعر الحقيقي

||سيد سعيد الشريفي ||


شماخذه الايام منك

انته...
بــس مو انته يمك

وعمرك الگاضي عمر
ماكله اسنينك الساعه وما وعيت
ضاعن الايام والمجيوب عمرك
وانته لاهي وما دريت

الدمعة اذا طاحت عمر
اللحظة اذا فاتت عمر
متاني وادم ماتعرفك هذا لـ متانه عمر

گلب بـ اوراق عمرك
ناس راحــوا
ناس اجــوا
ناس رايدهم يظلون ومشوا

اكو ناس تعوفهم ترتاح منهم
ناس ظلتهم حمل
واكو ناس طيوفهم
تگعد بـ راسك مثل خرخاشة بحجل

دربك اتعداك وانت
انت مشتول بدرب وادم نسوك
سلعة عازتها انتهت

العمر طاسة ماي وبرملة انچفت

الدنيا ردتلك احلامك صم رماد

وباگها الريح من اديك
ديرتك فرشت جنحها الناس غربه
وانته منها وما كسر فيها عليك

شگد جبيرة مرايتك
من ما تعرفك

شگد جبيرة بـ ديرتك
ماتلگه حايط ينتچي تعبك عليه

الشاعر ينقد المجتمع ب لغة خطاب آدم

(عباس الغالبي )


شمرن بيك ..يا ادم ؟

حشمه وما تعرف اهدوم ..؟
لو خبزه بحلگ محروم..؟
لو خرت سگف بالليل يرگص بوم..؟

شمرن بيك ..يا آدم
أمرن بيك
هل هلال ...هل هلال
والصايم كله الصايم

أمرن بيك حوى وبلكي نتوالم
مثل خطبة ثلث ﭼـلمات
صارت عيشة الحاكم ..

اجيت... وهالشفتهه ....
وهالخذيت
امراد
واحنه بعيشة امساوم

ايا عثرة الشجره برغبة العالم

لوّنه ابليس جاهل ما مشاله شراع ..
ولا غرك بشجره
وطحنه احنه بگاع
جا هسه ابمـﭼـان انشوف بيه وادم

مو وادمنه هاي التحـﭼـي مدري المن
يتراجف وعيها ابين ضحكه و سم

ي آدم ..شاخت الحسرة ..
انه من احجي بلسان الغير
تره الساني بكبر گدره ..

و على الفطره ..

صبحنه وليل ما ينراد
عشگنه وحرگه الها ازناد

اسمي واسم الولايات ..
جذبنه بمشية وبگعده

وضحكنه الكلشي ما يسوه

على الفطره ..

يا آدم طگ المعاتب ..!!
دنزلنه لمجان نشوف بيه خضره
دنزلنه لمجان يحلل الخمره ..

المن نزلتنه الـ دنيا بيها الماي يتمنن على الشجره

ولا تبره ..

السوالف بس عتب فقره..
هلبت من يشوفك يلمح بكفره ..
هلبت يندل القبله..
هلبت ما يشيل السيف
عنتر لو حضن عبله ..

ي آدم ....غاد هم ذله..؟!
هم الصيت للمله ..

هم عين الفقير امكتره ابلا لون
وعين ابن المدلل تضحك وشهله ..

يا ادم والعتب مو زين ..
ولا يمك عتب لن ما رضينه عليك
و رضينه اعلى الضمه العمرين
يا ادم انت موش حسين ....

شاعر يخاطب الله

إيهاب عيال الضالمي


( تسبيحة العنبر ) :

يالتسمعني !
تگدر ، بس تريد ازهگ
من يمتى الغصن ينباگ والسِبّاح يتحاسب ؟
و لـ يمتى ! تره الـ "ما اريد اخسره" اتعيِّنَت ديباجة امعاتَب

السهر نيشان ..
اذا بالجنة محد يغفى بيش نفرزن العاشگ ؟
و مو صعبة ،
الكتاب الفاهي يگطع رزق العمامة
رحت عبرية للجنة ، و آدم وصَّخ الجامة

يرب الدم و المسايس !
چنت من امشي بـ ظنوني ، حسبالي الغنى عثرة
حسبالي الـ "اسم الله" اعلى السكارى ..
تنحسب كفرة !
و سمعت الدَم : ابلا غـِيـبة !
الهوه شعليه ؟ المغرب ريّتك گلبك
اخوط مگاود الحنضل ..
و افز و اتمضمض بجيبـي
ما كاتب جديد و يصعد الدخان ،
و رِگدت چم قصيدة بجيب العذيبي
ابلا مـِنـّة !
عميت عيوني چي شوفي يطب گبلي

يرب الـ "ما اجو" چا يمتى احاچيهم ؟
اهز بالصورة .. طلعيهم !
الحظ المو رمح يگعد
و ما ضايگها !
ذِلّة ، تبوس چف الساعة حتى ترزقك بموعد

يالتسمعني محد يرضى يسمعني ،
احس همّي لحن مبيوگ
انه ادوارة دِوه عن المرض بالدَم ادور عليك

خايف ع الذنب منك
شكبر گلبك ! نِشد غربة
و انا ادري الحِنين ايدردم بگلبه
و انا ادري !
الفطن من النخل يحسب ..
بقى من عمره چم كِربة
الما يمشي بفريضة ناي ، لا ياخذ حِشَم گصبة

التعب يتنَسه بعيوني و توزني الصبخة اشگگ كل مطر بايت
يرب الـ "عافني" بهونك
انه ردت الـ "احبك" منه لا صغراً بالـ "شلونك"
يا خطوة الـ تكِف الناس من دربي ؟
الينام بگلبي ما يرتاح ، چرباية سجن گلبي
بين الحسبة و الخطوة ..
انه مثل الفضيحة بسرعة جاي اكبر
و ظلّت للحَمض تسبيحة العنبر
و ظلّت لافتة ابلا فيّ :
"الخِضر مو خِيرة و يحاسب هِلب كافر"

شكبر حزنك !
من اگلهم : "والله" و يگلولي :
"لا چذاب احلف بالتحبه" و احلف بغيرك

بين الـ "لا" و التحرمص صرت حاجوز
مستغرب بچي الفرحة ! و مضيع العرِف دمعي
الغريب يصير اعز الناس من يدعي
اشيدنيني ؟ سحگِت الخوف ،
مثل اليسحگ اعلى فلوس .. خاطِر يجزه راعيهن
انه الما ينغلب ، رديت خايف ع المكان ايضيگ
و گلت : خلّوني اكتب عن البگلبي ..
القصيدة العاهِر الـ ترتاح للتصفيگّ
و مو گدي ..
الشمس ما تستلذ من يختل التعبان بالطَرفَة
الشمس غربيل المتانين
و خفّة دم الچعوب التوصلك من يضوج الطين

و فزيت ! اعلى صوت من الرمح متبدي :
- "لموّا الكروة جامة آدم عليه"
و متت "موت الله" ما غثيت فصلية
يرب الـ "ماكو" ..
من شفت الخِضر خِيرة ،
لگيت مخازر الخايف يسومر ظِل اليچهبك
و مشيت و گلبي شاورني :
- اول مرة تكتبلك قصيدة لواحد يحبك

الحمدلله والشكر كملنا الامتحانات ع خير ..
والتوفيق للجميع ..

وعدنه فقرات حلوه بيها استضافة شعراء ..انتظروها ♥♥

( ألوان )

عبد الوهاب الحمداني

وجهي أبيض لاچن ابگلبي سمار
ولوني لون الخمرة و ابروحي خضار

يضحك بگلبي نذر فختايه شگرة

ما أعرفها ليا إمام
وما عرف ليش آنه هذا ؟
ليش أحب لي غراب والوادم حمام

ليش أدوّر عالضوه بوجنات غيري
وآنه بأحضان الگمر ليليه أنام

ليش أبوگ الضحكه من شفة غريب
و آنه بشفافي مضايف شعر تضحك

ليش أصير ليوسفك بالسكته بير
ليشك ما أزهگ و أفضحك

يمتى أصاحبلي گمر ما شايفه أحد
و يمتى أمد چفي إعله چف ما بيها معضد

يمتى أنام ابنص جفن ما لاحه مرود
و يمتى أحط روحي مدينه ابلايه معبد

حلمي أسافر للگصيبة الما غفت يمها شمس
و حلمي أدگ صوت الحبيبة اشراع و اوصل للهمس

وأرد أغنّي :

يموت نبض الگنطرة ابلايه نهر
و اليميل الوكت بيها ما يعدّلها مَهَر
الخنجر اليضحك بوجهك باچر يشوفك ظهر

( الرسالة العملية لأحد مراجع الناصريه شعرا)

نوفل الصافي

رساله عمليه


الكره يبطل وضوء
والتبات ابحضنه غيـبه يغتسل باقرب نهر
للشوگ دافي ـ على الأحوط ـ مرّت ابجرفه حبيبه
ولو سمعها- وإن سهوا –
يشطف اذنه نص نهار ابنده تغريد البلابل!!

اليمس خد الورد كفارته يزرع حديقه
واليصافح چف جراده... امنين ماچان
انتماءه وانتماءات الجراده فهو باطل..
ديّه يدفع للسنابل .. حرگ گونية مناجل!!

البيوت الخالية من طير للحب ما تصح بيها صلاه

اليطوف الناس باحرام المحبه
حجته مقبوله ولا يحتاج للكعبه وصول
اليصلي وقبلته ارموش الفقير..
وما إجه ابّاله اشحچه اشگال الأمير
اشلون ما رايد يكبـّر خل يكبـّر
آنه اضمنله ابتسامه من الرسول

الدعاء ابلا شعر للناس.. للحب
للأمل.. ما مستجاب.

ولو إجه فرض القصيده ما تصح
تـُكتب قضه.

لوحة المليانه حب .. تبقه
..وتموت
لوحة المرسومه لون امچفنه
اعله الحايط بتابوت خشباته شعار
واليعض شفته ابوجه باب الشتيمه
إنتصار.

ريحة البارود محظوره بتاتا
واليلامس سيف يكفلّه يتيم
الشبابيچ التجيلك منها ريح
إرسم اعله اخدودها بوسة اشراع
وابحر اشما مدلك الله ابروجه بجناح الضوه
لاصلاه للخوف بمتون الرسالة
ركعة الرجفه حرام


ليش خايف؟
القصور العاليه خدرانه حيل
والحچي بس للصرايف
واللسان موفقط للضوگ..
والله موفقط لبوس خالقها الشفايف..
ليش خايف؟

اللسان الينگص ايخضر اهلال

يركض اعله الباچر ابحلم الامس
ويجي باچر

ويجي شاعر

يكتب الجملة الكتبناها أمس!!!
الچان باچر يوم چنه اول أمس

وهاي هيه ..
الغيمة غيمة اشما يدثرها الظلام
اتطيح من تضحك شمس

النجمه من تموت لاتلبس عليها الدمع الاسود
الگمره تحبل كل شهر تنطيك نجمه

إرسم الطيف اليعجبك
وافتح اعيونك اتشوفه..

وابصم ابخد السمه اللون التريده
وللأمانه..

الگاع حره.. فشله تتخطط سجن!!

وللأمانة..
الدين حل المشكله.. عيب يصبح
مشكله وتبچي اعله حل

الله خير
اچفوفه مليانه فراشات وسلام
المحبه اقرب طريق الباب حنية الإله
الزكاه واجب عله كل المشاعر

ابلايه حب .. تكفض اجفون البراءه
تنطفي الدنيه ويخوط الليل چايه بالصبح
تنچفي الذلـّه عله خدود الملح جربة دمع.

ابلايه شوگ ..
تنشف اللهفه ويفرخ ابليس بعيون الشمع
النخله أم
شجرة التفاح أم

ونومة العاشگ عبادة شرط
ماناسيله موعد

الگلوب الليلو اكلادة عرش
ما يطب الجنه من يرعب فراشه

آثم اليصنع مخده نوم من ريش الحمام
الشهور الحرم عشره الباقي عيد..
أحمر الشفه غروب يفتح الليل
اعله موسيقى الجمال

والتيمم جائز ابكحلة عراقيه اصيله
العراقية الأصيله
الشدّت ايزار الحصار
وطبخت ابجدر الصبر لمن سجد..
يمها كلشي ابّالك ايصبّح حلال

العراقي ..
الينحني ابنيّة وقوف
ايعبـّرالجيل الوراه !!
الخط الأحمر يبدي من باب الطفوله
من ابتسامة طفل مثلومه
عله اضفاف الشفايف
تاكل ابلبّة لهاته
شوغة اخرس ترفس ابگلبه قصيده
حوبة البلبل چبيره
اتعثر الشط ّ و ثلث ترباع
من بحر التلوحه
الخط الاخضر يبدي من باب الطفولة ..
ابطور "داخل"
والدللوش الحنينه ابصوت فيروز
اليذكرني ابوطن منهوبه ترچية فراته

طور داخل حرز عن غول المكابر
والـ (بنفسج) تنقره حين الولاده
اتگطـّر ابإذن الرضيع
ويّه كل فرة اگماط اتلولي فيروز
ابدللوش امهاته
الخط الاحمر يبدي من باب الطفولة
وينتهي ابخيط البريسم
خيط البريسم مقدس ..

شيلة الأم علم والـ (چِــلاّب) راية
والشبگ تنور أم حته ـ لو باقي أثر ـ

يعتبر طالب لجوء

ناصر البدري .....


سكته عله سكته تمر الأيام
لاتـنشـره ولا جذب تـنسام
تدفـع بــ عمرك دفـع جـدام
حته الحلم مل منـك ونـام
. . .
فنك تنام وجفنك أبعـيد
وحزنك كسر ضهـر المواليد
أتـريد بس ماتـدري شـتريد
صافن وره ضعون الـمواعيد
. . .

صافن وگلبك ركض مذعـور
ركضـة نفس مابين الگبـور
تشتعل بس تـنشـاف تنـور
تـكتل الطيف أرسـمله ناطور
. . .

لاتحسب ولا تشـتري الصيت
ماتضحك أشفاف التـوابيـت
دللـت يامـه ويامـه ربـيت
بس أنـته واسمك تالي ضليت
. . .

ضليت شوغه بـصدر الغروب
ودمـوعك أمنطيـح حالـوب
أحبابك نسـوك وسدو البـوب
ونامـو اگلوب امشابـگه اگلوب
. . .

ديـر الخمر فوك الصور ديـر
بـلكت تطفـيك التصاويـر
ليـلك أشكبره وحلمك أزغير
ماينصـبغ شـيب الطباشيـر
. . .

و گَلتلها كَلمه بـ ذَهب
گتلها
عيـشيليّ

گالتلي
والـمَستحه

گتلها غـَنيليّ

وغَنت
و أَجه شـچم غصن يتبلل و يَمشيّ

غنتلي " يـا دنيتي "

و غنيـت " يـا كلشي "

گالتلي
ويـنك صرت

گتلها ما ادري

دنيٰلي خيـرچ بعد و اچفيني من شري

وغَيم وجهها ضَوه مـا مفتهم لونـه

صاحتـلي " يـا ضحكتي "💛


گتلها " يـ عيونه "

گالتلي لون الشمـس دگ الجـرس نمشي

گتلها قنعي النظر
وابديلي مـن رَمشيّ

فَرحانه
بـس الدمع ظل يوّگع و يحچي


عاشگهـا
بس من صدگ من الخـجل تبچي



، صفاء الجبوري

حسين الحبتري


|| الشوگ غلطه ||

ٳيصلن ضلوعي و دافية الناس ..
وتلجمني الحجايه مو من انجاس
ساس السهر بالعين دگ ساس ..
شيهودني والوحن خيط الانعاس ..
جنازه و وراهه اصياح بالراس..
ولا ضحك سني ولا اتهنيت
ولا وزعتـلي ابفرح جكليـت..
بعد ما بيها واهس طبت البيت
واعزاز گلبي بالتوابيت ...

وشمعه شمعه الليـله من عمري انـطفن ..
وروحي بيها اشجم عزيز الليله احسنه اندفن ..
هيه مقسومتلي هاي العيشه گوه و ما حجيت
ولا عشت دور اليسافر لا لگيت ابنادم ايگلي بطيت ..
وجفي متعوب اشحلاته وخلگي باب الناهبه اتحمل حجي
الساتر الله عيوني رفن لا يگلبنهه بجي ..
وجرحي مشكلته بگفاي ..
ومدري غربه و مدري من ناسي انلجم ..
وين اروح ..
الحاده اتضيع وجهه وما تشم ريحة زلم ...
وانه ذاك ..الما اخذ عبره ومشه وي التايهين ..
وانه ذاك ..الطاح حلال المشاكل بيد وادم مبتلين ..
وها يريح ...؟
ابهيده وي مگفاي عينيني يريح ..
ذنبي صدگت الگمر حطني ابمجانه ..
ولا مشت وادم بدربي ولا عرفت اشلون اطيح
ولا حلتلي السالفه وكيفت اموت ..
ولا امبطل مشتهه اوجهوه النستني
الـ هسه منهم بيه صوت ..
اجفوف حظن الفاتحه وتشتهي ابتوت ..
وغير اتوب ..
رموش لعيون العثگ شفت السعف ..
وشفت واحد جرحه شاف ..
وجذباه وصدگ بـ خنجر حلف ..
وشفت ناس تشوف ..بس اگلوبهه تدور عمه
وگلت اسد بابي بعد ما بيه ريح ..
ولا ظهر يحمل وازفنه اعله لجمه ..
تصعد الدخان روحه..
ويلتفت وبنفسه تلگه اجفوف الموادع تلزمه ..
فهموني ..الشوگ غلطه ..
وفهموني العشگ غلطه ..
وفهموني العتب غلطه ..
وانه ما طبهه تذكرني بعزيز..
اهواي تعنيلي المحطه ..
وگالوا اتكابر؟ گلت باجر اطيح ..
وگالوا الوحدك لگوني ابلا حبيب..
ناس ما تدري تغث الگاع خطوات الغريب ..
ومو غشيم ...النثيه قسمتهه مثل حگ الجنازه ..
تريد من تمشي بوكتهه..
والتتن كتاله واحد ..
شفه تتلاگه وي اختهه ..
وباهت بيوم الملاگه ..
والحزن صوته اشعلاته ..
والفرح نساني وجهه
بس اذكرنه اشحلاته..
وها يريح. ..ابهيده عزراييل ما خلاله صاحب ..
والسجن مرات خير ..سنين مسجونه الگصايب ..
وانه ما مغلوب بس گلت اشوراي ..
وصورتي تعيش من اموتن ..
والمطر كل عمره جاي ..

اتونســوا وي ..
الشاعر رزاق الركابي ..



لك سكوت
الاصوات براسي تذبحني من اذكرك
من اتلاكينا ابخيالك
وجهي صيف و وجهك امغيم عليه
شبيك جا ما صرت نسمه
يا جريب الروح يل كلتي و غلاتك
ما يصير الدمه ماي
بس نسيتك انته غيم
و من تجرحه الغيم ينزف ماي دمه
حاولت انساك و اغفى
لهوة المجروح نوم
و ونسته يطيح اعله حلمه
و انته ذاك
تكلم الجدران من شوگ التحبه
و من تشوفه تكابر و ما تحچي كلمه
و تصبح الجدارن عميه ابلا مرايه تعودت تنحط عليها
و صارت بچفك تدور بلكي ولفك بيها بصماته العميله
و ناس اجوني من الحلم
و ايد من المرايه سحبتني لحدرها
لأرض الابعاد البديله
درت وجهي منين اجيت
ماكو لون و لا غرفتي
غير جام اسود اظنه مگفا المرايه العبرته
رجف گلبي الما عرفته
خاف بالغرفه اوگعت مني العيون
خاف تالي الاعمى يطلع حلمه اسود ما له لون
ذكرياتك ثقب اسود ينعدم كلمن يجيله
و يفقد احساس الزمان و الاماكن مستحيله
ارض وهميه اعله ظنك و اليسافر ياخذ وياه المكان
المگص الهناك متحجب و يرجف
خايف تگصه الجديله
و وجهك الهرويني الابيض
حيل متغير دليله
شگد صحت لك مسمعتني
ترس ذاري حقول ربعك
اذنك الجوعانه حنطه و مسمعتني
و كل عصافير الگحط منگار يبحث
شلون تسلم طبلة اذنك منها لو وچدت
تراچيك رزقها و جانت الحنطه ذهب
شلون اجيلك و الحقول الباعدتنا
انزرعت الغام و متاهات و خشب
و مشية البسمار خطوة اعله الخشب
وين ذيچ اعيونك اقلام الكحل
ليش صاير قلم جاف
ما يگص الموس وجهك و العتب
شلون اجيلك خاف اسحگ لغم ياخذ
للثقب الاسود سنيني الچنها كحله
و العمر مره رحيله
و اشيرد للصدگ عمري
و انا بسمار اعله نعشك
وين ما احط رجلي گبري
و انته ذاك الحيل حليان اعله هجري
ليش خدك صاير احمر چنه جمري
و الوكت رد بالعكس حد امس ميله
مدري يمكن
الاراضي الهشمت دمها المعاول
توحي من تنبت ورد احمر قتيله
شلون اجيك
شهل التجافي
يا جذر يا غصن طالع بالعكس
حتى لا فوگك يحط طير و يجيله
مدري هذا الحذر واجب
خاف تندلك عصافير الگحط
و تاكل اعثوگ التراچي
لو تظن ارموشك النعسانه عشها
و فوكها توجي جمر
ليش حليان اعله هجري
يا وهم كم العوالم
تصير وكت عيوني تغفل عنك نجوم و تلالي
و وكت اصدلك ما تصير
غير خام اسود حبر
صفي رايك يا عطر
دمه مسجون ابگزازه و دمعه حر
انته يل چنك عطر
ريحتك ع الريه حلوه
و طعمك اعله الريج من تنضاگ مر
لا تحط ريحه ابرگبتك صار طعم البوسه مر
رغم هاي شكبر حظك يا عطر
بيك نسبه من الكحول
و محد يگلك خمر
و كل طباع النفط بيك من تلاگي النار تحرگ
و محد يگلك جمر
بس اگلك
انته سرب طيور تركض صوب وجهي
و انا اركض
و الدرب طين شثگل شردة اجدامي الصخر
درب ذكرني اب اوادم ما تجي بعين و اغاتي
تجفي ما تشبگ بجفك من تصير بخدها بوسه
جنها درب الطين كودا
الطين يشبك ع الجدم لمن يدوسه
و ما اگلك ضايقت وجهي الطيور و طاح فوك الريش دمي
لجن خوفي وعى عقلي عني رد و ما ردعني
تذكرت هذا خيالك ما له واقع
و حتى ارد منين اجيت لازم ارجع من المرايه الخذتني
جمعت كلشي كزاز بكلبي بلكت يصير بوابة رجوعي
مشكله و ما اجه ابالي كلشي منك
ماكو بس بركة الطين التعكس اعله الماي رسمي
ردت اطيح بصورتي و الطين كض بيدينه جدمي
كطعت احبال خوفي و طحت مرجوحة حديد فوك كيعان انعكاسي
و جان صوت الطيحه جاهل طير من الخمر راسي
الحمدلله و جان اردن للحقيقة
و شهكت مخنوك بالواقع و عيني شافت استوها اوادم
و انا بمركز بحوث الوهم عالم
و اجهزة بصفي و حواسيب و كراسي
و على دماغي اسلاك مربوطات كالو
من هذني طلعو من دماغي ناسي
و هذن الأسلاك جانت
تغلي ناس من الدماغ
و تبني ناس و توج روس ابوسط راسي
بالنهاية
كال لي العالم ابشرك انته ناجح بأختبارات التمرد ع التجذبه
و انا اهنيك بمحبتك بس انصحك كلبك يعوف اليحبه
لن اذا ما اغتال عقلك حبه الوهمي انصحك
تعوف هذا الوطن النه
لليخافون المثلنه
قبل ما نغتالك احنه

(يلهويتي بلا وچاد انوب من تهوين وچدي)

(خطاب الشاعر لنفسه بلهجة الندم والتوجيه )

(ردّي) (ردي)

عريان سيد الشعر

ردَي........ردَي.......
يا ظعن شتَ عن هله.....
وحدَاي غربة البيه يحدي.......

ردي ينباع العشك.....
للياكلب تهوين صدَي.......

لا تهيجين الجروح.....
جروحي من تنلجم تدَي......

وانه من دم ولحم......
مو من صخر جبدة العندي......

ردي ملَيت الصبر......
وامكاطر الدمعة اعله خدي......

جورَت ليل الهجر......
واعجزت منه وهذا حدَي.....

بلجي يغفه الجفن......
ما جلمة التنكال بعدي.......

وانه موش اول زند....
.يشتل شلب وايحصَد بردي......

ولانه بس اتغربت......
.والمعتنيله ايصير ضدَي.....
ردي ......ردي.......
مالي حيل امعاتبج.....
.وانه العليج ادَيت جهدي......

غلست من الكلت والكال........
.كمت اسمع واعدَي......

صابرت صبر الطفل....
شربي صبر والحزن مهدي........

واحملت ليل العطش........
وانه العيون السود وردي.....

والله جا ملّ وجزع......
لو قصتي اعله (أيوب) تسدي.....
ردي.......ردي......

يلي عمرج زهلله......
ودنّ وملامه وضيم وعدي.....

نحّي عني امحبتج....
.مالج دليل ايشيل دردي........

يالهويتي ابلا وجاد.....
انّوب من تهوين وجدي......

لا تتلومين اليوّن...
واللوم عالمدرج تعدي......

حطّي جدامج ملام الناس....
.وابمشيج تهدّي.....

وانه مو طبعي العتب.....
عالماحلاله ايصون عهدي...

يا مناحة ذلّتي.......
.وليل الكضيته دموع وحدي......

وانه خلاني الدهر .....
ناعور.....بس
أترس .......وابدّي.....

محسن الخياط السماوي || روزنامه ||

شلون اگلها
وشرد اگلها
واليحبها إملولحه روحة بكلامة
وهـى شامة وعدها شامة
والربيع اتجيبه گوه
اتجعده من هودج منامه
وتجني منه الورد الاحمر
تاخذه إتصوغة ابتسامة
الليل لو رادت تودعه
وتحدي شمعتها بضلامة
يتعب المراية مشطها
ويگضي صبره
ويصعد التل الشعر حگ السلامة
وهي لو بالعيد طلعت
يضحك العيد على روحة
وبالشته يصير الدخول
وينشگ الطليع هامة
وهـي حلوه
وجنها مهره وعابرة الشط
وبشهامة
جنها مهره ارجابها يغني لرسنها
ولف سرجها بهوى حزامة
وهي واحه
كلها ماي وكلها راحه
وگمره وي الصبح عدها
ومانفرزن ضي گمرها من صباحه
وهي واحه
وفيّ نخلها وين مايحلاله يفرش
يعن بيّه وبيّه يطرش
وبالگلب باني على جرحه
وبالصبي عاشن ايامه
وعالحواجب ديرة اهله
وعالرمش ديرة عمامه
وهي خطار الهوى
وهي المعزبه
ويامه يامه
ضوه مشمرها صدرها
والجفافي جن غزاله
تثني اديها وترضع بگذلة غرامة
وگفت بريش الگطايه
وفرشت بريش النعامه
ومايها ماي السماوة
وطينها طين النشامه
وبخت عد ذاك اليوجي بمايها ويربط إبلامه
وهي حلوه
حلوه ومحمله وطويله
وتامه وفوگ التمامه
شايله البستان گله
وغاطه بالجوري گامه
الريح لو يشبگ عليها
تهوف روحه وتنمرد
من يومها ليوم القيامه
ولو جرح بالليل يدي
وتعصر جفونه الندامه
مانفرزن هذا جرحي لو جرحها
وهن توم ومانعرفه هذا ياهو من التوامه
شلون اغطي جروحي بيها
وجرحي صورة وهي جامه
شلون اخلص گلبي منها
وگلبي خيط وهي خامه
شلون اضل مادور بيها
وانا ليله وهي دفتر روزنامه
……روزنامه روزنامه 

عقيل العرد
قصيدة. ..سعر الوفه


رخصان سعر الوفه
وسعر الغدر غالي

ولمن طحت جربت
وكفتلي وادم گبل ما جانت ابالي

يابو خناجر ذهب
ما اسوه هالگد طعن

ان نكصت وان زدت دمي اعله گد حالي

ما جابني لهالدرب
غير الحجي الينسمع بعيونك الحلوة

وما ادري حبك
قدر
لو عشك
لو نزوة
يالتسوة ناسي وهلي
شخلاك ما تسوة

لا ترضى احبك ولا ترضاها احب غيرك

ويم غصنك اتحيرن حطابك وطيرك

يالبيك لون الكَصب

تعرفني كلش نهر

وبجيتك اتكذل

ليش اليسنبل وفه

يتواعد بمنجل

وليش اليسولف دفو

بي يلعب المغزل

من كل مكان الورد جان اعله مد شوفي

اختاريتك وماردت جف ياخذ جفوفي

بس هي سفرة عمر
بيها اليتعبه الدرب
وبيها اليتعبه الغلب

وبيها اليعلم الوفى وتاليها ما يوفي
… ..

من بعيد اجاك الكلب
شمعة بوسط غابة

مجروح من كل جهة
وما سترته اثيابه

و ماعرفه شد الجرح
لو تعبه صوابه

عذبني ما يستقر
يضحك بوجه الغرب ومزاعل احبابه

يا كلبي مرمر كبر
من يشح ماي الورد
يشرب من غيابه

مفتاحك الما رهم

وكلشي ولا تنكسر ؟

ياكلبي لا تنكسر

القفل من ينكسر

ينكص شرف بابه

بيدي ضميرك غفى
وبيدي انقفل صبحه

واللي بذاته غفى
من ذاته ما يصحه

البير غلطة سما
الغيم بي ضحى

والعمر نشوة زلف ماخذ الدنيا لعب
ما مش هوى ينصحه
......

أبو دجلة العامري ...



من شح النشد والشوك

من مامش رسالة وضحكة مسيرين

من طاح الدمع فوك الصور بليل

واعرفت الكلوب شضامه من العين

من جفنت روحي ومامش مشيعين



رديت بويه متعوب شابح باكتة الدنيا

وهلبت منهم الجيه

ومامش منهم الجيه


ضميت التعب بالروح

دمع بعيون فصليه


انسيت وديرتي تغنى ولاهزها بجي الماشين

عليمن ابجي واتعنه من كون الربع ناسين

حسبالي انذكر لو غيب والكه والوادم متانين

واثاري الموصدك يضحك لو يتصادف وي الطين

دور روحك من تضيج مامش بعد ربع حسين

مرتجى سعدون-

وادعيتك

وادعيتك...وادعيتك،
.وانچفن دمعاتي كلهن من مشيت...
.اشگد بچيتك
مادريت،

.حلمي انته وناس تحلم بالرغيف..
.ليش طولت المسافه وچان موعدنه رصيف..

.ماگلتلي الغربه كاااس..
.ماگلتلي افراگ وجهك ماتسده اوجوه ناااس..
.چنت اشمك والگه روحي،
.اسولف احچاياتي ياس...

.علمتني اشماا يمر اليل اغفه ابحس نبرتك..
.اشماا اريد اعشگلي اوادم تخطر ابالي عشرتك.

.مره گتلي اذنوبي مشتهيه ضوااك..
.ومره گتلي اعيوني جنه..
.وانه گتلك ما اگودك اله نيتك بيها حنه..

.ليش چفك ماخذاني..
.وياعشگ بعدك عرفته،
.وشيب عشريني خذاااني..
.الچنه من نسمع حچيهن واحنه نحلم،
.هسه خنگني الاغاني...

.من رحت عني ومشيت،الساعه ماتعرف تميل
.والدروب اتهيس الجدم الثگیل..

.و اشكبرها اولايتي وعايش غريب.
.ويني او وين التراچي،
.وشنهي و امناطر حبيب..
.حلمي البسك حلقه بيدي.
.اشدخل القسمه والنصيب..

مصطفى العيساوي

الدنيا تتعب من تحطني أبالها
آنه أول ماصرت خيالها
الليل رافگني وترست اعيونه نوم
وفرزنت نجماتها من اهلالها
الميت اتعرفه عزيز من النگاب
والجنازه اتبين من الشالها
السلم من اليسره ماداخل مضيف
ومن تلومه الناس گال اشمالها

شايل براسي حچي من احچي اموت
ناس صعدت بالحچي المو مالها
ومامحول يم سلف مابي چبير
ولا مسولف سالفه يم الزغار
ولا مثني احچايتي وگايل دخيل
ولا مفرع يم عگل مطلوبه ثار
اكره الورده الترافه بعركه عيب
آنه احب السيف چي صاحب قرار
طيحة الماعنده اخو تعثر مضيف

الماله بالوادم ربع يگضيها صار
چوية التنور تطي الخبزه صيت
طبع المعزب تشوف إبابه نار
الطير لو صفگ يجي أبالي الرحيل
الطير متوارد احسه اويه القطار
المايخلي الروحه قيمه انقدره ليش
هواي وادم مستحه انگلها الكبار
أبقه عالي المايلوحك صوچ إديه
چانت الخبزه لبو ابوكت الحصار

هي سمعه وناسنه اتدور الصفير
الحمامه شما تزل سمعتها غار
المنجل من اتگله شيخ ايصير سيف
وينسه حجمه ويمشي بأسمه المستعار
ماگعدت براس غيري وبگته ليل
ولا كشخت أبيت غيري بنص نهار
آنه احب اسوالفي مثلي حلال
أسوالفي ايشبهني هم بيهن سمار
البدوي هلهولة نده عنده الرعيد

موت الغيمه عرس للگلبه حار
ولا تفر ايدك تره الناعور ماات
وگمنه نقره الفاتحه للعنده ثار
ولا تصفگ للنهر عمره گصير
النايم بحفره تره ماعنده دار
صاحبي اطيته تفگتي وگتله صيد
الصيده ضلت حاطه وصاحبنه طار
الفاتحه البيها بچي صاحبها زين
الخير ابسابع سلف ونحسبه جار
ولا تقيم صاحبك لو وجها اجاك
انت قيم صاحبك من تستدار
الشريف المايشر حچيه عله خوه
اليكشخ بثوب الحچي يم ربعه عار
منين اجيب الناسنه سيد بخيت
يحچي وي الله صدگ من يستخار


...

اليوم لحد يحاجيني ...


اليوم لحد يحاجيني
صاير عزيز كبال عيني
للنجف ياهو اليوديني


مريت بالديره انه سايل
و شفت ركن البيت مايل
سايل يدمع العين سايل

شط الجبير وكابليته
وبماي عيني جمليته
لو ينشره الوالي شريته

اسمر يبو العيون الوسيعه
طوله حلو اجدامه رفيعه
قاطك نضمه لو نبيعه

مرتك ي يمه شلون بيهه
حطهه بقفص واقفل عليهه
وخاف ياخذها وليها

يهل العكل يهل الطراريج
عبرو تره المعبر غميج
وسوو لوليدي طريج ...