واحدة من صحباتنا في الدَّاخلية اتعوّدت إنها كل جُمعة تمشي تصَلّي في مسجد ما بعيد مننا بس برضو ما قريب

أمس قررنا أنا وكم بِت نمشي معاها لأنها كل جمعة بتجي تحكي لينا قدر شنو الخطبة كانت سمحة ما شاء الله وشوّقتنا للمشي معاها

معانا صحبتنا عيّانة ليها أيام وبتاخد في دربات وحقن وواضح عليها أثر العَيَا

أثناء ما نحنا بنجهز طالعين لقيتا منتظرانا في الممر لابسة وشايلة سبحتها ما شاء الله!
يا بت المشوار بعيد ما قريب، ونحنا ماشين كدّاري بتقدري؟؟
ابتَسَمت واكتفت بقول: إن شاء الله

الموقِف ده ذكرني لمن مرة مرضت شديد في المعسكر
وعادةً لو الواحدة تعبت يعني ما بتكون مُلزمة بحضور الحلقة

لما بدا درس أسماء الله الحسنى، شِلتَ حيلي وقعدت في طرف الحلقة وكان برضو ظاهر عليّ التعب والمرض

وقتها، في كلمة قالتها لَي الشيخة من سنين، ما زالت في قلبي مُتَّقِدَة وما خَبَأت!

قالت لي يا صفِيَّة
"أكرمُ الخُطُواتِ على اللهِ=خُطوةٌ تَمشِيها مُتحَامِلًا على أَلِمك"!

اتخيَّل!
تدوس على ألمَك وتواصل مشي، تتناسى المرض وتواصل سعِي، تتجاوز التعب وتواصل مسير
الله الله في الخطوات البتمشيها في طريق ربنا
حاشاهُ ينسى تعبك، ألمك، سهرك في طاعتو، مجاهدتك في سبيل رضاهو!

نواياك الطيبة ،كلماتك الصادقة، دعواتك بأن يرزقك الجنة وما قرَّب إليها من قولٍ وعمَل
مُحَال تروح ساي بدون تُؤجَر عليها بإذن الكَرِيم!

جاهدو في سبيل ربنا ياخوانَّا
واللهِ إن لِلْطَّاعة وقت المرض والتعب، لذَّة ما ذاقها إلا من عرف الله والجهاد في سبيله وأحبَّهُ!

إنك حتى وانتِ عيانة ما تنسي نصيبك من الطَْاعات والنوافل ، إنك حتى وانتَ عندك امتحانات ما تنسى وردك من القرآن

إنك حتى وانتَ تحت الرصاص والضرب، تذكُر ربنا وتسألو الهداية
إنك حتى لو مُستاء من الحرب والدنيا جاية عليك شديد
تتذكر إنو ليك رَب=إذا دعوتهُ أجاب، وإن سألتَهُ أعطاك، وإن استجرتَ بهِ أجارَك
عايزين شنو أكتر من كده؟!

وزي ما قال شيخنا سلمان العودة -فَكَّ اللهُ بالعِزِّ أسرَهُ-
"للهِ درُّ الحاجات، كم قادتنا إلى الله"

مُجدَّدًا وخِتامًا:
"أكرمُ الخُطُواتِ على اللهِ=خُطوةٌ تَمشِيها مُتحَامِلًا على أَلِمك"!♥️

#صفية_مصطفى

رحلتي من:
شِنَط شي إن
إلى:
أكياس "أبَّكَر أرح السوق"
(ملحوظة: أيوا ياخوانَّا الكيس اسمو أبَّكَر أرح"🤣♥️)

قبل أيام سفنجتي الجيت بيها من الحرب أكل عليها الدهر وشَرِب🤣
كنت بلابِس ناس البيت وأضايقهم في الشباشِب لمن الله أدَّاني قِرشين كده مشيت السوق جبتا أسمح وأغلى سفنجة فيك يا سوق مدني "luofu" 🤣💘

ومنتظرة متين أسافر الحِلَّة لي ناس أمي عشان اكاويهم بي سفنجتي الماركة الما بتشبه سفنجات بنات الحِلَّة لأني -ولو قالو عليّ نازحة ولا كشَّة حميدتي-
ح أفضل هانم وطول عمري هانم، ذُل مش هتذَّل🤣

أها حكمة الله، نسيتا في الداخلية وما اتذكرتها إلا بعد وصلتا الحصاحيصا وراكبة حافلات الحِلَّة جاني بتاع سفنجات أبو حمامة بالشُّباك!
أمري لله اشتريتا وبقيت أعاين لي روحي، لقيت ليك
لوفو شنو يا صفية اتي شايلة هدومك في مُخلاية🤣

اتذكرتَ تفسير الآية "لَتَركَبُنَّ طَبَقًا عن طَبَق"
أي: حالًا بعدَ حال!

قَد تتغير أحوالك وتتبَدّل، وقد تمر عليك أيام ما يكون عندك حق اللبن والعيش
لكن
وإن ضاقت، وإن نزحنا، وإن نمنا في الأرض باقي عمرنا
فالحمدلله على الفي قبل الماف، والحمدلله على العافية
الحمدلله إننا ما نايمين في عنابِر ولا في أرض مستشفى، الحمدلله على اللسان الذاكر والقلب الشاكِر، والنفس الرَّاضية

اللهُمَّ رَضِينا بكَ ربًا وبالإسلام دينًا وبمحمدٍ ﷺ نبيًا ورسولا♥️!

#صفية_مصطفى

قبل كم شهر مشيت نزلت في بيت واحدة من بنات أهلنا لمدة يوم فقامت جابت لَي جلبابين اختار منهم واحد عشان ألبسو

كان فيهم واحد حلو شديد ما شاء الله، وحسيتو اتفَصّل لَي عديل🤣
لبستو وبقيت بتفرج على روحي في المراية وأول مرة أحس إني عايزة أقول لي زول لبستك دي حلوة فيني اديني ليها!

بقيت اردد في نفسي لغاية الصباح
"ولا تَمُدَنَّ عينيكَ إلى ما مَتَّعنا بهِ أزواجًا منهم"! ..

تاني يوم طلعتَ ليها جلبابها ده وشكرتها ومشيت أهلي وخلاص نسيت القصة كلها🤣

قبل 3 أسابيع تقريبًا لاقاني فستان حلو شديد في محل، وما كان عندي سعرو
فلما اعتذرت من صاحبة المحل، قالت لي عاجبك؟
قلتَ ليها أيوا
فقامت جابت كيس من الدرج ختت فيو الفستان وقالت لي اسمك منو؟
قلتَ ليها صفِيَّة مصطفى
فقامت كتبت اسمي في الكيس وقالت لي ح اخليو ليك في الريسبشن، متى ما جبتي حقو تعالي شيليو

عدت فترة ورقدنا مستشفى وما لقيت طريقة امشي تاني

قبل أيام عديت بي شارع المحل وأول ما دخلت البت عرفتني وطلّعت لي الكيس

لغاية هنا الموقف عادي
الما عادي
إني لمن لبست الفستان انتبهت لي إنو التشكيلة الفيو هي نفسها الكان عجبتني في جلباب بت أهلي داك
بس تشكيلة وقَصَّة الفستان كانت أحلى عشرة مرات من الجلباب!

حسيت كأنو ربنا بقول لي ..
لما ما تمدّي عينك وتتمني حاجة زول، ح اعوّضك أحسن منها وأجبر بي خاطرك!
"ولا تَتَمَنَّوا ما فَضَّلَ اللهُ بهِ بعضَكُم على بعض"♥️!

في ظل انتشار فيديوهات وحياة الناس على مواقع التواصل
ح نتمنى كتير إنو يكون عندنا زي ما عندهم، واننا نعيش زي ما هم عايشين
وإنو ليه هم عندهم ونحنا لأ!!

ولكن بالمُقَابِل
تجربة رُقَادنا في مستشفى الكلى، علَّمتني إني ما أعاين للمافي والما عندي، والأحسن مني
بل أحمد ربنا إني ما في مكان العيَّانين ديل، وإنو ربنا رزقني جسد مُعَافَى ونفس طيِّبَة، وحياة هادِئة دون قلق المصير أو الخوف من المجهول بسبب سوء الحال!

الحمدلله على العندنا قبل المافِيش
والحمدلله على طيب الخاطِر بما رزقنا الله وأكرمنا بهِ
الحمدلله حمدَ عبدٍ عرفَ فشَكَر

خِتَامًا:
"وَلا تَمُدَّنَّ عَينَيكَ إِلى ما مَتَّعنا بِهِ أَزواجًا مِنهُم زَهرَةَ الحَياةِ الدُّنيا لِنَفتِنَهُم فيهِ وَرِزقُ رَبِّكَ خَيرٌ وأبقى"

_ورِزقُ رَبِّكَ؟!
=خيرٌ وأبقَى♥️!

#صفية_مصطفى

(قصَّتي مع سورة البقرة)

اترددت كتير قبل أكتب البوست ده لكن لعل يقراه شخص واحد بَس ويعمل بما فيهِ وربنا يكتب لينا اجرو بإذنه تعالى

بداية السنة كده عييت عيا شديد خلاص وماف أي علاج نفع معاي، وكنتَ طريحة الفراش لي أكتر من شهر، بس بي التهاب!
كانت الحمى ما بتفارقني، وضيق في النَّفسِ وألم حاد في الصدر
اتشخصت بي أزمة وما كلمت زول من ناس البيت، لفّيت حكاية 3 أو 4 دكاترة كده وكلهم قالو نفس الشي
اتصلت عليّ صحبتي تشوفني بقيت كيف وأدَّتني أمها تكفّر لَي
قالت لي يا صفية خلّيهو كلام الدكاترة، وواظبي على سورة البقرة بَس وحتبقي كويسة بإذن الله!

قلتَ خلاص يا صفية انتي ما خلّيتي باب ما طرقتِيهو، أرح جرّبي اطرقي باب ربنا وإن شاء الله ما ح تخيبي

البِعرفني بعرف إني أكتر مخلوق بتجرّس من سورة البقرة، ومستعدة اقرأ القرآن في جلسة واحدة وما اقرأ البقرة شدة ما بخاف منها🤣

أها قلتا بس يا أنا يا انتَ يا إبليس
مش عامل لي فيها خايف من سورة البقرة؟!
أرح بَس قدّام ورا إعدام🤣

وقلتَ بسم الله كده جبتا لي جردل موية ختّيتو قدامي، اتوضيت واتربّعتَ في نص السرير وبديت
يوم
يومين
تلاتة يوم

عينكم ما تشوف إلا الضُلمَّة🤣
بقيت كويسة؟؟
أبدًا واللهِ عييت زيادة🤣💔
قلتا بس خلاص
عييت زيادة معناها أي مرض جواي قاعد يطفو للسطح، وإبليس يشيل ويقول لي ياخ شوفي انتي تعبانة كيف وقّفيها بتبقي كويسة
اصدّقو ؟
قلتا ليو كضَّاب
تعبان انتا ده، والليلة بَل بَس🤣

أربعة يوم
خمسة
ستة
جاتني أفكار انتحارية عديل وقلتا الدنيا دي أنا يوم واحد زيادة ما دايرة اقعد فيها، وكان ما الواطة كانت ليل، كان وقعت البحر

سبعة يوم
تمنية
عشرين، تلتين يوم

بديت أحس بالعافية، البركة، والخير اترادم عليّ حرفيًا
قدر ما تتقفل من باب، تتفتح من باب أكبر منو
ما ضاقت عليّ إلا وربَّنا فرّجها
ما بكيت إلا وضحكت بعدها
ما عييت إلا وكان شفائي في سورة البقرة

شهرين، تلاتة شهور، أربعة
الحياة ماشة معاي فُلّة شمعة منوّرة♥️!

أنا الكنتَ قاعدة 3 سنوات فيها ما قادرة احفظها
حفظت سورة البقرة من التكرار سبحان الله، وبقيت بسردها غيبًا بدون ارجع للمُصحف بحمد الله

يوم من أيام النزوح دي
نايمين كلنا في الحوش، أنا وأمي وخالتي سرايِرنا قُصاد بعض
كنت بقرا شوية وأحس بي تعب، اسكت وتاني أواصل
غفيت وسامعة صوت الناس بعيييييد كده،
خالتي قالت لي أمي اليومين ديل صفية رجعت تاني لمن تقرأ البقرة تتعب!
قالت ليها أمس بالليل زي الساعة 3 كده جاتني صَحية وشايفة سرير صفية ده فيو نور، بقيت أقول ليها يا صفية مش قلنا ليك ما تساهري في التلفون
وهي ما ردت لي، قلتا إلا لابسة سمّاعة
قمتا من سريري رفعت من وشها البطانية لقيتا نايمة!
قلتا سبحان الله!!

ما تأويل النور ده إلا سورة البقرة وبركتها علينا واللهِ!
من سمعت الكلام ده
أقسمت على نفسي إني لو بيني وبين الموت سورة البقرة، أجيبا حتى أموت!
واسأل الله إنو اليوم اللي ح تُقبض فيهو روحي، أكون قريت سورة البقرة حتى مُتَّا!

فيا اخوانا
سورة البقرة في بدايتها حارة ليه؟!
لأننا ببساطة شديدة مفرّطين في الأذكار والتحصين، والعين حق!
فما ممكن تكون ماشي وجايي بدون تحصين، وما عايز تُصَاب بالعين أو الحسد أو غيرو

كل التعب ده هو في الحقيقة دَرِب عافية وخير
ووالله مع الالتزام والتعويد ح تلقو روحكم ونَفَسكم سورة البقرة

ياخ أقول ليكم شي؟
شُفتو صداع الجَّبنة داك لمن تفوت مواعيدها وما تشربا؟!
أها أنا بقيت كان ما قريت سورة البقرة دي قبل يجي الليل، بصدّع عديل، اللَهمَّ أدِمها نِعمَة🤣♥️

الظريف في الموضوع
بقيت محل ما أمشي أقابِض الناس من طرف، أرح اقرو معاي سورة البقرة

اقرّب امسك الناس في الشارع أقول ليهم ياخوانَّا اقرو سورة البقرة ياخ🤣!

ما لقيت من سورة البقرة إلا البركة والخير في نفسي وأهل بيتنا، وكل زول نزلتَ معاهو فترة نزوحنا دي وبدأ يقراها معاي
سِعَة في النفس والرزق والأهل وكل شي في الحياة واللهِ فالحمدلله الحمدلله الحمدلله

ومافي ختام أفضل من قولهِ عليهِ الصلاةِ والسَّلام:
"تَعلَّموا سُورةَ البقرةِ؛ فإنَّ أَخْذَها بَرَكةٌ، وتَرْكَها حَسْرةٌ، ولا يستطِيعُها البَطَلَة" البَطَلَة=السَّحَرة

عايزين تعيشو حياة جميلة وطيبة؟! اقرو سورة البقرة ياخوانَّا♥️

#صفية_مصطفى

طيب بما إنو الناس في تعليقات الفيسبوك ورسايل الخاص كلها متحمّسة لي سورة البقرة أنَّحكي ليكم القصة دي🤣♥️

عندنا بت خالةً لينا كده، نزحتَ معاهم كم يوم في بيتهم
وأنا أساسًا اسمي في الشهادة: هيي فلانة تعالي اقري معاي سورة البقرة🤣

زولتنا دي قدر ما نناديها عشان تقراها معانا، بتعمل ليها حجة من ماف تختفي بيها وما تظهر إلا بعد نقول صدق الله العظيم🤣

أها اليوم داك قلتا ليها الليلة من هنا دي ماف ليك قومة كان ما جبتي معانا سورة البقرة، وبالفعل قعدت الحمدلله
تدرون ليش؟! عشان قلتا ليها أرح اقري معانا سورة البقرة عشان أمورك تزبط وتعرّسي سريع🤣❤️
هي كانت مخطوبة جديد كده بس لسه العرس ما اتحدد ولا قالو شي،

أها يوم يومين تلاتة من الالتزام ما شاء الله
دقَّ ليها خطيبها ونحنا قاعدين عايزين نقراها

اسمعا ليك تقول ليو،
هوي أنا ما فاضية ليك ماشة اقرأ سورة البقرة، انتا زاتك امشي اقراها خلي عوارضنا دي تفك🤣

قلتا ليها يا بتي ده شنو ده ده!؟
قالت لي "بي لهجتنا بتاعت الجزيرة"

أكان باريتو في الكلام بمرقني في الساعة ١٢ بالليل ما بلقى زول يقراها معاي🤣❤️

الشاهد، إني تاني يوم مشيت منهم وجاتني بُشريات إنهم هي وأختها التزمو بي قرايتها يوميًا تبارك الرحمن

وتوالت البُشريات جد جد ما شاء الله وفجأة العريس قال ليهم جايين نعقد بكرة، وعقدو ياخوانَّا🤣🔥

الخُلاصة:
اقرو سورة البقرة ياخوانَّا خلُّو عوارضكم دي تفِك🤣♥️

#صفية_مصطفى
#سورة_البقرة

مرّة وأنا طالعة الصباح للشغل
لاقاني جارنا وقال لي اركبي اقدّمك
في ناصية الشارع أخد ليه وقفة صغيرة كده
رفع يدّو ولوّح بيها لي شافع واقف جنب باب بيتهم
وييين يا فلان
مالك اليومين ديل بقيت ما بتجي الجامع؟
الصبح بقى يفوت عليك...!
مشينا وأنا بعاين ليهم الاتنين بي دهشة
قاطع دهشتي جارنا وهو بقول لي
ده فلان!
قاعد يجي مع ابوهو صلاة الصبح بس شكلو اتعلم النوم!
طفل غالبًا في الصف الأول أو التاني أساس لو بالغنا يعني!
قبل سنوات
أبوي جا يحكي لي بي ولد جيرانّا صغير في أولى أساس
قال لي الليلة بعد صلاة العصر في الجامع
جا وقف جنب ابوهو وقال ليه
"يا أبوي أنا الليلة تميت 40 يوم وأنا بصلّي معاك في المسجد،، حتشتري لي العجلة؟"
أبوي زمان كان بلمّنا أنا وأخواني
ويحكي لينا
"كان يا مكان
في قديم الزّمان
ما يحلوا الحديث إلّا بذكرِ الحبيب المصطفى صلى الله عليه وسلم"
وتلقانا نحن بنردد معاهو المقدمة دي حتى بعدها نسكت وهو يبدا القصة
لحدي هسي أنا بلقى روحي في نص ونستي مع زول
استشهدت بي موقف ما بتذكر إنو لاقاني في كتاب أو قريتو
بعدها بستحضر انو ابوي حكى لينا قصة زي دي زمان
كل قصص الصحابة وكل الحكاوي ديك
رغم اني ناسية النصوص بتاعتها
إلا اني بلقاها حاضرة في تصرفاتي وأفعالي وطريقة كلامي!
واحدة من الأشياء اللي زرعها فينا أبوي
حبّ اللغة العربية والخط العربي!
كان كل إجازة بجيب لينا دفاتر تعليم خط وكُتب المنهج السعودي في اللغة العربية

الشاهد من القصص الفوق دي كلها والرابط بينها:
إنو القِيم اللي بنزعها في أطفالنا
بتظهر في تصرفاتهم وأقوالهم بعد يكبروا
وبتحدد مكانتهم عند الغير وفي المجتمع
عشان كده دايمًا وللأبد
"هُبُّوا إلى درجاتِ الكمالِ نساءً ورِجالا
ودرِّبوا على الفضيلةِ أطفالا"❤️
___
الصورة دي عبارة عن جدول اسمو (لعبة النجمات)
عبارة عن جدول لي شيخ سلمان العودة _فكّ اللهُ أسرهُ_
هو وأولادو وزوجتو -رحمة الله على من توفّي منهم-
مع كل إنجاز بتعمل نجمة ومع كل تقصير،، يقل عندك عدد نجماتك! "طريقة حلوة في تربية النَّفس"🌸

#صفية_مصطفى

(هل ممكن يكون الخير في الشَّر؟!) ..

أخوها ليو سنين ما بِصَلّي!
بتحكي لي صحبتي، قالت قدر ما حاولت مع أخوها في موضوع الصلاة ده ما بزبط، يصلّي يوم وما يصلي شهر
وهكذا استمَرّ الحال لمن في يوم الأيام ولدو تعب ورقدو مستشفى
أول ركعة من سنين
كانت في المستشفى دي لما سأل ربنا فيها وقال
يا رب تشفي لَي ولدي وترفعو!
قالت لي على الرغم من صعوبة الموقف النّحنا فيهو، إلا إني في عز الضيق داك، صدري انشرح بي شوفتو وهو ساجِد لي ربَّنا بعد هجر طويل للصلاة
ومن اليوم اللي اتوفى فيهو ولدو، هو محافظ على صلاتو الحمدلله!
(الخير كان في الشَّر)!

صحبتنا ليها سنوات مع القرآن الكريم نفسها تختِم ومع ضغطة التخصص الهي فيهو، ما كانت بتلقى وقت تتفرّغ فيهو لي حفظ القرآن
طلعت النتيجة وكانت repeat !
كلنا حزننا ليها شديد، لأنه أساسًا دراستهم صعبة وضاغطة بس قلنا لعله خير

على بال يجي السمستر الجديد وتنزل مع الدفعة اللي تحتها كان في قاب شهور
بدت فيهم رحلة جادة في حفظ القرآن الكريم ولما بدت السنة الدراسية كانت بفضلِ الله خَتَمت!

(الخير كان في الشَّر)

صحبتنا عندها أختها ما شاء الله ذوق وأدب وجمال خلقة وأخلاق، ما لقت شريك حياتها المناسب واتخطبت لكم شاب وما كانو مناسبين معاها وبتفركش الخطوبة
لغاية ما جات الحرب، وسافرو لواحدة من الولايات ولاقَت هِنَاك سَعَدها!
شاب ما كان حيكون في بيناتهم أي رابط يجمعهم غير الحَرِب اللي خلّتهم يتلاقو في ولاية هي أول مرة تمشيها وتسكن فيها، والحمدلله كان شبِيه ليها في الطِّبَاع وتمَّ زواجهم على ألف خير، وسط فرحة الأهل بعد شهور من ضيق الحرب وإحساس النّزوح!
(الخير كان في الشَّر)

لو قعدت أحكي في المواقف اللي بكون ظاهرها شر، لكن جوَّاها كان مدسُوس لينا في خير كبير، ممكن أحكي لغاية بكرة وما أخلص!

جملة كتير بتلاقينا
"ربُّ الخير لا يأتي إلا بالخير"
لو ثَبّتناها في حياتنا ح نرتاح شديد مع مجريات الأقدار البتحصل لينا
"عجَبًا لأمر المؤمن إنَّ أمرهُ كلّه خير:
-وَلَيْسَ ذَلِكَ لأِحَدٍ إِلاَّ للْمُؤْمِن-
إن أصابتهُ سَرَّاء شَكَر=فكانَ خيرًا له
وإن أصابتهُ ضَرَّاء صَبَر=فكانَ خيرًا لَه"

في سماحة وخير أكتر من كده ياخوانَّا؟!

أما أنا يا رب
فقَد رضيت بأقدارِكَ كلّها، خيرها وشَرِّها
آمنتُ باللهِ رَبًّا وبالإسلامِ دينًا وبُمحمَّدٍ ﷺ نَبِيًّا ورَسُولا

"كُتِبَ عَلَيكُمُ القِتالُ وَهُوَ كُرهٌ لَكُم وَعَسى أَن تَكرَهوا شَيئًا وَهُوَ خَيرٌ لَكُم وَعَسى أَن تُحِبّوا شَيئًا وَهُوَ شَرٌّ لَكُم وَاللَّهُ يَعلَمُ وَأَنتُم لا تَعلَمونَ"

كُلما تحس بيها جايطة وما مُرَتّبة عندك
كلما تشوفها ضاقت بيك شديد
اتذكر قول الله:
"واللهُ يَعلمُ وَأَنتُم لا تَعلَمون"♥️

#صفية_مصطفى

يوم كده في الحِلَّة قاعدين في الحوش أنا وناس البيت
كوركت لينا بت خالتي بالحيطة
ياخوانَّا قريتو سورة البقرة ولا لسه؟!
قلتا ليها وين اتي قبيل نادينا ليك قالو مافي، قريناها تعالي بكرة بدري
أكان اشوفا ليك مدّت لي كورة فاضية قالت لي هاك ناوليني فيها موية
موية شنو أجي؟
موية البقرة🤣❤️

ياخوانَّا اها ناس بيتنا بعد كمّلو الدراما بتاعت "ما ناديتوني اقرا معاكم"
وانتقلو لي كورتك وكبايتي ودي مويتك ودي مويتي🤣

أول ما اقعد في نص السرير ده كده أقول "ألف لام ميم"

بلقى جنبي جردل وجك وكم كوز كده وطاسة، أي زول بي ماعون!🤣❤️

اليوم داك بايتة مع خالتي قلت ليها أرح نجيب سورة البقرة قبل جوطة الفطور وقصص الجبنة بتلقى روحنا مرقنا في العصر وأنا بعدين المسا عندي لف في الحلة خلينا ننجز هسي

ألقاها ليك قامت على حافظة الموية جابتها قِدّامنا وفتحتا وقعدت، الليلة شراب موية سورة البقرة بالصَّف🤣❤️

وطبعاً ياخوانَّا مِمَْا لا يخفى عليكم إنو قراءة سورة البقرة في الماء وشربه بي نيَّة الشفاء من التداوي المشروع بالقُرآن ولا بأس فيهِ إن شاء الله

فالناس تحرص على قراية سورة البقرة، وتسأل ربنا بركتها وتدعي ربنا يجعل شفاها في القرآن

ونذكّر تاني إنو البيت اللي بتُقرأ فيهو سورة البقرة لا تقرَبهُ الشياطين مصداقًا لقول النبي ﷺ

ونذكّر برضو
"فإنَّ أخذها بركة وتركُها حسرة ولا يستَطِيعُها البَطَلة"♥️

#صفية_مصطفى

مبدئيًا
البوست ده ما شيل حال، ولا مُشاركة لي خصوصيات الناس التانية
وإنما كلام من قلب أخت لي أخواتها فأتمناهو يصل زي ما هو بدون ما تدخلو شكوك في النَّوايا ")

في الأيام الأخيرة دي، بقينا نشوف كتير من الاستشارات على شاكِلة:
_يا بنات أنا وحبيبي اتلاقينا وحصلت بيناتنا حاجة وما كنتَ قاصدة، أنا والله تُبت وندمانة بس هسي خايفة أكون حامل أعمل شنو؟

_يا بنات صحبتي لاقت حبيبا وحصلت بيناتهم تجاوزات، وهسي هي خايفة تكون حامل، نعمل شنو؟

_يا بنات حبيبي بعمل لي كيت كيت،كيف افرّق بين إنو ده تحَرُّش ولَّا نوع من التفاصيل الحميمية البتكون بين المرتبطين؟

ياخوَانَّا دقيقة بس
متين قالو في تفاصيل حميميَّة بتحصل بين مرتبطين؟ متين قالو لمن تطوّلي من حبيبك مفروض تتلاقو بالأحضَان؟ متين قالو الـkissing والـ hugging شي عادي بل أساسي في العلاقات؟عشان بعدها الناس تخُش في حتّة ضيقة وتبدا تفتّش في البرفعا بعد تقع!
خلّيتو للعرس شنو طيب ياخوَانَّا،خليتو للحلال شنو؟

أنا ما هايجة ومنفعلة.. أنا بس حاسة إني منهارة وراسي ح يشيب من البحصل لينا ده واللهِ

ما دايرة أطرح الكلام بدون حلول عشان يبدو كأنو اتنشن ساي

فالشَّاهِد من الكلام ده:
1. ماف زول ح يكون حريص عليك زيِّك يا بتي، احرصي شديد على نفسك من الهوى ومن التجاوزات دي ومهما غيرك زيَّن ليك إنو الحاجات دي سمحة وما فيها حاجة وانتي فايتك كتير يا أم جيقة
شيلي عن عينك الغباش والغشاوة حقت الوهم واتذكري إنو من أساس الدين والإيمان= مخالفة الهوى
2. الشيطان ما بقول ليك رايك شنو في الزنا زابط صاح؟ أكيد ح تشوفي الحاجة دي بعيدة ومستحيلة
لكن ياهو الشيطان بقول ليك نظرة، بسمة، مسكة يد، حُضن، أرح نتلاقى في حتة هادية عشان نعرف نتكلم
نتكلم؟ واللهِ؟؟
أهو دي نتيجة الكلام في الحِتَّات الهادية والجّخانين!!
3. من البداية خلي بينك وبين الحرام حاجز ومسافة أمان (المصافحة،اللبس،الـ dates،ونسة الليل الملانة تفاصيل ما ياها،المكالمات الطويلة، اللقاءات البدون حواجز، والعلاقة الاسمها - نحنا حبايب لغاية ما يكوّن نفسو ويجي يتقدَّم-) = افصلي الحاجات دي عشان تضمني لي قلبك الحلال
4. الحب زيُّو وزي أي رزق= مكتوب ومُقدَّر لينا،فما تستعجلي الرزق بي معصية لا تُحمَد عُقباها

وصدّقيني، الحلال يستاهل شديد
يستاهل نصبر عشانو ونربط على قلوبنا ألف عقدة صبر عشان ننال البركة، اصبُري الصَّابرات روابِح!

ربنا يرزقنا الحُب الحلال.. ربنا يرزقنا الحُب الحلال ويجنّبنا الحرام مهما كِتِر
ويا رب ما نشوف الغلط عادي، ولا الحرام عادي
واتذَكَّري= "من صَبَر ظَفَر"

في الخِتام..
ألا فاحرصي على قلبِكِ يا فتاة.. ♥️

وشُكرًا
وعفوًا
#صفية_مصطفى

بعد خلّصتَ من تدريس حلقة السيرة النبويَّة الحمدلله دخلتا أقعد جوا شوية على بال يأذّن العصر ونصلي
جاتني واحدة من الطَّالِبَات قالت لي:
أنا في عرفة دعيت ربنا يجمعني بيك، وهسي دي كده واحدة من دعوات عرفة اُستُجِيبَت بحمدِ الله!!

لا بعرف المعسكر، لا كنتَ بعرف مدني، ولا حصل لاقيت البت دي أو اتكلمت معاها، وساقني القدر من يدّي جابني ليهم في المعسكر ده وفي الظروف دي سبحان الله

قبل عرفة بي يوم تقريبًا بتذكّر صحبتنا كتبت في الاستوري شاركونا بي جزء من دعوات عرفة للسنة الفاتت وربنا استجابها ليكم

كانت الدعوات كتيرة شديد ومختلفة شديد برضو
واحدة من الدعوات اللطيفة اللي أخدت ليها بالي واحدة قالت دعيت ربنا يطوّل لي شعري ويلهمني معرفة الحاجات البتنفع معاهو، وبالفعل خلال السنة دي شعري طال طول ملحوظ شديد تبارك الله!

واحدة من أحب العِبَادات لقلبي هي عبادة الدُّعاء!
وواحدة من هواياتي المفضلة أسمع قصص الناس اللي ربنا استجاب ليهم واسلّي بيها عن نفسي وقلبي!

عبادة الدعاء عبادة عظيمة وجميلة، وربنا يغضب من العبد إذا ما دعاهُ
ليه؟
لأنو ماف زول في الدنيا دي ما محتاج، محتاج لي كل شي
والحاجة والافتقار ديل لو ما كانو لله، فإنتَ أكيد ح تمشي تُذَل عند الخلق وتسألهم حاجتك
وربنا جل في علاه عايز المسلم يكون قويّ النفس عزيز، لا يسأل إلا الله، ولا يفتقر إلا لله، ولا يطلب إلا من الله

كذلك عشان يربّينا على إننا ما نعاين لي العند غيرنا، ويجينا شعور إننا أقل منهم وربنا ما مُكرِمنا!
"وَلا تَتَمَنَّوا ما فَضَّلَ اللَّهُ بِهِ بَعضَكُم عَلى بَعضٍ لِلرِّجالِ نَصيبٌ مِمَّا اكتَسَبوا وَلِلنِّساءِ نَصيبٌ مِمَّا اكتَسَبنَ وَاسأَلُوا اللَّهَ مِن فَضلِهِ إِنَّ اللَّهَ كانَ بِكُلِّ شَيءٍ عَليمًا"

تفاصيل كتيرة مُرهقة بالنسبة لينا، حاجات كتيرة نفسنا ربنا يدّينا ليها، وأمور كتيرة عايزين ربنا يهوّنها علينا، وشتات كبير في القلب والنفس ما ح يتلَم إلا بي سؤالنا لي ربنا

فياخوَانَّا..
السلف كانو شِدّة ما بسألو في صلاتهم ربنا من أي شي، أي شي حرفيًا يعني
كان الواحد فيهم لو نِعَالو دي اتقطعت بسأل في صلاتو ربنا يرزقو واحدة تانية، وكان الملح في بيتو انتهى بسأل ربنا يدّيو ملح

وده مِصداقًا لقول رسوله الكريم عليه أفضل الصلاة وأتم التسليم:
"ليسأل أحدكم ربه حاجته كلها حتى شِسعَ نعلهُ إذا انقطع"

هل حدد لينا في الحديث ده نحنا نسأل بس عن الحاجات الكبيرة والبتستاهل بَس؟
ياخوانَّا نحنا لمن نسأل، قاعدين نسأل رب كريم إذا دُعي استجاب، وإذا سُئل أعطى

أكلو حلال، واعبدو ربنا، وصلّو وأدعوه في صلاتكم من أي شي، وما تمدّو عينكم لي العندَ الناس،وما تقولو يا رب عايز زي فلان، اسألو ربنا يدّيكم من فضلو هو كريم بدّيك أحسن من العند فلان ده!

أخيرًا..
ختّو قدام عينكم وقلبكم:
ليسأل أحدكُم ربَّهُ
حاجتَهُ كلَّها♥️

#صفية_مصطفى

خلّوني أشارِك معاكم تجربتي للسنة الفاتت؛ بما إنو الدنيا مشارِف سنة جديدة عسى تفيد زول منكم♥️

بداية السنة الفاتت عِييت شديد وكنت راقدة تقريبًا من نهاية شهر ١٢ ولغاية شهر واحد بصورة متواصلة لدرجة أدَّت لي إني استقيل من وظيفتي وأخلّي كل نشاطاتي المُعتادة

نصحتني واحدة جزاها الله خير بي إني أرقِي نفسي بي سورة البقرة، واحاوِل اعمل حجامة إذا تيَسّر لَي

ولأني كنت تعبانة شديد الصراحة، لو وقتها وصّفت لي الكَيّ علاج كنت عملتو!

اشتريت لي جهاز حجامة ومشيت اتحجمت عند دكتورة في الثورات، وجبت لي زيت زيتون وصفق سِدر
عملتَ كالآتي:
_اتحجمت
_عملت صفق سدر "fresh" في موية عادية وقريت فيها
_قريت كذلك في زيت الزيتون
_التزمت بسورة البقرة يوميًا

كنتَ كل يوم بالمسا بغتسل بي موية السدر دي، وبدهِن جميع جسمي بالزيت وبشرب من موية سورة البقرة دي
التزمت بالبرنامج ده فترة الحمدلله
ومن بعدها بقيت وأنا في المواصلات، في الشغل، في البيت بغسل في العدة ولا قاعدة ولا أي شي
بقرا سورة البقرة أيًا كان الوضع الأنا فيهو
المهم إني ما افرّط فيها

ولا اخُفي عليكم ياخوانَّا إني كنتَ بتعب شديد والموضوع ما كان ساهل واللهِ، لكن سبحان الله في معونة كده بتجيك من ربنا لما تصدُق النيَّة، وأنا الصراحة كنتا ممكون وصابر🤣
فدعيت ربنا شديد وكتير إنو يعينّي ويشفيني ويخليني التَزم بسورة البقرة أيًا كان التمن والحمدلله معونة ربنا لازَمتني

والحمدلله الحمدلله
من وقتها وإلى يومنا هذا
سورة البقرة ملازماني زي ضُلِّي
على قدر ما اتقلّبت علينا الظروف، واتشرّدنا ونزحنا، ورقدنا مستشفيات، ومرّت عليّ أيام أنا بكون فيها قاعدة في كراسي ستات الشاي القصاد المستشفى الساعة ٣ صباحاً عشان ما عارفة امشي وين واعمل شنو بعد شفتا عدد من الجنايز بتطلع قدّامي!

في عز الحرب دي والصدمات النفسية المرّينا بيها بي سببها
كانت سورة البقرة زي عُكَّاز بتسَنِد عليو عشان ما أقع

عايز بركة تلاقي
رزق تلاقي
صبر عر الابتلاءات تلاقي
خير وفير وثبات تقيل برضو تلاقي

وكلو بفضل الله سبحانه وتعالى ومن ثَمَّ سورة البقرة

ولو في حاجة حقيقي تستاهل تبدا بيها السنة الجديدة وتلتَزم بيها فهي إنَّك تدخّل سورة البقرة في روتين حياتك عشان تِنعَدِل وحالك ينصَلِح
"اقْرَؤُوا سُورَةَ البَقَرَةِ، فإنَّ أخْذَها بَرَكَةٌ، وتَرْكَها حَسْرَةٌ، ولا تَسْتَطِيعُها البَطَلة، أي السَّحَرة"..♥️

#صفية_مصطفى
#سورة_البقرة

قبل فترة أخت صحبتي اتوَفّت -ربنا يرحما ويغفر ليها- وأنا كنتَ وقتها قاعدة مع صحبتي دي لما جاها الخبر
طول ما نحنا قاعدين وبحاوِل أواسيها في مصيبتها دي وفقدها لي اختها اللي في عز شبابها ونجاحها وحب الناس ليها
فجأة من بين الدموع والحزن داك قالت لي
"يا صفِيّة ماف شي هسي في بالي غير إنو أختي ماتت قبل تتحَجّب"
قالتها ودخلت في نوبة طويلة من البكا والحُزن

اختها كانت إنسانة جميلة من جوا وبرا سبحان الله، محبوبة لكل من حولها، خدومة، هميمة، ناجحة ومتفوّقة ورافعة راس أهلها
شلنا الليل كله وهي بتحكي ليّ عنها، وعن جمال طِباعها
وكل ده، كل ده هي ما وقفت عندو زي ما وقفت في فقرة إنها ما كانت محجبة!
الواحد مؤمِّل شديد في رحمة ربنا وإنو روحها الطيبة وقلبها اللين وهيّن يكونو تُقَال في ميزانها ورحمة ربنا واسعة واللهِ وظننا فيهو جميل إن شاء الله نلقاها قدامنا في الجنة تقول لينا ربنا دخّلني من غير سابقة عذاب ولا حساب

لكن
الذكّرني القصة دي
أمس في أثناء الهلع والخوف الداخل فينا من دخول الدّعامة لي القرى القِدَّامنا طوالي ونحنا شِبه بنعاين للموت ولي رحمة ربنا ولطفو بينا -على حدٍ سواء-
ما جا في بالي غير ذنوبي الـ كالجبال!
بقيت أقول هسي كان دخلو علينا تمّونا أنا امشي وين؟ اقابل ربنا بي شنو؟..وفي عز التساؤلات دي ماسكة تلفوني، دخلتا تلغرام
لقيت واحد من المشايخ مرسل في قناتو:
بعتذر عن تأخري في الدرس عشان شبكتنا كانت واقعة!
ذكرني بالضّبط موقف واحدة من نساء غزَّة، كانت فاتحة زوم بتدرّس في طالباتها قُرآن
فإذا بقذيفة تقع في بيتهم والطالبات يسمعوها ويشوفوها بتموت أثناء الحَلَقة وهي بتدرّس!

ياخوانَّا
الموت حق علينا كلنا
الليلة ولا بُكرة
موت فجأة ولا موت غدر ولا موت شهادة
أيًا كان السبب أو اليوم أو الطريقة

انتا كـ عبد مُطَالب تكون جاهِز في أي لحظة تسلّم ورقتك
في أي لحظة وعلى أيةِ حال
سلمًا أو حرب
نزوح أو استقرار
في عافية ولا عندك ابتلاء
في النهاية انتا مطالب بي العبادة والعمل لي الآخرة

دي أيام رجوع لي ربنا ياخوانَّا وأيام عمل تقيل
لا هي أيام جِرسة ولا أيام ياكُل فيها الحزن قلوبنا ويهِد فيها حيلنا
خلّونا نشد حيلنا ده كده شوية ونرجع لي ربنا، عسى بي رجوعنا ده ربنا يرفع عننا البلاء ويخفف عننا تُقل الأيام دي ويعافينا ويعيد لينا أيامنا الأُوَل

اللَهمَّ اغفر لنا وارحمنا، اللهمَّ عليكَ بالدعم السريع فإنّهم لا يُعجزونك، اللهمَّ انصر قوَّاتنا المسلَّحة وسدّد رميهم، آمين

#صفية_مصطفى