ကျူးဘားကို စစ်ရေးအရ မတိုက်ရန်သမ္မတ ဒီအက်ဇ်ကာနယ် သတိပေး
ကျူးဘားနိုင်ငံကို အမေရိကန်ပြည်ထောင်စုက စစ်ရေးအရ တိုက်ခိုက်မှုများ ပြုလုပ်လာခဲ့ပါက ဒေသတည်ငြိမ်ရေးနှင့် ငြိမ်းချမ်းရေးတို့အတွက် ခန့်မှန်းတွက်ချက်၍ မရနိုင်သော အကျိုးဆက် များ ပေါ်ထွက်လာနိုင်ကြောင်း ကျူးဘားသမ္မတ မီဂွဲလ်ဒီအက်ဇ်ကာနယ်က မေ ၁၈ ရက်တွင် သတိပေးလိုက်သည်။
ကျူးဘားနိုင်ငံအနေဖြင့် စစ်သုံးမောင်းသူမဲ့လေယာဉ် အစင်း ၃၀၀ ကျော်ဝယ်ယူထားပြီး ယင်းလေယာဉ်များဖြင့် ဂွာတာနာမိုပင်လယ်အော်ရှိ အမေရိကန်ရေတပ်စခန်းနှင့် စစ်သင်္ဘောများကို တိုက်ခိုက်ရေးအတွက် အကြံအစည်ရှိကြောင်း အမေရိကန်မီဒီယာများက သတင်းများ ထုတ်ပြန်ခဲ့ပြီးနောက် ကျူးဘားသမ္မတ၏ အထက်ပါသတိပေး ချက်ပေါ်ထွက် လာ ခြင်းဖြစ်သည်။
အမေရိကန်ပြည်ထောင်စုအနေဖြင့် အထက်ပါသတင်းများဖြင့် ကျူးဘားနိုင်ငံကို စစ်ရေးအရ ကြားဝင်စွက်ဖက်ရန် အကြောင်းရှာနေကြောင်း ကျူးဘားသမ္မတ ဒီအက်ဇ်ကာနယ်က ဝေဖန်ထားသည်။
ကျူးဘားခေါင်းဆောင်ဟောင်း ရောလ်ကက်စထရိုကို တရားစွဲဆိုရန်စီစဉ်ထားကြောင်း အမေရိကန်တာဝန်ရှိသူများက ပြောကြားခဲ့ပြီးနောက် ပြီးခဲ့သည့် ရက်ပိုင်းအတွင်း ကျူးဘားနှင့် အမေရိကန် နှစ်နိုင်ငံဆက်ဆံရေး ပိုမိုတင်းမာလာခဲ့ရသည်။
၁၉၉၆ ခုနှစ်အတွင်း လူသားချင်းစာနာထောက်ထားမှု အကူအညီများ သယ်ဆောင်လာသော လေယာဉ်နှစ်စင်းအား ကျူးဘားလေတပ်ကပစ်ချမှု ဖြင့် ရောလ်ကက်စထရိုကို တရားစွဲဆိုရန် အမေရိကန်အစိုးရက စီစဉ်ထားခြင်းဖြစ်သည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

ဒဗလျူအိတ်ခ်ျအို ညီလာခံအတွက် တရုတ်(တိုင်ပေ)အား ဖိတ်ကြားရေးအဆိုပြုချက် ပယ်ချခံရ
ဆွစ်ဇာလန်နိုင်ငံ ဂျီနီဗာမြို့၌ ကျင်းပနေသော ကမ္ဘာ့ကျန်းမာရေးအဖွဲ့ (ဒဗလျူအိတ်ခ်ျအို) နှစ်စဉ်ညီလာခံအတွက် တရုတ်(တိုင်ပေ)အားဖိတ်ကြားရေး အဆိုပြုချက်ကို ဒဗလျူအိတ်ခ်ျအို အဖွဲ့ဝင်နိုင်ငံများက ပယ်ချခဲ့ကြကြောင်း မေ ၁၈ရက် သတင်းများတွင် ရေးသားတင် ပြထားသည်။
ဒဗလျူအိတ်ခ်ျအို နှစ်စဉ်ညီလာခံ၌ တရုတ်(တိုင်ပေ) ပါဝင်တက်ရောက်မှုကို လက်ခံမည် မဟုတ်ကြောင်း တရုတ်နိုင်ငံက ပြောကြားခဲ့ပြီးနောက် ဒဗလျူအိတ်ခ်ျအိုအဖွဲ့ဝင်နိုင်ငံများက တရုတ်(တိုင်ပေ)အား ဖိတ်ကြားရေးအဆိုပြုချက်ကို ပယ်ချခဲ့ကြရခြင်းဖြစ်သည်။
ဒဗလျူအိတ်ခ်ျအိုညီလာခံမှ တရုတ်(တိုင်ပေ)ကို ဖယ်ထုတ်ထားမှုကြောင့် တစ်ကမ္ဘာလုံးဆိုင်ရာ ရောဂါထောက်လှမ်းရေးနှင့် သတင်းအချက်အလက်မျှဝေရေးလုပ်ငန်းစဉ်များ အားနည်းထိခိုက် သွားနိုင်ကြောင်း အဆိုပြုချက်ကိုထောက်ခံသည့်နိုင်ငံများက ထောက်ပြထားသည်။
တရုတ်(တိုင်ပေ)ကဲ့သို့ စွမ်းဆောင်ရည်မြင့်မားပြီး တာဝန်သိသော မိတ်ဖက်များကို ဒဗလျူ အိတ်ခ်ျအိုညီလာခံမှ ဖယ်ထုတ်ထားခြင်းကြောင့် နိုင်ငံတကာ ကျန်းမာရေးစီမံခန့်ခွဲမှုလုပ်ငန်း စဉ်၌ ဟာကွက်များရှိလာကြောင်း အဆိုပြုချက်ထောက်ခံသည့်နိုင်ငံများက ပြောကြား ထားသည်။
တရုတ်(တိုင်ပေ)ကို ပြည်မကြီး၏ အချုပ်အခြာပိုင်နယ်မြေအဖြစ် မှတ်ယူထားသော တရုတ် နိုင်ငံသည် နိုင်ငံတကာ အဖွဲ့အစည်းများ၌ တရုတ်(တိုင်ပေ)ပါဝင်ခွင့်ကို ဆန့်ကျင်ထားသည်။
တရုတ်(တိုင်ပေ)သည် သမ္မတဟောင်းမာရင်ရွှေလက်ထက် ၂၀၀၉ ခုနှစ်နှင့် ၂၀၁၆ ခုနှစ်အကြားတွင် ဒဗလျူအိတ်ခ်ျအိုညီလာခံများ၌ လေ့လာသူအဖြစ် ပါဝင်တက်ရောက်ခဲ့သည်။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

မြဝတီရှိကားဂိတ်များ စိမ်းလဲ့မြိုင်ကားဝင်းသို့ရွှေ့ပြောင်းရန် မြို့နယ်စည်ပင်ညွှန်ကြား
ကရင်ပြည်နယ်၊ မြဝတီမြို့တွင်းရှိကားဂိတ်များအားလုံး စိမ်းလဲ့မြိုင်ကားဝင်းအတွင်း ပြန်လည်ပြောင်းရွှေ့ဖွင့်လှစ်ရန် ယင်းမြို့နယ်စည်ပင်သာယာရေးကော်မတီကညွှန်ကြားထားကြောင်း ခရီးသည်တင်ယာဉ်မောင်းများထံမှသိရသည်။
မြဝတီမြို့တွင်း၌ပြေးဆွဲနေသည့် အဝေးပြေးခရီးသည်တင်မော်တော်ယာဉ်ကြီးများအပါဝင် ခရီးသည်တင်ကားလတ်၊ ကားသေဂိတ်များအားလုံး လာမည့်ဇွန် ၁ ရက်နောက်ဆုံးထားကာ စိမ်းလဲ့မြိုင်အဝေးပြေးကားဝင်းအတွင်းသို့ အပြီးပြောင်းရွှေ့ရမည်ဟု မြဝတီမြို့နယ်စည်ပင်သာယာရေး ဒုတိယညွှန်ကြားရေးမှူးက ယခုမေလ ၁၈ ရက်တွင် ကားဂိတ်တာဝန်ရှိသူများအားလုံးကိုတွေ့ဆုံပြောဆိုခဲ့ကြောင်းသိရသည်။
"အရင်တုန်းကကားတွေအားလုံး စိမ်းလဲ့မြိုင်ကားဝင်းအတွင်းမှာပဲ ဂိတ်ထိုးကြတာ။ ပြီးခဲ့တဲ့နှစ်ကစပြီး တိုက်ပွဲတွေဖြစ်ပွားခဲ့တဲ့အတွက် ကားတွေကစိမ်းလဲ့မြိုင်ကားဝင်းထဲကိုမသွားတော့ဘဲ မြဝတီမြို့ထဲမှာပဲ အဆင်ပြေတဲ့နေရာတွေမှာဂိတ်တွေဖွင့်နေကြတာ။ မြို့ထဲမှာယာဉ်ကြောကြပ်တာတွေ၊ လမ်းပိတ်တာတွေမဖြစ်အောင် ကားဂိတ်တွေအားလုံးကိုအရင်နေရာဖြစ်တဲ့စိမ်းလဲ့မြိုင်ကားဝင်း အတွင်းပြန်ပို့တာပါ" ဟု မြဝတီမြို့မှခရီးသည်တင်ယာဉ်မောင်းတစ်ဦးကပြော သည်။
ထိုကဲ့သို့ပြောင်းရွှေ့ရန် ကြိုတင်စာထုတ်အသိပေးထားပြီးဖြစ်ပြီး သတ်မှတ်ထားသောရက်အတွင်း ပြောင်းရွှေ့ခြင်းမပြုပါက ပို့ဆောင်ဆက်သွယ်ရေးဥပဒေအရအရေးယူသွားမည်ဟု မြဝတီမြို့နယ်စည်ပင်သာယာရေးအဖွဲ့၏ထုတ်ပြန်ချက်တွင်ဖော်ပြထားသည်။
သတင်း - ပိုင်လေး
ဓာတ်ပုံ - စိမ်းလဲ့မြိုင်ကားဝင်း/FB
#ပြည်တွင်းသတင်း

AI ကြောင့် Meta မှ ဝန်ထမ်း ၈၀၀၀ အလုပ်ပြုတ်
ကမ္ဘာတစ်ဝန်းမှ လုပ်သားအင်အား ၁၀ ရာခိုင်နှုန်း သို့မဟုတ် ဝန်ထမ်း ၈၀၀၀ ခန့်ကို ယ‌နေ့ (မေ ၂၀ ရက်) မှစ၍ လျှော့ချသွားမည်ဖြစ်ကြောင်း လူမှုမီဒီယာလုပ်ငန်း ဖေ့စ်ဘွတ်၏ မိခင်ကုမ္ပဏီ Meta က ပြောသည်။
ယင်းမှာ တစ်စိတ်တစ်ပိုင်းအားဖြင့် ဉာဏ်ရည်တုနည်းပညာ( AI ) ကြောင့် နည်းပညာလုပ်ငန်းတွင် နောက်ဆုံးထွက်ပေါ်လာသည့် အလုပ်အနားပေးမှုများ ဖြစ်သည်။
၎င်းတို့ကုမ္ပဏီ က ခေါ်ယူရန်လျာထားသည့် အလုပ်နေရာ ၆၀၀၀ ကိုလည်း ခေါ်ယူတော့မည်မဟုတ်ကြောင်း ကုမ္ပဏီဝန်ထမ်းများထံ ဖြန့်ဝေခဲ့သော စာတစ်စောင်တွင် Meta ၏ အမှုဆောင်အရာရှိချုပ် ဂျာနဲလ်ဂေးလ်က ပြောကြားခဲ့သည်။
ကုမ္ပဏီအား ပိုမို၍ ထိရောက်စွာလည်ပတ်နိုင်ရေး နှင့် ၎င်းတို့ လုပ်‌ဆောင်နေသော အခြားရင်းနှီးမြုပ်နှံမှုများကို ကာမိစေရန် ဝန်ထမ်းလျှော့ချမှုလုပ်ခြင်းဖြစ်ကြောင်း မစ္စဂေးလ်က ပြောသည်။
Meta က မန်နေဂျာရာထူးများကို လျှော့ချသွားမည်ဖြစ်ကာ လုပ်သားအင်အား ၇၀၀၀ ကို အေအိုင်နှင့်ဆက်စပ်သော လုပ်ငန်းနေရာသစ်များသို့ ပြောင်းရွှေ့သွားမည်ဟုလည်း ဂေးလ်က ပြောသည်။
စုစုပေါင်းဆိုလျှင် ထုတ်ပယ်မှုများနှင့် ရွှေ့ပြောင်းမှုများ သည်ကမ္ဘာတစ်ဝန်းတွင် ဝန်ထမ်းအင်အား ၇၇၉၈၆ ဦးရှိသော Meta ၏ ဝန်ထမ်း ၂၀ ရာခိုင်နှုန်းခန့်အပေါ် သက်‌ ရောက်မည်ဖြစ်ကြောင်း သိရကာ ယင်းမှာ ယခုနှစ်အတွင်း အမေရိကန် ကုမ္ပဏီကြီးများ အထူးသဖြင့် နည်းပညာလုပ်ငန်းများကြား အေအိုင်နှင့်ဆက်စပ်သော အလုပ်နေရာလျှော့ချမှုများကို ထင်ဟပ်နေသည်။
အမေရိကန်နိုင်ငံတွင် ရှိသော ဝန်ထမ်းများကိုလည်း ယနေ့ ဗုဒ္ဒဟူးနေ့တွင် ရုံးသို့မလာဘဲ နေအိမ်မှပင် အလုပ်လုပ်ကြရန် ပြောကြားထားသည်။
Meta နှင့် အခြားနည်းပညာကုမ္ပဏီကြီးများသည် ဉာဏ်ရည်တုနည်းပညာတွင် အကြီးအကျယ် ရင်းနှီး မြုပ်နှံနေကြပြီး ၂၀၂၅ ခုနှစ်တွင် Meta က ငွေပင်ငွေရင်းသုံးစွဲမှုများ အဖြစ် ဒေါ်လာ ၇၂ ဒသမ ၂ ဘီလီယံ သုံးစွဲခဲ့ကာ အဓိကအားဖြင့် ဒေတာစင်တာများနှင့် AI အခြေခံအ‌ဆောက်အအုံများအတွက် သုံးစွဲခဲ့ခြင်း ဖြစ်သည်။
ထိုသုံးစွဲမှုသည် ၂၀၂၆ ခုနှစ်တွင် ၁၁၅ ဘီလီယံအထိ ရောက်ရှိနိုင်ကြောင်း ဇန်နဝါရီလ ဝင်ငွေအစီရင်ခံစာ ထုတ်ပြန်ချိန်တွင် ပြောကြားခဲ့သည်။
သတင်း-ရဲမင်း
ကိုးကား-CNN
#နိုင်ငံတကာသတင်း

ဆော်ဒီသို့ တပ်ဖွဲ့ဝင် ၈၀၀၀နှင့် တိုက်လေယာဉ်အုပ်တစ်အုပ် ပါကစ္စတန် ဖြန့်ကြက်
နှစ်နိုင်ငံ အပြန်အလှန်ကာကွယ်ရေးစာချုပ်အရ ပါကစ္စတန်နိုင်ငံက ဆော်ဒီအာရေဗျနိုင်ငံသို့ တပ် ဖွဲ့ဝင် ၈၀၀၀၊ တိုက်လေယာဉ် အုပ်တစ်အုပ်နှင့် လေကြောင်းရန်ကာကွယ်ရေး စနစ်တစ်ခုတို့ ဖြန့်ကြက်ထားကြောင်း မေ ၁၈ ရက်သတင်းများတွင် ရေးသားတင်ပြထားသည်။
ပါကစ္စတန်နိုင်ငံသည် အီရန်စစ်ပွဲ ပြီးဆုံးရေးအတွက် ကြားခံလူအဖြစ် ပါဝင်ကူညီနေသော်လည်း နှစ်နိုင်ငံ အပြန်အလှန်ကာကွယ်ရေးသဘောတူညီချက်အရ ဆော်ဒီအာရေဗျနိုင်ငံနှင့် စစ်ရေး ပူးပေါင်းဆောင်ရွက်မှုများလည်း မြှင့်တင်လျက်ရှိသည်။
ယခုနှစ် ဖေဖော်ဝါရီ ၂၈ ရက်တွင် စတင်ဖြစ်ပွားခဲ့သော အီရန်စစ်ပွဲကြောင့် အရှေ့အလယ်ပိုင်း ဒေသတစ်ခွင်လုံး၌ စစ်ရေးတင်းမာမှုများအားကောင်းနေချိန်တွင် ပါကစ္စတန်နိုင်ငံက ဆော်ဒီအာရေဗျနိုင်ငံသို့လက်နက်ကိုင်တပ်များ စေလွှတ်ဖြန့် ကြက်ထားခြင်းဖြစ်သည်။
သတင်းအရင်းအမြစ်များ၏အဆိုအရ ပါကစ္စတန်နိုင်ငံသည်ဆော်ဒီအာရေဗျနိုင်ငံသို့ တပ်ဖွဲ့ဝင် ၈၀၀၀၊ ဂျေအက်ဖ်-၁၇ အမျိုးအစားတိုက်လေယာဉ်အများစု ပါဝင်သောလေယာဉ် ၁၆ စင်းပါ တိုက်လေယာဉ်အုပ်တစ်အုပ်နှင့် အိတ်ခ်ျကျူ-၉ အမျိုးအစား လေကြောင်းရန် ကာကွယ်ရေး စနစ်တစ်ခုကို ဖြန့်ကြက်ထားကြောင်းသိရသည်။
ပါကစ္စတန်နှင့် ဆော်ဒီအာရေဗျနိုင်ငံတို့သည် နှစ်နိုင်ငံ အပြန်အလှန် ကာကွယ်ရေး စာချုပ် တစ်ရပ်ကို ပြီးခဲ့သည့်နှစ်အတွင်း လက်မှတ်ရေးထိုးခဲ့ကြသော်လည်း စာချုပ်ပါ ပြဋ္ဌာန်းချက် များနှင့် ပတ်သက်၍ အသေးစိတ်အချက်အလက်များကို ကြေညာခြင်းမရှိခဲ့ပေ။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

ဟင်္သာတရှိ ဗိုလ်မောင်စိန်တိုက်တန်းမီးလောင်၊ အခန်း ၁၂ ခန်းပါအဆောက်အဦပျက်စီးဆုံးရှုံး
ဧရာဝတီတိုင်း၊ ဟင်္သာတမြို့နယ်၊ ပတ္တမြားရပ်ကွက်၊ ဗိုလ်အောင်ကျော်လမ်းရှိ ယမန်နေ့(မေ ၁၉ ရက်) ည ၁၁ နာရီခွဲတွင် ဗိုလ်မောင်စိန်တိုက်တန်းမီးလောင်မှုဖြစ်ပွားပြီး အခန်း ၁၂ ခန်းပါအဆောက်အဦပျက်စီးဆုံးရှုံးကြောင်း ဟင်္သာတခရိုင်ကွန်ရက်လူမှုကူညီရေးအသင်းထံမှသိရသည်။
မီးလောင်မှုကြောင့် သွပ်မိုး၊ အုတ်ကာ၊ ပျဉ်ခင်းအခန်း ၁၂ ခန်းပါ နှစ်ထပ်ဗိုလ်မောင်စိန်တိုက်တန်း အဆောက်အဦတစ်ခုလုံးမီလောင်ကျွမ်းခဲ့ကြောင်း၊ အချိန်နှစ်နာရီကျော်ကြာမီးငြှိမ်းသတ်ခဲ့ရပြီး ယနေ့(မေ ၂၀ ရက်) နံနက် ၂ နာရီခန့်တွင် မီးငြိမ်းကြောင်းသိရသည်။
“ဗိုလ်မောင်စိန်တိုက်တန်းက အန္တရာယ်ရှိအဆောက်အအုံအဖြစ်ကြေညာပြီးဖြစ်တဲ့ သက်တမ်းရှည် အဆောက်အဦဖြစ်ပါတယ်။ တိုက်တန်းမှာ အခန်း ၁၂ ခန်းရှိပါတယ်။ လက်ရှိလူနေတာနှစ်ခန်းပဲရှိတယ်။ ကျန်တဲ့အခန်းတွေကလူမနေဘူး” ဟုဟင်္သာတခရိုင်ကွန်ရက် လူမှုကူညီရေးအသင်းမှ တာဝန်ရှိသူတစ်ဦး ကပြောသည်။
မီးလောင်မှုဖြစ်ပွားရသည့်အကြောင်းရင်းကို သက်ဆိုင်ရာမြို့နယ်မီးသတ်တပ်ဖွဲ့က စုံစမ်းစစ်ဆေးလျက်ရှိကြောင်း သိရသည်။
သတင်း - ပိုင်လေး
ဓာတ်ပုံ - MFSD
#ပြည်တွင်းသတင်း

◾️တရုတ်သို့ မြန်မာ့ဒူးရင်းသီးတင်ပို့နိုင်ရေး GACC တွင် မှတ်ပုံတင်မည်
ကမ္ဘာ့ဒူးရင်းသီး ဝယ်လိုအားအမြင့်ဆုံးဈေးကွက်ဖြစ်သည့် တရုတ်နိုင်ငံသို့ မြန်မာ့ဒူးရင်းသီးများ တင်ပို့နိုင်ရေးအတွက် တရုတ်နိုင်ငံ၏အကောက်ခွန်အထွေထွေ အုပ်ချုပ်မှုအာဏာပိုင်အဖွဲ့ (GACC) တွင် မှတ်ပုံတင်နိုင်ရေး ဆောင်ရွက်သွားမည်ဖြစ်ကြောင်း စိုက်ပျိုးရေးဦးစီးဌာနမှ သိရသည်။
မြန်မာ-တရုတ် ချစ်ကြည်ရေးလမ်းကြောင်းများ ပေါ်ပေါက်လာမှုနှင့်အတူ တရုတ်ဒူးရင်းသီး ဈေးကွက်တွင် ဝေစုရရှိနိုင်ရန် ရည်မှန်း၍ ဆောင်ရွက်နေကြောင်း စိုက်ပျိုးရေးဦးစီးဌာန ညွှန်ကြားရေးမှူးချုပ်က မေ ၁၉ ရက်တွင် ကျင်းပသည့် ‘မြန်မာ့ဒူးရင်းသီးပွဲတော် ၂၀၂၆’ တွင် ပြောကြားခဲ့သည်။
လက်ရှိတွင် မြန်မာ့ဒူးရင်းသီးဈေးကွက်မှာ ပြည်တွင်းစားသုံးမှုအပေါ်အဓိကမှီခိုနေရသော်လည်း ၂၀၂၆-၂၀၂၇ ဘဏ္ဍာနှစ်အတွင်း ပြည်ပဈေးကွက်သို့အလုံးအရင်းဖြင့် တင်ပို့နိုင်ရန် ကြိုးပမ်းနေ ကြောင်းလည်း သိရသည်။
အာဆီယံဒေသတွင်း ဒူးရင်းသီးစိုက်ပျိုးထုတ်လုပ်မှုနှင့် တင်ပို့မှုတွင်ထိုင်းနိုင်ငံ၊ မလေးရှားနိုင်ငံနှင့် ဗီယက်နမ်နိုင်ငံတို့က ဈေးကွက်ကို ဦးဆောင်နေပြီးမြန်မာနိုင်ငံအနေဖြင့်လည်း စိုက်ပျိုးထုတ်လု ပ်မှုနှင့် ဈေးကွက်သစ်ဖော်ဆောင်ရေးများ တိုးမြှင့်ဆောင်ရွက်နေကြောင်း သိရသည်။
မြန်မာ့ဒူးရင်းသီးများကို မွန်ပြည်နယ်၊ ကရင်ပြည်နယ်နှင့် တနင်္သာရီတိုင်းဒေသကြီးတို့တွင် အဓိကစိုက်ပျိုးလျက်ရှိပြီး မေ၊ ဇွန်နှင့် ဇူလိုင်လများသည်ဒူးရင်းသီးအထွက်လှိုင်သည့် ကာလများဖြစ်ကြောင်း သိရသည်။
ယခုနှစ်တွင် ဒူးရင်းသီး တစ်ကီလိုလျှင် ကျပ် ၄၀၀၀၀ အထိ ဈေးဖွင့်ခဲ့ပြီးအလုံးကြီးများမှာ တစ်လုံးလျှင် ကျပ်နှစ်သိန်းကျော်အထိ ဈေးရရှိနိုင်ကြောင်းဈေးကွက်အတွင်းမှ သိရသည်။
သတင်း-သက်ပိုင်
ဓာတ်ပုံ-MOI
#ယနေ့ထုတ်သတင်းစာ_ပြည်တွင်းသတင်း

◾️အပြည်ပြည်ဆိုင်ရာ ခရီးသွားပြပွဲ ကျင်းပမည်
လာမည့်ခရီးသွားရာသီ၌ ပြည်ပနိုင်ငံများမှခရီးသွားများ မြန်မာ့အလှနှင့်ယဉ်ကျေးမှုဒေသများကို ပိုမိုသိရှိလည်ပတ်နိုင်စေရန်နှင့် မြန်မာ့ခရီးသွားလုပ်ငန်းပြန်လည်ဦးမော့လာစေရန် အပြည်ပြည် ဆိုင်ရာ ခရီးသွားပြပွဲကို ဇွန်လဒုတိယပတ်တွင် စည်ကားသိုက်မြိုက်စွာ ကျင်းပသွားမည် ဖြစ်ကြောင်းမြန်မာနိုင်ငံခရီးသွားလုပ်ငန်းရှင်များအသင်းမှ သိရသည်။
ကိုဗစ်ကာလနောက်ပိုင်း ပြည်ပခရီးသွားဝင်ရောက်မှု လျော့နည်းသွားမှုကို ပြန်လည်ဖော်ဆောင် ခြင်းဖြင့် မြန်မာနိုင်ငံ၏ ရှေးဟောင်းယဉ်ကျေးမှုအမွေအနှစ်များ၊ ရိုးရာဓလေ့များ၊ သဘာ၀အ လှများ၊ အပန်းဖြေကမ်းခြေများ၊ ရိုးရာအစားအစာများနှင့် ဆင်ယင်ထုံးဖွဲ့မှုများ၊ ဇီ၀မျိုးစုံ မျိုးကွဲများ၊ ရှားပါးတောရိုင်းတိရစ္ဆာန်များနှင့် ရှားပါးအပင်မျိုးစိတ်များကို လေ့လာကြည့်ရှု အပန်းဖြေနိုင်ရန်အပြည်ပြည်ဆိုင်ရာခရီးသွားပြပွဲကို စီစဉ်ကျင်းပခြင်းဖြစ်ကြောင်း သိရသည်။
အပြည်ပြည်ဆိုင်ရာခရီးသွား ပြပွဲတွင် တရုတ်၊ ရုရှား၊ အိန္ဒိယ၊ စပိန်၊ပြင်သစ်၊ အီဂျစ်၊ ဆလိုဗက်ကီးယား၊ ရိုမေးနီးယား၊ စင်ကာပူ၊ မလေးရှား၊ အင်ဒိုနီးရှား၊ကမ္ဘောဒီးယား၊ ထိုင်း၊ နီပေါ၊ ဗီယက်နမ်၊ ဘူတန်၊ ဖိလစ်ပိုင်နှင့် အခြားနိုင်ငံများမှခရီးသွားဆိုင်ရာကုမ္ပဏီများပါဝင်ပြီး မြန်မာနိုင်ငံ၏ ခရီးသွားမြှင့်တင်မှုကဏ္ဍတွင် ပုဂံ၊ နေပြည်တော်၊ ရန်ကုန်၊ မန္တလေး၊ အင်းလေး၊ ငွေဆောင်ကမ်းခြေနှင့်အခြားခရီးသွားဒေသတို့ကို အဓိကထားဖော်ဆောင်မည် ဖြစ်ကြောင်း သိရသည်။
ခရီးသွားပြပွဲတွင် ပြည်တွင်း^ပြည်ပခရီးသွားဒေသများ၊ ခရီးသွားဆိုင်ရာဆွေးနွေးပွဲများ၊ လေကြောင်းလိုင်းများ၊ ဟိုတယ်များ၊ ဘဏ်များနှင့် အာမခံများ၊ဆေးဝါးနှင့် ကျန်းမာရေးဆိုင်ရာများ၊ ပြည်တွင်း၊ ပြည်ပခရီးသွားလုပ်ငန်းဆိုင်ရာပြခန်းများနှင့် စွန့်ဦးတီထွင်ပြခန်းများကို ပြသသွားမည်ဖြစ်ပြီး ပြပွဲကို ဇွန် ၁၃ရက်နှင့် ၁၄ ရက်တို့တွင် ရန်ကုန်မြို့ Sedona Hotel ၌ကျင်းပသွားမည်ဖြစ်သည်။
သတင်း-မြင့်မိုရ်မျိုးမျိုးသူ
ဓာတ်ပုံ-MOI
#ယနေ့ထုတ်သတင်းစာ_ပြည်တွင်းသတင်း

◾️နိုင်ငံ ၉၀ ကျော်အား ရက်ပေါင်း ၆၀ ဗီဇာကင်းလွတ်ခွင့်အစီအစဉ် ပယ်ဖျက်ရန် ထိုင်းနိုင်ငံအစိုးရ အတည်ပြု
နိုင်ငံပေါင်း ၉၀ ကျော်မှ ခရီးသွားများအတွက် ရက်ပေါင်း ၆၀ ဗီဇာကင်းလွတ်ခွင့် အစီအစဉ်ကို ပယ်ဖျက်ရန် ထိုင်းနိုင်ငံအစိုးရက မေ ၁၉ ရက်တွင် အတည်ပြုလိုက်ကြောင်း သိရသည်။
ထိုင်းနိုင်ငံအစိုးရ၏ အဆိုပါ အတည်ပြုချက်အရ တစ်လသာ နေထိုင်ခွင့်ပြုခဲ့သည့် ယခင်သတ်မှတ်ချက်အတိုင်း ပြန်လည်ပြောင်းလဲလိုက်ခြင်းဖြစ်ကြောင်း ထိုင်းခရီးသွားလာ ရေးနှင့် အားကစားဝန်ကြီးဌာန ဝန်ကြီးဆူရာဆက်က မေ ၁၉ ရက်တွင် ပြောကြားလိုက်သည်ဟု The Thaiger သတင်းဌာနက ရေးသားဖော်ပြထားသည်။
နိုင်ငံပေါင်း ၉၀ ကျော်မှ ခရီးသွားများအတွက် ရက်ပေါင်း ၆၀ ဗီဇာကင်းလွတ်ခွင့်အစီအစဉ်ကို ပယ်ဖျက်ရန်ဆိုသည့် အချက်အောက်တွင် ဗီဇာအခွင့်အရေး အကြိမ်ကြိမ်ရယူခွင့်ပြုထားသည့် စီစဉ်ဆောင်ရွက်ချက်များကိုပါ ရုပ်သိမ်းရန်နှင့် ယခင်စည်းမျဉ်းဟောင်းများကို ပြန်လည် ကျင့်သုံးရန် အစိုးရအဖွဲ့ကသဘောတူညီခဲ့ကြခြင်းဖြစ်ကြောင်း ထိုင်းခရီးသွားလာရေးနှင့် အားကစား ဝန်ကြီးဌာန ဝန်ကြီးဆူရာဆက်က ပြောကြားခဲ့ခြင်းဖြစ်သည်။
သို့သော် ဗီဇာမူဝါဒကော်မတီအနေဖြင့် ယင်းနိုင်ငံ ၉၀ ထဲမှ နိုင်ငံတစ်နိုင်ငံချင်းစီအလိုက် ဗီဇာ စည်းမျဉ်းများကို ပြန်လည်သုံးသပ်သွားမည်ဖြစ်ပြီး လုံခြုံရေးနှင့် စီးပွားရေး ဆိုင်ရာ ထည့်သွင်းစဉ်းစားမှုများကို အခြေခံကာ မည်သည့်ဗီဇာအမျိုးအစားသည် နိုင်ငံအသီးသီး အတွက် သင့်လျော်မည်ဆိုသည်ကို ဆက်လက်ဆုံးဖြတ်သွားမည်ဖြစ်ကြောင်း ၎င်းက ထပ်မံပြောဆိုထားသည်။
သတင်း-စိန်သံ
ဓာတ်ပုံ-The Thaiger
#ယနေ့ထုတ်သတင်းစာ_နိုင်ငံတကာသတင်း

◾️ကွန်ဂိုအရှေ့ပိုင်း၌ အီဘိုလာဗိုင်းရပ်စ်ကြောင့် သေဆုံးသူ ၁၃၀ ကျော်
ကွန်ဂို ဒီမိုကရက်တစ် ပြည်သူ့သမ္မတနိုင်ငံ၌ ပြီးခဲ့သည့် ၂၄ နာရီအတွင်း အီဘိုလာဗိုင်းရပ်စ် ရောဂါဖြင့် လူပေါင်း ၂၆ ဦး ထပ်မံသေဆုံးခဲ့ရာ ယင်းဗိုင်းရပ်စ်ရောဂါကြောင့်သေဆုံးသူ စုစုပေါင်းမှာ၁၃၁ ဦးအထိ ရှိလာပြီဖြစ်ကြောင်း ကွန်ဂိုကျန်းမာရေးဝန်ကြီးဌာနက မေ ၁၉ ရက်တွင်သတင်းထုတ်ပြန်ထားသည်။
ယင်းအပြင် အီဘိုလာဗိုင်းရပ်စ် ကူးစက်ခံထားရသူများအဖြစ် အတည်ပြုထားနိုင်သည့် လူနာ အရေအတွက်မှာ ၃၃ ဦးရှိပြီး ဗိုင်းရပ်စ်ကူးစက်ခံထားရသူများအဖြစ် သံသယရှိသူ လူနာအရေအတွက်မှာလည်း ၅၄၃ ဦးအထိရှိနေကြောင်း ကွန်ဂိုကျန်းမာရေးဝန်ကြီးဌာန သတင်း ထုတ်ပြန်ချက်၌ ဖော်ပြထားသည်။
ကွန်ဂိုနိုင်ငံ၌ လက်ရှိပေါ်ပေါက်နေသော အီဘိုလာဗိုင်းရပ်စ်ကူးစက်မှုဘေးမှာသေဆုံးမှုနှုန်းနှင့် ကူးစက်မှု မြန်နှုန်းများအရအထူးစိုးရိမ်ရကြောင်း ကမ္ဘာ့ ကျန်းမာရေးအဖွဲ့(ဒဗလျူအိတ်ခ်ျအို) အကြီးအကဲ အက်ဒ်ဟာနွန်ဂျီဘရီယေးဆပ်က သတိပေးထားချိန်တွင်ကွန်ဂို၌ အီဘိုလာဗိုင်းရပ်စ် ကြောင့် သေဆုံးသူ၁၃၀ ကျော်အထိ ရှိလာခြင်းဖြစ်သည်။
ကွန်ဂိုနိုင်ငံ၌ ဖြစ်ပွားနေသော အီဘိုလာဗိုင်းရပ်စ်ရောဂါ ကူးစက်မှု ကပ်ဘေးအတွက် ဒဗလျူအိတ်ခ်ျအို အကြီးအကဲက မေ ၁၇ ရက်တွင် နိုင်ငံတကာပြည်သူ့ကျန်းမာရေးအရေး ပေါ်အခြေအနေကို ကြေညာထားသည်။
ဒဗလျူအိတ်ခ်ျအို အကြီးအကဲ ဂျီဘရီယေးဆပ်သည် အစဉ်အလာအရ အရေးပေါ် ကော်မတီ အစည်းအဝေး မခေါ်ယူမီမှာပင်ကွန်ဂိုအီဘိုလာ ဗိုင်းရပ်စ်ကပ်ဘေးကို နိုင်ငံတကာ ပြည်သူ့ ကျန်းမာရေး အရေးပေါ်အခြေအနေအဖြစ် ကြေညာခဲ့ခြင်းဖြစ်သည်။
နိုင်ငံတကာ ပြည်သူ့ကျန်းမာရေးအရေးပေါ်အခြေအနေ သတိပေးချက်သည် ဒဗလျူအိတ်ခ်ျအို ၏ ဆေးပညာစည်းမျဉ်းများအရ ဒုတိယအမြင့်ဆုံး ကျန်းမာရေးသတိပေးချက်ဖြစ်သည်။
လက်ရှိကူးစက်နေသော အီဘိုလာဗိုင်းရပ်စ်မှာ ကြညိငဘကါပသ အမျိုးအစား ရှားပါး အီဘိုလာဗိုင်းရပ်စ်ဖြစ်ပြီး ယင်းဗိုင်းရပ်စ်ရောဂါအတွက် သီးသန့် ကုထုံးနှင့် ကာကွယ်ဆေးများ မရှိသေးကြောင်း သိရသည်။
လက်ရှိ ရင်ဆိုင်နေရသော အီဘိုလာဗိုင်းရပ်စ်ကူးစက်မှုကပ်ဘေးမှာ ကွန်ဂိုနိုင်ငံအတွက် ၁၉၇၆ ခုနှစ် နောက်ပိုင်း ၁၇ ခုမြောက်အီဘိုလာဗိုင်းရပ်စ်ကူးစက်မှုဖြစ်သည်။
သတင်း-ဗျည်းနွဲ့
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

◾️ရုရှားတပ်ဖွဲ့ဝင် ၂၀၀ခန့်ကို တရုတ်စစ်ဘက်လျှို့ဝှက်လေ့ ကျင့်မှုများ ပြုလုပ်ပေးခဲ့ဟုဆို
တရုတ်လက်နက်ကိုင်တပ်ဖွဲ့များသည် ပြီးခဲ့သည့်နှစ်အတွင်း ရုရှားတပ်ဖွဲ့ဝင် ၂၀၀ ခန့်ကို လျှို့ဝှက်လေ့ကျင့်ပေးခဲ့ပြီး အဆိုပါရုရှားတပ်ဖွဲ့ဝင်များအနက်အချို့မှာ ယူကရိန်းစစ်မြေပြင်သို့ ပြန်လည်ရောက်ရှိနေပြီဖြစ်ကြောင်း ဥရောပထောက်လှမ်းရေးအဖွဲ့များ၏ အဆိုကို ကိုးကား၍ မေ ၁၉ ရက် သတင်းများတွင်ရေးသားတင်ပြထားသည်။
ဥရောပထောက်လှမ်းရေးအဖွဲ့များ၏ အဆိုအရ တရုတ်နိုင်ငံသည်အထက်ပါ ရုရှားတပ်ဖွဲ့ဝင် များကို မောင်းသူမဲ့လေယာဉ်များ အသုံးချမှုနှင့် ပတ်သက်၍ အဓိကလေ့ကျင့်ပေးခဲ့ကြောင်း သိရသည်။
၂၀၂၅ ခုနှစ် ဇူလိုင် ၂ ရက်တွင် ရုရှားနှင့်တရုတ် တာဝန်ရှိသူများအကြားရယူခဲ့သည့် သဘောတူ ညီချက်အရ တရုတ်နိုင်ငံက ရုရှားတပ်ဖွဲ့ဝင်များအားလေ့ကျင့်ပေးခဲ့ခြင်းဖြစ်ကြောင်း ဥရောပ ထောက်လှမ်းရေးအဖွဲ့အစည်းများကသတင်းထုတ်ပြန်ထားသည်။
တရုတ်နိုင်ငံသည် အထက်ပါသဘောတူညီချက်အရ ရုရှားတပ်ဖွဲ့ဝင်၂၀၀ ခန့်ကို ပေကျင်း မြို့တော်နှင့် နန်ကျင်းမြို့အပါအဝင် တရုတ်မြို့ကြီးများတွင်ရှိသော စစ်စခန်းများ၌ လေ့ကျင့်ပေးခဲ့ခြင်းဖြစ်ကြောင်း ဥရောပထောက်လှမ်းရေးအဖွဲ့အစည်းများက ပြောကြားထားသည်။
အထက်ပါသတင်းနှင့် ပတ်သက်၍ တရုတ်နှင့်ရုရှား ကာကွယ်ရေးဝန်ကြီးဌာနများက တစ်စုံတစ်ရာ တုံ့ပြန်မှုမရှိသေးပေ။
ကိုးကား-ရိုက်တာ
#ယနေ့ထုတ်သတင်းစာ_နိုင်ငံတကာသတင်း

မွေ့ရာပေါ်တွင် Power Bank ဖြင့် မီးလုံးအားသွင်းထားရာမှ မီးလောင်မှုဖြစ်ပွား
မန္တလေးတိုင်းဒေသကြီး ပြင်ဦးလွင်ခရိုင် ပြင်ဦးလွင်မြို့နယ် သပြေရေကျေးရွာတွင် Power Bank ဖြင့် LED မီးလုံး အားသွင်းထားရာမှ အပူလွန်ကဲ၍ မီးလောင်မှုဖြစ်ပွားခဲ့ကြောင်း သိရသည်။
မေ ၂၀ ရက် ညနေ ၄ နာရီ ၈ မိနစ်ခန့်တွင် ပြင်ဦးလွင်မြို့နယ် သပြေရေကျေးရွာတွင် အိမ်ပိုင်ရှင်ဦး...(၄၅) နှစ်၏ နေအိမ် (၄၅ x ၂၅)ပေ နှစ်ထပ်ခွဲ အဆောက်အအုံဒုတိယထပ်၊ ပေ ၂၀၁၀ အခန်းအတွင်း ရှိပြတင်းပေါက်အနီး နေပူထဲမွေ့ရာပေါ်တွင် ၃၀၀၀၀ mah Power Bank ဖြင့် LED မီးလုံးအားသွင်းထားရာမှ Power Bankအပူရှိန်လွန်ကဲ၍ပေါက်ကွဲပြီး မီးလောင်ကျွမ်းမှုဖြစ်ပွား ခဲ့ကြောင်း သိရသည်။
အဆိုပါဖြစ်စဉ်အား သတင်းရရချင်း ပြင်ဦးလွင်ခရိုင်မီးသတ်စခန်းမှ လက်ထောက် ညွှန်ကြားရေးမှူးဦးကျော်ဆန်း ခေါင်းဆောင်၍ တပ်ဖွဲ့ဝင်များ၊ မီးငြှိမ်းသတ်ယာဉ် တစ်စီး၊ မီးသတ်ရေသယ်ယာဉ်တစ်စီး၊ ပြင်ဦးလွင်မြို့နယ် မီးသတ်စခန်းမှ ဦးစီးအရာရှိ ဦးငြိမ်းချမ်းအောင် ခေါင်းဆောင်၍ တပ်ဖွဲ့ဝင်များက မီးငြှိမ်းသတ်ယာဉ်တစ်စီး၊ မီးသတ် ရေသယ်ယာဉ်တစ်စီး၊ စုစုပေါင်း တပ်ဖွဲ့ဝင် ၂၄ဦး၊ မီးသတ်ယာဉ်လေးစီးတို့ဖြင့် သွားရောက် ငြှိမ်းသတ်ခဲ့သည်။
ညနေ ၄ နာရီ ၂၇ မိနစ်တွင်ရောက်ရှိခဲ့ပြီး စတင်ငြှိမ်းသတ်ခဲ့ရာညနေ ၄ နာရီ ၂၈ မိနစ်တွင် မီးငြိမ်းခဲ့ကြောင်း၊ အဆိုပါမီးလောင်မှုကြောင့်လူနှင့်တိရစ္ဆာန် ထိခိုက်မှုမရှိပါကြောင်းနှင့် မီးပေါ့ ဆသူအား ဝက်ဝံနယ်မြေရဲစခန်းက (ပ) ၃၆။၂၀၂၆၊ရာဇသတ်ကြီးပုဒ်မ-၂၈၅ ဖြင့် အမှုဖွင့် အရေးယူ ဆောင်ရွက်လျက်ရှိကြောင်း သိရသည်။
သတင်း-နိုင်ဝင်းစိုး
ဓာတ်ပုံ-မြို့နယ်မီးသတ်
#ယနေ့ထုတ်သတင်းစာ_ပြည်တွင်းသတင်း