ورا شهرين  أجو أثنين ملثمين بالليل
ضربوني عله راسي بالمسدس
ماوعيت أله أني بمكان مظلم
گوه أجر ألنفس منه
وما أعرف الليل من النهار
مادري شگد مر وقت عليه وأني بالمكان
لأن ماكو أي شمس
صيحت دفرت بالباب ماكو ولابشر
بالي كله چان يمج ويم أمچ
شسوو بيچن،

وراها دخلو عليه
سامر وسَعد
وبيدهم فانوس
تگابلو عليه أثنينهم قبل ما أحچي كلمه
كسروني تكسر

وحطو رگبتي ونحروني

رفع راسه وأشر عل جرح

هناا نحروني

كل وجعي هين گدام شوفتي ألهم
وهما متگابلين عليه ثنينهم

سَعد عتبي عَلي أكثر
أخوي من أمي وأبوي
بالله ذاك نگول من غير أم وماراضعين سوا
بس هذا
،،اااخ
تنهد وكمل كلامه،

خلوني أمدد وطلعوا

وراها دخل واحد عليه
أنطاني خبز ومي

ومشى،
جنت كلش تعبان
والجوع موتني

أكلت،

أستمريت

كُل فتره يجون يعلگوني فلقه
ويضربوني لحد ما يملون ويعوفوني ويروحون

أكلي باليوم كله خبزا وماي
ولا أشوف شمس ولا أسبح
وحاجتي بنفس المكان،
جسمي طگع وطلع بيه گمل وجرب

أنواع العذاب شفت
وكل هذا وابالي يمج ويم أمج.

نزلت عله رجله وبستها بس يجيبكم أشوفكم
وكل ما أسأله يگول بخير عايشين من خيري

گامو مايجون
كم شهر أجو وبعدها ماشفتهم
ومن اسأل الحارس اليجيبلي الماي والخبز
ماايحجي ولاحرف.

المكان جان هدوء كَلش
وريحته مقرفه بشكل

العذاب الشافته عيني
ماضن أحد يحمله

20 سنه أني بسرداب جوا الگاع
ومن منو ؟
من أخوتي
وعلمود شنو ؟
علمود فلوس

عيوني راحن من البواجي
جنت أصلي
بس ما اعرف الوقت شنو
وماجنت اتوضه
وجنت دائما عله نگاسه
بس رب العالمين يعرف حالي
ولو غيري جان هسه ماضل عَقل براسه
سنين ماشايف شمس
ومادريت بروحي أعمى
شگد أصلي وأدعي لهذا أليوم
بس تمنيت أشوفج
تمنيت أشوف أمچ
لاتعتبين عليه بابا، والله ماجان بيدي

ملار
حطيت راسي بين رجليه وأجهش بالبكاء
شنو سوو بينه ذوله
ألي محسوبين علينه أهل

باوعت لأمي ألي تبجي

وكملت - بالليلة ألي أخذوا أبوچ
سحلوني أني وأمي وذبونه بالشارع وأخذوج
حتى لا أطالبهم بحقج
وأخذوا البيت الي جنتي بي والمحل
وجنت كل فترى أروحلهم
وأتوسل لحد مايطردوني طرد
يجروني من شعري
أخر مره رحت
جابج عمج سعد وجان عمرج 6 أشهور
وحطج گدامي وحط سجينه عله رگبتج
وگال أذا ماتروحين منا هسه أنحرها

ضليت أتوسل بي
وجر السجينه شويه عله نحرج
طلع دم وأني تخبلت
نزلت عله رجله
وگتله ماشيه وبعد ما أرجع والله

گعدنه بخرابه أني وأمي
وأجمع غواطي من الزباله وأبيع
وگوه دبرت وضعي،

مرت السنين وأني ألوب عليج وعله أبوچ
الي ما أعرف گاعه من سما

گلت أكيد هسه كبرت
وجنت أروح أباوعلج من أبعيد

بس مره لگاني سعد
وسحلني سحل وحلف أذا يشوفني راح يذبحج

ومن أهدها مارحت بعد
وجان بوقتها عمرج 3 سنوات تلعبين بالشارع وشفتج

ومن 17  سنه مااشافتج عيني
مو جفه مني والله يما مو بيدي جنت خايفه عليج

ومن عرفت سعد مات
رحت لأهله وگلبت الدنيا عليهم صياح وبواجي
وجنت أروح المياده
ماجنت أعرف مياده رجعت لبغداد
عبالي بالنجف
ولو أدري بيها هنا چان رحتلها من ألبدايه
لأن محد يساعدني غيرها

وأنصدمة بيه
عبالها اني جنت صدگ ذابتج
گالتلي بنتج هجة من ضيم مزاهر
عاتبتها ليش ماخلتج يمها
بس گالت مو بيدي والله

وعذرتها
لأن مزاهر وسعد طغوا ومحد يگدرلهم

بس گلبي ما ارتاح
وكل فترى أروح واتوسل بيهم يدوروچ

وچان أوس متعيني علي
معلگ أصورج بكل العمدان وبكل مكان

وهذا الضيم السده عله أمچ
يبعد أمچ وعمرها
والله ماذبيتج والله گلبي چان يلوب عليج
لاتشوفيني هيج عبالج جبيره الضيم كبرني ترا

عمري 36 بس اليشوفني چني أكبر مني أمي

ملار،
باوعت بوجوهم حيل متعوبه
أبويه جنه هيكل عضمي
وأمي صدگ اليباوعلها يشوفها أكبر من أمها
رتميت بحضن أمي وابچي،

حجت أمي وهيا تحضني - گليلي يما وين جنتي ؟

ماحجيت شي
وبس أريد أشبع من حضنها،

حجه أوس - جانت گاعده أبيت حجيه عدها 3 بنات

تمسح عله راسي بحنيه وتحجي - أوووف الغريب أحن من ابن امك وأبوك.

محمد - بويه أمل خو ما جانو يعذبوج ؟

باوعت لأوس بقهر.
اااخ لو تدري بويه شسوو بحالي

أوس هز راسه بلا
لاتحجين شي،

- بويه بس جانت تذب الشغل كُله عَليه

- جا شلون شردتي بويه ماتخافين الشارع كُلشي بي

- بويه رحت يم هاي المريه أعرفها
وهيا ضمتني يمها

- الله يوفقها أن شاءالله

أوس - هسه خالي شنو شوكت نروح ؟

- لابعد خالك غداك هنا

- لاخالو غدانه هناك جاهز

باوعتله وضيقت عيوني
بمعنى منو طابخه

بتسم وفهم قصدي
بس محجه،

گام - يالله خاله گومي لمي أغراضج

أمي بقت محتاره ماتعرف شنو تسوي،

حجه أبويه - خالي والله ماريد ..

قاطعه - لاتكلف ولاشي خالي أبوس ايدك لاتعاملني هيج جني غريب عنكم أني أبنكم مو واحد غريب حتى هيج مستحين مني وتتشكرون وتتعذرون
هسه گومي خاله لمي أغراض خالي وأغراضج واغراض الحجيه وخلي نتوكل

گامت أمي راحت للغرفه تلم الأغراض
وأني حاضنه چف أبويه
شگد شايله حنيه،
وأيده الثانيه يمسح عَله راسي بيها،

أبوس بأيده وأشمها،
وين جنت عايشه أني
هيج عشت كل عمري مفتقده هاي الحنيه

اوف الله لايرحمكم عساكم بنار تجوي جلودكم جوي مثل ما جويتوا گلوبنه،

لمت أمي أغراض أبويه وأغراضها وأغراض بيبي
وأخذنه أوس بالسياره ورجعنه للبيت،

شنو من فرحه چانت بداخلي
ماتنوصف
هسه حسيت بطعم الحيا

عمري كُله ماتوقعت يجي ليوم ألي أنجع بأمي وأبويه
صح متعوبين وبالگوه يحجون ويمشون
بس حنيتهم ترفه

دخلنه للبيت، وأوس ورانه ينزل بالأغراض
تلگتهم شجن
سلمت عليهم

سلموا عليها برحابة صدر
ولا كأنو أمها مسويه بيهم العمايل
طبعاً هذا كُله ألي صار بأهلي چان تخطيط منها
وخالو سعد چان يمشي بشورها

باوعت عَل طباخ لجدوره منصبه
والمعرض مليان سلات فواكه
وزلاطه وطرشي وحلويات

لويت شفتي،

جنت لازمه بيبي وساندتها أمشي بيها،
واسمعها دعي ألشَجن

والله يبيبي هاي حيه رگطعه
مال واحد يدعي عليها مو ألها

گعدتها بالصاله
وبابا تدف بي أمي

شجن - شلونك خالو

- الحمدالله زين بعد خالچ أنتِ شلونج ؟

- الحمدالله تحت رحمة الباري

ملار
شالچ الباري كون

- شلونج خاله ؟

- الحمدالله بنيتي بخير

دخل أوس بيده علاليگ الملابس،

- الغَده جاهز ؟

شجن - أي

- صبي بين ما نصلي

- صار

وگلبت بوزها أو ولت تصب الغده،

گمت ورا أوس،
وهوا دخل للغرفه دخل العلاليگ

- شلون تخليها تطبخ ؟
تدري بيه ما أكل من ايدها

- منو گال هيا طابخه ؟

- لعد منو أمي ؟!

- تدري بيه ولك ما أحب أسوي شي يضوجك
دزيت عَله مره هنا جوارينه طباخه وخليتها تطبخ وانبهت شجن ماتمد أيدها بشي فقط تكون وياها ودليها عَله كُلشي

- أكيد ؟

رفع تك حاجب - شتدرين بيه أچذب ؟

- لا حشاك

گرصني من خشمي وكال - روحي يم أهلج عوفي شجعونه معليج بيها

- اي طبعاً متقبل عليها وجه الخ&&&

- حبيبتي روحي يم أهلج مشايفتهم صارلج سنين ،هسه عيب يگولون شعدهم وحدهم بالغرفه
وغير هيج أريد أحچي ويا أهلج أليوم عَله موضوع ألزواج مالتنه

- ومنو گلك أني أرضه بيك ؟

- ليش عندج غيري أبالج

- ليش هوا أنتَ أبالي أصلاً ؟

بتسم بغرور - أعرف مو بالج بگلبچ أني

ضحكت - صح عفيه عليك

طلعت من الغرفه
والضحكه ماليه وجهي
واحس گلبي يرفرف فوگ الغيم،

طلعت بوجهي شجعونه

- أوس وين ؟

رفعت تك حاجب - شلچ بي ؟

- ألمره تريد فلوسها

- روحي أني أگله

- مو أريد أتفاهم ويا عَل سعر لأنو هيا مطبخت شي أكثر شي صار عَليه

- روحي أني أحاجي،

خلت ومشت،
وأني روحي طلعت من عرفت هيا ألي طبخت أكثر شي
رجعت لاوس
ستوا طلع من باب ألغرفه

- ها ها شبيج چنچ ثور هايچ ؟

- غده ماتغده من هذا الطبخ تروح تجيبلي لفات صخام حتلو نعول بس أكل من أيد هاي الجربه ما أكل فهمتتتتتتتت

- ششش لاصيحين، وأني مو گتلج جبت طباخه ؟

- أي ستوها أجت أم عيون مبگگه تگول "تقلد صوتها" والله اكثر شي أني طبخت
أتافهم ويا أوس عَل سعر
أم الگلگ عساس طبخها شلونه ال* بت * انعل *

- أني أروح وأتفاهم وياها،
بس بطلي فشار خوش

عافني ومشى،

وأني رحت لأاهلي
طالعين بالحوش يتوضون وگاعديلهم بفي،

شفت منضهرم شگد حلو،
رغم تعبهم بس متاركين الصلا
وأني بحيلي وماا راكعه عل تربا عُمري كُله

گعدت يمهم
ماما حچت
- ها حبيبتي توضيتي ؟

ضليت ساكته وماعرف شگللها

- ماما توضيتي ؟

- لا ماما

- أي لعد هاج ألبريگ توضي

ضليت ساكته،
أني محجيت لأوس أنُ أني ما أصلي
عله ألرغم.هوا أكثر من مره سألني
وچان يگعدني الصلاة الصبح
بس أرجع أنام وما أصليها،

أحس ذنوبي هواي
وأضحك عَله نفسي أذا صليت
ماكو أي فائده

فزيت عله كلام أمي وهيا تهمسلي - شنو حبيبتي جايتج الشهريه

ضليت مفهيا بوجها
وهزيتلها راسي بأي حتى لتگلي صلي ،

بتسمت - فدوه لبنيتي الكبرت

بتسمت بوجها،

أخذت أبويه ودخلت
وأني رحت سندت بيبتي

صلو كُلهم بالصاله
وأني اتفرج عليهم،

حسيت بجتف وراي
لتفتت أوس،
همسلي - ليش متروحين تصلين ؟

- شعليك بيه ؟

- ساعاتج مو سوى ولج ملار
ساعه شحلاتج وساعه أسم على مسما

- بكيفي

- كيفج مايمشي عندي
صح أحبج بس لازم تحترمين قراراتي وكلمتي تمشي فوگ راسج هذا المدعبل
وحجايتي ماتصير أثنين وصوتج ما يعلى عليه

لويت شفتي - لابشرفك ؟

- اي وشرفي،

- روح منا لاا أخلي شرفك.طشار هسه

گرصني من متني

- اااحح ولك

- شتفقنه ؟ تحترميني بالطيب أو بالغصب

گرصته مجانت توجع
بس جنت حيل ضايجه ، عله فرحانه
بحيث
گبل بجيت،

هوا من شافني بجيت
دفعني للغرفه عله يسارنه
اهلي جانو منطيني أضهورهم ف محد يشوفنه

- شبيج ملار دا اشاقه وياج والله

- وخر عنييي اوس

- ششش لايسمعوج، وگليلي ليش هيج بجيتي، ترا ما أذيتج والله دا أشاقه

- أوس أني تعبانه عوفني مالي خلگ روحي

- أبيعنّ عُمري كِله وأشتري لعُمرج فرَح

بجيت بالزايد،

- ملاار حاجيني شنو المأذيج ؟

- غصة بداخلي احسها راح تبلعني.

- شنو المضوجج مو أهلج هل رجعولج وصحتج بلشت ترجع ؟

- كُلي على بعضي غلط مدا أعرف اصلح نفسي

- أني وياچ ما أعوفچ وشويه شويه نصلح كُلشي
بس عيونج ما أريدهن يبجن ملار دموعج تأذيني

سحبت نفس أحاول اتماسك
بس كلامه يخليني أبچي بالزايد

- كافي أترجاج كافي ملار لاتعذبيني
جاي أگلج ما أگدر أتحمل دموعج

نترت بي - سننننين وأني أبچي وشفت الظيم وينك عنيييي

باوعلي مستغرب - ملاار شهل كلام ؟

دفعته - وخر عنييي لتسويلي هاي السوالف مال الحب عساس أنتَ مهتم بيه
لو مهتم مجان رحت وتزوجت

صك عَله سنونه وحچه - فهمتج عَله كُلشي بعد ليُش هل حَچي

عفته وطلعت من ألغرفه،
رحت للمطبخ
شفت شجن تحضر بالماعين،
تمنيت احط راسها بالجدر واسويها باجة مال صخول

رحت غسلت وجهي
ومشيت گعدت يم أهلي،
بهدوى،

حجت أمي - شبيج ماما شو ضايجه ؟

باوعتلها ونترت بيها - عساااس يهمكم لو يهمكم مااعفتوني كُل هاي السنين وهسه جايين تهتمون بيه
عبالكم بكُل بساطه راح أتقبلكمممم

عفتها قبل لاتحجي شي
ورحت لغرفتي،
شمرت نفسي عل چربايه وضليت أبجي،
ماعرف شبيه وشنو هل تناقض
أني أريدهم
وفرحانه بوجودهم
بس خاايفه
أني ملارررررر
تعرفون شنو ملااار
يعني أني ممقسومتلي الفرحه
من نعومة أضافري وأني معلعله
تالي وكت أرتاح ؟
مستحيل أدوملي فرحه

ندگ الباب بخفه
ودخل قبل لا أذنله بالدخول،

وأني مستمره بالبجي،

عَرفته من خطواته الهادئه

گعد عله طرف الچربايه،
وبس ضربت رجله أسمعها،

- أطلع برا

- شنو سبب هل تناقض ؟

- ماحبكُم

- بس أحنه نحبج

- كذاابين لو تحبوني معفتوووني

- كلمن مر بضروف وكلنه سمعتي ضروفنه

- محد مر بالمريت بي

- سجن جوا الگاع
ونعمة عيونه
ونحر برگبته
20 سنه مشايف الشمس ولا سابح ولا ماكل غير الخبز والمي
ونغدر من أخوانه
تشوفينه ضرف عادي ؟
تعرفين أبوج وين لگيته ؟
لو ما لحارس ألي چان علي
چان هسه أبوچ ميت
بس الحارس من مات سَعد
أجا وأنطاني خبر

لو مره تفقد رجلها وبتها وبيتها
وتتوسل ينطوها بتها وميقبلون ويهددوها أذا وصلت راح يقتلون بتها گبال عينها
وتنذل وتشتغل بمعامل الزبل

هم ضرف هين تشوفينه ؟

ما اقارنهم بضرفج لكن أيضاً ضروفهم چانت صعبه

- وأنتَ

- شنو الضل وماسويته حتى ألگاج ؟
فريت بغداد شبر شبر وما لگيتج
ذبيت افلوس عل مراكز لمن مليت وما لكولج أثر
أسهر الليالي واني ابچي
رجال وأبچي شبقيت للمره بعد ؟
تعرفين شنو يعني رجل عاجز ؟
أصعب شعور يحس بي لرجال
إنُ يشوف نفسه عاجز
أني جنت أشوف نفسي عاجز ناقص
گبال عيني ورحتي مني

ماا راح أگلج عشت أصعب منج
بس قدري ألي عشته
أيام ما أضوگ النوم والله
ولا الزاد
صرت أخرس حتى كلامي قليل
روحي خاويه ومالي خلگ أي بشر
تعرفين أني ماعندي ولا صديق
لا بالشغل ولا بالمنطقه
محد يعرفني أله قليل وهم علاقه سطحيه
كاره روحي
كاره العالم كُله
كل هذا لأنچ ماجنتي موجوده
ملار مكانج بگلبي مو مكان عادي
أنتِ مو شخص عادي بالنسبه أليه
أذا غاثج زواجي من شجن أطلگها والله
وهناك ادزها تعيش يم أمي

أريدچ
أريييدچ
قابل بيچ بكل حلوچ ومرچ
بس أفهميني

- ماا أستاهلك أوس عوفني شوفلك بنيه أني مو بنيه

- جاي أگلج قابل بيچ بكُل تفاصيلج
ألي صار مو بأرأدتج
ممكن غيري يشوفها قلة رجوله لو نقص
أقبل بوحده معتدين عليها
بس ماريد أصير أني والزمن عَليچ
أني جاي أحترگ من داخل
أموت ألف موته من أشوفج تتعذبين
عبالچ هينا عَليه ؟، ياخذون منچ أعز شي
ااخ ملار متعوب كُلش مو هينه عليه والله
رجال أني ألي كرامتي
بس الخاطرج أدوس عله كلشي

گومي كافي خطيه أمچ بقت تبجي هناك
وابوج مقهور
ليش هيج تاذيهم وهما سنين ينتظروچ

- أخاف أفقدهم أوس أخاااف

- الي چانو السبب راحو وصارو تحت التراب
هسه أجا وقت الفرج، بعد من شنو خايفه ؟

- ما أعرف

مد أيدها ولزم أيدي - گومي نطلع نگعد يم أهلج لأن كُلش ضايجين بسببچ

لزمت أيدا بقوا - أوس لتعوفني!

- وياچ للوحه
رفع أيدي وباسها،

وطلعنه سوا،

گعدت يم أمي وبست راسها وتعذرت منها
عل كلام ألي حجيته،
ورحت لأبويه هم بوست راسه وأيده

گعدنه وتغدينه سوا،
وجانت لمه شحلاتها،
وأني گاعدا بنص ماما وبابا
وأوكل بأبويه
وأضحك وأسولف ويا أمي
وأوس گبالي
بس يباوعلي ومبتسم

أول مره أعيش هيج شعور
شعور العائله
الأمان
الحنيه
الضحكه

نسيت خوفي
نسيت حزني
نسيت أيامي السود
كُلشي شمرته ورا ضهري

خلاص كافي لأزم أعيش
ألماضي صفحى واطويها من حياتي،

وأليوم أني اتبشر بأحلى خبر
من بعد 6 شهور أستمرار عل علاج
والأدويا
الاكياس نشالت من المبايض ورجعتلي الدوره
وراح أگدر أمارس حياتي طبيعيه مثل أي بنيه

رجع شعري طول،
وجهي صار صافي
بشرتي توحدت

گاعده بين أهلي  والمستحى واضح عله خدودي،
وجهي مجمر وگلبي طااير فوگ الغيم،

- ها خالو ؟

- خالي انتم مستوينها من زمان هههه

- هسه نتوكل على الله ونزوج ؟ توافق تنطيني بنتك ؟

- أذا بنتي موافقه بعد أني مالي علاقه،
ها بابا أمل شنو رأيچ ؟

تعودت عَله أسم أمل
وصرت أحبه
ولو ما أوس يصيحلي بأسم ملار جان غيرت لأسم
بي ما أگدر هم أحبه من شفاف أوس،

بتسمت - بكيفك بابا

هلهلت أمي وعمتي مياده ألي جانت موجوده طول الـ6 أشهر
فرحانه برجعت أخوها،

مياده وعيونها مغورگه دموع - والله صبرت ونلت يا أوس والله عوضك صبرك

أوس جان طاير من الفرحه وعيونه مانزلها عَني - بركة دعواتج يما

حچه أبو أوس - ألف مبروك وليدي

- يبارك بيك يابه يوم ألك

خزرته عمتي مياده - شنو ولك

ضحكنه كلنه،

حضنتني أمي وباست راسي - مبروك يروح أمچ

- الله يبارك بيج ماما

باوعت لأوس - حطها بعيونك يما داريها

- لاتوصين حريص خاله، أذا ماتشيلها عيوني أخليها بروحي وبين أضلوعي

باوعتله والدمعه بعيني
وعيني بعينه صارت،

سنين وأحنة متعذبين
وأخيراً رب العالمين جمعنه

البيت متلاٌ هلاهل ،
وفرحه شكبرها،
ماضنيت بيوم تغمرني هيج فرحه وهيج راحه

تنهدت وتذكرت ميامين الله يرحمها
حيل شتاقيتلها وتمنيتها يمي،
وأني أتذكر شلون تتنبئلي بالمستقبل
وجنها تعرف لكل بدايه حزينه نهايه سعيده
صح كلام الروايات والقصص
دائماً البدايات تكون مُأذيهَ والنهايات تكون مُرضيهَ
هذا مو كلام من عدنه أو جبنا من الكُتاب
لا بل هاي عدالة رب العالمين ولطفه بعباده

من ثاني يوم بلش أوس بالتحضيرات وجنه ممصدگ

قرر رجل عمتي مياده يبيع بيته ويسكن ويانه

وبابا وماما باعو ألبيت ألي رجعه ألهم أوس
وخلو بحسابهم،

عزمت الحجيه وبناتها،
الي زرتهم مره وحده من بعد ما طلعت من بيتهم فجئه
بشخصية.صخر الذكر
ورجعتلهم فجئه بشخصية ملار الأنثى،

فرحت الحجيه جانت شكبرها،
والبنات كذالك،

أخذت أمي وعمه مياده ورحنه للسوگ
شتريت كُلشي بنفسي
وشتريت دشداشه ألوان لأمي وخليتها تذب لأسود
وخليت الحفافه تحف وجهاا وحواجبها،

وعمه مياده هم رتبت نفسها،

خو أني طلعتهن كسر
بلايه حفافه ماحتاج لأنو عملية أليزر شالت كُل شعر وجهي،
أبوس روحي مممممُمُمُححح

رجعنه للبيت محملين أغراض
فتحلنه ألباب جعفوري،
صح أمه تطلع روحي منها وأخته ماطيقها
بس وجوده بالبيت كُلش حلو

وجنت جايبتله ملابس
شجن مجانت تطلع من غرفتها
قليل كُلش،

ماهتميت
وأصلاً چنت فرحانه لأن ما أشوفها
ما اريدها تنكد عليه فرحتي،

ماسوينه حنه،
بس ثاني يوم سوينه عرس
وهل أسبوع كُله ممنوع ألتقي بأوس
هذا قرار من عمه مياده وماما فرح

يگلولي خلي يشتاقلج
وتشتاقيله
ميدرون أحنه مگابلين بعض ونشتاق البعض،
ومن يجي يدخلني للغرفه ويغفلن الباب عليه
واوس أسمعه يداهرهن وهنا ميتات ضحك،

وأني اضحك ويا ضحكتهن
ومقهورا لأن ما أشوف أوس،

وصدُگ خطتهن چابت نتيجه،
ماشفته أله بالليلة ألعرس،

عالم هوسه ودگ وأغاني،
وأني روحي وبالي وتركيزي كُلها بيعيونه
وهوا لازم أيدي ويباوع بعيوني

- يصير أشِدچ لحضني وأتأمل عيونچ شويه ؟

بتسمت - أنتَ راح تبلعها لعيوني مو بس تتأملها

- ااخ شلون طالعه حلوه

- حبك الباين على وجهي ، محليني

- هيج ألحب يحلي ؟

- يخلي الواحد يجنن ههههههه

- أروح نذر الهاي الضحكه

- أوس كلامك أحسه يبوس گلبي

- مايصير أبوسچ أني بدل كلامي ؟

ضحكت - لا عيب

- وهاي رموشچ المَفروض كل ما تنرفع تنباس .

بتسمت بحب،

- حمامتي رديتي الضريحج

- انتَ يا أول ضريح ذنوبي تكثر من أطوفك.

ضحك بصوت خافت - شويه نگوم وأعلمچ الذنوب شلون تصير

بتسمت بخجل وحجيت - دور وجهك لتبقا هيج تباوعلي

- أحب أطبق عبارة "لاتغض البصر عن اشيائك الحلوه تأملها ."

- ليش اني شي تحبه ؟

- أشياء أنتِ مو شي واحد ،

- أحب سوالفك

- فَدوه ألچ روَحيَ وَ سوآلفها وحُزنها ،يا لبة گلبي أنتِ

- ساعات أحسك شاعر

- صرت شاعر بحبج مو بيدي هههه ياا شيخة گلبي

أذكرت شي - أوس

- عيونه وسنونه

- ههه ذكرت مره من زمان گتلي كلمه ومااعلمتني شنو معناها، گتلي "أنتِ گاعده بنص لأصمعان"

- يعني گاعده بگلبي ههه، لاصمعان مكان ذكي بالقلب وانتِ هيج گاعده بگلبي

أجت عمتي مياده

- عزا بعينكم فضحتونه
هسه نزفكو ودخلو أضحكو وسولفو براحتكم مو هيج گدام العالم

اوس - يما عليچ الله أطرديهم

- يماا صخام لصخمني تريد تفضحنى

- لو طردينهم لو تزفوني راح اتخبل

ضحكت - يبعد روحي شوف الفرحه شلون تاررستك ،صار والله هسه اخليهم يزفوك انعل ابو العالم

طفر باس راس أمه - كفوو

أجت ماما
- مبروك عليكم أن شاءالله

- الله يبارك بيج

دخلو بابا يسلم عليه،
جان كُلش فرحان،
بوسته وبوست أدي،

حجه - شوف ولك أوس مو تگول أبوها أعمى ومايگدرلي ترى أذا طخيت شعره منها احط جيله براسك

ضحك اوس - حطها بعيوني وعلي خالي أنتَ وياها وامها كولكم بعيوني

- بعد خالك دير بالك عليها ترا قطعه من گلبي هاي
نزلت دموعه،

حضنته وگمت أبجي،
وماما هم بجت

حجت عمه مياده - گولوا يالله شسالفه ترى كُلنه بنفس البيت مرايحين القاره ثانيه،

فرح - فرحانه يمياده هاي دموع فرح مو حزن ،سنين أحلم بشوفة بنيتي والحمدالله الله رزقني شوفتها وشفت هل يوم هذا ألي تتمنى كُل أم لبتها

- الحمدالله الله يتمملهم على خير يارب
وتشوفين جهالهم

- أمين،



يُتبع ....

هذا البارت لأخير من الجزء لأول 🦋.
أنتضرونه بالجزء الثاني،
بس مامعلوم يا وقت،

كلش أعتذر عن التأخير بس مجان الي واهس أكتب
وماحبيت أكتب بدون واهس وأخربها للقصه

اتمنى أذا أكو فد خطأ تنبهوني
أو أذا أكو فد شي ما ذكرته أو ذكرت معلومه خطأ

أني ممكن إرجع اصححه للبارت وأضيف علي تعديلات،
لأن مو كُلش مقتنعه ،بس لا بأس
لأن تأخرت عليكم هوايه عَذروني 🦋.

معنى أسم الروايه.
ذكرى أوس


أشباه لأبطال شويه وأنزلهم بين ما الگاهم 🦋.

شكراً لحبكم لهاي الروايه.
واتمنى تنطوني رايكم بيها بصدق

شنو تعلمتو منها ؟

حبيتوها ؟

شي محبيتو بيها ؟

معلومه ستفاديتو منها ؟



اليحب يتواصل وياي يدزلي رأيه أنشرا 🦋.
انستا
kri.v2




راح انقطع عَن الواتباد
وأكون متواجده بقناة التلي، گروب أني والبنات
نحجي عَن كولشي،

@lreema2




وهنا قناتي الثانيه الي انزل بيها روايات 🦋.

reemxix



  
             *مشهد*     ‏

گاعده ولازمه كتاب بين اديه، الي صارت جلد على عظم، اگلب بالكتاب بملل، مالي خلگ لشي،
اباوع بالفراغ،
رغم مساحة الغرفه الجبيره و لاثاث الفخم،
لكن كنما سجن، او يمكن لسجن ارحم منها،
تنهدت بحسره،
وگمت اباوع بالمرايه،
شكلي حيل متغير، وجهي ضعفان، عيوني حولها هالات سود، شعري الجان لحد افخاذي، صار فوگ اذني،

ندفع باب الغرفه بقوه،
دخل وعيونه تطاير شرار،

-شگايله لابوي ولججج

باوعت برود ،ومارديت
درت وجهي ومشيت تمددت عل جربايه،
شراح يسوي يعني أكثر من الي سوا

غمضت عيوني،
واني اتخيل شنو ممكن يسوي،

فتحت عيوني من حسيت اكو ثگل فوگ جسمي،
جان حاط 3 جگاير بين شفايفه، ستغربت شكله،
بثانيه ماحسيت اله وهوا شاگ ثوبي من الطول للطول،

حاولت اوخره وادفعه،
لكن جانت قوته امام قوتي لاشيء ،
،

يتبع .....

عمري،راح ابلش بيها ان شالله ،وكل وقت فراغ انزللكم ،
بس اهم شي اذا شفت تفاعل استمر،
🦋🤍

حسابي لانستگرام،

kri.v2

البارت ( لاول )

غرور انثى وشموخ رجل

#للكاتبه_ريـم_نايف

""""""""

"" اللهم صلِ على محمد وأل محمد ""

اسراء،
مجتمعين كُلنه عل سفره وضحكه وسالفه،
كُلش احب هاي الجمعه،
ودنسولف عن ايام قبل ونسترجع ذكرياتنا ويا بابا

اسراء بضحكه - تذكر لمن برو سوتها على ملابسك واحنى جنه طالعين بيت عمو سلام هههههه

براء بوزت - شنو شوكت

ضحك بابا - اي، دائماً جانت تخليني بمواقف محرجه هل برو

براء مسويه نفسها زعلانه - يعني متحبني صح ؟

جراها بابا لحضنه وباسها براسها - شلون ماحبج انتِ غير قطعه من گلبي

رفعت تك حاجب و باوعتلهم - اي عيني واني شنو ناطور خضره؟

ضحك بابا
وكل مايضحك كأنما نسمة هوى اداعب گلبي،
رغم الفقر والعوز ويتم لام لَـگِنْ بابا عوضنه عن كُلشي، وضحكته هيا اساس فرحتنه،

جرني من متني وحضني وباسني براسي،
- اميراتي وحبيباتي شعندي غيرجن اني
انتن كلشي الي بهاي الدنيا اللّـه لايحرمني منجن

بوسنه أدي اني وبراء،
وهوا ضل يباوعلنه وعيونه بيها دموع

سألته - لُيش هل حزن ؟

تنهد ومسح عيونه - احس نفسي مقصر وياجن وما موفرلجن كلشي

بتسمت - بابا وجودك كلش كافي،واحنى الحمدالله ممحتاجين شي

- حرمتجن من الدراسه والطلعه، بس والله من خوفي عليجن

ببتسامه رغم انُ هل اشياء بنفسنه من زمان
لكن وجوده لـبابا وخوفه علينه من الشارع والناس
صرنه نتغاضه عن هذا الأمر
- انتَ لو ما تحبنه وتخاف علينه مجان سويت هيج وعادي احنى تأقلمنه

براء - بابا حبيبي احنى نحبك لتحجي هيج والله ابد انتَ ممقصر ويانه بشي

بتسم وحضنه بقوه،
وبعدها نهض من مكانه - اني طالع ،باباتي محتاجات شي ؟

- لٱ حبيبي سلامتك، الله وياك
گلت هيج واني انهض ورا ،وانطي غترته المعلگه
بسمار بالحايط ،

خلاها على راسه وتشكرني،

وگف بالباب واني وراء،
وكل عاده، - سدي الباب زين ولاتفتحينه اله من احاجيج اني

- صار بابا

طلع، وغفلت الباب ورا

رجعت لبرو،
- ها يحلو شو ضايج ؟

- يعني بابا يعرف نفسه حارمنه من كُلشي لُيش هيج
مو هاي العالم دتخلي بناتها بالمدارس يعني معقوله كُلهن هسه منحرفات ؟

- بابا من خوفه علينه وحرصه، احنى بس بنات وماعدنه لٱ اخ يدير باله علينه بغياب بابا ولا عدنا أم من نوگع بفد مشكله نلجئلها او تگعد و تنصحنى وتحل مشكلتنه
والعالم الخارجي ترى يخوف،

- يعني انتِ بهذا عقلج ممكن تسوين فد غلط؟ ترى احنى نفتهم

- من كبرنا صرنا نفتهم لكن قبل ممكن ننخدع بأي شي

- ماعرف اني ما احس نفسي عايشه مثل بقية العالم، اني آحـب بابا بس احس نفسي مسجونه هنانا لا نطب لانطلع الى متى يعني؟

- كافي براء، الحمدالله مستورين وماعدنه شي

ضلت تتذمر مثل عادتها،
احياناً اوافقها الرأي، لكن من جانب اخر
اشوف بابا ويا حق ،لكن خوفه ممكن كان مبالغ بي
لدرجه يغفل الباب علينه بالليل لو نام ،
لكن اسلوبه وتعامله ويانا و حنيته خلتنا نتغاضا عن بعض لامور المزعجه النا ،

كانت براء مراهقه ،
واكبر احلامها انها ترتبط برجل يطلعها من هذا السجن حسب ماتسمي هيا،

مرت لأيام كـ عادتها هادئه،
عائله صغيره، يمليها حنان لأب
ألي معوضنا عن لأم الي فتقدناها باحد انفجارات بغداد
بعمر صغير،
كانت براء طفله صغيره، واني اذكر عمري كان 5 سنوات،
بابا هوا الي أهتم بينه، من لبس ومأكل ومشرب
لكن بالوقت الي كان يروح بي لواجبه بالحراسه المدرسيه
الي هوا من الساعه 4 العصر لحد ال7 بالليل
اخذت دور لأم، بعمر صغير
واجهت صعوبه بالبدايه لكن بعدها تعودت،
ربيتها على ايدي،
حالياً اني عمري 20، وهيا عمرها 16،
تشبه لبابا بشكل فضيع،
واني اشبه الماما الله يرحمها،
دائماً ألاحظ بابا يصفن بوجهي ويبتسم بحزن
وهوا يگول - تذكريني بأمج الله يرحمها بشكلج وكلامج، حتى بحنيتج على اختج

كُلش افرح انُ اني اشبها لماما،
هواي يسولفلي عنها وعن طيبتها،

،،،،،


باوعتله بغضب - انتَ شوكت تستعدل؟

ابرود - مااستعدل شعدك وياي ياخي خليني اتونس بشبابي جنك عيوز ماكول عشاها

- لاحول الله ،غسان كافي استعدل رحمه لدينك اذا باقي دين براسك ما ضلت وحده بالجامعه ما *

- هنا گح*** شسويلهن تجيني فاكا روحها شسوي اردها ؟ وخل اگلك شغله بالعباس ما اجتني وحده شريفه كلهن ملعوب بيهن

- وانتَ شنو مثلاً تقدم خدمات مجانيه ؟ للـ***

- يا مجانيه ترى ذاب عليهن كوما فلوس، بس الزرگه الجلحه ملحه ابلاش، شبيك جا اخلي بنفسهن ؟ حرام مايجوز

سكتت واني لعبانه نفسي،
كل عاده من احاجي مايسمع مني،
والمشكله ما أگدر اعوفه احبه، رغم الحجي الي اسمعه عني بسببه لأن اماشي، وكلها تعرف طينته شنو،
بس هوا لشخص الوحيد الواگف وياي بكل شده
وساندني بأصعب ايامي، ماكدر اعوفا وكلمن ذنبا على جنبه اني انصح بي شنو البيدي اسوي بعد ؟،

باوعتله - لادخن بالجامعه لٱ يلگفونك

- لٱ والله دافعلهم فلوس ومايخلوني ادخن؟
بعدين ترى الجگاره تجذب انظار البنات

- ميت على جنس حوا

- اقذر جنس

- لعد شكو كاتل روحك عليهن ؟

- هنا گح*** ورخاص شسويلهن واني آحـب اذل المره، ماتشوفهن من يصيرن بين ايديني شلون تضل تتلوه وتصيح، استمتع

- كافي غير الموضوع وذب الجگاره لٱ تسويلنه مشكله

ذب الجكاره وداس عليها برجله،
- ولايهمك ضرغومي حبيبي وهاي الجگاره اذبها بس لاضوج

باوعتله بطرف عيني، وسكتت،
هذا غسان وهذا طبعه شبيدي علي،


،،،،


مجتمعين على وجبة الغده

ابو جواد - وين جواد ؟

- بغرفته

- والى متى يضل هيج ياكل بغرفته ؟

بقلة حيله - شسويله ماتگلي

تنهد - لاحول الله

عسل - ميخالف بابا خلي يسوي اليعجيه لمهم يكون مرتاح

- يي لشوكت يا بنيتي،

- بعد هوا هيج شنسوي شبيدنا

- شنو رأيك نزوجا ؟ بلكت يتغير

- ومنو تقبل بي ؟ اروح اظلم بت الناس ؟ تقبلين تنطين بنتج الواحد مثل حالته ؟

- گول يالله ترى هوا مابي شي بس شوية مرض ،بلكت الله و تعالجه التاخذه

- انسي هاي السالفه ام جواد
وكافي سدوا الموضوع،

عسل،
كملنه اكل بدون منحجي
واني اشوف الحزن واضح على ماما وبابا،
واني كذالك گلبي يوجعني على حالة اخويه



يتبع ....


بارت خفيف ☺️
الدسومه جايتكم بالبارتات الجايه ان شالله

تابعوني عل انستا يحلوين 😉

kri.v2




وهنا عل تلي خاف يعطلون الواتباد 🥹😂

reemxix

يجي يوم ارجع اقوى من قبل 🫰

في القادم يُسرٌ يَسُر 🍃 💙

كلتها وارجع اكولها ❤️‍🩹

بنات

روايتي مال ملار

جاي تطلع يمي حد بارت 21

مادري ليش

جاي تطلع يمكم

شوفنها باله

لان اني اريد اطبعها 🥹

إنَّ الحُسَين "عليه السلام"
طريقًا يأخذ بِك الىٰ حيثُ
لا خَوفٌ عَليهِم ولا هُم يَحزنُونَ .

ريم نايف🤍🤍