◾️စိုက်ပျိုးစရိတ်နှင့် စက်ကိရိယာ ချေးငွေနှုန်းထားသစ်များ ထုတ်ပြန်
ဘဏ္ဍာရေးနှင့် အခွန်ဝန်ကြီးဌာနသည်နိုင်ငံတော်အစိုးရ၏ ရက်ပေါင်း (၁၀၀) စီမံကိန်းအရ တောင်သူလယ်သ မားများ၏လူမှုစီးပွားဘ၀ ဖွံ့ဖြိုးတိုးတက်စေရန်နှင့် လယ်ယာစိုက်ပျိုးထုတ်လုပ်မှုများ တိုးမြှင့်နိုင်ရန်အတွက် စိုက်ပျိုးစရိတ်ချေးငွေနှုန်းထားများကို ၂၀၂၆-၂၀၂၇ ဘဏ္ဍာနှစ် မိုးရာသီချေးငွေကာလမှ စတင်ကာ တိုးမြှင့် ထုတ်ချေးပေးမည်ဖြစ်ကြောင်း အသိပေးကြေညာထားသည်။
ယင်းအစီအစဉ်အရ စပါး၊ ဂျုံနှင့် ချည်မျှင်ရှည်ဝါ (မျိုးစေ့ထုတ်)များအတွက် တစ်ဧကလျှင် ကျပ် ၁၅၀၀၀၀ မှ ၃၀၀၀၀၀ အထိ၊အခြားသီးနှံ ၁၈ မျိုးအတွက် ကျပ် ၁၀၀၀၀၀ မှကျပ် ၂၅၀၀၀၀ အထိနှင့် ပန်းနှမ်း၊ ဆီမုန်ညင်း၊ဂုန်လျှော်များအတွက် ကျပ် ၁၀၀၀၀၀ မှ ကျပ်၁၅၀၀၀၀ အထိ တိုးမြှင့်ထုတ်ချေးပေးသွားမည်ဖြစ်သည်။
မိုးချေးငွေများကို ၂၀၂၆ ခုနှစ် မေလမှစက်တင်ဘာလကုန်အထိလည်းကောင်း၊ဆောင်းချေးငွေများကို အောက်တို ဘာလမှ၂၀၂၇ ခုနှစ် ဇန်နဝါရီလကုန်အထိလည်းကောင်း၊ မိုးကြိုချေးငွေများကို ၂၀၂၇ ခုနှစ်ဇန်နဝါရီလမှ မတ်လ ကုန်အထိလည်းကောင်းအသီးသီးထုတ်ချေးပေးသွားမည်ဖြစ်ပြီး အတိုးနှုန်းမှာ တစ်နှစ်လျှင် ၅ ရာခိုင်နှုန်း သတ်မှတ်ထားကာ အာမခံအဖြစ် လယ်ယာမြေလုပ်ပိုင်ခွင့်ပြုလက်မှတ် (ပုံစံ-၇) မူရင်း တင်ပြရမည်ဖြစ်သည်။
ထို့ပြင် တောင်သူများအနေဖြင့်လယ်ယာကဏ္ဍတွင် ခေတ်မီစက် ကိရိယာများအသုံးပြုနိုင်ရေးအတွက် လက် တွန်းထွန်စက်၊ထော်လာဂျီ၊ရေစုပ်/ရေတင်စက်၊ဆိုလာရေတင်စက်၊မျိုးစေ့ချစက်၊လယ်ထွန်စက်အသေး၊ရိတ်ခြွေစက်အသေး၊ ပဲခွဲစက်၊ကောက်စိုက်စက်၊ အခြောက်ခံ စက် (Dryer)၊သိုလှောင်ရုံ (Silo)၊ ဆန်စက် အစရှိသည့် စက်ကိရိယာများ စသည့် လယ်ယာသုံးစက်ကိရိယာဝယ်ယူရန် ချေးငွေများကိုလည်း ကျပ်သိန်း၁၀၀ မှ ၃၀၀၀ အထိ တစ်ကဏ္ဍ၊ ကျပ်သိန်း၃၀၀၁ မှ ၅၀၀၀ အထိ တစ်ကဏ္ဍ ထုတ်ချေးပေးသွားမည်ဖြစ်သည်။
ဤစက်ကိရိယာ ချေးငွေများကို တစ်နှစ်မှ ငါးနှစ်အထိ နှစ်ရှည်အရစ်ကျစနစ်ဖြင့် ပြန်လည်ပေးဆပ်နိုင်ပြီး အတိုးနှုန်းမှာ တစ်နှစ်လျှင် ၆ ရာခိုင်နှုန်း သတ်မှတ်ထားကာ လယ်ယာမြေလုပ်ပိုင်ခွင့်ပြုလက်မှတ် (ပုံစံ-၇)မြေ၊ ဘိုးဘပိုင်မြေ၊ ဂရန်မြေ၊ (လန-၃၉)မြေနှင့် ယင်းမြေပေါ်တွင် တည်ရှိသည့် အဆောက်အအုံများ၊စက်ပစ္စည်းများ၊ လုပ်ငန်းသုံးယာဉ်များ၊ အခြားပုံသေရပိုင်ခွင့်များ တင်ပြရမည်ဖြစ်ကာ အာမခံလုံလောက်ပါက စက်ကိရိယာ တစ်မျိုးထက်ပို၍ ဝယ်ယူနိုင်သည်။
အဆိုပါချေးငွေများကို ၂၀၂၆ ခုနှစ် မေလမှ စတင်ကာ ထုတ်ချေးပေးမည်ဖြစ်သည်။
နိုင်ငံတော်အစိုးရအနေဖြင့်ကျေးလက်နေပြည်သူများ၊တောင်သူလယ်သမားဦးကြီးများ၏လယ်ယာထုတ်ကုန်များ တိုးမြှင့်ထုတ်လုပ်နိုင်ပြီးလူမှုစီးပွားဘ၀ဖွံ့ဖြိုးတိုးတက်ရေးနှင့်လယ်ယာစိုက်ပျိုးရေးနှင့်မွေးမြူရေးကိုအခြေခံ သည့် စက်မှုလုပ်ငန်း (Agro-based Industry) တည်ဆောက်ရန်အတွက် ရည်ရွယ်ဆောင်ရွက်ပေးသည့် စိုက်ပျိုးရေးနှင့်လယ်ယာသုံးစက်ကိရိယာချေးငွေများရယူလိုသောတောင်သူများနှင့်စိုက်ပျိုးရေးလုပ်ငန်းရှင်များအနေဖြင့် နိုင်ငံတစ်ဝန်းရှိ မြန်မာ့လယ်ယာဖွံ့ဖြိုးရေးဘဏ် သက်ဆိုင်ရာခရိုင်/မြို့နယ်ဘဏ်ခွဲများသို့ အမြန်ဆုံး ဆက်သွယ်ကြပါရန်အသိပေးကြေညာထားသည်။
သတင်း-ဘုန်းမောင်
ဓာတ်ပုံ-MOI
#ယနေ့ထုတ်သတင်းစာ_ပြည်တွင်းသတင်း

◾️အီရန်စစ်ပွဲအတွက် အီရတ်နိုင်ငံ၌ လျှို့ဝှက်စစ်စခန်းတစ်ခု အစ္စရေးကြိုတင်တည်ဆောက်ခဲ့
အီရန်နိုင်ငံကို ပြုလုပ်မည့် လေကြောင်းတိုက်ခိုက်မှုများအား အထောက်အကူပြုနိုင်ရေးအတွက် အစ္စရေးနိုင်ငံက အီရတ်နိုင်ငံ သဲကန္တာရဒေသတွင် ယာယီစစ်စခန်းတစ်ခုတည်ဆောက်၍ယင်းစစ်စခန်းကိုလည်း လျှို့ဝှက်ချက်အ ဖြစ်ကာကွယ်ခဲ့ကြောင်း ဝေါလ်စထရိဂျာနယ် သတင်းစာက မေ ၉ ရက်တွင် ရေးသားတင်ပြထားသည်။
အစ္စရေးနိုင်ငံသည် အထက်ပါလျှို့ဝှက် စစ်စခန်းကို အီရန်စစ်ပွဲမစတင်မီမှာပင် တည်ဆောက်ခဲ့ခြင်းဖြစ်ပြီး ယင်းစစ်စခန်းအား အစ္စရေးလေတပ်အတွက် ထောက်ပို့စခန်းအဖြစ် အသုံးချခဲ့သလိုအထူးတပ်ဖွဲ့ဝင်များ အခြေစိုက်စခန်းအဖြစ်လည်းအသုံးပြုခဲ့ကြောင်း အစ္စရေးနှင့် အမေရိကန်အစိုးရသတင်းအရင်းအမြစ်များက ထုတ်ဖော်ပြောကြားထားသည်။
ယင်းအပြင် အစ္စရေးနိုင်ငံသည် အထက်ပါလျှို့ဝှက်စစ်စခန်းအား ရှာဖွေရန်ကြိုးပမ်းခဲ့သောအီရတ်တပ်ဖွဲ့ဝင် များကိုလည်း လေကြောင်းတိုက်ခိုက်မှုပြုလုပ်၍ တားဆီးခဲ့ကြောင်း သတင်းအရင်းအမြစ်များ၏ အဆိုအရ သိရသည်။
အီရတ်သဲကန္တာရဒေသ၌ အစ္စရေးစစ်စခန်း လျှို့ဝှက်တည်ရှိနေမှုကို မတ်လအစောပိုင်းတွင် နယ်ခံသိုး ကျောင်းသားတစ်ဦးက သတိထားမိခဲ့ပြီးနောက် အီရတ်အာဏာပိုင်များကိုအသိပေးခဲ့ကြောင်း သတင်းအ ရင်းအမြစ်များကပြောကြားထားသည်။
အထက်ပါ အစ္စရေးလျှို့ဝှက်စစ်စခန်းနှင့်ပတ်သက်၍ အီရတ်အစိုးရတာဝန်ရှိသူများကကုလသမဂ္ဂကို မတ်လကုန်ပိုင်းတွင် အသိပေး တိုင်တန်းမှုပြုလုပ်ခဲ့ပြီး အမေရိကန်အစိုးရကိုလည်းအသိပေးခဲ့ကြောင်း သတင်းအရင်းအမြစ်များ၏အဆိုအရ သိရသည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

◾️လေးနှစ်ကျော်ကြာ ယူကရိန်းစစ်ပွဲပြီးဆုံးတော့မည်ဟု ရုရှားသမ္မတ ထင်မြင်
လေးနှစ်ကျော်ကြာ ယူကရိန်းစစ်ပွဲ ပြီးဆုံးတော့မည်ဟု မိမိထင်မြင်ထားကြောင်း ရုရှားသမ္မတပူတင်က မေ ၉ ရက်တွင် သတင်းထောက်များနှင့် တွေ့ဆုံစဉ် ထုတ်ဖော်ပြောကြားလိုက်သည်။
မော်စကိုမြို့တော် ရင်ပြင်နီ၌ မေ ၉ ရက်တွင် ကျင်းပခဲ့သော (၈၁)ကြိမ်မြောက် ဒုတိယကမ္ဘာစစ် စစ်အောင်ပွဲနေ့ စစ်ရေးပြချီတက်ပွဲ မိန့်ခွန်း၌ ယူကရိန်းစစ်မြေပြင်တွင် အောင်ပွဲရယူမည်ဖြစ်ကြောင်း ကတိပြုခဲ့ပြီးနောက် သမ္မတပူတင်က အထက်ပါအတိုင်း မှန်းဆခဲ့ခြင်းဖြစ်သည်။
လေးနှစ်ကျော်ကြာ ယူကရိန်းစစ်ပွဲပြီးဆုံးတော့မည်ဟု မိမိထင်မြင်ထားကြောင်း၊ အလားတူ ဥရောပ လုံခြုံရေး အခင်းအကျင်းသစ်များ ရေးဆွဲပြဋ္ဌာန်းနိုင်ရေးအတွက်လည်း ဥရောပခေါင်းဆောင်များနှင့် စေ့စပ်ဆွေးနွေးရန် မိမိ ဆန္ဒရှိကြောင်း ရုရှားသမ္မတပူတင်က သတင်းထောက်များကို ထုတ်ဖော်ပြောကြားထားသည်။
ရုရှားနိုင်ငံသည် ၂၀၂၂ ခုနှစ်တွင် ယူကရိန်းနိုင်ငံကို စစ်ရေးအရ စတင်ကျူးကျော်တိုက်ခိုက်ခဲ့ရာ ရုရှားနှင့် အနောက်အုပ်စုနိုင်ငံများအကြား ဆက်ဆံရေးအခြေအနေမှာ ၁၉၆၂ ခုနှစ် ကျူးဘားဒုံးကျည် ပြဿနာနောက်ပိုင်း အဆိုးရွားဆုံးအခြေအနေသို့ ရောက်ခဲ့ရသည်။
ရုရှား၏ စစ်ရေးရည်မှန်းချက်အားလုံး ပြည့်မြောက်သည့်တိုင် ယူကရိန်း စစ်ပွဲကို ဆက်တိုက်မည်ဖြစ်ကြောင်း သမ္မတပူတင်ကပြောကြားထားသည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

#ယနေ့ထုတ်သတင်းစာ_ကာတွန်း

◾️အမ်ဗွီဟွန်ဒီးရပ်စ်ခရီးသည်များကို ခေါ်ယူရန် ဥရောပနိုင်ငံများ ပြင်ဆင်နေ
စပိန်နိုင်ငံသို့ ရောက်ရှိနေပြီဖြစ်သော အမ်ဗွီဟွန်ဒီးရပ်စ်ခရီးသည်တင်ဇိမ်ခံသင်္ဘောပေါ်မှ ခရီးသည်များကိုခေါ်ယူရေးအတွက် ဥရောပနိုင်ငံများက ပြင်ဆင်နေကြကြောင်း မေ ၁၀ရက် သတင်းများတွင် ရေးသားတင်ပြထားသည်။
ဝင်ရိုးစွန်းဒေသ ခရီးစဉ်အတွင်းဟန်တာဗိုင်းရပ်စ် ကူးစက်မှုပြဿနာနှင့် ရင်ဆိုင်နေရသည့် အမ်ဗွီဟွန်ဒီးရပ်စ်သင်္ဘောသည် မေ ၉ ရက်တွင်စပိန်နိုင်ငံ တီနာရစ်ဖ်ကျွန်းသို့ ရောက်ရှိနေပြီဖြစ်ကြောင်း သိရသည်။
အဆိုပါသင်္ဘော တီနာရစ်ဖ်ကျွန်းသို့ရောက်ရှိချိန်တွင် ၎င်းတို့၏သက်ဆိုင်ရာ နိုင်ငံသားများကို ခေါ်
ထုတ်ရေးအတွက် ပြင်သစ်၊ ဂျာမနီ၊အိုင်ယာလန်၊ နယ်သာလန် စသည့်ဥရောပနိုင်ငံများက လေယာဉ်များစေလွှတ်ရန် စီစဉ်ထားကြောင်း စပိန်ပြည်ထဲရေးဝန်ကြီးဌာနက သတင်းထုတ်ပြန်ထားသည်။
အလားတူ ကျန်ဥရောပ သမဂ္ဂအဖွဲ့ဝင်နိုင်ငံများမှ နိုင်ငံသားများကိုခေါ်ထုတ်နိုင်ရေး အတွက်လည်း
ဥရောပသမဂ္ဂက စပိန်နိုင်ငံသို့လေယာဉ်နှစ်စင်း စေလွှတ်ရန် စီစဉ်ထားကြောင်း သိရသည်။
အမ်ဗွီဟွန်ဒီးရပ်စ်သင်္ဘောသည်ဟန်တာဗိုင်းရပ်စ်ကူးစက်မှုပြဿနာပေါ်ပေါက်ခဲ့ပြီးနောက်အနောက်အာဖရိကဒေသ ကိပ်ဗာဒီကျွန်းစုနိုင်ငံ ကမ်းလွန်၌ မေ ၂ ရက်မှစ၍ ကျောက်ချထားခဲ့ရသည်။ဟန်တာ ဗိုင်းရပ်စ်ကြောင့် ယင်းသင်္ဘောပေါ်မှ ခရီးသည်သုံးဦးသေဆုံးခဲ့ရပြီး သုံးဦးကို အရေးပေါ်ကယ်ထုတ်ခဲ့ရသည်။
ကြွက်များမှတစ်ဆင့် ကူးစက်တတ်သော ဟန်တာဗိုင်းရပ်စ်ကြောင့်အသက်အန္တရာယ် ကြီးမားသော
အသက်ရှူလမ်းကြောင်း ဆိုင်ရာပြဿနာများပေါ်ထွက်လာနိုင်သည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

◾️စေတုတ္တရာ၌ငလျင်လှုပ်ခတ်၊ ဒေသခံများသိသာစွာခံစားရဟုဆို
မ‌ကွေးတိုင်း၊ စေတုတ္တရာမြို့၌ ယနေ့(မေ ၁၁ ရက်)နံနက်အစောပိုင်းတွင် ငလျင်လှုပ်ခတ်မှုဖြစ်ပွားခဲ့ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်သည်။
အဆိုပါငလျင်လှုပ်ခတ်မှုမှာ စေတုတ္တရာမြို့၏ အနောက်-အနောက်မြောက်ဘက် (၁၁) မိုင်ခန့်အကွာဗဟိုပြု၍ ယနေ့နံနက် ၂ နာရီ ၆ မိနစ် ၃၅ စက္ကန့်တွင်လှုပ်ခတ်ခဲ့ခြင်းဖြစ်ပြီး အင်အားရစ်ချ်တာစကေး ၅ အဆင့်ရှိငလျင်ဖြစ်ကြောင်း ထုတ်ပြန်ချက်အရသိရသည်။
စေတုတ္တရာမြို့နေဒေသခံတစ်ဦးက “ဟုတ်တယ်။ လှုပ်သွားတာသိသိသာသာပဲ။ ကြမ်းတယ်။ အသံပါပါတယ်” ဟု စံတော်ချိန်ဒစ်ဂျစ်တယ်သို့ပြောသည်။
ယခုမေလ ၅ ရက်၊ ည ၇ နာရီ ၅၃ မိနစ် ၃၄ စက္ကန့် တွင်လည်း စစ်ကိုင်းတိုင်း၊ ခန္တီးမြို့၌ အင်အားရစ်ချ်တာစကေး ၃ ဒသမ ၈ အဆင့်ရှိ ငလျင်လှုပ်ခတ်ခဲ့ကြောင်းမိုးလေဝသနှင့် ဇလဗေဒညွှန်ကြားမှုဦးစီးဌာနကထုတ်ပြန်ထားသည်။
သတင်း - အင်ကြင်း
#ပြည်တွင်းသတင်း

◾️ထရန့် - ရှီ နှစ်ဦး မတွေ့မီ တရုတ်နှင့် အမေရိကန် ကုန်သွယ်ရေး ဆွေးနွေးမည်
ဒေါ်နယ်ထရန့် နှင့် ရှီကျင့်ဖျင်တို့၏ ထိပ်သီးဆွေးနွေးပွဲမတိုင်မီတွင် အမေရိကန်နှင့် တရုတ် ထိပ်တန်းအရာရှိကြီးများသည် တောင်ကိုရီးယားနိုင်ငံတွင် ကုန်သွယ်ရေးကိစ္စ ဆွေးနွေးကြမည်ဖြစ်ကြောင်း အမေရိကန်ဘဏ္ဍာရေးဝန်ကြီး နှင့် တရုတ်စီးပွားကူးသန်း ဝန်ကြီးဌာနတို့က ပြောကြားကြသည်။
အင်္ဂါနေ့နှင့် ဗုဒ္ဒဟူးနေ့တွင် တောင်ကိုရီးယားနိုင်ငံ၌ ကျင်းပမည့် နှစ်ဖက်အပြန်အလှန် စီးပွားရေးနှင့် ကုန်သွယ်ရေးကိစ္စများဆွေးနွေးပွဲသို့ ဒုတိယဝန်ကြီးချုပ် ဟီလီဖန်း တက်‌ရောက်မည်ဖြစ်ကြောင်း တရုတ်စီးပွားကူးသန်း ဝန်ကြီးဌာနက ထုတ်ပြန်ပြောကြားသည်။
သမ္မတထရန့်နှင့် သမ္မတရှီတို့၏ ထိပ်သီးဆွေးနွေးပွဲအတွက် ပေကျင်းမြို့သို့ ခရီးမဆက်မီ တရုတ်ဒုတိယဝန်ကြီးချုပ် ဟီလီဖန်းနှင့် ဆွေးနွေးရန် ဗုဒ္ဒဟူးနေ့တွင် ဆိုးလ်မြို့သို့ ဝင်ရောက်မည် ဖြစ်ကြောင်း အမေရိကန်ဘဏ္ဍာရေးဝန်ကြီး စကော့ဘက်ဆင့်က X လူမှုကွန်ရက်ပေါ်တွင် ပြောကြားသည်။
ရှီကျင့်ဖျင်နှင့် အလျော်အစားကြီးမားသော ထိပ်သီးဆွေးနွေးပွဲအတွက် ဒေါ်နယ်ထရန့်သည် တရုတ်နိုင်ငံသို့ သွားရောက်ရန်ရှိကာ ကမ္ဘာ့အကြီးဆုံးစီးပွားရေး နှစ်နိုင်ငံ ခေါင်း‌ဆောင်များသည် အရှေ့အလယ်ပိုင်းစစ်ပွဲ အရိပ်မည်းကြီးအောက်တွင် ကုန်သွယ်ရေးနှင့် ထိုင်ဝမ်အ‌ရေး တို့အပေါ် တင်းမာမှုများ လျော့ပါးရေးကို အာရုံစိုက်ကြမည်ဟု မျှော်လင့်ထားကြသည်။
ဝါရှင်တန်နှင့် ပေကျင်းသည် လွန်ခဲ့သောတစ်နှစ်က တစ်ဖက်အပေါ် တစ်ဖက် ကြီးလေးသော အခွန်များချမှတ်ခဲ့ကြသော်လည်း တစ်နှစ်ကြာ ကုန်သွယ်ရေး သဘောတူညီချက်ယူ၍ ၎င်းအခွန်များကို ဆိုင်းငံ့ထားကြရန် အောက်တိုဘာလ တောင်ကိုရီးယားထိပ်သီးပွဲတွင် ထရန့်နှင့် ရှီ တို့ သဘောတူခဲ့ကြသည်။
ဟီလီဖန်း နှင့် စကော့ဘက်ဆင့်တို့သည် ကုန်သွယ်ရေးနှင့်စီးပွားရေးကိစ္စများ အားလုံးတွင် တရုတ် နှင့် အမေရိကန်တို့အတွက် ထိပ်သီးညှိနှိုင်းဆွေးနွေးသူများ ဖြစ်ကြသည်။
၎င်းတို့နှစ်ဦး၏ ဆွေးနွေးပွဲတွင် ထရန့် - ရှီ ထိပ်သီးပွဲတွင် ပြုလုပ်မည့်ကြေညာချက်များအတွက် အပြီးသတ်ပြင်ဆင်မှုများ ပြုလုပ်ကြဖွယ်ရှိသည်။
သတင်း-ရဲမင်း
ကိုးကား-AFP
#နိုင်ငံတကာသတင်း

◾️ခတ္တမန္ဒူမြို့၌ ဆင်းသက်စဉ် တာယာမီးလောင်ခဲ့သော တူရကီလေယာဉ်ပေါ်မှ ခရီးသည်များကို ကယ်ထုတ်
ယ‌နေ့ တနင်္လာနေ့တွင် နီပေါနိုင်ငံမြို့တော် ခတ္တမန္ဒူတွင် ဆင်းသက်ချိန်၌ တူရကီလေကြောင်းလိုင်းလေယာဉ်၏ ဘီးတစ်လုံး မီးလောင်ခဲ့သဖြင့် လေဆိပ်ကို တစ်နာရီခန့် ပိတ်ထားခဲ့ရကြောင်း သိရသည်။
အစ္စတန်ဘူလ်မြို့မှ ပျံသန်းလာခဲ့သော Airbus A330 လေယာဉ်ပေါ် လိုက်ပါခဲ့သည့် ခရီးသည် ၂၇၇ ဦးနှင့် လေယာဉ်ဝန်ထမ်း ၁၁ ဦး စလုံးကို အရေးပေါ် ထွက်ပေါက်များမှ တစ်ဆင့် ဘေးကင်းစွာ ကယ်ထုတ်နိုင်ခဲ့ပြီး ထိခိုက်ဒဏ်ရာရသူ မရှိခဲ့ကြောင်း နီပေါ အရပ်ဘက်လေကြောင်အာဏာပိုင်အဖွဲ့မှ ပြောရေးဆိုခွင့်ရှိသူ ဂါနင်ဒရာဘူးလ် က ရိုက်တာသတင်းဌာနကို ပြောကြားသည်။
“လေယာဉ်ရဲ့ ညာဘက်တာယာ မီးလောင်သွားတာပါ။ မီးငြှိမ်းသတ်ပြီး လေယာဉ်ကို ဆွဲသွားကာ အခုတော့ ရပ်ထားလိုက်ပါပြီ” ဟု ဘူးလ်က ပြောသည်။
လေယာဉ်ကို ဆွဲသွားချိန်တွင် လေယာဉ်အဆင်းဂီယာဘက်မှ မီးခိုးများ ထွက်ပေါ်လာသည်ကို မြင်တွေ့ရပြီး နည်းပညာပိုင်းစစ်ဆေးမှုများ လုပ်ဆောင်နေပြီဖြစ်ကြောင်း တူရကီလေကြောင်းက ပြောကြားသည်။
ဟိုက်ဒ‌ရောလစ်ပိုက်တစ်ချောင်း ချို့ယွင်းမှုကြောင့် မီးခိုးထွက်လာခဲ့သည်ဟု ကနဦး အကဲဖြတ်ချက်များအရ သိရကြောင်း လေကြောင်းလိုင်း၏ ပြုပြင်ထိန်းသိမ်းရေးဌာနဒုတိယအကြီးအကဲ ယာဟရာ အူစတန် က X လူမှုကွန်ရက်ပေါ်တွင် ပြောကြားသည်။
ခရီးသည်များ၏ အပြန်ခရီးစဉ်အတွက် အခြားလေယာဉ်ခရီးစဉ်တစ်ခု ထပ်မံ စီစဉ်ပေးခဲ့ကြောင်း လည်း ၎င်းက ဆက်ပြောသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း

ဒူးရင်းပွဲတော် ကျင်းပမည်
ဒူးရင်းဈေးကွက်ချဲ့ထွင်နိုင်ရေးအတွက် မြန်မာမျိုး ဒူးရင်းမျိုးရင်းများကို အဓိကထားပြသ သွား မည့် မြန်မာ့ဒူးရင်းပွဲတော် ၂၀၂၆ ကို မေ၁၉ ရက် (တစ်ရက်တည်း) ရန်ကုန်မြို့ ဗဟန်းမြို့နယ်ရှိ မြေပဒေသာကျွန်း၌ ကျင်းပသွားမည်ဖြစ်ကြောင်း မြန်မာနိုင်ငံ သစ်သီး၀လံ၊ပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ်တင်ပို့ရောင်းချသူများအသင်းမှ သိရသည်။
ယင်းပွဲတော်ကို စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနမှ ဦးဆောင်ကျင်းပမည် ဖြစ်ပြီး မြန်မာ့ဒေသထွက် ဒူးရင်းသီးများကိုပြည်ပပို့ကုန်အဖြစ် တိုးမြှင့်နိုင်ရန်]မြန်မာ့ဒူးရင်း} အမည်ဖြင့် နိုင်ငံတကာဈေးကွက်တွင် ထိုးဖောက်နိုင်ရန်နှင့်ခေတ်မီစိုက်ပျိုးရေးနည်းပညာများ၊ ရိတ်သိမ်းပြီးနောက် ထိန်းသိမ်းခြင်းနည်းပညာများကို ဆွေးနွေးဖလှယ်နိုင်ရန် ရည်ရွယ်ထားကြောင်း သိရသည်။
ထို့ပြင် ဒူးရင်းဈေးကွက်ချဲ့ထွင်ရေး၊ ရင်းနှီးမြှုပ်နှံမှုဆိုင်ရာ အခွင့်အလမ်းများဖန်တီးရေးနှင့် စီးပွားရေးကွန်ရက် ချိတ်ဆက်ရေးတို့ကိုလည်း အထူးအလေးထားဆောင်ရွက်သွားမည်ဖြစ်ပြီး ဈေးကွက်လိုအပ်ချက်နှင့် ကိုက်ညီသည့် အရည်အသွေးမြင့် ဒူးရင်းမျိုးများကို ရွေးချယ် ဖော်ထုတ်နိုင်ရန်လည်း မျှော်မှန်းထားကြောင်း အသင်းကထုတ်ပြန်ထားသည်။
အဆိုပါ ဒူးရင်းပွဲတော်တွင် မြန်မာနိုင်ငံ သစ်သီး၀လံ၊ ပန်းမန်နှင့်ဟင်းသီးဟင်းရွက် စိုက်ပျိုး ထုတ်လုပ်တင်ပို့ရောင်းချသူများအသင်း၏တိုင်းဒေသကြီးနှင့်ပြည်နယ်အသင်းများ၊ သီးနှံအသင်းအစုအဖွဲ့များ၊ အသင်းဝင်ကုမ္ပဏီများအနေဖြင့် ပူးပေါင်းပါဝင်ကြရန် မြန်မာနိုင်ငံ သစ်သီး၀လံ၊ ပန်းမန်နှင့် ဟင်းသီးဟင်းရွက်စိုက်ပျိုးထုတ်လုပ် တင်ပို့ရောင်းချသူများအသင်းက အသိပေးအကြောင်းကြားထားသည်။
သို့ဖြစ်ရာ ဒူးရင်းစိုက်တောင်သူများ၊ စီးပွားရေးလုပ်ငန်းရှင်များနှင့် စိတ်ပါဝင်စားသူများ အနေဖြင့် အဆို ပါပွဲတော်တွင် ပါဝင်ဆောင်ရွက်ကြရန်နှင့် အသေးစိတ်အချက် အလက် များအတွက် သက်ဆိုင်ရာအသင်းနှင့် ဆက်သွယ်နိုင်ကြောင်း သိရသည်။
သတင်း-လူ့တလူ
ဓာတ်ပုံ-အစိမ်းရောင်လမ်း
#ယနေ့ထုတ်သတင်းစာ_ပြည်တွင်းသတင်း

ချင်းရိုင်တွင် မြန်မာလုပ်သား ၃၆ ဦး ဖမ်းဆီးခံရ
ထိုင်းနိုင်ငံမြောက်ပိုင်း ချင်းရိုင်မြို့နယ် ပါအော့ဒွန်းချိုင်ကျေးရွာအုပ်စုရှိ အိမ်တစ်အိမ်တွင် တရားမဝင် ဝင်ရောက်လာပြီး ခိုအောင်းနေကြသည့် မြန်မာလုပ်သား၃၆ဦးအား ဖမ်းဆီး ခဲ့ကြောင်းထိုင်းသတင်းမှ ထုတ်ပြန်ချက်အရ သိရသည်။
ချင်းရိုင်ခရိုင် လ၀ကအဖွဲ့က မေ၁၁ ရက်တွင် သတင်းရရှိပြီး ယင်းနေအိမ်သို့ စစ်ဆေးခဲ့ခြင်းဖြစ် ပြီး အိမ်အတွင်း၌ မြန်မာလုပ်သားအမျိုးသား၁၇ဦး၊အမျိုးသမီး၁၉ဦးအားတွေ့ရှိခဲ့ရာအများစုမှာ လူငယ်အရွယ်များ ဖြစ်ကာ ခရီးဆက်ရန် အထုပ်အပိုးများ ပြင်ဆင်ထားကြောင်း သိရသည်။
ထိုအလုပ်သမားများမှာ မယ်ဆိုင်နယ်စပ်မှတစ်ဆင့် ဝင်ရောက်ကာဗန်ကောက်နယ်စပ်တွင် အလုပ်လုပ်နိုင်ရေး တစ်ဦးလျှင် ဘတ် ၅၀၀၀ မှ ဘတ်၁၀၀၀၀ အထိ ပေးချေခဲ့ရကြောင်း သိရသည်။
ပွဲစားက မယ်ဆိုင်နယ်စပ်မှတစ်ဆင့် ကားဖြင့်လာကြိုခဲ့ပြီး အဆိုပါအိမ်တွင် ခေတ္တထား ထားချိန်၌ ဖမ်းမိကြောင်း ဖော်ပြထားသည်။ဖမ်းဆီးရရှိခဲ့သော မြန်မာအလုပ်သမားများအား မှတ်တမ်းပြုစုကာမယ်ဆိုင်မြို့အမှတ် (၁)ချစ်ကြည်ရေးတံတားမှတစ်ဆင့် နေရပ်သို့ပြန်ပို့မည် ဖြစ်ကြောင်း သိရသည်။
ပြီးခဲ့သည့် မေ ၇ ရက်ကလည်း ဖိစနုလုခ်ခရိုင်တွင် တရားမဝင်ဝင်ရောက်လာသည့် မြန်မာ နိုင်ငံသား ၁၆၀ အား ကား ၁၀ စီးဖြင့် ဖမ်းဆီးခဲ့ကြောင်း သိရသည်။
ထိုအလုပ်သမားများမှာမဲဆိုင်မြို့မှဝင်ရောက်ကာအဆိုပါနေအိမ်တွင်ခိုအောင်းသွားကြသူများဖြစ်ကာ ကွင်းဆက်တရားခံများကို ဆက်လက်စုံစမ်းနေကြောင်း ထိုင်းသတင်းတွင် ဖော်ပြ ထားသည်။
သတင်း-လင်းလက်ကြယ်
ဓာတ်ပုံ-ထိုင်းရဲတပ်ဖွဲံ့
#ယနေ့ထုတ်သတင်းစာ_ပြည်တွင်းသတင်း

ထရန့်၏ တရုတ်ခရီးစဉ်အတွက် အီလွန်မက်စ်နှင့် တင်မ်ကွတ်ခ်တို့ကို အိမ်ဖြူတော် ဖိတ်ကြား
အမေရိကန်သမ္မတ ဒေါ်နယ်ထရန့်၏တရုတ်ခရီးစဉ်တွင် အတူလိုက်ပါရန် တက်စလာနည်းပညာ ကုမ္ပဏီ အကြီးအကဲ အီလွန်မက်စ်နှင့်အက်ပဲလ်ကုမ္ပဏီအကြီးအကဲ တင်မ်ကွတ်ခ်တို့ကို အိမ်ဖြူတော်က ဖိတ်ကြားထားကြောင်း အမေရိကန်မီဒီယာများက မေ ၁၁ ရက်တွင် သတင်းထုတ်ပြန်ထားသည်။
အမေရိကန်သမ္မတဒေါ်နယ်ထရန့်သည် မေ၁၃ ရက်မှ ၁၅ ရက်အထိ တရုတ်နိုင်ငံသို့ သွားရောက် ၍ တရုတ်သမ္မတရှီကျင်ပင်းနှင့် တွေ့ဆုံဆွေးနွေးရန်စီစဉ်ထားသည်။
အထက်ပါခရီးစဉ်တွင် သမ္မတဒေါ်နယ်ထရန့်နှင့်အတူ အမေရိကန် ထိပ်တန်းစီးပွားရေး လုပ်ငန်းရှင် အများအပြားလည်း လိုက်ပါမည်ဖြစ်ရာတက်စလာအကြီးအကဲ အီလွန်မက်စ်နှင့် အက်ပဲလ်ကုမ္ပဏီအကြီးအကဲ တင်မ်ကွတ်ခ်တို့ကိုလည်း ဖိတ်ကြားထားကြောင်း အိမ်ဖြူတော်တာဝန်ရှိသူများကပြောကြားသည်။
တရုတ်နိုင်ငံခရီးစဉ်အတွင်း စီးပွားရေးသဘောတူညီချက်နှင့် နှစ်နိုင်ငံအရောင်းအဝယ် သဘော တူညီချက်များ ရယူနိုင်ရန် သမ္မတဒေါ်နယ်ထရန့်က မျှော်လင့်ထားသည်။
အမေရိကန်သမ္မတ ဒေါ်နယ်ထရန့်သည်မူလက တရုတ်နိုင်ငံသို့ မတ်လကုန်ပိုင်း သို့မဟုတ် ဧပြီလအစောပိုင်းတွင် သွားရောက်ရန် စီစဉ်ထားသော်လည်း အီရန်စစ်ပွဲကြောင့် ခရီးစဉ်ကို ဆိုင်းငံ့ခဲ့ရသည်။
လာမည့်တရုတ်နိုင်ငံခရီးစဉ်သည် အမေရိကန်သမ္မတဒေါ်နယ်ထရန့်အတွက် ၂၀၁၇ ခုနှစ် နောက်ပိုင်း ပထမဆုံး တရုတ်နိုင်ငံခရီးစဉ်ဖြစ်ကြောင်း သိရသည်။
ကိုးကား-ရိုက်တာ