امس وانه بحلاة النوم
وبفكرة شعر بليل متعذب
ندهني صوت .. شاعرنه شاعرنه
وعرفته صوت أبو الطيب
وسألني عن جديد الشعر هل أيام
والناس اعله ضيم الصابهه شتكتب
شتكتب .. والجديد البي فرح چذاب
ولگاك جديد ايفرحك يچذب
امي من الزغر تنگل حطب للنار
ويفوّر جدرها ومدري شتركب
مصباح الحزن صبتلي بالماعون
ومن ضگت الحزن شفت الحزن طيب
هاي هدومنه مالات عشر اسنين
مو سمران .. بس هنه علينه الوانهن تگلب
وتسأل عالسمار الغلف الوجنات
گلبك يحترگ لو دمك يعطب

-المدرسة كاظم الگاطع

«« يا ثوب »»

الكبيــر غــني محســـن ..


يا ثوب صبرك عليّ
طلعني بس هالعيـــد..
صدگني منك بعد
كلشي ابد ماريد...
يا ثوب شكراً الك
ادريك مو مرمر
ما بين شگ و فتگ
سويتك امشجر ..
واحد بواحد سوه
بالليل نتدثــــر..
واحدنه عنده صبر
كل يوم بس منزيد
يا ثوب حتى الحلم
هم بيه نتلاگــــه
انا بحرير احلمت
وانتَ اعله تعلاگه
ضربات حظي جزن
ما وحده اجت شاگه
ادري الـ اريده سهل
لكن عليه ابعــيد
يا ثوب صبرك عليّ
طلعني بس هالعيـد
صدگني منك بعـد
كلشي ابد ماريد

لا أدليـهم بگلبك ،،
گـول ضاع

گـلهم أميه وتبخر ما أظن ينلگى بـ گاع

گـلهم أنه بلا أشـراع

حتى أذا گالوا حضن ،،
گـلهم وداع

كـلشي گـلهم ،،

يـاهو يسوه أدموع عينك ..؟!

ويـاهو يستاهل نشد وتگله وينك ..؟!

ليش تعثر ...؟
مره ضم روحك بروحك
مره چذب ناسك و صدگ جروحك
مره سير للفرح من دون نوحك

هي مره وبالحياة تعيش مره

ضيع ،،
خلهم يشتهونك
خلهم يعيشون دنيا بلايه لونك

لا يغرك شوگهم لو طاح مزنه
أ.ولا گلبهم من يلم لـ جفاك حزنه

تالي تعطش ،،
تالي تنمـل

كافي چفك ينعگد بچفوفهم وكت النفاه ،،
ومن يمرك ضيج ينحل
ثاري حضن الناس ليله ،،
شما أيطر الفجر تذبل

ليش تذبل ..؟

ليش حزن الناس موسم ،،
وانته حزنك ماله تالي ..؟

ليش طيفك فاهي گلبه ،،
وطيفهم عرس الليالي ..؟

هواي ليش
و ما حضيت بـ چلمه تشفي

خلصت عمرك أتناطر ،،
يمتى تجفي

مره كابر ،،
گلهم أيغثني المشابگ ،،
للهجر مخلوق چفي

مره ضيع ،،
الدنيا مره

الغربه هم ترهم وطن للـ مالـه ناس
الخمره هم ترهم ولف للـ گلبه كاس




جواد زغير

احمد معلة || بلكت الله ||

هملي جدمك بلكت الله
ونعثر بطاري الصغار
حيرتني بظهرك الماصفه نيته
اشما اشوفه اهواي وادم خايفه وماضمها غار
الحلوه بيك اشما اشوفك تفتهمني؟
وتستأذن امن الأعمه كون السالفه اطلابت نهار
والله متعرف عليك شعرفاني اعله القطار
وبلكت الله
وجدمك يدليك بيه
وتكشخ ابروحي صليب
وحشة افراكك طويله ابطول وحشة ذاك المسافر غريب
وحشة الشاب اليموت وما يجي الكبره حبيب
ولا تحير لا تحير.
رمل حاسبني انته عادي
وداعتك بيه استفاده عالأقل سووه كزاز
الجرف بلصحرى نشاز
ومادريت
ضحكت البطران هوسه
والورد هم يحترم وي سامح الاعمى اعل دوسه
وما دريت
الرايح ابنية عشك بجيوبه دور تلكه هيل
الشبكه محتاجه محب يطيهه حيل
اي ...... ليش كلما اذكر اسمك يوكع امن عيوني ريل
وما دريت
الينعشك اهواي نعمه!!
والله مايحتاج شاهد
اتحلف الخرسان زحمه
امساوم الغركان نسمه
ووشالة الدخان غيمه كلشي بعدك صار ظلمه
دربي ليل وجدمي ظلمه
كلمه ظلتلي دخيلك بادر ومربيه نجمه

رسائل مغترب
للمغترب عزيز عسكر


عمر متعوب بس دافي
ازغير يلاعب النهران ويمشط الفجر والليل
بس كل مغرب يجافي..
وانا ابلا ناس
لا عندي وطن لا دين
دمعي يخضر من الخوف
گمرية على الحافي
من بيتي الطيور تطير
ومن عمري الظلام يموت
بس حافي ..
هذا انا بعد عندي وبعد بيه
انا بروحي السمر والماي
انا بوجه الزلم نجمه
وانا النشمي الترف والعارفه الگصاي
واجيتيني وجبت گلبي وجبت كل الحزن والشوگ
ردت اغفه على اسنينج
واگلج هذا انا الشاعر
اموت من الحزن والشوگ
ولج غنّــي..
ولج دليني بثيابي
تهت والعمر مو گمره
ظلام يخوف المحروم
ويحرگ روحه للسلطان ويغني
ولج موتي گبل لااموت
لا ياخذوني للحرمان ويگلولج عني
جبان يحب هلـه والناس
بس يكتب على السلطان
شاعر جاااان!
هسه الوحده ما يعرف يروح الـ وين
غريب ويكسر الخاطر
بس ما خاف ما جذب
بطل قومي وجنح مكسور
و امطرز على النجمات
بس مهموم ويكابر
مرات يتمنى امه تگله نام
ابهيده نام ..
"عيونك زرازير البراري "
يفز ويصيح هذا انا بعدني هنا
احب واسكر واصلي واندل الفقرة
واعرف الباگ والمبيوگ
واعرف العاهره الحره..
عمر خلص طفل يشبح بعين الناس
بس ما يلگه بيهم ناس ..
يرد وحده وعبرته بصدره جن مهره
ولج لو بيج من روحي فلا تغفين
سهر ودموع ..!!!
شعب متروس بس دخان شتغنين؟
هو احنه عرفنه ..الناس؟
هو احنه اشعرفنه الدين؟
اجيتيني واجيتي بكل بـﭼـي العشاگ
اجيت من الشغل مرتاح عندي انتي
وعندي الله ..عندي ادلال ..عندي الناس
وهذا انا الجبان الگالج عنه عزيز ..
ويشرب اگهوته ويهم بالناس
ويريد الدنيا كلها تصير ورديه ..
عشاگ وعمرهم من غنه الرحمان ..
ومن وجه الصرايف هيل للديوان
حلوات ودلع ونهود ..
ومسامر حبايب ليله گمريه
هاي الدنيا يمعودين ..
هاي الدنيا يمعودين...

مسامحينك . .

ع ألبرود ألترس دمك
وع الحجي ألما كلته يمنه
مسامحينك
كون مره أتموت النه

مسامحينك
عاليالي ألبيها عفنه
صورتك متروسه حنه
مسامحينك وأنت لمنه
والتطشر كلشي بينه

وهسه متنه ؟
وليش هالغربه تصيح وأنت تسكت

فدوه أبجي أمن البجي ألباجينه ألك
من رحت عنه

فدوه لو بالجذب تبجي

أحنا من جان ألنفس يمشي
أعله طوله قشمرتنه !!

وهسه متنه
وأنت دلينا الدرب يالموتتنه ؟

شكد حجي يغثنه سمعنه ومازعلنه

أنت طبيت بكلبهم
وأحنا من كلبك طلعنه

فدوه لو بالجذب تبجي
ليش تسكت

ليش كدام أليكرهونا بعتنه
أنت ما تاعب علينه مسامحينك تعبتنه

أحنا ما بعناك من باعوك اهلنه !! ..
ع ألحجي ألما كلته ألنا حلو كلنه

أحنا عودنا نفسنا أنحبك أكثر
أنت أبد ما عودتنه !!!

ويا طعم يسوه ألعمر لو راح طعمك

أخ لو أحنا نهمك ..

أخ لو تقبل نلزمك
منين نبدي من نلزمك

وما حاسبينك ؟؟
ومسامحينك !!

أحمد ملآذ

#تهدمت_والله_اركان_الهدى. واعلياه

وانتَ ولا خذت عبرّة
تبديت اعله شمس الناس طاسة فيّ




علي الشباني

الى أمير الضوء والانسان علي ( ع )
لكن لم يذكر اسم الامير كثيرا حرصآ على استهلاك الوضوء مني .


يبو سوالف حنينه أستاهدك ضوگ
يالمگفاك حته لوجهك يلوگ

من چانت الوادم تحلم بگيض
بتوالي الغيم چفك يعصر الفوگ

من تشتد تضل تنفض توابيت
بس يم اليتيمه حچايتك طوگ

الخبز مستفحل بذاك الوكت چان
ويمر طاريك سفره . وتغفه الحلوگ

الضماير حاديه الليل وتماشيه
وزفيت الضوه لكل صبح مبيوگ

يبو الدنيا . وتواضع مال ابو تراب
علي اتدنگ سواجي وتوگف عثوگ

يخير ولايتك . يالكلش أفياي
الفقير اليدگ بابك تنده السوگ

يالعندك عرف بالحنطه والماي
الطيور بديرتك شدنلك علوگ

اليتيم ينام خوف . ويگعد ب آآآخ
وأنت تهب عوافي محمل النوگ

مشه بسچة چفوفك دمع الزغار
أمدثرهم حظن . وشكثر مشبوگ

يهيبه ومن تگوم أتگوم ألاجواد
أمنشباب المضيف أتطلع حگوك

يبو حسين شعلامه النخل وياك ؟
شو يشرب سمارك حد العروگ !؟

لذيذ لحد عليك البرحي يلتاف
وتزف أفيش لآخر باب مسروگ

يالمشذر الگاع بسجدتك ذيچ
طيفك عافيه لكل جفن مطبوگ

#الرائع
#زين_كريم

حتى ما نلكه عذر

نعيش باجر

وبين حلوات السواجي نطيح ماي

وحنه متروسه الصواني

صوت دافي

والهلاهل جانت بروحي حلم

غير وجهك ماترس عيني رسم

يادلالي وخير تعبي

حصت الطير الغصن

انت يا اول وطن

وانت يا اخر وطن ،






لـــ فارس قاسم

#قصیده_جمیله_للمبدع_مهند_العزاوی
#لاتفوتکم

هل  يا تُرى؟؟

هل يا تُرى ؟

لو مت انسى ماجرى ؟

هل يا تُرى ؟

لو كان عندي غيركم قلبي اليكم ما سرى ؟



هل يا تُرى ؟

يحتاج مني كرهكم قلباً قوياً ثائراً وتمرداً وتجمهرا ..

ها قد افأضت أجفني والدمع منها قد جرى ...

والدنيا ضاكَت والنفس باقي على كَد الحسرة ...

فرحان داويت الغصن ثاري المرض بالشجرة ...

مرت سنين من العطش ...


مو شفتي روحي تفطرت ومتاني حبكم كَطره ...

وما كَلت ليش اتعذبت !!

جنت ادري اليحب من صدك يرتاح بس بكبره ..

وصار المعارك بالحجي ..

وبين الضجيج المرتفع فرزنت منكم نبره ..

حنيت كَمت اكتب شعر ..

ديوان كامل بس غزل ..

كملته وانطيته الشخص لايكتب ولايقراءه ..

أمست جروحي معطفاً .. 

وأحتل لوني نزفها والحزن بي قيثارةً يُبكي جماداً عزفها ...

صارحتكم بمشاعري وأزداد فيكم صدها ..

لو كان فيها كذبةً ما كان منكم ردها ..

مو صوجكم طبع البشر يرتاح للي يغدره  ..

لو غاب يومين الرمج يشتاق ويفك صدره .. 

وجيف اني احبكم من صدك ..

وبروحي شايلكم عشك ..



مل غيري منه عيونكم وأني بحسرتي النظرة ..

وشكد اجو رادوني احب ..

علمت كَلبي وماعرف ..

يعني اني احبكم من طرف واحد وصنت العشرة ..

وشكد فضول اتحملت و وجوه مابيها طعم ..

واني بكثر ماغيمت يرعبني لون الكَمره ..

مليت وكلش من صدك و يبست الروح الخضره ..

احتاجُ بيتاً هادئاً ..

احتاجُ بيتاً هادئاً يوماً اذا فيه ارتمت ينسمع صوت الابره ..

احتاج صدراً واسعاً ما عاد صدري يحتمل كسرت ضلوعي العبرة .. 

وبالضحكة حيل استعجلت فرحان داويت الغصن ثاري المرض بالشجره


#مهند_العزاوی

بلايه شفه
الموت صاح
بشر عيونك يـ نايم

اليريد
أيعيش باجر
يركب بـ ريل العمايم

اگعد ..
اگعد ..

صار شوك التربه باهت
والجوامع فاهيه بـ عين السكاره

وخوفي ..
لا يرخص الدين
وربكم أيصبح خساره

بـ يا حلم
ضيعت عينك

بـ يا بخت
جرحك تنينك

خذو من گلبك گصيبه
وقشمروك بــ حاسبينك

وهمه ؟؟
بيمن حاسبينك

حاسبينك ..
لـ الضحك للـبيع للچلمه الرخيصه

يابساتين البنفسج عين روحك
الك ثلـثين بمطرهم ليش يابس

فنك ..
تكض الشمس
وتگودها الباب الحرامي

اگعد ..
اگعد ..

ديرم أشفاف الصريفه
وشيلها بواهس مضيف

واسگف ..
العوز بـ عباته

الـ صدك نادر
يفزع گلاده الخواته

أمس جان
الغيم خير

أيبدي روحه
وين ما عد الله حب

ومايعطله دعاء

الگاع من فكت صدرها
مطرت الدنيه عصافير وشلب

اي يـ شيال الطواري
أشتري النعشك أمتون

ولبس !
أسنين النشامه
الترست الـ عفيه هلاهل ..

كل عشگ تكبر بعينه
لو متت فوك الرسايل ..

ناصر البدري

الثورة من تبدي گصيبة
وتنضفر للوطن , للچف النظيف
لديرة سمرة..
الثورة من تبدي قصيدة
وفكر شعبي
الما تلمّ الناس ماتسّمّه ثورة...
وطولك اليندل مشاوير الملح والماي
وعيون الشمس
كلما يطيح تغنّي فوگ ترابه شجرة...
انت يازفة عشگ ليلة مطر
صلّت عليها گلوب خضره..
گلبك يجيس الفلِح والگاع
وتهلهل بيادر
ترگص الحنطة وطن والديرة خير...
صوتك يعلّمني
احب گاعي وهويتي
واضحك بوجه الهوى شماغنّى طير..
چنْت الم دمعي اعلى مودك
يم جرف عاشور ابدّي
واشتعلّك شمعة شمعة...
هسه چم عاشوريندل
خلّص دموعي وكسرني
الليلة مابيّاش دمعة...
الليلة بس آنه
وضريحك والبخور
وعلگ بالشباچ من عاشگ علامة...
الليلة اشد راسي بحضرتك
ياندى يالون
ياطلعة فجر يتنفّس الدنيا ابتسامة....
للعشگ مشتولة روحك
طينتك طينة صريفة و نيّتك نيّة حمامة...
أكبر من الدمعة صوتك
وأبعد من الشعر ماضيّه وجديده....
انت بس عبد الله عندك يشتل الصحره براءة
و يسگي تاريخ العطش ماي وقصيدة...
غروبهم مابدّه شمسك
ذيچ شمسك طافحة بچبد السمه....
وذاك شوفك
يمتد لآخر مدينة
يسيّر اعليها العمه ...
وهذا صوتك يغزل السچة البعيدة
ويندل المهرة الجموح...
واحنا شبّينه اعلى مودك
عِشرة صرنا ويه الرماح
وغزّرت بينه الجروح ...
شكثر متنه
شكثر فوگ صدورنا داست حوافر
وانت تشهگنه اعلى كيفك
نسمة نسمة ...
تريدنه نضوّي الوطن
من تكبر جبال الظلام
ونشتعل بالثورة نجمة.....
الليلة من يطفه الگمر
چم نجمة تطفه ؟!..
وچم نهر بالديرة ينسد؟..
وباچربوجه العطش چم وردة توگف!
باچرالغيم ايتدلّه
وچم علگ للثورة ينشد!..
خاطر يطش الخضار ويه المطر
ويطير دخان الحرب
واللون الاسود....
خاطر يبردن عليك گلوب اهلنا
وگلب خيمة زينب المحروگ يبرد
گلب خيمة زينب المحروگ يبرد

ميثاق الهلالي

شد جرحك يكلبي وعوف كلمن راح
بعد ما بيه اصير الكل ظهر دمعه

ولا بيه اماشي اليفرح من اغتاض
ولا بيه اصيرن للربع سلعه

صرتلهم بلم من شحت المعبار
وعلى متن الجرف عزوا عليّ دفعه

اعرفهم صدك ودريهم يخونون
وطبع البير كلبي البيه شيطلعه

وكفولي اعترف كل هذا ما ناسي
لجن وكفت الريح بصفحة الشمعة

صوجي وما خذت طبع الفلح ولكاع
العيط الما ثمر تتحزم تشلعه

ونه طبعي احن من ناكة البدوان
من تهجر سلفهه وعينها مدمعه

عشت مثل المرايه بغرفة العميان
اتحسر ع الجهبني وعيني اله مفرعه

قاسم الشريفي......🍀🍀

هـم رجـليك عالـملگـة…

قـابل بيـك لـو تابـوت المهـم اي…
تنحسب شبـگـة

أشـمك ويـن يـاكـافـور??

تـرة النـاعور…
يضـل يـصـفـگ بـدي لـو مـاي مـايـلگـة

المثـل صخـرت بلال بصـدري شـربت مـاي
انـه بصـدري يـرفـس حـافـر الخنـگة

المـضيـع ولـف مثـل المضيـع چـفوف
وسـمع هـدو عمـامـة شيـحچي للتفگـة

تـرة الفـرگـة البـراسي مـوش مـالت شـاب
مـالـت واحـد مـگضـي العمـر فـرگـة

انـة وخيـط الفجـر رفگـة

اگـود الـطيـف اذا سـكران
وادليـه بحضـن خـدران

واشـرب مـن مـتن بـت مـاي
مـن ثـگـل الگـصايب للـسمـة مـدنــگـة

لـ#سجاد_التميمي

سهران وألم بالشوف..

مدري شطايح بروحي تعب لو واحد يغني؟

لو ظلمه ومسافة خوف..

روحي تفك فرحها بساع بس تاخذ حزنها جفوف..

روحي ومدري وين تريد ليليه اعله ديره تطوف..

أحب ربعي وأحب امي التكلي شبيك
ياوحشت رسايلنه العمرها زغير..
انه وأنته مدري منين بس الكل شعار نصير.

جبيره الشاره البروحك..

اخاف من الشعر ينسه ويذم بين العمر صبحك..

زغيره العافيه بلياك
يلمتبدي برسومي أغاني وسالفه وجرحك..

انه لباب المتانيك..

انه الطيف المتانيك ترمش حته اكلك جاي..
تجيني ويه العطش كطره وأصوغنك شعب من ماي..

حيطان وسهر متبدي ع الشباج
بس يتنفس الشاعر اذا ماصايغ الشباج..

أحس ثورة شعب بيه ونثايه تنوح..
مدري شيجري يم كلبي احس روحي تجيس بروح..

خوف يشد ظلام العين
ويكسر الظوه اعله الباب..
وناس تحب ضحكتي وياك نعمه وعندي لون احباب..

عبدالله راهي

انتِـ ي يحليوة اهلنا ويادُبگ ماي الشكر !!

تهندست شمس الله بيه

ومن وره البرده العتيكة وجهج ينگط گمر !

مديت اديه اعلى الوجن بيه شتعلتي

باگة گرنفل

خضار

وياسمين

ومحبس يلالي اعلى جفي

طويسه حنه

وياس بعده بياسه ويفرفحلي دنيا

وديرم مغمس سمار امي وكحلها

شوي مسجها

شويه من عيناها عين

انتِـ ي يا اول هوى اليضحكلي ريه

ردي طيشي وطشي بيه

فدوه ردي

ردي ياول بشر بخياله وردي !

فدوه ردي

مفصل احزوني اعلى گدي

يابعدني

وعين عيني

ياحنين اهلي

وحنيني

كلشي بعدج طعمه فاهي والشكر مات اعلى تيني

شني ذنب الزعفران مفرهد وريگاته منه

ها تجي ها ماتجيني

ماتجيني ،،



اوس_النواب

الكبير
..........غانم الفياض

شفتك تشرب جروحك
ضوة امبسمر عذابة بلوحة الايام
طش ثوبة الظلام .. وما طفت روحك

وشفت ابظل تواريخك حزن يغلي
اوجه غابة اونهر متعوب
واگف وحدة ايصلي

وشظايا .. ومنجل .. ونخلة
اومدن ميته رماد ابعينهه اتخلي
لگيتك هم مثل روحي

عثگ عالي .. بعيد وما تلوحة الايد
للچف اليحبه الوحدة ايدلي
لگيتك هم مثل روحي وجرح مثلي

وطبع گلبك مثل گلبي
غريب وبالسفر معني
اتناسل ليل المجنون
ليل .. وخضرتله سنون
واحنه اثنينه ابهالليل
بس اثنينه انغني

تذكر
من چنت تركض وره اهلالك
ماواحد ركض وياك
اول ما ركض گدامك اخيالك
وتذكرمن گمت غنيت

شفت ابكل حرگته الماي غنالك
وتذكر .. من بنيت امن الثلج تمثال
طلعت چم شمس
ما ماع تمثالك

باجر عيد لو ورطة..!

المرحوم سعد محمد الحسن



باجر عيد ونعيّد ..
ونحرگ بيت ابو سعيّد
ابو سعيّد گرابتنه
نذبحله دجاجتنه
دجاجتنه الهراتيه
تسوه الف وتسع ميه
باجر عيد لو قصة..؟؟؟؟
واحنه ارواحنه مخلصه..
وخافنه يجي سعيًد
ويصادف گاضيه الحصه
ﭼـا شنخلي لـ سعـيّد؟
نذبحله دجاجتنه؟؟
نجيب احنه الدجاجه امنيـن؟
وامس بعناهن بـ الفين؟
وما كفن غده النه طحين
جا بطران يـ سعيّد؟
باجر لو ورطة ..؟
رجفنه وما لگينه اغطه!
بيعنه الغطه و الفرش والماعون..
وما عازت گصصنه وباعت النگطه
ولا واحد لغفنه وصرنه حدر ابطه
نجوع انجوع كلش حد ما يدگنه الجوع
وهذولاكه بعدنه نطيــح بالخطه ..
باجر عيد لو حيــره؟
ومامش حتى كنديره!
نزرزر ثوبنا المهزول
الما عدنه هدم غيره
ودينه انتداين ثوب من الجار
لمن ما صعب ع الثوب تزريره
ثاري احنه اشوه منهم ثوبنا المهزول
عريانه صفت كل وادم الديره..
عريانه صفت ما عدها خرگه اهدوم
لـﭼـن عز الوكت ما نزعوا الغيره
باجر عيد لو محنه؟
واحنه اريوگ ما عدنه!!
گطعينه الحجي
وسدسنه بالبيبان
خافن لا يجي جار ويعايدنا
لان عدنه جهنم عشعشت بالبيت
ما فد يوم دگت بابنه الجنة ..
گضينه العمر ما لحنه كل عنگود
نوبه احنه التمصع نوبه نتمنى
باجر عيد لو بلوه
مريض وما لگيت ادوه
وصفولي الدوه كلش بعيد بعيد
ولا انا بيه حيل وعالدرب يگوه
ولا عندي واكلف وادفع الكروه
بير من الوجع ومن النزف ضليت
وعليه الجوع گام وشد حزم دلوه
شمرني اعله النصيصه وگمت اركد ماي
ما يدري صگر واتخير العلوه ..
تطيح سنين عمري وتنكسر وتضيع
ما همني العمر وسنيني گلت فدوه
بس همني الوكت جي عاشر المو خوش
وﭼـي ولّه علينه نــاس ما تسوه

مثل الجوو عل جرح بلعيد افز باجر
عيد السنه بي طعم من ليلة العاشر

جرحي الخطيه البكه يحشم عله الناصر
فزعت اخيوط الفرح جرحي بقه يناطر

وانه ادري يبقه ندي بس ضال يكابر
بكل سنه اتئمل وضن من كسرة الخاطر

اخلص وحزني يرد هاي امنيت عاجر
بعيني الطفت عل مشو مهر الدمع غاير

كتله يمهر الدمع الديرة منو ناحر
الديرة عذابك يرد وچانونك الشاجر

تيهو ارسومي هلي من كثر ما حافر
مهر الدموع الوكح والجبح والماذر

يسطي علي كل مسه ويخرب العامر
شتاكو الوجهي هلي من كثر ماداير

انكابي عله طول السنه كل ساع اخو مسافر

كلساع اطمن نبع وانه كلب شاعر
ياعمي انه الحزن كادر علي كادر
::::::::::::: ::::::::::::: :::::::::::::::
گادر عليه الحزن مانت علي أيده
يو ميه ماخذ حلم ترفه مو اليده

يهضمك الشوف الطفه موش بواعيده
يامر وينهي علي تعويده تعويده

الكلشي تقاليد اكو اتسهل المچيده
بس انه مدري شني حزني تقاليده

من مااريده يجي ويتركني لو ريده
بس تالي منه اعرفت يحسب للبعيده

يعيشني مثل النخل يعشك صواعيده
كتله اخذني ورفض ثاري انه مافيده

حسسني هوه ملك وحنه چواديده
حاسبني ثاري طعم للصيده للصيده

كل امنياتي الحدر كيدهن بكيده
سد كل سواجي الكلب سخرني الفيده
مهضوم غصن العنب كصو عناكيده

لـ مرتضى حرب

محمد لفته العماري ....

تعب…
ب رسوم وجه…الله
حزن
ب رسوم وجه…الله
خدر
من
أول ابراهيم
ل… اخر بيت

من
اول
ضريح
بمدري شنهو…..انداس
من
اول
رسول

انباگ من عنده جواز…ال ياس…!!!

من
اول
نبي
استاحش نده الصفاف
وال غبشه
خدر
يمشي
بعناوين
الكتب…كلها
خدر
يشرب
تفاصيل المدن كلها

خدر جتف رموش…الناس….!!!!
وانه
هنااااااك
انه
ب اخر السچه
حلم عابر
اتاني
ومايرد…..احد
اصيح
ومايرد……. احد
اموووووت
ومايصحلي فراش
اموت
ومايصح جناز…لل يبرد….!!!!!!

وانه
هناك
ومتانيك

عاگد
كل ضوه الدنيا
بشبابيچ
الحزن كلها
بسراگي
ال اخ
والويلاه
بمتون التعب والليل
ناذرلك
شمش يم باب….كل…معبد….!!!!

انه
هناك
ومتانيك
هلبت
يا صلاة الليل
هلبت
يا
يا مسچ الهيل
هلبت
يا مفارگ حيل
يا
غرة
هلال
وفرحه يم كل بيت

هلبت
يا
تجي
وماجيت
هلبت
لن
تچي وماجيت
هلبت…..يا گطع…..وازود…...!!!!

لسه
هناااك
ومتانيك
اعرفك
ماتجي…متانيك
راح
هناااااك
تلگاني

حزن
برسوم وجه الله
تعب
برسوم وجه الله
راح هناك تلگاني
اثر شامه
اثر شامه…..ب ضريح….اسود .…!!!