أهو ده العيد هسه علي الابواب ..
وأنا بيني و بينك ألف حجاب

أنا بيني و بينك سكة شوق ..
ومنافي مَحنّة و هم وغياب

أهو ده العيد هسه على الأبواب

و الناس فرحانة و بتغني ..
علشان العيد لمّة أحباب

بتخيل جيتك في كل عيد

أعياد بتمر وأنا مستني
وأتخيل صورتك جمب الباب
رسل لي مرة وطمني
رسل مع فجر العيد جوّاب

أهو ده العيد هسه علي الأبواب ..
و أنا بيني و بينك ألف حجاب

أنا بيني و بينك سكة شوق ..
ومنافي محنة و هم وغياب

العيد متردد يا غالي ..
خايف من يجي و يلقاك مافيش

خايف ما يلاقي فرح أطفال
لا يلاقي عيون بتغني جمال

ما يلاقي عروس تديو شبال
بيسألني عليك العيد و بقول

وين البي شوفتو الفرحة تعيش؟

أهو ده العيد هسه علي الابواب ..
و انا بيني و بينك ألف حجاب

أنا بيني و بينك سكة شوق ..
و منافي محنة و هم وغياب

#محمود_الجيلي

العيد بدون شوفتك
عيد غايتو عادي شديد
مافيهو غير الشوق
واللهفة والتنهيد
عيد شايفة في الشفع
في ضحكة من امي
شايلنو في الشالات
في طيبة الخالات
شايفاهو في الحالات
تصميم في بروفايلات
لكن بدون عينيك
مافيهو اي جديد
بس برضو يا احباب
عيدكم بخيت وسعيد

كل سنة وانتو طيبين

☕ #ماجدولين_سعد 🎉

ياسلاااااام على عيد بلادي
الجلاليب الكتيرة
صوت منادي :
عيد مبارك ...
والسلام الفي الأيادي
يا تبارك ...
وصوت طلق شفع تصنن
وحالتي يامريود تحنن
كل لحظة أشب وأتاوق
شوووووق يجنن

والوطن حبه ويروق
طول ما ليل الهم بهضلم
يعني بكرة شروق شروق
نحنا شاربين الحناضل
صفو دم كل الغلابه
والفضل يا يبقى سافر
أو يسافر
ومافضل في الصحبة فاضل
وما إنكسرنا
ما إنكسرنا
ولسه متماسكين نناضل

كل عام والجميع بالخير
والقابله في براحات وطن زي مانحب ح يكون
خالي من الحروب
#ايمان_متوكل

مع إنو الدنيا قبايل عيد
التخا شرا
والنيل بخر
والشمس إنقلبت لي برا
وبكينا قصيد
والناس مشغولة بخرفانه
والبلد التنضم خرفانه
انا دايره شهيد
انا دايره شهيد
انا دايره شهيد
واضان الخوف عملت طرشه
ومع إنو الدنيا قبايل عيد
انا لابسه حداد
على دم اخوانا الراح ساهي
والتار البيش
ح نعيش
ميتين
والدين
في رقاب الحكام شين
والشين
لمتين
خايفين
ساكتين
نحنا الكفار الخرابين
وهم اهل الدين
المعصومين
وحق البنزين
حق الغلبان
حق الورنيش
حق كيس العيش
حق الشحاد
حق عمو حسين سيد الكارو
حق السافر وقطع اخبارو
حق المويه
حق وفويه
...
حق وفويه !!!

وبي بركة دعانا ودعوة الحجاج ,,
للميت شهادة
وللمعتقل إفراج ,,
للظالم إبادة
الطاغية الحجاج ,,
وحقوق الوطن تمرق لغاية الضفه ,,,
أولاد الرجال إيدم توازي الكفه ,,,
والخيل الأصيل بظهر ويبان في اللفه ,,,
وانا افرح واشوف للعيد طعم يا داب ,,
والتخا ينبهل فوق للرسين كبآب ,,
والشمس التبق ضي الغنا الرباب ,,
ويادابك أهني العيد على الأصحاب ,,

#ايمان_متوكل

جات تهنيني و تشارك
شايلة طيب بعض الازاهر
وكل أسلحة المعارك
مدت إيد مليانة ريدة
وفتحت كل المدارك
انتي ياخ عيدي البعيشو
ياتو يوم العيد ببارك؟

#ودمسيخ

لمه فرحه بين اخواني
عندي العيد بكون عيدين
ابارك للبعيد والداني
حنينه هي دعوة الوالدين

حس اطفال فرح في الحي
صباح العيد تزيل البي
تهانيك من اهل واصحاب
اماني توصلك للباب
كل سنه و انتو طيبين
عموم ناسي البعاد وقراب
و عقبال من العايدين

#عاطف_شمبات

وانا كل ما اقول الجية متين ؟

بتقول لي بجيك في العيد

وبلم في صرة توب الريدة عقاب صبري

وبقول ليك

خيييييييير

...للحول ما بعيد

ونصهنج من الشوق ونصن

وتمر ايام وشهور واعوام ...والنار بتزيد

والهم بيزيد

وظروف ما بتدي حريف ....

ودموع تتجارى وﻻ بتقيف

....وما بجيب الفرحة عناد ام ايد

اها كل عام يا غالي وات الخير

كل عام وعيونك لسة بخير

كل عام وظروفنا اخير...يا الغالي وانت

#نهي_الكباشي

يا ابوي:-
جانا عيد من دون وعودك
وامنياتك وطلتك
منظرك والهيبة حالك
نور مُحيَّاك قدلتك
ونحن نتشابي وننطط
لي قروش عيدية منك
قُبلة نتسابق عليها
وكل أمان الدنيا حضنك
تعدل العمة وتباشر
كل زول بي بسمتك
وديمة ديوانك معبى
ومابتفتر همتك

#ريم_الرفاعي

و جن أعياد ..
و انحن بعاد..
غلبنا نعود..
فقدنا بلاد ..

نبارك العيد ..
نعظم لي شعيرةَ الله
سعيدين بي شهرنا الفات..
عظيم مقبول برَكةَ الله ..
الكريم و أجواد

و جن أعياد..
و لسع يا بلدنا بعاد..
متين راح يرجع الميعاد ..
نعيّد في ربى الخرطوم ..
و نتقالد..
نحوم و نحوم ..
خطاوي اللهفة سابقانا..
قبيل شوقنا الحمانا النوم ..
نزور احبابنا و الأصحاب
و أهلنا الفي بلدنا عموم..
و نغشى النيل
دموعنا تسيل و تمرق من قلبنا هموم…
و نسمع موجو يوم ما يشوفنا زي بيقول ..
أخيرا عاد .. أخيرا عاد.. أخيرا عاد

و جن أعياد
و لسع يا قلب موعود..
عقب ترجع ..
تسلم لي تراب الواطة تتمردغ..
تشيل الزاد

كل عام و أنتم بخير
ينعاد عليكم و أنتم على أحسن حال، و محقَّقي الأمنيات

#مجاهد_كاروري

يا ربييييت

لو الفرح بتباع
انا كان مليت الكون
ومسحت كل أسية
وقشيت دموع محزون
وزعت للناس عيد
حمام / غصن زيتون
لي كل زول بسمة
واديتها كمييين لون

ربنا يتقبل الصيام والقيام ويجعل العيد سعيد

اللهم خفف احزاننا جميعا واجعل لنا من الفرح نصيب

#عاطف_شمبات

الظروف الجات بتمشي
والجروح الفينا بتزول
العشم في الناس مذلة
والله ما يحوجنا لي زول

الله ما يحوجنا ليهو
الفي العذاب ما بحس بيكا
ويفهمك من قبل ما تقول
وتشرح الحال العليكا
السند في الدنيا دائما
تبقى ليهو ويبقى ليكا
الله ما يحوجنا لي زول
يكسر الروح ويشتكيكا

الكلام القالوا لينا
والوعود البخلفوها
والمحبة الصادقة ظاهرة
ولسه هم ما بعرفوها
وقبل ما أحلامنا تبدأ
بالقساوة بينسفوها
والدموع القالوا بتسيل
هسه بالهم نشفوها

الله ما يحوجنا لي زول
بالعشم يكوينا جمرو
كان بيزيد آلامنا ويمشي
وعمرو ما فرحنا عمرو
الله عالم وحاسي بينا
ويسرو مربوط جوه عسرو
نحن رافعين الأيادي
وديمة بنسلم لأمرو

#محمود_الجيلي

لولا النزوحُ وأنَّ حربًا قائمةْ
ومدائنٌ مُحتلّةٌ ومقاوِمةْ

أقرأتُ عينيك القصائدَ كلَّها
تفعيلةً حُرًّا وأبحرَ سالمةْ

عيناك ،من بين الرَّصاصِ، حمائمٌ بيضاءُ تجتاحُ الجيوشَ القاتِمةْ

وتعيدُ ترسيمَ الحدودِ فعاشقٌ
في حِضنِ عاشقةٍ يعدُّ هزائمهْ

#محمد_عبدالواحد

ايا رب التردد و الوضوحِ

أريد تدفئة الكلامِ بجملة
من بعدها
الأيام تتركني لحالي
والطريق يقودني عكس اتجاه الشكِّ
و الأحزان تحدث مرةً
و يجف بابي من فضول الأسئلة

و أريد أن يجد الأجابة من يرى وجهي.
و أن يضع انتباهي في يديه الثلج.
أن يقف انفعالي مرة
قبل اختبار الضغط في دمِي المعكّرِ.
أن يعود الصمت للتعبير عن غضبي بهذي المرحلة

أيا ربي
أصِبني بالبرود
بدهشةٍ لا تفضحُ الطفل الذي خبأتُهُ بملامحي
بأقل ما أنزلته في الكون من حظ التعلق
بالتفاصيل الصغيرة
والخطى
و البهدلة

#محمد_عبدالقادر

اهدأ قليلاً
فالحديثُ قد انقضى
والعينُ ما زالت تحنُ لكي ترى
أثراً قديماً للحقيقةِ
ربما سيكونُ هذا ممكناً
أو ربما قد لا يكون
اهدأ كثيراً عند مرحلةِ السكون
الحزنُ يجتاحُ القلوبَ بغفلةٍ
والوقتُ في صمتٍ يخون
الظلُ أصبح فارغاً
الظلُ أصبح فارعاً
يتسلقُ الحيطانَ خشيةَ لهفةٍ
فالصيفُ يلتهمُ الوجوهَ
بنظرةٍ مثل المنون
أهدأ قليلاً
فالرياحُ تثاقلت
بالكادِ تحملُ غيمةً
ولربما يأتي المطر
انظر بعينِ الصدقِ
للأرضِ التي حملت
بداخلِها أناساً طيبين
الخوفُ لا يأتي رفيقاً للخطر
والموتُ يجلسُ بيننا في هيبةٍ
يمضي يرافقهُ القدر
اهدأ كثيراً
فالزمانُ قد استعر
فالحبُ للمبعوثِ صدقاً
للنفوسِ الطيبة
والقلبُ بالذاتِ العليةِ عامرٌ
والعشقُ نورُ الحقِ
مشكاةُ البصيرةِ والبصر

#ماجدولين_سعد

وبعد تلاتة سنين حِرب
ان شاء الله يا بلد الحبيب
لا تضوق دمار لا تنكرِب
ان شاء الله من بعد الحصل
يحصل سلام يملا الغرب
تطير طيورك في امان
تطير تغني سِرب سٍرب
لا يفجعها الصوت الغتيت
لا تشوف جناها سِهى وضِرب
ان شاء الله نيلنا يلمنا
يسقينا تاني يضمنا
لا نلقى زول قال ما شِرب
نسهر عشان نبيهو صاح
نسقيو محنة دِرب دِرب
نمشيهو صاح وخُطى نُصاح
ان شاء الله ما نخطى الدَرب
#عاطف_شمبات

عازماني عيونك و ليك بكتب.. غرويدة و ريدة و شاي مغرب
يا طعم السكر و لون الشاي

عازمني عيونك و نسة حب
و كلام من قلبك يخش القلب
أنا عايز أكون أقرب و أقرب
يا سر الريد الفات و الجاي
.
عازماني عيونك و ليك بكتب.. غرويدة و ريدة و شاي مغرب
يا طعم السكر و لون الشاي

عازماني عيونك ونسة دقاق
و كلام اللهفة الفي الأشواق
و السيرة البتخلي العشاق
في النص لا لامين جاي لا جاي

عازماني عيونك و ليك بكتب.. غرويدة و ريدة و شاي مغرب
يا طعم السكر و لون الشاي

عينيك الشايلة عصا موسى
ساحرني و حارسة و محروسة
عازماني محنة و بسبوسة
يا سر الفرحة المالية غناي

عازماني عيونك و ليك بكتب.. غرويدة و ريدة و شاي مغرب
يا طعم السكر و لون الشاي

#محمود_الجيلي