كان مرَّة
سمعتا قصة شيخ كان كلما يتسابق مع طُلَّابو كان يسبقهم ويفوز عليهم رغم كِبَر سِنّو
فالطلاب استغربو كيف يا شيخ عمرك كبير كده وكل مرة بتفوتنا!!
فقال ليهم:
"هذه جوارِحُ
حفظناها للهِ في الصِّغَر، فحفظَها لنا في الكِبَر"♥️!

بتكونو شايفين التايم لاين والاستوريز اللي كلها اخبار وفاة سبحان الله وكل يوم نسمع زول من أصحابنا اتوفَّى ليهو زول عزيز وهكذا!
كم زول ربنا قبض روحه قبل رمضان ونحنا الحمدلله الحمدلله ربنا بلّغنا أول ليلة فيهو!

حرب، وجوع، ونزوح، وأحزان تِطَّاقَش، هموم تقيلة عايزين نرميها على عتبة بابو ونقول ليهو يااااااااااااااا رب تفرّجها علينا خلاص ضاقت
دعوات كتيرة شايلِنّها لي ليالي رمضان
دموع كتيرة كتيرة شديد
عايزين نبكيها في سجدات التروايح
وأمنيات داخرِنَّها لي دعوات رمضان

كل ده
كل ده عايز مننا همة عالية، وروح عالية، ويقين قوي شديد في ربنا إنو يخفف عننا ويجبر خواطرنا ويعيننا على الصيام والقيام وصالح الأعمال

لكن قبل ده ياخوانَّا لازم نتذكر
إنو ده شهر طاعات وبِر، أبدًا وإطلاقًا ياخوانَّا ما شهر مسلسلات ورمضان vibes اللي بنشوفا دي وغيرها من المعاصي الما بتشبه المسلمين ولا بتشبهم في رمضان تحديدًا دون غيرو..
﴿ذلِكَ وَمَن يُعَظِّم شَعائِرَ اللَّهِ فَإِنَّها مِن تَقوَى القُلوبِ﴾

ولو عايزين ربنا يدّينا فلازم نقدّم بينَ يديّ دعواتنا دي كلها خير وأعمال صالحة

الحرب دي شالت مننا كتير شديد ياخوانَّا ومَلَت قلوبنا دي خراب واحزان
خلونا نجهّز قلوبنا دي لي رمضان، ونبكي ونتجرّس في أبواب ربنا ونسأله من حنانو يحِن علينا ومن لطفو يلطف بينا ومن كرمو يكرمنا ومن خيرو يوَسِّع علينا

جهّزو دعواتكم لي رمضان، جهّزو قلوبكم لي الختمة والقرآن والتلاوة والتدبر
قيمو الليل بي خشوع، صلوا بي خشوع وادعوا بي ابتهال شديد
عسى ربنا ينظر لي حالنا ونحنا في طاعة يرفع عن السودان الهم البيهو ده ويرجّع لينا وطنَّا الزين

عايزين كل واحد يتخيل إنو بي ذنبو ربنا حا يحرمنا كلنا وبي طاعتو ربنا حا يفرجها علينا كلنا
ويستشعر كده إنو صلاح حال بلدنا دي ما ببقى إلا بي صلاحو هو أول زول!

شِدّو حيلكم ياخوانَّا واحفظو قلوبكم وجوارحكم من المعاصي يمكن ما نحضر رمضان ده ولا الجايي!

يا رب تسلمنا لي رمضان وتسلّمو لينا وتعينَّا فيو على الطاعة وتتقبل مننا
يا رب يكون آخر رمضان ونحنا بعيدين عن بيوتنا يا رب ينعاد علينا ونحنا تامين لامين والسودان بي خير ونحنا بخير، يا رب نحنا وأخواننا المستضعفين في غـ..زة وسائر بلاد المسلمين آمين آمين آمين

كل عام ونحنا بخير♥️..

#صفية_مصطفى

أمس بالليل كنا قاعدين كده ما عارفين نعمل شنو في العشا
بعد شوية كل واحد فينا بقى يقول مقترح لي حاجة خفيفة وسريعة، وإذا بنا بعد دقايق نملا الصينية ما شاء الله والخير باسِط!

أثناء ما طالعة ونازلة في تايم لاين ملان بي تهاني وتبريكات رمضان
كنتا بشوف منشورات لي جدول فيهو أصناف فطور عشا سحور طيلة شهر رمضان، وناس بتشارك في صينيّة وسُفرة فطورها في رمضان وأصناف أشكال ما ليها أول من آخر ما شاء الله!

اتذكرت اخوانا هناك، عرفتوهم؟؟ اللي تم استدراجهم بي مؤونة جايَّاهم وفجأة حصل الحصل!

اتذكرت اخوانا اللي نزـحو معانا من الخرطوم، لكن ما نزلو في بيوت إيجار ولا مع أهلهم وإنما في معسكرات وخِيَام ومدارس!
يا ربي حالهم كيف؟! ..وبفطرو على شنو؟ ..

ياخوانَّا عايزة منكم حاجتين بَس
الأولى تتذكرو إنو الحال الانتو فيو هسي ده أحسن من حال ألف غيركم، تحمدو ربنا عليو صباح ومسا ..

والتانية،
قبل ما ترفع بوست Ramadan vibes، ارفع صحن لي جارك الما عندو حق الفطور
وارفع بوست تبرّعات ماشة لي ناس منتظرين جنيه وجنيهين مني ومنك
ارفع يدّك بالدعاء للبلد ولي اخوانا المسtضعفين في بلاد المسلمين التي نعلم

قبل ما اقفل البوست ده، حابة أقول إنو تُقى صحبتي شغالة إفطارات في معسكر السرايا دنقلا،
اتصدّقو في حسابها ده:
2228653
بي اسم: تقى عبد الوهاب عباس
واتذكرو إنو رمضان ده شهر خير وصدقاتنا فيو مقبولة بإذن الله فما تحرمو نفسكم الأجر، واتذكرو الآية دي:

﴿ها أَنتُم هؤُلاءِ تُدعَونَ لِتُنفِقوا في سَبيلِ اللَّهِ فَمِنكُم مَن يَبخَلُ وَمَن يَبخَل فَإِنَّما يَبخَلُ عَن نَفسِهِ وَاللَّهُ الغَنِيُّ وَأَنتُمُ الفُقَراءُ وَإِن تَتَوَلَّوا يَستَبدِل قَومًا غَيرَكُم ثُمَّ لا يَكونوا أَمثالَكُم﴾

وإذا ما عندك، احتسب أجر الصدقة بي شير للبوست ده وانتا ماشي♥️") ..

#صفية_مصطفى

دائمًا ما يرافق طالب العلم شهور العطاء، لأنه يدرك مقدار ما يحمل في قلبه!💙

لقاءنا الأول مع أسامة عز الدين ومرام الخيرى أسميناهُ "من بين أنيابِ الحرب"
لنرى هذه الزُمرة التي نهلت من عَذب العلوم وأشرفها ، فتعلمت كيف تنتزع من بين أنياب الحرب فرصاً تبثّ من خلالها إضاءات القرآن، تبصر الثغور حيث هي فتسدها، وتتحسس مواطن النقص من حولها لتجعله اكتماﻻً.
يُحدِّثوننا هنا عن الرِحلة، والسِّقاية، وحُلو الثمار وأطيبها..

اترك العالم حولك، ضع سمّاعتك وانضم إلينا.💙

https://t.me/Almajalistv/1794

#لقاءات_النور 3
#إعلام_مجالس_النور
#مجالس_النور

سئل الحسن البصري: ايختصم المرء مع والديه؟
قال: ولا مع أحذيتهما
♥️

أمبارح واقفة في المطبخ، وعايزة اشتغل في البوتجاز قدر ما حاولتَ اخرش الكبريت ما راضية تولّع لَي عشان نوعا كعب
وأشيل وأحاول وما عندي طريقة إني احرَد العشا واعمل اندومي بي البويلر عشان خلاص القصة بقى فيها زوجي قُرة عيني ولازم نرُص صينية تسكِّت الخَشَّامة🤣

وأنا لسه واقفة في مرحلة الكبريت، العود الأول ما زبط والتاني والتالت والعاشر
فَضّيت الكبريتة دي كلها في المسطبة أظني لغاية ما الحمدلله والشكر لله ولّعت معاي بعد قَوَّمت لَي نَفَسَي وزَهّجتني🤣!!

أها في عز الموقف ده سرحتا بي خيالي في كمية الأعواد الخرشتها دي عشان بَس اولّع لي نار!!

وجا في بالي محاولاتنا في جهاد أنفُسنا عشان نواصل في طريق ربنا!
كم عود كبريت خرشناهو في طريقنا ده !!
محاولاتنا في الحجاب
محاولاتنا عشان نحفظ جزء عم وتبارك
محاولاتنا عشان نطلع من بيوتنا بدون نتعطَّر
ومحاولاتنا في غض البصر

اتذكرتا محاولاتي في إني احفظ القرآن وكيف لسه بجاهِد عشان احفظ الآية والآيتين
أول سنة نزلتا مركز تحفيظ
والسنة البعدها مشيت معسكر مقفول
والسنة التالتة بديت حلقات أون لاين
والسنة الرابعة بقيت احفظ براي لما النت قطع
وهكذا
احفظ يوم واقيف شهرين ولسه ما حفظت!
ولغاية ما أموت حا يكون هدفي وأُمنيتي في الحياة دي إني احفظ القرآن واحفّظو لي أولادي بإذن الله

وهكذا ياخوانَّا ..
كل زول فينا عندو عبادة بجاهد نفسو فيها
العايزة تتحَجّب، والعايزة تغض بصرها، والعايزة تخلّي الأغاني والعايزة تبطّل المصافحة

كم عود كبريت خرشناهو في طريقنا ده ؟!
في النهاية
وزي ما إننا حاولنا كتير عشان العود يولّع معانا وما كسرنا الحنك
هوَ السيرُ في طريق الله
زي أعواد الكبريت
ح نحاول مرة واتنين وألف
نخلّص صندوق كبريت وما نكسر الحنك
نجيب البعدو وما نكسر الحنك

يا وصلنا لي مُبتغانا ونجحنا في جهاد نفسنا
يا مُتنا ونحنا بنحاوِل نولّع عود كبريت♥️!

#صفية_مصطفى

لأول مرة أحس نفسي زاهدة في الدنيا دي قدر كده!!

زمان دايمًا بحس إني نفسي أعيش وانبَسِط باللحظة وأسعى لي إني اشتغل شغل كويس اعِز بيو روحي وناس بيتنا
بعد الح.رب والنز.وح الوضع بقى مختلف

بقيت ما بنقنق زي زمان لو لقيت العيش بايت ما جديد
عشان الحمدلله في عيش وغيرنا ما لاقي

ما زعلتا عشان ما عُسنا آبري
لأنه أهلي في الجزيرة ما عندهم كهربا ليهم شهرين وبشربو موية من الزير
الحمدلله نحنا عندنا عصير!!

ما اتجرَّستا من قطعة الكهربا زي رمضان الفات
عشان نحنا قاعدين في بيت وضُل وغيري قاعد في المعسكرات ومظلات الزنكي والحصير

صاح ن.زحنا وطلعنا من بيوتنا، لكن لسه عندنا خيارات ناكل شنو وما ناكل شنو
عندنا تلاجة وموية باردة وسرير ننوم فيهو وملابس نضيفة وحلوة لابسنَّها

المرة دي نحنا فقدنا كتير
بَس كِسبنا أكتر
كِسبنا الرِّضا واليقين واتعلّمنا نكون شاكرين حامدين ونعاين لي الناس التعبانين أكتر مننا
اتعلمنا نكون رحيمين بي غيرنا، واتعلّمنا ندّي اللقمة لي الجيعان ونمد يدنا لي المحتاج ونقيف مع العيَّان ونشوف ليو علاج
اتعلمنا نرفع يدنا بالدعا ونقول يا رب ليك الحمد نحنا كويسين وأهلنا بخير!

صاح قَد ما نكون تامّين لامّين
لكن كويسين ياخوانَّا وأحسن كتير من غيرنا
نحمد ربنا ونشكرو خيرو باسط ويدّو ملانة وعطاياهو علينا ما ليها حَد

يا رب حامدين وشاكرين، يا رب تديم علينا نعمة الأمن والعافية والستر

ما ننسى ياخوانَّا نرفع يدنا لي ربنا بالحمد والشكر
ونمد يدنا لي غيرنا بالصّدقات

وزي ما قلنا قُبَّال كده
تُقى صحبتي شغالة إفطارات يومية في معسكر نازحات دنقلا (معسكر السرايا)
ما تحرمو نفسكم من الأجر، اتصدّقو في حسابها ده:
2228653
بي اسم: تقى عبد الوهاب عباس
وإذا ما عندك، احتسب أجر الصدقة بي شير للبوست ده وانتا ماشي♥️") ..

#صفية_مصطفى

لَحَىٰ اللهُ الفِراقَ ولا رَعاهُ
فَكَم قَد شَكَّ قلبِي بالنِّبَالِ🥀

بتذكر أيام النزوح الأولى لمن مشينا الجزيرة
كان وضعنا المادي صعب شديد، يكاد يكون ماف قرش أحمر في البيت لمدة تتجاوز الشهر عادي🤣
يومنا كان بمشي بي دقيق الكسرة البجينا، وملاح الويكة وأيام نجازف لينا حبّتين طماطم من جاي وجاي
ونكورك لي مرت خالي تزيدنا طرقتين كسرة🤣 ونكورك لي خالتي تدينا طماطمة طماطمتين،
وتمشي مآب جري تجيب لينا زيت فول من بيتهم ونزبّط لينا صحن كسرة بي طماطم كااااارب كده نشيل بيو حيلنا لي تاني يوم الحمدلله
بعدو نشوف ويكتنا والأم رقيقة بي وين، وهكذا
الوجبة المفضلة والاقتصاديّة بالنسبة لينا كانت بليلة عدسية، رشة ملح رشة سكر ولو الله اداك رشة زيت🤣♥️
والملاعق تِطَّاقش
مشكلتي معاها كان الحيرقان الما بتطفيو موية الزير🤣💔

أها في ليلة كده من ليالينا، مهوّيين شديد وضاربنا الجوع أها ربّك رب الخير أنعم علينا بي كيس شعيرية وظرف شاي اسمو "البَطّارية"

ولّعنا فحمنا داك وسويناها وشدّينا الشاي ده وقعدنا كلنا في الحوش
الليلة ديك كانت ليلة سعيدة عديل ياخوانَّا
ناكُل ونتمَطّق تحلف تقول بناكل في شيّة جمر يوم عيد🤣 -الله يجازيك يا حميدتي كان سويتا فينا-

بقينا شغالين عاد الليلة عيد أكلنا الشعيرية وشربنا شاي البطّاريَّة🤣🤣♥️

أها بعدها رغم الوضع المستمر والنزوح الـ خشا العضم، ربنا برضو فاتِحا على الناس والخير كل يوم باسِط والحمدلله دايمًا خيرو باسِط🌸

لكن بعد الفترة ديك تحديدًا نحنا بقينا ناس متواضعين شديد، وقنوعِين شديد، وملانين رِضَا شديد
بننبسط بي أقل القليل، ونجود بالموجود ونمد لي الجار ونتذكّر المساكين ونتصدّق قدر ما الله يدينا
احساسنا بالغير بقى زايِد، وشعورنا بي حوجة غيرنا بقى واضح وبقينا نساعد أكتر وندّي أكتر لأننا فهمنا واتعلمنا تمامًا يعني شنو تكون في حوجة أو تنوم جيعان عشان ماف لقمة في البيت!!

عشان كده ياخوانَّا أصلو ما حا ازهج من إني كل يوم أقول ليكم عندنا أخوات نازحات في معسكرات الولايات
والناس شغالة ليهم افطارات رمضانية بشكل يومي تبارك الرحمن
الحوجة يومي في ازدياد
والمبالغ كبيرة وياهو بتتمّا وتتجازف بي جنيه مني وشير منك
وكالعادة ح اذكركم تاني
تُقى صحبتي شغالة افطارات يومية في معسكر نازحات دنقلا (معسكر السرايا)
اتصدّقو في حسابها ده
2228653
تقى عبد الوهاب عباس محمد
ولو ما عندك، احتسب أجر الصدقة بي شير للبوست ده وانتا ماشي♥️

#صفية_مصطفى

ورد في فضل ليلة القدر الكثير من الأحاديث المبينة لفضلها، وقد كان من هدي النبي صلى الله عليه وسلم في العشر الأواخر أن يعتكف من شهر رمضان لكي يتحرى ليلة القدر، وفي فعل النبي صلى الله عليه وسلم حث لباقي الأمة على الاجتهاد في العبادة في هذه الأزمنة المباركة .

يقول فضيلة الشيخ محمد صالح المنجد : "قد كان النبي صلى الله عليه وسلم يجتهد في العشر الأواخر من شهر رمضان ، ما لا يجتهد في غيرها".

وفي الصحيحين من حديث عائشة رضي الله عنها أن النبي صلى الله عليه وسلم " كان إذا دخل العشر أحيا الليل وأيقظ أهله وشد مئزره "

في ظل هذه الظروف قد يغفل الكثير منا عن اغتنام واستغلال هذه الايام المباركة، وقد يضيق على نفسه التصور عن العبودية بحصرها في جوانب قد لا تتاح مع الأوضاع الاستثنائية .

📌لذا يدعوكم نادي سكول الديني في محاضرة بعنوان :
العشر الأواخر (سعة العبودية .. في ظل الظروف الاستثنائية )

مع فضيلة الشيخ : محمد خلف الله

⏰الزمان : السبت ٣٠ مارس /٢٠ رمضان
، الساعة ١٠ مساءًا

📍المكان : قناة النادي بالتلقرام
https://t.me/Sc_R_C

#كن_صالحا_مصلحا
#نادي_اسكول_الديني

نحنُ نتعامل مع ربّ لا يُفتّش عن ماضيك إن تُبت.

انت عارف معنى الحديث القدسي : ( غَفَرْتُ لكَ على ما كان فيكَ ولا أُبالِي ) ؟

أهي ( ولا أبالي ) دي معناها  : ومش هنفتح الموضوع ده تاني ، ومش هنذكر الذنوب دي تاني.

- الشيخ محمد خيري.

بما إنو القناة هنا تشمل الجِنسين، وبما إننا ك بنات محتاجين مجتمع خاص حبة حبتين تلاتة، نتكلم فيو ريكوردات، نفتح لايفات، ومساحات نقاش، أو ننشد ونغنّي كلو بما يرضي الله😂
المهم،،
على الرابط أدناه، مساحة خاصة بالبنات ومجتمع نحبّه كثيرًا؛

ننتظركم فيه بكل الشوق والحُب والفعاليات بإذن الله🤣❤️

نستقبل أول طلبات ونقول ألو🤣❤️

https://t.me/+Vcpc0yXLw7szMjQ0

ننوِّه يا جماعة إننا ما بنقبل إضافة أي معرّف ما عليو اسم مستخدم واضح يدل على إنك بت

يعني ما ينفع يكون اسمك ( . )
ماف زول اسمو نُقطة، فشنو، اكتبو اسمكم عديل عشان نضيفكم عديل🤣💙

__"وما رزقتني مِمَّا أُحِب فاجعلهُ قُوَّةِ لي فيما تُحِب"🩵

حتّى وإن كانَ الامتحانُ غدًا، وأنتَ لم تفتحْ كتابَك بعد، لا تيأس وتترك المذاكرةَ بالجملةِ وتقل: "زي ما تيجي تيجي"، إيّاك!
نحنُ أمَّة الفسيلة؛ وإن كانت القيامةُ غدًا، أُمِرنا بغرسِ الفسيلةِ ولو تأكّدنا يقينًا أنَّا لن نشهدَ أو نجني ثمارها، اغرس الفسيلةَ وذاكِر لآخرِ لحظةٍ، واتعب لآخر دقيقةٍ، ولا تظنّنَ أنّ الأمرَ بالكمِّ أو العددِ، استعِن باللهِ وتوكَّلْ عليه واعمل بقدرِ وسعك وطاقتك وربّك المعين، وأجرك عليه.

- إبراهيم إمام.

‏"تأسفين على احتجابِ اللفظ وأنتِ المعنى."💜

‏كتب رجل إلى سفيان الثوري: أن عظني فأوجز.

فكتب إليه: عافانا الله وإياك من السوء كله، يا أخي إن الدنيا غمها لا يفنى، وفرحها لا يدوم، وفكرها لا ينقضي، فاعمل لنفسك حتى تنجو، ولا تتوانَ فتعطب، والسلام.

- حلية الأولياء.

لا تتصرّف كأنك الحارس الأول والأخير لكل ثغورِ حياتكَ وتفاصيلها
لا تتيقّظ لدرجةٍ يُخيّلُ إليكَ فيها أنّ كل ركنٍ ستلتفِتُ عنه سينهدُّ..
لم يخلق اللهُ فيكَ عقلًا ولا قلبًا ولا روحًا تستطيعُ تحمُّل كل هذا، ولم يجعل ذاكَ شأنكَ ولا جعلكَ على نفسكَ حفيظًا، تصوّر!
ليس في الأمر مفاجأة، لستَ أنت الحفيظ على شؤونكَ ولو كنتَ لهلكتَ ولَطاشَ اتزانُك من سنين
فاهدأ فإنك لن تؤتى من ثغرٍ كفاكَ الله همّه، ولن ينهدّ في حياتكَ ركنٌ أقامهُ مولاكَ وربُّك
لا أدعوكَ للتواكُل، لا أقولُ لا تحرُس ولا تكترِث، لا أقولُ التفِت ولا تُقِم أركانك
لكنّي أقولُ لا تقلق، أبدًا !
فليس بإمكانك حراسة حاضركَ ومستقبلِك بالقلق
جرّب بعد الاجتهاد وقبلهُ لذة الاستعانة بالله ورمي الهم عند باب الله وراحة تفويض الأمر لمن بيده الأمر،
فهو خيرٌ حافِظًا، وهُو
أرحمُ الراحِمين 💜

"وإذا العِنايةُ لاحظتكَ عُيونُها
نَم، فالمخاوفُ كُلهُنَّ أمانُ" 💜

سأُخبّرُ المختارَ يومَ لقائنا
عن من أُحبُّ وأننا إخوانُ 🩵

ما زالت الأخبار مقطوعة تمامًا عن أخواتي وأخوي وباقي أهلي في قرية ام عضام بعد دخول الدعم السريع عليهم صباح أمس
بلغتنا أخبار سيئة عن وفاة عدد كبير من شبابنا في الحلّة💔
وكذلك عدد كبير من المصابين في مستشفى المناقل

أنا للأمانة ما حصل رفعتا حوجة في صفحتي قَط بي حسابي الشخصي ولكن لو في يدي شي حاليًا اقدّمو لي أهلنا هناك فهو إني افتح باب للتبرّعات لعلنا نقدر نقيف مع أسر المصابين والمحتاجين من أهلنا
حاليًا في عدد كبير منهم في مستشفى المناقل وعندي علاقات مباشرة مع دكاترة هناك ممكن يتكفّلو بتوصيل المبلغ المجموع ده ليهم، جزء من التبرعات إن شاء الله ح نحاول نطلّع بيهو عدد من الأسر المحتاجة لمكان آمن برا الجزيرة
وربنا يصلح الحال💔
ودعواتكم ربنا يطمني على أخواتي وأخوي وأولادهم وجميع أهلي وما يُريني فيهم مكروه🥀
رقم الحساب: 2335279
باسم: صفية مصطفى عبدالله

الناس تساهم ولو بالقليل، وتعمل شير للبوست ده كرمًا