مش كفاية !!!
مش كفاية إنك ماتتكلمش على الناس وتغتابهم ...
المطلوب كمان ....إنك لما تسمع حد بيتكلم على أخوك المسلم وبيغتابه إنك تدافع عنه وترد غيبة أخوك المسلم
ولما تسمعي واحده بتتكلم على زميلتك ...ماتكمليش معاها ..بالعكس دافعي عنها
النبيﷺ بيبشر اللي يعمل كدة ..بإنه لما يدافع عن عرض اخوه المسلم ...ربنا يدفع عنه النار يوم القيامة
" مَن ردَّ عن عِرضِ أخيه ردَّ اللهُ عن وجهِه النَّارَ يومَ القيامةِ"
والغيبة على فكرة هي أي كلام فيه تنقص أو تقليل من أي شخص
لو عاوز/ة تفضفض وتحكي ...احكي الموقف بدون تقليل من الشخص اللي بتحكي عنه مهما كنت مظلوم ومتضايق
ماتتكلمش على حد في غيبته ❌
ماتقعدش مع ناس بيغتابوا و تشارك معاهم أو حتى تقعد تتفرج وانت ساكت ❌
خليك إيجابي ...
طول ماانت موجود =مفيش غيبة 👍

#كاريكاتير_رسايل

شعبان دخل نعمل ايه؟؟!!

دخول شعبان معناه انك خلاص على بعد خطوات من رمضان فلازم تستعد كويس .... هقولك شوية حاجات تستعد بيها
1️⃣ التوبة من كل ذنب ...لو بتعمل أي ذنب لازم تسيبه فورًا وتتوب منه ...ده انت في شهر رفع الأعمال
2️⃣ تاني حاجه الصياااااام
النبيﷺ كان بيصوم في شعبان أكتر من أي شهر لإنه شهر رفع الأعمال إلى الله فيرفع عملك وانت صايم
غير ان ده كمان هيسهل عليك صيام رمضان
👈 واللي عليها أيام من رمضان لسه ماصامتهاش ...تلحق تقضيها سريعا ده دين في رقبتك لازم تسديه
3️⃣الصلاة ...
طبعا انت محافظ على الفروض في وقتها جماعه للرجال وفي اول وقتها للنساء...الكلام ده طول السنة المفروض
لو مش محافظ عليهم يبقى لازم تلحق نفسك وتحافظ ده عمود الدين
في شعبان بقى ...هتزود كمان صلاة السنن ...12 ركعة سنه مؤكده النبيﷺ كان بيحافظ عليهم دايما(٢ قبل الفجر +٤ قبل الظهر +٢بعد الظهر+٢ بعد المغرب + ٢ بعد العشاء )
4️⃣ قيام الليل والوتر
ولو بركعتين بعد العشاء ..عشان تتعود عليه وماتفصلش بعد كام يوم من رمضان
5️⃣ قراءة القرآن
لو مقصر طول السنة ومش بتقرا قرآن ...في شعبان لازم تفتح مصحفك وتبدأ تقرا وتعملك كمية محددة تقرأها كل يوم وكل شوية تزودها ..عشان تقدر تثبت في رمضان
6️⃣ ركعتين ضحى
من الشروق لحد قبل الظهر ..تطلع بيهم صدقة عن كل مفاصل جسمك
7️⃣ الصدقات ...ولو بالقليل
8️⃣ من أهم الحاجات اللي لازم تعملها في شعبان ...انك تشوف الناس اللي مقاطعهم وتراضيهم...
بتكلم عن القطيعة والخصام ..مش بتكلم عن حد بتتجنب التعامل معاه بدون خصام
مهم اوي عشان تكون من المغفور لهم باذن الله في ليلة النصف من شعبان

#كاريكاتير_رسايل
#رسايل_شعبان

الجماعة اللي بيحكوا عن المسلسلات والأكشن الرهيب اللي فيها
سواء على الفيس أو في أي قعدة بيسلوا وقتهم عن اللي حصل في المسلسل
ياجمااااعة !!!
كفاية عليكم ذنوب نفسكم ...كفاية والله
رايحين تشيلوا ذنوب غيركم ليه وتعرفوا الناس بأن المسلسل ده رهيب وده فظيع وده شغال على قناة كذا ...والناس تروح تتابع ويشيلوا ذنوب وتشيلوا معاهم
بقى يرضيكم تشغلوا الناس عن الطاعة وعن رمضان اللي هي وظيفة الشياطين المصفدة حاليا؟؟!!
خدوا بالكم من الذنوب اللي بتشيلوها ببلاش
هم هيتفرجوا ويتابعوا ويضيعوا رمضان وانت تشيل الذنب مرتين..مرة ذنبك ومرة ذنبهم😥
في الحديث :
"وَمَن سَنَّ في الإسْلَامِ سُنَّةً سَيِّئَةً، كانَ عليه وِزْرُهَا وَوِزْرُ مَن عَمِلَ بهَا مِن بَعْدِهِ، مِن غيرِ أَنْ يَنْقُصَ مِن أَوْزَارِهِمْ شَيءٌ"

#كاريكاتير_رسايل
#رسايل_رمضان

مضى نصف الشهر !
كغمضة عين؟ ربّما أسرع!
و رغبة شديدة فيك بأن تبطّئ الأيّام

أنا و أنت ربنا بلغنا الشّهر بفضله و كرمه، ووصلنا لنص الشهر كمان
ولسه باقي النص التاني والأهم...

حتى لو ضيعت كل اللي فات ركز في الكام يوم الجايين دول ....الدنيا دي كلها ملحوقة والله ، انما رمضان لو ضاع عليك مش هتعرف ترجعه تاني

_ زود في عباداتك من صلاة أو ذكر أو تسبيح

_ قلّل نومك 💤

_ امسك مصحفك وزود وردك لو كنت بتقرأ جزء خليهم اتنين

_ ارفع إيديك كل يوم وكل ليلة
وادعي ربنا اللي بلغك رمضان ..انه يعتقك فيه وماتخرجش منه إلا كسبان مغفور ليك

#كاريكاتير_رسايل
#رسايل_رمضان

مع ذروة الأحداث اللي بتكون في مسلسلات رمضان في أيامه الأخيرة ..
تكون ذروة العتق من النار وليال العفو من الله عزوجل لعباده ..
تكون العشر الأواخر من رمضان ..
وما فيها من ليلة العبادة فيها أفضل من عبادة ألف شهر يعني أجر العبادة في ليلة واحدة أكثر من 83 سنة ..!
ليلة القدر ..
كل ما عليك هو الاختيار !!
بين شغفك لمشاهدة المسلسل ونهايته ..
والمبارايات والبطولات التي تقام في رمضان ..
والانشغال بلبس العيد والخروجات ..
وبين شغفك وانشغالك وحرصك ..
على نيل العفو من الله ..!
وأن تكون من الفائزين في العشر ..
- "كان النبي ﷺ: إذا دخل العشر الأواخر من رمضان ، أحيا ليله ، وأيقظ أهله ، وجد وشد المئزر " متفق عليه .
وكَانَ ﷺ يَجْتَهِدُ فِي رَمضانَ مَالا يَجْتَهِدُ في غَيْرِهِ، وَفِي العَشْرِ الأَوَاخِرِ منْه مَالا يَجْتَهدُ في غَيْرِهِ" رواهُ مسلمٌ.
أحي ليلك بالعبادة والدعاء والاستغفار في العشر ..
أرِ الله حرصك وشغفك على النيل المغفرة ..
ولا تنشغل .. فـ تُحرم !

#كاريكاتير_رسايل
#رسايل_رمضان

س1️⃣/ يعني إيه صيام 6 من شوال ؟ وايه فضله ؟
ج/ شهر شوال هو شهر عيد الفطر يعني الشهر اللي بيجي بعد رمضان على طول
والنبيﷺ وصانا إننا نصوم منه 6 أيام وبكده ناخد اجر كإننا صومنا السنه كااااااملة
لحديث: *من صامَ رَمَضانَ ثُمَّ أتْبَعَهُ سِتًّا مِن شَوَّالٍ، كانَ كَصِيامِ الدَّهْرِ.* رواه مسلم
**
س2️⃣/يعني صيام 6 من شوال سُنة ولا فرض ؟
ج/صيام 6 من شوال سُنة ولكن أجره كبير
الصيام الوحييييد الفرض هو صيام رمضان
**
س3️⃣/ أصومهم في أي وقت طول الشهر ولا لازم أبدأ من يوم معين ؟
ج/ صوم في أي وقت طول الشهر
اهم حاجه تخلص ال6 أيام قبل آخر يوم في شوال
**
س4️⃣/ينفع أصومهم متفرقين ولا لازم أصوم ال6 أيام ورا بعض ؟
ج/ ينفع تصومهم متفرقين عادي مش لازم ورا بعض
**
س5️⃣/ينفع أصوم بنية الأيام اللي عليا ونية ال6 من شوال في نفس الوقت ؟؟
ج/ لا ماينفعش لازم لكل واحد نية لوحده لأن ايام رمضان فرض وال6 من شوال سُنة زي بالظبط ماينفعش تصلي 4 ركعات بنية الظهر والسُنة
**
س6️⃣/ طيب ينفع أصوم بنية 6 من شوال وفي نفس الوقت بنية الاثنين والخميس أو الأيام القمرية (ايام 13,14,15 من الشهر الهجري )؟؟
ج/ اه ينفع لان الاتنين سُنه فينفع عادي تنوي النيتين وتاخد الأجرين بإذن الله
**
س7️⃣/طيب أنا عليا أيام من رمضان ينفع أصوم ال6 شوال الأول وبعد كده أصوم الأيام اللي عليا في رمضان ؟
ج/ فيه خلاف والراجح إنه ينفع
والافضل طبعا تخلصي الايام اللي عليكي الاول لو انتي ضامنه إنك هتلحقي تخلصي الايام دي وال6 أيام من شوال أما لو مش هتلحقي ....يبقى تصومي ال6 أيام الأول وبعدها تصومي اللي عليكي لأن قضاء أيام رمضان مش واجب على الفور ولكن واجب على التراخي (يعني مش لازم تصوميه اول مايخلص رمضان أهم حاجه تخلصيهم قبل رمضان الجاي)
لحديث السيدة عائشة : *كان يكون علي الصوم من رمضان فما أستطيع أن أقضي إلا في شعبان*

#كاريكاتير_رسايل
#رسايل

"خسارة اللبس ده كله أسيبه 😥"
الجملة اللي عطلت بعض البنات عن أعظم قرار ممكن تاخده
قرار إنها تاخد الخطوة الصح وتلبس الحجاب
أو تاخد خطوة أعلى وتلبس خمار أو نقاب
وأنا هنا بقولك..
خسارة اللبس ده كله ولا حاجة إنما خسارة الجنة هي خسارة كل حاجة
إنك تخسري درجات كتيييير في الجنة كنتي هتاخديها بالخطوة دي هو ده اللي يزعل بجد
النبي بيقولنا:
"في الجنَّةِ مائةَ درجةٍ ما بينَ كلِّ درجَتينِ كما بينَ السَّماءِ والأرضِ"
فتخيلي لو خسرتي درجة واحدة بس تبقي خسرتي ايه

خدي قرارك بسرعة ..اوعي تترددي أو تأخري قرار هيقربك من رضا ربنا ويزودك درجات في الجنة
خليكي زي الصحابيات اللي أول مانزلت آية الحجاب شقوا اللبس اللي عندهم عشان ينفذوا الحجاب اللي ربنا إمر بيه في نفس اللحظة
خدي قرارك وخليكي معاهم وسابقي عشان تعلي درجات أكتر في الجنة 🩵

#كاريكاتير_رسايل
#رسايل_الحجاب
#رسايل

"مش بسلم على أي راجل غير المحارم❌️"
لازم تقوليها بكل وضوووح...
من غير خجل أو إحراج،،
من غير ماتقولي أصله هيتحرج،،
لأي راجل غير محارمك يمد إيده يسلم عليكي
المحارم =الأب والأخ والجد والابن والأحفاد والعم والخال والزوج والحما
وده معناه إن...
- جوز اختك سواء كبير في مقام بابا او صغير زي أخويا مش محرم ❌️
- أخو جوزك مش محرم❌️
- ابن عمك او عمتك وابن خالك أو خالتك اللي متربيين مع بعض وزي أخواتك برضو مش محااااارم ❌️
ماينفعش تسلمي عليهم أو تقعدي قدامهم من غير حجابك كااامل ❌️

خليكي قوية في الحاجة اللي ترضي ربك واوعي تقولي بتحرج وأسلم

#كاريكاتير_رسايل

نداء إلى النساء في يوم عرفة📣

- يوم عرفة (يوم الوقفة) ده يوم عظيم وليه فضل كبيييير
سيبك من طقوس تنظيف البيت (حتة حتة كرسي كرسي سرير سرير .....حتي تحت السرير 😁)
مش يومه ياست الكل....

- يوم عرفة محتاجة تتفرغي فيه للعبادة والدعاء مش يوم النظافة السنوية

- صيام يوم عرفة بس بيكفر ذنوووب سنتين
قال الرسولﷺ عن صيام يوم عرفة : يكفر السنة الماضية والسنة القابلة) رواه مسلم .

- وكمان أفضل الدعاء دعاء يوم عرفة يعني أمنياتك كلها تجمعيها كده وتقعدي تركزي وتدعي مش تضيعي الوقت في التنظيف
في الحديث : (خير الدعاء دعاء يوم عرفة )

- مش كده وبس ده أكثر يوم يُعتق فيه عباد من النار هو يوم عرفة !

👈إن شاء الله يوم عرفة يوم السبت فلو حضرتك مصممة علي التنظيف يبقا الموضوع ينتهي يوم الجمعة
وتفضي كده يوم السبت للعبادة و الدعاء وبسسس😤
ربنا يتقبل منا ومنكم

#كاريكاتير_رسايل
#رسايل_العشر1445هـ
#أفضل_أيام_الدنيا

مش عاوزه تهاجري ؟؟!!
بجد والله ..ايه رايك تهاجري بس مش لأمريكا وكندا
تهاجري لربنا.. تسيبي الحاجة اللي ماترضيش ربنا وتاخدي أجر المهاجر ؟؟!!
ايه رأيك تتحجبي وتكوني زي المهاجرين
ايه رأيك تسيبي اللبس الضيق أو القصير وتلاقي في ميزانك أجر الهجرة
النبي بيقولنا:
"والمُهَاجِرُ مَن هَجَرَ ما نَهَى اللَّهُ عنْه"
يعني كل ماتسيبي حاجة ماترضيش ربنا ...تبقي إنتي كده مهاجرة
حتى لو هتبقي وحيدة في وسط اصحابك لما تعملي كده
خدي الخطوة وخدي مش بس أجر المهاجر
لا ..كمان خدي أجر 50شهيد من الصحابة بثباتك وصبرك
زي ماالنبي بشرك وقالنا
"إنّ مِنْ ورائِكُم زمانُ صبرٍ ، لِلْمُتَمَسِّكِ فيه أجرُ خمسينَ شهيدًا منكم"

#رسايل_الهجرة1446هـ
#كاريكاتير_رسايل

س/مين هم المحارم ؟؟
ج/ محارم المرأة هم الرجال اللي يجوز للبنت تقعد قدامهم بدون حجاب
واللي يحرم تماما انهم يتزوجوا البنت دي ..
ودول بيتقسموا لتلات أنواع :
1️⃣ محارم بسبب القرابة
2️⃣محارم بسبب الرضاعة
3️⃣محارم بسبب الزواج
*****
س/مين هم المحارم بسبب القرابة ؟
ج/1️⃣الأب والجد اللي هو أبو والدك ..
*ابن عم والدك الكبير مش جد❌،
*جوز عمة والدك الراجل الكبير مش جد برضو ❌
2️⃣الابن والأحفاد
*ابنك بس ... أصحاب ابنك مش محرم ماينفعش تسلمي عليهم حتى لو انتي أكبر من والدتهم ❌
3️⃣ العم والخال ومعاهم عم والدك وخال والدتك ....
لكن ابن عم والدك مش محرم ولا ابن خالة والدتك❌
4️⃣الأخ وابن الأخ وابن الأخت
*ابن اخو زوجك وابن اخت زوجك مش محرم ❌
***
س/مين هم المحارم بسبب الرضاعة ؟؟
ج/ قال رسول الله (( يَحرُمُ مِنَ الرَّضاعةِ ما يَحرُمُ مِنَ النَّسَبِ ))
يعني الأب والإبن والأخ والخال والعم من الرضاع ..محرمين
بس رغم إنهم محارم إلا إنن لازم ناخد بالنا من التساهل في اللبس أمام المحارم من الرضاعة
**
س/ مين هم المحارم بسبب الزواج (المصاهرة )؟؟
ج/ 1️⃣ أب الزوج (الحما)...يحرم تحريم ابدي بمجرد العقد حتى لو طلقت الزوجه بعد كده
*وأم الزوجة (الحماة)...تحرم على زوج بنتها بمجرد العقد حتى لو لم يكتمل الزواج او اتطلقوا
2️⃣ ابن الزوج ...اذا ليه ابناء من زواج تاني يحرم بمجرد العقد
*
يعني كده...
*أخو الزوج خال الزوج عم الزوج مش محرم ❌
*زوج الأخت مش محرم ❌، صحيح ماينفعش يتزوج اخت الزوجه بس مش تحريم ابدي ...ده تحريم مؤقت
*ابن الخالة وابن العمة وجوز خالتك اللي مربيكي ....كل دول مش محااااارم ❌
الحجاب يتلبس قدامهم ومفيش سلام بالإيد عليهم ❌

#كاريكاتير_رسايل
#س_و_ج #رسايل

دخوووول مفاجئ😎
قرأت وردك النهارده؟؟!!
الورد = كمية محددة تقرأها يوميا من القرآن
حتى لو صفحة بس لازم تقرأ يوميا
وحتى لو احنا مش في رمضان ولا عشر ذي الحجة☺️
لازم تنور يومك كل يوم وماتسيبش التراب على مصحفك من رمضان لرمضان
لازم ماتسيبش روحك عطشانة من غير قرآن كده
سيب التليفون يلا واقرأ وردك
وخليك فاكر إنك مهما كنت مشغول حتى لو بحاجة نافعة
عمرك ماهتلاقي كتاب في الدنيا الحرف فيه بعشر حسنات
فاوعى تفرط فيه تحت أي ظرف
اقرأه واحفظه وافهمه وعيش معاه عشان تعيش بجد🩵

#كاريكاتير_رسايل

قال رسول اللهﷺ: "لا يَدْخُلُ الجَنَّةَ نَمَّامٌ"
النمام = ناقل الكلام بين الناس للإفساد
وعيد النبيﷺ للي بيوقع بين الناس وينقل الكلام عشان يفسد
ناخد بالنا ياجماااااعة ....
مش ذنب سهل والله
ده النبيﷺ قالنا إنه من أسباب عذاب القبر
وقالنا الوعيد الجامد في إنه لو مات من غير مايتوب من الذنب ده مش هيدخل الجنة من الأول
عشان كده عاوزين ناخد قرار
مافيش غيبة ولا نميمة تاااااني ❌❌
مش هنتكلم على الناس ولا نوقع بينهم أصلنا مش حمل العقاب ده👍

#كاريكاتير_رسايل