(القيامة ) عريان السيد خلف💚🍃

اسِتْمٌتْْعوَوَ💚🍃

الحيطان منخل والدروب حفور

والبيبان صرخه بلا صدى ولاصوت

صفنة گمبره بوحشة مسية گبور

ووجوه الزغار الحاضنه الشباچ

باگة ورد ذابل بالحزن معصور

والنظرة متاهه وخوف يرضع خوف

من يهتز قفل حسبالهم شاجور

من يهتز قفل حتى الطيور تطير

مرعوبة جنح وبلا وعيها تدور

ماظل لاملاذ يلوذ بيه الخوف

بس حسرة مرارة بحشرجة مصدور

قامت والجراد اسراب تتلى اسراب

من تسكن الريح يعشعش المنذور

قامت والمناير تختل ويه الناس

وتخاوي الرصاصة الصگر والعصفور

قامت والبشر مو بشر غابة زور

يحصدهه العصف ويلوچها التنور

حتى الماي ورث والتوى الصفصاف

شاحب والنهر من كثر غيضه يفور

والموت بصلافه يدگ على البيبان

ويوزع عليهه السدر والكافور

قامت والدقايق ترضع من الموت

كل لحظة بطبگ كل ثانية بعاشور

هنا دفتر كتابة ...هنا حمامة بيت

هنا وصلة جديله بچف طفل مبتور

هنا تربة صلاة والدم عليها هلال

هنا مصحف جلالة من العصف منشور

هنا صرخة نثايه تشتت بالريح

على جثه تململ من چلب مسعور

قامت والمناية تدور فوگ الروس

صفنت رحى الگاع ورحى الموت تدور

قامت من دخيلك ياعلي الكرار

مو هاي القيامة المن بعد مذخور

حسن البركي || بطش العرندس الشهيد ||

العذر ما وﭼـدوله بسـﭼتك نيشان
گالو طب صدگ لو معتذر ﭼا ظل ..
موش انته التغثك ندهت الها خوي
وتعكمش ضميرك ﭼـيلة المگبل
ولا انته التوهس گلبك ابنفنوف
ولا غرتك جملة بالحـرب طـّول
ولا وصلة عرس لو تظل وصلت گاع
گبل لا جثتك عالگاع تتوصـل
شني جا تايهه اتعگل اركبك غاد
ولك جا غير ابوك اتريده يتعگل
يا بطش العرندس يا عرمرم ثار
يالمحصص نسر يالوين تتحصل
خلك وحدك جا المن يگولون
من يحضر الماء اتِيممك يبطل
تشبه ﭼـيلتك بالفزعه ما تنشاف
خل تخطي الهدف بس فنهه تتعطل
الجدم يثگل بشمة خبر موت اعزاز
وتلاحگت جدمك گبـل لا يثگل
ضهر گاعج هجع يا سحگت ام التوم
واليسحگله شي حساس ما يخمل
ما خفنه اعله گاعك حتى من العين
يـ جروه و قل اعوذ و مغرب و حرمل
خلهه الملسه تشخل جسمك اكثر صيد
الشبج ما صاد لو ما جسمه المشخل
خل دمك عذر بـ السان كل عريس
دخل ساگ العروس الدور يتخلخل
يالمبلل كرم يالما نشفلك هاك
رغم ما دنيتك من صالح اليبخل
وانته الطلگتها ابلا عرس وتگول
مو تطلگ المفروض تترمل
اشلون ترد عدل يالبيك سبحه الروح
ما لزمتهه ايد و ما صحت تگبل
اشلون يضيع ذجرك و انته سدر الگاع
كلما تنملخ بالگـاع تتأصـــل
يالمشيم الحلگ حتى بثواب حسين
نلهج بيك حالك حال الـ تفضل
يالمخورس جروحي الجدد ابطرواگ
حشاك من النزف يا ورگة الحنضل
لو ما طيحتك ما صرنه ال فلان
ولا طارش الگوم من السلف بطل
كل صاحب طويله يظل گصيره احلام
وكل صادق ابوجهه الدنيا تتقفل
يا طيرة امروه و جنحت لحسين
گله انظل بعد نلبس اشما فصل

عريان سيد خلف || لا تجيــنه ||


لا تجينه .. لاتجينه .. جان كَلت
ابوجه الابيض ..
غير معشركم لكَينة
جينة مشتاكَين .. وبلهفة .. او تسد
بابك علينه
جينه ايدفعنه الهوى . اودمعاتنه
اتكَطر بدينه
اوجنت اظن عندك وفه .. اورحية
من فرد طينة
غمكَت جرح الجفة .. اوزدت ..
الكَلب ونه لونينه
اعتب اعله الروح .. جي لنها اعله ..
ريحتكم حنينة
واعتب اعله الشوك .. والعشرة ..
اوسوالفها الحزينة
علمتني شلون يتبره .. الخوي ..
اوحمل اليكَع محد يعينه
عفية صحبة هالوكت .. بيها اليجافي
.. اشوكح عينه ..
او لاتجينه .. !! - ما اجيكم واليدك
بابك ، بعد تنشل يمينه
او جينه .. مدري الجدم زل بينه
العه دربك .. لو عمينه
اوجيت ارد اروحي .. البكَت سنتين
بديارك رهينه
اوجني ضيف ! او عادت الينضاف ..
للخطار .. يرخص ماي عينه
وانته .. ما جنك ربيت ابماينه ..
او شارب حنانه
وانكرت حتى العرف .. يوم الوكت ..
.. بيدك رمانه
عفيه كَلبك هلبت ابساعه .. وفه
.. ابالك طرانه
او جينه نشجيلك .. عذاب اجروحنه
.. او لوعة هوانه
آخ .. يا دمعك فلا يبطل .. يهل ..
لمن عمانه
يا عفه اكَلوب التشيل .. الظيم
وشنحمل عفانه
او حتى اعز الناس من طحنه ..
ابهظم جاروا علينه
:او من وصلنه الدارهم كَالوا
اشجابك ؟. لا تجينه
عفيه صحبة هالوكت بيها اليجافي
اشوكح عينه..

مظفر النواب || جرح صويحب ||

مَيلن . لا تنگطن كحل فوگ الدم
مَيلن . وردة الخزّامة تنگط سم
جرح صويحب بعطابه ما يلتم
لا تفرح ابدمنه لا يلگطاعي
صويحب من يموت المنجل يداعي .
***
أحاه . شوسع جرحك ما يسده الثار
يصويحب . وحكَ الدم ودمك حار
من بعدك ، مناجل غيظ ايحصدن نار .
شيل بيارغ الدم فوگ يلساعي
صويحب من يموت المنجل يداعي .
مَيلَن . لا تغيظنه بِجَه صويحب
وبجفنه النِدي نجم الكحل ، غايب
لو يشرِكَ اردود ، المسج ونعاتب
عتب النده ، بروح البردي يلناعي
وملامح عيون انعجه ، للراعي .
لَتفزعن ، مثايه العين . شِدنه
مَيلن وردة الخزّامة ، على الحنّه
صويحب . ما مش صويحب أبد . مِنّه .
هذا إيشان ، ما ينذل للاگطاعي
وبليل الخناجر ، منجله يداعي .
ودَّن على المكاحل يا مضايف هيل
غطنّه ، بكحل دخله ومحبة ليل
عگبك سجة يصويحب هجرني الريل .
لتشيلك مذلة الريل يگطاعي
من ريل { الرميثة } المنجل يداعي .
هاي آنه اللّحضنك لا تلم روحك
اضمك بالگصايب عين لتلوحك
يصويحب . أفيِّ الفيه لجروحك
يتلاگن عيون الذيب بشراعي
وأحاه اشكبر ضحجات الاگطاعي ؟
صويحب على العِگل صندوگ عرس اجبير
حزمة من الحصاد . ايلفها طيب جثير
وين اللي يگلي { فلان } وين يصير ؟
أوصله وأدگ شراعه بشراعي
صويحب من يموت المنجل يداعي .
صدور الغيظ اينفثن نار على المشرگ
وجفوف الفِلح ، لمة شمس تحرگ
ها . يالحُكُم . هاي شرايع تمزلگ
والخنزير يزلكَ بيها يالراعي
وصويحب يموت ومنجله يداعي .
حا . يصويحب الدگات . ايفتحن دم
وبشيمة عطش تِندَه اليشامغ سم
يالنجمك حَمَر عدّه ، العكَل تلتم
طيب الذات خاوه الذيب والراعي
وتوالم عرس واويه واگطاعي .
طِشّن طيب وخزّامات ورِز عنبر
وبحسن الگصايب حَنّن المعبر
ما هي جروح يصويحب . نگش خنجر
حِسَّك حِسَّك اتنبّر يهل الناعي
صويحب من يموت المنجل يداعي .
صويحب . هاي حبتك لا تطول الموت
من تسمع شجية الفِلح رِد الصوت
هاي الدنيه عيب يضيع بيها الفوت
البِد . البِد ابدمك يلگطاعي
كل بيدر وراه المنجل يداعي .

عبد الأمير العضاض || المشنوق ||



چانت
چانت اعيونه غريبة
ودم البجسمَّه ... امسافر
والمتاع
ادموع
ادموع شبان المحلة
و...حبل للودع عراقه
وروحه چانت
روحه چانت .. روحه شمعه
وخمدَّوها
وعلّگوا ما بين بيبان السجن
هذي البطاقة
بيها خطوا كل جرمهم
وبيها طمغوا
صورة الچف الحوَّت صبغة الدم
وبيها صلبوا
جثة التعبان والحس ابعراقه
ايريد لم
وبيها كلشي
بيها سيف.. وبيها طف
وبيها وجه ابنادم
السمعوا على اشفافه النضال
ابحرگه رف
والسِلَم منهُم الخايب
الماله سيف ولاله چف
الماله سيف ولاله چف

ولاء الفرطوسي || سوالف سكته ||

أدفع بالبلم ما ادري بيه غرگان
و المردي انكسر و الروجة خانگته
و بديرة مناجل سنبلة انحطيت
حصدوني و خضار الطيش ما شفته
و صدگت الرمل بيه تكشخ الصحراء
ما ادري الأبل كل حول ساحگته
و صبرت اعله الجرح حد ما خذاني الشيب
و تحملت السنين و ضگت ما ضگته
الحنضل و العسل و الزين و الموزين
كلهن جربتهن و انت ذاك انته
خابط يا وكت ما يصفى بيك الراي
تطشرني و تلمني العمر خلّصته
الجنيته وياك شنهي و وين بيه تريد
أنه هلال بسماك شبيك نزلّته
اليكفر بالنجم تنطيه ضواك شلون
الي يذمّ الشمس لا تحلف ببخته
ترره سنين العسر طشن بروحي الضيم
و اعاتبهن و اگلهن كلشي خلّصته
لا حفنة صبر و نعيش بيها الصيف
و لا ضحكة أمل و نگّضي بيها الشته
مرواح التعب حطني بحلگ الريح
ذراني و طحت و الراس دنگته
و ابن نفس الحضن يضحك بعالي الصوت
و لا چنه اخوي و امي راضعته
و كل ذني و عشت و النايبات هواي
و عبرن و انتهن و الفات موته
و يحاچيني الضمير بحرگة المصيوب
و يگلي الزمان شلون صاحبته
على گنطرة غيرك لا تحط رجليك
وكتك موش امان ذياب دايرته
نورس لا تحط بجرف ما بيه ماي
العطش كتّال مثل السيف سالفته
و لا تزرع شلب و تغشك النهران
الشلب ينرادله و ما صح الك الردته
رافگته الجرف و سنيني كلهن بور
ما حط بيدي گطرة و لا يحن شفته
و من شفت الندى يصبّح على العاگول
وخدود الورد ما يوم حاضنته
لمّيت الشبچ و السمچ ترس الهور
و گلت الصيد قَلْ و هذا مو وكته
و على راحة خلگهم حمّلوا شگبان
و گالوا صيدنا و آنه الأمس صدته
و مدري شلون اصدگ يا وكت وياك
و آنه البيك أعرفه و ياما جربته
بيا روجة اطيح تمد لي چف سجّان
و تحطني بقفص و تگول ونسته
دطشرني رمل هم امشي ويه الريح
و لا تحكمني بيدك هذا ما عشته
عشت شاهين وكتي و آنه تك جناح
و طرت بلا سما و حطيت عالردته
و تمرني حجايتك و أقراها صورة و صوت
و ادري بالقصد و اعرف القاصدته
و ما افرّ مغزلي و اغزل حجي الفاهين
و لا ابرم سوالف تنحجي بسكته

عباس الغالبي || يا رفگتي ||

يارفكتي الليل ينشد والسوالف والضوه
عنك ويامن مشيت وين تشتم ياهوه
هاذي قسمة حظنة لاموقسمة الله
چنت تمدح بالقطار وحسبت مومنه لله
گلي ليش تغربت ياكلبي رد
يالشتلت ابعيني شوفك وين ماخذ يادرب
اسكي بوشالة صلاتي وخظرت بعيوني رب
يامواعيدك جزني ولاشفت
چلبت بيهن خظار وچفي كاع ولايهد
گلي ليش اتغربت ياكلبي رد
مابيه حيل معاتبك ياشدهة البال
ليل على نيته وفاكدك من الكمر شال
چم دوب اكولن عاذرك
خلصت عمري مناطرك
مابيه بس الخاطرك متعني الثكال
يالشايل وجوه السفر كله ابسواليفك
عايشلك ابكيف الغرب بس ميت ابكيفك
كونك تريدولايتي چاصادفتني
وانا على ريح ولايتك تايه وغني
كربتني ابظوكك اوحلوة رظاك
تيهتني ابممشه مايلحك وراك
عيشتني بكل سلام وكلمن ايحب الهله
كلهه موحلوة بعيوني وطيفك الميت حله
دوهنتني الله يدوهن من خذاك
موتني وياك شهكات العتب
من قريتك شوفه شوغه اتسامر ابروحي النشد مدري شعجب
يالكيت وياك كلشي
يالتمشيت اعلى رمشي
الدنيا تنزف من عثكها ومامش رويحة رطب
هايخير وين غافي ابياشليل
اوين صرت بيابخت عنبر سبيل
مانه كد مامشتهيك
عيني صحره وشوفي خيل
يالكيت وياك كلشي
يالتمشيت اعلى رمشي
الدنيا تنزف من عثكها ومامش رويحة رطب

ذياب كزار || حد التراجي برد ||

حدر التراجي برد …
والكَنطرة ابعيدة
وامشي وأكَول
أوصلت
والكَنطرة ابعيدة
ونكَضني مشي الدرب
والشوگ هز الكَلب …
والكَنطرة ابعيدة
حلمانه برد الصبح …
رجَّف خلاخيلي
يا دفو جمّل دفو ..
يا كَمر ضوّيلي
ويا ذهب خيط الشمس طوكَين سويلي
لايكَلي طوق الذهب والدغش ما ريده
وامشي وأكَول
أوصلت
والكَنطرة ابعيدة

لا لا يبرد الصبح ..
ما تحمل اجفوفي
ازغيرة وجواني العشك ..
واتوسّد إزلوفي
هيمه وجحيل الوكت ..
ما لمني نفنوفي
لوذي اعله بعد البعد ..
يا روحي
حدر ايده
وامشي وأكَول
أوصلت
والكَنطرة ابعيدة

احمد معلة || بلكت الله ||

هملي جدمك بلكت الله
ونعثر بطاري الصغار
حيرتني بظهرك الماصفه نيته
اشما اشوفه اهواي وادم خايفه وماضمها غار
الحلوه بيك اشما اشوفك تفتهمني؟
وتستأذن امن الأعمه كون السالفه اطلابت نهار
والله متعرف عليك شعرفاني اعله القطار
وبلكت الله
وجدمك يدليك بيه
وتكشخ ابروحي صليب
وحشة افراكك طويله ابطول وحشة ذاك المسافر غريب
وحشة الشاب اليموت وما يجي الكبره حبيب
ولا تحير لا تحير.
رمل حاسبني انته عادي
وداعتك بيه استفاده عالأقل سووه كزاز
الجرف بلصحرى نشاز
ومادريت
ضحكت البطران هوسه
والورد هم يحترم وي سامح الاعمى اعل دوسه
وما دريت
الرايح ابنية عشك بجيوبه دور تلكه هيل
الشبكه محتاجه محب يطيهه حيل
اي ...... ليش كلما اذكر اسمك يوكع امن عيوني ريل
وما دريت
الينعشك اهواي نعمه!!
والله مايحتاج شاهد
اتحلف الخرسان زحمه
امساوم الغركان نسمه
ووشالة الدخان غيمه كلشي بعدك صار ظلمه
دربي ليل وجدمي ظلمه
كلمه ظلتلي دخيلك بادر ومربيه نجمه

حسين الحبتري || اعذرني ||

اعذرني رسمتك بالمطر عالجام ..

من يبرد العاشك كلشي يتصور..

ماخذ غيبتي وعايفني بس مرتاح

عندي المهم گلبك بعده يتذكر

صدگني اليتيه عشه يگضي الليل

مثل طيفك براسي للصبح يفتر

لا والحلوه عنك انسأل مرات

واحتار بدمعتي بسالفه تعذر

وجنت ادري الرسايل تنشگ و وديت

وابرللك و اگولن ردك اتــأخر

ومو هسـه متت لا مـوتتني اوياك

من گتـلك احبك ما گلتلـي اكثـر

ايهاب عيال الظالمي ||وانتَ الما تحب وجهك ||

اشبعدْ للفضه وتشبهك
وگفض كفيت الگلوب الذخينة شوگ ..
وانتَ الما تحب وجهك ..
ابهونك وﭼـد الـ هذا انه من اتمون عالوينك ..
لو ادري العمى نيشان ..
ما تيهتك بگلبي ..
لو يدري الدعاء امدمه ما صار السگف حاجوز ..
شما يمشي العمر بالطين كلمن يعثر بگلبه
اليحب عيون ما ينعبر بالنگبه ..
واجي امنگب واضوگك يا حلو حلك
التكتلك عيني التكت لك ..
بعدني اشما اﭼيم الليل ..
حسبة طيف تجويني ..
وبعد مگفاي مگفه امرايه ..
من تكثر جروحي يضيع وجهك من تلاگيني..
وبعد بيه حزن منفوس ..
واجي متبدي ..
واغسل راسه بالدخان من يطوطح الفانوس
كل هذا الحزن بعيوني لو صاير قصيدة اشوه
كل روجة عتب تتكسر اعله الشيب ..
من تغفه الضفيره اشراع ..
وهذا انه ..
ما اصعد منصة شوج حتى يشوفني النعناع
نسيت وادري ما تنساني لو گلبك مثل وجهگ ..
وانت الما تحب وجهك..
اضمك وين يالمتبدي لون احمر ..
يميز عين كل حاسود ...
صغنه من الحديد گلـوب ..
تزاعلنه وجبت بالمشية جم داود..
غريب ومن يغثني الشوج ..
احط جم باب عالشباج ..
واجي ويطيحلك حگي ..
وسدينة السوالف سدة الفصلية للسرگي ..
انشدك من يفز عطرك..
كسر بالجام لو خصرك
ابلا شوف العمر يركض ..
ابلا شوف الاغاني اول دوه يمرض ..
يا ذكرى التهز گلبك عثگ شوغه
يا اخ التوشلني ..
شرخصني؟ شرخصني
ابكل قصيدة امطلعك الموزين حتى الوادم تحبني ..
اثوب للمحنه اوجوه ..
لا خلف الله عالغيمه
يطيح الخير وي وجهك ..
وانت الما تحب وجهك ..

حسين الحبتري || كون الوفه ينباع بالسوگ||

كون الوفه ينبـاع بـالسـوگ
وكون الشلونك مو حجي حلوگ
شكت كواغد گلبي مشكوك
ومو من الهوه من الوكت مخنوك

ياهو اليشيل الحمل عني
وجوه النسوني يوجعني
مره ابجي وحدي ومره اغني
وما صحلي واحد يفتهمني

ما ثكل وجهي ع الخطاطير
ولا صدكت بالكالو تصير
ويامن اعيش وتنفض بخير
والعمر يوكف بالتصاوير

مو بالغصن بالعرك مطكوك
ومو من هوه من الوكت مخنوك
ومحد غاثني بس اني مغثوث

وحس الروح تطلع والله مرات
وجي الكلبي وكول يجوز بي صوج
كون الروح الكاها مثل كلب الحمامات
چا ليش اختنك باوقات الغروب
ودور حجه حته ابجيلي دمعات
وليش بصدري احس صياح مخنوك
وليش الوحدي ومتروس زينات
شكثر كايله بس جيب الي يصدكون
يخيعونه الخلص من دنيته ومات
الحمد لله اذا ع العافيه بخير
(بس بنفسي ابات بلايه حسبات)
يجي الليل بسوالف ما ادري منين
اشكال يجيبلي ويترسني حسبات
مره اضحك وكول فرصه وتروح
وتاني الثانيه تعوض الخسارات
واتاني الثانيه
وتمر السنين ورد اندم وكول لا حرامات
المهم ياهو يعرف شبيه ورتاح
انه موزين ساعه وزين ساعات

حسين الحبتري || الشوگ غلطه ||

ٳيصلن ضلوعي و دافية الناس ..
وتلجمني الحجايه مو من انجاس
ساس السهر بالعين دگ ساس ..
شيهودني والوحن خيط الانعاس ..
جنازه و وراهه اصياح بالراس..
ولا ضحك سني ولا اتهنيت
ولا وزعتـلي ابفرح جكليـت..
بعد ما بيها واهس طبت البيت
واعزاز گلبي بالتوابيت ...

وشمعه شمعه الليـله من عمري انـطفن ..
وروحي بيها اشجم عزيز الليله احسنه اندفن ..
هيه مقسومتلي هاي العيشه گوه و ما حجيت
ولا عشت دور اليسافر لا لگيت ابنادم ايگلي بطيت ..
وجفي متعوب اشحلاته وخلگي باب الناهبه اتحمل حجي
الساتر الله عيوني رفن لا يگلبنهه بجي ..
وجرحي مشكلته بگفاي ..
ومدري غربه و مدري من ناسي انلجم ..
وين اروح ..
الحاده اتضيع وجهه وما تشم ريحة زلم ...
وانه ذاك ..الما اخذ عبره ومشه وي التايهين ..
وانه ذاك ..الطاح حلال المشاكل بيد وادم مبتلين ..
وها يريح ...؟
ابهيده وي مگفاي عينيني يريح ..
ذنبي صدگت الگمر حطني ابمجانه ..
ولا مشت وادم بدربي ولا عرفت اشلون اطيح
ولا حلتلي السالفه وكيفت اموت ..
ولا امبطل مشتهه اوجهوه النستني
الـ هسه منهم بيه صوت ..
اجفوف حظن الفاتحه وتشتهي ابتوت ..
وغير اتوب ..
رموش لعيون العثگ شفت السعف ..
وشفت واحد جرحه شاف ..
وجذباه وصدگ بـ خنجر حلف ..
وشفت ناس تشوف ..بس اگلوبهه تدور عمه
وگلت اسد بابي بعد ما بيه ريح ..
ولا ظهر يحمل وازفنه اعله لجمه ..
تصعد الدخان روحه..
ويلتفت وبنفسه تلگه اجفوف الموادع تلزمه ..
فهموني ..الشوگ غلطه ..
وفهموني العشگ غلطه ..
وفهموني العتب غلطه ..
وانه ما طبهه تذكرني بعزيز..
اهواي تعنيلي المحطه ..
وگالوا اتكابر؟ گلت باجر اطيح ..
وگالوا الوحدك لگوني ابلا حبيب..
ناس ما تدري تغث الگاع خطوات الغريب ..
ومو غشيم ...النثيه قسمتهه مثل حگ الجنازه ..
تريد من تمشي بوكتهه..
والتتن كتاله واحد ..
شفه تتلاگه وي اختهه ..
وباهت بيوم الملاگه ..
والحزن صوته اشعلاته ..
والفرح نساني وجهه
بس اذكرنه اشحلاته..
وها يريح. ..ابهيده عزراييل ما خلاله صاحب ..
والسجن مرات خير ..سنين مسجونه الگصايب ..
وانه ما مغلوب بس گلت اشوراي ..
وصورتي تعيش من اموتن ..
والمطر كل عمره جاي ..

سعود الخفاجي || قشمرني ||

بـدرب نملة تلاگينه ..زلفني وگال ما شفتك ..
رايح ..وين رايح؟
وين رايح والشواطي التارسه عيونك نسوك ابلايه روح ..
و واهسك ضحكة يتيم ..
الماخذك منك درب ما يشتهيك..
الشوﭺ اخضر و المشه بـ رايه غشيم ..
رايح الـ وادم ادّور تراب عدهه ..
العدهم يبات الهوى ميبسين روحي ..
ولا لگيت الينطر عيونه اعله خدهه
صارلي اشجم يوم ادور ما لگيته ..
ولا لگيت السالفه الـ بيهم تشدهه ..
رايح الـ ديره ادور بيها وجهك ..
تيهتني اسنين بوجوه النستني البارحه ..
ليل يتوﭼـه اعله روحه ..
وناس يم ناس ابحضنهه اشگد سوالف طايحه ..
ظلمه و الوادم سكارى ومدري وين
الـ يا جهه الـ من عندي رايح...
يا وجه لعيون اشبگه يگلي شسمك ..
وانقريت عيونك انته منين جانت واضحه ..
يا حبيبي ..
و واهسي ..
وصاحب جروحي ..
ضحكتني مره وحده و طلعت الضحكه اعله روحي ..
و ااااااخ يالمدري شلگيت بصف ضحكتك ..
مدري احبك ..مدري احبك مدري لا ..
بس لا كرهتك ..
ضيعتني بعينهم وانه اللگيتك ..
تيهت روحي ومشت عميه اعله نيتك ..
ليش مو شسمك جنت وانه العرفتك ..
انتظرتك ما اجيت؟ ..
يمنه.. يسره اتلفتت يمي و لگيت!
ناس تضحك و ناس تضحك و ناس تضحك ..
افتهمت السالفه تخصني ومشــيت ..
يا فشلتي اگبالهم وانه بحرگتي ..
ويا غربتي بـ ليل ما يندل شهگتي ..
و ااااااااااخ لو تسمع صرختي ...
وداعتك ناقصني انته ..وغيرك يبين نشاز ..
ومن يجي يخرب كشختي ..
واشتهيت عيونك ضحكة فقير ..
وما دريت الضحكه ما تستر حلگ متروس دم ..
ولا دريت اليشتهيله عيون ملتهيه بصور غيره يتندم ..
وجانت الدنيا حلم بعيون كافر ..
خلص وطب لـ جهنم ..ليش نحلم
يله حبني ..قشمرني بـ هلا و مشتاگلك ..
حبني و العباس انه استاهلك ...
حبني واتمشه اعله طولي براحتك ..
و وين ما مديت اديك بروحي اخذ تفاحتك ..
حبني والله اسمك سوالف ما يملهه الساني ..
گتلي خدك وين حتى اندل و اجيك ..
صرت خد ومحد اندلاني ..
حبني ..!!!
گلي احبـــك!! ..
احبك ..ﭼـلمة سامعهه اشكثر من غير ناس ..
بس اريد اسمعها منك.. يله فنك ..

ايهاب المالكي || المقهـى ||

امضى الكثير من حياتهِ وهو يقف على الساتر مدافعاً عن العراق لـ يأخذ نصيبهُ من الرصاص و الشضايا وهو الآن يقف أيظاً ولكن كـ عامل يبيع الشاي في المقهى ..كاد ان يكون گلگامش لكنه لم يكن يبحث عن عشب الخلود بل كان يبحث عن منزلاً للأيجار يأوي فيه اطفاله ...

شطّيت العراق و هوه شطّاك ..
منو البيكم لـ الاخر واگف اهواي ..
تدافع عن وطن ما بي الك بيت
وجبتهه متاني يفرج وكتك الجاي ..
يالبوكت الحروب بخندق تنام ..
وبوكت السلام تدور افيــاي ..
بالمقهى اخير حروبك تصيـر ..
ما ماخذ مكانك بالحرب هــاي ..
جبت عمرك قذايف يمك تطيح ...
هسه تدگ بـ اذانك طگة الصاي ..
قصر قاتلت طوعاً؟ عندك اسباب؟
المهم ما قاتلتني و واگف وياي ..
اذا بجروح گلبك هبت الريح ..
يطلع صوت منهن يشبه الناي ..
تسولف وي يوميتك ع الاحلام ..
ليليه و ترد ما طالــع بـ راي
يبو حلم الرخيص الينبني بلوك ..
واطفالك قنوعه وتشبع بـ ماي ..
ثمن للبيت ماكو وتمتلك بيت ..؟
جا ليش الشضايا العندك اهواي ..
يالمخدر السواتر لمن تصول ..
مثل ما هسه بيدك يخدر الـﭼـاي ..

ايهاب عيال الظالمي ثگل جدمي

الحمدلله اعلى كل نزوة اشتهت طولك
بچيت من الحلم للـ وين !

وحگ جرحك !
اغلى احوايجي .. جرحك
طحت طيحت الـ "ماهو فلان" لو غيَّم حزن ع البوب .
مشيت وياك .. متعوب و يحب متعوب

عيونك گنطرة لحلمي ،
ادنالي .. كون ارموشك يشبگن على ارموشي .
خل نطفه ،
شمس و غروب ! دمع و عيون !
انتَ امزاود الله بگلبي .. اتوب شلون !

مچوي .. و طايح بمايك ،
بعيد .. و تندل جروحي .
اضم عليك چي ضميتك بروحي !
انا من اطلعت مغتاظ ،
ديرتكم و لا رحمت .. ثِگل جدمي
سحل صرت اسحل بـ اسمي

تغيب و تلتهي بغيري ..
واسجدلك مطر ع الشوچ
الگمر شامة اعلى رگبت كل نهر مشلول
كلهه تريد تقراني ..
رسالة بمحفظة مكتول

جنسية اليحب من غير ديرة الگاع ..
چي ماكو وطن صدفة
اليحب من غير ديرة .. يصلي للـ سچة
و ما يتلفت من اتمر عشيرة هيل

حطني بگلبك ارد اصفى ، يجاون گلبك اموهس .. شِلب روحي
الگبلك شگگو روحي ، وصية و شگگو روحي .. شلي بروحي ؟

احب خوفك !
عجاج "عيـون" .. فز يا خِضرمة اعلى الماي ..
الحلم لو جاسك اتحصله
غلطة !
و هيَ هم مرات غلطة شاعر اتوصله

عكس كل شاعر من اسمي حزن گلبي
رابع مره تغلط بـ اسمي گدامي ،
و تفرفح روحي .. يجلي الصوت و اكوار اعلى متن الـ "هاا"

تعاتبنه ! لحد ما نشف ريج الـ "ليش"
انا من اطلعت مغتاظ ،
كثر ما شايل بگلبي .. ثگل جدمي

السَمار استوطن بلونك ،
و چي منك و بيك احلامي عرفنَّك
و چي منك و بيِّه جـروحي عرفنَّك
التين منسِّم بعينك ،
دِنت نفس البلابل من جزت عينك
و خذاني المستحة اعلى اللِب
الچذب هم يدْنَّه للسكران ،
المو توّه عرِف بالكاس يگدر بالحچي يچذب

ناگوط الشته بشفتك ،
و غيرك .. ما لگو غيرك دفو بروحي
وك غثني .. يالما فارغ تغثني !
ولو مو راحتك يمي .. اخِذ جرحك
اغلى احوايجي ! اخذه
انا من اطلعت مغتاظ ، بس كضيتني من ايدي ..
نسيت عيون ديرتكم !
و نسيت الشايله بگلبي !

علي رشم - بس اصبري 🏴

بس اصبري
مرورة الفرگه اعلى صدري اتطيح نجمه
واعثر بصوتج ضوّه واتبده ظلمه
يوكف بصدري هوّى يكفيله دنيه وخلكي نسمه
توها بردت وانتي مريتي رصاصه
خايف اتروحين واذبل والعطش يترس مكاني
وخايف اشرب روحتج واخذلي ليل وما اتاني
هاي اليه اسنين بارد محد بملكاه جواني
اشلون ما طكّت عشب بيّه الثواني
ويخلص الليل ويخضر ليل ثاني
بيه واهس كافر وربج هداني
الليل شبعني سفر واني بمكاني
والتسافر عينه بترابج حرام...
شوفي منج وين اغضه
يامسافه البيها جدمج ماتوضه
ويا طريق المامشيته وماعبر ظهري وتشظه
وياندى المنطيج عمره اشكبره حظه
فكي شباج الوجع وانطيني روح..
يا لمشيتي الغير ديره
السمه ازغيره اعلى عيني وروحي اسيره
المايشبهونج..شكلهم هي حيره
كل بعيد ابعيني يزغر وانتي بعيوني جبيره
جنها حالي الغيمه تلهث بالجزيره
الوحشه ناس ابغيبتج ما عدها غيره
اشلون اسده يالفراغج وين حده
ابيا عطش تلكين سده
ابكل جزر تلكين وجهي بلايه مده
وانه خاطر لهفتي بكل طيف اشده
وكل جرح يندارلي ويلكاني عنده
ابكل مكان العوز وابن ادم غريب
وغربة العاشك طويله بلايه رده
حاصرتني..الفشله سكرانه اعلى وجهي اتريد تلكالج عذر
كون يعرفني الحطب جا صار ماي
ولايورث بيه كل حيله الجمر
جا ولابغصان خلكي اغيابج يمرها بكسر
جاندهت الروح من نومة ضواها وما نشف بيها الصبر
جا اندليت الخساره بيا كتر
وجا عرفت اشلون ما يطفا العمر
لو تجيبين الزعل كله وتجين..جالكيتيني نذر
بروحي لميت الندى وشبعته ليل
وانتي ما مريتي بعيوني فجـر
هذا عمري..وذاك يوم...وشوكي يلهث جنه جمره
ياهو ما مشتاك خل ينطيني ليل
ومني خل ياخذ صبح بعيونه صحره
وين ماروح التفت والكاج يمي
بالوجوه الماتعرفج عفتي ذكره
بيه يوميه الجرح ياخذله سفره
ياهو مثلي وجهه فارغ من حنينه وتارس الدخان صدره
وانتي أنتي..الغيم بعيون العطش محفوظ كدره
وانتي ماكو..اشلونه حالي وهو جان الملكه نار
ينزل اشراعي حلم والماي يوكف
والنوارس ما تحط لو حظها طار
الصخره حظ العاثرين وانتي حظج توه صار
لــو تجيــن...جالكيتيني ملح بي حوبة أمي
جالكيتني خضار
اشويه تاني مروة العاشك نهار
بارده اعيوني عليج وكلبي حار
منين اجيب الحيل والحك
وانتي تمشين بجدم مطلوب ثار
حتى ميشــوف الموادع
كـون من يوصل محطه ايغمض اعيونه القطار

رائد ابو فتيان - احن الگلبك الما حن 🏴

احن لكلبك الما حن .....
واتلذذ بهجرك والوصل وياك
واذكرك وابتسم وانوب ارد احزن
حلاة الذكرى من وياها دمعة تطيح
شفتك تبتسم ركعة بصلاة الون
سلام لكبك الما حن ....
وسلام لدمك البارد
يل ما كتلي اجيك شمالي افشل الروح
ليش اكشخ وانطرك جني متواعد
أذا محتاجني اتعنه
حركـ شوككـ االراكد
واذا ماشيت غيرك ناس
واذا بأحضانهم كاعد
انه بس حاولت
ليش انحسب خوان ما دام الله يدري بكلبي بس واحد
وصنت زرعك وانه بروحي مواسم جوع
ومن سنبل ودادك كرصة ما حاصد
انه غراني فيك من جنت حطاب
والمهيوب امددها
لمن جنت اخلي بكل جذع نيشان
اختاريتكـ الشجرة لاكعد بسدها
يل ماخذني دولاب وهوه
اترجاك بوجهي الدنيه لتسدها
هاي الروح طفله وددلتها بيوت
وادم خبزة ما عدها
لا اتيها ولك تكسر هواي كلوب من يضيع معضدها
والي يمك كلب من تبتعد رجعه
ولك بيه حنيني ماضي طيوره يفزن بسرعه
دنطيني مجال اتفاهم ويه الناس
كل ما اريد اسولف تنزل الدمعه
اتعودتك هوه معلم ما ينشم
اذا ميطوف برديه
او لا ضيجت خلكي وياك
تطلب واني اكول الدنيه مكضيه
اضمك وين ما بيه
انت بروحي وي يشوفوك
دكه بوجه عربيه
تنزعل ينخطف لوني
ويمدد جرف بعيوني
بسرعة يبين شبيه
الزلف لمن يبوسة الشيب
عليٌ زعلانه ترجية

صادق الجهلاوي || گلبتهن ||

گلبتهن واشتهيت اقرالها ...
والبالي يدور أحسه ابالها...
شفت شنهو الظال من الذكريات...
هنه صورتهه وعطرها وشالها...
وكمت احاجي الصورة واسمع يمي صوت...
مدري ياهو يصيحلي ادنالها...
واركض مفرفح والآخر صاح وين...
هيه تعبانة دخلها بحالها ...
كتله بس ارد احاجيهه واروح...
ارد اشوف غيابي يمكن سالها...
ارد اكلهه بداعت امي وروح ابوي...
روحي عكبج كلشي ما تسوالها...
خاف حسبالج نمت ليل بجفاج...
لا وحك الما انشاف خيالها...
وكمت اكلهه شلونه ليلج من وراي...
تكلي مثل الما حظت بطفالها...
لا تغمض عيني ولا تستراح...
شما تريد تنام تتراوالها...
اي وداعت هاي البحضني بجفاك...
احسد المرتاحة عند عيالها...
وانت تدري الما حظت بأول حبيب...
دوم يبقه اول عشك جتالها...
حته هاي المكبرة ام خلك الجبير...
ليش ما تخاذني مدري شمالها...
دنكت كدامي وكلتلي كوم...
المهره هيبتهة بعزم خيالها...
شيل راسك يمن رفعة راسي بيك...
النجمة ما تنشاف لولا هلالها...

ناظم السماوي || دوريتك ||

دوريتك بين نجمات الثريا وما لكيتك
يا حسافه تبيعني برخص الأمس يا الما دريتك
روحي وحشة وطيفك الغايب عبرها
ليلي كلمة عشك عذبها صبرها
ولك لو تسوى العتب جا عاتبيتك
ولك لو تسوى العتب جا عاتبيتك
عمري بردين شتا وبكاع هيمة
عمري سباحة بجرف عاشت يتيمة
وأنت مطرت صيف مرت ياحريمة
تيهتني وتهت والغربة عذاب
وعيني ما تعرف الماي من السراب
بهيدة يالكلك دغش ...
بهيدة يالكلك دغش ...وأنا أشتهيتك
ولك لو تسوى العتب جا عاتبيتك .....
ولك لو تسوى العتب جا عاتبيتك
شوكي صفصافة حزن منك
بقايا ..جفنك النعسان خايب ولك ما مرة بچالي
حوبتي تعثرك ياخايب انا ودموع الليالي
حوبتي تعثرك ياخايب انا ودموع اليالي
جرح الموادع كلف فنك تشيلة وياك
ونه بدون العبي لايك ياماي الحب يا دهيله
أشدعوه يالتايه برايك .... أشدعوه يالتايه برايك
وانا بكلبي شريتك ..... دوريتك