ماعاد عشنا العيد ضحك وزغاريد
رحتوّا بطعم العيد يـ أهل المقابّر .

ليته مشاورني واسوق الفدايّا
واحط في قبره ثمانين رجّال .

اذيت بطن امي عشان اجّي الحياة
‏اثر الحيّاة اضيق علي من بطنها .

‏من كثرة الافكار في هذا المساء
‏ احس بـ الضوضاء حتى في الهدوء

من لم يكن بين العلن مثل الخفاء
‏ يحتاج إعادة خلق وإعادة نشوء

ما للظلام الا دهاليز الشقاء
‏ الشمس في شتى البقاع تشع ضوء

مع التلوّث من تمسك بـ النقاء
‏ حتى ولو الايام ساءت مايسوء

عييت لا اطرق غير بيبان السماء
‏ انا استحي حتى لـ اعز انسان ابوء

مهما استمر الكرب واشتد البلاء
‏ لا استطيع الا الى الله اللجوء .

‏هبّ لي حناناً من لدُنكَ وضمّني
‏في حضن روحِكَ ربِّ إني مُتعبُ .

أنا خبلة دموعي ما تعرف المزح بالذكرى
على أدنى شي يطري ذكرياتي جابت أقصاها .

ماودك تشوف الجانب المخفي من انسان
ياكم طيبٍ له جانب اسود ماهو طيب

لك الحمد ياربي على الستر والنسيان
يالولاهم الاطفال تهتال وتشيّب

ستر ربّي الضافي على كل كاين كان
الين يتكاثر نعمة الله ويعيّب .

ماكبرت وتوني صغيرٍ في سن الشباب
واحتوتني ضيقه العمر وارخت منكبي

من كثر ماني من الحزن صايبني صواب
ودي اوقف خلف الافراح وابكي واختبي .

أنعم وأكرم ياربّي وأنت خيرك كثير
‏ياميّسر اليسر بعد العسر والفاجعه

‏عطني من أيامك البيضا محبة وخير
‏النفس من ماضي الأيام مستاجعه .

يمّه خذيني في كنف صدرك وخلّيني أنام
وأصحى بعد عامين عشر أعوام ماهي مشكلة .

ينتابني خوف لا شفت الدقايق تضيع
وحياتنا الفانية ماهو بـ من طولها .

‏يارب تنهكني ذنوبي وعفوك كبير
‏ودمعي على سكة التوبة معك ذارفه

‏اغنيتني بالفضايل يوم جيتك فقير
‏اسألك جنة عدن وأغصانها الوارفة

‏أنا لو إني جهلت الآخرة والمصير
‏يكفيني إنك شعوري عارفه عارفه .

على صوره موقّفني حنيني لي ستة سنين
‏وعيّت لا تدور الأرض مدري عيّت الصورة .

ليت الزمان يرجع إحساسٍ فقدته من زمان
الموت موت الحلم والفقدان فقدان السرور

كنت أتوهم يوم أحسب إن عزلتي عزلة مكان
أنا تيقنت وعرفت إن عزلتي عزلة شعور .

وأنا للسكينة كل ما أرخيت جفني رفّ
على الريح أبيع أحلامي البيض وآمالي

ماعاد المسا له طله من بعدك ترف
ولا أشرق صباح عقبك إلا يورالي

أداري بفقدك خاطر ما لـ شوقه ضف
من الشمس كنّي واقف أداري ظلالي

وش الدمع لو ماسال بعضه وبعضه جفّ
وش الفقد لو ما يندفن فـ الثرى غالي

لغيبتك هول وعوق ممشى وقبضة كف
وتغريبةٍ مرسى تعبها على جالي

أدفّ الليالي من خذا الموت روحك دف
من العام عيّا يدخل الموت في بالي .

فارقونا ولكن عادهم فيّنا
مانسينا ملامحهم وذكراهم

رحمة الله عليهم كان لاجيّنا
ما أوسع من البيوت الا محياهم

غير هالحين وإن سقنا خطاويّنا
لا بنلقى البيوت ولا بنلقاهم

مات من بعدهم ماكان يحييّنا
والفضا ضاق صدره يوم فرقاهم

ليه يانعمة النسيّان تنسينا
كل ماسج خاطرنا ذكرناهم

مايغيبون دايم عن حكاوينا
وفي وجيه الأماكن دوم نقراهم

ليتنا قبل نتسّمى بـ أساميّنا
من رصيد العمر زدنا عطيناهم

يارب اغفر لهم وأقبل دعاوينا
وإجعل جنان خلدك دار مثواهم .

‏طايبةٍ نفسه مثل اللي قال:
أنا مابي من الدنيا بعد هالمرحلة رغبات
عسى الله بس يكفيني .. هوى نفسي وزلّاتي .

هزوا بجذع السحاب إن مات جذع النخيل
لعل بعد الجفاف تطيح لي مايّته

‏اثر البنادم على هفوات نفسه دليل
‏لا صار بعد الوسيلة تنجهل غايّته

‏شلون ابلقى بعد مسرى الليالي حصيل
والليل ثلثه ضياع بـ عين سرايّته

‏مسلسل العمر هذا بالرتابة طويل
من فيكم الواعي الّي يحرق نهايّته .

رحاب الأرض مدّي لي مداك الجرهدي وأهلّ
‏قصيدٍ ما عليه إلا نباي وسيرة أجدادي

‏أتل خطاي في عرقٍ من الصحرا وأنا ما أدلّ
‏طريقٍ لو تعلّق فوق جفني طوّل سهادي .