#កម្រងរូបភាព៖ ពលរដ្ឋ​តវ៉ាទាមទារ​ដោះលែង​សកម្មជន​ដីធ្លី​ ចំនួន​ ៩​នាក់ ​នៅ​កោះកុង
---
ក្រុមពលរដ្ឋមានទំនាស់ដីធ្លីជិត ១០០នាក់ ភាគច្រើនជាប្រពន្ធ ប្ដី កូនៗ និងសាច់ញាតិរបស់សកម្មជនដីធ្លី នៅខេត្តកោះកុង ដែលកំពុងជាប់ឃុំទាំង ៩នាក់ ព្រមទាំងសហគមន៍មួយចំនួនទៀត បាននាំគ្នាប្រមូលផ្ដុំ នៅមុខសាលាដំបូងខេត្តកោះកុង ដើម្បីតវ៉ាឱ្យតុលាការទម្លាក់ការចោទប្រកាន់មកលើសកម្មជនដីធ្លីទាំង៩នាក់នោះ ឱ្យមានសេរីភាពឡើងវិញ ។ ការប្រមូលផ្តុំគ្នាតវ៉ា ដោយលើកបដាស្រែកទាមទារឲ្យដោះលែងអ្នកទាំង ៩នាក់នោះ ធ្វើឡើងស្របពេល ដែលចៅក្រមស៊ើបសួរនៃសាលាដំបូងខេត្តកោះកុង កោះហៅអ្នកទាំង៩នាក់មកសាកសួរបន្ថែម ក្នុងសំណុំរឿង «ញុះញង់» នៅព្រឹកថ្ងៃទី១១ កក្កដា នេះ។ ការចោទប្រកាន់លើសកម្មជនទាំងនេះ បន្ទាប់ពីពួកគេស្វះស្វែងរកដំណោះស្រាយបញ្ហាជម្លោះដីធ្លី ដោយព្យាយាមឡើងមកដាក់ញត្តិ នៅក្រសួងយុត្តិធម៌ ក្នុងរាជធានីភ្នំពេញ ដើម្បីស្នើសុំឱ្យទម្លាក់ការចោទប្រកាន់លើតំណាងសហគមន៍របស់ពួកគាត់ចំនួន ៣០នាក់។
---
#RFAKhmer #Cambodia #LandActivists #LandDispute #Protest #KohKong #CourtKH

អតីតបុគ្គលិកក្រុមហ៊ុនបនល្បែងណាហ្គាវើលដ៍ (NagaWorld) នៅតែបន្តនាំគ្នាធ្វើកូដកម្មទាមទារដំណោះស្រាយពីក្រុមហ៊ុន បើ​ទោះបីជា​ពួកគាត់ត្រូវប្រឈមនឹងបញ្ហាជីវភាព និងរងការចោទប្រកាន់ពីប្រមុខរដ្ឋាភិបាលយ៉ាងណាក្ដី។ អតីតបុគ្គលិកក្រុមហ៊ុនណាហ្គាវើលដ៍ ដែលធ្វើកូដកម្មអស់រយៈពេល ៥៧២ គិតត្រឹមថ្ងៃទី ១២ កក្កដា ឆ្នាំ២០២៣ បាននាំគ្នាពាក់មួកបិទក្រដាសទម្រង់មកុដ និងមានសរសេរអក្សរអង់គ្លេស LRSU ដែលជាឈ្មោះ សហជីពទ្រទ្រង់សិទ្ធិការងាររបស់ពួកគេ។ ​កូដករខ្លះ កាន់បដាដោយសរសេរថា «៥៧២ថ្ងៃ ដើម្បីសិទ្ធិសហជីព មិនមែនស៊ីឈ្នួល មិនមែនជាបទញុះញង់» និងខ្លះទៀត សរសេរថា «ដោះលែងកញ្ញា ឈឹម ស៊ីថរ ជាបន្ទាន់» ដែលអមដោយសំឡេងត្រែ និងស្គរបន្លឺឡើង នៅមុខអគារណាហ្គាវើលដ៍២។ ជាមួយគ្នានេះ ក៏មានការអធិប្បាយតាមឧបករណ៍បំពងសំឡេង (ឧគ្ឃោសនាសព្ទ) ស្នើឱ្យតុលាការដោះលែងកញ្ញា ឈឹម ស៊ីថរ និងសមាជិកសហជីពដទៃទៀត ពីពន្ធនាគារ ជាពិសេស គឺការទាមទារឱ្យក្រុមហ៊ុនណាហ្គាវើលដ៍ទទួលបុគ្គលិក និងក្រុមសហជីពឱ្យចូលធ្វើការវិញ។
---
#RFAKhmer #Cambodia #HumanRights #Worker #NagaWorld #ChhimSithar