لو ازف الصبح لعيون العمى
مايشوف من السواد الا سواد

ربما اني مصيب وربما
اني اخطيت وتجاوزت المراد .

اللي جرحه الحضور وحنّ لـ غيابه
‏ودّع عيونٍ بـ دمع الخوف ذارفته

‏من زود ما هوب متأذي من احبابه
شوك الحذر صار ينبت حول عاطفته .

الحزن لو هو يعلّك عادي اللي يعل
‏ضحكٍ يمرّك على حلّه ولا تضحكه

‏لوامة النفس واخطائي كثيرة جعل
‏ربّي يسامحني فـ شيٍ ماعاد أملكه

‏جرّبت كل المشاعر من رضا لا زعل
‏وانمسحت خطوط كفي من كثر ما افركه .

‏ياما حضنت المتعبين بـ هالحياة
‏حتى غدى صدري مخيّم لاجئين

وياما رميت أمالي بكلّ أتجاه
حتى عرفت أن الحياة أخطر كمين .

بدا اليأس يثعى في عزومي شويّ شويّ
‏وبديت أتظاهر بـ المكابر وأنا والله

‏لو أفضفض أخلّي فياض الكلام مليّ
‏مثل مستجيرٍ قالوا إسلم وجاب أقصاه .

‏﴿وَلَقَدْ نَعْلمُ أَنَّكَ يَضِيقُ صَدْرُكَ ﴾

وأسألك بكل اسمٍ سمّيت به نفسك أن تعيدني إليك برفق، كلما ضيعتني السبل وأن تحفظ قلبي من كل فجيعة .

أخاف الموت خوفًا حقيقيًا، ولن أكابر بزخارف القول وأتشاجع في موطن أعقل مواقفك فيه أن تكون مشفقًا، أرجو من الله أن يقبضني وأنا واسع الخطو في السير إليه ..
وأن يعفو عن خطاياي، ويجبر نقصي، ويسامح غفلتي، ويعينني على خجلتي منه سبحانه .

يارب لاينكشف للناس ستر الشعور
أسترني بدنيتي وأستر علي الممات

حتى لو إنّي مخلد لين يوم النشور
بعيش خايف أموت وفايتتني صلاة .

يارب وأنت أقرب من الواحّد لقلبه
‏وأنا اللي في خاطري ماهوب في يديني

‏يسّر لي العسره وليّن لي الصلبه
‏وأغفرلي ذنوبي اللي بينك وبيني .

﴿ إِنَّ ٱلۡمُتَّقِينَ فِي جَنَّٰتٖ وَعُيُونٍ  ﴾

یارب ابي منك العزيمة والصلابة والثبات
في قلبي بوجه الذنوب كبيرها وصغيرها

يارب عبدك هزّته سود الليال العابسات
ولا لقى له واحدٍ غيرك يعدل سيرها

انا الغريق اللي رماه الموج بين المغريات
أغفرلي ذنوبي وساعدني على تغييرها

تعبت اكون الغصن قدام الهبوب الذاريات
لا ضاعت الخطوه وضاع الدرب من تقصيرها

خايف من المجهول بوجيه السنين المقبلات
ولا قدرت ألمح من الدنيا سوی تکشیرها

ومدري متى بـ اوادع اللي فات و ألمّ الشتات
وانا لا جيت افارق جروحي تجيني غيرها

مکسور خاطر و اطلبك طول الرضا والأمنيات
اللي بدونك بـ انتهي قبل ارتوي من بيرها .

لا زلت اعاني من الوحده وكثر الملام
وأرواح داخل ضلوعي تستلذّ تعبي

‏اخاف لا طال صمتي يستبيح الكلام
‏الدمعه اللي تراود عزّتي وهدبي .

مابين إني أعيش ومابين اموت اشوفني مفقود
مراكب عمري بـ ليل الأسى ياصعب مرساها .

يا جعل ليله تكبّرني معاناها
فدا من العمر ضحكاتي وانا طفله

ترکت رغباتي الحلوة لـ مجراها
عسى ما تأكل فوادي وتحسّف له

من ضرّ روحي سنين الود ينساها
لا يتقي من غضبي ولا أتحلف له

لكن نفسي من يشوّه نواياها
يروح منها الرجى يائس وهي جفله

يعيش في عيني الصادق لو ابكاها
لين يتحلفني من الشكّ واحلف له

طبيعتي في العلاقات اتحاماها
اللي أحبه ربيع العمر ياقف له

مشاعري اللي تصبّ بنارها ماها
يا لو على روحي أن جت بتّكاتف له

اعزّ داره ودارٍ سافر وجاها
وأعادي عداه وأقف واتطرّف له

تذبل من البعد روحٍ قربي احياها
في حزةٍ صورة الذكرى تخطّف له

يا من لـ بنتٍ صفت على مسمّاها
عيّا لا يلقى وفاها قلب منصف له .

محتاج للعزله ومحتاج للغيبه
‏وإني أواجه قسى الإحساس من تالي

‏أغلب مجالستي لـ ربعي من الريبه
‏يا كثر ماني بـ خايف أجلس لحالي

‏يوجعني الجرح لين يخلّف الطيبه
‏والطيبه جروح واجد مالها والي .

سامحيني وأقبلي تنهيدتي ياضلوعي
المساء الليله ماهوب اللي من أول عصره

طاحت دموعي وأنا مانيب أحب دموعي
ولا أنحصر الشعور اللي عجزت احصره .

ضحكات الأيام لـ إلحاح الرجاء عيّن
‏لا الأرض أرضي ولا صدر السماء كوني

‏ما عادني بـ الحشيم الهادي الليّن
‏أركى علي الزمان وثقلت متوني

‏يا رب هذا الحزن بالوجه لا يبيّن
‏وش عذري من الشموخ ليا أنخطف لوني

وأنا إن شكى لي صديقي همه الهين
‏بانت على حد رمشي دمعة عيوني .

يجفّ الحبر ويجفّ اللسان ومحجري مبلول
اثر بعض الكلام يسيل لامن سالت دموعي

انا اللي اغرق بكلمة لو انه مالها مدلول
واتوه بفكرةٍ مرة ولا القى خط لرجوعي

اقول اني قوية صح لكن فالنهاية قول
خذ العلم الصحيح برجفتي لا من كثر روعي

كبرت اعاند ظروف الحياة القاسية وانول
من القسوة ماخلاني اعاند ليّن ضلوعي .