Ucell деган расво компания бор. Хизмат ва алоқа сифати ҳақида кўп гапирилган, майли буни бир четга суринг. Бошқа қилиғи ҳам бор. Буни аввал ҳам ёзгандим.

Охирги ойларда тинимсиз реклама мазмунидаги хабарлар ола бошлагандим, бу ҳеч тиним билмаяпти. Танишимнинг тавсияси билан компанияга мурожаат қилганман. Хусусий тижорат корхоналари менга реклама юборишни қандай уддалаяпти, қизиққанман.

Менга маълум бўлишича, компания учинчи шахсга рақамимни бермаган, аммо улар билан тижорий шартнома имзолаб, рекламани Ucell ўзи юборяпти. Ишлам калламай қолди яна.

Алоқа оператори мижозларидан бир оғиз сўрамай рекламани босиб ётибди. Демак, хизмат учун тўлов олмаса ҳам бўлади, чунки мижозлари орқали рекламадан даромад топиш мумкин. Масалан, кун.уз Телеграм каналига аъзо бўлиб, янгиликлардан бохабар бўлишингиз учун тўлов ундирилмайди, лекин реклама жойлаштириш ҳуқуқини ўзида сақлаб қолган.

Бундан ҳам қизиғи - уларнинг хабарида реклама маркировкаси йўқ. Шу жойда Монополияга қарши курашиш қўмитасига салом. UzAutomotors'дан бўшаб олсангиз, бир қараб қўйинглар.

Рақамли иқтисодиётга ўтмоқчи бўлган давлатда алоқа оператори мижозларнинг шахсий маълумотларидан шундай фойдаланса, рақамли иқтисодиётни ҳам 25 йилда қура олмаймиз.

Ps. Ренессансга эса анча бор.

Ўзбекистон Марказий сайлов комиссияси раиси Мирзо Улуғбек Абдусаломов ва Тараққиёт стратегияси маркази раҳбари Элдор Туляков Тожикистонда президентлик сайловини бевосита кузатишмоқда.

МДҲ ва ШҲТ вакиллари ҳам бор. Шу икки ташкилот делегацияси дунёдаги исталган сайлов натижасини тан олса керак.

Ютуб ва Инстаграм оламида вайнер, влоггер ва интервьювер ҳаваскорлар кўпайган. Эринмай видеоларини кузатаман, ахир журналистнинг асосий иши - ахборот тўплаб, уни таҳлил этиш ва жамоатчилик эътиборига ҳавола этиш-ку.

Хуллас, шу тоифа ижодкорлар ичида ҳам ўзаро бўлиниш бор: кимдир қандайдир ўзига образ яратиб олган, барчасининг маълум миқдорда обуначиси, кузатувчилари бор. Аммо ҳаммасига хос битта умумий сифат мавжудки, у жамиятга салбий таъсир қилиши мумкин.

Уларнинг деярли барчаси видеоларда брутал сўзлашув тилидан фойдаланяпти. Бу томошабинларда муаллиф ўзини эмин-эркин тутиши, рост гапириши, халқчил ва самимий гапираётгани ҳақида нотўғри тасаввур пайдо қилиши мумкин. Кейинчалик, шундай образ орқали ахборот маконида сохта хабарлар, тор гуруҳлар манфаатидаги пропаганда ҳам тарқатилиши мумкин.

Дўстларимга шунчаки тавсия: брутал сўзлашув билан бошланган ҳар қандай видеодан сақланинг. Бу ҳиссиётлар билан ўйнашиш, дея қабул қилинг.

Брутал - қўпол, кескин, безбетларча. Дангал сўзи билан адаштирилмасин.

Депутат Расул Кушербаев бож масаласида жиддий курашни бошламоқчи, деб ёзилмоқда.

Бу жуда тўғри. Монополист «Ўзавтомоторс»га қарши ҳар қандай восита билан курашиш лозим.

Шу ўринда ҳурматли депутатимиздан EQUINOX, TRAVERSE, TRAILBLAZER ва TAHOE моделларини импорт қилишда «Ўзавтомоторс» бож тўловларини амалга ошираяптими ёки йўқми, шу масалани ҳам кун тартибига олиб чиқишни сўрайман. Бу моделлар истисно тариқасида бож тўловларисиз Ўзбекистонга келтирилаётган бўлиши ва давлатга тўланиши лозим божлар «Ўзавтомоторс» томонидан фойда сифатида ўзлаштирилаётган бўлиши мумкин. Ахир «Ўзавтомоторс»нинг ҳар бир қадами ва бизнес схемаси "давлат сири" грифи билан истеъмолчилардан яширилган.

Агар прейскурант нархларини калькуляцияга солсангиз мазкур истисноли схемадан Volkswagen Caddy ва Škoda Kodiaq моделларини импорт қилишда ҳам фойдаланилаётган бўлиниши мумкинлиги борасида гумонлар пайдо бўлади.

Ва табиийки, ўз-ўзидан савол туғилади: Нега «Ўзавтомоторс» бож тўламай авто импорт қилиши мумкин, бошқа импортерларга бу тирқиш тақа-тақ ёпиқ.

Ўзбекистонда қонун барчага баробар эмасми?

Монополист деса, хафа бўладиган «Ўзавтомоторс» компанияси матбуот хизмати суд мажлисидан муқобил видеони эълон қилди. Қизиқ, айрим кадрлар умуман йўқолиб қолган.

Судья сўз навбати Сахаповга, марҳамат деди-ю, лекин Сахапов чиқиши олиб ташланган. Судда Антимонополия қўмитаси вакили Сахаповнинг нутқида компания фаолиятига доир умумий маълумотлар бўлгани, ишга ё аризадаги даъвога оид гап йўқлигини таъкидлаганди. Менимча, «Ўзавтомоторс» ҳам шу гапга қўшилиб, Сахаповнинг нутқини видеодан қирқиб ташлаган. Сахаповнинг савол-жавобида ҳам компания манфаатига путур етказадиган қисми (6.00) олиб ташланган.

Наргиза Отахонова компания нархи кўтарилган, аммо етказиб берилмаган автомобиль учун қўшимча тўлов ундиргани ҳақида тан олиб гапирганди. Бундай «қовун» ҳам тозаланибди.

Отахоновага судья яхши савол берганди. Бу ҳам йўқолиб қолибди. Наргиза машина бутловчи қисмлари ўзгартилиб, тан нарх ошганини айтганди. Лекин 1996 йилдан буён ишлаб чиқарилувчи «Дамас»нинг конвейрдаги йиллари эскириб, амортизацион харажатларидан қолган пулларига қизиққан қўмита вакилининг саволига Сахапов бошқача жавоб берган.

У айтганки, йиллар давомида машина модели ўзгаришсиз қолмаяпти, бутловчи қисмлари алмаштирилиб, қолдиқ маблағлар шу ерга сарфланган. Латифада айтилгандек, ё мушук, ё гўшт йўқ.

Хуллас, видеони 21 дақиқагача кўрдим. Фойдасиз.

@the_bakiroo импорт қилинадиган машиналар бож тўлови масаласида зўр кейсни келтириб чиқарди. Яъни ану монополист деса, хафа бўладиган «Ўзавтомоторс» компанияси импорт қилиб, халққа сотаётган машиналар учун бож тўловини тўлайдими?

Шу саволга назарий жавоб бериш учун @the_bakiroo тенгламани ечган.

Агар компания чиндан импорт қилинаётган Caddy учун бож, ҚҚС ва утилизация йиғими тўласа, машинанинг Ўзбекистонга киришдаги нархи 5 314 доллар бўлиши керак. Чунки у сотувда 172,1 миллион ёки 16 минг 645 доллар.

Хуллас, ниманидир ҳиди келяпти, а?

Фейсбукдаги аккаунтим орқали қўйилган постга шундай изоҳ қолдирилган. Изоҳ қолдирувчи шартларнинг бирини бузгани учун, мурожаати бўйича тайёрланган материал эълон қилинмаган.

Буни тўғри, деб ўйлайсизми?

"Одам ўз қарорларини нотўғри бўлишидан қўрқади. Шунинг учун ўз қарорлари тўғри эканлигига ўзини умри давомида ишонтириб яшайди. Бу касалликка барчамиз чалинганмиз",

Иқтисодчи Беҳзод Ҳошимов дастурчи Павел Дуровнниг ёш кўриниш сирлари ҳақидаги фикрига муносабат билдирибди. Яъни кузатув ва тадқиқот натижасига кўра, турмушда яшаган жуфтлик ёлғиз инсонга қараганда кўпроқ умр кўради. Дуров эса ёлғизлик ёш кўринишга сабаб бўлиши ҳақида айтяпти. Демак, ёш кўринган одам кам яшайди, деган хулоса келиб чиқиши мумкин.

Шунинг учун, одамлар ишонч ва қарорларини нотўғри бўлишидан қўрқиб, турли оқлов ўйлаб топади.

Доллар курси нега ошди?

Иқтисодчи эмасман, лекин кузатувларим бўйича бир хулосани тақдим қиламан. Хорижий валютанинг қадри нега ошади? Менимча, бу аввало ўша давлат иқтисодиётига бўлган ишонч билан изоҳланади.

АҚШ сиёсатчилари пандемия иқтисодий инқирозини бартараф этиш учун иқтисодиётни рағбатлантирувчи навбатдаги моддий кўмак пакети тайёрлиги ҳақида маълумот беришди. Шу гапдан кейин жаҳонда АҚШ доллари қиймати яна ошди.

Молия вазири ўринбосари айтгандек, иқтисодий фаровонлик сиёсий қарорларга боғлиқ.

Мунозара клубининг илк йиғилишига ҳам 3 ой тўлди. Кейинги йиғилишда қандай макроиқтисодий мавзуда мунозара бўлишини истайсиз?

Расул Кушербаев — «Ўзавтомоторс», депутатга қарши иш ва ижро ҳокимияти ҳақида

Олий Мажлис депутати Расул Кушербаев «Ўзавтомоторс» иши, судда гувоҳ сифатида сўроқ қилингани, депутатга босимлар ва парламент ҳаёти тўғрисида Kun.uz билан суҳбатлашди. У ижро ҳокимияти, хусусан маҳаллий ҳокимият органларини танқид қилиб, мулоҳазаларини билдирди.

👉 Мақолани ўқиш

📹 Тўлиқ видео

Kun.uz Telegram каналлари👇

Ўзбекча | O‘zbekcha | Русская

Бугун селекторда Бош вазир Абдулла Арипов Монополияга қарши курашиш қўмитаси раиси Нажмиддин Шариповни танқид қилиб, уни популизмда айблабди. Масала — «Ўзавтомоторс» иши.

Манбанинг айтишича, селектор кун тартибидан «Ахборот муҳитидаги ҳолат, матбуот котибларининг фаолияти самарадорлиги, улар томонидан ахборот манбалари билан ишлашдаги муаммо ва камчиликлар тўғрисида» мавзу ҳам жой олган.

Йиғилишнинг шу нуқтасида Бош вазир Шариповни танқид остига олиб, унинг раҳбарлигидаги қўмита томонидан эркатой «Ўзавтомоторс»га нисбатан кўрилаётган чораларни популизм, дея баҳоланганмиш.

Айтишларича, текшириш натижалари бўйича чет эл консалтинг компанияларнинг хулосасини олмаган ҳолда қўмита махсус комиссияси хулоса чиқарган.

Популизм? Яқин орада шу сўзга яна қаерда дуч келдик? Ҳа, эсладим, «Ўзавтомоторс» депутат Расул Кушербаевни популизмда айблаганмиди? Демак Монополияга қарши курашиш қўмитаси «Ўзавтомоторс»нинг бир ўзи билан курашмаяпти, унинг орқасида ҳукумат турибди.

Қачондан давлат органининг назорат функциясини бажаришда чет эл консалтинг компанияларнинг хулосасини олиш талаби пайдо бўлиб қолди. Тушунарсиз. Қонун талабими бу, жаноб Бош вазир?

Расул Кушербаев, қўмитадаги 5-6 нафар ходим, майли, раиси Шарипов ҳам популист экан, шунчаки Ютубда эълон қилинган суд репортажи остидаги изоҳларни ўқинг. Наҳотки, бир гуруҳ манфаати халқ иродасидан устун турса?

Бир яхши инсон айтган: тушкун бўлма, бу — кураш майдони. Халқ фаровонлигини кўзлаб қадам ташлайдиганлар йўқ эмас, аммо унга қаршилар ҳар жойда ва вақтда топилган. Масала эса халқ манфаатини ўйлайдиган гуруҳи қанча эканида. Агар консерватив қадамлар кўпайиб, ислоҳотчилар ҳукуматдан четлаштирилса, ваъда бериб айтаманки, аниқ «суриш керак» бўлади. Чунки биз яна 2015 йилга қайтамиз.

Хайрли тонг, миллат. Автомобиль давлат рақами шунақа шаклда ҳам берилар экан. Энди кўрибман.

«Ва Аллоҳ қилаётган амалларингиздан хабардордир». (Бақара, 271-оят)

Ўртоқлар, сиёсатни яхши тушуниш учун сиёсий назариялар эмас, иқтисодий мунозараларни кузатиш керак. Бу — менинг шахсий хулосам.

Шундай экан, Youtube'даги Беҳзод Ҳошимов каналига обуна бўлинг. Видеоларини кузатиб боринг. Баъзан русча, инглизча, лекин ўзбекча субтитрлари бўлади. Бўлмаганига Беҳзод ака, субтитир қўйинг, кенг омма суҳбатлардан баҳраманд бўлсин.

Мен суҳбатлар орасидан Тимур Ишметов, Одилбек Исоқов, Сергей Гуриев, Иса Ҳалафир, қўйинки ҳаммасини алоҳида ажратиб кўрсата оламан. Шунчаки, мароқ билан томоша қиламан.

Бошгинамга ағанаган катта тоғлар, алвидо.
Мен кетарман ҳасратланиб, руҳи соғлар, алвидо!
Бу дунёнинг шўришига навниҳоллар тебранинг,
Эслироқ боғбони йўқ, қолди боғлар, алвидо!

Шайтанатдаги Анварни эсладингизми? Ажойиб персонажнинг прототипи аслида шоир, ношир ва журналист Асқар Қосим бўлади. У 40 ёшида ўз жонига қасд қилган. Ўзбек бўлиб, туғилмасайдим, кўрмас эдим шунчалар хорлик, сатрлари учун таъқиб этилган. Китобларни аввал шунчаки ўқиб қўйган эканман. Энди ҳар бир диалогни ҳис этяпман.

PS: сиёсийлаштирилмасин. Бу бир йил аввалги постим.

Ҳукумат матбуот котиби бош вазир танқиди тўғрисидаги постимни савол остига олибди. Яъни мен Ариповга нисбатан халқда ишончсизлик яратишга уриниб, оммада англашмовчилик ва турли муҳокамаларга сабаб бўлувчи постни ёзишни мақсад қилганмидим?

Қисқа жавоб: йўқ.

Кенгроқ айтганда эса менинг постимда билдирилган маълумот ҳукумат йиғилишида янграганини АОКА раҳбари Асад Хўжаев ҳам тасдиқлабди-ку. У ҳолда Асад Хўжаев ҳам халқни бош вазирга қарши қайрамоқчими?

Монополияга қарши курашиш қўмитаси раддия берди, деб айтишганди. Хабарни ўқидим. Унда аввало, ҳукумат йиғилиши қайси масалага бағишлангани, селекторда UzAuto Motors ё қўмита фаолияти юзасидан ахборот тингланмаган, қўмита ҳисоботи эшитилмагани айтилади. Менинг постимда ҳам шундай бўлганди, деганмидим?

Хуллас, мен учун ҳамма гап айтилибди. Мен бу мавзуга нуқта қўйдим.

Яна ҳалиги гап, вазир Бобожонов, тизимни ислоҳ қилиш керакми? https://t.me/TYUZBEK/12419

Шахсимга нисбатан ғаламислик бошланди. No name Замир Холмахмадов (эмишки, иқтисод фанлари номзоди, доцент) бош вазир танқиди масаласидаги постимга муносабатда шахсиятга ўтлаб кетган.

Қисқача қилиб, шу шахсни камера қаршисида теледебат, суҳбатга таклиф этаман. Афсуски, бир суткада алоқага чиқмаса, бисотимдаги айрим фактларни оммага ошкор қилиб, хулоса чиқаришни халққа қолдираман. Шу керакмиди сизларга?

Маҳалламиз мушукларига мазззааа.

Хуллас, менинг постимга муносабат билдирган одамлар ва уларнинг фикри:

Фозил Додиев, иқтисод фанлари номзоди (Банк-молия академияси кафедра мудири) — Шаффофлик ва очиқлик компания обрўсини оширади, миш-мишни камайтиради

Замир Холмахмадов, иқтисод фанлари номзоди (Молия институти Молия-банк иши кафедраси мудири) — Монополияга қарши курашиш қўмитаси ҳақиқатан ҳам “популизм” билан шуғулланмоқдами?

Тоҳир Маликов, иқтисод фанлари доктори (Молият институти профессори) — Холисона хулоса олиш - бунинг нимаси ёмон?

Одил Олимжонов, иқтисод фанлари доктори (Иқтисодий тараққиёт ва камбағалликни қисқартириш вазирлиги ҳузуридига институт лойиҳа раҳбари) — Кимда ахборот бўлса, у дунёни бошқаради!

Шунча профессор-доцентлар муносабат билдиришга ташна бўлиб турган экан, бизда монетар-фискал сиёсат юритилиши бўйича мингдан ошиқ савол бор эди. Афсус, аввалроқ билмаган эканмиз. Сизларни таниб олдик. Майли, биз популист, сиз реал масалада муносабат билдира оласизми?

Бизнинг саволларга ҳам жавоб берасизми? Буюртмалардан вақтингиз ошса, алоқага чиқинглар, ҳурматли профессорлар!