حسين الحبتري || كون الوفه ينباع بالسوگ||

كون الوفه ينبـاع بـالسـوگ
وكون الشلونك مو حجي حلوگ
شكت كواغد گلبي مشكوك
ومو من الهوه من الوكت مخنوك

ياهو اليشيل الحمل عني
وجوه النسوني يوجعني
مره ابجي وحدي ومره اغني
وما صحلي واحد يفتهمني

ما ثكل وجهي ع الخطاطير
ولا صدكت بالكالو تصير
ويامن اعيش وتنفض بخير
والعمر يوكف بالتصاوير

مو بالغصن بالعرك مطكوك
ومو من هوه من الوكت مخنوك
ومحد غاثني بس اني مغثوث

وحس الروح تطلع والله مرات
وجي الكلبي وكول يجوز بي صوج
كون الروح الكاها مثل كلب الحمامات
چا ليش اختنك باوقات الغروب
ودور حجه حته ابجيلي دمعات
وليش بصدري احس صياح مخنوك
وليش الوحدي ومتروس زينات
شكثر كايله بس جيب الي يصدكون
يخيعونه الخلص من دنيته ومات
الحمد لله اذا ع العافيه بخير
(بس بنفسي ابات بلايه حسبات)
يجي الليل بسوالف ما ادري منين
اشكال يجيبلي ويترسني حسبات
مره اضحك وكول فرصه وتروح
وتاني الثانيه تعوض الخسارات
واتاني الثانيه
وتمر السنين ورد اندم وكول لا حرامات
المهم ياهو يعرف شبيه ورتاح
انه موزين ساعه وزين ساعات

حسين الحبتري || الشوگ غلطه ||

ٳيصلن ضلوعي و دافية الناس ..
وتلجمني الحجايه مو من انجاس
ساس السهر بالعين دگ ساس ..
شيهودني والوحن خيط الانعاس ..
جنازه و وراهه اصياح بالراس..
ولا ضحك سني ولا اتهنيت
ولا وزعتـلي ابفرح جكليـت..
بعد ما بيها واهس طبت البيت
واعزاز گلبي بالتوابيت ...

وشمعه شمعه الليـله من عمري انـطفن ..
وروحي بيها اشجم عزيز الليله احسنه اندفن ..
هيه مقسومتلي هاي العيشه گوه و ما حجيت
ولا عشت دور اليسافر لا لگيت ابنادم ايگلي بطيت ..
وجفي متعوب اشحلاته وخلگي باب الناهبه اتحمل حجي
الساتر الله عيوني رفن لا يگلبنهه بجي ..
وجرحي مشكلته بگفاي ..
ومدري غربه و مدري من ناسي انلجم ..
وين اروح ..
الحاده اتضيع وجهه وما تشم ريحة زلم ...
وانه ذاك ..الما اخذ عبره ومشه وي التايهين ..
وانه ذاك ..الطاح حلال المشاكل بيد وادم مبتلين ..
وها يريح ...؟
ابهيده وي مگفاي عينيني يريح ..
ذنبي صدگت الگمر حطني ابمجانه ..
ولا مشت وادم بدربي ولا عرفت اشلون اطيح
ولا حلتلي السالفه وكيفت اموت ..
ولا امبطل مشتهه اوجهوه النستني
الـ هسه منهم بيه صوت ..
اجفوف حظن الفاتحه وتشتهي ابتوت ..
وغير اتوب ..
رموش لعيون العثگ شفت السعف ..
وشفت واحد جرحه شاف ..
وجذباه وصدگ بـ خنجر حلف ..
وشفت ناس تشوف ..بس اگلوبهه تدور عمه
وگلت اسد بابي بعد ما بيه ريح ..
ولا ظهر يحمل وازفنه اعله لجمه ..
تصعد الدخان روحه..
ويلتفت وبنفسه تلگه اجفوف الموادع تلزمه ..
فهموني ..الشوگ غلطه ..
وفهموني العشگ غلطه ..
وفهموني العتب غلطه ..
وانه ما طبهه تذكرني بعزيز..
اهواي تعنيلي المحطه ..
وگالوا اتكابر؟ گلت باجر اطيح ..
وگالوا الوحدك لگوني ابلا حبيب..
ناس ما تدري تغث الگاع خطوات الغريب ..
ومو غشيم ...النثيه قسمتهه مثل حگ الجنازه ..
تريد من تمشي بوكتهه..
والتتن كتاله واحد ..
شفه تتلاگه وي اختهه ..
وباهت بيوم الملاگه ..
والحزن صوته اشعلاته ..
والفرح نساني وجهه
بس اذكرنه اشحلاته..
وها يريح. ..ابهيده عزراييل ما خلاله صاحب ..
والسجن مرات خير ..سنين مسجونه الگصايب ..
وانه ما مغلوب بس گلت اشوراي ..
وصورتي تعيش من اموتن ..
والمطر كل عمره جاي ..

سعود الخفاجي || قشمرني ||

بـدرب نملة تلاگينه ..زلفني وگال ما شفتك ..
رايح ..وين رايح؟
وين رايح والشواطي التارسه عيونك نسوك ابلايه روح ..
و واهسك ضحكة يتيم ..
الماخذك منك درب ما يشتهيك..
الشوﭺ اخضر و المشه بـ رايه غشيم ..
رايح الـ وادم ادّور تراب عدهه ..
العدهم يبات الهوى ميبسين روحي ..
ولا لگيت الينطر عيونه اعله خدهه
صارلي اشجم يوم ادور ما لگيته ..
ولا لگيت السالفه الـ بيهم تشدهه ..
رايح الـ ديره ادور بيها وجهك ..
تيهتني اسنين بوجوه النستني البارحه ..
ليل يتوﭼـه اعله روحه ..
وناس يم ناس ابحضنهه اشگد سوالف طايحه ..
ظلمه و الوادم سكارى ومدري وين
الـ يا جهه الـ من عندي رايح...
يا وجه لعيون اشبگه يگلي شسمك ..
وانقريت عيونك انته منين جانت واضحه ..
يا حبيبي ..
و واهسي ..
وصاحب جروحي ..
ضحكتني مره وحده و طلعت الضحكه اعله روحي ..
و ااااااخ يالمدري شلگيت بصف ضحكتك ..
مدري احبك ..مدري احبك مدري لا ..
بس لا كرهتك ..
ضيعتني بعينهم وانه اللگيتك ..
تيهت روحي ومشت عميه اعله نيتك ..
ليش مو شسمك جنت وانه العرفتك ..
انتظرتك ما اجيت؟ ..
يمنه.. يسره اتلفتت يمي و لگيت!
ناس تضحك و ناس تضحك و ناس تضحك ..
افتهمت السالفه تخصني ومشــيت ..
يا فشلتي اگبالهم وانه بحرگتي ..
ويا غربتي بـ ليل ما يندل شهگتي ..
و ااااااااااخ لو تسمع صرختي ...
وداعتك ناقصني انته ..وغيرك يبين نشاز ..
ومن يجي يخرب كشختي ..
واشتهيت عيونك ضحكة فقير ..
وما دريت الضحكه ما تستر حلگ متروس دم ..
ولا دريت اليشتهيله عيون ملتهيه بصور غيره يتندم ..
وجانت الدنيا حلم بعيون كافر ..
خلص وطب لـ جهنم ..ليش نحلم
يله حبني ..قشمرني بـ هلا و مشتاگلك ..
حبني و العباس انه استاهلك ...
حبني واتمشه اعله طولي براحتك ..
و وين ما مديت اديك بروحي اخذ تفاحتك ..
حبني والله اسمك سوالف ما يملهه الساني ..
گتلي خدك وين حتى اندل و اجيك ..
صرت خد ومحد اندلاني ..
حبني ..!!!
گلي احبـــك!! ..
احبك ..ﭼـلمة سامعهه اشكثر من غير ناس ..
بس اريد اسمعها منك.. يله فنك ..

ايهاب المالكي || المقهـى ||

امضى الكثير من حياتهِ وهو يقف على الساتر مدافعاً عن العراق لـ يأخذ نصيبهُ من الرصاص و الشضايا وهو الآن يقف أيظاً ولكن كـ عامل يبيع الشاي في المقهى ..كاد ان يكون گلگامش لكنه لم يكن يبحث عن عشب الخلود بل كان يبحث عن منزلاً للأيجار يأوي فيه اطفاله ...

شطّيت العراق و هوه شطّاك ..
منو البيكم لـ الاخر واگف اهواي ..
تدافع عن وطن ما بي الك بيت
وجبتهه متاني يفرج وكتك الجاي ..
يالبوكت الحروب بخندق تنام ..
وبوكت السلام تدور افيــاي ..
بالمقهى اخير حروبك تصيـر ..
ما ماخذ مكانك بالحرب هــاي ..
جبت عمرك قذايف يمك تطيح ...
هسه تدگ بـ اذانك طگة الصاي ..
قصر قاتلت طوعاً؟ عندك اسباب؟
المهم ما قاتلتني و واگف وياي ..
اذا بجروح گلبك هبت الريح ..
يطلع صوت منهن يشبه الناي ..
تسولف وي يوميتك ع الاحلام ..
ليليه و ترد ما طالــع بـ راي
يبو حلم الرخيص الينبني بلوك ..
واطفالك قنوعه وتشبع بـ ماي ..
ثمن للبيت ماكو وتمتلك بيت ..؟
جا ليش الشضايا العندك اهواي ..
يالمخدر السواتر لمن تصول ..
مثل ما هسه بيدك يخدر الـﭼـاي ..

ايهاب عيال الظالمي ثگل جدمي

الحمدلله اعلى كل نزوة اشتهت طولك
بچيت من الحلم للـ وين !

وحگ جرحك !
اغلى احوايجي .. جرحك
طحت طيحت الـ "ماهو فلان" لو غيَّم حزن ع البوب .
مشيت وياك .. متعوب و يحب متعوب

عيونك گنطرة لحلمي ،
ادنالي .. كون ارموشك يشبگن على ارموشي .
خل نطفه ،
شمس و غروب ! دمع و عيون !
انتَ امزاود الله بگلبي .. اتوب شلون !

مچوي .. و طايح بمايك ،
بعيد .. و تندل جروحي .
اضم عليك چي ضميتك بروحي !
انا من اطلعت مغتاظ ،
ديرتكم و لا رحمت .. ثِگل جدمي
سحل صرت اسحل بـ اسمي

تغيب و تلتهي بغيري ..
واسجدلك مطر ع الشوچ
الگمر شامة اعلى رگبت كل نهر مشلول
كلهه تريد تقراني ..
رسالة بمحفظة مكتول

جنسية اليحب من غير ديرة الگاع ..
چي ماكو وطن صدفة
اليحب من غير ديرة .. يصلي للـ سچة
و ما يتلفت من اتمر عشيرة هيل

حطني بگلبك ارد اصفى ، يجاون گلبك اموهس .. شِلب روحي
الگبلك شگگو روحي ، وصية و شگگو روحي .. شلي بروحي ؟

احب خوفك !
عجاج "عيـون" .. فز يا خِضرمة اعلى الماي ..
الحلم لو جاسك اتحصله
غلطة !
و هيَ هم مرات غلطة شاعر اتوصله

عكس كل شاعر من اسمي حزن گلبي
رابع مره تغلط بـ اسمي گدامي ،
و تفرفح روحي .. يجلي الصوت و اكوار اعلى متن الـ "هاا"

تعاتبنه ! لحد ما نشف ريج الـ "ليش"
انا من اطلعت مغتاظ ،
كثر ما شايل بگلبي .. ثگل جدمي

السَمار استوطن بلونك ،
و چي منك و بيك احلامي عرفنَّك
و چي منك و بيِّه جـروحي عرفنَّك
التين منسِّم بعينك ،
دِنت نفس البلابل من جزت عينك
و خذاني المستحة اعلى اللِب
الچذب هم يدْنَّه للسكران ،
المو توّه عرِف بالكاس يگدر بالحچي يچذب

ناگوط الشته بشفتك ،
و غيرك .. ما لگو غيرك دفو بروحي
وك غثني .. يالما فارغ تغثني !
ولو مو راحتك يمي .. اخِذ جرحك
اغلى احوايجي ! اخذه
انا من اطلعت مغتاظ ، بس كضيتني من ايدي ..
نسيت عيون ديرتكم !
و نسيت الشايله بگلبي !

علي رشم - بس اصبري 🏴

بس اصبري
مرورة الفرگه اعلى صدري اتطيح نجمه
واعثر بصوتج ضوّه واتبده ظلمه
يوكف بصدري هوّى يكفيله دنيه وخلكي نسمه
توها بردت وانتي مريتي رصاصه
خايف اتروحين واذبل والعطش يترس مكاني
وخايف اشرب روحتج واخذلي ليل وما اتاني
هاي اليه اسنين بارد محد بملكاه جواني
اشلون ما طكّت عشب بيّه الثواني
ويخلص الليل ويخضر ليل ثاني
بيه واهس كافر وربج هداني
الليل شبعني سفر واني بمكاني
والتسافر عينه بترابج حرام...
شوفي منج وين اغضه
يامسافه البيها جدمج ماتوضه
ويا طريق المامشيته وماعبر ظهري وتشظه
وياندى المنطيج عمره اشكبره حظه
فكي شباج الوجع وانطيني روح..
يا لمشيتي الغير ديره
السمه ازغيره اعلى عيني وروحي اسيره
المايشبهونج..شكلهم هي حيره
كل بعيد ابعيني يزغر وانتي بعيوني جبيره
جنها حالي الغيمه تلهث بالجزيره
الوحشه ناس ابغيبتج ما عدها غيره
اشلون اسده يالفراغج وين حده
ابيا عطش تلكين سده
ابكل جزر تلكين وجهي بلايه مده
وانه خاطر لهفتي بكل طيف اشده
وكل جرح يندارلي ويلكاني عنده
ابكل مكان العوز وابن ادم غريب
وغربة العاشك طويله بلايه رده
حاصرتني..الفشله سكرانه اعلى وجهي اتريد تلكالج عذر
كون يعرفني الحطب جا صار ماي
ولايورث بيه كل حيله الجمر
جا ولابغصان خلكي اغيابج يمرها بكسر
جاندهت الروح من نومة ضواها وما نشف بيها الصبر
جا اندليت الخساره بيا كتر
وجا عرفت اشلون ما يطفا العمر
لو تجيبين الزعل كله وتجين..جالكيتيني نذر
بروحي لميت الندى وشبعته ليل
وانتي ما مريتي بعيوني فجـر
هذا عمري..وذاك يوم...وشوكي يلهث جنه جمره
ياهو ما مشتاك خل ينطيني ليل
ومني خل ياخذ صبح بعيونه صحره
وين ماروح التفت والكاج يمي
بالوجوه الماتعرفج عفتي ذكره
بيه يوميه الجرح ياخذله سفره
ياهو مثلي وجهه فارغ من حنينه وتارس الدخان صدره
وانتي أنتي..الغيم بعيون العطش محفوظ كدره
وانتي ماكو..اشلونه حالي وهو جان الملكه نار
ينزل اشراعي حلم والماي يوكف
والنوارس ما تحط لو حظها طار
الصخره حظ العاثرين وانتي حظج توه صار
لــو تجيــن...جالكيتيني ملح بي حوبة أمي
جالكيتني خضار
اشويه تاني مروة العاشك نهار
بارده اعيوني عليج وكلبي حار
منين اجيب الحيل والحك
وانتي تمشين بجدم مطلوب ثار
حتى ميشــوف الموادع
كـون من يوصل محطه ايغمض اعيونه القطار

رائد ابو فتيان - احن الگلبك الما حن 🏴

احن لكلبك الما حن .....
واتلذذ بهجرك والوصل وياك
واذكرك وابتسم وانوب ارد احزن
حلاة الذكرى من وياها دمعة تطيح
شفتك تبتسم ركعة بصلاة الون
سلام لكبك الما حن ....
وسلام لدمك البارد
يل ما كتلي اجيك شمالي افشل الروح
ليش اكشخ وانطرك جني متواعد
أذا محتاجني اتعنه
حركـ شوككـ االراكد
واذا ماشيت غيرك ناس
واذا بأحضانهم كاعد
انه بس حاولت
ليش انحسب خوان ما دام الله يدري بكلبي بس واحد
وصنت زرعك وانه بروحي مواسم جوع
ومن سنبل ودادك كرصة ما حاصد
انه غراني فيك من جنت حطاب
والمهيوب امددها
لمن جنت اخلي بكل جذع نيشان
اختاريتكـ الشجرة لاكعد بسدها
يل ماخذني دولاب وهوه
اترجاك بوجهي الدنيه لتسدها
هاي الروح طفله وددلتها بيوت
وادم خبزة ما عدها
لا اتيها ولك تكسر هواي كلوب من يضيع معضدها
والي يمك كلب من تبتعد رجعه
ولك بيه حنيني ماضي طيوره يفزن بسرعه
دنطيني مجال اتفاهم ويه الناس
كل ما اريد اسولف تنزل الدمعه
اتعودتك هوه معلم ما ينشم
اذا ميطوف برديه
او لا ضيجت خلكي وياك
تطلب واني اكول الدنيه مكضيه
اضمك وين ما بيه
انت بروحي وي يشوفوك
دكه بوجه عربيه
تنزعل ينخطف لوني
ويمدد جرف بعيوني
بسرعة يبين شبيه
الزلف لمن يبوسة الشيب
عليٌ زعلانه ترجية

صادق الجهلاوي || گلبتهن ||

گلبتهن واشتهيت اقرالها ...
والبالي يدور أحسه ابالها...
شفت شنهو الظال من الذكريات...
هنه صورتهه وعطرها وشالها...
وكمت احاجي الصورة واسمع يمي صوت...
مدري ياهو يصيحلي ادنالها...
واركض مفرفح والآخر صاح وين...
هيه تعبانة دخلها بحالها ...
كتله بس ارد احاجيهه واروح...
ارد اشوف غيابي يمكن سالها...
ارد اكلهه بداعت امي وروح ابوي...
روحي عكبج كلشي ما تسوالها...
خاف حسبالج نمت ليل بجفاج...
لا وحك الما انشاف خيالها...
وكمت اكلهه شلونه ليلج من وراي...
تكلي مثل الما حظت بطفالها...
لا تغمض عيني ولا تستراح...
شما تريد تنام تتراوالها...
اي وداعت هاي البحضني بجفاك...
احسد المرتاحة عند عيالها...
وانت تدري الما حظت بأول حبيب...
دوم يبقه اول عشك جتالها...
حته هاي المكبرة ام خلك الجبير...
ليش ما تخاذني مدري شمالها...
دنكت كدامي وكلتلي كوم...
المهره هيبتهة بعزم خيالها...
شيل راسك يمن رفعة راسي بيك...
النجمة ما تنشاف لولا هلالها...

ناظم السماوي || دوريتك ||

دوريتك بين نجمات الثريا وما لكيتك
يا حسافه تبيعني برخص الأمس يا الما دريتك
روحي وحشة وطيفك الغايب عبرها
ليلي كلمة عشك عذبها صبرها
ولك لو تسوى العتب جا عاتبيتك
ولك لو تسوى العتب جا عاتبيتك
عمري بردين شتا وبكاع هيمة
عمري سباحة بجرف عاشت يتيمة
وأنت مطرت صيف مرت ياحريمة
تيهتني وتهت والغربة عذاب
وعيني ما تعرف الماي من السراب
بهيدة يالكلك دغش ...
بهيدة يالكلك دغش ...وأنا أشتهيتك
ولك لو تسوى العتب جا عاتبيتك .....
ولك لو تسوى العتب جا عاتبيتك
شوكي صفصافة حزن منك
بقايا ..جفنك النعسان خايب ولك ما مرة بچالي
حوبتي تعثرك ياخايب انا ودموع الليالي
حوبتي تعثرك ياخايب انا ودموع اليالي
جرح الموادع كلف فنك تشيلة وياك
ونه بدون العبي لايك ياماي الحب يا دهيله
أشدعوه يالتايه برايك .... أشدعوه يالتايه برايك
وانا بكلبي شريتك ..... دوريتك

فاضل عبد الساده || عوادين الاقفاص ||

هو مو كلمن ينجرح جرحه يطيب

لا ولا كل بيت ضعفه من الاساس

لا ولا كلمن هجر كاعه غريب

كلشي بالدنيا الة احدود وقياس

اكو ناس كلوبهة من الهم تشيب

واكو ما مهموم ومشيب الراس

الناس بيهة اجروح تحتاج لطبيب

وآنة بية اجروح تحتاجلها ناس

كبل حسرة يخلف بكلبي اليغيب

بإنتظاره ابقى شمع واشواكي ياس

لاكن من شفت الغدر من القريب

بدلت دمعي ضحك والسلوى كاس

اني عاشك ضيم واطرب للنحيب

هم شفت شجرة بحياتك تهوى فاس

وانة مكور حزن بس مليان طيب

حتى بلما حاس بية بضيمه حاس

كالمسيح اصبحت وهمومي صليب

والهموم شلون من عدها الخلاص

عاشرت بلبل ربة ولكيته ذيب

وهسة اشك حتى بعوادين الاقفاص

مو عجيبة انخنت بس هو العجيب

تبقى للخاين وفي وكلك اخلاص

ليش يا كلبي لظلمهم نستجيب

ويا بريء ال يقبل بحكم القصاص

لا اتصورلي العدو بصورة حبيب

ولا اتكلي الورد اقسى من الرصاص

ولا اتكلي النار ما بيهة لهيب

آني شاعر لا اتصير براسي قاص

أدهم عادل || احب وحـده ||

(أحب وحّدة تگلي الگمر من يا لون؟!..)
(أحب بنية ما تدري الخبال شلون..)
(أحب شفة تريد الدرب بس مّتون !!)
(تعّقل وآني الاتخبل !..)
من تّضحكين
تطّلع للصحارى سنون !..
ومن تبّچين
هاي الدنيا ما يبقة بوجها عيون..
ومن تمشين
يمشي وياچ دمعي ظنون..
حرامات العقل وياج
چان يخاف
ما شفّتيني بخبالي !!..
ما شفّتيني
من چنت أزرع
شفافچ أعلى خيالي..
ما لحّگتي بية شلون
من آخذ عيونچ وأختل ببالي..
بدلة عرس للعقّال
مترهّمين
للشكّگلچ هدومة..
مترهّمين
للبايع سنينة لمگبرة
وبعدين
مآخذ منها بس يومة..
خسرّتي أنسان
چان يضمّچ
من الناس بهدومة..
يل تمشين
سم أصفر بزردومة..
(ولو يدري)
إعلى دمة الترس كل الكون
حتى الخنجر يلومة..
ما مظلوم من عيونچ الوكحات
بس عيوني مظلومة !

محسن الخياط || الطوگ و المحبس ||

رحت كوه بجرح من سيف
بي ماضاج خلك السيف يتونس
رحت كوه صعدت صعود
اماطل والصعدته املس
رحت كوه اذب روحي على العطشان
واليابس كبل سنتين بيه الحس
رحت كوه مثل كاغد عتيج
وملتف ومشكوك ومعفس
اصوغ الونه بيها احجي
واخيط الحسره بيها البس
ومن شفت الخضر ماطاح
رديت على الميبس
نشدت الليل عن وجه الصبح ماكال
شاور وحشته وغلس
يمشحوف على ريح الليل
تاه معيبره وسيس
ضوه مطفي وشمع مخنوك
هلبت يوم يتنفس
وﻻرده وﻻهوسة حصاد
ومنجلك هوس
حرت بيك وحرت بيه
عمت عين الدخول المايضوك الخس
وحك ذاك اليعدي الليل
نايم كلشي ماهيس
انا جروحي جرح مايدري شمتاني
وجرح فاته الوكت ايس
وجرح ظل ياكل بروحه
انمرد والينمرد يلهس
شريت الجاي يشريني
وعليه مزاود الشدات يمهندس
يصوغه من حنين الكاع
من تغسل ومن تلبس
قلم من لون الكتابه
يحلو الذات والملبس
العمر بردي ويناتر بي
يعته الوكت يتهلس
اخافن جيتك تفوته
واخاف الباجي يسلس
ماتكعد جواك الريش يالنعام
كضيت العمر تشمس
بنفسج ياضوه الواحه
يتكي الشام يملبس
سرج ليلو ومهر ادبس
لهسه وماعشكت عليك
وانت الطوك والمحبس
يطير الماي يانورس
اغنيلك شغنيلك
اغني شلون وانا اخرس..!

احمد عاشور || الـ ما يعرفك ما يثمنك ||

المايعرفــك مــايثمنـــك لاتــروح
هنانه ظــــل بدار حقك مستجن
وهيه مو شغلة مكـــــابر لاتخاف
انت ســـــــر وهيبتك من تندفن
الوحشه حيل تلوكلك ظل بيه ليل
حتى اسمعنك ونيني من ارد اون
بحركة الما تدري بي ميت عليك
اي بحركة ياس وي حن وانه حن
ولا تحجي اليسوه والما يسوه بيك
الدمعه ماتسوه فلس بره الجفن
النثيه اليموتهه مو طلعان روح
تموت من يحجونهه بطرف اللسن
شلون ماتكلبني تلكاني غشيم
والله ماضميــــت سرك لو فطن
جنت اشم ريحة وداعك من زمان
من جنت تتخيل ضلوعي سجن
من جنت تشبكني وعيونك لفوك
تطير بس تخــــاف وترد للغصن
تشيل جدمك واني اكلك لا تعال
يا (جنين) الدنيه مو مثل البطن
هاي وادم ماتعرف احساس شوك
كبل لاترمش عيونـــــك تنطعن
وياهو يكدر يوصلك وانت بحماي
بحظني وتلوحك اديهم لا تظن
ابليس يندل للجوامع مايفوت
والله مو عزة نفس بس ينلعن
ابليس يتلكه اليمر منطي كفاه
شحال لو واحد يجي يحظنه حظن
وانت شموازيك تمشي بغير كاع
الغريب ويه النفس يشتم حزن
اليغرك يشيعه النهر بجفوف ماي
تشمره ويكظه الكصب مايندفن

مظفر النواب || للريل و حمد ||


مرّينه بيكم حمد ،

واحنه إبقطار الليل

واسمعنه دكَ اكَهوه

وشمّينه ريحة هيل

يا ريل صيح ابقهر

صيحة عشكَ يا ريل .


هودر هواهم ولك

حدر السنابل كّطه
-

يا بو محابس شذر ، يلشاد خزّامات

يا ريل بلّله ابغنج

من تجزي بام شامات

ولا تمشي مشية هجر

كَلبي بعد ما مات .


وهودر هواهم ولك

حدر السنابل كَطه .
-

جيزي المحطة بحزن وونين يفراكَين

ما ونّسونه بعشكَهم عيب تتونسين .

يا ريل جيّم حزن أهل الهوى مجيّمين .


وهودر هواهم ولك

حدر السنابل كَطه .
-

يا ريل طلعوا دغش والعشكَ جذابي

دِكَ بيه كل العمر ما يطفه عطابي

نتوالف ويه الدرب وترابك ترابي .


وهودر هواهم ولك

حدر السنابل كَطه .

-

آنه أرد ألوكَ لحمد . ما لوكَن لغيره

يجفلني برد الصبح وتلجلج الليره

يا ريل باول زغرنه لعبنا طفيره .


وهودر هواهم ولك

حدر السنابل كَطه .

-

جن حمد فضة عرس جن حمد نركَيله

مدكَكَ بمي الشذر ومشلّه شليله

يا ريل . ثكَّل يبويه وخلِ أناغيله

يمكن أناغي بحزن منه ويحن الكَطه

كَضبة دفو ، يا نهد لملمك برد الصبح

ويرجفنّك فراكَين الهوه ياسرح .

يا ريل . لا . لا تفززّهن . تهيّج الجرح

خليهن يهودرن حدر الحراير كّطه .

-

جن كّذلتك ، والشمس ، والهوه هلهوله

شلايل بريسم ، والبريسم اله سوله

واذري ذهب يا مشط يلخلكَكَ اشطوله .

بطول الشعر

والهوى البارد ينيّم الكَطه .

-

تَو العيون امتلن ضحجات وسواليف

ونهودي زمَّن ، والطيور الزغيره ، تزيف .
يا ريل . سَّيس هوانه وما اله مجاديف .


وهودر هواهم ولك

حدر السنابل كَطه .,!

عباس الغالبي || صفنة اه ||

:
لجمهن يركص بروحي..
وتوازة اعل شم الآه..

رفكة ماي جاريت النده بطرواك..
وتسرسح عباية طيف..
... وتغطه اعل ريح شتاك
يتمشه اعل جفني الطير...
وديت الحلم للغير..مافك ياخه مني جفاك
جمدوب الكصب بردان
ونه بوجهي مضيف انسان
مافز اعل صيت الشيخ..
فز اعل الغنه الملموم.
وحفنة هموم
وحجايات (صفنة نوم)

كلشي ولااشوفك جاي

طبع الناي جيتك وآنه ضيجة صوت
ماعايز حزنّه هواي..

رافكتك خلك عاكول
بس بوجه جوري ابيض..

ورافكتك سهر مشلول..
بس بوجه صبره انفض
...
علساعة يطيح شوفي المنتجي اعل الدوم..

ما ملجوم منّك بس اشم فراك
وي كل غبشه بيه يحوم

اتوجه اعل طيف العام...والمّن شكو من التسعين

ظل بجيب حزني المالكاله الثام

وفزلك جنّي ركصة ماي من يسمع غنه الخضرة
وغنّيلك يتيم هواي ...(زفّو عيني للكمرة)

ولامندوم,,,

انه لخاطر غبشتك راح اعذره الليل..

عزيز السماوي || لا تنتظر ||

لا تنتظر
يزي اكبرت
والدنيه صارت موش الك
وراحت مشاحيف العمر تفتر فلك
عيونك اعلى دروب العشگ
غصن الصبر ظل ما يطگ
لا تحتركَـ
يالزارع الآمال بسنين الوهم
اثمر ورد مصبوغ بجروح الندم
شليلك ثمر جذاب مابي كل طعم
اتأسفت على أيام المضت
مامش بخت
رديت تمشي بلا گلب
وفراگ دنيانه تصب
حبك صعب
بيدك مجاذيف الضوه وثگلن اهمومك من زغر
ما ندري دنيانه تظل بس ليل ما بيها فجر
لو طلفح گَليبك صبر
لا تنتظر...
اسمع سواليفي شكثر
جرني النفس للگاع .. وك ما بيّ أجر
بدموعي موتّ الضوه ..والدنيه وحشة
ابلا بدر
مو فاضن اعدول الصبر
مامش فجر
ومشيت سنطة بلا حجي
بطل يدلالي البجي
اتعكز على اوعود الترف
والليل تدريبه كلف
ماظن يعف
وضلوعي هزهزها البرد
حسبات تاخذني وترد
گضبة عرد
حصلنه من تالي العشگ گضبة عرد
او ظليت أشد بجروح عمري شگد أشد
ابذاك البرد
شديت كسر البـضلع.. ومشيت ودموعي تهل
ومشيت متعني الترف
طلعولي وضلوعي اتخذف!
وشعندك بتالي الليل .. نام النجم نام سهيل
والشوگَـ راح ويه السيل
والخيبة تعصر بالگلب
رديت ماعرف الدرب
وك يا گلب
غفلة الدموع تموت برموش الجفن
ما ندري تالي الشوگ بس ذلة وحزن

ذياب كزار ||| سورة مـاي |||

ياخذني الحلم و يدور
سورة ماي !
ملت من شواطي الماي
و عيونك گمر يا هيه ، ما لمت گمرنه بحور ...
و انه بجفي الرمح تايهه
و أتيه وياك ضيعني ، لذيذة الغربة عد بابك !
ولك يا هيه جرحني
لذيذ الجرح طعمك بي ...
يروحي البيك من شلهة سفينة نوح جنت وياك
گبل الموت حفنة دم
و أجيت وياك عگب الموت سر مذبوح
أداويلك جرح بجروح ..
أريدك تلجم جروحي غميجة و سرهه ما ينگاش
غميجة جروحي موش جروح
و أجيت أنشد طفل مصلوب عد بابك
نسه جروحه و لوين يروح
مشيني اعله حد السيف أگول افيش
ونزف روحي حد الموت ...
مايعثر جدم ويزل ولا يرجف ضلع بسكوت
مشيني اعله غيمة صيف امطر دم واكلك فوت
مشيني ولك يا هيه جرحني ولك يا هيه
حاجيني مامش صوت
هنيال الشمس تنزف ضواهه وتحترك وتموت
وجروحي خشب تابوت
واردن للحلم مجبور وياخذني الحلم ويدور
وافتر زفة ويه الكَاع سباكَه بجنح مكسور
وعيونك كَمر يا هيه تايه
تايه وبسمانه يدور
ينشد عن كحل وبخور
ياروحي سمه ونهران شو صيري كحل وبخور
للرايد كحل وبخور

ميثاق الهلالي || ما تستاهل ابـﭼـيلك ||

ما تستاهل ابچيلك حرامات
ولاتاخذ بعد من عيني دمعه
چنت كبر الجرح شايل معاناة
وصدگ چان الگلب من ينعه ينعه
چن داخل حسن لو طلعت الاخ
وتطلع روحي الك وتردهه فدعه
حسبّتك رقم من لمعة البيك
وين ادري الصفر هم ينطي لمعه
وين ادري الغصن بيه يركض الموت
وعلى عش المحنه يودي الافعه
باچر راح اچفن كل الجروح
ونعش الذكريات براسي اشيعه
وباچر راح اهدّم بيت الدموع
وابني من الفرح بعيوني قلعه
وتذبل شفتّك وترد الي زحوف
وانه بچفي النهر وبكيفي اگطعه
وأگلك كلشي مات اللهفه والشوك
محال اليندفن تگدر ترجعه
وسود تصير كلهه ايامك البيض
وينذل خاطرك ويعض اصبعه
مثل ماجرعتني بكاسك الموت
كاس الذل شرط باچر تجرعه
چنت ازرع ورد بس هسه مجبور
حته الباقي منهن راح أشلعه
أيس مابقتلك يمي اسرار
وحته اليدگ باب الروح ادفعه
بقى يمي الشمع بس ذوبه الليل
وانه متاني الصبح يطلع واشيعه
عرفتك ثوب بس ماتستر العيب
المايرهم علي مجبور انزعه
چنت اخجل واعبرلک حچی هواي
واعرف بي چذب بس گلت اسمعه
وهسه أتگطعت وياك الدروب
وبقه درب الخجل بلساني اگطعه
كرهتك كثر ماودعت الشموع
شمعه بعيني تحله وتطفه شمعه

كاظم اسماعيل الكاطع || سفرة مجانين ||

جربت مرّة
وبعدهه زنجر بگلبي القفل
يوم حب بارد جمعنه.. وعرفت ما نشتعل
ردت اجيب الروح گوة
البيتك المسكون
لكن ما رضت دگة رجل
گالت الشرفة كمين
وخوفي من عدهه يطل
كل شي بيها مو حقيقي
حتى هذا الگمر لعبة
من خلص دوره وطلعنا نزلوه
اهله بحبل
والنوارس مو طبيعية النوارس
كل مهمتها تفرح الناس
وتبجي الجرف من تنكتل
ابيتك المسكون مجلوبة النوارس
على الناس جناحها يرامي نبل
والتماثيل اتحّرك
وعلى طعنات السيوف
الحجر يضحك
وعلى الما يسوى تطيح الروس جملة
والشوارب تنفتل
والطيور ملثمة ابّاب الحدايق
بينهن-ثارات- ودموم وفصل
الساجية البيتك عليها
مومثل باقي السواجي
شكد عجيبة الساجية البيتك عليها؟
.ميهه..كل كطرة شكل
شحصّل الگبلي وجي البيتك
وخدمة؟
ومثل الگلوب اشتعل
الشمس ترجع لاهلها
العصر عميه
اثيابها بطين الحدايق تنغسل
كل حصيلة ذكرياتك
كاتل ومكتول صرنه
والحقد بيناتنا همزة وصل
آه يالكلك تناقض
خدك وكلبك عجايب
صورة مو طبق الاصل
خدك بلون الوفر ليلة ضباب
وكلبك بلون الكحل
وجان همك تستغلني
وغصن المكابر بروحي ترشّه ذل
وصرت باعيادك مغنّي
وصرت باعراسك طبل
وكاس واحد
مرة من صحتك شربته. اسنين
خلاني ثمل
وشرد اكل للعيروني
واستحي وهسه آنه شايب
مهرتي حجلة طفل
وهي فصلين الرواية
وانتهى اول فصل
والف هنيالك عليه الفصل الاول
جان تعذيبه سهل
هسه آنا وياك والبر
سفرة مجانين حرة وانتهى
دور العقل
اثنينه بهاي الجزيرة
لاشهود ولا قيود ولامثل
نمشي
ومغمضين نمشي
بالرمل غرّز جدمنه
ردنه نطلعما كدرنه
وآه من يلتف على الساك الرمل
يوم مر.. ويوم ثاني
ومايسمعك هالرمل لو
كلت حل
يوم ثالث.. يوم رابع
والعطش والجوع اخذنه
والدمع ما ينشرب
والرمل ما ينوكل
يوم خامس-يوم سادس
وما نلحك على السابع يمكن
وبي نحتفل
وبعد شيفيد اعتذارك؟
ينقبل- ما ينقبل
بالسمه الغربان باعتنه وشرتنه
وقسمتنه نصير جم وجبة اكل

كاظم اسماعيل الگاطع - الرحيل 💚🍂

مالي خلگ الطيف
لو بسط على جفوني بعذابي
ومالي حيل ايلاوي الوحشه من اغني
وآنــــــــه
لو تسمع ونين اغناي تنسل الربابه
ما فرحت "ابنايلك" ساعة وصل
وسنين بچتني "العتابه"
وما جرعت اموادعك
وموادعك علگم شرابه
من قفلت الباب روحي اتبسمرت!!
ووداعتك بِچت اخشابه
وتدري
عاشكَگ من يدگ باب الولف
ينهضم لو محد يرد للدگ جوابه
وتدري
ابحال الگلب
كون الخذاه طول غيابه
يا عذابه
وآني ما عندي گلب يجرع ونين الشوگ
من يذكر احبابه
لا تذل روحي بودادك
واليذله الشوگ اظن محد يهابه
لا تخليني ابدرب فرگاك
مثل التايه ابليلة مطر
والعرف سد ابوجهه بابه
يلتهي ابضيم الدرب ؟!
لو يلتهي ايضمد اصوابه
يالنويت اتشيل!!
من هسه العمر حسب احسابه
لو وراك ايشيل ويذبل شبابه
لو يظل بِچفوف شماته لعابه
او لو صدگ وتشيل!!
شيلة اجنازة العشره الطويله
اواسي گلب متيمك وابچي المصابه
لچن گلي شلون !!؟
لو عن الهوه
ومريت ، ولگه البيت يتناثر اترابه ؟
من قفلت الباب..
روحي اتبسمرت..
وبنارهه التهبت اخشابه
لا تخليني بليالي اجفاك اغني
وآني لو تسمع ونين اغناي تنسل الربابه