‏مستحُيل يفهمو انك قاعد تحُت ضغط نفسي ومش قادر تحُكي ومتضايق ونفسيتك تعبانه ، بس يفهمو انك انسان مزاجي وكل مره بجو ، ويسيبوك بروحُك لأنك معش قعدتت الأنسان الي ديما يضحك يبوك ديما فرحان يكونو معاك ، بس وقت حزنك من انتَ .

نفسيتي وردود فعلي تحسنت لما فهمت إن مش كل حاجه لازم نعطيها قيمه ، مش كل موقف يستاهل إن ننفعل على خاطره ، ولا كل موضوع نكبره ، ولا كل كلمه تستاهل نرد عليها ، بديت نتفرج ونتابع بصمت ونفوت فِ الموضوع لان مش حـ نقدر نغير طبع اللي قدامي ، لكن نقدر نقلل من الخُلطه ونعرف كل شخص ع حقيقته ونتجاهل ونكسب راحتي وبرود اعصابي وصحتي  .

ح يجي وقت وتلقا روحك بطّلت تبيّن إنك زعلان من تصرّفاتهم مش عشان ما يوجعنش لا توجع وتسيب أثر بس عشان تعبت من كثرت الشرح  ومن كثرت العتاب اللي ما غيّرش فيك ولا حاجة وح يجي وقت تفهم إن السكوت مش ضعف هذا اخر مرحلة يوصلها اللي حاول وحاول وما لقش تقدير وإنك بطلّت تزعل مش معناه إنك قاسي معناه إنك تعبت واخترت تحمي روحك ونفسيتك .

نعترف اني شخصيه مش مفهومه ومعظم الوقت نبقى مش متريح ومش أي حد يفهم اللخبطه الى في راسي اوقات نكون محتاج حد يتحملني وياخذني على قد عقلي رغم اني عاقل اوقات نحب نقعد بروحي بس منحبش نحس انى بروحي والحقيقه ان مفش حد عمره فهمني لاني اصلا مش فاهم روحي .

في فرق بين لي يفهمك وبين لي يسمعك فقط ،اللي يفهمك يشوف نيتك قبل كلامك ويشوف قلبك قبل صوتك ويعرف شعورك من طريقة النفس لي تاخذ فيه قبل ماتحكي يفهم سكوتك ويعرف الكلمه لي مقدرتش تطلعها من فمك، اما الي يسمعك يسمع الحرف وينسى المعنى ويركز ع كلام وميعرفش المقصد يعرف صوتك بس ميعرفش بشنو انتا حاس .

كبرنا وفهمنا إن الحياة ما تجيبش كل شيء مرة وحدة تعطيك درس ورا درس باش تعلمك الصبر باش تقويك باش تعرف قيمتك وقيمة تعبك كل طيحه كل خيبة كل وجع يعلمك حاجة جديدة يعلمك كيف تحسب خطواتك قبل ما تمشي وكيف تحمي روحك من اللي يوجعوك حتى لو كانوا قريبين منك .

من كثر مانحب نكون أنسان مستقل في حياتي قعد صعب عليا نشارك أوقاتي مع اي شخص نحس اني لازم نتعامل مع مشاكلي ولحظات ضعفي بروحي وبصراحة هذي حاجة قاسية لكن عارف انه مهما شخصيتي تغيرت ح نقعد نفضل نفسى علي نفسي بدال ماحد غيري يقسي عليا .

ماتراقبش حد انت تبي تنساه انت عارف ان العلاقة هذي مش نافعه ولازم تنتهي ف مافيش داعي تراقب وماتوضحلش انك تراقب فيه وماتوضحلش انك مش قادر تعيش من غيره ومتجيش علي كرامتك عشان حد ومتخليش حد يلوي ذراعك اللي جاباته تجيب غيره مافيش حاجه إسمها اصلا هذا حد مايتعوضش ف اعرف انك اخترت الصح واللي يدير الصح مايقللش من قيمة نفسه .

مرَات تستاهِل الطيحَه لِطحتهَا ، لأنِك لو منغدرتِش منهم حتقعِد لليُوم مصدق انهم سندِك وناسِك وعزوتِك ، لازم تتوجَع باش عقلِك يصَحصح وتفهِم ان معمرُك تعطي ثقتِك لحد بساهِل .

تجي فتره للشخص تصير له زي مرحلة التصكيره لا عاد يحكي لا يتناقش لا يضحك لا يبصر لا يزعل لا يبي يفهم لا يبرر ، فتره يكون فيها بروحه من غير اي شوائب في حياته ويكتفي بيها بنفسه وبس .

- هو الحمدلله لكن الفترة هذي غريبة أغلبيتنا عايشين تحت ضغط نفسي ومش عارفين نلقوها من وشنو ولا شنو، سواء ضغط عمل ولا الروتين الممل،ولا مشاكلنا ولاالحوارات فلان قال وفلان يقول،وكلنا لاطه معانا في كم موضوع شاغل تفكيرنا ،لكن عشمنا في ربي كبير إن الفترة هذي تمشي على خير وربي يعوضنا خير.

- ماتعطيش فرصه وانتَ عارفهم حيضيعوها ، عطيها لنفسك عشان تصلح من روحك ، وتعرف إنه ما يستهلوش .

أنا مش مقتنعه بموضوع العشره والسنين ، أنا مقتنعه بشي واحد بس ان فيه ناس عندها أصل وناس ما عندها ، وقليل الأصل لو عاشرته مليون سنة ماراح يثمر فيه 🤍