31 avgust — Qatag‘on qurbonlarini yod etish kuni

JADIDCHA KO‘RGILIK

Atirgullar ochib og‘zini katta,
nomozshomgullar kuch
                             olmoqda shomdan,
o, oltin tuprog‘im,
seni deb hatto
quyosh ham
o‘zini tashladi tomdan.

Dildagi arzimas
ishq olovini
eplolmay
oldirib qo‘ydim alanga;
kir qilib boshimga qo‘ngan qirovni,
tog‘larning ko‘zini o‘ydi garanglar.

Jilmaydim
men Xudo haqqi-hurmati,
bo‘g‘zimda
tosh qotgan o‘krigim bilan
va ko‘zga ko‘ringan jonim suratin
o‘chirib tashladim
kiprigim bilan

va birdan
keltirib suvni elakda,
shamol erkaladi
bog‘u-bo‘stonni,
bahor
cho‘miltirib qo‘ydi:
chelaklab
boshidan suv quyib O‘zbekistonni.

Shuhrat Azizov