◾️မအူပင်နှင့် ကာမိုင်းအနီးတို့၌ ငလျင်လှုပ်
မအူပင်မြို့အနီး နှင့် ကာမိုင်းမြို့အနီး ဗဟိုပြု၍ ယနေ့(မေ ၅ ရက်) နံနက် ၃ နာရီနှင့် နံနက် ၁၀ နာရီ ၄၀ မိနစ်တို့၌ ငလျင်များလှုပ်ခတ်ခဲ့ကြောင်း မိုးလေဝသနှင့်ဇလဗေဒညွှန်ကြားမှု ဦးစီးဌာန၏ ထုတ်ပြန်ချက်အရ သိရသည်။
ယနေ့(မေ ၅ ရက်) နံနက် ၃ နာရီ ၁ မိနစ်ခန့်က မအူပင်မြို့၏ အရှေ့မြောက်ဘက် (၉) မိုင်ခန့်အကွာ အနက် (၁၆) ကီလို မီတာကို ဗဟိုပြု၍ ပမာဏ ၃ ဒသမ ၈(M) အဆင့်ရှိ အင်အားအနည်းငယ်ရှိ မြေငလျင်တစ်ခု လှုပ်ရှားသွားကြောင်း ထုတ်ပြန်ထားသည်။
ထို့ပြင် ကာမိုင်းမြို့၏ အနောက်ဘက်(၁၃) မိုင်ခန့်အကွအနက် (၁၀) ကီလိုမီတာကို ဗဟိုပြု၍ ပမာဏ ၄ ဒသမ ၅ (M) အဆင့်ရှိ မြေငလျင်တစ်ခု လှုပ်ခတ်ခဲ့ကြောင်း ထုတ်ပြန်ထားသည်။
ပြီးခဲ့သည့် မေ ၁ ရက် ညပိုင်းနှင့် မေ ၂ ရက် မွန်းလွဲပိုင်းတို့တွင်လည်း ဧရာဝတီတိုင်း၊ မအူပင်မြို့အနီး ဗဟိုပြု၍ ငလျင်လှုပ်ခတ်မှုများဖြစ်ပွားခဲ့သေးကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်များအရ သိရသည်။
သတင်း - စံတော်ချိန်ဒစ်ဂျစ်တယ်
ဓာတ်ပုံ-မိုးဇလ
#ပြည်တွင်းသတင်း

◾️ဗိုင်းရပ်စ်ကူးစက်မှုကြောင့် နယ်သာလန် ဇိမ်ခံသင်္ဘောပေါ် ၌ လူသုံးဦး သေဆုံး
နယ်သာလန်နိုင်ငံ အခြေစိုက်ဇိမ်ခံခရီးသည်တင် သင်္ဘောပေါ်၌ဟန်တာဗိုင်းရပ်စ် (hantavirus) အဖြစ် ယူဆရသော ဗိုင်းရပ်စ် တစ်မျိုးကူးစက်မှုကြောင့် လူသုံးဦးသေဆုံး၍သုံးဦး နာမကျန်းဖြစ်နေကြောင်း မေ၃ ရက် သတင်းများတွင် ရေးသားတင်ပြထားသည်။
အဆိုပါခရီးသည်တင် ဇိမ်ခံသင်္ဘောမှာ နယ်သာလန်အခြေစိုက်အိုးရှင်းဝိုက် အိတ်စပတ်ဒီးရှင်းကုမ္ပဏီပိုင် အမ်ဗွီဟွန်ဒီးရပ်စ် အမည်ရှိ သင်္ဘောဖြစ်ကြောင်း သိရသည်။
အမ်ဗွီဟွန်ဒီးရပ်စ် သင်္ဘောသည် ဝင်ရိုးစွန်းဒေသ ခရီးစဉ်အတွင်းဟန်တာဗိုင်းရပ်စ်အဖြစ် ယူဆရသော ဗိုင်းရပ်စ်တစ်မျိုး ကူးစက်မှုပြဿနာနှင့် ရင်ဆိုင်နေရခြင်းဖြစ်ပြီး အခြေအနေကို ထိန်းချုပ်ရေး အတွက် ကြိုးပမ်းနေကြောင်း အိုးရှင်းဝိုက်အိတ်စပတ်ဒီးရှင်း ကုမ္ပဏီက သတင်းထုတ်ပြန်ထားသည်။
ဟန်တာဗိုင်းရပ်စ်သည် ကြွက်များမှတစ်ဆင့် ကူးစက်နိုင်သောဗိုင်းရပ်စ်တစ်မျိုးဖြစ်ပြီး ကူးစက်ခံခဲ့ရပါက အသက်အန္တရာယ်ကြီးမားသည့်အသက်ရှူလမ်းကြောင်း ဆိုင်ရာပြဿနာများပေါ်လာတတ်သည်။
ဟန်တာဗိုင်းရပ်စ်အဖြစ်ယူဆရသော ဗိုင်းရပ်စ်ကူးစက်မှုကြောင့်သေဆုံးသူများထဲတွင် နယ်သာလန်
နိုင်ငံသားနှစ်ဦး ပါဝင်ကြောင်းသိရသည်။
အမ်ဗွီဟွန်ဒီးရပ်စ် သင်္ဘောသည် ခရီးသည် ၁၅၀ ခန့်နှင့်အတူအာဂျင်တီးနားနိုင်ငံမှ လွန်ခဲ့သည့်
သီတင်းသုံးပတ်ခန့်က စတင်ထွက်ခွာခဲ့ပြီး ယခုအခါ အန္တာတိကသမုဒ္ဒရာအတွင်း ကျောက်ချထားသည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

#ယနေ့ထုတ်သတင်းစာ_ကာတွန်း

◾️ရုရှား၏ ဘောလ်တစ်ဒေသ ရေနံဆိပ်ကမ်းကို ယူကရိန်း တိုက်ခိုက်
ရုရှားနိုင်ငံ၏ ပရီမော့ခ်အမည်ရှိ ဘောလ်တစ်ပင်လယ်ဒေသ ဆိပ်ကမ်းတစ်ခုကို ယူကရိန်းနိုင်ငံက မေ၃ ရက်တွင် မောင်းသူမဲ့လေယာဉ်များဖြင့် တိုက်ခိုက်ခဲ့ကြောင်း သိရသည်။
ပရီမော့ခ်ဆိပ်ကမ်းကို တိုက်ခိုက်စဉ် ယူကရိန်း မောင်းသူမဲ့လေယာဉ်များက ယင်းဆိပ်ကမ်းရှိရုရှားစစ်ရေယာဉ်ငယ်များကိုလည်းပစ်မှတ်ထားခဲ့ကြောင်း ယူကရိန်းတာဝန်ရှိသူများက ပြောကြားထားသည်။
ယူကရိန်း မောင်းသူမဲ့လေယာဉ်များ၏ တိုက်ခိုက်မှုကြောင့်ပရီမော့ခ်ရေနံဆိပ်ကမ်း ထိခိုက်ပျက်စီးခဲ့ရကြောင်း ယူကရိန်းသမ္မတဇီလန်စကီးက အတည်ပြုထားသည်။ရုရှား၏ ရေနံလုပ်ငန်းအခြေခံ
အဆောက်အအုံများကို တိုက်ခိုက်ခြင်းဖြင့် ရုရှား၏ စစ်ပွဲ ဆင်နွှဲနိုင်စွမ်းကိုကန့်သတ်ထားနိုင်ကြောင်း ယူကရိန်းသမ္မတဇီလန်စကီးက သုံးသပ်ထားသည်။
ပရီမော့ခ်ဆိပ်ကမ်းသည် ရုရှား၏ အကြီးမားဆုံး နိုင်ငံတကာ ပို့ကုန်ဆိပ်ကမ်းများထဲတွင် အပါအဝင်ဖြစ်ပြီး နေ့စဉ် ပြည်ပပို့ကုန် ရေနံစိမ်းစည်တစ်သန်းအထိ ကိုင်တွယ်ပေးနေသော ဆိပ်ကမ်းဖြစ်သည်။
ယူကရိန်းနိုင်ငံသည် ပြီးခဲ့သည့်လများအတွင်း ပရီမော့ခ်ဆိပ်ကမ်းကိုအကြိမ်ကြိမ် တိုက်ခိုက်ခဲ့ဖူးသည်။
ရုရှားနိုင်ငံ၏ ရေနံလုပ်ငန်းအခြေခံ အဆောက်အအုံများကိုယူကရိန်းနိုင်ငံက ဆက်လက်တိုက်ခိုက် နေမည် ဆိုပါက ကမ္ဘာ့စွမ်းအင်ဈေးကွက်၌ ရေနံစိမ်းဈေးနှုန်းများထပ်မံမြင့်တက်လာနိုင်ကြောင်း ရုရှားအစိုးရပြောရေးဆိုခွင့်ရှိသူက သတိပေးထားသည်။
ယူကရိန်းနိုင်ငံက မောင်းသူမဲ့လေယာဉ်များဖြင့် ပရီမော့ခ်ရေနံဆိပ်ကမ်းအား တိုက်ခိုက်ခဲ့မှုကို ရုရှား
အစိုးရ တာဝန်ရှိသူများက အတည်ပြုထားပြီး ယူကရိန်းမောင်းသူမဲ့လေယာဉ် ၆၀ ကျော်ကို ပစ်ချခဲ့ရ
ကြောင်း ပြောကြားထားသည်။
မောင်းသူမဲ့ လေယာဉ်များတိုက်ခိုက်မှုကြောင့် ပရီမော့ခ်ဆိပ်ကမ်း၌ မီးလောင်မှု ဖြစ်ပွားခဲ့ရ
သော်လည်း အချိန်တိုအတွင်း ထိန်းချုပ်နိုင်ခဲ့ကြောင်း သိရသည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

◾️တရုတ်၌ မီးရှူးမီးပန်းစက်ရုံ ပေါက်ကွဲပြီး ၂၁ ဦးသေဆုံး
‎
‎တရုတ်နိုင်ငံ ဟူနန်ပြည်နယ်မှ မီးရှူးမီးပန်း စက်ရုံတစ်ခုတွင် ပေါက်ကွဲမှုဖြစ်ပေါ်ခဲ့ရာ လူ ၂၁ ဦးသေဆုံးခဲ့ပြီး ၆၁ ဦး ဒဏ်ရာရရှိခဲ့ကြောင်း တရုတ်သတင်းဌာနများက ဖော်ပြသည်။
‎
‎အဆိုပါ ဖြစ်စဥ်ကို စေ့စပ် သေချာစွာ စုံစမ်းစစ်ဆေးမှုလုပ်ရန် သမ္မတ ရှီကျင့်ဖျင်ထံမှ ညွှန်ကြားချက် ထွက်ပေါ်လာခဲ့ကြောင်း တရုတ်သတင်းဌာနများက ဖော်ပြကြသည်။
‎
‎မီရှူးမီးပန်းစက်ရုံအများအပြား တည်ရှိသော ပြည်နယ် မြို့တော် ချန်းရှာမှ ပေါက်ကွဲမှုသည် တနင်္လာနေ့ ညနေ ၄ နာရီ ၄၀ ခန့်က ဖြစ်ပေါ်ခဲ့သည်ဟု ဆင်ဟွာ နှင့် CCTV သတင်းဌာန တို့က ဖော်ပြသည်။
‎
‎ပြိုကျနေသော အဆောက်အဦးများနှင့် အပျက်အစီးများ ပြန့်ကျဲနေသော ကျယ်ပြောသောစက်ရုံမှ မဲမှောင်နေသော မီးခိုးလုံးများ တက်လာသည်ကို တရုတ်အင်တာနက် ပလက်ဖောင်း ဗီဒီယိုများတွင် မြင်တွေ့ရပြီး ၎င်းတို့အနေဖြင့် စိစစ်နိုင်ခြင်း မရှိကြောင်း သတင်းက ဖော်ပြသည်။
‎
‎မီးလောင်သည့် စက်ရုံသို့ ကယ်ဆယ်ရေးသမား၊ ဆေးအဖွဲ့များ နှင့် မီးသတ်တပ်ဖွဲ့ဝင် ၅၀၀ ခန့် သွားရောက် မီးငြှိမ်းသတ်လုပ်ကိုင်ခဲ့ရကြောင်း ဆောက်ချိုင်းနားမောနင်းပို့စ် သတင်းက ဖော်ပြထားသည်။
‎
‎Huasheng Fireworks Manufacturing and Display တွင် ပေါက်ကွဲမှု ဖြစ်ပွားခဲ့ကြောင်း သတင်းများက ဖော်ပြခဲ့သော်လည်း မှတ်ချက်ရယူရန် ကုမ္ပဏီနာမည်နှင့် တယ်လီဖုန်းနံပါတ် မတွေ့ရှိခဲ့ကြောင်း ရိုက်တာသတင်းက ဆိုသည်။
‎
‎ပေါက်ကွဲမှုဖြစ်ရခြင်း အကြောင်းရင်းကို အလျင်အမြန် စုံစမ်းစစ်ဆေးရန်နှင့် ယင်းဖြစ်ရပ်အတွက် တင်းကျပ်စွာတာဝန်ခံခိုင်းရန် သမ္မတ ရှီကျင့်ဖျင်က ပြောကြားခဲ့ကြောင်း ဆင်ဟွာသတင်းက ဖော်ပြသည်။
‎
‎တရုတ်နိုင်ငံသည် ပြီးခဲ့သည့်နှစ်က ကန်ဒေါ်လာ ၁ ဒသမ ၄ ဘီလီယံဖိုး မီးရှူးမီးပန်းများကို ပြည်ပသို့ တင်ပို့ရောင်းချခဲ့ပြီး ကမ္ဘာ့စုစုပေါင်းတန်ဖိုး၏ သုံးပုံ ၊ နှစ်ပုံ ရှိသည်။
‎
‎သတင်း - ရဲမင်း
‎ကိုးကား - Reuters
‎#နိုင်ငံတကာသတင်း

◾️အီရန်အမျိုးသမီး ငြိမ်းချမ်းရေးနိုဘယ်ဆုရှင် မိုဟမ်မာဒီ၏ အခြေအနေ စိုးရိမ်နေရဆဲဖြစ်
အီရန်နိုင်ငံ အနောက်မြောက်ပိုင်း ဆေးရုံတစ်ရုံ၌ ဆေးဝါးကုသမှု ခံယူနေရသော အီရန်အမျိုးသမီး ငြိမ်းချမ်းရေးနိုဘယ်ဆုရှင် နာဂျက်စ်မိုဟမ်မာဒီ၏ အခြေအနေမှာ စိုးရိမ်ရကြောင်းနာဂျက်စ်မိုဟမ်မာဒီ ဖောင်ဒေးရှင်းက မေ ၃ ရက်တွင် သတင်းထုတ်ပြန်ထားသည်။
ငြိမ်းချမ်းရေးနိုဘယ်ဆုရှင် မိုဟမ်မာဒီ၏သွေးဖိအားမှာ အမြဲလိုလို အသက်အန္တရာယ်ကြီးမားသည့် အဆင့်မျိုးဖြင့် အတက်အကျရှိနေသော်လည်းကုထုံးများမှာ အကန့်အသတ်ရှိနေကြောင်း အထက်ပါ
သတင်းထုတ်ပြန်ချက်၌ ဖော်ပြထားသည်။
အီရန်အနောက်မြောက်ပိုင်း ဇန်ဂျန်မြို့အကျဉ်းထောင်၌ အကျဉ်းချ ဖမ်းဆီးခံထားရသူအသက် (၅၃) နှစ်အရွယ် မိုဟမ်မာဒီ၏ ကျန်းမာရေးအခြေအနေမှာ ပိုမိုဆိုးရွားလာသည်ဖြစ်ရာ မေ ၁ရက်တွင် အကျဉ်းထောင်မှ ဆေးရုံသို့ ပို့ဆောင်ပေးခဲ့ရသည်။
မိုဟမ်မာဒီအနေဖြင့် ၎င်း၏ ဆေးအဖွဲ့ဖြင့်ကုသမှုခံယူမှသာလျှင် ရောဂါကို ထိရောက်စွာ
ထိန်းချုပ်နိုင်မည်ဖြစ်ကြောင်း နာဂျက်စ်မိုဟမ်မာဒီဖောင်ဒေးရှင်း တာဝန်ရှိသူများက ပြောကြားသည်။
မိုဟမ်မာဒီသည် အမျိုးသမီးအခွင့်အရေးလှုပ်ရှားမှု၊ သေဒဏ်စီရင်မှု ပယ်ဖျက်ရေး လှုပ်ရှားမှုများကြောင့် ထောင်သွင်းအကျဉ်းချခံထားရချိန်၂၀၂၃ ခုနှစ်တွင် ငြိမ်းချမ်းရေးနိုဘယ်ဆုကို ရရှိခဲ့သူဖြစ်သည်။
အီရန်အာဏာပိုင်များသည် မိုဟမ်မာဒီကိုပြီးခဲ့သည့်နှစ် ဒီဇင်ဘာလတွင် ပြန်လည်ဖမ်းဆီးခဲ့ပြီး
ထောင်ဒဏ် ခုနစ်နှစ်ခွဲပြစ်ဒဏ် ထပ်မံချမှတ်ထားကြောင်း သိရသည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

◾️ခွင့်ပြန်အလုပ်သမားများ အထောက်အထားခိုင်လုံစွာတင်ပြမှသာ ပြည်ပထွက်ခွာခွင့်ပြု
မြန်မာနိုင်ငံသို့ ခွင့်ဖြင့်ပြန်လည်ဝင်ရောက်လာပြီး PJ စာအုပ်ကိုင်ဆောင်ထားသောအလုပ်သမားများသည် အထောက်အထားခိုင်လုံစွာတင်ပြမှသာ ပြည်ပသို့ပြန်လည်ထွက်ခွာခွင့်ပြုမည်ဖြစ်ကြောင်း အလုပ်သမားညွှန်ကြားရေးဦးစီးဌာနက ယမန်နေ့(မေ ၄ ရက်) ကထုတ်ပြန်သည်။
ယခုမေလ ၁ ရက်မတိုင်မီကာလအတွင်း မြန်မာနိုင်ငံသို့ပြန်လည်ရောက်ရှိနေကြသည့်အလုပ်သမားများတွင် ခွင့်ကာလတစ်လအထက်ကျော်သူများသည် ခွင့်ကာလတစ်လကျော်ယူရသည့်အကြောင်းပြချက်နှင့် OWIC တွင် ဖော်ပြထားသောနိုင်ငံနှင့်လုပ်ငန်းခွင်ကွဲလွဲသူများသည် ကွဲလွဲရသည့်အထောက်အထား ခိုင်လုံစွာဖြင့်တင်ပြရမည်ဟု ယင်းထုတ်ပြန်ချက်တွင်ဖော်ပြထားသည်။
ထို့ပြင် မြန်မာနိုင်ငံသို့ ခွင့်ဖြင့်ပြန်လည်ဝင်ရောက်မည့်အလုပ်သမားများသည် အလုပ်ရှင်ထံမှခွင့်စာ (Letter of Permission for Leave) နှင့် သက်ဆိုင်ရာမြန်မာသံရုံး၊ အဖွဲ့ရုံး၊ ကောင်စစ်ဝန်ချုပ်ရုံးတို့မှ မှန်ကန်ကြောင်း စိစစ်ထောက်ခံချက်ရယူပြီး သတ်မှတ်စာရွက်စာတမ်းများနှင့်အတူ သက်ဆိုင်ရာမှထုတ်ပေးသော ထောက်ခံချက်ပူးတွဲ၍ ပြည်ပသို့ပြန်လည်ထွက်ခွာခွင့်ညတင်ပြလျှောက်ထားရမည်ဟုဆိုသည်။
မြန်မာနိုင်ငံသားများအလုပ်သွားရောက်လုပ်ကိုင်နေသောနိုင်ငံအများစုတွင် သတ်မှတ်ထားသော ခွင့်အမျိုးအစားများအနက် မီးဖွားခွင့်၊ မိသားစုစောင့်ရှောက်ခွင့်၊ နာမကျန်းခွင့်တို့မှအပ နှစ်ပတ်လည်ခွင့်အပါအဝင် သာမန်ခွင့်များကို အများဆုံးတစ်လသာခွင့်ပြုထားသည်ဟုသိရှိထားရသဖြင့် အမှန်တကယ် ခွင့်တင်ပြရယူထားသော ခွင့်ပြန်အလုပ်သမားဖြစ်ကြောင်း သေချာစေရန်စိစစ်ရခြင်းဖြစ်သည်ဟု ထုတ်ပြန်ထားသည်။
ထို့ကြောင့် ပြည်ပနိုင်ငံများတွင် အလုပ်လုပ်ကိုင်နေသည့် PJ စာအုပ်ကိုင်ဆောင်ထားသော မြန်မာနိုင်ငံသားများ ခွင့်ဖြင့်မြန်မာနိုင်ငံသို့ ပြန်လည်ဝင်ရောက်လာပြီး ၎င်းတို့အလုပ်လုပ်ကိုင်ရာ သက်ဆိုင်ရာနိုင်ငံရှိလုပ်ငန်းခွင်များသို့ အချိန်မီပြန်လည်ဝင်ရောက်နိုင်ရေးနှင့် အလုပ်အကိုင်အခွင့်အလမ်းများဆုံးရှုံးမှုမရှိစေရေးအတွက် စိစစ်ခွင့်ပြုဆောင်ရွက်ပေးသွားမည်ဖြစ်ကြောင်း ထုတ်ပြန်ထားသည်။
သတင်း - ပိုင်လေး
ဓာတ်ပုံ-MOI(ပြည်ပသို့သွားရောက်မည့်အလုပ်သမားများကိုတွေ့ရစဉ်)
ပုံဟောင်းအသုံးပြုထားပါသည်
#ပြည်တွင်းသတင်း

◾️ထိုင်းတွင် တရားမဝင် နိုင်ငံခြားသားလုပ်သားများကိုစစ်ဆေးဖမ်းဆီးမှုများ အရှိန်မြှင့် လုပ်ဆောင်မည်
ထိုင်းနိုင်ငံအတွင်း တရားမဝင် အလုပ်လုပ်ကိုင်နေသော နိုင်ငံခြားသားလုပ်သားများကို တစ်နိုင်ငံလုံး အတိုင်းအတာဖြင့် စစ်ဆေးဖမ်းဆီး အရေးယူမှုများ အရှိန်မြှင့်ဆောင်ရွက်သွားမည်ဖြစ်ကြောင်း အလုပ်သမား ဝန်ကြီး Julapun Amorrivivat က မေ ၃ ရက်တွင် ထုတ်ဖော်ပြောကြားခဲ့သည်။
အလုပ်လုပ်ခွင့် လက်မှတ်မရှိဘဲ လုပ်ကိုင်နေသူများနှင့် သတ်မှတ်ထားသော အလုပ်အမျိုးအစားများကိုကျော်လွန်၍ တားမြစ်ထားသောလုပ်ငန်းများတွင် ဝင်ရောက်လုပ်ကိုင်နေသူများကို တင်းကျပ်စွာ စစ်ဆေးရှာဖွေ အရေးယူသွားမည်ဖြစ်ကြောင်းသိရသည်။
ထိုသို့စစ်ဆေးမှုများကို အရှိန်မြှင့်ဆောင်ရွက်မည်ဟု ကြေညာခြင်းမှာ မေ ၁ ရက်တွင် စူရတ်ဌာနီခရိုင်
ကော့ဖငန်းကျွန်းရှိ Arki Kidကလေးထိန်းကျောင်းအား အာဏာပိုင်များ ဝင်ရောက်စစ်ဆေး အရေးယူခဲ့ပြီးနောက်ဖြစ်သည်။
စစ်ဆေးမှုအတွင်း အဆိုပါကျောင်းတွင် အသက် (၂) နှစ်မှ (၁၂)နှစ်အရွယ် နိုင်ငံခြားသားကလေးငယ်၈၉ ဦးနှင့်အတူ မြန်မာလုပ်သား ၄၀ပါဝင်သည့် နိုင်ငံခြားသားလုပ်သားစုစုပေါင်း ၆၂ ဦးကို တွေ့ရှိခဲ့သည်။သို့ရာတွင် အစိုးရထံ တရားဝင်မှတ်ပုံတင်ထားမှုအရ ယင်းကျောင်းသည် အသက် (၂) နှစ်မှ (၅) နှစ်အရွယ် ကလေး ၁၈ ဦး ကိုသာ လက်ခံသင်ကြားခွင့်ရှိကြောင်း သိရသည်။
သတ်မှတ်အရေအတွက်ထက်ကျော်လွန်၍ လက်ခံသင်ကြားခြင်း၊ခွင့်ပြုချက်မရှိဘဲ ကျောင်းဖွင့်လှစ်ခြင်းနှင့် နိုင်ငံခြားသားများကို တရားမဝင်အလုပ်ခန့်ထားခြင်းတို့ကြောင့် ကျောင်းတာဝန်ခံ ထိုင်းအမျိုးသမီးနှင့် အီရန်နိုင်ငံသားတစ်ဦးကို အရေးယူထားကြောင်း သိရသည်။
ထို့ပြင် နိုင်ငံခြားသား ခုနစ်ဦးကိုလည်း အလုပ်လုပ်ခွင့်လက်မှတ်မရှိဘဲ လုပ်ကိုင်မှုနှင့် အလုပ်ရှင် ပြောင်းလဲမှုကို မတိုင်ကြားမှုဖြင့် အရေးယူထားပြီး မြန်မာ လုပ်သား ၄၀ အပေါ် အရေးယူဆောင်
ရွက်မှု ရှိ၊ မရှိကိုမူ တရားဝင်ထုတ်ပြန်ချက်များ၌ ဖော်ပြထားခြင်းမရှိကြောင်း သိရသည်။
ထိုင်းနိုင်ငံ ဥပဒေအရ နိုင်ငံခြားသားများသည် အလုပ်လုပ်ခွင့်လက်မှတ်မရှိဘဲ အလုပ်လုပ်ကိုင်ခွင့်
မရှိသလို ဈေးရောင်း၊ အနှိပ်လုပ်ငန်း၊ဆံပင်အလှပြင်၊ သယ်ယူပို့ဆောင်ရေး၊ဧည့်လမ်းညွှန် စသည့် တားမြစ်ထားသောအလုပ်များတွင်လည်း ဝင်ရောက်လုပ်ကိုင်ခွင့်မရှိကြောင်း သိရသည်။
တရားမဝင် အလုပ်လုပ်ကိုင်နေသည်ကို စစ်ဆေးတွေ့ရှိပါကဒဏ်ငွေ ဘတ် ၅၀၀၀ မှ ၅၀၀၀၀အထိ ချမှတ်ခံရခြင်း၊ မိမိနိုင်ငံသို့ပြန်လည်ပို့ဆောင်ခံရခြင်းနှင့် ထိုင်းနိုင်ငံတွင် အလုပ်လုပ်ခွင့် နှစ်နှစ်အထိ
ပိတ်ပင်ခံရနိုင်သည်။
ထို့ပြင် တရားမဝင် လုပ်သားများကို အလုပ် ခန့်ထားသော အလုပ်ရှင်များသည် လည်း ဘတ် ၁၀၀၀၀ မှ၁၀၀၀၀၀ အထိ ဒဏ်ငွေချမှတ်ခံရနိုင်ကြောင်း သိရသည်။
အလုပ်သမားဝန်ကြီးဌာနကတရားမဝင် အလုပ်လုပ်ကိုင်နေသူများကို သံသယရှိပါက တိုင်ကြားနိုင်
ရန်နှင့် ဆက်သွယ်ရန် ဖုန်းနံပါတ်များကိုလည်း ထုတ်ပြန်ထားကြောင်း သိရသည်။
သတင်း-ဆုလဲ့
ဓာတ်ပုံ-ထိုင်းရဲတပ်ဖွဲ့(ထိုင်တွင်ဖမ်းဆီခံရသည့်တရားမဝင်လုပ်သားအချို့)
#ယနေ့ထုတ်သတင်းစာ_ပြည်တွင်းသတင်း

◾️အီရန် ရေယာဉ်ငယ် ခြောက်စင်းကို ဟော်မုဇ်ရေလက်ကြား၌ အမေရိကန် တိုက်ခိုက်ဖျက်ဆီး
ဟော်မုဇ် ရေလက်ကြားဒေသ၌အရပ်ဘက်သင်္ဘောများအား ပစ်မှတ်ထား တိုက်ခိုက်ရန် ကြိုးပမ်းနေသောအီရန် ရေယာဉ်ငယ် ခြောက်စင်းကိုမေ ၄ ရက်တွင် တိုက်ခိုက်ဖျက်ဆီးခဲ့ကြောင်း အမေရိကန်စစ်ဘက်မှ သတင်းထုတ်ပြန်ထားသည်။
ဟော်မုဇ်ရေလက်ကြားကို ပြန်လည်ဖွင့်လှစ်ရေးအတွက် ကြိုးပမ်းနေချိန်တွင် အမေရိကန် ရေတပ်က အီရန်ရေယာဉ်ငယ်များကို ဟော်မုဇ်ရေလက်ကြား၌ တိုက်ခိုက်ဖျက်ဆီးခဲ့ခြင်းဖြစ်သည်။
မေ ၄ ရက်တွင် အမေရိကန်ရေတပ်၏ လုံခြုံရေးရယူပေးမှုဖြင့် အမေရိကန်မှတ်ပုံတင် သင်္ဘောနှစ်စင်း ဟော်မုဇ်ရေလက်ကြားကို ဘေးကင်းစွာဖြတ်သန်းနိုင်ခဲ့ကြောင်းအမေရိကန်စစ်ဘက်သတင်းထုတ်ပြန်ချက်၌ ဖော်ပြထားသည်။
တစ်ချိန်တည်းမှာပင် အမေရိကန်ပြည်ထောင်စု၏ အဓိက ဒေသတွင်း မဟာမိတ်ဖြစ်သောအာရပ် စော်ဘွားများပြည်ထောင်စု (ယူအေအီး)နိုင်ငံကို အီရန်နိုင်ငံက မောင်းသူမဲ့လေယာဉ်များ၊ ဒုံးကျည်များဖြင့် ပစ်ခတ်တိုက်ခိုက်ခဲ့ကြောင်းသိရသည်။
သုံးလတာ ကာလ အတွင်း ဝင်ရောက်လာပြီဖြစ်သော အီရန်စစ်ပွဲကို အပစ်အခတ်ရပ်စဲရေး သဘော တူညီချက်ဖြင့်ရပ်ဆိုင်းထားခဲ့ပြီးနောက်ပိုင်း ပထမဆုံးအကြိမ်အဖြစ် အီရန်နိုင်ငံက မေ ၄ ရက်တွင် ယူအေအီးနိုင်ငံကို တိုက်ခိုက်ခဲ့ခြင်းဖြစ်သည်။
ပရောဂျက်ဖရီးဒမ်းအမည်ရှိ စစ်ဆင်ရေးဖြင့် ပင်လယ်ကွေ့ရေပြင်များအတွင်း ပိတ်မိနေသော သင်္ဘော များကို ကယ်ထုတ်မည်ဖြစ်ကြောင်း အမေရိကန်သမ္မတ ဒေါ်နယ်ထရန့် က မေ ၃ ရက်တွင် ကြေညာထားသည်။
အလားတူ ပိတ်မိနေသည့် သင်္ဘောများအား ဟော်မုဇ်ရေလက်ကြားကိုဖြတ်၍ ခေါ်ထုတ်မှု စစ်ဆင်ရေးကို ဟန့်တားနှောင့်ယှက်ပါက စစ်ရေးအရ ဖြေရှင်းမည်ဖြစ်ကြောင်း အမေရိကန်သမ္မတ ဒေါ်နယ်ထရန့်က အီရန်ကို သတိပေးထားသည်။
ပိတ်မိနေသည့် သင်္ဘောများအား ဟော်မုဇ်ရေလက်ကြားကိုဖြတ်၍ ခေါ်ထုတ်ရေးလုပ်ငန်းစဉ်၌ အမေရိကန်စစ်ဘက်က တပ်ဖွဲ့ဝင် အင်အား ၁၅၀၀၀၊ မြေပြင်၊ ရေပြင် အခြေစိုက် လေယာဉ်စင်းရေ ၁၀၀ ကျော်အပြင် စစ်သင်္ဘောများ၊မောင်းသူမဲ့လေယာဉ်များ ပါဝင်လျက်ရှိသည်။
ယခုနှစ် ဖေဖော်ဝါရီ ၂၈ ရက်တွင် အမေရိကန်ပြည်ထောင်စုနှင့် အစ္စရေးတို့က စစ်ရေးအရ စတင် တိုက်ခိုက်ခဲ့ပြီးနောက် အီရန်နိုင်ငံက မဟာဗျူဟာမြောက် ဟော်မုဇ်ရေလက်ကြား ရေလမ်းကြောင်းများကို ပိတ်ဆို့ခဲ့ရာ ကမ္ဘာ့စွမ်းအင်ဈေးကွက်၌ စွမ်းအင်ဖြည့်ဆည်းမှု ကွင်းဆက် ပြတ်တောက်ခဲ့ရပြီး စွမ်းအင် ဈေးနှုန်းများ မြင့်တက်လာခဲ့သည်။
သတင်း-ဗျည်းနွဲ့
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

#ယနေ့ထုတ်သတင်းစာ_ကာတွန်း

◾️UFC ချန်ပီယံ Joshua Van ၏ ပထမဆုံးခါးပတ်ကာကွယ်ပွဲ မေ ၉ ရက်တွင် ကျင်းပမည်
UFC 328 ပြိုင်ပွဲတွင် မြန်မာနိုင်ငံဖွား UFC Flyweight ချန်ပီယံJoshua Van သည် ၎င်း၏ ချန်ပီယံခါးပတ်ကို ပထမဆုံးအကြိမ် ကာကွယ်ရမည့် ပွဲစဉ်အဖြစ် ဂျပန်ဖိုက်တာ Tatsuro Taira နှင့် မေ ၉ ရက်တွင်အမေရိကန်နိုင်ငံ Prudential Center ၌ ထိုးသတ်မည်ဖြစ်သည်။
အဆိုပါ UFC 328 ပြိုင်ပွဲ၏ Co-Main Event ပွဲစဉ်သည် UFC သမိုင်းတစ်လျောက် ပထမဦးဆုံးအကြိမ် အာရှသား ဖိုက်တာနှစ်ဦးယှဉ်ပြိုင်သည့် ပွဲစဉ်တစ်ခုဖြစ်သည်။
ချန်ပီယံ Van သည် ၂၀၂၅ခုနှစ်ဒီဇင်ဘာတွင် ဘရာဇီးနိုင်ငံသားချန်ပီယံဟောင်း Alexandre Pantoja ကိုအနိုင်ယူကာ UFC ချန်ပီယံခါးပတ်ကိုသိမ်းပိုက်နိုင်ခဲ့သူဖြစ်ပြီးလက်ရှိတွင် MMA ပွဲစဉ်မှတ်တမ်းအရ (၁၂နိုင်၁ပွဲရှုံး)ရရှိထားသူဖြစ်သည်။
ယင်း ခါးပတ်ကာကွယ်ပွဲတွင် Van သည် ဂျပန်နိုင်ငံသား Tatsuro Tairaနှင့် ယဉ်ပြိုင်သွားမည်ဖြစ်ပြီးTaira သည် လက်ရှိအချိန်ထိ ၁၆ပွဲနိုင်ရှုံးပွဲမရှိ ဖိုက်တာတစ်ဦးဖြစ်ကြောင်းသိရသည်။
ထိုပွဲကို ကမ္ဘာတစ်ဝန်း MMA ပရိသတ်များက စိတ်ဝင်စားစွာ စောင့်ကြည့်နေကြပြီး Van အနေဖြင့် ချန်ပီယံခါးပတ်ကို ဆက်လက်ထိန်းသိမ်းနိုင်မည်လားဆိုသည်မှာ အထူးစိတ်ဝင်စားဖွယ်ဖြစ်နေကြောင်း သိရသည်။
သတင်း-ဝတ်ရည်
ဓာတ်ပုံ-UFC
#ယနေ့ထုတ်သတင်းစာ_ပြည်တွင်းသတင်း