[ تاجر الآخرة .. ]

إذا تعبت أثناء سيرك..
وعانيت في رحلتك نحو الهداية ..
واستوحشت قلة الرفقاء وكثرة الأدعياء ..
فلا تحزن ولا تبتئس ..؛
لأنك - دونهم - لمحت الكنز المختبيء من وراء التعب ..
الهداية الربانية والمدد الإلهي ..
إن التاجر حين يضع ماله في سلعة رائجة ..
يهون عليه قطع الأسفار ووصل الليل بالنهار ..
ليقينه أنه سيجني آخر الموسم أعظم الأرباح ..
وأنت تاجر آخرة ..
وما أربحها من تجارة 💙

وإذا كان التعب شرط الهداية والجنة ..
فلا راحة إذن بعد اليوم !

#رسايل_السحر
#رسايل_رمضان

الاختراع دا لازم يكون معاك وفي ايدك دايما في كل وقت ....
في الشارع، في البيت، في المواصلات ،
رايحه الكلية ،واقفة في المطبخ
رمضان كل ثانية بغنيمة عايزين نستغلها ، وطول ما خاتم التسبيح ده ف ايدك هتفتكر وتذكر الله كتير ✅

استغلوا أوقاتكم في ذكر الله دائما
لأن كل لحظه عدت لم تذكر الله فيها هتتحسر عليها يوم القيامة😥.

وممكن كمان تتاجر في الحسنات أكتر
وتجيب لاصحابك وقرايبك وتكسب بدل أجر واحد أجور كتير

ماتستخسرش في نفسك كله هتلاقي بعد كدة في ميزان حسناتك🌸

#رسايل_رمضان

خلص تلت شهر رمضان هواااا
10 أيام طاروا فعليا من غير مانحس
كان فيهم فرص كتيييير للعتق من النار و للدعوة المستجابة في كل يوم وليلة ...ياترى كسبت أي فرصة فيهم ؟؟!!
لو أدائك ماكانش تمام الفترة اللي فاتت ..قوم يلا استقتل في اللي جاي
- يلا حالا تبدأ قراءة قرآن وتحطلك خطة تختمه ولو مرة في رمضان
- ماتفوتش ولا ليلة تروايح مافيش حاجة اسمها كسلان ..اسمع عن فضل رمضان تاني عشان تعرف انت بتضيع ايه من ايدك
- من النهارده خطة أذكار محترمة مابين أذكار صباح ومساء واستغفار وتسبيح وتحميد طول الوقت
- لو لسه مااتحجبتيش ..سريعا خدي قرارك
- ولو عندك ذنب بسرعة الحق تووووب منه
وخد بالك ..الباقي من الشهر هيطيروا هوا برضو وهتلاقي نفسك فجأة بتسمع تكبيرات العيد وناس طلعت كسبانة وناس خدت دعاء جبريل وتأمين النبي
في الحديث:"أتاني جبريلُ ، فقال : رغِم أنفُ امرئٍ أدرك رمضانَ فلم يُغفرْ له ، قُلْ : آمين ، فقلتُ : آمين"
فاختار الفريق الكسبااااان 💪

#رسايل_رمضان

هو ربنا تقبل مني الصيام والتراويح؟
لما بتعمل العبادة بتبقى حريص انها تتقبل منك وبتاخد بأسباب القبول وبتدعي ربنا يتقبل؟
ولا بتحط في بطنك بطيخة صيفي وكده خلاص انا عملت اللي علي وضامن جنة؟
إوعى تتغر بالركعتين والكام جزء اللي بتقرأهم وتعجب بنفسك وتقولها كتر خيرك.. لا والله مهما عبدنا ربنا ما هنعبده حق عبادته ولا هنقدره حق قدره..
ونظرة الاعجاب بالعمل والإحساس باستحقاق الثواب والقبول كفيلة تحبط العمل وتجعله غير مقبول..
ده سيدنا ابراهيم عليه السلام كان بيبني الكعبة.. الكعبة يا مؤمن وهو عمال يدعي ويقول "ربنا تقبل منا انك انت السميع العليم"
وأذهلني المجاhد وهو طالع من النفق وبيصوب تجاه الهدف وبيدعي ويقول يارب تقبل وكأنه خايف إنه لا يُقبل منه..
وسألت السيدة عائشة النبي ﷺ عن الآية "وَالَّذِينَ يُؤْتُونَ مَا آتَوا وَّقُلُوبُهُمْ وَجِلَةٌ أَنَّهُمْ إِلَىٰ رَبِّهِمْ رَاجِعُونَ" فقالت أهم الذين يَشرَبونَ الخَمرَ ويَسرِقونَ؟ قال: لا يا بِنتَ الصِّديقِ، ولكِنَّهم الذين يصومون ويُصَلُّونَ ويتصَدَّقون وهم يخافون ألَّا تُقبَلَ منهم، أولئك الذين يسارِعونَ في الخيراتِ وهم لها سابِقونَ
إوعى تَمُن على ربنا الطاعة اللي هو هداك ووفقك ليها وأعانك عليها.. وادعي ربنا يتقبل منك

#رسايل_رمضان

الجماعة اللي بيحكوا عن المسلسلات والأكشن الرهيب اللي فيها
سواء على الفيس أو في أي قعدة بيسلوا وقتهم عن اللي حصل في المسلسل
ياجمااااعة !!!
كفاية عليكم ذنوب نفسكم ...كفاية والله
رايحين تشيلوا ذنوب غيركم ليه وتعرفوا الناس بأن المسلسل ده رهيب وده فظيع وده شغال على قناة كذا ...والناس تروح تتابع ويشيلوا ذنوب وتشيلوا معاهم
بقى يرضيكم تشغلوا الناس عن الطاعة وعن رمضان اللي هي وظيفة الشياطين المصفدة حاليا؟؟!!
خدوا بالكم من الذنوب اللي بتشيلوها ببلاش
هم هيتفرجوا ويتابعوا ويضيعوا رمضان وانت تشيل الذنب مرتين..مرة ذنبك ومرة ذنبهم😥
في الحديث :
"وَمَن سَنَّ في الإسْلَامِ سُنَّةً سَيِّئَةً، كانَ عليه وِزْرُهَا وَوِزْرُ مَن عَمِلَ بهَا مِن بَعْدِهِ، مِن غيرِ أَنْ يَنْقُصَ مِن أَوْزَارِهِمْ شَيءٌ"

#كاريكاتير_رسايل
#رسايل_رمضان

مضى نصف الشهر !
كغمضة عين؟ ربّما أسرع!
و رغبة شديدة فيك بأن تبطّئ الأيّام

أنا و أنت ربنا بلغنا الشّهر بفضله و كرمه، ووصلنا لنص الشهر كمان
ولسه باقي النص التاني والأهم...

حتى لو ضيعت كل اللي فات ركز في الكام يوم الجايين دول ....الدنيا دي كلها ملحوقة والله ، انما رمضان لو ضاع عليك مش هتعرف ترجعه تاني

_ زود في عباداتك من صلاة أو ذكر أو تسبيح

_ قلّل نومك 💤

_ امسك مصحفك وزود وردك لو كنت بتقرأ جزء خليهم اتنين

_ ارفع إيديك كل يوم وكل ليلة
وادعي ربنا اللي بلغك رمضان ..انه يعتقك فيه وماتخرجش منه إلا كسبان مغفور ليك

#كاريكاتير_رسايل
#رسايل_رمضان

رمضان فات منه كتير ...
صمت كتير وصليت تروايح كتير و...و...
وان شاء الله تكون خدت حسنات كتيييير 😍
بس استنى!!!..ده أنت طلع عليك ديوووووون كتييييير !!!
حسانتك دي بقى هنوزعها على.. واحد هنا اغتبته ..وواحد كمان هنا اهو اتكلمت عليه ..وتالت اهو ....خلاص مافيش حسنااااات كلها اتوزعت ديوووووون عليك😱

مع إن الكلام ده مش هنشوفه في الدنيا بس مجرد تخيل انك تتعب في حسنات وتديها هديه لحد تاني...يجيلك حسرة على المجهود اللي ضيعته على الفاضي....
الغيبة.... أسوأ حاجه ممكن الواحد يعملها في نفسه ....انه يروح يضيع تعبه بايده وياكل لحم اخوه ميت

لما تيجي تتكلمي على واحدة مضايقاكي افتكري انك كده بتحبيها اكتر من نفسك وبتديها حسانتك جاهزه من غير ماتتعب🎁 ....ومش بس بتضيعي حسانتك !!
كماااان....اللي بيغتاب الناس ده هيجي يوم القيامة يقطع لحم وشه بظوافر نحاس زي ماكان بياكل لحم اخوه في الدنيا😢

آن الأوان🤝 بقى نحافظ على حسانتا
ونطلع من مدرسة رمضان ....واحنا بنتعب وبنجمع حسانتا لنفسنا مش لغيرنا
نطلع من مدرسة رمضان بحاجه مهمة جدا هي ...((ترك الغيبة))
خد العهد على نفسك..واستعن بالله
وابدأ.....وبإذن الله هتقدر 💪

#لعلكم_تتقون
#رسايل_رمضان

معروفة لما بيكون في مسابقة ومكافأة ختامية لكل المشتركين ..
مابيبقاش مبسوط وحاسس بطعم المكافأة الحقيقي إلا اللي اجتهد ..

• كذلك العيد .. العيد دا مكافأة للي اجتهدوا في رمضان ..
كلنا بنحضر رمضان وبنحضر برضو العيد ..
لو ماجتهدش في رمضان👇
هاييجي عليك العيد وانت بتقول زي كل سنة :
أين هو العيد 🙂!
أنا لا أراه 🙃 !

دا مش علشان في الحقيقة العيد ملهوش فرحة ..
دا علشان في الحقيقة انت اللي غشيت نفسك في رمضان ..
انت اللي ظلمت نفسك في رمضان وماجتهدتش ..
وضيعت على نفسك فرحة العيد ..

استنى رايح فين 😟!
عايز أقولك أن الفرصة ما ضاعتش 🥰
وتقدر والله في باقي العشر أيام دول تعمل أجمد شغل ..
وتعوض فيهم الأيام اللي فاتت ..
وتاخد فيهم كمان أجر عبادة خير من ألف شهر ..
مر اكتر من يوم من العشر الأواخر من رمضان ..
ابدأ من النهاردة واجتهد ..
عشان تفرح في العيد🌸

#رسايل_رمضان
#العشر_الأواخر

مع ذروة الأحداث اللي بتكون في مسلسلات رمضان في أيامه الأخيرة ..
تكون ذروة العتق من النار وليال العفو من الله عزوجل لعباده ..
تكون العشر الأواخر من رمضان ..
وما فيها من ليلة العبادة فيها أفضل من عبادة ألف شهر يعني أجر العبادة في ليلة واحدة أكثر من 83 سنة ..!
ليلة القدر ..
كل ما عليك هو الاختيار !!
بين شغفك لمشاهدة المسلسل ونهايته ..
والمبارايات والبطولات التي تقام في رمضان ..
والانشغال بلبس العيد والخروجات ..
وبين شغفك وانشغالك وحرصك ..
على نيل العفو من الله ..!
وأن تكون من الفائزين في العشر ..
- "كان النبي ﷺ: إذا دخل العشر الأواخر من رمضان ، أحيا ليله ، وأيقظ أهله ، وجد وشد المئزر " متفق عليه .
وكَانَ ﷺ يَجْتَهِدُ فِي رَمضانَ مَالا يَجْتَهِدُ في غَيْرِهِ، وَفِي العَشْرِ الأَوَاخِرِ منْه مَالا يَجْتَهدُ في غَيْرِهِ" رواهُ مسلمٌ.
أحي ليلك بالعبادة والدعاء والاستغفار في العشر ..
أرِ الله حرصك وشغفك على النيل المغفرة ..
ولا تنشغل .. فـ تُحرم !

#كاريكاتير_رسايل
#رسايل_رمضان

لكل بنت لبست الحجاب أو الخمار في رمضان....
اثبت يابطل 💪
اثبتي..اوعي تغيري حجاب رمضان الجميل بعد العيد
اوعي تقولي بس هقصر الخمار شوية أو هبين شوية شعر صغيرين اوي أصل الدنيا عيد ...
اوعي تعملي كده ..خليكي واعية لخطط الشيطان وانه بياخدك ع الهادي واحدة واحدة عشان يوقعك تاني
إنتي أخدتي القرار الصح في رمضان واخدتي خطوة تقربك من ربنا ..ماترجعيش فيها بقى حتى لو قابلتك شوية صعوبات معلش استحملي واثبتي.. الجنة تستاهل
ربنا بيقولنا "فَاسْتَمْسِكْ بِالَّذِي أُوحِيَ إِلَيْكَ"..استمسك مش تمسك أصل اكيد هنواجه شوية صعوبات فاوعي تستسلمي
بالعكس قولي يارب ثبتني ع الخطوة دي وأحسنها أكتر
واوعي تقولي أصلي مستغربة نفسي ومش حاسة إن دي شخصيتي..
اثبتي بس وشوية وهيبقى حجابك أو خمارك جزء من شخصيتك والله ومش هتقدري تتخلي عنه
بس أهم حاجه ....اوعي تسلمي نفسك لكيد الشيطان عشان تثبتي
يلا منشن لصاحبتك وقوليلها ثابتين سوا ان شاءالله 👍

#رسايل_الحجاب
#رسايل_رمضان