📜اسم القصيدة: الدين الحقيقي
🎤أداء: سيد سلام الحسيني
🖋️كلمات: ميرزا علي المحمداوي
ـــــــــــــــــــــــــــــــــــــــــــــــــــــــــــــــ
جعفر الصادق وصي رب العرش
مذهبه الدين الحقيقي دونه غش
هو علمنه ننوح لكربلاء
و الجزع مريود في ليل اهدش

اثمنطعش عام ويواسي بالدمع
گلب زين العابدين المنفجع
والي عايش كل حياته كربلاء
شما يصد للماي گلبه ينوجع

من ال اميه عشرته خمسة عقود
رغم كل الجور والهم والقيود
ضل ينادي يا لثار كربلاء
ويالثار الحيد مگطوع الزنود

والزياره الوارده عن الإمام
بيهه تفصيل البرائه والكلام
و العصابه الظالمه في كربلاء
تلـگه مصدرها من اولاد الحرام

حين شبت نار بالدار وبدت
ينظر بنياته من تراكضت
تذكر النار السرت في كربلاء
يجري دمعاته لرقية الي انچوت

هاي بأسم الدين دعوه للخلك
الما تبع ال النبي حتما غرك
همه رحمه والسفينه كربلاء
واليضدهم راح بالنار احترگ

انتمائي لجعفر الصادق فخر
مايهمنه شما حچت هاي البشر
نبقى نحييهه مصيبة كربلاء
هذا منهج سادتي الأثني عشر

هذا عهد وياك من الرافضه
شما تقدم هالعمر والي مضة
عهد و انطيناك تحيا كربلاء
نبقه ننحب للضلوعه مرضرضه

جعفر الصادق رسم للأمه دين
ماتهزه الريح لو مرت سنين
ابد ماننسى مصيبة كربلاء
وابد ما ننسى مصابك ياحسين
ــــــــــــــــــــــــــــــــــــــــــــــــــــــــــــــ

📜اسم القصيدة: كافل خدر اخته
🎤أداء: سيد سلام الحسيني
🖋️كلمات: سيد محمد جابر الحلو
ــــــــــــــــــــــــــــــــــــــــــــــــــــــــــــــ

يمه تدري جان مهدك خيمه لختك
ورايتك موجوده بيه ابصف جربتك
ماتهزمك مهدك احسها اطوف بختك
وزينب من تلولي ترنيمة محنتك
ماجنهاتلولي وجن تقره بقران البطوله
حي العباس الكافل خدري كلك رجوله
يلماخذ زودك من حيدر خوية امن الطفولة
اسمعها وارفع يا گمر راســــي
مفتخره واتشوف الفخر ناســـي

يعنوان فخرها .. يسموك گمرها

من المهد وانت ذخر وانته
راعي الحمه وكافل خدر اخته
يكفال خدرها .. يسموك كمرها

ـــــــــــــــــــــــــــــــــــــــــــــــــــــــــــــــ

تكبر ويكبر حلم اختك واملها
ياذخرها ويابعد امك واهلها
تذكر امن انطيك رايه وبيدي احلها
من اكلك روح رف بلرايه الها
من اترف بيها كبال اختك كلبي ايرف عليها
تتشكر وانه اخجل واجبل صوب اديها
وتسبگني انت اتحب ايديها وهايم يبني بيها
صح يا گمر انت مجد هاشم
بس انه ربيتك عبد خادم

تضل طوع امرها .. يسموك گمرها

من المهد وانت ذخر وانته
راعي الحمه وكافل خدر اخته
يكفال خدرها .. يسموك گمرها

ـــــــــــــــــــــــــــــــــــــــــــــــــــــــــــــــ

يبني تذكر جنت اعلمك عالكفاله
اكعد ابفيك واگلك مد ضلاله
الكفيل ابكبره فيه ايصير جاله
كون الها امخيم اتصير اعله حاله
جانت اختك زينب فيها والدها الصميده
ذاك السواك أعظم فارس وربيت اعله ايده
هسه ابفيك تكعد واعرف يا مقصد أريده
شيمني يبني بشيمتك كدري
مو بس خدر ابذمتك عمري

كضت طول عمرها .. يسموك كمرها

من المهد وانت ذخر وانته
راعي الحمه وكافل خدر اخته
يكفال خدرها .. يسموك گمرها

ـــــــــــــــــــــــــــــــــــــــــــــــــــــــــــــــ

تدري جمله ياكمر زينب جبيره
الضوه خيمتها والهاله العشيره
انه من انطقها ارجف يبني غيره
صار ابني بها الاسم ماصار غيره
ختاروك انت الكافل الها يسمونك كمرها
يعني الكل بالكل انت الها هيبتها وكدرها
اختك هاي ابشارب حيدر وعرفها شكبرها
من الضوه صايغ ستر لختك
يعمه اليصد شمس الضهر بختك

ضوه صار سترها .. يسموك كمرها

من المهد وانت ذخر انته
راعي الحمه وكافل خدر اخته
يكفال خدرها .. يسموك گمرها

ـــــــــــــــــــــــــــــــــــــــــــــــــــــــــــــــ

روح يبني اوداعة الله امودعه بيدك
زينب وبيدك بعد راية عضيدك
صح عضيدك لاجن اكباله اريدك
اتكله يامولاي انه من عبيدك
ابن الزهره وتاج الراسك يوليدي وامامك
شما تتصاغر يبني اكباله ايصير اعله مقامك
ويم الزهره اتبيض وجهي ابفعلك وابكلامك
مودعتك ماانتظر ترجع
خليني بالصبر اكبع

الصبر صار قدرها .. يسموك كمرها

من المهد وانت ذخر انته
راعي الحمه وكافل خدر اخته
يكفال خدرها .. يسموك گمرها

📜اسم القصيدة: يبني بدمعتي جيتك
🎤أداء: سيد سلام الحسيني
🖋️كلمات: أبو محمد الزبيدي
ـــــــــــــــــــــــــــــــــــــــــــــــــــــــــــــــ
يبني بدمعتي جيتك .. ظامي بكربلا لگيتك
عينك عالنهر تربي .. وتندار الأهل بيتك

تعنيت إلك وأنا أمك فاطمة
ياغريب بكربلا .. يم النهر
جبت الدمع والحچي دموع وظمه
أنا وانت بالفلا .. يم النهر
اوليدي يبو الأكبر
لاحك هجير البر .. وبيك العطش أثر

يا واهب الكوثر الي
هذا ابني والعطش هد حيله
حر الشمس ما ينحمل
كطرة من جود الگمر وديله
يبني شفتك اكبالي .. وحدك والظهر خالي
الساقي چان أبو فاضل .. غالي ويروي كل غالي
ــــــــــــــــــــــــــــــــــــــــــــــــــــــــــــــ
وين اخوتك يبني تكتل غربتك
واكف بحر الشمس .. وكت الظهر
حار الدمع مايبرد چبدتك
جمرة بضلوعك أحس .. وكت الظهر
عليك العطش من طاف
كل خل إلك ما عاف
ونحر الرضيع انشاف
هب الهوا يم برگعه
وبين اكبال العِده مكنونه
طفلك نسى كل شي وبكت
صورة شفافك حزن بعيونه
روحي وكلبي عبدالله
وياكم لو گطع وصله
المن يبقى المناغه
والمن چلمه اسم الله


يبني بدمعتي جيتك .. ظامي بكربلا لگيتك
عينك عالنهر تربي .. وتندار الأهل بيتك
ــــــــــــــــــــــــــــــــــــــــــــــــــــــــــــــ

يبني اسمعت طفلة عطشانه اشتكت
حملت گلبك قهر .. بمخيمك
المدللــة من العطش كون حچت
ناشدت عن الكمر .. بمخيمك
اسمع حچي سكينه
ساقي العطش وينه
يشوف العطش بينه
عندك اخو ساقي الظِمه
والعطش نار ودخل صيوانك
وأم البنين الربته
هذا يوم اليروي بي عطشانة
ابني وعدها ربيته
بمهده وأنا هزيته
راضع غيرة من أمه
الكافل ياعمد بيته

يبني بدمعتي جيتك .. ظامي بكربلا لگيتك
عينك عالنهر تربي .. وتندار الأهل بيتك
ــــــــــــــــــــــــــــــــــــــــــــــــــــــــــــــ
زينب شفت جابته لمهرك واجت
وانهضم گلب الحرم .. يم المهر
كلهن بچن روحي وياهن بچت
موادع باب الخيم .. يم المهر
مهرك مشى خطوة
وصاحن يبو النخوة
وداعك أشد بلوة
من فاركت يبني الخيم
اتكابلن نوح ولطم بالثاية
وياهن لطمت على الضلع
الخيل اجت من كل كثر عناية

ليلـى كابلت رمـلة
وسكنـة كابلت خولة
زينب والرباب هنا
ثكلـة كابلت ثكلـة

يبني بدمعتي جيتك .. ظامي بكربلا لگيتك
عينك عالنهر تربي .. وتندار الأهل بيتك
ــــــــــــــــــــــــــــــــــــــــــــــــــــــــــــــ
فوك الثره يالولد طاح الگلب
من طحت من المهر .. جروح وعطش
كلشي انتهى من شفت دمك يصب
من جبهتك والصدر .. جروح وعطش

چبدك ينور العين
اكبالي حمل جرحين
نبله وعطش يحسين
من اسمعت غارة زلم
والحرم طلت ركض بالبيده
شفتك كمت وانا صحت
كوم يبني من الوطيه بهيدة
حالي شابهه لحالك
نبچي لضيعة أطفالك
إلزمني وأنا اتچيلك
ونرجع نجمع عيالك
يبني بدمعتي جيتك .. ظامي بكربلا لگيتك
عينك عالنهر تربي .. وتندار الأهل بيتك
ــــــــــــــــــــــــــــــــــــــــــــــــــــــــــــــ

كلمات قصيدة اعتذر ساداتي
الرادود: سيد سلام الحسيني
الشاعر: سيد أنور الموسوي
ـــــــــــــــــــــــــــــــــــــــــــــــــــــــــــــــــــــــــــ


ليا وكت صوت الضماير.. يحجي بينه وما نسمعه
ليمته بالتعجيل ندعي..ولا ظهور بلايه فزعة
للبقسع تصد عيونه..وناظره النه نرجعه
بلكي واحد بينه جاهز..خطار يكملون ربعه

بكربله نگول.. ماكو انصار
وظل الحسين.. وحده حاير
طيب اليوم.. شنهو الأعذار
والبقيع إب.. لا مناير

بكربله نگول.. ماكو انصار
وظل الحسين.. وحده حاير
طيب اليوم.. شنهو الصار
والبقيع إب.. لا مناير

يرد عينه لثاره ويكلهم ماجوني
انتظر موقفهم الناس الينتظروني

انتظار وصبر عمره هاي اسفاره
شما يطول الزمن ما لگه انصاره

اعتذر ساداتي
مابينه لتنطرونه

اعتذر ساداتي
اشما دم تهل عيونه

للبقيع النظر والفكر يم ثاره
شما يطول الزمن ما لكه انصاره

ساداتي هذا اعترافي.. اقل شي لازم اقدمه
عاهدتكم والحقيقة.. انه مو وفاي كلمة
نصرتي لكم معدة.. حچاية يرادلها زلمة
رغم هذا وخير ايديكم.. بجفي نعمة بأثر نعمة

اعترف جاي.. واعتذركم
وانتم الادرى بضميري
شما يصح راي.. فزعة الكم
انه اگولن.. اكو غيري

يمته اواجه گلبي وي سيده الينتظره
يا گلب ينتظره المهدي عايش عمره

يا گلب موقفك يمته چا تختاره
شما يطول الزمن مالگه انصاره

ساعة اگول الثار ثاري.. والبقيع أنرفعه لازم
ساعة اگولن ما استعجل.. المهدي يبنيه هو قادم
كون ثاري شعندي ساكت.. ليش ما ادافع واهاجم
وكون يبنيه ابو صالح.. غير كون تنصره وادم

احنه نبنيه؟.. شلون نبنيه
اتناسوا الثار.. الشيعة الف راي
من يهم بيه؟.. المهدي هاليوم
بلايه انصار... ليا سبب جاي

لاني باني الغرقد واوفي بنصرتي وعهدي
ولاني عجلت امره ويظهر يرفعه المهدي

يمته اوافي العمر مو گضه مشواره
شما يطول الزمن ما لگه انصاره

ليتنا صحنه بزمنكم.. وآنه من هالكلمة خايف
سهلة نحجيها هالعبارة.. والصعب يوم المواقف
يمته اصفي الكم دليلي.. ليمته اظل عاليمته
عاكف
لا يجي اليوم لنصركم... بيه ماي الفزعة ناشف

مو حجي لسان.. لمن نصيح
ليتنا يا.. ساداتي نكون
الدنيا غربال.. وخايف نطيح
ومكثر الناس.. اليطيحون

ارد ابيض وجهي اگبال الزچية الزهرة
ارزقوني الغيرة حتى الكم انطي النصرة

الجمرة الحب لزم تاخذه الكم ناره
شما يطول الزمن مالگه انصاره

رغم تقصيري وجفائي.. حسرة يا ساداتي بيه
اتمنه من گلبي گببكم.. بالعلو اتلوح الثريه
واعرف الياذيكم اكثر.. واشد من هاي الرزيه

الماكو شاهد گبر الها... يا ظلامتها الزچيه

الماكو شاهد.. يم گبرها
غربة ما صارت.. مثلها
ولاكو واحد.. يدري اثرها
وياهو غير المهدي الها

ادعي من كل گلبي يا رب تعجل يومه
مو لخاطر واحد بس خاطر المظلومة
يمته يوم الفرج ونعتنيها زيارة

شما يطول الزمن ما لگه انصاره
ـ

📜اسم القصيدة: يبير اسراري
🎤أداء: سيد سلام الحسيني
🖋️كلمات: حيدر شايع

ـــــــــــــــــــــــــــــــــــــــــــــــــــــــــــــــــــــــــ

ابا ياحسن ... هاي ايام غيابي
ابا ياحسن ... مو بالطبرة مصابي
ابا ياحسن ... جرحي بدفعة بابي

من بعد ما راحت امكم عيشتي مر اعله مر
جنت اعيش بلايه روح وامشي بجدار الصبر

اذكر بساعة غسلها ايدي مرت على الكسر
هو صار هناك موتي وعمري صار بلا عمر

دمع الليالي جان مصيبتي
كل نسمة اشمها اذكر زهرتي
جانت هواي اليدخل ريتي

اسمع يبير اسراري ... راح امشي واترك داري

ـــــــــــــــــــــــــــــــــــــــــــــــــــــــــــــــــــــــــ

ابا ياحسن ... راح امشي لفاطمتي
ابا ياحسن ... منتظره امكم جيتي
ابا ياحسن ... ما ظل شي من وكتي

نـفـسـي عـلـى زفـراتـهـا مـحـبـوسـة
يـالـيـتـهـا خـرجـت مـع الـزفـرات
لـا خـيـر بـعـدكـ فـي الحـيـاة
وإنـمـا ابـكـي مـخـافـة ان تـطـول حـيـاتـي

حــــيـــــاتــــي فــــاطــــمــــة
فــــاطــــمــــة فــــاطــــمــــة آه آه

اسأل الباب الذبحني هو لو كلبي احترك
واسأل اللسمار ياهو بساعة الدفعة شهك

شيبي هذا بساعة وحدة بطيحة امكم بيه طك
كبالي من لزمت ضلعها كبالي الحسين انسحك

يبني المواجع تاكل بالصبر
وعيوني تحجي الي بيكم يمر
والغربة رادت تكسر جم صدر

بدمع المصيبة الجاري ... راح امشي واترك داري
اسمع يبير اسراري ... راح امشي واترك داري

ـــــــــــــــــــــــــــــــــــــــــــــــــــــــــــــــــــــــــ

ابا ياحسن ... امسح دمع جفانك
ابا ياحسن ... اوصيك اعله اخوانك
ابا ياحسن ... قرب يمي اذانك

راح اودع سر كتلني لكلبك ارد احجي جرح
بعيني شفتك تشرب السم يا ابو الكلب السمح

وشفت لمن امشي عنكم جم سنة ويبدي الذبح
حسين اخوك بديرة غربة راسه ينشال برمح

ديرة غريبة تكطع جم نحر
عايله تعطش وبصفها النهر
ودمع اليتامى يترك جم اثر

ما تبرد الكم ناري ... راح امشي واترك داري
اسمع يبير اسراري ... راح امشي واترك داري

ـــــــــــــــــــــــــــــــــــــــــــــــــــــــــــــــــــــــــ

ابا ياحسن ... بكلبك حط حسينك
ابا ياحسن ... وزينب حطها بعينك
ابا ياحسن ... واجفي عليها سنينك

زينب الشايفته هسة كطرة من بحر الالم
بكربلا وبعصر المصيبة توكع عليها الخيم

تلتفت وتصيح اخوتي فزعوا يا اهل الشيم
يا اهل خدري ادركوني جابوا حبال الحرم

عالتل تنادي يا اهل الضعن
ما باقي عندي خيمة ولا وطن
مجتوفه ايديه ودموعي جرن

كون الها تعمه انظاري ... راح امشي واترك داري
اسمع يبير اسراري ... راح امشي واترك داري

ـــــــــــــــــــــــــــــــــــــــــــــــــــــــــــــــــــــــــ

📜اسم القصيدة: انهم فتية آمنوا بربهم
🎤أداء: سيد سلام الحسيني
🖋️كلمات: احمد اللامي وسيد وائل الهندي
ـــــــــــــــــــــــــــــــــــــــــــــــــــــــــــــــ

انهم فتية آمنوا..بربهم..وزدناهم هدىٰ
اخذ الحب يسري..بأحشائهم..لمصباح الهدىٰ
الطاهر بأصله وحليبه
كلمن وحبه لحبيبه

چلمه من عِشّاك طلعت دمعة بالعين
گلبي ضل يسمع عشكهم وي الحسين
انا الهم بالدمع سافر خيالي
شفت صورة جون والموقف حلالي
ماكو ابيض من سواده وعبد غالي
چان ابيض من دمعتي وما اغالي

ايها المسك من بعده..امسك فذا
غدا مسك الختام
انما العطر عطر.. حقيقيٌ اذاً
لانقاس الامام

كل گلب يعرف مجيبه
وكلمن وحبه لحبيبه


انهم فتية آمنوا..بربهم..وزدناهم هدىٰ
اخذ الحب يسري..بأحشائهم..لمصباح الهدىٰ
الطاهر بأصله وحليبه
كلمن وحبه لحبيبه
ـــــــــــــــــــــــــــــــــــــــــــــــــــــــــــــــ

بعيني ابن ظاهر اشوفه شايب وشاب
گام يحچي سنين عشگه بين الاصحاب

كلهم انا بصغري شفته وحب غزاني
متت هم مره و حبه رد و حياني
ثاني مره راح اموت وباقي اني
لان حب حسين باقي وكلشي فاني

ذاك عهد قديم..قضاه بالهوىٰ
حسين الازلي
سوف ابقى اسيراً..جرىٰ ماجرىٰ
لحبي الاولي

والعشگ خضب مشيبه
زكلمن وحبه لحبيبه

انهم فتية آمنوا..بربهم..وزدناهم هدىٰ
اخذ الحب يسري..بأحشائهم..لمصباح الهدىٰ
الطاهر بأصله وحليبه
كلمن وحبه لحبيبه
ـــــــــــــــــــــــــــــــــــــــــــــــــــــــــــــــ

شاب ذب درعه وتقدم صاح مجنون
سمع ها شفت العشگ يا عابس شلون؟
كلهم الدنيا و قميصي مفارگ ثنين
صدري عاري ختى احظه بستر الحسين
امنيتي اواسي انه حبيبي و اغمض العين
لان ادري يموت عاري بلايه تجفين

حَرَ قلبي له.. بالعرى سابحاً.. ودامي الودجين
كل عضوٍ بجسمي.. سيبكيكَ يا.. حبيبي ياحسين

ودع الغالي بنحيبه
كلمن وحبه لحبيبه

انهم فتية آمنوا..بربهم..وزدناهم هدىٰ
اخذ الحب يسري..بأحشائهم..لمصباح الهدىٰ
الطاهر بأصله وحليبه
كلمن وحبه لحبيبه
ـــــــــــــــــــــــــــــــــــــــــــــــــــــــــــــــ

يم خيم شفت الكنيسة من وهب گام
والعشگ سوه مسيحي بكبر الاسلام
شفت عشك حسين يلهب بالديانات
حرگ كل الفات قبله و ماهوَ آت
وهب بجروحه الحبيبه طهر الذات
يعني حب حسين حصراً يذهب الفات

انت ياكعبة العشق..من حجها..محى كل الذنوب
ذاب فيك مسيحٌ..وكلُ الانبياء..مليك للقلوب

ذب صليبه مو عجيبه
وكلمن وحبه لحبيبه

انهم فتية آمنوا..بربهم..وزدناهم هدىٰ
اخذ الحب يسري..بأحشائهم..لمصباح الهدىٰ
الطاهر بأصله وحليبه
كلمن وحبه لحبيبه
ـــــــــــــــــــــــــــــــــــــــــــــــــــــــــــــــ

الغيرة مرضع مو شرط تحويها الرجال
ام وهب عاشگ كلبها وعشگه خيال
فزعت تناصر غريب وتحمل هيام
ماتت بطفها وگلبها يصير يالشام
كون وي اهله سبوني مثل الايتام
مره هاي وزلم بيها ترفع الهام
درة صاغها الحب في وادي الهوىٰ..وشعت بالسما
وهبت كل آمالها بكربلا.. وماتت بالحما

طاهره وحره ونجيبه
وكلمن وحبه لحبيبه

انهم فتية آمنوا..بربهم..وزدناهم هدىٰ
اخذ الحب يسري..بأحشائهم..لمصباح الهدىٰ
الطاهر بأصله وحليبه
كلمن وحبه لحبيبه
ـــــــــــــــــــــــــــــــــــــــــــــــــــــــــــــــ

انهم فتية امنو بربهم | سيد سلام الحسيني
https://youtube.com/watch?v=F9K48A3fbS8&si=x-phi49GAVco5mGg

📜اسم القصيدة: هاي أخر أيامي
🎤أداء: سيد سلام الحسيني
🖋️كلمات: احمد الهلباوي
ـــــــــــــــــــــــــــــــــــــــــــــــــــــــــــــــ
يا كافل اخيامي هاي اخر أيامي
وليك الگلب ضامي .. يبوفاضل
الدنيا بلا صوتك ما احبها وإمروتك
ممنونه من خوتك .. يبوفاضل

بعيوني صورتك عضيدي .. ومافارگني ضي شمعه
وعطرك ايدك الترڪته بيدي .. كل مااشمه اكوم انعه
وكلما اذكرك الوي جيدي.. ودمعه تصب بأثر دمعه

النور والألق ..من وجهك انبثق .. ولهذا اخت الگمر سموني
كسرتني غيبتك .. ماأنسى وكفتك.. مادام اكو دمع بعيوني

الك دمعي اليصب ونزف شوك الگلب
ضحكتك اباني ودوم إتراولي
وارسومك إگبالي .. بيوفاضل
وابجفني الامساهر دمعة شكر وافر
در امك الطاهر .. بيوفاضل

ايسألوني واحلف ابحميتك.. يل ماكو اخو يجي ايشبهك
امگطع على النهر إجيتك .. ولون الخجل طغى ابوجهك
ميت واحس لمن بچيتك .. امن النومه دمعتي اتندهك

عنك رحت غصب.. بيك احچي للدرب.. طاح اخوي وماطحت من عينه
وممنونه من أجل .. خوتك يبوالفضل.. إبگد مابچت عليك اسكينه

البعد عنك صعب ونزف شوك الگلب
الك دمعي اليصب ونزف شوك الگلب


للطف سوى جينه وإشكد تماشينه
تالي إنگطع بينه .. بيوفاضل
مريتك ابحيلي وابكل تفاصيلي
وسولفتك لليلي .. بيوفاضل

گتله انه چان اخو اليه .. ينزف شيم على الخوه
كل خطوه على الوطيه .. إتخضر شهامه وإمرؤه
وكد ما عذب تجيه رقية .. ومن شم وريده تروه

حن گلبي للخيم.. البانيها ابوالشيم.. الموت بيهن افضل امن اهنانه
من مارجعت الي .. وافراگي وي هلي.. لهسه وانه امن الركض تعباته

يمحروم الشرب نزف شوك الگلب
الك دمعي اليصب نزف شوك الگلب

مشاركني بأنفاسك امخليني اعز ناسك
ومالكني بأحساسك .. بيوفاضل
ايريدنك أجروجي وحنت الك روحي
وما ينتهي نوحي .. بيوفاضل

ماصار اخو مثل صفائك .. مرضاتي والخيم دينك
وللخوة قدمت حياتك .. ولاجلي إنذرت قرابينك
عمرك .. اخوتك وحلاتك .. هامك .. چفوفك وعينك

احچيها وانوجع .. ما عندي بس دمع .. بيه اشكرك على السويته
ياصاحب اللواء .. كسرتي كربلاء .. وحيلي التبذ ما لميته

واون طول الدرب نزف شوك الگلب
الك دمعي اليصب نزف شوك الگلب
ــــــــــــــــــــــــــــــــــــــــــــــــــــــــــــــ

📜اسم القصيدة: معجزة الوفه
🎤أداء: سيد سلام الحسيني
🖋️كلمات: أحمد اللامي
ـــــــــــــــــــــــــــــــــــــــــــــــــــــــــــــ
عباس عباس   يسبع الگنطره
عباس عباس   يمعجزة الوفه
صانع للخيام   كيانه و موقفه

عفيه بأبني الرفع راسي ودوم عيشني بفخر
مبتدأ كل الرجوله و بعده كل زلمه خبر
بظعن زينب چان يمشي كافل وماي وگمر
گالوا أُم عباس أبنچ زلمه وتحول نهر

ما دون الخيام   يخضّر مشرعه
وچفوفه الثنين   يذبها مگطعه

عباس عباس   يسبع الگنطره
عباس عباس   يمعجزة الوفه
صانع للخيام   كيانه و موقفه
ــــــــــــــــــــــــــــــــــــــــــــــــــــــــــــــ
معجزه بتكوينه صارت غير عالم عالمه
ثنين بس هو أُمهات غير كل خلق السمه
آنا أصيرن أُم حليبه وأُم نخوته فاطمه
هو راية بني هاشم وآنا عندهم خادمه

آنا أُمه من صار    أرضعه وأفطمه
وبالنخوه والزود   تره امه فاطمه

عباس عباس   يسبع الگنطره
عباس عباس   يمعجزة الوفه
صانع للخيام   كيانه و موقفه
ــــــــــــــــــــــــــــــــــــــــــــــــــــــــــــــ
إبني كلش زين اعرفه عالبشر كلها اختلف
الناس تستقبل القبله وظهر أنطت للشرف
وأبني يستقبل عضيده وين ماشافه وگف
الناس تعرگ مي گصصها وعرگت العباس طف

صلّى القبلتين    لعضيده و زينبه
بيهم عبد صار     عظيم المرتبه

عباس عباس   يسبع الگنطره
عباس عباس   يمعجزة الوفه
صانع للخيام   كيانه و موقفه
ــــــــــــــــــــــــــــــــــــــــــــــــــــــــــــــ
من بدت هاي الخليقه ﷲ بيده شيجتبي
أنطه للعباس خصله ما حِواها كل نبي
صاغه كافل حرم ﷲ عفيه بأبني الزينبي
مو بمصحف كاتب أسمه كاتب أسمه عالعبي

كل النبوات         فضلهم يكتمل
من صار عباس   "هوَ أبو الفضل"

عباس عباس   يسبع الگنطره
عباس عباس   يمعجزة الوفه
صانع للخيام   كيانه و موقفه
ــــــــــــــــــــــــــــــــــــــــــــــــــــــــــــــ
گالوا على الماي نايم زوده بجروفه جرى
گلت وين ينام يعني غير سبع الگنطره
طاح والرايه بيمينه گلت شمرة حيدره
لفظ گالوا أسم أخيّه گلت گطعوا منحره

ماي و غفه بماي   يمحلى نومته
عين لأخو جاي   و عين لخيمته

عباس عباس   يسبع الگنطره
عباس عباس   يمعجزة الوفه
صانع للخيام   كيانه و موقفه
ــــــــــــــــــــــــــــــــــــــــــــــــــــــــــــــ

📜اسم القصيدة: شمتانيه
🎤أداء: سيد سلام الحسيني
🖋️كلمات: علي ابو عراق
ــــــــــــــــــــــــــــــــــــــــــــــــــــــــــــــ
شمتانيه
يالواكفه بدرب الظعن محتارة
حسين راح ومايعود لداره
هذا السفر مايرد منه مسافر
لو عالرمح لو عالهزيلة أخباره

ماشيين وانتي معذبة
تبچين لضعون الربة
والعلة زادت بالهجر
وزغرچ بالفراك انسبه

سارت الضعينة
وتنحب المدينة
بعدن الهوادچ
وظلت الحزينة
ــــــــــــــــــــــــــــــــــــــــــــــــــــــــــــــ
ما صايره
يمشون عن طفلة الأهل فد روحه
أول زغيرة تعيش بس مذبوحه
وي الضعن محملها رايح خالي
مكسوره خاطر ظلت ومجروحه

كل ظنها ياخذها الكمر
ومجهزه أثياب السفر
راحن خوات الها وبقت
دمعاتها اعله الخد نهر

كل حلمها ضايع
بالأهل توداع
وبطرف ردنها
تمسح المدامع
ــــــــــــــــــــــــــــــــــــــــــــــــــــــــــــــ

بعيونها
قصة يتم من الزغر مرسومه
واخبار ابوها الراح مامعلومه
مرها الضمه وگالت حسين الضامي
وشفافه من ماي العذب محرومه

لحسين من يضمه القلب
ما يرتوي بماي الشرب
تشتاك حد قطع النفس
وتهيم كل ساع لدرب

تدعي كل مسيه
تلتقي برقيه
تذكر الليالي
من ربن سويه
ــــــــــــــــــــــــــــــــــــــــــــــــــــــــــــــ
بحسابها
حل يوم المصاب ونهار العاشر
عرفت ابوها وحيد بالطف حاير
مر بنظرها حسين طايح دامي
ولصدره فزعن حافر بصف حافر

صدر الحنان البي ربت
خيل الحرب فوقه انتچت
والف وتسعمية جرح
بجسمه الجروح اتشابكت

ميته وغريبة
صارت الحبيبة
من زغر عمرها
ـــــــــــــــــــــــــــــــــــــــــــــــــــــــــــــ

📜اسم القصيدة: يالجعفرية
🎤أداء: سيد سلام الحسيني
🖋️كلمات: سيد مرتضى الياسري
ـــــــــــــــــــــــــــــــــــــــــــــــــــــــــــــــ

ما يصير .. هالنهايه
هالمصير .. ليا بدايه
با الأخير لونه شاحب
چبده ذايب شهالمصايب

بگد عمره طيبه
بس ياهم اليجازونه
شو غربته على عيونه والسم نصيبه
صابر دليله واتحملاهن اوجاعه
بخباره تعلم اتباعه خل تعتنيله

يالجعفريه تدرونه
متسمم التتبعونه
شو ثاره ما تطلبونه
راح ومشت محاچيه
لا ترتجون اله جيه
يا وسفه هذا تاليه

مظلوم مسموم ويلاه
مظلوم مسموم ويلاه

ـــــــــــــــــــــــــــــــــــــــــــــــــــــــــــــــ

الكبرياء .. دامي جرحه
الطاغي شاء .. أن يوضحه
هالعناء ظل يألمه
گوه يمه يجيبه خصمه

اتعمد يهضمه
ماراعه عمره و أيامه
جابو اله بلا عمامه ويصيحه بأسمه
ما بيّناها
كسرة دليله مو كسره
جمره شكبرها هالجمره يسعر لضاها

مثل الليالي مأساته
ما تنكشف معاناته
لا ينجبر جرح ذاته
عمره سفر صفه امتاعه
هضمه وأنينه و أوجاعه
چم چلمه جرحت اسماعه

مظلوم مسموم ويلاه
مظلوم مسموم ويلاه

ـــــــــــــــــــــــــــــــــــــــــــــــــــــــــــــــ

ما يطيب .. جرحه نازف
هالنصيب .. كلشي شايف
يا حبيب بعمره ضيمه
بعينه هيمه داره خيمه

ونه اعله ونه
خلصها مدمع ايامه
طف و عطاشه گدامه احاه يهلنه
حرگوها داره
وگدامه تركض عياله
وشاف المخيم گباله مستعره ناره

جمره يهلها دمعاته
وخطت أثرها وجناته
چي هلهن اعله عماته
اتراوت مهجته مذبوحه
للطف جَزع عِله نوحه
من داره طلعت جروحه

مظلوم مسموم ويلاه
مظلوم مسموم ويلاه

ـــــــــــــــــــــــــــــــــــــــــــــــــــــــــــــــ

گلبه عَين .. ويبچي دمه
والحسين .. لطاري اسمه
ما تْبِيِن بوجهه بسمه
الهم يلزمه وينعه رسمه

گدامه اذا مر
ذكر الحسين اخذ روحه
اسمه يفتّح جروحه وبدموعه يسهر
ايظل يومه كله
ما يبتسم ولا مره
هيچي حزن منو ايگدره بس همه أهله

ذكره محه ابتساماته
ولجده كلها دمعاته
چنه يصدها نظراته
بحربه ومخيمه ابّاله
ساعه و يفارگ اعياله
آه شكبر هضم حاله

مظلوم مسموم ويلاه
مظلوم مسموم ويلاه

ـــــــــــــــــــــــــــــــــــــــــــــــــــــــــــــــ