محرم 1447 (هز الحومة) 
قصيدة حماسية 
ليلة الامام علي الاكبر (ع) 


من طبّاهه   هز الحومه

تجهّز للحرب من گِصْته باسه احسين
ركب ظهر الفرس حالف يگر العين 
عهد خلاه ينصر والده والدين 
علي ابن الاطايب وارث الماضين

زلمه وْماخذ من جده اسمه
وْمن جينات الحامي وْدمه
وْخصّه الباري باجمل نعمه

چنه احمد يشبه لرسومه 

طب الليث راجز بيده سيف الحگ
متكتره الزلم ياهو ابعلي يندگ 
عظم اصدورهم عظم ابعظم ينطگ
البي آخر نفس للشهگه ما لحّگ

وْكلمن يبلع ريجه وخانس
هزهم هز ومامش فارس 
يطلع كون ابزوده ينافس 

من هاشم يدرون اعلومه 

محتارين ياهو ايگابل الاكبر 
قائدهم جبن گال انه ما اگدر
مرحب وي علي بالضربه انطر طر 
نزل صاعق عليهم صعبه يتفسّر

گد ما بيهم يرعد چفّه
رجليهم صارت بالرجفه 
چن ريشه ابريح الخفّه

وْكل واحد گلبه ابزردومه

متلثّم علي چن حيدر القادم
روجه ابروجه من طگهه وْطلع سالم
من عدهم طلع بارِز ابن غانم 
راس ابدون جسمه رده للوادم 

ابن احسين القطعن يفلح
شافو سيفه ابإيده اتمرجح
واحدهم رعبه ابيقظه اصبح

وْبالرگبه امچلب جيثومه
 
يحصد بالرگب موسم حصد ارجاس 
من زاد العطش ماهزهه راعي الباس
علي ابناموسه عمه ابفعله يرفع راس
من جاب النصر هز سيف اله العباس 

گام العباس وْگالاله 
ليث انت وْمحد يدناله
انت اليرعب خصمه اخياله

گدهه امنتصول وْمحسومه



خادم الزهراء (ع) 
سيد حامد النعيمي 


 

ليلة الرضيع
لسان حال الرباب (ع ) ام الرضيع (ع)


عبدالله بالطف موسى باليم
عبدالله يُذْبَحْ موسى يسلم
واويلاه واويلاه

حكمه بيهه آنه وام موسى اشتركنه بالبلاء
كلمن ابإيده رضيعه شده عشنه مو رخاء
وِبْرَحِمْتَهْ أوحى لام موسى الجليل امن السماء
لا تخافي إلقي باليم إبنچ أفعل ما أشاء

محفوظ إبنچ آنه أعلم
عبدالله يُذْبَحْ موسى يسلم
واويلاه واويلاه

موسى بالصندوگ يوضع وابني بچفوف الامام
من بحر رد النبي لحضان أمه وبسلام
وانه عبدالله رجعلي شايل ابنحره سهام
ميت ابسكت ورد ومفرفح ابجنح الحمام

وگماطه أحمر ناگع ابدم
عبدالله يُذْبَحْ موسى يسلم
واويلاه واويلاه

ماتوادعنه ابرحيله لاشِبَعت ابشوفه عين
نظرة اعيونه الأخيره عكست ابعين الحُسين
بيهه أقرا احچايه بويه فدوه أحلفك أمي وين
گلبي نار ورايد اغفه عالصدر ذاك الحنين

ولحضانهه مشتاگ أشتم
عبدالله يُذْبَحْ موسى يسلم
واويلاه واويلاه

لو فرغ كاروك ابنهه الوالده يترسهه نوح
من تهز جذعه ابحزن تتساقط اعليهه الجروح
كل جرح لچماته ذكرى لو صور تلفي وتروح
الدنيه بفراگ الغوالي مگبره مابيهه روح

ظل بس حزنهه ابصدري خَيَّم
عبدالله يُذْبَحْ موسى يسلم
واويلاه واويلاه

الضحكه بشفايف رضيع وبالمهد إلهه طعم
بالعطش ضحكت ضنايه يبست وبالمي حلم
موسى من فرعون ينجي أطغى حكام الأمم
وال اميه امن الظلم عبدالله منهم ماسلم

القاتل براءة ورده يندم
عبدالله يُذْبَحْ موسى يسلم
واويلاه واويلاه


خادم الزهراء (ع)
سيد حامد النعيمي

محرم 1447 (كلّي حيره) 
ليلة الوداع 
لسان حال مولاتي زينب (ع) تكلم الامام الحسين (ع) 


خويه صدلي نظره اخيره
وانه يمك كلّي حيره
باچر اتلوحك منيّه
وامشي آنه لغير ديره
 
حزني هدني ... وانت سالم باچر اليبقالي مدمع
انت مني ... نجمة وتلازم ضواهه ابليل تطلع
ماتلمني ... دنيا بس اوياك لو شخصين تجمع  
خويه خلني ... شوف ومسامر حبايب منك اشبع

هاي فرصة نگعد احنه 
كل حچينه بس محنه 
هيه ليلة وما بديّه
وامشي انه لغير ديره 
 
روحي غاصت ... بالحزن وادريك بيّه انت تهتم 
صحره شفتك ... يابسه ومن عدهه باين جاري الدم
رايده افرح ... خويه بشفاك الفطر أتمنى يلتم 
ادري يابس ... بيش احلفك رطبه من عيني وْتِبَسّم 
  
بيك انظر ضحكة امي 
لو شفتهه اتزيل همي
تدري بالضيم العليّه
وامشي انه لغير ديره

الله يشهد ... وجهك الشاحب يشابه امنياتي
حيلي من هد ... جفنك الذابل اصدله چن گواتي
منه اسود ... من تروح اتصير بعدك كل حياتي 
مالي احد ... تنذبح بالسيف وآنه ابذكرياتي 

وعيني اتصد عالشريعه
شهم يفزع للوديعه
انتظر وشّر بديّه
وامشي انه لغير ديره 

هسه يمي .... إكعد وخليني اشم ياخويه نحرك 
سيف معمي ... وثلّموه الخاطر ابذبحك يعورك 
وانت مدمي ... محد ايعينك فقط ربك يصبرك  
وانت مرمي ... بالگمر لو بيك اكلك عظم اجرك 

وي سهمهم يچوي گلبك 
من شمر بيده يگلبك
وْنور وجهك عل وطيه
وانه امشي لغير ديره
 
آه صدرك ... بالسحگ من ظهرك اضلوعك يِطِلعن
آه صدرك ... من سحكهم لو بناتك كسره سمعن 
آه صدرك ... هو بس يشفي ألمهن لو تِوَجْعَن 
آه صدرك ... شرد اكلهن ينطحن بالخيل طبعن 

كلمه اخيره صوتي سمعه
انتظر للمهدي طلعه
ثارك ايجيبه إليّه 
وامشي انه لغير ديره 



خادم الزهراء (ع)
سيد حامد النعيمي 

اعادة نشر
ليالي الوحشة
لسان حال مولاتي زينب (ع)


ياليالي الوحشة رُحْمَنْ حالنه
بس عليل وغيره واحد مالنه

كلنه مكسورات نسوه ابلا خيام
منّه راح اليوم چم زلمه وامام
الليل يرهب لا تطوخن بالظلام
إخوة ماعدنه وعدو يبرالنه

ابيا وكت بالغربه بالهيمه نبات
ومن عگب عباس احامي امخدرات
آه لو يدري بخواته امتربات
چا گلب هالكون چف كفّالنه

امفطره اوجوه العلاوي چن ارض
بين نار وسوط تعبنه الركض
السوط چفه بالظهر لمّن يكظ
وذره يشلع بي حفر سوّالنه

يوم عاشر خيلهم سحگت ورد
تيّهت بحسابي لاطفالي اعد
طفله لو ضاعت تموت وما ترد
حافر البي موت يتعنّالنه

هذا واكثر حالنه والمر صعب
مختصر لو احچي ما تكفي الكتب
ليل امس يم اخْوِتي هسه رعب
لا ضوه والخوف شاغل بالنه

ياليالي اعليچ أمنه فاطمة
من وجه عباس ضويهه السمه
عيلته حامي عليهه امعلمه
والگمر يحمينه من اخيالنه



خادم الزهراء (ع)
سيد حامد النعيمي

نسألكم الدعاء لنا ولوالدينا رحمهما الله والى جميع المؤمنين والمؤمنات والمسلمين والمسلمات الاحياء منهم والاموات
ولا سيما بالخصوص شيعة اهل البيت عليهم السلام ومن لم يذكرهم ذاكر

يوم العَاشرْ يوم حزن الزهراء والعقيلة زينب والحجة المنتظر (عليهم السلام) ويوم الْوَدَاع ويوم الْبُكَاء وَيوم الْحُزْن
"السَّلَامُ عَلَىٰ الشَّيْبِ الْخَضِيبِ 💔
عظم الله اجورنا واجوركم واحسن الله عزائكم

ليلة الوحشة / محرم 1447
الرادود علي ربيع

ليلة فاطمة العليلة (ع) محرم 1447
الرادود السيد علي طارق

تاج راسي خدام الامام الحسين (ع)
اي شخص عنده توثيق لقصيدة يرجى الارسال على صفحتي الخاصة
@sayedhamid10

ليلة الوداع
لسان حال مولاتي زينب (ع)
تكلم الامام الحسين (ع)

الرادود علي السراي

ياحجة الله روحي لك الفدا

(دم جره دمعه)


ابليلة الجمعة / ابيا حزن ينعه
منتظرنه اليوم / حاير ابوضعه 

كل سنة بعاشور ينظر واقعة وكل الجرى
ماكو واحد جسمه كامل مندفن حدر الثرى
وصله وصله ذيچ الاجساد الشريفة الطاهرة
چنهه حنطة ابيوم موسم عالارض متناثرة 

مكشوفه عن عينه الحجب ينظرهه
فوگ الترب سيف الغدر ناثرهه

احسين غاليّه / گِصْتَه مدميه
والنحر مذبوح / ومنگطع صبعه

الليلة مهدينه ابدَمِعْتَه مو زيارة ابكربله
خلص العاشر بده الأصعب عليه ايعلعله  
وحشة الليلة عظيمة زينب ابنص الفلا
عگب اخوهه خيمة صارت چودرت عالعايله

محني ظهرهه امحرّگات ايديهه
فوگ الحرگ مسبيه ومگيديهه

وبمتن زينب / سوطهم يلهب
خله فوگ امتون / بالأثر لسعه

والله دنيا دارت وهاليوم يفرق عن امس
ينضرب كل واحد اعله الماي يسأل لو همس
الصارو ايتام وعطاشه وبين عدوان ابحبس
من اجل اعيونهم عباس ضحى بالنفس

هسه الملامح ضايعه بواحدهم 
ياعين بيهه المنتظر شاهدهم

ضلت النسوه / مالهن تچوه
بس عليل الضال / علته اتمنعه
 
هيه ياروح التضل للعنده غيره وطالبي
من يصد وي عين شامت چف وصل بنت النبي
وايْتِأَمّرْ عالخدر صار النذل والاجنبي
للعقيلة ايگول باچر بيچن انطوف ابسبي

أول محطات السبي للكوفة 
للبيهه أميرة چنتي وْمعروفه

من تطبيهه / ذكرى الچ بيهه 
عمده من ناذيچ / گلبچ انشلعه

الشام آه الشام تنعد بالگلب أكبر جرح
ماتقارن بالچفوف ولا نحر لا بالسطح
طبت ابديوان زينب تذبح المهدي ذبح
وچنهه طعنه بالطفوف ابكل سهم وبكل رمح
 
ديوان لو طبت دعي يتعمد 
وحدچ يگللهه اخوتچ ماكو احد 

حشمي الكافل / بلكي ايقاتل
عالرماح انشال / ياهو اليرجعه

بالختام احنه إله ندعي العجل وي الصبر
المثله الله ايعينه حزنه دايم ابطول العمر 
راعي إلمصاب اشنگله گلبه صاير چن جمر 
خل نگله ابصوت واحد عظم اللٓهُ الأجر 

واكثر نواسي بالدمع مولانه
ندريه يحضر كل وكت ويانه 

ايقرح ابعينه / دمعه لحسينه 
بالمجالس دوم / يحضر ابطبعه


خادم الزهراء (ع) 
سيد حامد النعيمي 

دفن جسد الامام الحسين (ع)
لسان حال الامام السجاد (ع)

شيخ عباس العزاوي

لسان حال الامام السجاد (ع)

(يباقر)

يباقر . ميت عشت من بعد الجرالي
يباقر . طف كربله ميفارگ خيالي 
يباقر . فوگ الرمح راس أغلى الغوالي
يباقر . يباقر

.......
عاشت ابعيني صور كل صوره من عدهن سهم
ويه ما أرمش أَحِسَّنْ كل جرح بِيَّهْ انْلِچَمْ

ذاك جدك .  صورته ابلايه نحر 
ذاك جدك . راسه عينه اعله الگمر
ذاك جدك . گصته محفوره ابحجر . ذاك جدك

شسولف . تخنگ نفس قصة ذكرياتي
شسولف . والطف أخذ كل عمري وحياتي
شسولف . من حالي اشد طگ عَمْتِي اوخواتي . يباقر

.......
إنته مثلي يبني عينك شاهدت كل الجره 
يبني لكن والدي مو والدك فوگ الثره

انته أهون . مني سالم كل عضو
انته أهون . ماشفت ذبح الأبو 
انته أهون . ماشفت فرگت اخو . انته أهون

وزيدك . يوم الدفن بالعثره اوْصَلِتْهُم
وزيدك . بيدي وصل بويه لملمتهم
وزيدك . أربع جثث عِمَّانِي ادفنتهم . يباقر

.......
چبدي بالسم من تِگَطَّعْ عيني الوجهك تصد
باحتضاري يبني حضنك خفف آلام الچبد

اه أبويه . عالتراب اويِحْتِضُر
اه أبويه . يندفن ماينتظُر
اه أبويه . ظل ثلاثه ابلا گبر . اه أبويه 

وداعي . إنته ونا بي گمنه انتكلم
وداعي . لا مو مثل جدك من تألم
وداعي . بي ماشفت نيران المخيم . يباقر
 
.......
من تِغَسِّل جسمي تلگه بي أثر گيد السبي
بيه أُذكر جرح زينب من تچلب بالعبي

ياجرحهه . بعده ينشد عن علي
ياجرحهه . صوته يصرخ ياهلي
ياجرحهه . ناده كافل محملي  . ياجرحهه

تنادي . خويه الگمر يوم الغاضريه
تنادي . گوم الشمر سوطه ألّمْ رقيه
تنادي . لمن رحت خاوينه المنيه . يباقر

....... 

هاي آخر طلبه منك لو خلص مني العمر 
والأجل منك خذاني والجسم صار ابگبر 

منك اطلب . بمنه والام الضلع
منك اطلب . كل عرس تجري الدمع
منك اطلب . تشعل الجاسم شمع . منك اطلب

وخويه . كاروكه هِزّه يطفي لهيبي
وخويه . ‏مثلك تره عبدالله حبيبي 
وخويه . يوم السهم هذا اول مشيبي . يباقر 



خادم الزهراء (ع)
سيد حامد النعيمي 

 

اخذ الوصايا (قصيدة المشايه)
محرم 1447

اخذ الوصايا والتزم بيهه * هاي المسيرة بالوعي امشيهه

خطوات الزيارة _ كل خطوة منارة
تصدح بالمعاني _ تخط اسمى الرسالات
اعرفهه الحقيقة _ من تمشي ابطريقه
لحسينك أماني _تهد عرش الظلامات
وقدوة انت تظل دوم
مَشعل تضوي كل يوم
تنصر ياهو مظلوم......... يريدك

لو كلّف امرك رگبه تنطيهه _ هاي المسيرة بالوعي امشيهه

وبدرب السلامة _ اخفي الابتسامة
حاذر يسهو فكرك _ فرح تظهر ثناياك
سبّح بالمدامع _ وبگلبك مواجع
خل نفسك تذكرك _ مشي زينب تجي اوياك
والمهدي يهل عين
گاصد زاير احسين
تمشي مثل إلثنين...... يريدك

وهاي الشعيرة قربة خليهه _ هاي المسيرة بالوعي امشيهه

اسمع هالنصيحة / گلب الزهره ريحه
لتأخّر صلاتك / توقف وكت إلآذان
انطت نحر ابنهه _ يهدي الامة كلهه
والخمسة ابحياتك _ فرض واجْزاهن اجنان
من خيْر العبادات
حافظ عالصلاوات
ربنه ابكل الاوقات....... يريدك

تلزم صلاتك دوم تحييهه _ هاي المسيرة بالوعي امشيهه

يا راعي الحمية _ لاختي الزينبية
ام الحشمه كلهه _ دِرِعْ إنت وْعلي اوياك
بخوتهه النجابا _ مصيونه ابمهابه
طلعت من اهلهه _ درب حاسبته بحماك
كون اتعَجّب الناس
وفعلك يرضي عباس
ابزودك ترفع الراس......يريدك

تحميهه اختك والظهر ليهه _ هاي المسيرة بالوعي امشيهه

لليمشي اخاطِب _ والاهل المواكِب
أَنْصَحْ والنه كلنه _ نغيّر وبفعل جاد
مو بس ابمحرم _ وِبْصَفْرِ الْمُكَرّم
من نلحظ عملنه _ فعل بالتقوى يزداد
بارينه ابأمرنه
واسنين ابعمرنه
كل يوم اليمرنه........يريدك
تزداد تقوى موسم انهيهه _ هاي المسيرة بالوعي امشيهه



خادم الزهراء (ع)
سيد حامد النعيمي

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

https://t.me/+PZwpTt2HLXcvUQZh

------------------------------------------------------