2.أنا واثق إنك راجعة لي



يا انتي ياكل الاماني المجحفه..
لوايه الموج المشحتف في جدار الأرصفة..
فصلت نفسي على هواك ..
شكلت ريدك في ملامحي أضفت نفسي إليكي ضل..
وتبعتك آلموصوفة راضي اكون صفة..
صورت طيفك فيني لوحة ..
رسمت نفسي عليكي خلفية وكفى..
(ذيلتي) توقيعك فراق..
وقلعتي صورتك من إطاري تركتي لي الأغلفة..
سبتيني بعدك لوحة..
لكن دون هواك مزيفة..
و عرضتي قلبي مع قلوب مفروشة في سوق الجفا..
بعتيني بي أبخس تمن.. فرجتي فيني الما اشترى..
ناديتي يالعزال تعالو..تعالو ..علي قريب...
بايعنو بي ..قرشين حبيب..
وعرضتي حالي كما وطنا على الغريب ..
دخلتي بيناتنا الأمم ..
مارضيتي واسطة خال وعم..
يابنيه ماكان العشم ..
وانا قلبي كان اهديتو ليك ..
غلفتو بي ورق الحنان وربطتو بي ريدك شريط..
تمرتو في نيلنا العظيم ..
ورسلتو عبرك للمحيط..
رجعتو تاني على عجل ..
ضمختو بي رمل الشمال..
رقصتو بالسيف في الشرق
وسمعتا نبضاتو بتدق..دق ..دق..درق..نقارة في أقصى الغرب..
نزلتو مطرة على الجنوب ..
رجعتو للمقرن فجر ..
يلقي السلام صبحيه لي عامل نشيط ..
ودعتو أسرجتو الهيام في صهوة الشوق الشديد..
زينتو بي عنوان هواك وكتبتا فيهو ..
(إهداء بسيط)..
ف ليه بعدما اخلصت ليك سبتيني للزمن العنيد..
ليه سعري عندك في الرخيص.. (وانا شايف أي سعر بزيد)..
ليه رافضة واسطة حبي ليك..
والواسطة قربت البعيد..
ليه كل ماتشرق شمس تخفيها كتاحه وهبوب..
ولو لحظة انكشف الغبار نلقاها ماشه على الغروب..
ليه حالنا يالمحبوبة ماشي على الفراق ..
ماكان زمانك حالنا طيب وماهو شين ..
و أنا كم صبرت عليك وكم ..والصبر مفتاح .....الوهم
ضاقت فلما استحكمت حلقاتها ضاق الحلم..
والحلم كان واسع فسيح ..
إنك معاي..
نتوحد اطياف في سديم من السعادة المترفة..
يمسح خلافاتنا الزمان طول العمر نفضل سوا..
ونحل مشاكلنا برويه.. و بي فهم..
ما نحن اقرب من قراب..
والضفر مهما طال ومال مابمرق اصلو من اللحم..
و أنا عارف الدنيا ام قدود ضغطت عليك ضحيتي بي..
غشاكي حلم الانفصال..
ياحلوة قايلة الحال بدون ريدتنا احسن ليك ولي ..
ف تكيتي راسي على حجر ..
سالت دميعتي على الأرض..
وانا راضي ماسك في الصبر..
مأمورة عارفك
الا ما مرضيه من رب الأمر..
جريتي نصلك في رقيبتي فتحتي لي جرحي القديم...
السال عليك نقط حبر ..
لطخ عناوين الصحف في الدنيا وانتشر الخبر..
ففكرت في آخر نفس في صدر لحظات الخطر..
افديها نفسي قصاد كبش..
و يبقالنا عيد..
ما خيرنا وافر والسعية دي عندنا ...
من كل نوع كافيانا حدت ماتزيد ..
بتقضي حاجات البلد ..
والزاد نصدرو للبعيد..
و رضيتي فديتي يالحبيبة بعد تعب ..
لكن طلبتي كبش (سمين )
أصفر وفاقع لونو ما جرالو طين..
وجميل يسر الناظرين..
وانا جبتو ليك..
فتشت (مليون ميل مربع) في وطن
ياحلوة لو بي ايدي كان غيرت اسمو قبل زمن ..
وبدلتو بي (جنة عدن)
وجبتا الكبش..
ضحينا بيهو عشان نمش..
الا العوارض مابتقيف ياحلوة والعزال كتر ..
جايين يغنو على هواك شان ما يولعو بينا نار..
والقال مساهر في غرامك
ما صدق..
ساهر عشان نام النهار..
طمعان وداير ينهبك زي ما نهب قبلك كتاااااار...
فيا بت ملوك و شموخ وعز ..
وأصلو اللبيب من غيرو لازم يتعظ..
و انا عارف انك راجعة لي..
ما البينا أكبر من ورق
وأجب بلا أو ضع نعم..
والمستحيل لو نفترق
دي المويه مهما يبقى ماراح تبقى دم..
وانا عارف انك راجعة لي..
خليك معاي ماتبعدي ..
ده الشر حوالينا بزيد
وانا مادي ليك ايدي هدي..
خلينا وحدة على الصعاب..
واصلو الوحيد لا بد يضيع..
والمرفعين لو ليلة جاع .. ياكل من الغنم المطرف..
و ما بيمشي على القطيع..
والقبضة مابتلوي الحطب ..
لا بتتني ليها كويم قصب ..
لكن تكسر العود سريع..
والإيد براها محال تصفق الا بالإيدين جميع..
وانا واثق إنك راجعة لي..


☕ #مجاهد_كاروري 🍃





الشاعر مجاهد كاروري - أنا واثق إانك راجعة لي - قن…: http://youtu.be/8_g5l_FQs0g

قدر الله ما يديك
أمليني ياخي عذاب
بقيني أكعب زول
يوم تحكي للأغراب
بياع كلام وناس
ما جادي زول كضاب
كان بشفي و جعي أناك
أهلنبو ألف حباب ..

*الاطلال*

يا حليل سمحة البسمة التضوي بروقه
الشم في خدوده ومن ثناها شِروقه
الشاويني شوقه ونغجلتني حِروقه
طلعته يوسفية ويعرُبيه عِروقه
***
اطلال المحبه آلى لِقانا تنادي
مفتقداكي يانغم الكنار الشادي
اشواقى آلبناتلن في القليب الصادي
حنلك حنين آهلي الغبش للرادي
***
كل ماقيف عليهن بالدموع إتبله
واسرح وحيلي يخدر والفكر يتشله
يالصاين غرامك وعنو مابتخله
مان قايل بفارقك والزمن بتغله
***
ياروحي البتلدغ في الفؤاد افعاكي
مره حياتي دونك وربي لي يرعاكي
ماتنسيني يالمالكه الحواس اوعاكي
وارجوك خلي بالك من فؤادي معاكي
***
يازهري البريدك ومن عطورك فُلي
مشتاقلك تعودي وفي سمايا تطُلي
من لوعة فراقك وآ عزابي وزُلي
بقْلد طيفك ابكي وبيك اونس ضُلي
***
بشكيلك ممحن ياغرامي واسي
من هماً يودر كاد إشيّب راسي
إتنين إبتلني وجرّعني مأسي
حسادي العوازل والزمان القاسي
***
بلاك العيشه مره ويام موايق زِله
مترطش موهدب لا اهل لاخِله
من مافتي يالسمحه وهجرتي الحِله
روحي علي حزنت وإحتوتني العِله
***
شوقاً لي عيونا وطلته ومحياها
والبسمه البتنزر بالمطر من فاها
اربعه ياخلايق بشكي من مُر داها
بعدها والمغايس والحزن والاها
***
يال تريانه عفه وإحترام ورزانا
بعدك نار وقاسي وبي لهيبو ازانا
انا والنجمه والقمر البلالي حزانا
في البكاء والقصايد والتمني عزانا
***
طريت ايامي جمبك والليالي الغُره
يابت العواهل والإصول الحُره
شوقك وإبتعادك جرعني المُره
والعجب العوازل والحظوظ الطُره
***
اجمل اغاني في نمي القلم خطْاها
فوقك يالجمالك بالدرر غطْاها
وحات العلا قامتك وحاشا ما وطْاها
بي ريدك متيّم ولاحق امات طه
***
يال لي جرحي بي طيبة لهيجك حايكه
فيكي براءة الطفله وتقاكي ملايكه
مادام القمر طلعو الخواجه ولايكه
مابلحق جمالك يالدروبك شايكه
***
الحياء والتعفف والتواضع زانه
والوسمي البيهطل في الربيع امزانه
قبلان ابقى سلة مهملات احزانه
ترمي شقاها فوقي وادمنن اوزانا
***
البي ريده والصد الكتر عاقتنا
لي درب المواجع والسهر ساقتنا
يال في دروب غرامك كل محن لاقتنا
رفقن بينا إتحملنا فوق طاقتنا

☕ #نزار_سراج 🍃

جروحي زايده
وبكاي ياخلا ماجاب ليا فايده
شبيهة الفي الخلا ومطرانه خايده
وعيونه كحيله لي خلق الله صايده

نحت حرفك
علي وجداني يالعزبني طرفك
كل ماقول اصلك يقسى ظرفك
بموت إن مالقيتك وضقته ترفك

مرضني هجرك
متين القاكي يغلب ليلي فجرك
عليك آآسمحه تصفحي زيدي اجرك
تلطفي بيا ابكي عيوني زجرك

عشقتو زوقك
نواكي بلاني يالأسرتني موقك
سحرني هواكي يال الأمرضني شوقك
ترفقي حني شاكي فؤادي عوقك

ليها أبنا
وبعد خلينا درب الريد وتبنا
ازانا غرامه لي عينيها هبنا
ونواها هلكنا ياخلق الله دبنا

نشدت فنن
علي المنطوقه كالبن المقنن
عيونه تبارز السيف المسنن
وياصلاحنا ارقو لي مجنن

منايا ليمه
ومسكنه في الدواخل ليها قيمه
بريده بريده وإتباهابا ديمه
ورموشه ظليله لي عينيها نيمه

عالي شانه
وفؤادي شواهو جمر البين وعانا
من قول العوازل ربي صانا
ولحاظه ازتني ياخلق الله دانا

عودي ناحل
انوح إتبكي فزه فؤادي راحل
علي حورية البحر اب سواحل
نظمته قصيدي في المحجوله واحل

☕ #نزار_سراج 🍃

ﻧﻈﻤﺘﻚ ﺧﻮﺍﻃﺮ ﻣﻠﻴﺖ ﺍﻟﺪﻓﺎﺗﺮ .
ﻣﻄﺎﻟﻊ ﻗﺼﺎﻳﺪ ﺟﻤﻴﻠﻪ ﻭﻏﻮﺍﻟﻲ ..
ﻭﻟﺠﺘﻲ ﺍﻟﺪﻭﺍﺧﻞ ﺟﻤﻴﻊ ﺍﻟﻤﺪﺍﺧﻞ.
ﺗﺮﺩﺩ ﺗﻌﺎﻟﻲ ﻭﺗﻌﺎﻟﻲ ﻭﺗﻌﺎﻟﻲ..
ﺑﺤﺒﻚ ﺑﺠﺎﻫﺮ ﻣﺘﻴﻴﻢ ﺑﻔﺎﺧﺮ.
ﻷﻧﻚ ﺣﺒﻴﺒﻪ ﻭﻏﺮﺍﻣﻚ ﻣﺜﺎﻟﻲ ..
ﻷﻧﻚ ﻓﺮﻳﺪﻩ ﻭﺣﺮﻭﻑ ﺍﻟﻘﺼﻴﺪﻩ .

نحن صواقع الليل اب هويد وعويش
نخن متلنا في الحوبات جزم مافيش
نحن عدونا يوت داقنو دق العيش
نحن الفي البلد سمونا ناس الديش

نحن العركه اسيادا وبنخبر خودا
نحن نواحه الصقعه ولظي العنقودا
نحن الهاون الفتق اقاصي حدودا
نحن الفرسه اسيادا ومطامير جودا

نحن دهامه في الليل اب هويش ودبايب
نحن مغارز الوجع اب وححيح ونحايب
نحن القون والجسم المفتل طايب
نحن الجنا من قهرتنا بصبح طايب

☕ #الهمباتي_الاغبش 🍃

الليهو المشاعر هادي اكحل طرفو
نفسو مباخر المسك المجيه كرفو
العينيهو بي الريد ديمة لي بعترفو
هل قاصد يغيب ام ليهو عاكس ظرفو

*****

البتغـشـو روحـو يقـول عليـنا يفوت
يا داب مـا عـرف تالانا شـغـل البوت
بلقي اوراقو جاهزة والختم مختوت
جـوازو المـأشـر شـايلو مـلك المـوت

*****

الخـاواك ضـاق حــلو التآخـي وناقـعو
والعـاداك مأكـد خيت حكيم مو راقعو
قلبك صـبة في اليوم البيشـخر واقعو
كل من جاك مزبد شاقي نصو وفـاقعو

*****

كتير سـألوني مـنها وإنزويت بي ردي
مون خابرين دا سراً ليهو ما اظن ادي
فـريع المـحلب الفـوقو النحول بتعدي
عطرو نشمو شم لي شوفتو ما بنودي


☕ #الهمباتي_الاغبش 🍃

يا النجفة العيونك لي البعيد بتصايد
امسيت منهن كاتب حروف وقصايد
ما دام هن بسون في قلبنا فصايد
احسن يبقي بينا وبينن الف وصايد
♡
يا سيد السماحة اللي المحاسن قائد
اعطف دام بقيت مالك حسوسنا وقايد
قلبي الراضي ضيمو وفي المهالك خايد
انا متبري فعلو وباقي منو محايد
♡
وين الديمة في الليل كنتا بتناجابو
وين النال رضاي ونلتا كل اعجابو
وين الغافرو من عين الخلوق لجابو
ودع وخلا طيفو معايا اتحجابو
♡
الشاعر البليغ في قول كلامو ونصو
ما بقدر يجيد اوصاف كتابو وقصو
فرع الخيدران الدابو لين فصو
ضباط بي نِجُومُن حرسو ما بتوصو
♡
خبرك من قبيل لي الطيوف تمنو
كونك جاي صاد من المنام خمنو
عيني لي رؤاك كم طولن يتمنو
ريدا شايلو ليك بدري الضلوع لمنو
♡
من لاقيتو مريودي المطول منو
شفت الذوق ملازم للسلام في حنو
معزول عجوة المحس السبايطو اتتنو
رَجّع قلبي لي المو وحسارو وجنو
♡
عشوقتي الفيها انواع الوسامة
غير الرقة والذوق فيها شامه
شبيهة الجافل البي صيو هاما
معذور قلبي واقع في غراما
♡
بعد ما قلبي فات الريدة عافة
اصبح نمرة ون رافض الوصافة
جديا ظاهرة في نصو النحافة
لحاظو تخلي عاتي الجن يخافا
♡
يا قلبي المهود طال سراكا
شايف كل محاسنو ولا يراكا
ما دام لسه تايه وما دراكا
ايه يجديك من هذا العراكا
♡
كتير ساسقت فوق الريدة حافي
مساقد بالسنين نافر لحافي
عشمي الحظ يحن ما يبقي جافي
الاقي المنو فر النظرة شافي
♡
كم داريت لهايبو وليها خافي
مديت ياما ضرع الريدة دافي
مهما يبقي نافر ولي منافي
غافر ليهو دماع عيني عافي
♡
بايت دمعي فوق اجفاني طافي
بي فوق السهر اصبح اضافي
يا اسباب ازايا وسر تلافي
قلبي معاك اظنو دليل وكافي
♡
باين ليهو في الريد اختلافي
زايد دلو وازداد إئتلافي
البي محيو عجل بي كفافي
جيت لي غارو قاصد اعتكافي
♡
جلا الباري لي محياكا صور
كم اخجل ضياك ذاك المدور
عاشقك لملم الاشواق وكوّر
الا سماك بي الاشهب تسوّر
♡
ترا الصلاح مع الأسحار قامو
وانا البين الخلوق محبوبو لامو
غافر لي النجوم وعيوني هامو
طارو الفرو يلصف في ابتسامو



☕ #الهمباتي_الاغبش 🍃

البي حسـنو والذوق والدلال بدهشنا
جـنبو الإلفـة مَعـَلم والسمـاحـة بتشنا
رَوِّح يانسيم بي طيب شذاهو انعشنا
قولو تعال قريب اصلو البعاد بوحشنا

☕ #الهمباتي_الاغبش 🍃

فارق معاك ؟

ما قبييل طردت الامنيات
ومرقت لى اﻵلام براك
وقعدت فى حر الشقا
وخليت وريف الريد وراك
سديتنى فى حوش القصيد
قايلنى ما بحمل بلاك
واريتنى فى حضن العذاب
ماسك تلابيب الصبر قبال
إروح وإتبع جفاك
انا ما عزلتك شأن تغيب
وتضارى فى الاعزار لقاك
وانا ما تركتك شأن نسيت العشرة
او خليت هواك
انا ماندهتك للغنا شأن تبعد إنت
وإعود صداك
وانا ما حكيتبك لى النجم شأن
تحجب الاقمار ضياءك
وأنا مانسجتبك الحروف شأن
إنبطح فى القول سواك
انا ياخى مليت الصبر
مليت تجاهلك وجفوتك
مليت متاريس إشتهاك
ورجعت مكسور الجناح
بصرخ ولاااااا فارق معاى
ترجع تقول فارق معاك؟
ياخ اختشى!!

☕ #ودمسيخ 🍃

*سكك ألرجوع*

سكك ألرجوع إتقفلت؟
ولا القلوب لي حالنا
ما دارت ترق
بيبان غنانا أتكسرت؟
ولا أتنسينا مع الزحام
واصبحنا ذي ما بنستحق
ياساحة أحلامنا البقت
بي غناك تزق
ياواحة الكلمة
ومواعين الصدق
إسبوع
ونسوان الحروف
مشدوها في ترتياب
مداخل
الكلمة وأشكال الوتر
إسبوع وجنيات القصيد
شاده السواعد لي سقوف
القول وميقات السفر
إسبوع ولسنات العشم
ما صابه من دعوات فتر
وإنت بتاقلد في الظروف
لادايرة تشبع من وداع
لا فكا إيديها القدر
وأنا في رجاك
في ساحة النمة التذق
بي أغلي اصناف البشر
علقنا صورتك في القلوب وزرعنا في المدخل شجر
ربطت مناهل بقجة النضم البسر
ملت المساحات بي الزهر
وأعلنا لي العالم مجئك
مابين بواديك والحضر
إصطفت آلاف القلوب
العاشقة نبض الكلمة
وأنغام الوتر
ووزعنا أولادك علي
كل المداخل والسكك
في كل مدخل كم نفر
المكي ود العز نزار
واقف علي باب المطار
حافظ مواقيت الوصول
لي كل مواعين السفر
ولابس من الحنية توب
كاتب عشان جئتك درر
هتان مولع شوقو ليك
حارس القوافل الجايا بر
ولدأ معتق في القصيد
ولدأ ولا بخشي الخطر
اما البهيج ياالمرضي
محتاج لي مجئك ذي هلة
العيد لي السغار
ذي حوجة الليل لي القمر
تلقاهو مرات ذي نسيم
وأسدأ إذا بي القول نتر
نسج المرابيع بالوعد
مافيها فد بيت إنكسر
خليت عساكرو مشتتين
حارسين محطات القطر
واللللللله علي سراقة الأشم
ولدأ طمح بي غناهو
ذي موج البحر
تلقاهو في كل الدواخل فال وريد
إن طلا او لي الدار هبر
والبشري فارس النم وتيلاد الفصيح كل مرة إتناطي ألظروف
وإسأل عن
الحال والخبر
دعواتو جامع يارقيب
جار سبحتو اللالوبه جر
وفارسأ رجع من ديرة
الطمش الممسحة بي السواد
ولدأ يمين ياالمرضي
ذائد فوق ضكر
ده آلمرضي إبراهيم أخوي
القيدو في النم إنكسر
أما ألاصم أحمد بشير
حاجز شجر ليمونو
شان شربات وصولك
لي البلد
حالف طلاق لي غير سعادتك ما أنعصر
وأنا
وأنا ولسه سارح في شعور الدنيا
يوم توصل هنا
وتهدي المدائن توب سعد
وأشكيلك آلامي المربعنة في القلب
وأنا بين صحابك ذي حجر
أضحك ولا بنفر جبين
أنزف ولادم إندفق
أبكيها في الخاطر أسف
أصرخ ولا دمع إنهمر
راجنك آبونا أنكرب
أحزم حقائبك بي المني
وأمرق قبل كلماتنا ما يطوله الفتر
نلقاك بي اشكال الورود
والخوه في أجمل صور

☕ #ودمسيخ 🍃

الفى قلبي مكتوب بى دمايا فصلها
شرايتأ سابع العلم الاساسي فصلها
الرب العباد بى قدرتو مفصلها
كضاب البقول من سيل غناى بفصلها

☕ #ودمسيخ 🍃

لا ينجلي عني تجهم فكرتي
حال الشراع مسافرا
ما انفك يهوى ساحلهْ
للنفس رغبتها البتول الى الهوى
وتظل في مسعى الكمال مُناضلهْ
طوبى لهم ...
طوبي لهم ...
من يزرعون على رماد البوح افكارا تهيمُ
وبعض عشقٍ قد اتم مراحله
(( والناس كالابل المائه ... ))*
للروح الف تساؤلٍ
أوَهل وجدتُ الراحلهْ ؟ ؟!!

☕ #مهند_الشيخ 🍃

ومازلت اهوى البقاءَ بقربك
مازلت اهديك حبي
برغم القساوة في عمق قلبي ...
برغم التعدد في مثل شخصي
برغم اختلاف (( الأنا )) والوجوهْ
كثيراً يقولون عنك كلاماً
وشعراً نبيلا وكم لحنوه
كنبع الحنان .. وباب الجنان
ووصفا جميلا وما انصفوه
وعلمٌ له إن أُعِدَّت أَعدت
ومن قال يوما (( احبك امي ))
فسعدا به بل ولا فض فوه
ساحياك دوما كطفل صغير
يفاخر دوما بما علموه
فأول خَطوِي ونُطقي لحرفي
رَصَانه نفسي وصحة جسمي
واخفي عن الناس ما يجهلوه
بفضلك انت ساحيا عزيزا
اذا ما دعوتي إله عزيزا
بأن فاحم ابني وإن ذللوه
ومن ليس يسعى لنيل رضاك
فويل وويل اذا كفنوه
فانت الصديقة انت الشقيقة
بل و الحبيبة انت القوافي
وسحر المعاني وما ألفوه
ولله حق علي ببرٍ
لشخصك حتى يقول اقبضوه

☕ #مهند_الشيخ 🍃

شفت صوره قديمه مني
والامل في عيني فاضح
كت بعيش احلام كبيرة،،
كنت اعزل.. بس مكافح
كنت قايل الدنيا جنه..
وكنت شايل حلم جامح
الا لما الدنيا جارت..
غيرت فيني الملامح

أقصى الوجع إنو صحبك يعادي
يزيد في خصومتك ويرميكا عادي
يبشتن حواسك وهو الكان بكون في خصومتك هو ناسك
هو كان الأمل والحنين المقاسك
وهسع رماك ..وكنت الدفاع وكان في حماك
تفاصيل كتيييره بتربط فواصل فصولو المعاك
فياااارب قلوب الصحاب ماله قاسيييه
بتنكر جميلك ولردو ناسيه
بتملاكا هم رغم إنو الصداقه النمت في الدواخل بدت فيكا راسيه
دا حال الزمن لا نهاية الزمن فيو خيوت النفاق للمساكين هي كاسيه
مواجع وتكرار قصص فات حدوده مصالح تحد الصداقه وتقوده
صديقتي وبروده
دي وقفت قصادي ولغت حد وعوده
عشان كنت صادقه وبوقع عن الحب في دفتر عقوده
وبعدت خطاها في زمن كان بفتش أماكن وقوده
رغم إنو البحر شله موج الأماني البتديني دافع دُهش بي ردوده
وحات ربي كت السلاح البحارب أراضي الوجع للفرح كت بقوده
كنت الأماني البتسقيها خير وكنت الربيع البفرهد وروده
صديقتي وبروده
بديت السكات والسكات هز قلبي وصبح مابريّح
وياما الحزن للبعادوك بيشمت وليهم بفرّح
سكاكين صداقة التماسيح بتلبد
وخلفك تجرّح
فعذراً صديقة مصالح وراحت
تجارة بتبيع الكضب مااابتربّح

☕ #اديبه_احمد 🍃

ﺣﺐ ﻳﻌﻨﻲ ﻭﺟﻌﻪ
ﻳﻌﻨﻲ ﺩﻣﻌﻪ ﻭﻣﺼﺎﺋﺐ
ﻳﻌﻨﻲ ﺗﺠﺮﺡ ﺣﺒﻴﺒﻚ
ﻭﺗﺄﺫﻯ ﻭﻫﻮ ﻏﺎﺋﺐ
ﻳﻌﻨﻲ ﺗﻤﻼﻭ ﺃﻧﻴﻦ
ﺑﻮﺭﺍﻭ ﺫﺍﻣﻲ ﻋﺎﺋﺐ
ﺃﺻﻠﻮ ﺣﺎﻝ ﺍﻟﻌﺸﻖ
ﻟﻠﻤﺼﺎﺋﺐ ﻫﻮ ﺟﺎﻳﺐ .
☕ #اديبه_احمد 🍃


https://m.youtube.com/watch?feature=youtu.be&v=n2ztpVutG44

آخر قصيد
أديبة أحمد و محمدالمهندس


أديبة
ﺁﺧﺮ ﻗﺼﻴﺪ ﻣﺎﺗﻠﻮمني ﺭﻭﺡ
ﺭﺿﻴﺎﻧﻪ ﻳﻤﻼﻧﻲ ﺍﻟﻮﺟﻊ ﺧﻠﻴﻬﺎ ﺗﻠﺘﻬﺐ ﺍﻟﺠﺮﻭﺡ
ﻛﺎﻥ ﺳﻜﺘﻚ ﺷﻮﻙ ﻣﻦ ﺃﻧﻴﻦ ﺍﻟﻔﺮﺣﻪ ﺧﻠﻴﻬﺎ ﺍﻟﺘﺮﻭﺡ
ﻟﻤﻠﻢ ﺳﻜﺎﺕ ﺍﻟﻮﺟﻌﻪ ﻗﺒﺎﻝ ﺍﻟﻀﺠﻴﺞ ﻳﺒﻘﺎﻟﻲ ﺭﻭﺡ
ﻣﻜﺘﻮﻟﻪ ﺫﺍﺍﺍﺍﺍﺗﻪ ﺍﻟﺮﻳﺪﻩ ﺇﻥ ﻗﺎﻟﺖ ﺗﻠﺪ ﻧﺎﺭﻙ ﻗﺮﻭﺡ
ﺭﻳﺤﺔ ﺑﺨﻮﺭ ﺍﻟﻔﺮﻗﻪ ﻣﺎﻣﺤﺘﺎﺟﻪ ﺟﻤﺮﻩ ﻋﺸﺎﻥ ﺗﻔﻮﺡ

مهندس
آخر قصيد كتب الغرام عنوان جريح
واتوكا بصبر السنين قاطع دروب الشوق رحيح
ما هب للاحزان جمر او بخر الغنا بالنويح
لكنو كلما ما يلم شتات يلقى الفرح تذروه ريح

أديبة
آخر قصيد دربك بفوتني وبالمراد
لميت عصا الفرقه التشيل حيل الفرح و كت الله راد
ماتلوم أحاسيسي البتمرق بهموم الدنيا عاد
سوط الفراق جالدني قدام الخلق في ضربو زاد
عاد النويح ونسني في عز الشقا وكفتني لامن صوتي عاد

مهندس
آخر قصيد ماتعكري الراق تنكتيو
ايد الغزول قاعدة بتصيد
انا كان بلوم كان لمت ريد خاتيو رصيد
كان لمت هم فاتح شراعو علي وصيد
وملاني دين وخسرت لا حب لا حصيد

أديبة
دام ما بتلوم راجيه الجديد
راجياك تجابد فرحة القلم البئن
يكتبنا في دفتر مواجع الدنيا ريد
دايراك تديني الأمل وتصم خشم فرقتنا
كان فرحتنا تملانا وتزيد

مهندس
آخر قصيد نحن الجديد وهوانا نور
سكت النشاز الكان بقلد ريدنا زور
يلا انناغم الفرحة ونسجل مع العشاق حضور
الحب بقلبين متصل والفرقة كان اخر ظهور
أديبة
آخر قصيد أنا ليك بدور
طمبجت عينيك بالسكات و أنا عارفه إنو الدور بدور
من طفل إحساس الوجع بمرق أمل ويصلنا نور
وآخرنا راجعين لبعض مادام بتربطنا الجذور

مهندس
آخر قصيد خليو يكون اول كلام
اسه ابتداك صنع الفرح صدّر عطور اشواقو خام
نفَّض من الروح هم فراقا وخت سرو مع الحمام
واهداكي من بابل حدايق ورتب اسمك في الغمام

بالغت شديد
كسرت جواي أحلامي البيك
البيت التاكلة حمولتو عليك
لبس الأولاد وخبيز العيد
بالغت شديد
بتقول أصحاب!!
دة كلاما ليك وأنا قافلة عليك؟!
.........
الريد البينا دة ما عادي
ما عادي الجوطة الماليانا...
وبرغمها كان البال هادي
ما عادي أقول نعمين فجأة ...
وات أصلا كت ناوي تنادي
يا غالي وحاتك ما عادي

الشوق الفي كل لحظة بزيد
موعدنا الما بحتاج تأكيد
مشوارنا الما شايفنو بعيد
وتقول أصحاب ؟
؟!!
بس تعرف شي..
لو فتك ما بلقاك تاني..
هو في زيك في العالم بالله؟!
ولا دايرة أفوتك شان القاك..
دي الثانية بلاك سنتييين والله
دايراك في حياتي تكون موجود..
صاحب أو جار أو معرفة ساي

بتقول أصحاب ؟!
خير وبركتين
أصجاب أصحاب
بطلنا نريد

☕ #غدير_شيخنا 🍃


https://m.youtube.com/watch?v=ADOp7vLODfM&feature=youtu.be