احمد عاشور- يمكن مو موكتها 🍂🍃

يمكن مو وكتها بَس بَعَـــدْ حبيت
لا والمشكلة ماتدري بيه انــتَ
وحق عيونك الماحاسبلها حساب
اليحب من طرف واحد يحترگ سكته
انا متعود اخذ دور اليبجون
بس دور المدلل ... ماتعودته
اول مره احس بروحي مو صياد
شفت شفايفك وسلاحي تيهته
المهم .. المهم حبيتك
وكَمت اكتب أسمك وين ما افتح كتابي وتجي ابالي انته
وآنا من ياوكت محسوب ع الطلاب
جنت كَبلك الطير الماتخيلته
جنت كَبلك وكح بس غيرتني هواي
صرت هذا اليروح ويرجع بوكته
اليفز من الصبح بالبرد ويتانيك
كَبل لا تنفتح بيبان جامعته
انه الشاعر السجدتلك مخيلته
الهوه الماجاب عطرك ماتنفسته
أكتبهن بدمعي وجنت احس بالموت
من اشوفن صاحبي يدزهن لـ صاحبته
ردتهن بس الك بس انت ماحسيت
مو ذنبك ولكن ذنبي ماكَلته
الحجي البعيوني جان يبين من ابعيد
بس انته العيونك مامفرزنته
جنت اتخيلك كل مايجيني الليل
الشوارع فارغه وكَدامي بس انت
وامشي في دربك كاني ضرير
وانطر تدليني طريقي كفوفك
ما أبغي منك يا سموّ الأمير شيءً
ولكن كل مبغاي اشوفك
خذني اسيرك
يا حلاة الاسير لما توقع فوگ صدره سيوفك
أرض وسما عندي ولكن فقير
ياگبلة احلامي غناي من اطوفك من غرفتي
يبدي الشتا والسرير يَدفا مُجرد ما تمره طيوفك
انا حتى الحلم لأجلك تحلمته
لو ماشايفك والله ما نمته
بس هو اليحب من صدگ ما يرتاح
مثل البي نفس ويشوف فاتحته
انا ماخوفتني هوسة الحراس
بكثر ماخوفتني هوسة السكته
مرات اشتهي ارموشك النعسانات
گبل لا يوصل المرود المگحلته
بس انت تستاهل اي انت تستاهل تنحب من بعيد
حلاة المطر من ينزل كَبل وكته
وأعرف مو وكتها بَس بَعَـــدْ حبيت
لا والمشكلة ماتدري بيه انــتَ

محسن الخياط- فيّ البرتقال 🍂🍃

لون بوصافك اتعشگ
جبل من الصبر يشهگ
تحن يمته شوكت
وجه الثلج يعرگ
تلمست الجرح بالليل
واليم الضوه ادنيت
ردت اعرف نتل لو شگ
سمعت الروح ونت بيه
كاغد من تهم لزگ
وياهو يصرف ال ملزگ
تگاطيع وصبر مابيه
گبل ما جيسه يتشگگ
واذا تلحگ
وأذا دنياك مثل ام الغزالة بـ ليل
ماتدري وببنها توهمت تسحكَـ
فلاهي اتضر يلن ابن الغزالة يطيب
يحمل سحگة امه ولا بعد يزهگ
المطر شم الورد من دنگ اعله الگاع
وراح يبوسه من دنگ
صبح كلك صبح
وارموشك مرايات
وانگوط وربيع بطولك معلگ
للمك والتم انه وياك
والتف بيك واطبگ
واشوفك شوفة القداح
لمه من يريد ايطيح
والتف لف جگاره عليك واشبگ
شوصفك وانت روح الماي
وانه شلون فَــي البرتقال زغير
وين على نهر يلحگ
يمن طبعك ثلج ويلوگ بيه الصيف
ولو هب البرد بهواك نتمشرگ
أحبك ردتك بكل لون
أذا ابيض
واذا اشگر
واذا اغمگ
يلن لونك مثل لون الچمه العطشان
من شبگات گاعه يصير لونه احرگ
ويلكشني البرد واشتاگلك وأحتام
تطلع بالجنح سبگ
يا أول نبع مبهوره بي حلوات
ملهوفه امهاتهه عليه
غنن للعشگ مطبگ
وحده تشيله الـ چكليت
وحده تصير فَــي عليه
وحده ادوف حنه
ووحده بي تطلگ
يگنطار النخل ومنين جبت اللوز
مو بعده النخل والچمر بعده ازرگ
اجر الليل بيد وبيد اسيس بيك
حد الگيشك واغرگ
وأفز والگه الوكت بي طول
واتچوه خضر ع النار
اثارينـي الخضر ع النار
وانه روحي مثل روح النخل لو صارت بجريد
والجريد ما مامون يتشرگ
وراويت الجرح لـ بن امي
عافه وراح
بعد ياهو لجروحي يشوفهه معوگ

علي الصفراني -ماباقي بس صفنتي🍂

من اغتاض عن الهوى اطرد شكو بريتي
واترس الدنيا حزن لوسولفت دمعتي
كهوه اني مره نعم بس عايش بهيبتي
اتشابه وي الورد دوم الندى بكصتي
عايش غريب بوطن ماجني ابن ديرتي
وزعت كلشي وخلص ماباقي بس صفنتي
بصفنتي دوله وعلم .. تتباوس وي القلم
بيها البلابل سوى مو كلمن وشجرتي
مابيها جندي وسجن .. علمها حب الغصن
ولامات بلبل عشك ينزل علم دولتي
هذا آني طبعي سهل بس ياسهل ممتنع
لايوم شايل سهم ولايوم لابس درع
بالليل نخلة سوه انا و عمر شمعتي
جكليته حيل اقتنع شايل قناعة طفل
واغسل عيوني بدمع ماغسلتها بكحل
لاعاشرتلي صعب ولادورت عن سهل
رغم انا حتى الهوه يدري بأمَس حاجتي
استأذن من الهوى لو ردت اودع العمر
وتنوري طين وعلي بس بيّ رهاوة قصر
وميراثي ومضة شعر بيتين طابو فقر
هذا آنه وضعي أبد مااقصر بدنيتي
لكني طبعي ترف للمجفي اصيحن هلا
وماصير منجل أبد لوما صِرت سنبله
امشي بطريق العدل ممشه اعله كَد خطوتي
ماطالبتلي ابفضل اليكتلني وردة الفصل
وما أشد عداوه ابد شدة ورد شدتي
بس انا عكس البشر يرجع لون يندفن
يخضر بلهفة عشكَـ ويعيش صافي ذهن
ماعندي حن وآنه حن ،، للمايحن هم أحن
ياس وحياتك مشو عافوني كل صحبتي
لاكني كشخة سلف رغم اني عايش فرد
وما اگول جنت وجنت وأطرق ابواب السرد
معروف عن طيبتي للصيف اضمن برد
ولـ اشتاي اضمن دفو هذا آنه كل قصتي
هذا آنه كل قصتي

كاظم الركابي -نوارس ماي 🍂🍃

بعد تنشاف بيه ارسوم
من اشتاگ

وبعدني ألبس وجه ملگاك
واعطش ماي ما ضايگ
حلاة الراگ

وبعد بيه ملامح من بشر ينخاك
متحزم عتب گيعان
وايدور خضار انباگ

من شح الصدگ بالناس
دورتك عشگ سبعين
بي نية نوارس ماي
زفوها اعله بخت الطين

وسولفتك حمل متعوب
ما شايف متن مرتاح

يل اموالف وجه مگفاي
اضم الشوفتك ذله
واكشخلك جرح مندوم
زفو للغرب خله

تعال وخاطري امتانيك
ما حس ابطعم وي ناس يم العين
بس انت البعيد بكلشي احسن بيك

شلت عمرين حتى الگاك
وتناوشت الضحك بشفاف
يبسن من ثگل طرواك
يبو اعتاب الثگيل ابخاطر النسمات
يجنازة نده امن تفوت
فوگ اخدود ذبلانات

اخاف امن العمر يزهگ
واخاف الليل يلبس ناس
واثياب الصبح تعتگ

يوينك ماتوالمني
ذراني العتب واللوم
وازياگ الهوه اتلمني

وين الگاك
دنيه وكل حجيها افراگ
وادم ماتعرف اتموت من تشتاگ
وينه اليشبه ارسومك
واصوغ ابشفته احچايه

حيره وكل وكتنه عيون
ينطي الوين وجهه العاشگ امرايه
اليخطف عالجفن وينام ينزع روح
فشله اعله الهوة ممن ايفوت مايغفه ابحضن رايه

ومو ذنب السمه امن اتطيح
النهر نيشان .. لكن باگها ابمايه ..

عقيل العرد- لا تقرين فنجاني 🍂🍃

لاتقرين فنجاني
أسكتي لاتفز نجمه
برد ليلي وحركَت الدم قصايد
وأبجي واتحمه
أسكتي الدمع مو بالعين
الدمع من الكَلب يبدي
وأخاف اليمسح دموعي تزل ايده اعله كَلبي
وينمسح رسمه
لاتقرين فنجاني
أسكتي لا .... لا تفز من الجفن مطره
الفرح شدة ورد
من وره الجامه اتلهف لـ عطره
الفرح محبس عرس ماغفه وي الشذره
الفرح مثلج بعيد ،، بعيد هناك
الفرح مامنه لاشبكَه .. ولاشمه
العمر مابي بعد لجمه
أسكتي لاتفز نجمه
التتن والوطن والدخان
منو بكَدي احتركَـ دمه
يحلوه الليل دمع الناس
يحلوه الليل بالفنجان شيلمه
عبادة شمس روحي
وكَالتلي الشمس بعيونج امسلمه
اسافر بيج ، لآخر وين
وماضوكَـ اليرد روحي
ولونج مو دوه اعله الآه
ماحنتلج جروحي
أسافر واليسافر كون
كون يشرب ماي بخت الناس
وبخت الناس كله يمر نهر محشوم بجتافج
وختم التذكرة شفافج
بين ولايتين السنده عيني اتيّه
أمر بنصهن مدنكَـ
وبحبال الشرف مجتوف
ويصير شحلاته الشوف
وأشد عيني حرز بزياكَج من الخوف
وأخاف الحرز لمن ينفتح ينسد
يحلوه يا ونس عيني
بعد ماريد تقريني
الفطن وياي مايحتار
كلشي امبين بعيني
لاتقرين فنجاني
انا عيوني فناجيني
لاتقرين فنجاني
انا عيوني فناجيني

عطا السعيدي-الحرمل والكرنفل 🍂

الحمد لله اكتشفتك كبل لا أشريك
ماغشني الصدف لوخدع عيني اللون
بس من فوك مطلي ومو ذهب ليرات
اول مالمستك بين المضمون !!
انه بخبرت اسنيني استاذ بتميز
واقرأ بكلب ضيفي الغرض والمكنون..
وبلغط الشفايف دون ماتفسير
أقرأ اللعنه ولعان والملعون
واميز الفارغات من الترسهن خير
لإن من وضع جسمه مبين الماعون !!
ولو شوشت وجه الكاع بعض الناس
حته أتيه بيها اجدام اليمرون ..!
لاكن ما أتيه الكاع نفس الكاع
وانه اندل كنزها بيا كتر مدفون
مرواح الوكت بس ترفع ايدك فوك
يعزلك الصافي ويعزل المأفون !!
ماتعبر علي كلما لبست اثياب يا ثوب
لتلبسه من العرض مخبون !
ولاتستر عورتك واضحه لكل عين
وانه بوجهي وكفاي وبصفاح عيون
مثل ما انته اشوفك حته لو صبغوك
انه خبرة سنين واعرف المدهون
اسود كلك اسود؟؟؟؟ حته ذاتك ليل
بس مو للمسامر ليل لليبجون
مغتث من سوادك حته لون ليل
ويرفظ لون بينه وبينك يشبهون
الحرمل والكرنفل بسواد اخوان
بس شوف الفرق مابين وحش وجون
مره اللون يغري ويعبر اعله العين
وعندي عيون تكشف سيف ميه لون ،،
يارخص السوالف كون اسولف بيك
ويا ذله من اذكرك بين اليذكرون ؟؟
مانادم عليك وروح لارديت
شلتك من خيالي وروحت اليرحون
راحت ناس كبلك واجت عكبك ناس
مدري شلون راحو واجو مدري شلون !!!
مرور الطيف مرو وانته الموضوع
مالكطو بذهني وكلشي مايعنون !!
أنه مبين واضح بشته وبلكيض
ما صلي وي موسى واركص الفرعون !!
انه سنيني رحه وطاكين عمري ادور
ويمر من خلالي ويوكع المطحون ،،
معقوله الاذبه انوب اردله اردود
واصير اشعب واركض وي اليركضون
،انه غربيل واصحاب النوايه دنان
مجرد ما اهزهم كلشي مايصفون،،،
بس حركت اديه بهزت الغربيك
واحد تلو الاخر كامو يصكطون

ناظم السماوي - الجوري الاحمر 🍂

لاتركض ..
تره الدنيه مسافتهه..
ابشبختك بالركض ضيكه !!
لاتركض .. كبلك ناس ركضوا..
والبشر الوان ..
راح السيف منه وضيع الدركه
وناس انطه العزيزه ..ونزف حد الموت ..
ومارخص الروح .. لأخر الشهكه
وناس ..نريد .. تقفل ..
باب الله اعليك ..
الهوه لوبيده صدك ..
عنك إبخنكه
وناس ..اوجزهه .. رخصت ..
بأول سوم !!
وناس ..اويه الشرف .ز
لم العُله تركه
وناس اتخف جدم ..
وي صفكة الماشين ..!!
اعله حس الطبل يركض ..
لوعله الصفكه
طبع بالناس .. هاذه يختلف عن ذاك ..
ذاك ارخيص ..
وهذه بالذهب مثله فلا تلكه !!
وأبو ..جف الكريم .. وصخي ..
ايعز الناس ..
مثل النخل ينطي ..!!
وّعبرته اتغركه
وابو .. وجه البخيل ..
الموت ماينطيه ..!!
خاف الجفن يشرد منه ويلحكه
النخل ..!
النخل يفرح إذا عثكه ..
هدل للكاع ..
شله ابطوله النخل ..
لوماهدل عثكه ..!!
الشجر وكت الخريف ..
ايصثير عاري الثوب
يبجي ..اعله الربيع ..
ابستره بالوركه
اذن .. عّود ضميرك .. لو ..
ردت ترتاح ..!!
إلأ لك .. ماينوخذ منك ..مهما يطول ..
اليكلك غلط لتصدكه ..!!
الحسين ..
اشلون خله الناس ..
تبجي اعليه ..؟
إلى يوم القيامه .. وساعة الملكه
لأن .. اسمه الحسين
وابن داحي الباب ..
ترك دم الشهاده .. يطالب بحكه !!
خله السيف يبجي ..
اعله النحر لليوم ..!!
وخله .. السمه .ـ سبعه ـ
نزلت اتشبكه !!
وثيقة ..
تضحيات وشرف صبر احسين !!
إقره .. وكلب التاريخ ..!!
فِنك رُبعه لو تلكه ..!!
الوثيقه ..اموقعه .. بأصبع
إلاه الكون ..
وبّباب الشفاعه اهناك متعلكه
ولاتنهظم ..
لاتنهظم .. لوشفت الاسد جوعان
والواوي .. يطيح .. اللحم ..
من حلكه ..!!
ولاتنهظم .. لوشفت ..
المثقف .. عالرصيف ايبيع ..؟
يبيع آخر كتاب .. ودمعته اتلحكه
لأن ..
طبع المثقف .. دفتر امن اشواك ..!!
موقف ..!!
والغبي مايكدر ايحركه
جان ..!! اعله الورد ..
اجمل فراش ايطير ..!!
وهسه .. اعله الورد ..
تتشايم "البكه " *
صدكوني .. الورد .. من عطره موزعلان ..
لان ..
اصل الورد .. يشتم ..
عطر حلكه !!
لان .. طبع الورد .. بخدوده..
رابي الكون ..
ويكره عل اليدوسه ..!!
ابجدمه ويسحكه !
الورد ..
ألوانه ..لون ..
ولون يسحر لون .. !!
بس .. الجوري الاحمر ..
مانمل عشكه

هادي العكايشي-نزوه وما جهبها احد 🍃

نزره وماجهبها أحدّ... وأكل لكليبي يمعّود
تغازلها تحاجيها ..
يصير أعليك يوم أسود
رسنها أيتيه المولد ...
معارفها نده وياقوت
كصتها شذر .. وأمطرز بليلو
كلتلهم ذهب ! .. كالولي : لاله أزود
كلتلهم ذهب ... لا ينزل ويصعد
كالولي : الوصل ! كلت : الجزر والمد
لونها أتطاوع اويايه ... لجرها وياي للمشّهد
وأورجها على أجروحي ..
واعدهن .. واحد واحد .. وتيه العد
يجرح المر بعانية.. غرو ماكحلك مرود ؟!
يجرح المر بعانية .. يا شاعر رثه روحه
يجرح المر بعانية
الجرح متشابجه أجروحه
ياعنبر مجمن ابفوحه
ياسر القوافي المحد ايبوحه
يجرح المربعانية .. للأجيك أمحزم أبروحي
وأتلك تل الموازه
وأكلك روحي معتازه
واطك واحه وافيليك
وبالهندس .. وأضويلك
يالجمة غفل مجروح ...
الجبل ينشال عااللوحه
صدك تحجون ! ... ياشاعر رثه روحه ؟
تضحك !..تسكت !.. تحجي !
تضحك .. ضحكتك نشوه .. تطوف بكاس ابن هاني
وتفزز طيف الولايات .. صوره وصوت ..
للدنيه ..ترد ثاني
نسكت سكتتك غنوه .. ياخذه النسيم أسنين ..
ويردها لكهاوينه
خرز سبحه .. وجكاره .. وجاي سيلاني
تحجي حجايتك سلوه .. غفت بيها النكات احروز
هايابه .. هاخويه .. هايابه وها خويه !
هايابه ..
وعلى هايابه هايابه ..نكته اثنين وأثلاث ..
وأربعه.. أتدش على أكليبي ..
كبل ماتوصل أذاني ..
وتخلي الروح مشروحه
صدك تحجون ! ياشاعر رثه روحه
يجرح المر بعانية .. كصر باع الجلم ..
متدوهنه الجلمه
اجيت أرثيك مامن جلمه طاعتني ..
بسل روحه الحجي أبظلمه ؟!
يدانك ناكل المنجد ..
عبر شطين عالدنيه
ورجعت وكاغدي اينوني بياض ..
وفشلته بقلمه
ولاكطان جلمة .. وفالتي اتلوحه
صدك تحجون ؟ ! ...ياشاعر رثه روحه ؟
ياجرح المربعانية .. يبو كلب الجبير ألحكته ألدنيه
يبو جلمات البريسم ..
تفل باب ألسمه بشهكه ..
ونرد عالكلب حنيه
هم شفتو ا الكمر يختل أبرديه ؟
هم شفتوا الشمس تنباك صبحيه ؟
اتخسه ياشارع الطوسي !
جم مره يمر أعليك يتمشه
ولامره التجي بحرشه ؟
ولابيك الترد نعشه ؟
بآمر منبر عزا المشراك ..
ممنوع الكمر .. يسكن ألبريه
ممنوع الكمر ..يسكن ألبريه
ودواوين الشعر صاغت الاطروحه
صدك تحجون ؟!.. ياشاعر رثه روحه

ذياب كزار - يحاديني 🍂🍃

يحاديني ويذاريني..
اعله كاع يفيض بيهه الدم
وبيهه الدم تكحل بالتراب ..
وزوك الطينه
امشي الروح الك سجه وحرثهه الشوك
واعتاب الهوى الحزنان..
وبيهه الضيم خلف كل نياشينه
ويحاديني... ويذاريني
بزمان اخرس خنك لحنه ودفن صوته
ويريد الناس تطربله بتلاحينه
اخذ..هاك ..انه ومضه سيف
وين تريد تطفيني
امش والليل يطوينه
ويحاديني.. ويذاريني
السنين اتشوف
مجروحه وجرحها ايشوف
هلبت شافت شبينه.
نموت اويه اليموت ابلاش
وانحيه اويه اليحايينه
ويحاديني ويذاريني...
ابسمه تيتم كمرها وعافته النجمات..
بين الكحلت جرحه بضواها وماتت ولاطاب.
وبين الغمضت سكته وبجت نور العيون وبطلت لعتاب
وبين التيهت من ياطريج اتفوت وتودي الضوه الياباب
ويكبر بالسوالف خوف .
وعله حبل الشكوك يطوف
ونتهامس.....اظنه الخوف
وننشد ....وين تالينه ..
والم خوفي ...
واردنلك..شجاع يخاف من خوفه .
والم صبري ...واشوفنك حلم غركان بطيوفه..
والم روحي ..واحسنك ..يلن روحك لروح الغير موصوفه
وتمووت ..وينشتل صوتك ع الساني
وتموت ..وتطبع الوانك ع الواني
وتموت...وضاع ميتنه ...المتت انته المتت انه..
واعتابي وياك نساني
واصيرلك جنج ياهيه
واطيرن بيك ..كل الدنيا كيعاني
وانه ياهو التريده يصير
انه (الحلاج) ياجرف الهوى الثاني
وعليك انه يحاديني ..
بسماي الغيم مجروح ونشف مايه
وعليك انه يذاريني ..
صلاه عيون مطبوع الحزن بيهه ..طبع كل صوره بمرايه
وثكل عمرين بشفافي العتب وياك
بس ماوجدت ياطيف
دغدغ زيبك عيوني وحجه احجايه ..
وسكتنه ...
وسولفت روحي
العذاب يهون وانته تهون ..
واخبرنك يحاديني ..
هاي وجوه ماتحزن
وهاي وجوه ماشكَكَـ سججها دموع
واحنه شطوط بينه الماي مدوهن .. لچن سكتاوي تطفيني
وأظل أطفه؟؟ وأشب وطفه؟
ويشب بيه حريج النوم يطفيني وأظل أطفه؟؟
وأكَلك اي يحاديني
حلاة الموت لو مات الرجل وكَفه
مثل موتت الشوف بعين غفله ولاضوه اليلمض
مثل موتت الكَلوب بساع سكته ولانفس ينبض
مثل موت النخل بالكَاع وكَفه ولاعرج يغمَض
ولا موت التموته الناس
اموت وياك عكَب الموت ليليه
أصيرن بالنعش جناز وامشي ويه الحدوا بيه
لوين لياجرف لياكَاع كلمن شاف تاليه
وغناي لياوكت يلكَه تواليه
ويحاديني
ويداريني اخبرنك ، أخبرنك تخبرني
دريت شبيك وشبيه
ويا محراب وجه الله التعبده الناس يل كلك مناير
تيهت الصلى والباب
ولميت الذنوب عتاب
وتبت من حوبة القرآن
ورديت وصرت كافر
ورديت وصرت كافر

عباس الغالبي - حجي الكواغد 🍂🍃

صدك حجي الكواغد ضاع يبنيه
دخيل بكل نهر مياس ضيعتي
وضيعتي الرمل بيه
من اهد مابيه جملتي رفيف الغيف
وبللني بطعم عناب يترهدن خطيه هم
جزه الحسره باالف جنه
بحلاوت هوسة الشمام
وكت افيش من ينشم
وموبيدي
ولا بيدي
الرحمني اخر قطار بسجه اهل الكيض
جاب المطر مشايه
وكعدت ابير مدري المن
يودي مسابك الجلمات
خرسان ورزقهم الله بحجايه
وجفيت اوجوه يابو اوجوه
على اضنون التسير بس ضحك ساعه
وطحنت الحك نفس راعي
لكه عيونج اغنيه وصوتج امتاعه
يسولت رهدنت حنه تعاي
عيوني بيهن ناس ماتلتم
تطيح بوشلت المزنه
مابايع كبل حتى اعرف السوم
الي بخصر الكمر شروت هلاهل
انه مبين مهر حسره ومشاحيف
وحركت سنبله وركصت مناجل
ودفو عيون الهله المايبرد بساع
ومعافف صدك كيعان شايل
لكيتج من كلب والسان محروح
كضاها وي السموم بحضه مايل
وهسه تساهدت طولج على الباب
وتلكيتج خرس لهفه رسايل
وهوسه خمره بكليبي اعله ملكاج
انه المايصحه اله بحضن جاهل
نيتي زغيره بعيون النياشين
وحلو خيط الضوه اتضيعه المغازل
وهو ياخيط مايندل بكاياج
عوز بعوز وانه كليبي جافل .

غازي ثجيل - كلها تهون 🍂🍃

كلهة اتهون .
_جرحي
_أدموعي
_ونتي اعليك
. كلهّةّ اتهون ،
__تعبي الراح...
عمري أللي خسرته اوياك
كلهّةّ اتهون،
.شيبي أللي طلع بالراس
احسدةّ عليك...
گلبي أللي نخيتة وصارلك ممنون
.
بعتني لناس غربة....اوگلبي ضل عليك ..
خاف ابرجعتك تحتاج وگفة وعون
وطيتك عمر من شفت جفك عاز, .
وانتة أتشمتت بيه بس أسمعت مديون
زاعلت الفرح جي شفتة مجفي وياك.
وانتةالصاحبت حزني وصرتلةّ عيون
سهلات اليجنك بالوجه والله
.
..بس
.
. گلي اليجنك من گفاك اشــلون؟؟؟؟
صدگتك ورد من شـفت لون البيك
..بس زينة اطلعــت مامش عطر بس لون
وضنيتك ســند من ردت أوجي أعليك
ثاريك گصب بس أتوجة أتخــون
.

يا ليرة ذخرنة أشــبدلك بتراب!!!!!
وانتةسنين ما بدل زمانك لون
يافالة جلل ومخرزة الشــاخات
يالبيك أنتضيف لو ضلك يلفون"-
ويا بيرغ عراضــة أو بيك خوش ذراع
.

ياوســفة أصبحت بيد النذل مرهون
ويا خرزة يســر تكشف عيون الناس,
شو حصوة أصبحت بيد الذي يكشــفون؟؟
.

عاشــرتك عمر ومتت بيك اسنين,
ضنيتك ســند لو دار بيه الكون
؛خنجرهم لصــف وحنة أنتزامط بيك
فك گراب روحك لاتضل مرهون-"
.

وك أذكر گبل من نسل ريشــك جان
وأحنة أنحومي الك خوف أمن اليصيدون
هدينة أبعــگلنة أبيوم حاطو بيك
هسه اليوم حوطتهم علينه أشــلَون؟؟؟ .

وجدان النقيب - تعال اتمرجح بروحي🍂

تعـال إتمـرجح بروحي
أجيبن خلگ ما متعوب
أناغيـك بطواريـَّه .. ،
،
وأصوغَن من ثگل آهي
ضحكة تعـآند آه الناي
تكتـل كل نواعيـَّه ..
،
وأملح حچـآية البطران
والما لآح عبرة ضيـج
وحدة بكل لياليـَّه ..
،

وأمد شعري على چتافـك
أطرز سوالفي بعينك
واحچيها بدفو النيـَّة ..
تعـال وگلبي إلك مِحتـام
أغنيلك دفو النـوآب
من تصيدة ترچيـَّة ..
،
أغفِّـي مسودنـآت الظَّـن
أگـابل وجهَـك المتعوب
ألولـي بمستَحة بنيـَّة ..
وأتيهَـك بين الحچايـات
أسمعّلك المـآ مسموع
بس بنيِّتـَك جيـَّة .. ،

أكسر خـآطر الوهوآس
وأموَّت بيـّة چلمـة ليـش
بس مـآكو أثر نيـّة .. ،

تعـآل الما يلوحَـك شـووف
ما وچـَّد حـلآة الضيم
ما يعرف يتـوه بآه
ويعثر بيـك تاليـَّه .. ،

ايهاب عيال الظالمي -الحجي مفرع🍂🍃

الحجي مفرع
واذن قدت قميص لسان
يعازة تفكه لو ب الريج بلعة ريج
افزع دله لا يمصخ حجي الديوان
الرجفه هناااك
عيب اعله الزلم بس هيية للفنجان
الونين صياح
الشجر لو مات ذمه بركبة الفلاح
الغيمه اطير مو شرط اليطير يكون عنده جناح
فز ي الضلت المهره بكفااك تلوذ من هديت
الجوع ابن الغجر والكرصه بت البيت
حرز الماي زحمه يضل سكف مشموس
الاخرس مايسولف ليش ياخذ غيبة القاموس
ولو دم النخل ينضاك
لتزل عينه اعله خبزه بشارع من ايفوت لاينسه بكفاه تنور
هيمة كافي
حتى السرگي شهوة باب
ترى التابوت جي حطبات
يستنكيها وينه الشاب
لا تختاض ابتسامت كنطره المشحوف
لا ترضاهاا تتبدل كصص بحبال
حلاة الكذله سجن الطوك
كاروگ البجي حجايه ومو اخرس
لسان الحايط البسمار
وخايف لا تشوف فطوره من تندار
مايطعن ب المرايه

عبد الامير العضاض- دوار 🍂🍃


إمخليك
أنه إمخليك
من تطفي الليالي أضويك
يالنايم إبخلگي إسنين
أتچوّه إعله نارك ماگلتلي إشبيك
وأنه إمخليك
أورثك بالجگاره إهموم
وأتكاتل زعل من تخلص وأطفيك
ياعشگ الصبا المجنون
ياأول نبع ورّد على العشرين
ويا أول صبح يتشابگ إويه الروح
راواني الشمس بمراية العينين
ياغصن المحبّه وگلبي بي عنگود
ياخذني البرد ومن النده إمدفيك
أحبن مشتهاتك وي لهيب الروح
أطفه واشتعل واتلهوگ إبطاريك
يا أطلس خرايط عمري التعبان
يابحّار روحي إبيا بحر ألگيك
ألتف بالخطر و يلفني چف الريح
ومدري إبأولك مدريني إبتاليك
واصبر وطگ سن وخوف يسند خوف
يامتحف عذابي إشلون أعثر بيك
ومتانيك
و... لملمت الشبچ وأتفرفح إعله الصيد
ومدريت الشبچ يلتف علي وأنصاد
واتگوّه ... أرد أخلص روحي ... وأهفت لوم
من روحي الرّخت ومعاند الصياد
أتوچه ...
وعذابك سوط يلحگ سوط
وأعاند وإعترافي إيدوّخ الجلاد
واگف سنبله
عطشان شح الماي
من شفت المناجل غافيه إبچاليك
كتّرت القصيده وصابني الدوار
من شفتك بطل للمسرحيه وذيب
هنوك إبحراره ... وشالك التصفيگ
وفزت إبكل جوائز حفلة التعذيب

شاكر السماوي -صوت الجرح 🍂

شوگي شوگ اجروحنه الماغفت طيف
ابضِل سچاچين اللچم
شوگي شوگ املوحة الگاع التنخي
ومالگت ريحة زلم
شوگي الك دمعة محطه التغفه وي رفة ضوه
وأشتعل صفنة جفن ماشرب نوم
بكل قلم ماسفك دم المحبره
جرح ماذم التراب
ومارضه اتذله الشمس وأتخيط ابشمعة هوه
وآنه كلما اشوف جرحي اشتاگ اشوفك
وينولد وجهك بالمرايه القديمه
ادموع ناس… وتعب خبزه
وثار من إيشان فجرك
والملفات الحمر…. والدم الأسود
والسنين الحبلن بماي الجرح
وصفنة ام وكت الغروب
بمستحاها اتخيط الثوب وتلم شيب العمر
لا وحگ غربة اعيونك
والحنين الشرب عمرك
ترد خيال عله جرحك
مايموت الخضر بدمه نخل
ترد واليسأل نگله
الماي يندل كل درب مهجور بي شتلة صبر
رد نطش حيل الضوه بكل عين عاگر
رد نحني اسيوفنه من دم رگبهم
والرگاب الخاويه ماتنضرب
ولاتظن الدم فطمنه
من يبس ثدي الحرب
من تهب الريح بينه انسوي دمهم گنطره
ونوصل لحدهم گبل مايبرد الغيظ عله چفنه
ومانريد اسيوف تفزع بيها بصمه امزوره
روحي يمته اتفك سجنها بشوفتك
يالون شوگي وياحلم بسمة نهر
مابعت ريتك لمن جاسك عطش
وشفتك الماجدت بيوم الضحك
وعينك الماركضت ابدرب الشمع
اجروحي تغفه بمستحاها
ومن اذكرك…. تعرگ اظنوني سوالف
وأنت يانافورة الليل ونده الشوگ
التگطر شذر وردي
انطيني بس شباچ روحك خل الزمه وما اريد
وشرد اگلك…
الخوف ياكل صوتنه وينمد خيال
وأنت تدري ..
ابد مايركد الماي ابــ بطن خايف
بين گمرة خيلنه وطگ التفگ
الشرب دخانه الشباب
واگفين.. وماوگف ويانه احد
بات دمنه عله السچاچين وبردها
الخضرن دخان بينه
ومن شربنه النار خفنه من الشته ايعود
ويوزعنه بطاقات الرجيف
حتى سرجون الزعيم
غير ارموز الحضاره وبدل الثوره بلجوء ايريح باله
وقلم گلگامش تراجع عن كتابة ملحمه بحق الخبز
وعلي لساه ياخذ من الجوع حصته
ويثلم بـچفه الشريف
من تعب عمره ويوزع بالمحطات الرغيف
والحسين الهسه ينزف كبرياء
والنهر مذلول مايه وباقي بي مأتم عطش
والبطل عباس لساه جربته متروسه غيره
ابراسه يفتر وگفه دخان الخيم
وبعد عندي.. المحطات العفتهن سود ضلن
خيم أعليهن ضباب وروس مرصوفه حوافر
مالگت بالغبشه باب
ولالگت تچوة نفس من طاحت بحلگ النزيف
وروس وگفت لمن طاح الجوع يمها
من لگت خبزتها ذمه اتريد وگفه عله الرصيف
آلة التصوير رمده
وخشبة المسرح مريضه
وماوصل صوت الدمع
الأدوار اتقسمت
ومابقه الدور اليجسد حالة اهدوم الفقير
وماكو مثل الجرح صوت
ولاكو مثل الغربه موت

مرتضى حرب - وداعت التنشف لهاتي🍂

وداعت التنشف لهاتي
من اگول وداعته
طاحت من عيوني
وادم گد هوه الله وعازته
بيـين الصدگ بصحبته وطلع گد حچايته
وبيـين المابي محنه وكشخ بـ المومالته
وبيـين الـ من شافني اثغب ملش إعلي هامته
الدنيا منخل ناس ثاري المالحه تكض والتطيح الباهته
الماحزن وي حزن ربعه ومولحت دشداشته
هذا يستاهل الصحبه؟؟
اعليك امشي الهوسو بعمامته
اعليك أمشي الـ من تگنطر صلت إعلي رايته
اعليك امشي الضعن ذاك الفارجو حدايته
شنهي رايك بالگلتهن؟؟
صدگ لو تحسبها چلمه وفايته
المايجازي العشره باچر من يموت
محد يطر زيجه فوگ جنازته
ها ها:
الطيح دمعه بيومك ردها بلطمه وشگت زيج

عبد الوهاب الحمداني - انجيل النده 🍃

ورة عيونك
ذابلة عيون المدينة
بلايا ناس
وذابل وياها
الورد والگاع
وشطوط السوالف والنعاس
يل خذيت وياك
رب الماي
وانجيل النده
ودين الگناطر
شلون الوحك
رب المشابگ بديك
وانته كافر
شلون اجيك
ودربي شوك
وعگلي حافي
وگلبي ماكلته الضنون
بلا ضوه عيونك
نعاس وكلشي غافي
يا تواليت ذنب قابيل
ما من عنده توبه
وياطواري سوالفك
ليل الحصار
العثر الوادم هذيج
بلايا حوبه
حيل ويه جروحي
عذبني برضاتك
حط ملح روحك عليهن
واستر ذنوبي بعباتك
انت يا اول ضريح
ذنوبي تكثر من اطوفك
لاهي حاجت عين
مفطومه عله شوفك
ولاهي رغبة عشگ
يستاهل چفوفك
ولا انتَ ابالي
واگول النيه بيضه
ولا انتَ الراكب
عنان الطيش
حتى اگدر اعوفك
مدري ياهو النزلك
يم گبري جرحي
وانته اول واحد العندك
عنب يترس طيوفك
مالي حيلك
ريح تسودن رماد جروحي
مايحمل عصفها
طشرتني وعلمتني
الشوگ مثل الريح
مانندل وصفها
الشوگ ياخذني
دوه ل اخر نزيف
وارجع حجايه
ذليله بغير دم
والگه صوتك
يستحي يكشف گذلته
وينشتل بالروح هم
وتكبر ولايات جرحي
وما عرف يمك ملامه ولاندم
وانتشيك الخوف ياخذني
واجيك بلهفة ام
وتلتف عله الروح
صفصافة حزن
والعين غرگانه هظم
وامتحن يم باب عينك
من يمر رمشك سؤال
واشتهي النسمه التغني
زلوفك بطاري شتال
ياتنين النعمه مابيه دلال
مالي حيل الشوگ ياخذني
وارد بلا حبيب
مالي حيل الناس
من تشوفني تگلي غريب
سچة العشاگ مابيها وداع
وحصة العاشگ چفن
كونك شجاع
انته ماتندل جميل
ومن تغني تنام بزلوفك بثينه
ولاعثر قيس عل سجه
وياك يم ريل المدينه
شلون مدري شلون
خاويت النده وسولفت بينه

وجدان النقيب- تهت والمستحه بروحي🍂

تهت والمستحة بروحي
أدور وين ما بيه بگايا إرماد
وأتوسد على جروحي
وأفزع چلمة التنگال
توگفلي بوجه نوحي
وأداري الآه
هلبت
من عيون الناس أداريني
وألاگيني وحيدة هم
وأختل بيني وبيني
شنو ذنبي وحرمني الضيم عشريني ؟
شنو ذنبي وحرمني المسچ والحنة وعلى جروحي يتچيني ؟
أعيش إلمن ؟
وأموت بـ ليش !
آنه أصلاً ضمير الناس موتني ميحييني
آنه بلا ظفيرة وشوگ تشعل ظلمة سنيني
آنه بلاية غير الـ هم
يوميلي ويواسيني
وتهت ما بيني وبيني
اتوچة اعله طاري الشوگ
من أتعب واسليني
وأشهگني نِفس محتام
مامش رية تشريني
وأتخايل الجنة بعين خنگت كل ضحك بيه
وأتوچه اعله آهي النوب
بلكي تعيني شوية
اتمايز عيون الناس تاخذ مني كل حيلي
اواسي بروحي أگول تهون واتجرع بخت ليلي
واغني الآه
تعثر كل محطاتي بغنه الـ ويلي
واعاتبني اعله كل ونه تغنيلي بسواديني
يمن بالروح مطبوعات
ناغَنّي وأغنيني
أنه من طين
موش حجار
متعوب وترف طيني
غَنني اريد ابچي فرح مبيوگ من عيني

حسين الثويني-اليرشني ابماي ...🍂

اليرشني ابماي ارشه ابطگة ايد
الگطره بطراگين ارجعهه اله
اليوازيني على بيعة جدري جاي
ابوجهي يلگه ارسوم مو مالت هله
چلمتي وعرج السواحل ذني توم
سالفه اگبالي تصير المعضله
ابسرعه اعرفه المايودني وضحكه زور
مايحلي العوره شغل المكحله
المايود المسج يطعن بالغزال
المايود عليمن ابقه امجامله
مهري من اجني اچبشه بخزرتين
وما اخزره الثالثه لا اجهوله
التوه شگ طليعهه اتاني اللگاح
ما اجاملهه واكلهه امحمله
النخيته وما اجه بوكت الحصاد
زحمه اعوفه اگبالي يمدح منجله
احجاره والماعجبه افشخه المثل گال
احجاره .بس ما اصير حصوة كربله
البعض گالو يركب محدده شبي!!
حد عرفهم هذا هيه امحجله
لااتدوس الجني واتسمي اليگول
هالمثل بي اني اشوفن مشكله
امشي ادوسه .. ولا اظل اركض وراه
وماتجي على اشفافي طاري البسمله
العنب لو حامظ واذب من طيبي بي
ايصيح السوباط عنكودي حله
الصوچ بيه وشرعت گلبي الرچيج
وبيه طبت ناس ماتستاهله
الموشلب مايستحق اسگي اهواي
ليش اظل اسگي وانطر حاصله
الاسمه مو يونس شعنده لحوتي جاي
خاف مايطلع وبالذله شله
ولايجيني بيوم عسره يمد اديه
ولو.. ع المنجل درب كل سنبله

كاظم خبط -جنت احبها 💙🍂

جنت أحبها ..
وجانت بسحر بتسامتها يتفطن كل حنيني
وجانت بليل الرموش تنيم ايامي وتفرهد كل سنيني
جنت اكَضي بعطش فركَتها نهاري
ومن يجيني الليل حسبه وهم تجيني
ياحلاة عيونها شما يوجعني
انا اصيحن حيل يعيوني أوجعيني
وياملذ طيوفها يسيرن علي ليليه ويباتن بعيني
جنت احاجي زلوفها بلمسات اديه
تعاركن على الزلف يسراي ويميني
وجانت بلمسات أديها الدافيات أتجيس صدري
تكَلي كل دكَات كَلبك تشتهيني
جانت تكَلي أخذ كَلبي ينام بحضن كَلبك
وجانت تكلي بكثر حب العطش للماي أحبك
وأبكَى احبك
حتى لو كل يوم تجتلني وترد تحييني أحبك
جنت احبها وجانت عيوني على كل الوجوه أتحط رسمها
وأحفر بروحي يــ هلبت بالجرح مكتوب أسمها
وساعه أطير بجنح شوكَي ومايذبني الشوكَـ يمها
آه لون نچيمه هيه
جنت أعد كل النجوم وهلبت يصادف نجمها
و آه لو غناوه هيه
جنت أضل كل عمري أغنيها وأذوبن وي نغمها
و آه لون اطويره هيه
جنت أصير الها سمه وكَاع وتطير تحط أشمها
صادگت كل العصافير بطرفهم وأعرفني
وگمت لو مريت يتناغن بسمها يسمعني
وحتى شارعهم
نشدني شوكت جا ترتاح شو كلساعه تمر مشيك سحلني ..
گتله ياشارع انا المجتول
مو حگي من أدور اعله الجتلني
أمس ودت ليه اختها
تگول اختي الساعه بيش وين اشوفه
تگول أختي وهاي اخر مره اشوفه
وردت اگلها اعله السبب
تالي اعرفت
لن السبب ما عندي سياره وقصر هاي معروفه
أوالمتها ومن شفت دمعة جفنها
ضعت بيت تراب دربي وحرت مدري منين أفوت
بلا حجايه ولا سلام
عيوني ذبت روحها وتبجي بسكوت
تگلي موتني اعله ايدك مره وحده
احسن من افراگ بي كلساع اموت .
تگلي باعوني اعله غيرك
جا بعد عمري شريده
تگلي غرگوني بذهبهم وآني اصيحن مااريده
تگلي حدوا كل خناجرهم عليك
وذكروا أسمك گلت اريده
يا حسافه العگل طخت وانحنت تحت الدنانير الجديده
ويا حسافه الشيمه اليحلفون بيها للصدگ كلش بعيده ..
سمو الما عنده تكرم مال ما عنده شرف
والشرف كل الشرف للعنده سياره جديده
ومادروا باليحب شايل روحه وكت الضيج بيده
وحتى لو گدرو يسجنون الجسم هذا بقصرهم ،،
تبگه ذيج رويحتي تعيش بصريفتكم سعيده ،،