يارب افهق هلاكّي والمنايا والدروبّ بعيد
مادام المودماني للترابّ تقوده دروبه

ياغيّاث الضوامي والثمام وجرهدي البيد
اعذني من جهّنم والحشر والموت وكروبّه

انا مانيب لامشرك ولا فاسّق ولاعربيد
انا اللي لاعصّى واخطأ تجهم واقلقه ثوبه

وانا اللي يترجّف مثل ارتجاف الخايف الرعّديد
ليا شاف القبّور الضايقات وحسّ بذنوبه

انا عبدك ولد عبدك وجداني هل التوحّيد
خطاياي اخجلتني يالله الغفران والتوبه

انا الانسّان حمّال النقايض والكمد والكيد
غريق الطّين واللذات من راسّه لعرقوبه

انا عبدك ياربي وانت تفعل ماتشاء وتريد
سألتك يالله العفو العظيم وهيّن دروبه .

‏بعد موت روحك كن مالله خلق لي حس
‏يدين الحياة بجذوة النار تنهشني

‏أنا ماوحشني في حياتي وجودك بس
‏وجود الحياة بكبرها معك يوحشني .

لاتهمك أحوالي أنا شخص مرتاح
مرتاح رغم الإبتسامة حزينه

الدمعه اللي في عيوني من أفراح
والرعشه اللي في يديني سكينه .

دوّروا لي مرقبٍ مايجيه الا النسيم
‏مايذبّه كون انا والطيور الحايمه

‏فيه تصفيقة حسايف وتنهيدة يتيم
‏وفيه عينٍ تشرب الماء وكبدٍ صايمه

‏داخلٍ دوامةٍ لادخل فيها السليم
‏عوّد يجر الهزيمه وحمله ضايمه

‏والشّفيا والرجاوي على شيٍ قديم
‏حرقةٍ من بين حدب المحاني دايمه .

كل يوم يحاك ثوب ويرتدى
وكل يوم يكفّن ويقبر فقيد

وكل مافي الكون زايل ماعدا
وجه ربك مالك الملك المجيد

يامحاكي الصم صرخاتك سدى
لا تأذن وسط أوثان الحديد .

يارب رحمتك لا هلو علي التراب
واصبحت مالي عن الوحشه مفر ومطير

واقفوا ولدموعهم فوق الخدود انسكاب
واسمع قريع احذيتهم فالوداع الاخير

ودخلت في عالم البرزخ وطال الغياب
وفارقت كل القرايب والاهل والعشير

وجوني ملائكتك العمل والعذاب
استسلمت نفسي لـ منكر وجاني نكير

في موقفٍ للسؤال يزيد ثقل الجواب
الا برحمتك اللي فالخفايا خبير

يارب حملت نفسي بالشقا والعتاب
ومديت حبل الخطا لـ أبليس واصبحت اسير

وطاوعتها في متاهات الوهد والسراب
لين اشبكتها الخطايا شبك والنفس طير

ازل واقول انا توي بسن الشباب
واليا نصحني محب اقول توي صغير

ماكنت احسب لـ وقتي والليالي احساب
ولا كنت افكر وش اللي في زماني يصير

الا بعد ما نصفت العمر والراس شاب
وفقدت من ربعي الادنين جمعٍ غفير

عرفت ان الحياة مصارعه واكتئاب
واني مودع ولالي غير ربي نصير

ومن لا تزهب من التقوى لـ نفسه زهاب
لا مات وش حجته يوم النهار الكبير

فالموقف الي مافيه امجادله وانسحاب
منهوله لهاك النهار يشيب راس الغرير

لكن اليا اذنب نبي آدم واعترف ثم تاب
الله يغفر الذنوب وينصر المستجير .

بسولف لك لو انك عارف الي صار
‏وبـ فتح لك يارب كفوفي الثنتين

‏جلست ومن ورا ظهري الحياة عصار
‏ويقيني لا وقفت ان الحياة تزين .

‏إدعي وانا عندي يقين أنّه دعائي مستجاب
‏على حسن ظني بعطفك يا إلهي أعطني

‏ياربي أقضي حاجتي وأرحمني بيوم الحساب
‏ولا تعذبني بما قلبي تعلّق وأرضني .

لا تلوم الصامت اللي يقول الصمت زين
‏داخله هرجٍ مبعثر مع انه ما حكى

‏عايشٍ مابين يالله تعين ومل عين
‏لين صار الضيق فالصدر مامعه أشركا

‏أنا لو احتاج لي دم واحتاج أكسجين
‏ما اشتكي لاشفت غيري من أيامه شكى

‏ما يضيق صدري إلا تنهات الحزين
‏لو تجيه تقول أمانتك لا تبكي بكى .

‏يقولون الحذر لمّاح واقول الحذر خوّاف
‏كلام اللي يغامر والعمر في دبرة الوالي .

‏حمدتك على خير وحمدتك على مكروه
‏وسبحانك اللي لا ألتجى عبدك أنصفته

‏أجي لك بـ وجهٍ ساير الناس ماشافوه
‏علشان وجهٍ ساير الناس عارفته .

ياربي أحبّك وأحب الدّين وأحب الرسول
‏وأتعوذ من إبليس وجنوده ومن دربٍ مشاه

‏أبي من الدنيا بياضٍ يسمح لوجهي دخول
‏الجنة الّلي تجمع أهل الله بوجهه وبلقاه .

يارب ساعدني وانا العبد الضعيف
‏حتى ولو نفسي تشوف إني قوي

‏أنت الآله المقتدر وانت اللطيف
‏وانا الفقير اللي ذراعي ملتوي .

الامور اللي دوافع فعلها ماهيب لله
‏حايلٍ من دونها ضميري الحيّ وحيائي

‏ساوم الطيّب على عطفه واخذ صافيه كله
‏واحذر تساومني بـ حاجات تخدش كبريائي

أنا إنسان احترم رقيبي الذاتي واجلّه
‏جاب لي توفيق ربّي شي ماجابه دهائي

لو قبلت اضحك على مسلم واغشه واستغله
كيف ابستجري على الله يسمع ويقبل دعائي

زاهدٍ في مجمل نجوم السماوات المطله
‏في كنف مشكات نورٍ ساطعٍ على سمائي

ومعرضٍ عن مجتمع حقيقة أحكامه مخلة
‏عنده الحب انتقائي وأيضاً الكره انتقائي

يا رحاب الخطّر المتسامحات المسفهله
ما يضيّق شاسع المترامية غير استيائي

‏الشفاحه تورد النفس العزيزه لـ المذله
‏نفسك اليا ارخصتها مره بترخصها نهائي

‏ غالبًا يحكم سلوك المرء جينات وجبلة
‏شي تأباه المروءة صعب يأباه المرائي

‏لدّ عينك فالبشر وتشوف مضمون الأدلة
‏كل مصلحجي جريء وكل حسّاس انطوائي .

‏يالميّت إللي ماقدرت أعتبركّ
‏ميت ولو إن الدموع إنساقت

‏من يوم ماضاق المدى في قبرك
‏كل الصدور إلليّ تحبّك ضاقت .

‏لا خفت من موتي وإذا أرتجفت ايديّ
‏مشاعر الإيمان نادت وعيّت

‏اللي خلقني ما نساني وأنا حيّ
‏وشلون ينساني اذا صرت ميّت .

وما كُنت أهوى الدّار إلا بأهلِها
على الدّار بعد الرّاحلين سلامُ .

عساك مخلد بـ جنة تنسيك الزمان الشين
عسى دارك هو الفردوس منعم به ولا تحاتي .

قل للمعابر تسير وتنتشي منّي
‏أنا الرحيل اللي إن ضاق آدمي سلّه

‏رتبّت فوضى العواصف ورحلت عنّي
‏ما أجمل من الشي إلا أن صار في حلّه

‏وشلون أضيق وظروف الوقت تحزنّي
‏والله هو اللي مدبّر أمرنا كلّه

‏شامخ مابين إتزان وعزّ رغم إني
‏امرّ بأوقات ما يعلم بها الا الله .

‏ياللي ما تاصفك الدعاوي والخطب
‏عفوك لو الدنيا دبورٍ في دبور

‏ماندري الطايح حصى ولا رطب
‏لولاك ياعالم بما تخفي الصدور

‏اللي كتب ماهوب مثل اللي شطب
‏واللي ثبت ماهوب مثل اللي يدور

‏مقدين يوم نخلي الزله مطب
‏ونمشّي المخطي بلا عذر معذور

‏ظهورنا ماهيب حمالة حطب
‏ويديننا ماهيب حفارة قبور .

الوقت يدحمني بجنبه وجنبه متين
‏حلاوته ذقتها ومرارته ذقتها

‏كم لي وانا احاول اخبي الشعور الدفين
‏اكتم عن الناس ضيقاتي اذا ضقتها

‏هذا وانا واحد من عبادك الطيبين
‏صلاته فـ وقتها ودموعه فـ وقتها

‏توفني مسلماً وألحقني بالصالحين
‏النفس ماهي بخير اذا ما وفقتها .