مصطفى جواد


الصدك مرتاح هسه وكلبي خالي
شلت من بالي ناس امتعبه بالي

جنت ياهو الاعرفه الغالي اسمي
وغير امي بعد ما عندي غالي

بعد مو اني ذاك الينغث هواي
اليجرحونه ويبين لا ابالي

شنهو الشفته منهم غير الجروح
ركضت لناس ما تسوى انشغالي

اريد لوحدي اعيشن مثل الهلال
وحده وعاش عالي ومات عالي

انه بظلمة رايد مو بس ارتاح
لا ماريد يمي يضل خيالي

دنيا وبيهه ناس تجامل بناس
يتعب من يضل بيهه المثالي

ما مجبور اجامل بالهوه الحار
واسمي اليچوي ابو النسمه الشمالي

ما مجبور اسوي عيوني شلال
لل احتاجيت دمعه وما بجالي

بادرت وسألت هواي ع ناس
لاكن من طحت محد اجالي

اثاري وياك حد الوكعه العزاز
ترجع تالي وحدك تبقى تالي

لا تسأل يجونك من يعطشون
يحب كبلك تندمت بسؤالي

كبلك مني شربو ماي العيون
زلال ومن خلص ذمو زلالي

كاظم الرويعي


ورّد ألتفّاح يسمر
وألارض لبست خضار

ورّد ألتفّاح يسمر
وأنت ماورّد وصالك
إوبالليالي عله أعيوني
أيحوم يمدلل خيالك
وين وديت ألمحنه
يا حبيبي
وأشجرالك

ألدرب ضيعني
وضعت
كدر واهموم أشبعت
والخمر شفتك جعت
وإن لگت عينك بدالي
عيني ما تلگه بدالك

بالدمع رويت عودك
وأنت ترويني مرار
ورّد ألتفّاح يسمر
وألارض
لبست خضار

عزيز السماوي


(خطار عدنه الفرح)

خطار عدنه الفرح ..!
نعلگ صواني شمــوع ..
خافن يمر بالعگــد..
رش العگـد بدموع ..
يگليبي وين الحزن؟
حدر الحدر مرفوع
دومك توّن ونّتك ..
تبجي بدمع مفجوع ..
طيفك أمل جذاب ..
فوگ السما مرفوع
بالك تصيح بحزن
صوت الحزن مسموع

شكبان ليلك غضب
بالك تفز بالليل

دافن بصيص الأمل
مسهر نجوم سهيــل
والريل فات وجزى
مالك شغل بالريل
حطلنا موگد جمــر
زود سعير الويل ..
ذوب شموع الوصل
فرهد حباب الهيل
بس لا يبوگ العمر
طيف العمر ملسوع ..


لملم سنين العمر
عثرها ليل الظيم
فارشها فوگ الهظم
مطرزها لون الغيم
مشتال عمرك ذبل
ما حن نثيث الديم
والگيظ اجاك بثگل
بعدك تظل امجيم
خيال حلمك مرگ
شتگله عيب انهيم
يبست انهار الأمل
وانتظر روحي تموت

بدموعي طيفك غرگ
امسح ادموع الطيف
شمسح جزاني الوكت
راح الحلم يا حيف
گمريه ومامش بعد
وليش احنه موش بصيف؟
ظلمة ودواشگ حزن ..

لا تظن روحي بكيف
غرّب شراع الفرح
اهلا اجانه الضيف
حسبالي يسوه العتب
ثاري العتب مرفوع

خطار عدنه الفرح

غناء : الهام مدفعي
كلمات : عزيز السماوي

@sha3er_100
...

كريم حاشوش


وخاف كلها تعوف كلبك
عيش وحدك
عيش طير وسافر بحزنك وتعبك

يا جواز لكل وجه مبيوك لونه
ويا سراديب الحزن وال(آخ)
والتعب متونه
ويا بواجي الما لگن يمسح عيونه

انت وين
بيا حزن مدفون گلــبك

وين ناسـك
يا بخـور بيا خرابه
بيا فطر شبيت راسك

خاف ما تلكه اليشمك
خاف ما تلكه اليحبك
خاف باجر ترجع وتچوتك جرحك

خاف كلبك مثل شباج العراريس الجديدة
ينام وي اول نجم متروس ذم

اگعد بغنوة حزينه
وبسمة ما بيها براءة ولا عذارة
بسمة المجبور هم

وانه كتلك
عيش وحدك
خلي كلها تصير ضدك لا يهمك

عندك جفوف وجكاير
هو مرات الحزن يمشي وي دمك....

كرار وحيد

انت شسمك..؟
انه اسمي بكل گلب مانام ليله
وي اليصفنون.. بس من التفت
نظراتي چيلة
انه اسمي بوطن يشكي
ومايحب اليشتكيله
انه اسمي بكل محطات الموادع
بالضحك ..بالبچي ..بالحب..
تگدر تكول الصدگ صاحب طويلة

اشكثر عمرك..؟
روح واسألها شكثر واصل عمرها
انه عايش عيشتي اعله الله وخصرها
انه عمري بكثر ماحطت عطر بخة لصدرها

واجي والگه وياهه غيري
ثاري طول بطول .. نومتها وشعرها

هم تحبها ..؟
انه احبها ابدون هم
انه گد ماطشر عيوني بصورها
عيوني هم محتازه لم

انه مادگيت من حروف اسمها بحايط اعمى
انه دگيت الحرف فوگ اللحم
شهالقداسة
الفضلت حرف اعله دم

من الگلوب التحب الناس بس محد يحبها
من الگلوب اليغشمها دربها
مثل طبة بيتي طبيت بگلبها
ومن يشيل الماي عينه تزغر بعيني المنارة
ويكبر بعيني گصبها

هاي روحي امذهبة وگفت گبالك
وانت ميزان اليقيم كل ذهبها
ولو شفت خردل مفضفض بيها ..ذبها

#قصيدة_وشاب

مريم القيسي ( ديالى)


مثل قوس القزح عايش بلايا سهام
يموگد طيبتي
چم دوب اضل محتام

حرك ببهام
والحاكم يريد اثبات
وربعي تنكبوا بلثام
جنت بعازة الدمعه
وبجيتلكم قصايد بيها كسر اقلام
شاعر حاكمينه اعدام
وقبل ليموت اجاله الهام

وبدمعه رسم ضحكه اختصر ديوان
الدنيا الوان
وحصتي من الفرح شنهي!؟
انه ماضاحك من لعام
وعلي ايامي حسبت ايام
حسبالي السهر ونسه
اثاريها الثكاله من التعب متنام
ترف مثل الحمام
بيا ذنب  انلام
وليش اعله الكفر تنسام

نواياكم صفت من جام
ومامش للجذب مضمام

كاظم خبط


يبني من تصهل مهرتك
نذكر ايام المضايف والضيوف
ويبني من تعرگ جفوفك
تمطر الدنيا فرح بين الجفوف
اتغنه بيك الما يغني
وصله بيك الما يصلي
وشاف بيك الما يشوف
الدنيا يبني مسودنه اتبدل طبعها
بكيفها تفسر الطيوف

الشوگ بينه يعيش بالدم
ولو نشفنه الشوك ينزل
للعضام وما يعوف
الشمس يبني تخاربت هيه وسماها
ولبدت لسد الكسوف
الغيرة يبني الفاركتنه
وما لكينه حسين غيرك
يرخص الدم بالطفوف

خلها يبني منين ما تمشي السچچ
تتلاكه بينه
منين ما يعبر جدمهم
يوصل النه
واحنه يبني الريح المدوخه الجزيرة
لغير هاي الريح ما يركص رملنه
واحنه يبني العلمينه الناس تعشگ
من يعلمنه العشگ والعشگ منه

ضكنه كل الثمر ماصخ
يبني والطيب يعيش ابفي نخلنه

مصطفى اسعد


لا
لا يـ احبيبة لتأملين
شعري اعله الوطن والناس
بس اعله الوطن والناس
الوطن عنده الخدود المارضت تنباس
الوطن عنده الحدود المارضت تنجاس

الوطن ذيج العيون الماكو من عدهه
الوطن عنده الچفوف
التسوه نعبدهه

وحتى الناس
احب الناس .. واكتب چي احب الناس
منهم تبدي كل لهفة
ويغني الشوگ بالوهواس

وابوس حروف كل الناس من تكتبلي زعلانة
واكول أسماء كل الناس ..بس ماكولن فلانة
ااحب الوطن چي دربي
واحب الناس من گلبي

وشعري اعله الوطن والناس
لچن يـ احبيبة ماتدرين ..؟
انتِ الوطن ...
وانتِ الناس ..كل الناس...

عزيز عسكر

ندى رموشك سنابل طيف
خاوتني ضحك بيبان
تبدى اعلى الشمس گيظين
راويت العطش للبير
ما يكبر بخلگي الماي

يا گمرة المامش لم عتبنا چفوف
كل خطوة نهر تثلم بروحي انسان
لا نبچي الدمع مو راي
گاع الما يغصها الغيم
يعبرها الصبر مجبور
ويصلي اعلى چفها افياي

ليلية الجفا يشدني ضوه
اعلى الروج
ويسافر بعمري شراع
وارد مهموم لثيابي ، لهلي
لكل ضحكة منك ما مشت وياي

#قصيدة_وشاب

حسين سعد ( بغداد)


ردتك بس سِوَد كل لون
ابيض للعشگ نية
لبست الغربة كلها اشلون
شيگدرك بعد بيه
يالوجهك غدالي اعيون

تبچي ابكلبي ليلية
حنين وليل يردف ليل
والجيات معدومة
اذا يم حيلي سهلة الحيل
بس الروح مهدومة
العمر غثاني لين اطويل
وصبري ازغر امن اهمومه
واتلگاها ابقى امنين ؟
من عندك ؟ امن ايامي ؟

اني اشمدريني حلم العين
هوه يدمر احلامي
ردتك بس النياشين
عبرت وصلت اعظامي .
شدبر يا عذر وتهون
عملتك واقبل ابجيتك
طفح بيه وداعك لون
اسود يوحي وادعتك .
ولك چا لمنا اليخربون

انت العطلت بختك ؟
مراسيلك يَا هالچذاب
على رفي غدن رزمة
ولو احسبهن اني احساب
أعد زحمة على الزحمة.
رگبتك يا بَعيدي اگراب
ما غمدتها أي ذمة ....
اعاتب بس بلا تأثير
گلبك جامح ابطيشه

رجوعك موش حل والغير
ثمل بيك ورغَد عيشه
اشيفيد اگلوبنا التجبير
وانكسرت كسر ريشة .

صالح الساعدي


حقك ياتعب گلبي
كبرت وما بشر سامك ..

و حقك لو ردت غيري
اعذرك ماتبَدّن بيدك احلامك ..

وحقك مانمت وگفه لحدما رجفن اجدامك ..

ماضگت السهر مرة ..
امن اعشه اتورّد اطيوفك
وانه ب ريج الشمس واگف اعد كل ليلي بسهامك ..

فاعل ، بالجرح ماتنكسر عينك ..
ولا مخنوگ مرة وشايف ال" وينك ..
ولا باجي گبل ومنكع الثامك ..

شني اللذه وتعذّبني ؟
فرد حزه وعفت نحري ولك دذبحني شمتاتي ..

مابيه دمع ينزل بغير اسباب
انه امن اهل الله تدريني
والبگلبي عله ارداني ..

ولك يمحيّر الرادك
اشو بولاية ظنوني ،
ثوبك يستحي يجيسك ، مساماتك تصب عفّه ..

و اشو من ردلي محرابك بعد سفره
لگيت جيوش مهزومه وحدر كل جيد اثر شفه ..

عايشلك اسير آنه
ولك يمك اسير آنه ..
بنص اهلي عشت مسجون وبراسي تدور اثنعش زنزانه ..

ولك نمرودك بروحي شعل ناره
لحدما حرگت ابراهيم البكلبي وطلع من صدري دخّانه ..

ولك يمته يسولفني الضمه وماتگطع السانه ..

وتشوف النار
تضحك من تشوف النار ..
تنشدني شنو المحروك ؟
وك طفيني هذا آنه ..

هذا ال لو ردت تبجي يفزّع گلبه واردانه ..
هذا اليدري ماترجع ..
لجن تانه ..

هذا الداك شوفه اعله الدرب كل حين
وامعود اعله كل اسوالفك ذانه ..

وك شكثر عانه ايوب حتى يفوز يم الله ؟
وحقك گلبي خمس اضعاف مثله لخاطرك عانه ..

وارد اردود اعذرنّك
واگول الصوج بيه آنه ..

وانه ادريبَك جمر بفراش ..

مصطفى ابو طيف

غزل يندل
لم روحه النهر جرفين
من جدمك نوى المعبر
وكسر عينه الضوة من
الشوف من شاف الحجاب احمر
وگض روحه الهوا مرتین
بس بالثالثه اتعذر

طر وادي الثلج نصين
ركد..وتطشر العنبر
واحتل الحبل من كثر ما قداه
چف أسمر
ومطرت والمزن شالن
خشمهن فوگ
وتسرسح بهيدة وبهت لذة الجر

وعلا صوت المشابگ
والظلام أعلى
بحيث انخبط لون الليل
والگذلة
وبدينة السوالف يم نهر دجلة
ودعينة يخضر العنگود
ما خضر

ورد الهوا انوب اردود...للمعبر
يصعد للمثاني البيض
ورد وتسرسح الناگوط
وخفنة عل التلال تفيض
وفاضت والعسل مرغوب بشفاف
.... الخلگ كلها
..وتعب چف الهوا..الخدران
.ما يوصل ويوصلها...
ومثل هزة طفل كاروك
تدفعني وأرد الها....
ولأن طبع اللذيذ اغماگ
خدرنا اثنينة ونمنة
لزگ وعناگ
خاف يفوت ثالثنة..
ويخرب جرف نهرينك
رضيت تصير شيطاني
واصيرن كل شياطينك

اگلك سر
مد روحه النهر جذاب
الضوة.شافك بدون احجاب
الهوا يندل ازروف الباب
بوادي الثلج طاح انکاب
جرني الحبل للمحراب
مطرت وارتخة الچلاب

لا تزعل علي حباب
تفسير الحلم مگلوب
كلشي ولا شفت
جذاب...

كريم حاشوش


أخذني من الجرح والأخ
أخذني من التعب والظيم
لا من سمه ولا من گاع
اتلولح برمش الغيم
أخذني الكلبك المرطوب
كافي ميبس ويه الناس
كافي مناشغ عيوني
تعبت من الوطن والكاس
كافي الهوه يأخذني ويرجعني
يرب مو گذلة حديثات
سعف يابس اريد ارتاح
لوما فشل من آدم
كفرت بدين كل تفاح
ثگل حزني فياي اشته
وعرايه ضلوع البصدري
أيا مفتاح
فك ليلي ..فك حزني
السمه والگاع عرفني
كثر مادز مراسيل ويرجعلي اعله متن الريح
مراسيلي خذتهه الريح
قرتهه وبجتهه الريح
تطشرت ويه كل مكتوب طشه الريح
خطيه إنه
احب وادم زرع موسم وكت وتطيح

محمد جاسم

كمركم كبر الولاية
ونزفت اخر فرح مني
وطفيت اكبالك بنجمه
وردت كطرة ضوه لحزني

يل مسافر اخذني لديرة عيونه
لكيته للحزن كمره
ولكيته للعشك سمره
جندوب الحزن يشلبه لمتوني
جندوب العشك مايرهم لوني
وگلت بلكي بضواك اندل

شكو لمضموم لبگلبي !! الوطن يبجي
وبكلي من الغزل وياك
اطيح بديرتك واحجي

طحت بس القصايد وازنت حملي
وشكيله القلم مرات يفهمني ويفك حزني
شمدريني العمر مايرهم لونك
شمدريني لكصايب غرت عيونك
اااخ شكد حزن منك
توسلت بفرح منك ولاجنك

الدمع ياخذني يم خدك ؟
ولا جنك
گلولي نساك وضاع
گلت مجبور احبنك

أمير جدوع

قصيدة الناهبة التي عادت لـ ابيها وهي تحمل طفلاً بـ أحضانها .. بعد أن ظنَّ أنها أُختطفت ..
فـ يّكلَم ذاته قائلاً:


ردّت مخضرة طفل ..محتار خاف انسأل
مريم خذاها العشگ لو ربها حط النسل
ويطيح مني الـحـﭼـي ..
طيحة حگوگ النِزل.
وادمنا وادم عرب ميلة عگلهم كتل
والراي عگب الجرح گصبة ويبس
ينشرگ مو سعف ينسف عدل ..
گتلها گبل شكثر بالشرف يلتم شمل
والگذلة لگمة مگص لو غفت بيد النذل
ناذر أظل محترگ بالملگة يلا أنطفي
والملگة مجمر غضا وشلون اوفي النذر
فوگ الجماجم ورد ينشاف عذرج تره
جدم الـ احديثة العثر ينشاف بيه الفشل
يبنيتي گبل الكسر ..
يبنيتي واحنه عرب ما نقتنع بالعذر
كل ظني تعبي عبي ..ما ادري تالي انحسب
طين اعله وجه الشذر ..
وما بيه واحمل بعد والتعب ما ينزع
ثوب ويبس عالجرح واردود دم ينهدر
والگلب لوح انسجى والشوگ سحگة مهر
والگاع ما ﭼـلبت بالماله بيها جذر
ﭼـان البگلبي بلم ..واهس بلم وانكسر
وبساع ينسى النهر ..
والبلم ينطر حرگ لو عالسواجي انّذر ..
مشّيتج بـفيّ گلب أخضر وما محترگ
يا ريح ما حسبت ركضة دخيل بمطر
بـ مروز روحي أندست ..
الريح تلبس عبي بس من تمر بالخفت ..
يبنيتي.. بيمن لگيتي الجرح ..
يبنيتي طبع المريّ تاخذ وتطّي العين
سـﭼـين عذر العقل ..وكسر الشرف سـﭼـين ..
وحاجوز صار الگلب أعمى و بعركة كتل
والعرك عِبر النهر والگنطرة من الطين
رديتي مايـﭻ عكر يا ساجية من التعب
شربتج انا بـگحط ..والماي ثورة شعب
جيـتـﭻ تـكمل العطش
باث اليجيبه هوى طارش بعين الشلب..
كتلـﭻ ازواگـﭻ صبح ..
وازواگ روحي الذنب ..

حزن الكبير .. عماد المطاريحي


هاي السنة الما بيها غيــــــــرة
باگت احلام اشــ جم ظفيرة؟
المفروض ما نحتفل بيهــــــــا
ولا نحلف بريحة ثديهـــــــــــا
باعت ولدنه اعله الحفـيــــــرة

وحدك گمر والوادم اهــــــواي
عفت السمه وصليت ع الماي
يوليدي ما حطيتنـــــي بـ راي
كونك تريد لغير ديـــــــــــرة

وكلها بغيابك صارت ذنـــوب
صورتك والشباج والبـــــوب
يهدني ذني يگضني الغروب
والليل والنجمة الصغيـــــرة

امي الوحيدة الدفنت الليل
يرحمها لو يعزف مواويــــل
لو حدّر الشمام والهيـــــــــل
هب النســـيم وجاب سيرة

من ينعى ابوك يسكّت الناي
بطور الحزن محبوبتك هاي
يمشي الفرات ودجلة حفاي
بجنازة المتروس غـــــــــيرة

باسم الشموسي

اعبرت چم طیف
بس ردت اوصل الطیفك،
عطشتك شم.

واجیتك، مدری یا ساعه، !!
الوکت من دونك مطشر ولا یلتم.

بچیتك دم،..
شوگک جاسنی ابعینی وبچیتك دم

ارکض والأثر یتبعنی سرب اجدام
اخاف اعثر وافز وینمحی عطرك، ضباب ابجام.
اظل لاوین احیر ابجیتك و طیفك؟
انامن؟
لا،. اظل امناطر اجدامه مطر مانام.!

محبتك تاکل ابروحي،
مثل ذیچ القصیده المانی کاتبهه واحبهه اشگد.

عبرتي طافحه بعیني،
ولاتنضم نساوة خد

الحزن بیه نهر اسود.

الفرح بیه غریب امضیع ال حانه و یبات بعتبة المعبد.

عشت حایط ،
و یا رسام یرسم لوحة احزانه یدگ ابعینی بسماره

و انا فانوس منسی من قبل لیله
ولا واحد نفخ ناره

افک شباچی اشوف الدنیا جنح اسود،
احن الحزنی من دونك،
وارد مثل الغریب المنزوی ابداره

انا ابلیاك طیر امشدده اعیونی
ایتراوالی الشمس شامه

اسلهم بل چذب عن لا ضواك ایفیض من عینی،
ترا لیل الیمر اعلیك، مانامه

بلم تایه ابنص الروي وامصوب ابراگ الگصب بلامه

اضل الیا شته اتنطر ضحکتك ماي؟
حد یا عبرا اعیشن ناي؟
انا چم دوب ادث بهداي؟

مصطفى عاهد


چف أعمه وجزيرة هم
وأظافر سود حنتهة ألجلد وألدم

اشوفك وين
بالظلمة الكحل طافي
والسچة.. شمع متعوب.. ضي حافي
يدروبك خناجر شوچ
ادورك وين
يا أول سفر للروح
ويا آخر ذنب بلدين

صَنهب شوگي غنوة بديرة طرشه وفار
غنيت الحطب للنار
من چان الدمع غافي
وطشرت التتن بالدم
صحت وحدي
يل طبعك حمامي سنين الي متانيك
خل نلتم

صحت وحدي
اغني الغبشة رازونه وضوه لمسجون
واهيمن بالعتب مرسال چف وعيون
والظلمة بزوية تموت كتر العين..
اشوفك وين
مذبوح وخفگ جنحي بلحن حزنين
حزن وامي وحزن صوتك

يمن دمعي وحزن دمي عُبَر شطين من صوتك
تتن والمعبر ايامي ومواليدي
ياا يمته..؟ شكبر عيدي
اشد عروگي واتعناك
واوصلك لحد هناك
اصفر والنزف يضوي عله عيوني
واكلك يا وجع لوني

بواچي من الشِعر والناس حد آخر نزف بالروح
ليش تروح؟.. وتجافي
انته آخر رسم للضحكة ضي يطگ عَله شفافي
بالغفلة
هزِر سدرة الليالي تمر عله رسومي
وسواجي الخوف
تكبر والحزن صافي

حزن ورد الصحاري المات بحلامه
خَدَر والعثرة موقف بالندم والشم
حزن يكبر سِكْر بالدم
والفرحة گمر طافي

ادورك وين
والكلشي گلب خواف
ذاك انته وهذاك آنه ولا ننشاف

احسان عكوش

الفرج يمته الفرج يا يوم
انا بنادم ترة
وع الظيم مو معصوم
انا البچاي انا المهموم
انا التايه الما مرتاح
انا المهموم انا الماجاي
للدنيا وجزاني اللوم

انا ذاك الينشدوني وأگلهم زين
حتى بساعة السودة
انا الراكض ركض چادود
انا الكشاخ بجرودة
انا الطاح ويبس عودة
انا الساعاته معدودة

انا الما طگ ضحچ سنه
انا الماخوذ حزن الناس من حزنه
انا المكتوبله مايوم يتهنه
انا التعبان بس محد مسح متنه
انا الخلصها كون وكون يتمنه