Сябры! Дзень Волі ў Беластоку. Далучайцеся!

22 сакавіка (нядзеля)
Беласток

10:00 — Бажэственная літургія і малебен за беларускі народ, канцэрт беларускіх песень.
Царква Святога апостала Іаана Багаслова, ul. Zbigniewa Herberta 1, 15-779 Białystok

12:00 — «Святкаванне Дня Волі ў найноўшыя часы ў Беларусі і на дыяспары»
сустрэча з лідарамі Руху Салідарнасці «Разам»
Беларускі Хаб «Новая зямля», ul. Świętego Rocha 5, lok. 32

14:00 — віктарына «А што ты ведаеш пра БНР?»
прысвечаная 108-й гадавіне абвяшчэння БНР
Беларускі Хаб «Новая зямля», ul. Świętego Rocha 5, lok. 32

16:00 — Мітынг-канцэрт у гонар Дня Волі.
Выступіць вядомы беларускі паэт, бард і перакладчык — Андрэй Хадановіч.
plac przy restauracji Żubrowisko, ul. Rynek Kościuszki 10, 15-426 Białystok

Бяспека на Дні Волі.

Кожны, хто адзначае Дзень Волі - мае выбар, як гэта зрабіць.

Ёсць людзі, якія могуць выйсці на вуліцы і плошчы вольнага свету пад бел-чырвона-белым сцягам з адкрытым абліччам і запосціць віншаванне ў сацсетках.

Ёсць тыя, хто вымушаны хаваць твар, каб не быць апазнанымі, і каб іх сваякі ў Беларусі не пацярпелі. У тых краінах, дзе заканадаўства дазваляе з'яўляцца на мітынгах і шэсцях у медычных масках альбо з павязанымі хусткамі ды ў акулярах - такі ўдзел магчымы.

Ёсць тыя, хто ня можа далучыцца да шэсця, але можа падтрымаць адзначэнне Дня Волі падрыхтоўкай альбо данатам - у вольным свеце, у адрозненні ад Беларусі, гэта можна зрабіць бяспечна. То падтрымлівайце!

Рэжым Лукашэнкі баіцца беларусаў і асабліва баіцца Дня Волі. Рэжым рыхтуецца і "прымае меры". У такі дзень варта быць асцярожным - але не баяцца.

У Беларусі Дзень Волі можна бяспечна адзначыць у царкве, касцёле альбо малітоўным доме - тым больш што ў рыма-каталікоў і грэка-каталікоў, а таксама ў пратэстантаў і праваслаўных Канстантынопальскага патрыярхату 25 сакавіка - свята Дабравесця.

У гэты дзень Бог абвясціў Марыі, што ў яе народзіцца Збаўца свету - і менавіта ў гэты дзень Ісус быў зачаты Духам Святым.

Маліцца за Беларусь на Дабравесце па-беларуску ніхто не забароніць - ані ў Беларусі, ані за яе межамі.

У Дзень Волі можна на вуліцы альбо ў транспарце гучна размаўляць па-беларуску. Усміхацца ўсім людзям вакол. Абдымацца з сябрамі і блізкімі. Віншаваць адзін аднаго. Дзяліцца надзеяй.

Радасць і надзею забараніць немагчыма!

Нарэшце, ніхто не забароніць адзначыць Дзень Волі дома, у сям'і, з сябрамі. Самае важнае ў гэты дзень за святочным сталом могуць сказаць адзін аднаму таты і мамы, сыны і дочкі, браты і сёстры - сам-насам.

Мы вольны народ, і воля - у нашых сэрцах. Ніхто і ніколі ня вырве яе з нашых грудзей.

З Днём Волі, сябры! Натхнім беларусаў!

Жыве Беларусь!

Далейшыя акцыі да Дня Волі, сябры:
⸻
🗓 25 сакавіка (серада) ✊
🇪🇪 Талін
🕕 18:00 — III штогадовы забег да Дня Волі
📍 Плошча Вабадузэ (Vabaduse väljak)
на прыступках Mayeri trepp
🏃 Дыстанцыя — 8,7 км
Дэталі

🇵🇱 Беласток
🕓 16:00 — Украінскі xор «Кalyna» з праграмай беларускіх песень да Дня Волі.
📍 Беларускі Хаб «Новая зямля», ul. Świętego Rocha 5, lok. 32
🕕 18:00 — Урачысты канцэрт класічнай музыкі «Жыве Беларусь! Учора. Сёння. Заўтра.»
🎟 Уваход толькі па запрашэннях.
Дэталі
⸻
🇵🇱 Кракаў
🕕 18:00 — Марш і мітынг да Дня Волі.
📍 Plac Wielkiej Armii Napoleona
Марш да вежы ратушы на цантральнай плошчы. Там адбудзецца мітынг
Дэталі
⸻
🇵🇱 Шчэцін
🕕 18:00–21:00
Вечар памяці, салідарнасці і надзеі
📍 каля Zegar Słoneczny на Aleja Kwiatowa
Дэталі
⸻
🇵🇱 Уроцлаў
🕔 17:00 — збор
🕠 17:30 — марш з нагоды Дня Волі
📍 Plac Wolności → Pręgierz Rynek
Дэталі

🕡 18:30 — Польска-беларуская вечарына і перфарматыўныя чытанні
📍 Instytut Grotowskiego
Rynek-Ratusz 27


🎟 Уваход вольны (патрэбна бясплатная рэгістрацыя)
Дэталі
⸻
🇱🇹 Вільня
🕓 09:00 —Збор ля Сейма, адрас: Gedimino pr. 53
🕓 09:30 —Ідзем на "Беларускую алею" завязваць бел-чырвона-белыя стужкі: Gedimino pr. 64
🕓 10:30 — Аўтапрабег з нацыянальнымі сцягамі.
Калі вы жадаеце ўдзельнічаць,  рэгіструйцеся ў таблічцы

🕓 11:30 —Ушанаванне памяці герояў.
Сустрэнемся на могілках Расу, каб узгадаць тых, хто аддаў жыццё за свабоду Беларусі.

🕓 18:00 —✊ Мітынг на Лукiшскай плошчы.
🕓 19:00 —Шэсце да амбасады Беларусі.

🕓 19:30 —Варта святла.
Запалім знічы ў памяць загiнулых герояў, каля беларускай амбасады на Mindaugo g. 13.

🕓 20:00 — Святочнае набажэнства на беларускай мове: Bokšto g. 4.
🕓 20:30 — канцэрт «Дай Дарогу!»ў Pub Alaus Namai, Goštauto 8. Пачатак у 20:30.
Квіткі набыць можна тут
Дэталі
⸻
🇸🇪 Стакгольм
🎶 Акустычны канцэрт
Лявона Вольскага прысвечаны Дню Волі!
Дэталі
⸻
🇵🇱 Гданьск
📍 Еўрапейскі Цэнтр Салідарнасці
🕓 16:00 — прастора для незалежных мастакоў, рамеснікаў і ініцыятыў
📍 зімовы сад (1 паверх)
🕠 17:30 — урачыстае святкаванне Дня Волі — 108 гадоў БНР
🕕 18:00 — дыскусія
«Беларуская Народная Рэспубліка 1918–1920»
📍 бібліятэка EЦС
🕢 19:30 — канцэрт Volny Chor
Дэталі
⸻
🇵🇱 Торунь
🕖 19:00 — Мітынг да Дня Волі
📍 Помнік Мікалаю Каперніку
Дэталі
[15.03.2026 13:03] Jan Абадоўскі: Расклад мерапрыемстваў для беларусаў усяго сьвету!
🗓 25 сакавіка (серада) ✊
🇺🇸 Філядэльфія, Пэнсыльванія
🕒 14:00 | Philadelphia City Hall (North Wing)
Узняцьце сьцяга, прамовы, тур па Сіці Холе
Дэталі
⸻
🇺🇸 Мінэапаліс, Мінэсота
🕒 19:30–21:30 | 2855 Park Ave, Ste 200
Урачыстае адкрыцьцё Беларускага Культурнага Цэнтра з Зянонам Пазьняком!
Дэталі
⸻
🇬🇪 Батумі
🕢 19:30 — Святкаванне Дня Волі — 108 гадоў БНР
📍 Беларуская прастора «аКсяродак», ул. Клдзіашвілі 32
Дэталі
⸻
🇩🇪 Берлін
🕕 18:00 — Святкаванне Дня Волі
📍 Haus der Statistik
Otto-Braun-Straße 70–72, 10178 Berlin
У праграме:
▪️ 18:00 — літаратурны майстар-клас
Асацыяцыі «Сыметрыя. Кола» вядучы — Zmicer Che
▪️ 19:15 — паказ фільма «Наш сцяг»
рэж. Ганна Русінава
▪️ 20:00 — чытанне тэкстаў з майстар-класу
з перфарматыўным музычным суправаджэннем
⸻
🇪🇸 Пуэрто-Санцьяга (Тэнэрыфэ)
🕐 13:00 — сустрэча беларусаў да Дня Волі
📍 Playa La Arena
Puerto de Santiago
⸻
🗓 26 сакавіка (чацверг)✊
🇵🇱 Кракаў
🕖 19:40 — гульня-сімуляцыя БНР
📍 Mikołajska 4/6
Дэталі
⸻
🗓 27 сакавіка (пятніца)✊
🇵🇱 Кракаў
🕖 19:00 — У гонар Дня Волі адбудзецца магутны рок-канцэрт-фестываль «Незалежная Беларусь»

🎸Удзел бяруць гурты BIAZ NAZVY, SYNDROM SAMAZVANCA і ATESTA
➡️ Набыць квіток
📍 Klub RE ul. Św. Krzyża 4
Дэталі
⸻
🗓 28 сакавіка (субота)
🇬🇧 Лондан
🕑 14:00 — акадэмія да Дня Волі з удзелам Зьмітра Лукашука
📍 Беларускі Рэлігійна-Культурны Цэнтр пры Беларускай царкве ў Лёндане-Marian House, Holden Ave, London N12 8HY
Дэталі
⸻
🇵🇱 Варшава
Маштабнае святкаванне 108-й гадавіны абвяшчэння Беларускай Народнай Рэспублікі.
🕓 16:00
📍 Збор удзельнікаў Plac Trzech Krzyży
🚶 шэсце з 330-метровым нацыянальным сцягам
📍 да Plac Zamkowy
Тут чакаюцца:
• выступы палітыкаў і прадстаўнікоў грамадзянскай супольнасці;
• канцэрт;
• святочны кірмаш і сустрэчы з сябрамі.
Дэталі
⸻
🇵🇱 Быдгашч
🕓 16:00 — Мітынг да Дня Волі
📍 Мост Старамейскі
Дэталі
⸻
🇺🇸 Філядэльфія, Пэнсыльванія
🕒 16:00 | Sweeney's Station Saloon, 13639 Philmont Ave
Музыка, ежа, спецыяльны госьць — Уладзімер Пугач (J:Морс) | толькі для дарослых, уваход вольны
Дэталі
⸻
🇺🇸 Шарлот, Паўночная Караліна
🕒 14:30 | Colonel J. Francis Beatty Park
Гістарычная частка, забавы для дзяцей і дарослых, potluck
👉 Дэталі
⸻
🇵🇱 Познань
Дзень Волі ў Бараку- фестываль беларускай культуры, музыкі і жывога слова ў прасторы свабоды і салідарнасці.

📍 Barak Kultury
Al. Marcinkowskiego 21

Праграма:
🕑 14:00–15:30 — прэзентацыя выдавецтва RozUM Media
і новай кнігі Антона Бяляева
«Як я правёў гэтае лета»
🕓 16:00–17:00 — выступ беларускага барда Сяргей Чарняк
🛍 16:00–17:30 — міні-кірмаш беларускія кнігі, салодыч і рамесныя вырабы
🎶 18:00–19:00 — канцэрт хору Poznański Śpieuny Schod
🎟 Уваход вольны
Дэталі
⸻
🗓 29 сакавіка (нядзеля)✊
🇨🇦 Атава
🕒 15:00 — Святкаванне Дня Волі
📍 Nepean Creative Art Centre
35 Stafford St., Nepean, ON

У праграме:
▪️ віншавальнае слова Івонкі Сурвіллы, старшыні Рады БНР
▪️ выступы прадстаўнікоў беларускіх і міжнародных суполак
▪️ святочны канцэрт
🎟 Уваход вольны
Дэталі
⸻
🇵🇱 Кракаў
🕖 19:00 — кінапрагляд
«Куля для нязгодных»
📍 Mikołajska 4/6
Дэталі
⸻
🇺🇸 Сан Францыска/Бэй Эрыя, Каліфорнія
🕛 12:00–17:00
🌿 Open-Air святкаванне Дня Волі — 108 гадоў БНР
📍 Sugarloaf Open Space, Walnut Creek

Potluck-пікнік, канцэрт, танцы, дзіцячыя гульні, jumbo-дранікі
🎟 Уваход вольны
Дэталі
⸻
🇺🇸 Сіэтл / Белв'ю, Вашынгтон
🕒 12:00 | Bellevue Downtown Park
Батлейка для дзяцей, відэапрамовы Івонкі Сурвілы і Сьвятланы Ціханоўскай, шэсьце са сьцягамі
Дэталі
⸻
🗓 31 сакавіка (аўторак)✊
🇵🇱 Беласток
🕕 18:00 — Спектакль «Мая мама ў турме»
(паводле кнігі беларускай псіхолагіні і грамадскай актывісткі Вольгі Вялічка)

🎭 Беларускі тэатр VARTA з Вільні
🎟 Уваход толькі па запрашэннях.
Бясплатныя запрашэнні можна атрымаць у офісе Фонду OKNO NA WSCHOD да 27 сакавіка:
ul. Sienkiewicza 82, Białystok

📍 Książnica Podlaska, ul. Marii Curie-Skłodowskiej 14A
⸻
✊ Адсвяткуем Дзень Волі разам!
🤍❤️🤍 Жыве Беларусь!

25 сакавіка 2023 года, калонія ў Шклове. У царкве якраз дзень нашага атраду, вязень-псаломшчык чытае малітву, я адзін стаю перад алтаром, малюся.

Заходзіць маёр Сямёнаў (на Шклове і ў магілёўскай ПК 15 яго добра памятаюць, рэгулярна "адстрэльваў" палітычных).

Заходзіць, становіцца побач. Моўчкі стаіць усю малітву. Паглядвае на мяне. Ну, думаю, можа, і ў Сямёнава ў сэрцы нешта засталося. Вунь прыйшоў, стаіць перад Богам.

Малітва заканчваецца. Жагнаюся. Адчуваю, што нешта трэба сказаць таму Сямёнаву - усё-такі дзе двое ці трое сабраліся ў імя Ісуса, там і Ён пасярод нас.

- Грамадзянін начальнік... Вы ж у Бога верыце?

- Осужденный Северінец. Я тут стоял, чтобы вы на ваш День Волі бело-красно-белый флаг на церкві не повесілі.

З Днём Волі, беларусы! З Дабравесцем! Са святам!

У беларускай мове слова “ВОЛЯ” азначае і свабоду, і рашучасць, і адказнасць за свой уласны лёс.

Таму і беларускі нацыянальны рух – вызвольны.

Таму так любяць беларусы называць сваіх дачок Волямі.

Вялікая беларуская воля, здольная і на подзвіг, і на пакутніцтва, і на самаахвярнасць – вобраз і падабенства той Волі, якая вяла Хрыста на Галгофу, і праз крыж – да ўваскрасення.

Каму, як не беларусам, хрысціянскаму народу, ведаць: пераможная воля ўласцівая толькі свабодным!

Наша бязвольнасць, агульная млявасць і абыякавасць да жыцця пачыналася тады, калі беларусы адварочваліся ад Бога і забываліся, хто яны ёсць.

Яна, народная воля, закладзеная ў нас глыбока. Стоеная, стрыманая, агромністая: якія ж цярпенні давялося вытрымаць гэтае нацыі! Беларус стрывае ўсё, але калі дойдзе да краю… Ціхая ў сваю пару, але ўпартая воля выпростваецца з сілаю сцятае спружыны.

А хто ня любіць волі – ня нашага роду, казаў Купала.

Сотні людзей выйшлі на Дзень Волі ў Вільні - і гэта было натхняльна!

Вялізны дзякуй найперш камандзе "Дапамогі" Наталлі Калегавай, якая апошнія гады рыхтуе свята - з калонай байкераў і аўтамашынаў са сцягамі, з наведваннем віленскіх некропаляў, з партрэтамі дзеячаў БНР, з мітынгам і шэсцем пад бой барабанаў да "Варты святла"!

Дзякуй усім, хто прыйшоў - нёс сцягі, гукаў, запальваў знічкі, вёў стрымы для медыяў.

Дзякуй цудоўным беларускім святарам, якія на Росах І Ефрасіннеўскіх могілках тлумачылі новаму пакаленню беларускага руху, на чыіх плячах мы стаім.

Дзякуй Старшыні Рады Беларускай Народнай Рэспублікі Івонцы Сурвіле за прачулы і глыбокі зварот. Дзякуй Святлане Ціханоўскай - яе прамова да віленскіх беларусаў была складзеная ясна і якасна, па ўсіх правілах еўрапейскай палітыкі.
Дзякуй Дзянісу Кучынскаму, сапраўднаму дыпламату, які скарае сэрцы літоўцаў дасканалым веданнем мовы краіны, якая нас прыняла.

Дзякуй сябрам Беларусі, дэпутатам літоўскага Сейму - Жыгісу Павільёнасу, Русланасу Баранавасу, Томасу Тамілінасу - якія прыйшлі прывітаць беларускі народ і павіншаваць яго са святам.

Дзякуй музыку Юрыю Стыльскаму - ягоныя спевы пад гітару запалілі Вільню.

Мяне моцна ўразілі сем'і з дзецьмі ў бел-чырвона-белым - малечы гарэзавалі пад вялізнымі бел-чырвона-белым і літоўскім сцягамі і заводзілі скандаванні на шэсці.

Настрой віленскага Дня Волі нагадаў мне найлепшыя менскія акцыі на 25 сакавіка.

Гартаю стужкі ў сацсетках - і бачу: Дзень Волі сапраўды стаў народным святам.

А народ, які мае свой Дзень Волі, перамагчы немагчыма!

Бел-чырвона-белы Дзень Волі крыляе па свеце.

Канцэрт Лявона Вольскага ў Варшаве. Бел-чырвона-белыя сцягі пад дажджом у Кракаве. БНР у Ерэване. Барабаны і дуды на шэсці ў Вільні. Пікнікі і квізы па ўсёй Амерыцы. Вялізны беларускі сцяг у Еўрапарламенце. Набажэнствы ў беларускіх парафіях і прыходах...

Жыве Беларусь!

Запрашаем усіх далучацца да Цырымоніі ўзняцця бела-чырвона-белага сцяга каля Сейма з нагоды 108-й гадавіны абвяшчэння незалежнасці БНР.

У цырымоніі возьмуць удзел і выступяць з прамовамі нацыянальная лідарка Беларусі, Святлана Ціханоўская, старшыня Сейма Літвы, Юозас Олекас і віцэ-маршалак Сената Польшчы, Міхал Камінскі.

🗓 Дата: 30 сакавіка 2026
🕘 Час: 09:00–09:15
📍 Месца: Сейм Літоўскай Рэспублікі (флагшток з боку ракі)

Больш інфармацыі па спасылцы: https://tsikhanouskaya.org/be/event/cyrymoniya-uznyaccya-bela-chyrvona-belaga-scyaga-z-nagody-108-j-gadaviny-abvyashchennya-nezalezhnasci-belaruskaj-narodnaj-respubliki.

Да сустрэчы!

У Змітра Дашкевіча ёсць вялікі дар ад Бога. Калі ён гаворыць - хочацца слухаць.

Бо тое, пра што гаворыць Дашкевіч - ён пражыў і перажыў.

Калі ён кажа пра беларускую мову - за гэтым стаяць дзесяцігоддзі прынцыповай беларускамоўнасці, у тым ліку ў турме. Калі пра сям'ю - у яго цудоўная беларуская сям'я, чацьвёра дзяцей, якія таксама размаўляюць па-беларуску. Калі пра палітыку - ён ахвяраваўся ў адным Маладым Фронце так, што хопіць на дзесяць жыццяў.

Ягоныя акцыі пачатку 2000-ых - залаты фонд нацыянальнага супраціву.

І калі Дашкевіч кажа пра Бога - абавязкова паслухайце. Бо Дашкевіч, якога ведае ўся Беларусь, пачаўся якраз тады, калі ён паверыў у Ісуса Хрыста.

І на малітве за Беларусь, калі ён моліцца, і калі чытаюць Біблію (па-беларуску, у перакладзе Антонія Бокуна) такую глыбіню слова пачуеш ня ў кожнага пастара.

Вернік. Цясляр. Муж. Бацька. Пісьменнік. Прапаведнік.

Дашкевіч, які часта гаворыць ня тое, што нам падабаецца, а тое, чаго мы ўпарта ня хочам пачуць.

Вось такіх людзей і трэба слухаць.

Вынікі сёлетняга Дня Волі - абяцанне таго самага вялікага Дня, калі Беларусь нарэшце будзе вызваленая.

Апошнія дні бясконца здзіўляўся і захапляўся беларусамі, якія выходзілі на вуліцы ў Літве і Польшчы, Украіне і ЗША, Канадзе і Нямеччыне, Іспаніі і Чэхіі, Бельгіі і Аўстраліі, Арменіі і Інданэзіі, Мексіцы ды Грузіі, Швейцарыі і Італіі, Славаччыне і Францыі, Швецыі і Вялікай Брытаніі - дзясятках краінаў, сотнях гарадоў.

Нягледзячы ні на якую стому, ні на якія пагрозы, ні на якія сваркі альбо расчараванні - Беларусь у вольным свеце жыве і будзе жыць.

Чалавек, які хоча ўсталяваць сусветны рэкорд, гадамі трэніруецца і адпрацоўвае патрэбныя рухі. І беларускі народ упарта "качаецца", збірае сілы, рыхтуе сваё цела для вырашальнага рыўка. 25 сакавіка. Чарнобыльскі шлях. 9 жніўня.

Перажытыя пакуты асэнсоўваюцца нацыяй як будаўнічы матэрыял. Яшчэ раз - не як сіла разбурэння, а як заклад будучай магутнасці.

Дзякуй вам, любыя беларусы, за тое, што вы разумееце: Бог абарочвае зло на дабро. Бог праводзіць нас праз выпрабаванні, каб загартаваць. Турмы, выгнанні і страты насамрэч намнажаюць досвед, здольнасці і магчымасці.

Дзякуй вам за свята Волі - вы адзначаеце яго як наш выклік рэжыму, вайне, страху!

Дзень Волі 2026 года - яшчэ адзін наш падход да трэнажору гісторыі ў праграме патрэбнай падрыхтоўкі. Ужо цяпер бачу сярод беларусаў свету сотні і тысячы ўпартых, мэтанакіраваных, прафесійных майстроў, якія ў рэшце рэшт возьмуць Беларусь у свае рукі.

Верым! Можам! Пераможам!

Падтрымайма беларускамоўных праваслаўных братоў і сёстраў, сябры!

🌿 Вялікі пост яшчэ ідзе, а ў нас ужо добрыя велікодныя навіны! Сустракайце — велікодныя літургічныя спевы па-беларуску!

Мы запісалі альбом (36 трэкаў) велікодных спеваў па-беларуску і падрыхтавалі ноты, цяпер працуем над новымі нотнымі зборнікамі.

Калі вы хочаце, каб беларуская мова гучала ў праваслаўным набажэнстве — падтрымайце гэты праект.

Мы — беларуская праваслаўная супольнасць капліцы св. Рыгора Перадзэ ў Варшаве (Польская аўтакефальная праваслаўная царква). Ад сакавіка 2023 г. мы служым Боскую літургію па-беларуску ў Варшаве і развіваем царкоўныя спевы на беларускай мове.

Вынікі нашай працы
Мы працавалі некалькі гадоў над гэтым, і вось што атрымалася:
📖 зрабілі беларускі пераклад велікодных тэкстаў праваслаўнай царкоўнай традыцыі;
🎧 запісалі 36 трэкаў для велікоднага альбома;
🎼 падрыхтавалі ноты да велікоднага набажэнства.
Паслухаць прыклады запісаў і спампаваць поўны камплект нот можна тут і праз QR-код на фота.

Як атрымаць аўдыёматэрыялы
► Альбом “Праваслаўны Вялікдзень” (у 2 частках) выйдзе на стрымінгавых платформах ад аўтараў “Беларускі хор капліцы св. Рыгора”. Ён з’явіцца ў першых днях красавіка 2026 г. Мы б хацелі, каб і нашыя сябры з Заходняй царквы таксама далучыліся да візантыйскага досведу святкавання Вялікадня, таму, спадзяемся, к 5 красавіка альбом пройдзе мадэрацыю.
► У Варшаве на прыходзе св. Рыгора Перадзэ (Warszawa, ul. Lelechowska 5) можна атрымаць паштоўку-вокладку велікоднага альбома з QR-кодам доступу да ўсіх нот і запісаў за ахвяраванне.
Мінімальнае ахвяраванне — 35 злотых (прыкладна 9 еўра). Вы ахвяруеце на месцы — мы аддаем на месцы.
Час працы капліцы глядзіце ў раскладзе набажэнстваў (Kaplica św. Grzegorza Peradze у Фэйсбуку)
► 🎁 Thank-you gift
Пры ахвяраванні ад 200 злотых (прыкладна 50 еўра) мы вышлем гэтую паштоўку ў любую краіну, куды толькі магчымая паштовая дастаўка з Варшавы…
Пры ахвяраванні ад 600 злотых (прыкладна 140 еўра) мы зробім для Вас флэшку, запішам туды велікодны альбом з нотамі і вышлем поштай.
Максімальны тэрмін высылкі — 20 дзён ад пацвярджэння данатаў на пошту.
Калі вы зрабілі данат і хочаце атрымаць паштоўку па пошце, напішыце нам на prawaslaunajawarszawa@gmail.com. Далучыце да ліста: пацвярджэнне даната, ваш адрас, імя атрымальніка.

Як ахвяраваць
► праз Zrzutka (Wydanie nut do prawosławnych nabożeństw po białorusku) тут і ў QR-кодзе на фота;
► праз Buymeacoffee (Belarusian Orthodox Music Project) тут і ў QR-кодзе на фота;
► гатоўкай, калі ў нас адбываецца набажэнства: 15 сакавіка; 12 красавіка на Вялікдзень з польскамоўнай супольнасцю; 26 красавіка; 17 мая.

На што пойдуць сродкі
Ахвяраванні ідуць на развіццё беларускамоўнага праваслаўнага набажэнства:
► адаптацыю літургічных твораў пад беларускую мову (аплата працы музыкаў і кампазітараў);
► стварэнне электронных нот (аплата апраграмавання);
► музычную і моўную карэктуру;
► дызайн і вёрстку нотных зборнікаў;
► друк і распаўсюд.

Нашы планы
Да канца 2027 г. (а спадзяемся — і раней) мы плануем выдаць:
► нотны зборнік літургій св. Яна Златаўста і св. Васіля Вялікага;
► велікодны нотны зборнік.
У будучыні ўсе ноты, створаныя ў межах гэтага праекта, будуць выкладзеныя анлайн у адкрытым доступе.

Мы таксама плануем
🎧 новыя аўдыязапісы;
🎼 ноты да Раства Хрыстовага і іншых вялікіх святаў.

Кантакты
Facebook
YouTube: PrawaslaunajaWarszawa
Spotify / Apple Music etc.: Беларускі хор капліцы св. Рыгора Перадзэ

🕊 Падтрымаеце развіццё праваслаўных літургічных спеваў па-беларуску!

Вясна. Утраёх едзем па Вільні.

Волечка ціха напявае велікодны спеў - у суботу і нядзелю касцёльны хор. Францішак няспынна перапытвае пра краіны і сталіцы свету. Хораша.

Мы - у фотастудыю. Нам падаравалі гадзіну сямейнай фотасесіі.

Гаспадыня - цудоўная беларусачка - паказвае студыю, дае пульт ад камеры, паказвае, дзе паглядзець фоты і дзе уключыць сваю музыку. Ёсць нават моцны вентылятар, які можа развяваць валасы, нібы ты на вятры. І пакідае нас адных: гадзіну можаш сам фотацца, як хочаш, пад сваю музыку, пераапранацца, гарэзаваць.

Як для мяне - гэта нашмат лепш за звычайныя здымкі, калі табе кажуць, як стаць, куды глядзець і які выраз твару рабіць.

Да таго ж - беларускі бізнэс. Чалавек прыехаў з Беларусі, робіць тое, што яму падабаецца, аказвае паслугі іншым - і гэтым забяспечвае сабе жыццё.

З пультам, канечне, Францішак))

Інстаграм студыі па спасылцы.

Пакуты, ціск, боль - разбураюць беларусаў альбо будуюць?

Нармальны чалавек скажа: ты што, паехаў дахам? Канечне, разбураюць. Нікому ня хочацца пакутваць і паспытваць боль. Гады ў турме ці пераследзе, дзесяцігоддзі пад рэжымам альбо ў выгнанні - страчаныя для жыцця.

На першы погляд так. Але гісторыя і асабістыя чалавечыя лёсы сведчаць пра іншае.

Кепскія часы нараджаюць добрых людзей, добрыя часы - кепскіх людзей, кажа класік.

Беларус, які прайшоў турмы, найлепш зразумее іншага беларуса, які апынуўся ў бядзе. Дапаможа яго сваякам. Знойдзе час і словы для падтрымкі.

Калі мне баліць - значыць, я жывы і я ведаю, у чым праблема. Значыць, у мяне ёсць надзея.

Шчыра, да 2020 года я са сваімі маладафронтаўскімі альбо хадэцкімі клопатамі пра ўсю Беларусь пастаянна натыкаўся на сцяну неразумення ды абыякавасці з боку большасці беларусаў. Ну так, рэжым. Ну, гіне мова, культура. Ну, Расея паўсюль. Ну і што? Табе, Паша, больш за ўсіх трэба? І асабліва мяне ўражвала, калі суразмоўнік паводзіў вачыма вакол і сцішана пытаў: сядзець у турме? упірацца? тут? А дзеля чаго? Дзеля каго?..

Цяпер пытанняў няма. Лукашэнка і Расея ўжо каторы год выхоўваюць сярод беларусаў яснае разуменне: свабода, дэмакратыя і незалежнасць - аснова жыцця. Беларускасць - грунт, на якім ты стаіш. Кожны беларус - цэлы скарб. Радзіма - гэта тое, без чаго ты воўкам выеш на чужыне.

Большасць беларусаў ужо адчулі каштоўнасць Беларусі асабіста, на сваёй уласнай скуры. Але выпрабаванні працягваюцца. Значыць, прасякліся мы з вамі, браты і сёстры, яшчэ ня ўсе і яшчэ не да канца.

Той самы вагонь, які плавіць воск, робіць каменем гліну.

У нашу эпоху Бог масава выпрацоўвае ў беларусаў характар. Тыя, хто наракае на жыццё, вінаваціць ва ўсім Святлану альбо Зянона, ные і апускае рукі - проста не гатовыя да змагання за Беларусь. Значыць, яшчэ ня ўсю праграму загартоўкі прайшлі. Значыць, трэба яшчэ выкоўваць у сабе беларуса.

Сёння ў каталікоў і евангельскіх хрысціянаў - Страсная Пятніца. Дзень, калі Ісуса Хрыста бічавалі, прымусілі цягнуць на сабе крыж і прыбілі цвікамі да дрэва, каб пакутліва паміраў.

І Бог, падабаецца нам гэта ці не, так уладкаваў свет, што без пакутаў і болю не бывае збавення. Без крыжу няма уваскрасення.

Менавіта Галгофа, прачутыя і асэнсаваныя пакуты, пакладзеныя ў падмурак жыцця, і ёсць ключом да мільярдаў сэрцаў.

Менавіта пакуты, боль, ціск і рэпрэсіі - беларускі крыжовы шлях да перамогі.

Мы маем цягнуць гэты крыж - і дзеля сябе, і дзеля ўсіх беларусаў. Тысячу гадоў беларусы, нацыя не рэлігійная, але глыбока хрысціянская, разумелі гэта - і ішлі ўгару.

Так што гартуем сэрцы, мілыя беларусы. Трывайма.

Бог ужо зрабіў для нас галоўнае. Засталося толькі прайсці следам за Ім.

З Яўгенам Афнагелем мы пазнаёміліся амаль трыццаць гадоў таму ў Маладым Фронце.

Яўген узначаліў Койданаўскую раду (суполку Маскоўскага раёна Менску) - знакаміты КРАМФ.

У канцы 1990-ых - пачатку 2000-ых гэта была адна з самых шматлікіх і баявых структураў Маладога Фронту. У іх была свая штаб-кватэра, база для лясных вышкалаў, уласны сцяг, чорны з бел-чырвона-белай стужкай - і дружная каманда, якая першай ішла на прарыў міліцэйскіх кардонаў на шэсцях.

Маладафронтаўскія сходы яны любілі праводзіць дзе-небудзь зацемна ля вогнішча - і за гэта ў нас на Управе МФ іх называлі "партызанамі".

Памятаю, у 1999-ым яны раскідвалі ў менскай Малінаўцы дзясяткі тысячаў улётак, каб запрашаць расселеных там чарнобыльцаў на нашу сустрэчу ў офіс Генадзя Грушавога (для маладзейшых патлумачу: ну так рабілі, калі яшчэ не было інтэрнэту)) А ў 2000-ым КРАМФ адной з першых пачала праводзіць шквальныя "Шоў беларушчыны", калі асветніцкімі віктарынамі ахопліваліся ўсе паралелі ў раённых школах.

Арганізоўваў гэта ўсё Яўген - маўклівы, засяроджаны, па-спартоваму падцягнуты блакітнавокі "вараг". Бывала, за ўсю акцыю ад яго не пачуеш ані слова - але ягоная дружына ніколі не падвядзе.

У 2001-ым Яўген разам з КРАМФам перайшоў у "Зубр". Прычым адзіны з усіх маладафронтаўцаў (а іх тады сышло "зубрыць" вельмі шмат) прыйшоў і папярэдзіў:

- Паш, прапанавалі. Разумееш, там магчымасцяў рабіць для Беларусі значна больш. Людзі хочуць. Але калі ты скажаш "не", мы ня пойдзем.

Тады я пагадзіўся (у Маладога Фронту ў той час і праўда "зуброўскіх" магчымасцяў не было і блізка, усе змагаліся, як кажуць, за ідэю) - але цяпер думаю, ці не зрабіў я памылкі. Не, у Яўгене я не памыліўся - ён і ў "Зубры", і потым у "Еўрапейскай Беларусі" паказаў сябе як адданы беларус і моцны, стрыманы ды эфектыўны лідэр. Засумняваўся ў сабе - падумаў, што не змагу ўтрымаць хлопцаў ды дзяўчат адным дзеяннем, ахвярнасцю і натхненнем.

А з Яўгенам Бог зноў цесна звёў нас разам у 2020-ым: следчыя вырашылі аб'яднаць нас, колішніх маладафронтаўцаў, у адной крымінальнай справе аб "масавых беспарадках", і аформілі "падзельнікамі". І падчас "прысуду" ў траўні 2021-га ў Магілёўскім абласным судзе мы разам, як і калісьці ў МФ, скандавалі ў клетцы "Жыве Беларусь!"

І як бы ні склаліся нашы лёсы далей, ведаю: з Яўгенам Афнагелем гатовы і ў выведку, і скрозь ваду, вагонь ці медныя трубы.

Яўген - чалавек жалезнай волі і гонару. Беларусь ён не падвядзе.

Хрыстос уваскрос – і Беларусь уваскрэсне!

Збаўца чалавецтва ўваскрос у тую самую ноч, калі нават Ягоным вучням здавалася: усё скончана.

Часам цемра настолькі прыгнятае, а бездань настолькі прыцягвае, што вера, надзея і любоў здаюцца нічога ня вартымі.

Часам адчуванне бездапаможнасці настолькі вострае, што ясна разумееш: ніякіх чалавечых сілаў тут ня хопіць.

І вось тады - менавіта тады! - прыходзіць Бог.

Бел-чырвона-белы сцяг насамрэч нарадзіўся 2000 гадоў таму. Белая палатніна з крывёю ўкрыжаванага Ісуса засталася людзям пасля Уваскрасення як знак перамогі над злом і смерцю.

З тых пор ва ўсім хрысціянскім свеце белы сцяг з чырвонай паласой ці крыжам стаў сімвалам Уваскрасення – і ўвайшоў у дзясяткі сімвалаў.

Беларусь адраджалася і ўваскрасала менавіта пад бел-чырвона-белым сцягам Ісуса Хрыста.

І пад Грунвальдам. І ў бітве пад Воршай. І з паўстаннямі Касцюшкі ды Каліноўскага. І ў 1918-ым, 1991-ым, 1996-ым, 2020-ым…

Тысячу гадоў нашай гісторыі нас вёў Ён – Ісус Хрыстос, Які размаўляе па-беларуску.

"ЗМАГАРЫ" АЛЬБО "МАЙСТРЫ"?

Падзел беларускага руху на ўмоўных "змагароў" і "майстроў" - адзін з самых згубных для Беларусі.

"Змагары", схільныя да вулічнай альбо збройнай барацьбы, маюць гучны голас, гавораць рэзкія прамовы, ганарацца тым, што ідуць за ідэю і да канца, і часта ставяцца грэбліва да тых, хто выбірае іншыя шляхі.

"Майстры" больш займаюцца дыпламатыяй, бізнэсам, адміністраваннем, творчасцю, робяць сваю справу без шуму і пылу, любяць падкрэсліць свой прафесіяналізм, вытрымку і абачлівасць, і ня менш часта (хаця і менш гучна) дакараюць "змагароў" за безвыніковасць і безадказнасць.

- Вы толькі крычыце, правакуеце і шкодзіце, - кажуць "майстры" "змагарам".

- А вы наогул здраднікі і грантасмокі! - хорам адказваюць "змагары".

Сённяшні падзел на "гераічных лузераў" і "рэспектабельных здраднікаў" напоўніцу выкарыстоўваюць усе ворагі Беларусі.

За апошнія пару дзён тройчы сутыкнуўся з такімі ацэнкамі нават сярод беларускамоўных вернікаў - у дачыненні да вядомых асобаў і кіраўніцтва хрысціянскіх грамадаў.

Дарагія мае беларусы і беларускі!

Варта зразумець адну простую рэч: ёсць час змагароў, і ёсць час майстроў. Ёсць час і абставіны, якія патрабуюць адказнай і руплівай працы дзеля Беларусі - з поўнай аддачаю, часам без асаблівага піяру і публічнай падзякі. А ёсць час і абставіны, якія проста крычаць: усе - да змагання!

У пачатку 2000-ых альбо ў пару так званай "нармалізацыі" быў час майстроў - і нават ад змагароў патрабаваліся адпаведныя ўласцівасці ды вынікі.

А вось у 2020-ым большасць была змагарамі - і цяпер згадвае той час з настальгіяй.

Масавы турэмны досвед, вайна ва Украіне з тысячамі дабраахвотнікаў і вымушаная эміграцыя пашырылі і паглыбілі гэты падзел на самую актыўную і творчую частку нацыі, на ўсе яе пласты. Сваркі на уяўнай і шмат у чым штучнай мяжы "змагары"-"майстры" паглынаюць сілы і час, так патрэбныя беларусам для гарту як адзінай нацыі.

І змагары, і майстры аднолькава крытычна патрэбныя сённяшняму беларускаму руху. Без вулічных і правадыроў і байцоў мы будзем няздольныя скарыстацца вакном магчымасцяў і прайграем рэжыму альбо Расеі. Без прафесійных дыпламатаў, штабістаў, дасведчаных менэджараў мы завалім парыў нацыі да перамогі. Навучыцца ўзаемнай павазе, супрацы, падтрымцы у адпаведнасці з дэвізам "беларус беларусу беларус" - найпершая патрэба сённяшняга часу і для майстроў, і для змагароў.

Ніякаму чорту ня ўдасца зламіць народ, які адчувае сябе адзіным, цэласным, зладжаным і здаровым арганізмам.

Бог дасць нам перамогу - калі мы самі будзем гатовыя ўзяць на сябе адказнасць за Беларусь.

Праваслаўны Вялікдзень у Вільні - у царкве Святой Тройцы па-беларуску!

Браты і сёстры!

Ноч уваскрасення Хрыста паводле праваслаўнага календара, з 11 на 12 красавіка, беларусы Вільні ўпершыню змогуць сустрэць у знакамітай Свята-Траецкай царкве ля Вострай Брамы.

Гэта тая самая царква, якую Канстанцін Астрожскі паабяцаў Богу пабудаваць, калі пераможа Маскву пад Воршай у 1514 годзе.

Цяпер царква належыць украінскай грэка-каталіцкай грамадзе, але праваслаўныя беларусы Канстанцінопальскага патрыярхату змогуць яднаць падзеленае хрысціянства сабой - у Тройцы Адзінай.

Найпрыгажэйшае начное набажэнства з хросным ходам, свечкамі і магутным беларускім хорам, з рэхам Залатога веку - проста цуд.

Удзельнічаць у ім - значыць стаць у малітоўным праломе за Беларусь.

Для кагосьці - раз на год, а для кагосьці - раз у жыцці.

Пачатак а 00.00. Адрас - Aušros Vartų g. 7B

Мы з Францішкам усё-такі хочам размаўляць з Гуглам на мове любові))

Колькі беларускіх дзетак, якія паўсюль размаўляюць па-беларуску, будзе дастаткова для таго, каб Беларусь жыла?

Няўжо і нам, дарослым, не надакучыла запытвацца ў Гугла усё-што-заўгодна па-расейску?

Петыцыя за галасавы ўвод Гугла па-беларуску набрала пакуль трохі больш за 1000 подпісаў.

Але для таго, каб гігант заварушыўся, патрэбна прынамсі тысячы дзьве-тры. І наогул, чым больш, тым лепш.

І тут пытанне такое: колькі беларускамоўных беларусаў сядзяць у сацсетках?

Прапаную узняць хвалю і праштурхнуць наш родны галасавы ўвод у Гугл!

Спасылка тут.