عيون الأدب ومْعلّقات الفصيح اورود
على ارضك تراثٍ باعتزازه مخلّدها

وانا لوكتبت من الغزل في وصوف الخود
قصايد تفيض من الدّرر من شواردها

عليك اكتمل عقد النوادر ونفح العود
شذى حروفٍ تتوّج بحبك فرايدها

يا ارض الحضارة والبطولة ودار الجود
ومهد الرسالة والعروبة ومولدها

على ذكر تأسيسك من محمد ابن سعود
ثلاثة قرون بذروة المجد نعقدها

قيام السعودية بإمامٍ وعزم اجدود
ثلاثة مراحل ثبتت بك قواعدها

امامٍ بنى الدوله وجنبه سند واعضود
رجالٍ على السنّه سليمٍ عقايدها

وامامٍ تلاه امام يكمل مسير افهود
يروم المعالي والصعايب يمهّدها

وعلى الثانية من راع الاجرب سناك يعود
تجلاّ بنور ٍكلّ ظلمة يبددها

وعلى الثالثة عبدالعزيز الملك والطود
بنا مجدها ثم دفّة الحكم وطّدها

ومن الدّولة الأولى عصورٍ مضت وعهود
ليا الدولة العظمى وسيرة موحّدها

تواريخ وامجادٍ عليها الفخر معقود
معالم هويتك العظيمة شواهدها

وردنا من العزّه على المنبع القرهود
بوقتٍ بهالدنيا شحيحٍ مواردها

يا اعظم بلد واطهر ثرى عن حماك نذود
وعلى ركونك اصروح المفاخر نشيّدها

وتوجّه على شطرك جميع العباد اسجود
وتعلّق بك قلوبٍ رضا الله مقاصدها

ومن عمق تاريخك ليا الحاضر المشهود
جذورٍ ترسّخ للثقافة روافدها

ومن عزم سلمان المكارم رقانا سنود
عسى الله يعز الدار ويعز قايدها

على ذكره ابكار المعاني يجن وفود
توارد على شمّ الخصال ومحامدها

وعلى يمينه محمد ذرا الخايف المضهود
وريث الزعامة والمفاخر وسيّدها

نهض بالبلاد وكل كايد هدف منشود
طموحٍ سما فوق النجوم وتقلّدها

حماة الوطن والدين في طاعة المعبود
وحرم مكة وطيبة فخدمة مساجدها

وهذا الشرق الاوسط في ذراهم رخاه يزود
وكم مدت اشعوب ودول من موايدها

واسود الشرى لازمجرت من غضبها ارعود
تقول السما فوق البسيطه رواعدها

تزلزل كيان وتخلي اعروش فوق حشود
ملوكٍ يصالي بطشها اللي يعاندها

وخطوب السياسة لاستشاطت ببيض وسود
بقصر اليمامة عاهل يحلحل اعقدها

وروس الدول تذعن لراس ٍ عليها يسود
ليا ضاق تخضع وان رضا جنبه اقعدها

وحنا هل العوجا ليا كلّح البارود
خوا روسنا بخوض المعارك نقنّدها

#فيصل_دخيل_الله

(جديد⁩)

‏في ضفاف الحلم الاعظم للمعاني ضفّه
‏برهنت عزمٍ مايفتر في رجا مطلوبه

‏تعظم الغايه بجهده والصعاب تحفّه
‏بالمخاطر فالطريق وخطوته محسوبه

‏يترك السهل المطرّف لو دنا للحفّه
‏وينحر الصعب المهيب اللي يزيد صعوبه

‏راسي اللي في سماه وعن هواه وشفّه
‏ماتعذّر لو ظروفه بالعناد تلوبه

‏يلوي اذراع الظروف وتعتدل في صفّه
‏وكبّر بشمّ النوايف معتلٍ مشذوبه

‏وخاطري في معزلٍ فيه الضلوع تنفّه
‏كلّ ماعوّد بلاي وبين نوب ونوبه

‏يحتدم فالصدر ضيقٍ كل ضلع يدفّه
‏لاذكرت اللي جرالي فالهوى ودروبه

‏ليلةٍ هارونها سلّ الصقيل بكفّه
‏وفي صبيحتها بني برمك صحت منكوبه

‏وعوّد بخفي حُنين من الحنين بخفّه
‏من ترجّل عن شداده في ظهر منجوبه

‏شالعٍ قلبي غزالٍ وسط نجد امرفّه
‏مترفٍ يلعب بعرشه في وطن محبوبه

‏الحيا والوصف الاعظم والستر والعفّه
‏والجمال الباذخ النادر وحسن اسلوبه

‏قوةٍ كَنْهَا جيوشٍ فالوغا مصطفه
‏من طلايعها الجحافل تنثني مغلوبه

‏جاعله ربي بكفّه والبنات بكفّه
‏مايضاهي حسنه الطاغي ولا رعبوبه

‏تشرق الشمس فجبينه والبروق اترفه
‏واللحاظ اسهوم والمبسم غمر منسوبه

‏كوثرٍ يمزج دواي ولذّته بالشفّه
‏العذاب النشوه ان زادت يزيد اعذوبه

‏لهف نفسي كل ماهفهف نسيم وهفّه
‏لاتفرعن ثم تفرّع بالفتن نبنوبه

‏النحر فيه الثمر يانع يادوب يضفّه
‏وضامرٍ بطنه وردفه ينجبع به ثوبه

‏بري حالي ياعناقٍ من ظمأ يلتفّه
‏ضمةٍ فيها يكفّر عن جميع اذنوبه

‏ياحبيبي ماتعكر دون وصلك صفّه
‏والله انك في ذراي عن الشقا وخطوبه

‏مانقص من كل لهفه ياحبيبي وفّه
‏التغلي والهجر فالحب وش ماجوبه

‏الغياب اللي تمادى عن حبيبك كفّه
‏عاشقك من حربة الفرقا نجا باعجوبه

‏يفرح القلب بوصالٍ للحياة يزفّه
‏فرحة اللي فاق للدنيا بعد غيبوبه

‏⁧ #شعر⁩ ⁧ #فيصل_دخيل_الله⁩

جديد

‏البَنُون وكثرة المال هي زين الحياه
‏والمكارم تمّمت عقب تنزيل الوحي

‏والمبادي والقيم للفتى سترة نجاة
‏والجمايل تنحفظ للوفا ما تنمحي

‏والفتى لامن صلاحه تبدد من رداه
‏مثل من عوّد حليقٍ وقبلٍ ملتحي

‏والرجل لاصار يعرف مداه ووش وراه
‏طاح قدره وانطحن طحن حبٍ فالرّحي

‏تجذب الطيّب عروقه ولا يلحق مداه
‏والوضيع بْسكة الذلّ ملحيٍ لحي

‏والستر نعمة وثوبٍ ويهشم من رماه
‏هشمة الغصن الخضر لانْسلب عنه اللّحي

‏قلّوا العقّال واهل المروّه والدّهاه
‏وجارفٍ كل المهابيل سيلٍ منتحي

‏ابلشونا تالي الوقت من كل اتجاه
‏عالمٍ لاهي تقدّر ولاهي تستحي

‏من رجا فاللاش فزعه وتقديرٍ وجاه
‏مثل من يرجي بجثمان ميّت عرق حي

‏⁧ #فيصل_دخيل_الله⁩