مظفر النواب ..ولوحتهُ
((مو حزن ))


مو حزن 
لكن حزين ..! 
مثل ماتنگطع 
جوا المطر 
شتلة ياسمين !

مو حزن
لكن حزين ..!
مثل صندوگ العرس 
ينباع خردة عشگ
من تمضي السنين

انا گتلك 
مو حزن لكن .. حزين !! 
مثل بلبل گعد متأخر 
لگه البستان كلها بلاية تين

مو حزن لامو حزن لامو حزن لكن 
احبك من چنت يا اسمر جنين

خذني يابحر 
خذني خشبة 
خذني والبحارة لو ينسوك كلهم 
مانسيتك

الخشبة عاشت عمر طيب 
عشگت كل المخاطر 
عاندت .. مشيت بوجه الريح 
لكن ماكسرها 
وصارت تسافر وحدها 
بلا اتجاه ! 
وارجع احط خدي على خدك 
يابحر

خشبه وبحر 
خشبه .. خشبه وكلش حزينه 
خشبه لكن حيل 
اهيب من سفينه

مابـﭼـيتك 
فارگت انت السفينه 
وانا جايبلك بحر . . !

جبتلك طوفان الحلم 
حلم منذور بغياب الشمس 
فارگت حلم الناس 
ومليت السفينه والسفر ؟

مابچيتك 
انا بچتني السفينه ! 
منين ماطش الرذاذ .. تريد تبحر !

تدري نوبات السفن
لو ضاگ خاطرها بجبن قبطانها 
تسافرو حدها وبلا تجاه !

انا مابچيتك 
انا بچتني السفينه ! !

حيدر النوري ......


لمه فجرك ناده عيني ..
گلبي ضم جرحي عليك
و درت وجهي !
امسح دموعي و بقايه الشمع ع الچف
و اطرد الحسبات و الليل و شبابيچ القطارات المكدره
انت تضحك ! و انا اگل للغربة هانت
وي ضحكتك گلت للما گلته هانت
لمه فجرك ناده شباچي الحزين ..
لملمت كل وردة متعوبه بغرفتي
ردت اشبگك من فرحتي
صار كلشي البيه وده ينحچيلك
وانا گبلك ،
كون ظهري و هاي الخطوط البچفي ..
و ضحكتي المثلومة و الدخان البصدري ثگل
و ارماد چم صورة بعدهي براسي تفتر
يسولفلك ..
چم عزيز بعيني گبلك بچه عيني
يا احبيب يا عذب يا طير خايف
انت وي ما تغفه ابوس ايدك و اگلك ..
لا تعودني عليك
يا احبيب .. لا تعلمني عليك
انا گبلك بعت كلشي و مو الي و منذور دمي
انت تحلم بيه و انا .. جرحي ضم گلبي عليك
شتدري بيه !
گبل لا اشوفك بهذا الليل الاظلم
و المطر و البرد و الدم
و الورگ عينه على اعشوشي
و تدفعه الريح و الدم
شتدري بيه
منين اجيت
و الجنط هايه الاجرهه شبيهه و عيوني و لمعهه
و خوفهه و شحت دمعهه
اچفوف ادي و الباب ذاك
گلبي بسنينه يدگ ع الباب ذاك
گلبي دامه يدگ يدگ ع الباب ذاك
يا احبيب يا عذب يا طير خايف
طير ابيض خايف و مبتل
نكت جنحه بسواد عيوني و بگلبي
شتدري بيه !
شگد شوارع شافت عيوني الغريبة
شگد مدن و وجوه محفوظة بقصصهه
منين اجيت ! و وين رايح !
انا يا روح الاغاني .. مو الي و منذور دمي
و انا لو ما غربتي اباب المحطة ..
ما اشوف الضحكة دمعة و ما اشوف الجاي رايح

انسيابية وزن (النعي )
وعذوبه كلمات

علاء عبد



حبيت صدفه اليوم حبيت
ورديت مثل الطير للبيت

كد مافهيت بشوفة هواي
جتال ابوي تباوس وياي

مامش اسم الله وطحت جني
وعالفاتحه مريت اغني

صافن حرام عيوني ترمش
لو طير يبني اعله الشجر عش

كد ماصفنت بلمعة الخد
ولكم حسبت رموشهه شكد
شني هالمحبه الله ولحد

هب الهوا وفص الثلج بان
شامه اعله وركة ورد رمان

ولكم لون فلت عباهه
العربان تتجاتل وراهه

كوسر عصاري وعنب مرطوب
حنطه وتخضر حدر الحبوب

ولكم هلي شوفولي اهلهه
لاجاتل العربان كلهه
.....
❤️

حسن وصفي

وشالة هم..

وشالة هم شفت روحي كنسني الريح
خلقني الله اعله گد چم يوم.
چا ذني الليالي منين
شو چنه العمر هادود...
يا روحي جبتلچ عام..
خاف شويه عوزتي بگاية هم
مر چم عام بيه وباقي بس أحلم..

السنه الراحت ولا مرتاح وشلت الدمع والدم !!!!

وعشت بيهه ضوه متيهين ،،
تيهت الدرب يا صوب من كل صوب مامش عين....
مامش والسهر مگيود بعيوني
الطيوف اشتاگت لضلي....
وازرع والمناجل كاضه البيبان
عشت صرخه بحلگ غركان..

اي يا روحي سوتهه صدك دنياي
لمت كل شمس بيه اخاف اشويه چان افياي...

شنو المضموملي بعمري عشت عمري حلگ تابوت..

چم برزخ مشه بروحي مشه بيه الوجع زاتوت..
چا هوه العمر شنهي بلايه الاخ

يهنياله الغبش مرتاح...
يا روحي الذنب ذنبچ
تلگيتي السنين صدور..
ونية هل سنين ارماح
.

( ( الى كل صديق حقيقي) )

حسن البركي....... وقصيدة

( معنى الرفاكة )

...


معنى الرفاكه الصادكه تمثل بيك
يل بيك روحية كبل متحزمه
ياخشم سمرة يشم بنفسج من جان
حته العجاج عذيبي كلهه تشمه

من جانت الوادم كحط عدهه الماي
جان المصوب بيك يغسل دمه

والعنبر يشوفونه بس وكت النوم
وجان اليمر عليك تترس خشمه

وكتك جزه بيام ذني الحلوات
بيام ذيج وجوهنه المبتسمه

من جانت من كلوبنه (الله بالخير)
من جانت الناس الكرم تفتهمه

من جنه ندفر باب سابع جيران
من جنه عالجار اليجينه نعزمه

من جانت ركاب البشر كلهه ركاب
جنت ويه الركاب بمثابة ذمه

ياستر وكت الجان مامش حيطان
درياهه بس الناس تنكط حشمه

من جان عيب الجار يخطب من جار
من جان سفح المستحه عله القمه

من جانو يذبحون مطفل للضيف
وتقبيل رجل الضيف عدهم واجب

بيام جدي وصايته ام عشر فتوك
الماواحد يكله عله هدمك حاجب

ياجاي عصريات وبكوسر كوخ
وكعدت بخت شايب يمازح شايب

يعكال حجيه اليفوخ اليافوخ
ويامحله جفهه مدكدك وبيك يشد

يالتعترف بالخبزة يالماعليت
خشمك وكلما يعله مايك يركد

ياوكت مابي فاتحه تهبط الراس
بي فاتحة واحد شهم مستشهد

من جانت التتكاتل بلايه فصول
من جانت المشيه حب عمك واكعد

ينته يميلة كصب ياونسة هور
وكعود وغنه وصادفة كلهه تصيد

ياواهس حديثه على حلك التنور
وموشحه وحلوة وخبزهه مورد

ياجاسبي وبمتون شيخ وعريس
ياجوبي ياشوباش وامي تغرد

يا مفردة عريان يا ام عريف
يالمن تثور تجيس حته اليلبد

يانهر خوه الماينحرك جالي
يالما تجدم احوالك اعله حوالي
ياصاحبي وخوتك لو ازل عليك
كون الله يكتلهم بضهري اطفالي

مره بغيابك ردت ابيعك طبيت
سوك الرفاكه وحظرت دلالي
بيهه بشمس كاومني حته خيالي
كاعد وجو شرايه شرايه ثكال
وصلوني بس اجان وهوس بالي
كالولي سعرة ابيش ماكلت ابيش
شنقصتك كالو صديجك غالي

وانه ادري غالي عليه وعله الشراي
هوه شيبيعه الكلبه كلش خالي
هوه انت لو تنباع جابسط بيك
بس ردت ابين معدنك لامثالي

عمي انت ماموجود نوعك مقروض
بالكوة لو تنوجد لو حسبالي

حته امي كالت صاحبك جنه فلوس
هسه امنت يوليدي راسك عالي

الكبير حسن عاشور

ومفرداتهُ وقصيدتهُ "دبگة الارض " 💛



صوتي احترگ..
مثل المواني يم الماي
مجنونه طبرات العشگ
خلتني ما بيه افياي
بدنيه سفيهه تورطت
الدنيه لا مو دنياي
وياك و مو وياك
احس روحي وحگرني المفتاح
كلما اريدنه يفك داري يموت المفتاح
حدر الدواشگ ضمضمينه النور ..وباجر مالاح
يا ريت مثل الشط عزب امشي واطيحن بشطوط
تشربني المصخنه و البنيات وتسبحني ابطوط
دبگة الأرض شرجي وتمر كون الف حلمك بخطوط
كثرن عذاريب الدرب وبعيني دمعة شرمخ
نوبه نهر نوبه الدهر واتعبت گد ما اشبخ
الطوفه حلمت بالزرع خضرت ..وانه امصبخ ..
كلما ترسناهن امل خلصن نشفن الأيام
گد ما طلع حلمي ﭼـذب سكته بلعت الاحلام
لو جيت هالنوبه شمس حڰي من ارسمك بـ اصخام
بدنية شراب اشرب ادهيلي ..ومتت گد ما صاحي
ابابي گفول اتعلگت وانه بطرگ مفتاحي
اسم الله طرت لاﭼـن طرت شايل گفص (قفص) بجناحي
ثربت گلبي بحيرتي ..وجبت العمر اتغلط
عطشان رمانك نهر ..فوگ الارض يتفرط
بدرك مثل عيش اصفر ..بحلگ العشگ يتگرط
جن بشر الهمبوش ..وگلب النخل ويانه التوى
وانت زلف اشگر تلگاك ولعب بيك الهوى
وانت بعيد ونوري عزل ..وانغمد گلب الثرى...

قصيدة الــيوم ..من الأهواز والشاعر

محمد الشوبكي


ﭼـنت نايم والحلم جرني اعله كيفه
لباب بيتك ..
ما لگيتك
بس تراﭼـي الريح وسنين العمر والريل سكته
وگاعده السمره اعله رمشي
تخيط بثوب الصبح ..
وراسمه الآهات صندوگ وقفل مفتاحه ضاع
والسوالف ليلو فوگ شفاف بت جارتنه. ما اگول اشأسمها..
إيدي ما توصل ..اريد اشتم زلفهـا..
العمر گيض ..
الغيوم الناشدتها تريد من ﭼـفي مطر ..
منين اجيب الماي وسنيني گحــط
اي يعمري ..الموت ما الگاله بــاب ..!
الساجيه وهرش المحنه وبيت ابوي سنين يبـﭼـن ..
والفرح زعلان ﭼـنه ..
يريد عيني اتبوس اديه
وانه مشتول اعله ضيمي
ونابت بعزة نفــس..
حسبه تاخذني لـ عشگ والثانيه اتردني اعله دمعي
وحسبه تاخذني لـ وطن والثانيه اتردني اعله حلمي
اي يعمري الموت ما الگاله باب ..!
لا خبر ..غنت بگاية الروح ..
بلكي تشم عطركم ..
وصابرين ..نصيح يالبيكم ٲملنه ..
والحنين يجرنه مدري لوين ..
ظنته يمر بـ أهلنه ..
وظنتي تهنه وما درينه ..
حساب ضيعنه مشينه
اي يعمري الموت ما الگاله موت ..!
خاف تگضي وننسى نتأمل اباﭼـر من أمس
وخاف عگب اعمارنه تبين شمس ..
ان شاء الله نشوف الشمس ..

((لون الهلاهل ))

للمبدع عبد الوهاب الحمداني

اشمج والگه بيـج الله ..!!!
و ارد متعجب الـ روحي
واتيه بدورة الخلخال
من يرگص حـﭼـي الرجلين بجروحي
واغفه بنص ليالي الهَم ..
و ارد واتلمس ازلوفج
واسافر للنهد نجمه
واتيه بحنة اجفوفج ..
يفلانه العمر تنور والوادم حطب سوله
مبخوت اليموت بهالوطن عريس
يلگه الدنيا هلهوله ...
ومغبون التكتله الـ اه بالغربه
مثل ماي الدمع مجنون اليشربه
مثل شاعر حصد روحه وبگه مشتاگ للتربه
مثل عيني ..
مثل گلبي ..
اثاري الماي البروحي شعر شعبي
واثاري النار البدمي قصايد للوطن تدبي
تذكريني بليالي الشيب گلتيلي؟؟
وره البيبان دم ابيض ..
يندل الحجي ابيا لون ..
ولو ضاع الشعر تلگاه
حدر بير العتب مدفون ..
حدر فيّ الجدايل تلتقي بروحك
وحدر لون الهلاهل تلتم اجروحك ..
وگلتيلي ..هذاك انتَ جزيت الليل ..
وتعديت للنجمه ..
وصغت من النهد شباﭺ للنسمه
وخذت لون المضايف والگصب والهور ..
وبنية سلفنه التشبه الجلمه..
تشبه كل شعر لليوم ما مكتوب ..
تشبه رمش الـ احديثات اذا صلى بگلب محبوب
وگلتيلي الگلب عاري بشته العذال
فصل لي القصايد ثـــوب ..
وگلتلج هذا درب الليل يضحك لو جدم يعثر ..
واحنه اجفوف ادينه اشــراع
وجلمات البحر خرزه اعله صدر الروج تتكسر ..
وعزفتيلي بحلاة اجروحج اغنية..
هنيال اليحبها الشاعر من ابعيد ..
جـــم نجمة الـ حجيها اتصير ترجيه!
و جــم گطرة نده بتموز خدرانه اعله باب النهد ليليه
جم ابليس يزرع ع الخصر تفاح من تتبدل النيه ..
وگلتلج والعمر ذكرى!
ضل اشـﭼـم نبي ابلا راي
ﭼـي ما رافگ الشجره
يفلانه الصدگ نيشان للفقره..

حسين الحبتري


بعت عمري ... ومدري عدمن
وآآآآآخ حسرتها اليتيمه من تكلها الناس بتمن

الثكَل بوجهي
بالملاكَة غشم
الغنة يم جرحي أعله شيب بعينة أبات
روحي خضره
وبيه حيل ابليس ومشامر صلاة

مارضيت بسالفه خي عونه كَلبك
وﻻحضيت بجلمه اشلونك واحبك

هيه هاي امراية العميه أديها
وماحجت يوم بكمر
ولاتعب ليل المحطة
ولاشبع مني السفر

وكون اعرف براس ابو الميت شكوو
وكون اعرف الصحره شنهي وتستلذ بيها البدو

وين تاخذ عيني نوم

الكاع ذبحتني تون
وخفت ﻻسويلي عمله وروحي اذبها باي حضن

حضوظ تكعد للجتفهم يهتز بوكت الركَص
ناس عطشانة كصصها وطبعي بالجلمات اغص

ماحسبتلها شجاني وعفت بطني امي واجيت
والله فشله....
والله فشله الضامها ابكلبي خذوها ومادريت

وين أذب الصوج شص بيا نهر
وصعبة الوم بعيني لو جدمي عثر

هوايه ركضو
وآنا أحب أمشي عالكيف

مامدحت بروحي يوم وﻻ كلت خيالها
وﻻدنت نفسي عله جكليت العروس ولا خذت من حالها

(لا ترحين.)

ل حسن وصفي

لا ترحين .
يبنيه الجفه مو ثوب المعرسين..

يحليوه الضلام اهواي..
خل نتناوش اويه بليس.
الفجر مسرع يبت الناس شمتانين..

ضميني بدفو ازياكج انه ميتم دفو وبردان....
يصاحبتي الينام الليل لابس ثوبه نص اردان..

شحلات العاشگه من اتحل جدايلهه..
شحلات العگده من تصعب تجي محبوبتي تفلهه..

ذكرتج والعشگ فد نوب يطشر بعافيتي..
شمس ربج يبعد الحيل ما گربت يم بيتي

اشتم ريحتج واغفه اعلى طاري افيش
والف روحي واخلي ال اخ تتسابگ..
جا هوه شحلات الليل من يخلص بلمشابگ...

يبت روحي العمر منذور
سهري وحيرتي وداعيج فدوه يروح لعيونج..
يكمره الوان هاي الناس محد بيهم بلونج.

لفيني بكرب زلفج ضفيرة ليل..
وفليني بنده جفوفج.
ولاگيني بحلم محبوب..
يبنيه الهوى طيوفج..

..بلكي اغفه اعلى بستانج.
وانوش البرحي بشفافي.
هوه اليمج وما ضاگ
مثل الكاشخ وحافي.

اباوع كل زلف مرني بوجه ملهوف.
بلكي ولنهه ترچيتچ...
وارد امشي بضهر محني.
واشوف الناس كلمن معتني لبيته...
وانه متعني حد بيتج.

مدري شمالني بلياج.
عضم ريس يمرني الماي..
من كد ما سره بروحي.هوى الدخان.
اليگابلني ايعرف مگفاي..

شحجيلج يلمضيعتني.رديني.
تراه الليل شد رايه..اعلى عافيتي.

ولو هوه النهار انباگ..بس يدنالي.اذا اجيتي..

عزيز عسكر ...


سكارى نصلي ونغني...

نحب ونموت ونخضر وطن للناس ونغني..

بصابعنه النجم سجه وعمر مكتوب لعيون الحبيبة الغافيه بظنك كبل ظني...

كضيناهن سهر ودموع كل موعد يجي يجيب العمر والخوف
يجي بجف الرمل بسكوت..
سكته برمشك ورمشي الظلام يطوف...

كضيناهن كراجات وسفر وهموم
حماميل وحزن وجفوف...

وين انت وهذاك انا نهر فوك منصابعيك خسارة يصيح..

وينك خايف بروحي النهار يطيح..

فوك اول منارة التفلفت بسمك يوجه ابليس

فوك الماي كبلك وانت مثلي تصيح...

حماميل الوطن فقره..
حته ثيابنه تغني الشعر فطره..

يوجه ابليس هذا انا شعر شعبي أحب شعبي

احب ناسي بس اكره غنه المحراب

كلهه احزاب

وحنه ثنينه من تراب...

نسكر والعمر مكتوب فوك الباب...

حماميل وعمرنه الراح مثل الجاي....

ترجية بوجه حلوه انطفت بالماي..

سكارى ويدري بينه الله نحب الدنيا وطفال الصبح والعيد

الفرح بعيونه من العيد..

(كلشي موسم ...حتى حب الناس موسم)

||عريان ال سيد خلف||

المواسم ....


حته طبع الطير موسم
والنبت موسم
والايام التجي وتروح موسم
والمواسم من تمر عالناس
موسم ينتهي ...
وموسم جديد يبات
والحب،، والكره ،، والصلح ،، والزعلات
وانسام العصاري بطيب الحديثات
بس انت حبيبي
وماكلت بذات

يامفتاح روحي
والسوالف بيك تحله
والهوه يمرني ويرطبني هبوبك
ياندى الغبشه
ياخطار عيني ها كثر مغتاض ..!
من رمش لرمش زعلان تتمشه
وانه احبيبك

عمر زخني حنانك مثل الحميمه
خذت طبعه
وحنينه .. وطيبته ..
وفرني زماني ....وكبرت الوحشه
ياطير المحبه
هم سمعت بطير ؟!
ماشده الحنين لديرته وعشه ؟.

الشاعر ازهر كريم


شمدريني
تلگيت الهوه بگلبي وطحت عاشگ

وذبل عودي بربيعه
وبردت الدنيا
وبعد مالي عرف باحضان المشابگ

وبعد ماحب
لان حبيتك وضليت
واني ودمعتي بالليل نترافگ

واني وحزن الولاية
تواعدنه
وتسامرنه
بفرد شهگة
ردنه نلم بگايانه
ونضحك بس طواريك تباعدنه

شگول عليك
وانت بكل مسافاتي
حزن شمعة

انت تريدني انذل ع لاهيتي
واطيح لنزوتك دمعة

واني العيب الي يغطي
المضايف كله ماخذني

شگول عليك
يل وازيتني بصدك
عساك بليل مايطفه

وعساك بناس جذابة وتضل وحدك

وعساك تصير هم عاشگ
غريب ولامحطة تعرف عنوانك

يلجم گلبك المدري
وتشيل النايم بصدري

ودموعك تجري ع المامش
وتضيع وكلشي بيك يموت
وتظل لجفوف ياهو الجان تستاحش..

قصيده رائعة ... تحمل معنى الشعر الحقيقي

||سيد سعيد الشريفي ||


شماخذه الايام منك

انته...
بــس مو انته يمك

وعمرك الگاضي عمر
ماكله اسنينك الساعه وما وعيت
ضاعن الايام والمجيوب عمرك
وانته لاهي وما دريت

الدمعة اذا طاحت عمر
اللحظة اذا فاتت عمر
متاني وادم ماتعرفك هذا لـ متانه عمر

گلب بـ اوراق عمرك
ناس راحــوا
ناس اجــوا
ناس رايدهم يظلون ومشوا

اكو ناس تعوفهم ترتاح منهم
ناس ظلتهم حمل
واكو ناس طيوفهم
تگعد بـ راسك مثل خرخاشة بحجل

دربك اتعداك وانت
انت مشتول بدرب وادم نسوك
سلعة عازتها انتهت

العمر طاسة ماي وبرملة انچفت

الدنيا ردتلك احلامك صم رماد

وباگها الريح من اديك
ديرتك فرشت جنحها الناس غربه
وانته منها وما كسر فيها عليك

شگد جبيرة مرايتك
من ما تعرفك

شگد جبيرة بـ ديرتك
ماتلگه حايط ينتچي تعبك عليه

الشاعر ينقد المجتمع ب لغة خطاب آدم

(عباس الغالبي )


شمرن بيك ..يا ادم ؟

حشمه وما تعرف اهدوم ..؟
لو خبزه بحلگ محروم..؟
لو خرت سگف بالليل يرگص بوم..؟

شمرن بيك ..يا آدم
أمرن بيك
هل هلال ...هل هلال
والصايم كله الصايم

أمرن بيك حوى وبلكي نتوالم
مثل خطبة ثلث ﭼـلمات
صارت عيشة الحاكم ..

اجيت... وهالشفتهه ....
وهالخذيت
امراد
واحنه بعيشة امساوم

ايا عثرة الشجره برغبة العالم

لوّنه ابليس جاهل ما مشاله شراع ..
ولا غرك بشجره
وطحنه احنه بگاع
جا هسه ابمـﭼـان انشوف بيه وادم

مو وادمنه هاي التحـﭼـي مدري المن
يتراجف وعيها ابين ضحكه و سم

ي آدم ..شاخت الحسرة ..
انه من احجي بلسان الغير
تره الساني بكبر گدره ..

و على الفطره ..

صبحنه وليل ما ينراد
عشگنه وحرگه الها ازناد

اسمي واسم الولايات ..
جذبنه بمشية وبگعده

وضحكنه الكلشي ما يسوه

على الفطره ..

يا آدم طگ المعاتب ..!!
دنزلنه لمجان نشوف بيه خضره
دنزلنه لمجان يحلل الخمره ..

المن نزلتنه الـ دنيا بيها الماي يتمنن على الشجره

ولا تبره ..

السوالف بس عتب فقره..
هلبت من يشوفك يلمح بكفره ..
هلبت يندل القبله..
هلبت ما يشيل السيف
عنتر لو حضن عبله ..

ي آدم ....غاد هم ذله..؟!
هم الصيت للمله ..

هم عين الفقير امكتره ابلا لون
وعين ابن المدلل تضحك وشهله ..

يا ادم والعتب مو زين ..
ولا يمك عتب لن ما رضينه عليك
و رضينه اعلى الضمه العمرين
يا ادم انت موش حسين ....

شاعر يخاطب الله

إيهاب عيال الضالمي


( تسبيحة العنبر ) :

يالتسمعني !
تگدر ، بس تريد ازهگ
من يمتى الغصن ينباگ والسِبّاح يتحاسب ؟
و لـ يمتى ! تره الـ "ما اريد اخسره" اتعيِّنَت ديباجة امعاتَب

السهر نيشان ..
اذا بالجنة محد يغفى بيش نفرزن العاشگ ؟
و مو صعبة ،
الكتاب الفاهي يگطع رزق العمامة
رحت عبرية للجنة ، و آدم وصَّخ الجامة

يرب الدم و المسايس !
چنت من امشي بـ ظنوني ، حسبالي الغنى عثرة
حسبالي الـ "اسم الله" اعلى السكارى ..
تنحسب كفرة !
و سمعت الدَم : ابلا غـِيـبة !
الهوه شعليه ؟ المغرب ريّتك گلبك
اخوط مگاود الحنضل ..
و افز و اتمضمض بجيبـي
ما كاتب جديد و يصعد الدخان ،
و رِگدت چم قصيدة بجيب العذيبي
ابلا مـِنـّة !
عميت عيوني چي شوفي يطب گبلي

يرب الـ "ما اجو" چا يمتى احاچيهم ؟
اهز بالصورة .. طلعيهم !
الحظ المو رمح يگعد
و ما ضايگها !
ذِلّة ، تبوس چف الساعة حتى ترزقك بموعد

يالتسمعني محد يرضى يسمعني ،
احس همّي لحن مبيوگ
انه ادوارة دِوه عن المرض بالدَم ادور عليك

خايف ع الذنب منك
شكبر گلبك ! نِشد غربة
و انا ادري الحِنين ايدردم بگلبه
و انا ادري !
الفطن من النخل يحسب ..
بقى من عمره چم كِربة
الما يمشي بفريضة ناي ، لا ياخذ حِشَم گصبة

التعب يتنَسه بعيوني و توزني الصبخة اشگگ كل مطر بايت
يرب الـ "عافني" بهونك
انه ردت الـ "احبك" منه لا صغراً بالـ "شلونك"
يا خطوة الـ تكِف الناس من دربي ؟
الينام بگلبي ما يرتاح ، چرباية سجن گلبي
بين الحسبة و الخطوة ..
انه مثل الفضيحة بسرعة جاي اكبر
و ظلّت للحَمض تسبيحة العنبر
و ظلّت لافتة ابلا فيّ :
"الخِضر مو خِيرة و يحاسب هِلب كافر"

شكبر حزنك !
من اگلهم : "والله" و يگلولي :
"لا چذاب احلف بالتحبه" و احلف بغيرك

بين الـ "لا" و التحرمص صرت حاجوز
مستغرب بچي الفرحة ! و مضيع العرِف دمعي
الغريب يصير اعز الناس من يدعي
اشيدنيني ؟ سحگِت الخوف ،
مثل اليسحگ اعلى فلوس .. خاطِر يجزه راعيهن
انه الما ينغلب ، رديت خايف ع المكان ايضيگ
و گلت : خلّوني اكتب عن البگلبي ..
القصيدة العاهِر الـ ترتاح للتصفيگّ
و مو گدي ..
الشمس ما تستلذ من يختل التعبان بالطَرفَة
الشمس غربيل المتانين
و خفّة دم الچعوب التوصلك من يضوج الطين

و فزيت ! اعلى صوت من الرمح متبدي :
- "لموّا الكروة جامة آدم عليه"
و متت "موت الله" ما غثيت فصلية
يرب الـ "ماكو" ..
من شفت الخِضر خِيرة ،
لگيت مخازر الخايف يسومر ظِل اليچهبك
و مشيت و گلبي شاورني :
- اول مرة تكتبلك قصيدة لواحد يحبك

الحمدلله والشكر كملنا الامتحانات ع خير ..
والتوفيق للجميع ..

وعدنه فقرات حلوه بيها استضافة شعراء ..انتظروها ♥♥

( ألوان )

عبد الوهاب الحمداني

وجهي أبيض لاچن ابگلبي سمار
ولوني لون الخمرة و ابروحي خضار

يضحك بگلبي نذر فختايه شگرة

ما أعرفها ليا إمام
وما عرف ليش آنه هذا ؟
ليش أحب لي غراب والوادم حمام

ليش أدوّر عالضوه بوجنات غيري
وآنه بأحضان الگمر ليليه أنام

ليش أبوگ الضحكه من شفة غريب
و آنه بشفافي مضايف شعر تضحك

ليش أصير ليوسفك بالسكته بير
ليشك ما أزهگ و أفضحك

يمتى أصاحبلي گمر ما شايفه أحد
و يمتى أمد چفي إعله چف ما بيها معضد

يمتى أنام ابنص جفن ما لاحه مرود
و يمتى أحط روحي مدينه ابلايه معبد

حلمي أسافر للگصيبة الما غفت يمها شمس
و حلمي أدگ صوت الحبيبة اشراع و اوصل للهمس

وأرد أغنّي :

يموت نبض الگنطرة ابلايه نهر
و اليميل الوكت بيها ما يعدّلها مَهَر
الخنجر اليضحك بوجهك باچر يشوفك ظهر

( الرسالة العملية لأحد مراجع الناصريه شعرا)

نوفل الصافي

رساله عمليه


الكره يبطل وضوء
والتبات ابحضنه غيـبه يغتسل باقرب نهر
للشوگ دافي ـ على الأحوط ـ مرّت ابجرفه حبيبه
ولو سمعها- وإن سهوا –
يشطف اذنه نص نهار ابنده تغريد البلابل!!

اليمس خد الورد كفارته يزرع حديقه
واليصافح چف جراده... امنين ماچان
انتماءه وانتماءات الجراده فهو باطل..
ديّه يدفع للسنابل .. حرگ گونية مناجل!!

البيوت الخالية من طير للحب ما تصح بيها صلاه

اليطوف الناس باحرام المحبه
حجته مقبوله ولا يحتاج للكعبه وصول
اليصلي وقبلته ارموش الفقير..
وما إجه ابّاله اشحچه اشگال الأمير
اشلون ما رايد يكبـّر خل يكبـّر
آنه اضمنله ابتسامه من الرسول

الدعاء ابلا شعر للناس.. للحب
للأمل.. ما مستجاب.

ولو إجه فرض القصيده ما تصح
تـُكتب قضه.

لوحة المليانه حب .. تبقه
..وتموت
لوحة المرسومه لون امچفنه
اعله الحايط بتابوت خشباته شعار
واليعض شفته ابوجه باب الشتيمه
إنتصار.

ريحة البارود محظوره بتاتا
واليلامس سيف يكفلّه يتيم
الشبابيچ التجيلك منها ريح
إرسم اعله اخدودها بوسة اشراع
وابحر اشما مدلك الله ابروجه بجناح الضوه
لاصلاه للخوف بمتون الرسالة
ركعة الرجفه حرام


ليش خايف؟
القصور العاليه خدرانه حيل
والحچي بس للصرايف
واللسان موفقط للضوگ..
والله موفقط لبوس خالقها الشفايف..
ليش خايف؟

اللسان الينگص ايخضر اهلال

يركض اعله الباچر ابحلم الامس
ويجي باچر

ويجي شاعر

يكتب الجملة الكتبناها أمس!!!
الچان باچر يوم چنه اول أمس

وهاي هيه ..
الغيمة غيمة اشما يدثرها الظلام
اتطيح من تضحك شمس

النجمه من تموت لاتلبس عليها الدمع الاسود
الگمره تحبل كل شهر تنطيك نجمه

إرسم الطيف اليعجبك
وافتح اعيونك اتشوفه..

وابصم ابخد السمه اللون التريده
وللأمانه..

الگاع حره.. فشله تتخطط سجن!!

وللأمانة..
الدين حل المشكله.. عيب يصبح
مشكله وتبچي اعله حل

الله خير
اچفوفه مليانه فراشات وسلام
المحبه اقرب طريق الباب حنية الإله
الزكاه واجب عله كل المشاعر

ابلايه حب .. تكفض اجفون البراءه
تنطفي الدنيه ويخوط الليل چايه بالصبح
تنچفي الذلـّه عله خدود الملح جربة دمع.

ابلايه شوگ ..
تنشف اللهفه ويفرخ ابليس بعيون الشمع
النخله أم
شجرة التفاح أم

ونومة العاشگ عبادة شرط
ماناسيله موعد

الگلوب الليلو اكلادة عرش
ما يطب الجنه من يرعب فراشه

آثم اليصنع مخده نوم من ريش الحمام
الشهور الحرم عشره الباقي عيد..
أحمر الشفه غروب يفتح الليل
اعله موسيقى الجمال

والتيمم جائز ابكحلة عراقيه اصيله
العراقية الأصيله
الشدّت ايزار الحصار
وطبخت ابجدر الصبر لمن سجد..
يمها كلشي ابّالك ايصبّح حلال

العراقي ..
الينحني ابنيّة وقوف
ايعبـّرالجيل الوراه !!
الخط الأحمر يبدي من باب الطفوله
من ابتسامة طفل مثلومه
عله اضفاف الشفايف
تاكل ابلبّة لهاته
شوغة اخرس ترفس ابگلبه قصيده
حوبة البلبل چبيره
اتعثر الشط ّ و ثلث ترباع
من بحر التلوحه
الخط الاخضر يبدي من باب الطفولة ..
ابطور "داخل"
والدللوش الحنينه ابصوت فيروز
اليذكرني ابوطن منهوبه ترچية فراته

طور داخل حرز عن غول المكابر
والـ (بنفسج) تنقره حين الولاده
اتگطـّر ابإذن الرضيع
ويّه كل فرة اگماط اتلولي فيروز
ابدللوش امهاته
الخط الاحمر يبدي من باب الطفولة
وينتهي ابخيط البريسم
خيط البريسم مقدس ..

شيلة الأم علم والـ (چِــلاّب) راية
والشبگ تنور أم حته ـ لو باقي أثر ـ

يعتبر طالب لجوء

ناصر البدري .....


سكته عله سكته تمر الأيام
لاتـنشـره ولا جذب تـنسام
تدفـع بــ عمرك دفـع جـدام
حته الحلم مل منـك ونـام
. . .
فنك تنام وجفنك أبعـيد
وحزنك كسر ضهـر المواليد
أتـريد بس ماتـدري شـتريد
صافن وره ضعون الـمواعيد
. . .

صافن وگلبك ركض مذعـور
ركضـة نفس مابين الگبـور
تشتعل بس تـنشـاف تنـور
تـكتل الطيف أرسـمله ناطور
. . .

لاتحسب ولا تشـتري الصيت
ماتضحك أشفاف التـوابيـت
دللـت يامـه ويامـه ربـيت
بس أنـته واسمك تالي ضليت
. . .

ضليت شوغه بـصدر الغروب
ودمـوعك أمنطيـح حالـوب
أحبابك نسـوك وسدو البـوب
ونامـو اگلوب امشابـگه اگلوب
. . .

ديـر الخمر فوك الصور ديـر
بـلكت تطفـيك التصاويـر
ليـلك أشكبره وحلمك أزغير
ماينصـبغ شـيب الطباشيـر
. . .